რესპუბლიკელმა კონგრესმენმა, ჯო უილსონმა აშშ-ის სახელმწიფო დეპარტამენტის ავტორიზაციის აქტში „ქართული კოშმარის არაღიარების“ შესწორების წინადადება წარადგინა.

ამის შესახებ ინფორმაციას თავად ჯო უილსონი სოციალურ ქსელში ავრცელებს.

დოკუმენტში ნათქვამია, რომ შესწორება აშშ-ის მთავრობასა და მის ნებისმიერ ორგანოს „ქართული ოცნების“ მთავრობის აღიარებას უკრძალავს.

აღნიშნული წინადადება წარმომადგენელთა პალატამ უნდა განიხილოს.

„არცერთ ფედერალურ თანამდებობის პირს ან თანამშრომელს არ შეუძლია რაიმე ქმედების განხორციელება და არცერთი ფედერალური სახსრების გამოყოფა იმ მიზნით, რომ აღიაროს ან რაიმე ფორმით სხვაგვარად იგულისხმოს ამერიკის შეერთებული შტატების მიერ საქართველოში „ქართული ოცნების“ მეთაურობით მოქმედი მთავრობის აღიარება“, – ნათქვამია შესწორებაში.

ამერიკელი კონგრესმენი ჯო უილსონი საქართველოსთან დაკავშირებული „მეგობარი აქტის“ კანონპროექტის ავტორია, რომელიც ითვალისწინებს „სანქციების დაწესებას საქართველოს დემოკრატიისთვის ძირგამომთხრელ საქმიანობაში შემჩნეული პირებისთვის“.

ამასთან, როგორც დემოკრატმა კონგრესმენმა, სტივ კოენმა 11 სექტემბერს ჰელსინკის კომისიაში განაცხადა: „სამწუხაროა, რომ სენატმა არ მიიღო და არ მიიღებენ „მეგობარი აქტს“, რაღაც პრობლემები იყო და შესაძლოა, ეს დაკავშირებული იყოს ერთ კონკრეტულ დიდ ბიზნესთან, რომელიც პორტს უკავშირდება. „მეგობარი აქტის“ ჩაკვლა ერთმა ადამიანმა შეძლო“.

ნებისმიერი რადიკალური სცენარი, საუბარი მშვიდობიან ამბოხებაზე, ჩვენი პოლიტიკური პარტიისთვის აბსოლუტურად მიუღებელია, ამ პროცესში არ ვიქნებით არცერთი წუთით, სადაც ადგილი ექნება რადიკალიზაციას, დაპირისპირებას. ამას შეიძლება ძალიან მძიმე შედეგები მოჰყვეს ქვეყნისთვის, – ამის შესახებ „გახარია საქართველოსთვის“ ერთ-ერთმა ლიდერმა, ბერდია სიჭინავამ „პალიტრანიუსის“ ეთერში განაცხადა.

როგორც სიჭინავამ აღნიშნა, ამბოხის თარიღის გამოცხადება საკუთარი მოქალაქეების მიმართ უპასუხისმგებლობაა.

„26 ოქტომბრის შემდეგ ადამიანები ძალიან იმედგაცრუებულები არიან. ჩვენ აქედან უნდა გამოვიდეთ, ნიჰილიზმი უნდა დავამარცხოთ. როდესაც კონკრეტულ თარიღს ვსახავთ, 4 ოქტომბერს, როდესაც უნდა შედგეს ამბოხი, მე არ მინდა, რომ ადამიანები იმედგაცრუებულები იყვნენ. ამიტომ ასეთი ტიპის განცხადებები საკუთარი მოქალაქეების მიმართ უპასუხისმგებლობა მგონია, რასაც შეიძლება უზარმაზარი იმედგაცრუება მოჰყვეს, რომლის მართვაც შემდეგ ძალიან რთული იქნება. შემდეგ ამ პოლიტიკური პარტიების მხრიდან გადაბრალება არ იყოს, რომ თურმე ეს „ნაცმოძრაობა„ კი არ არის, „რუსთაველის გამზირია“, პაატა ბურჭულაძეა და ბოლოს დააბრალებენ ხალხს, რომელიც თურმე საკმარისი რაოდენობით არ გამოვიდა“, – განაცხადა ბერდია სიჭინავამ.

მისივე თქმით, ოპოზიციის ნაწილი „დიდ სისულელეშია გადავარდნილი“ და მათ პასუხისმგებლობა უნდა აიღონ იამზე, რაც მოხდება 4 ოქტომბერს.

„ნებისმიერ რადიკალური დღის წესრიგი, დღეს დასავლეთში გაიყიდება, როგორც ოპოზიციის მარცხი, არანაირ რადიკალურ სცენარს დასავლეთი აქ არ განიხილავს. ეს პროპაგანდაა, რომელსაც „ოცნება“ სალაფავივით აწვდის საკუთარ მოქალაქეებს. „ნაცმოძრაობაში“ და სხვა პარტიებში, სადაც ამ რადიკალიზაციაზე, დაპირისპირებაზე და მშვიდობიან დამხობაზე საუბრობენ, არიან აბსურდში. 5 ოქტომბერს დაუძახეთ ამ ადამიანებს, 5 ოქტომბრამდეც და ჰკითხეთ, აიღებენ თუ არა პასუხისმგებლობას იმაზე, რა მოხდება 4 ოქტომბერს ამ ქვეყანაში. ეს მართლა „ტემუდან“ გამოწერილები, რომლებიც ბინძური წარსულით მოდიან.

გახარია გვმოძღვრავსო, რომ ისმის, კი არ გმოძღვრავთ, გიორგი გახარია რჩევებს გაძლევთ, რადგან დიდი სისულელეში ხართ გადავარდნილი და 13 წელია ერთსა და იმავეს სიგიჟეს აკეთებთ, ერთი და იმავე წრეზე დაგყავთ ხალხი. ეს ხალხი უდაბნოდან უნდა გამოვიდეს და სწორ გზას უნდა დაადგეს“, – განაცხადა ბერდია სიჭინავამ.

რაც შეეხება პარტიიდან „გახარია საქართველოსთვის” წასულ პოლიტიკოსებს, ბერდია სიჭინავა აცხადებს, რომ „ისინი მოკლევადიანი“ პროექტები იყვნენ.

„პატივისცემა თითოეულ მათგანს, მაგრამ როგორც ეს ადამიანები პოზიციონირებენ, მოკლევადიანი პროექტები იყვნენ ამ პარტიისთვის. მოკლევადიან პროექტს აქვს დასაწყისი და აქვს დასასრული. მადლობა მათ გაწეული შრომისთვის, მაგრამ არც თეონა აქუბარდიაზე დგას ეს პარტია და არც დიმიტრი ცქიტიშვილზე“, – განაცხადა სიჭინავამ.

ახლა, როდესაც ჩვენი სახელმწიფო და სახელმწიფო ინსტიტუტები არის ძლიერი, როგორც არასდროს, არავის მიეცემა არათუ რაიმე რევოლუციური სცენარის, არამედ რაიმე რადიკალური სცენარის განხორციელების საშუალება, – ამის შესახებ პრემიერ-მინისტრმა ირაკლი კობახიძემ ჟურნალისტებს ფოთში განუცხადა.

მისივე თქმით, მრავალი წელია, საზოგადოებას ესმის საუბრები რადიკალიზაციასა და რადიკალურ სცენარებზე, თუმცა არც ერთი ასეთი საუბარი წარმატებით არ დასრულებულა, ვინაიდან სახელმწიფო ყოველთვის იდგა მოწოდების სიმაღლეზე.

„მთლიანად ოპოზიცია არის გაურკვევლობაში, არის 2 პარტია, რომელიც არჩევნებში მონაწილეობს და არის კიდევ ორი პარტია, რომლებიც არჩევნებში მონაწილეობას ღალატად აცხადებენ. ფუნქცია ამ კუთხითაც დაკარგული აქვთ. შესაბამისად, მათ სხვა აღარაფერი დარჩენიათ გარდა იმისა, რომ ისაუბრონ რაღაც რადიკალურ სცენარებზე. თუმცა ასეთი საუბრები რადიკალიზაციაზე, რადიკალურ სცენარებზე გვახსოვს უკვე მრავალი წელია და ისიც გახსოვთ, რომ არც ერთი საუბარი არ დასრულებულა წარმატებით, ვინაიდან სახელმწიფო ყოველთვის იყო მოწოდების სიმაღლეზე და არავის აძლევდა რადიკალური სცენარების განხორციელების საშუალებას. მითუმეტეს ახლა, როდესაც ჩვენი სახელმწიფო და სახელმწიფო ინსტიტუტები არის ძლიერი, როგორც არასდროს, არავის მიეცემა არათუ რაიმე რევოლუციური სცენარის, არამედ რაიმე რადიკალური სცენარის განხორციელების საშუალება,”- განაცხადა პრემიერმა.

საქართველოში ცვლილებების ორი სცენარი არსებობს: არჩევნები და საპროტესტო აქციები, სანამ არჩევნებამდე მიაღწევ, – ამის შესახებ საქართველოს მეხუთე პრეზიდენტმა, სალომე ზურაბიშვილმა Foreign Policy-სთან ინტერვიუში განაცხადა.

კითხვაზე, რა არის საქართველოში ცვლილებების მიღწევის ყველაზე სავარაუდო სცენარი, სალომე ზურაბიშვილმა უპასუხა, რომ ორი სცენარი არსებობს.

„მხოლოდ ორი სცენარი არსებობს, რომლებიც ჩვენ ვიცით: არჩევნები და საპროტესტო აქციები, სანამ არჩევნებამდე მიაღწევ. კიდევ ერთ ალტერნატივას რაიმე ფორმით ამბოხება წარმოადენს, თუმცა ეს საქართველოს ტრადიციების ნაწილი არ არის. მაგრამ, გარკვეული სახის წინააღმდეგობა უნდა იყოს და წინააღმდეგობა გარედან უკეთ მხარდაჭერილი უნდა იყოს“, – განაცხადა სალომე ზურაბიშვილმა.

მისი თქმით, „პარტნიორებმა უკეთ უნდა გაიგონ ის, თუ რა ხდება საქართველოში“.

„ჩვენ რუსეთს ვებრძვით, რომელიც საქართველოს ჰიბრიდული საშუალებებით და რბილი ძალის მეშვეობით ებრძვის. ვფიქრობ, ევროპელი და ამერიკელი პარტნიორები უნდა ღელავდნენ იმ ფაქტის გამო, რომ რუსეთი ცდის, თუ რისი მიღწევა შეუძლია რბილი ძალის მეშვეობით“, – აღნიშნა საქართველოს მეხუთე პრეზიდენტმა.

კითხვაზე, რა სურს, რომ აშშ-მა გააკეთოს, სალომე ზურაბიშვილის თქმით, „პრობლემა ის არის, რომ ძალიან დაგვიანდა“.

„ბაიდენის ადმინისტრაცია სანქციების შესახებ საუბრობდა, ერთგვარად ხალხი ამას მიაჩვია, თუმცა ბოლო დღემდე არ იმოქმედა. საქართველოში სანქციები მუშაობს, რადგან ეს პატარა ქვეყანაა და ყველა ყველას იცნობს. სანქციები მეორე დონეზე მუშაობს, გარკვეულწილად, შეიძლება პირველ დონესაც შეეხოს, არა? ეს ბიძინა ივანიშვილზე არ იმუშავებს. სანქციები არ შეიძლება მხოლოდ ერთი საშუალება იყოს, თანაც თუ ამის შესახებ საუბრობ, მაშინ უნდა გამოიყენო კიდეც, წინააღმდეგ შემთხვევაში ეს ცარიელი მუქარა ხდება“, – განაცხადა სალომე ზურაბიშვილმა.

ასევე, მისი თქმით, საქართველოსთან დაკავშირებით პოლიტიკური განცხადებების ნაკლებობაა.

„განცხადებების ნაკლებობაა, რომელშიც ნათქვამი იქნება, რომ ეს მიუღებელია. ეს არის ხელისუფლება, რომელიც რუსეთისკენ მიდის. საქართველოს არასტაბილურობა და რუსეთის სფეროში დაბრუნება, ნიშნავს იმას, რომ ეს აზერბაიჯანს, სომხეთს, სატრანზიტო ზონებს და ზოგადად, კავკასიის როლს საფრთხეს უქმნის. კონგრესმენებისთვის ჩემი გზავნილია, რომ საქართველოს ყურადღება სჭირდება, რადგან რეგიონში ამერიკის ინტერესები სასწორზე დევს. ამერიკა და ევროპა საქართველოს რუსეთს უთმობენ, ისე რომ რაიმეს გაკეთებასაც კი არ ცდილობენ“, – აღნიშნა სალომე ზურაბიშვილმა.

ქართულმა სასამართლომ ელენე ხოშტარიას უთხრა, წინასწარ პატიმრობაში არ მჭირდები, გირაო გადაიხადე და საბოლოო განაჩენს დაელოდეო. დააპატიმრა, აღკვეთ ღონისძიებად პატიმრობა შეუფარდა? ალტერნატივა გამოიყენა. მისგან პასუხი რა არის? ამ შესაძლებლობას არ გამოვიყენებ, ციხეში მივდივარო, – ამის შესახებ „ქართული ოცნების“ წევრმა, თენგიზ შარმანაშვილმა განაცხადა.

მისი თქმით, ელენე ხოშტარია ცდილობს, ციხეს თავს შეაფაროს.

„ხელისუფლება აპატიმრებს ამ ქალბატონს, თუ თავად იპატიმრებს თავის თავს? როგორ გგონიათ, დედამიწაზე რომელიმე ქვეყანა არსებობს, სადაც სასამართლო ადამიანს გირაოს განუსაზღვრავს, შემდეგ თითს დაუქნევს და ეტყვის, გირაოს არ გადავიხდიო და გარეთ დატოვებს? ელენე ხოშტარიას ციხეში ჯდომა სჭირდება, რადგან კარგად იცის, 4 ოქტომბერს არავითარი რევოლუცია არ იქნება და შერცხვება როგორც თავისი მომხრეების, ასევე პატრონების წინაშე. ამიტომ ახლა, თავისი ჭკუით, ლამაზი გამოსავალი იპოვა – ციხეს თავს შეაფარებს და ამით გაიმართლებს თავს, გარეთ რომ ყოფილიყო, უფრო მეტ აქტიურობას გაწევდა. ის გარეთ იქნება თუ შიგნით, არ გვაინტერესებს. სახელმწიფოს ასეთი ტიპის ადამიანების არ ეშინია“, – განაცხადა შარმანაშვილმა.

„დროას“ ლიდერმა, ელენა ხოშტარიამ ციხიდან გამოგზავნილ წერილში თქვა: „ვინმეს მიერ ჩემი გირაოს შეტანა იქნება ჩემთვის გულში დანის ჩარტყმა, არავის ვაძლევ ამის უფლებას“.