„აკერმანის ტრენინგებიდან: დემონსტრირება უნდა მოხდეს, რომ პროცესები სახალხო, ბუნებრივი და გამჭვირვალეა. შექმენით ფონდები და სოციალური გვერდები, სადაც ანგარიშებს გამოაქვეყნებთ და შიგადაშიგ გაავრცელებთ ინფორმაციას, რომ ხალხია შემომწირველი და დამფინანსებელი პროცესისა“, – ამის შესახებ „ხალხის ძალის“ წევრი ზურაბ ქადაგიძე სოციალურ ქსელში წერს.

როგორც ქადაგიძე აღნიშნავს, ნანუკა ჟორჟოლიანი აქვეყნებს ხარჯთაღრიცხვას, რომ კოლოსალური თანხები შეაგროვა ხალხმა, პროტესტის დასაფინანსებლად, სინამდვილეში კი კეზერაშვილმა მოხსნა გუდას თავი და აგზავნის “მაყუთს”! თუ რამდენი და ვინ ჩამოიტანა, ეგეც მალე გაირკვევა!

„აკერმანის ტრენინგებიდან :
• ძალადობრივი აქციები შიგა და შიგ უნდა ჩაანაცვლოს მშვიდობიანმა მანიფესტაციებმა, კარგი იქნება თუ მანიფესტაციების დროს გამოყენებული იქნება, სოციალური აქციები( დასუფთავება, ცხოველებზე ზრუნვა, სტუდენტებზე დახმარებების გაწევა და ა.შ) ასევე აუცილებელია რელიგიური რიტუალები : ეკლესიებში მასობრივად მისვლა, ლოცვაში მონაწილეობა, რომ საზოგადოებისგან თანაგრძნობა გამოიხატოს.
• დემონსტრირება უნდა მოხდეს, რომ პროცესები სახალხო, ბუნებრივი და გამჭვირვალეა. შექმენით ფონდები და სოციალური გვერდები, სადაც ანგარიშებს გამოაქვეყნებთ და შიგადაშიგ გაავრცელებთ ინფორმაციას, რომ ხალხია შემომწირველი და დამფინანსებელი პროცესისა.
მოკლედ, ორდღიანი ლეწვა-მტვრევის შემდეგ, ვიხილეთ საყოველთაო გალობა და სინანული ქაშვეთის წინ და დღეს მთელი დღეა, საზოგადოებისგან უპრეცედენტო შემოწირულებებზე წერენ.
P.S.
ორი დღეა, ნანუკა ჟორჟოლიანი აქვეყნებს ხარჯთაღრიცხვას, რომ კოლოსალური თანხები შეაგროვა ხალხმა, პროტესტის დასაფინანსებლად. სინამდვილეში კი კეზერაშვილმა მოხსნა გუდას თავი და აგზავნის “მაყუთს”! თუ რამდენი და ვინ ჩამოიტანა, ეგეც მალე გაირკვევა!“, – წერს ზურაბ ქადაგიძე სოციალურ ქსელში.

მსოფლიოს ყოველთვის მართავდნენ და დღესაც მართავენ იმპერიები. დღეს უპირობო ლიდერი ამერიკის შეერთებული შტატებია, ასევე, არიან ლოკალური ლიდერებიც: რუსეთი, ჩინეთი, ინდოეთი, ირანი, თურქეთი და სხვა, ყველა საკუთარი მიზნებით, – ამის შესახებ საქართველოს პარლამენტის საფინანსო-საბიუჯეტო კომიტეტის თავმჯდომარე პაატა კვიჟინაძე სოციალურ ქსელში წერს.

„ჯერ კიდევ ხუთი წლის წინ ამერიკა რასაც იტყოდა, ის სრულდებოდა ყველა მიმართულებით, დღეს „ხელთათმანი ესროლეს ამერიკას“ და აღარ ემორჩილებიან:

– სრულად – რუსეთი, ირანი, ჩინეთი;

– ნაწილობრივ – თურქეთი, საუდის არაბეთი, სრულად მუსულმანური სამყარო, ინდოეთი (არ უერთდებიან სანქციებს, ვაჭრობენ რუსულ და ჩინურ ვალუტებში და სხვა).

ხოლო დანარჩენი მსოფლიო ელოდება, როგორ განვითარდება მოვლენები და რა მოხდება. დიდი ალბათობით, მომავალში მსოფლიოში გაჩნდება ორი-სამი გადაწყვეტილების მიმღები პოლუსი. ამერიკა, როგორც ადრე ყველა იმპერია, იბრძოლებს ბოლომდე.

ამ ფონზე უდიდესი მნიშვნელობა ენიჭება უკრაინას, რუსეთის შეჭრის შემდეგ, ვინ მოიგებს ომს? რუსეთი და მის უკან მდგომი ჩინეთ-ირანი თუ ამერიკა და დასავლეთი (ევროპას აქვს ეკონომიკური და სოციალური პოლიტიკა, მაგრამ საერთოდ არ აქვს საგარეო და თავდაცვის პოლიტიკა, რაც ამერიკისთვის არის გადაცემული).

ყველა ამას შეჰყურებს, ვინ დათმობს. თუკი ამერიკამ დათმო, მისი უმთავრესი იარაღი – დოლარი საფრთხის ქვეშ დადგება (მოწინააღმდეგე სამეული ახალი საგადახდო საშუალების შექმნას დაიწყებს, რაც გაჟღერებული აქვთ), რაც ძალიან საშიშია, სწორედ ამიტომაც, ამ ფონზე მართლაც ვაჟკაცი, გმირი უკრაინელი ხალხი ნაკლებად აინტერესებს ორივე მხარეს, როგორც ითქვა, ბრძოლა იქნება ბოლო უკრაინელამდე.

აქვე გამოიკვეთა, რომ დასავლეთს რუსეთის სწრაფი წაგების ეშინია, რათა არ გამოიყენოს ატომური იარაღი (ყველაზე დიდი მარაგი ამერიკას და რუსეთს აქვთ, რუსეთს ცოტათი მეტიც), მდიდარი ქვეყნებისთვის ეს განსაკუთრებით დაუშვებელია, ეშინიათ.

რუსეთზე გამარჯვება თუ სურთ, უკრაინას კი არ უნდა გადასცენ ორი-სამი საზენიტო-სარაკეტო კომპლექსი „პეტრიოტი“, რამდენიმე ათეული „ჰაიმარსი“, „აბრამსი“, „ლეოპარდი“, შორი მოქმედების რაკეტა „ატაკამსი“ და რამდენიმე თვითმფრინავი, არამედ: 1 000 „ჰაიმარსი“, ათასობით „აბრამსი“, „ლეოპარდი“ და „ატაკამსი“, ასეულობით და ათასობით თვითმფრინავი F-15 და F-16 (რომლებიც მოძველებულია, ამერიკას უკვე აქვს თანამედროვე თაობის F-35 და სხვა თვითმფრინავები დიდი რაოდენობით), ასევე ასეულობით თავდაცვის სისტემა „პეტრიოტი“. რომ წარმოიდგინოთ, საბჭოთა კავშირის დროს უკრაინაში იდგა 1 000-მდე მაშინდელი თანამედროვე თავდაცვის სისტემა – S-300. ასეთ შემთხვევაში უკრაინა მოიგებს ომს, მაგრამ ომი მიდის არა მოგებისთვის, არამედ რუსეთის გამოფიტვისთვის, რასაც ეწირება უკრაინა. ვნახოთ, რა იქნება!

რუსეთმა ოფიციალურად თავდაცვის ხარჯები ბიუჯეტის 30%-მდე აიყვანა (რეალურად, ალბათ უფრო მეტია). უჭირს, თუმცა 4%-იანი ეკონომიკური ზრდა აქვს.

რაც შეგვეხება ჩვენ, რომლებსაც გულწრფელად ყველას გვინდა დასავლეთში, „სახიფათო დრო“ დაგვიდგა მოლდოვა-უკრაინასთან ერთად, რადგან დასავლეთის მხარდაჭერისა და სურვილის მიუხედავად, მიგვიღონ თავისთან, ეს ახლა მეორეხარისხოვანია. უპირველესია ამერიკისთვის ლიდერობის შენარჩუნება (რასაც ძალიან დიდი ფასი აქვს). ამისთვის, მათ სჭირდებათ არა ეროვნული, არამედ უპირობო შემსრულებელი მთავრობა, როგორიც ზელენსკი, სანდუ არიან, ან სააკაშვილი იყო. იციან, რომ ჩვენ მყარი დასავლური პოზიცია გვაქვს (პრემიერი და პარლამენტის თავმჯდომარე გერმანიაში მიღებული განათლებით, ყოფილი პრემიერი – საფრანგეთში), მაგრამ ურჩევნიათ უპირობო შემსრულებლები, რომლებიც ქვეყნის კი არა, სხვის ინტერესებს გაატარებენ და ცეცხლის რკალს შექმნიან რუსეთის საზღვარზე. ამისთვის იყენებენ ფერად რევოლუციებს, რომელიც დე გოლის გადაყენებით დაიწყო და დღესაც გრძელდება, მათ შორის, საქართველოშიც. ამ ბოლო პერიოდში ბევრგან აღარ გამოუვიდათ და არ გამოუვათ აქაც. ჩვენთან უკვე იყო ერთი ფერადი რევოლუცია და ხალხმა ყველაფერი იცის.

ამასთან, დიდი ცვლილებები ხდება დასავლეთში, ევროპარლამენტის და წამყვან ქვეყნებში არჩევნები, ივლისიდან ევროპული საბჭოს თავმჯდომარე ქვეყანა უნგრეთი ხდება და რაც მთავარია – ამერიკის არჩევნები.

როგორც იქნა, წელში გავიმართეთ, ეკონომიკა სწრაფად იზრდება (იზრდება პენსიები, ხელფასები, ინფრასტრუქტურა), ლარი და ინფლაცია სტაბილურია, არის მშვიდობა და დიდი პერსპექტივები, განსაკუთრებით „შუა დერეფანის“, ამიტომ დიდი სიფრთხილით, ჩვენი ინტერესების გათვალისწინებით უნდა გავაგრძელოთ ჩვენი გზა ევროპისაკენ“, – წერს პაატა კვიჟინაძე.

მაქვს განცდა, რომ ახალგაზრდებმა საკუთარ თავში, აწმყოსთან ერთად, ის წარსულიც გააერთიანეს, რომელიც მშობლების თაობაა და ის მომავალიც, რაც ცალსახად მათია, ამიტომ მათზე თავდასხმა აპრიორი მარცხისთვისაა განწირული, – ამის შესახებ საქართველოს სახალხო დამცველი ლევან იოსელიანი სოციალურ ქსელში წერს.

როგორც იოსელიანი აღნიშნავს, კატეგორიულად მიუღებელია მათი შეურაცხყოფა, დემონიზება, ან ნებისმიერი პოლიტიკური ნარატივისადმი მიკუთვნების მცდელობა!

„მინდა დავწერო, როგორც მოქალაქემ და არა როგორც სახალხო დამცველმა, რთულია მიმდინარე მოვლენებზე განყენებულად საუბარი, იმ პოზიციიდან რაც მიკავია და იმ პასუხისმგებლობით, რაც მაკისრია. მოკლედ ვიტყვი, რომ აქციების დაწყების პირველივე დღიდან, მეც და სახალხო დამცველის აპარატიც სრულად, ვაკეთებთ იმას, რასაც კონსტიტუცია და კანონი გვავალდებულებს, ვნახულობთ დაკავებულებს და დაზარალებულებს, ვაწვდით ინფორმაციას ოჯახის წევრებს და საზოგადოებას, ვაფასებთ პოლიციის მოქმედების პროპორციულობას და მშვიდობიანი შეკრების ფარგლებს. აღნიშნულზე დეტალური ინფორმაცია განთავსებულია ჩვენს ვებ-გვერდზე.

აქ სხვა რამეზე მინდა გამოვთქვა აზრი და ეს, პირველ რიგში, ეხება ჩვენს ახალგაზრდებს, პროტესტის მონაწილეებს, იშვიათად მინახავს ასეთი გულწრფელობა აქციაზე, ეს ამ თაობის მთავარი განმასხვავებელია ყველა დანარჩენისგან. მე ვიცი ვინ დგას იქ, ისინი ჩვენი შვილები, მათი მეგობრები, ჩვენი მეგობრების შვილები, მეზობლები, ნათესავები არიან. კატეგორიულად მიუღებელია მათი შეურაცხყოფა, დემონიზება, ან ნებისმიერი პოლიტიკური ნარატივისადმი მიკუთვნების მცდელობა! მაქვს განცდა, რომ ამ ახალგაზრდებმა საკუთარ თავში, აწმყოსთან ერთად, ის წარსულიც გააერთიანეს, რომელიც მათი მშობლების თაობაა (თუნდაც, ისინი განსხვავებულად უყურებდნენ ბევრ რამეს) და ის მომავალიც, რომელიც ცალსახად მათია, ამიტომ მათზე თავდასხმა აპრიორი მარცხისთვისაა განწირული. ჩვენ ვერ ვიქნებით მათ გარეშე და ისინი უჩვენოდ, რადგან ეს ერთი დიდი ოჯახია.

ვნახე კადრები, სადაც მოქალაქეების ჯგუფი აქციის მონაწილეს წიხლებით გაუსწორდა; ეს ის საშიში ზღვარია, რომლის შემდეგაც, უბნური ვენდეტები და გარჩევები იწყება. ამ ჯოჯოხეთს ძლივს დავაღწიეთ თავი და იქ არასდროს უნდა დავბრუნდეთ. სახელმწიფოს განსაკუთრებული პასუხისმგებლობა აკისრია ამ შემთხვევაში, მან არ უნდა დაუშვას ძალადობა, ხოლო მოძალადეებმა კანონის წინაშე უნდა აგონ პასუხი. ძალადობა დაუშვებელია შეკრების მონაწილეების მხრიდანაც, ყველას უნდა გვესმოდეს რომ სახელმწიფო ინსტიტუციებზე დგას და ამ ინსტიტუციებს პატივისცემა სჭირდება, პოლიციელების შეურაცხყოფა, გინება თუ ფურთხება კატეგორიულად მიუღებელია და მას გამართლება არ აქვს.

სიძულვილის ენა ის წყევლაა, რაც ათწლეულების მანძილზე არ გვაძლევს საშუალებას გავერთიანდეთ საერთო ღირებულებების ირგვლივ, სიძულვილის ენის გამოყენება არის ადამიანის დეჰუმანიზაციის სამარცხვინო აქტი და საკუთარი პოზიციის გასამყარებლად არჩეული უარგუმენტო გზა, განსაკუთრებით, როცა ჩვენს საამაყო სპორტსმენებზეა საუბარი, ისინი ბევრად მეტს აკეთებენ ჩვენი ქვეყნისთვის, ვიდრე ვინმეს სასარგებლოდ პოზიციის დაფიქსირება შეიძლება იყოს, მათ აქვთ უფლება, აკეთონ საკუთარი საქმე და არავის აქვს უფლება ამუნათოს ამისთვის. ნუ დაგვავიწყდება, რომ სამოქალაქო პოზიციის დაფიქსირებაც ადამიანის უფლებაა და არა ვალდებულება.

და ბოლოს, ისევ ჩვენს ახალგაზრდებს დავუბრუნდები, ჩვენი ევროპული მომავლის ფლაგმანს და ვიტყვი, რომ არ შევწყვიტოთ შრომა ჩვენი ევროპული მომავლისთვის, ადამიანის უფლებების დაცვისთვის, მაგრამ ისიც უნდა გვახსოვდეს, რომ ამ ორ სიტყვაში „ადამიანის უფლებები”, მთავარი სიტყვა ადამიანია.

გილოცავთ, ყველას აღდგომის ბრწყინვალე დღესასწაულს, ბედნიერებას, მშვიდობას და სიხარულს გისურვებთ! – წერს ლევან იოსელიანი.