რუსულმა ძალებმა 6 აპრილის ღამეს უკრაინას საჰაერო, სახმელეთო და საზღვაო ბაზირების 23 რაკეტით და 109 უპილოტო საფრენი აპარატით შეუტია, – ინფორმაციას უკრაინული მედია ავრცელებს.

მათივე ინფორმაციით, 132 რაკეტასა და დრონს შორის იყო : Х-101/Х-55СМ ტიპის 9 ფრთოსანი რაკეტა, „კალიბრის“ ტიპის 8 ფრთოსანი რაკეტა, „ისკანდერ -მ“ ტიპის 6 ბალისიტკური რაკეტა, Shahed-ისა და სხვა ტიპის 109 დრონი.

უკრაინელებმა 53 საჰაერო სამიზნე ჩამოაგდეს, მათ შორის Х-101/Х-55СМ ტიპის 6 ფრთოსანი რაკეტა, „კალიბრის“ ტიპის 6 ფრთოსანი რაკეტა, „ისკანდერ -მ“ ტიპის 1 ბალისტიკური რაკეტა და Shahed-ის ტიპის 40 დრონი.

ჩამოგდება: 6 Kh-101/Kh-55SM საკრუიზო რაკეტა; 6 საკრუიზო რაკეტა “კალიბრი”; 1 ბალისტიკური რაკეტა ისკანდერ-მ; 40 შაჰედის ტიპის თავდასხმის უპილოტო საფრენი აპარატი. კიდევ 53 დრონი კი დაიკარგა.

თავდასხმის შედეგად დაზარალდა კიევის, სუმის, ხარკოვის, ხმელნიცკის, ჩერკასისა და ნიკოლაევის ოლქები.

რუსეთის ფედერაციის მიერ უკრაინაზე განხორციელებული მასიური სარაკეტო თავდასხმის გამო, პოლონეთმა ავიაცია გაააქტიურა და საჰაერო თავდაცვისა და სარადარო დაზვერვის სისტემები სრულ საბრძოლო მზადყოფნაში მოიყვანა, – ინფორმაციას უკრაინული მედია პოლონეთის შეიარაღებული ძალების ოპერატიულ სარდლობაზე დაყრდნობით ავრცელებს.

„რუსეთის ფედერაციის სტრატეგიული ავიაციის აქტიურ მოქმედებებთან დაკავშირებით, დაიწყო პოლონეთის და მოკავშირეთა ავიაციის ოპერაცია ჩვენს საჰაერო სივრცეში. არსებული პროცედურების შესაბამისად, მოიერიშეების მორიგი წყვილი ჰაერში განთავსდა, ხოლო სახმელეთო ბაზირების საჰაერო თავდაცვისა და სარადარო დაზვერვის სისტემები მაღალი დონის მზადყოფნაშია“, – აცხადებენ სარდლობაში.

მათივე ინფორმაციით, აკვირდებიან არსებულ ვითარებას და მათ დაქვემდებარებაში მყოფი ძალები და აქტივები სრულ მზადყოფნაში არიან დაუყოვნებლივი რეაგირებისთვის.

ცნობისთვის, რუსულმა ძალებმა დღეს დილით კიევზე ბალისტიკური სარაკეტო დარტყმა განახორციელა, რასაც ხანძარი მოჰყვა და სამი ადამიანი დაშავდა. რუსეთის სტრატეგიული ავიაციის აქტიურობის გამო, დღეს დილით უკრაინის თითქმის მთელ ტერიტორიაზე საჰაერო თავდასხმის მაუწყებელი განგაში გამოცხადდა.

გაერთიანებული სამეფოს პრემიერ-მინისტრის კირ სტარმერის განცხადებით, გააგრძელებს შეერთებულ შტატებთან ეკონომიკური შეთანხმების გაფორმების მცდელობას, რათა თავიდან აიცილოს აშშ-ის გარკვეული ტარიფები.

„მზად ვართ, გამოვიყენოთ ინდუსტრიული პოლიტიკა, რათა დავეხმაროთ ბრიტანულ ბიზნესს ქარიშხლისგან თავის შეფარებაში. ზოგიერთმა შეიძლება თავი უხერხულად იგრძნოს ამის გამო – იდეას, რომ სახელმწიფო პირდაპირ უნდა ჩაერიოს ბაზრის ფორმირებისთვის, ხშირად დასცინოდნენ, მაგრამ არ შეგვიძლია მივეჯაჭვოთ ძველ გრძნობებს, როდესაც სამყარო ასე სწრაფად იცვლება“, – წერს სტარმერი Sunday Telegraph-ში გამოქვეყნებულ სტატიაში.

მისი თქმით, სავაჭრო ომში გამარჯვებული არავინაა.

„სწორედ ამიტომ, ტარიფებზე, დაუყოვნებელი პრიორიტეტია სიმშვიდის შენარჩუნება და საუკეთესო შეთანხმებისთვის ბრძოლა. სავაჭრო ომში გამარჯვებული არავინაა. ეკონომიკური შედეგები, აქ და მთელ მსოფლიოში, შეიძლება იყოს ღრმა. ჩვენ უკვე გვაქვს დაბალანსებული სავაჭრო ურთიერთობა ჩვენს ამერიკელ მოკავშირეებთან და მუშაობა გრძელდება ახალი ეკონომიკური კეთილდღეობის შეთანხმებაზე“, – აცხადებს სტარმერი.

ამასთან, მისი თქმით, მიუხედავად ამისა, ყველა ვარიანტი მაგიდაზე რჩება.

„მხოლოდ მაშინ დავდებ შეთანხმებას, თუ ეს სწორი იქნება ბრიტანული ბიზნესისა და მშრომელი ხალხის უსაფრთხოებისთვის და გავაგრძელებ თავისუფალი და ღია ვაჭრობის დაცვას, რადგან ახლა ამისთვის ზურგის შექცევა სერიოზული შეცდომა იქნება“, – წერს სტარმერი.

შეგახსენებთ, დონალდ ტრამპის მიერ აშშ-ში იმპორტირებულ თითქმის ყველა საქონელზე დაწესებული საბაზისო 10%-იანი ტარიფები ძალაში გუშინ შევიდა.

როცა ერთი მხრივ ამბობ, რომ არანაირ არჩევნებს არ აღიარებ და არჩევნებში მონაწილეობას არ აპირებ, მაგრამ მეორე მხრივ, არჩევნების პროცედურებზე შენიშვნები გაქვს, ეს აჩვენებს, რომ ისინი კვლავ დაკავებულები არიან საკუთარი მხარდამჭერების მოტყუებით, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.

პარლამენტის თავმჯდომარის შეფასებით, ცესკო-ს გადაწყვეტილებები საუკეთესო საერთაშორისო სტანდარტებს ემყარება, რაც არაერთხელ დადასტურდა.

ამასთან, პაპუაშვილი ამბობს, რომ კვლავ მზადდება თავდასხმა არჩევნებსა და დემოკრატიაზე.

,,სინამდვილეში მათ ისევ საარჩევნო მარათონში ვიხილავთ, რაც ცუდია, რადგან ზოგადად, თუ არჩევნებში ექსტრემისტული პარტიები მონაწილეობას არ მიიღებენ, ეს უმჯობესი იქნება ჩვენი დემოკრატიისთვის. რაც შეეხება ცესკო-ს გადაწყვეტილებას, ის, რომ ეს ყალბი აჟიოტაჟი ატყდება ხოლმე უცხოური დაფინანსებით, ეს არაერთხელ დადასტურდა. ასევე, ის, რომ ცესკო-ს გადაწყვეტილებები საუკეთესო საერთაშორისო სტანდარტისაა, ესეც არაერთხელ დადასტურდა. ამიტომ, აქ პრობლემაა არა “ისფედში”, “გამჭვირვალობაში” და სხვა უცხოური გავლენის გამტარებელ ორგანიზაციაში, არამედ იმ დაფინანსებაში, რომელიც ფულს ხარჯავს ქართულ დემოკრატიაზე თავდასხმაში, თუმცა პასუხი უნდა ეძებონ დონორებში, თუ რა განზრახვებია ქართული დემოკრატიის მიმართ, როცა მათ მიერ დაქირავებულ ორგანიზაციებს ალაპარაკებენ, ეს ჩვენთვის სიგნალი უნდა იყოს, რომ ისევ მზადდება თავდასხმა არჩევნებსა და დემოკრატიაზე, რაც არაერთხელ მოხდა”, – განაცხადა შალვა პაპუაშვილმა.

შეგახსენებთ, ცესკოს დადგენილებით, არჩევნების დღეს, კენჭისყრის შენობაში ყოფნის უფლების მქონე პირებისთვის რიგი შეზღუდვები დაწესდა, მათ შორის, სიახლეა ის, რომ დამკვირვებლები კენჭისყრის შენობაში ამომრჩევლისთვის პირადობის დამადასტურებელი დოკუმენტის გამორთმევას ვერ შეძლებენ.

გარდა ამისა, იკრძალება ამომრჩევლის პირადობის დამადასტურებელი დოკუმენტის, ამომრჩეველთა ვერიფიკაციის აპარატზე გამოტანილი ამომრჩევლის მონაცემების, ამომრჩეველთა ვერიფიკაციის აპარატიდან ამობეჭდილი ამომრჩევლის ვერიფიკაციის დამადასტურებელი ქვითრისა და ამომრჩევლის მიერ საარჩევნო ბიულეტენზე გაკეთებული არჩევანის ფოტოვიდეოგადაღება ან სხვაგვარი დამუშავება.

კრივი-რიჰზე რუსეთის თავდასხმის შედეგად დაღუპულთა გამო უკრაინაში დღევანდელი დღე გლოვის დღედ არის გამოცხადებული. ინფორმაციას უკრაინული მედია ავრცელებს.

უკრაინის ვიცე-პრემიერმა რეკონსტრუქციის საკითხებში, თემებისა და ტერიტორიების განვითარების მინისტრმა ალექსეი კულებამ განაცხადა, რომ მსხვერპლებისა და მათი ოჯახების მიმართ სოლიდარობის ნიშნად, 6 აპრილი გლოვის დღედ გამოცხადდა და უკრაინის ქალაქებში კიევიდან ოდესამდე და კრამატორსკიდან უჟჰოროდამდე დროშები დაეშვება.

მინისტრის თქმით, ბალისტიკური რაკეტების თავდასხმისა და თვითმკვლელი ტერორისტების შედეგად 19 ადამიანი დაიღუპა და 74 დაშავდა.