წავიკითხე გამოგზავნილი დოკუმენტი და როგორც იურისტმა, შემიძლია ვთქვა, რომ ვენეციის კომისიას პროფესიულ ღირსებაზე საერთოდ უარი აქვს ნათქვამი, – ამის შესახებ საქართველოს პრემიერ-მინისტრმა ირაკლი კობახიძემ პირველი არხის გადაცემაში „გადაწყვეტილება”, გამჭვირვალობის კანონთან დაკავშირებით ვენეციის კომისიის დასკვნის შეფასებისას განაცხადა.

მთავრობის მეთაურის შეფასებით, დოკუმენტში უამრავი აბსურდული ჩანაწერი და ტყუილია.

„უბრალოდ, უხერხულობას ვგრძნობდი, როგორც იურისტი, როდესაც ამ დოკუმენტს ვკითხულობდი, იმდენად უსუსური იყო ის სახე, რომელიც აჩვენა ვენეციის კომისიამ ამ დოკუმენტით. არაფერი აქვთ სათქმელი და უბრალოდ არის სავსე აბსურდული ჩანაწერებით და მათ შორის ტყუილებით. უამრავი სიცრუე გხვდებათ თქვენ ვენეციის კომისიის დოკუმენტში და ამ სიცრუესთან ერთად არის სრულიად აბსურდული სამართლებრივი მსჯელობა ყოველგვარი არგუმენტაციის გარეშე, მაგრამ საზოგადოება უყურებს საბოლოო ჯამში არა იმას, თუ რა თქვა ვენეციის კომისიამ, არამედ უყურებს იმას, თუ სად არის სიმართლე და ეს არის ერთ-ერთი სერიოზული მიღწევა, რაც ჩვენ გვაქვს ამ 2-3 წლის განმავლობაში. ამიტომ ვამბობთ ხოლმე მათ შორის ხშირად, რომ დღეს ჩვენი ქვეყანა არის სუვერენული, როგორც არასდროს. ამაში მათ შორის იგულისხმება ის, რომ საზოგადოება უფრო მეტად აფასებს ჩვენი ქვეყნის დამოუკიდებლობას. ანუ დამოუკიდებლობის ფასი დღეს უფრო მეტად აქვს გააზრებული ქართულ საზოგადოებას დღეს, ვიდრე ჰქონდა თუნდაც 3-4 წლის წინ”, – აღნიშნა პრემიერმა.

3-4 წლის წინ ერთი ევროპარლამენტარი რომ რაღაც ცუდს იტყოდა, ამაზეც კი სერიოზული მღელვარება იყო საზოგადოებაში; დღეს ისე იღებენ ევროპარლამენტის უსამართლო რეზოლუციებს, საერთოდ არავითარი რეაქცია აღარ აქვს საზოგადოებას და ამ კუთხითაც გაჯანსაღებულია ვითარება, – ამის შესახებ საქართველოს პრემიერ-მინისტრმა ირაკლი კობახიძემ პირველი არხის გადაცემაში „გადაწყვეტილება” განაცხადა.

მთავრობის მეთაურის შეფასებით, საზოგადოების უდიდესი უმრავლესობა პირველ რიგში უყურებს, სად არის სიმართლე და მერე აქცევს ყურადღებას იმას, თუ ვინ რას ამბობს ამ სიმართლესთან დაკავშირებით.

„ჩვენ კვლევის შედეგებიც გავაცანით საზოგადოებას. როცა სოციოლოგიურ კვლევაში ეკითხებოდნენ ზოგადად გამჭვირვალობასთან დაკავშირებით, 80% აცხადებდა, რომ ემხრობოდა NGO-ების გამჭვირვალობის იდეას, რომ მათ უნდა გამოექვეყნებინათ ინფორმაცია საკუთარი ფინანსების შესახებ, თუმცა როგორც კი კითხვაში შემოდიოდა უცხოური ჩარევის ელემენტი, დაუჭერდნენ თუ არა ისინი მხარს იგივე კანონს, თუ უცხოელები იტყოდნენ, რომ არ ვარგა, მაჩვენებელი ამ შემთხვევაში 61%-მდე ჩამოდიოდა. დაახლოებით 20%-იანი კლება დაფიქსირდა, რაც მაინც მაღალი მაჩვენებელია. ერთსა და იმავე კანონზეა საუბარი – თუ უცხოელები არაფერს ამბობენ, 80%-ზე მეტს მოსწონს, მაგრამ თუ უცხოელებს არ მოსწონთ, ჩამოდის უკვე 61%-მდე. ეს დამოკიდებულება კიდევ არსებობს, მაგრამ აქაც თვისებრივად გაჯანსაღებულია ვითარება, ვინაიდან მხოლოდ 61%-მდე ჩამოვიდა ეს მაჩვენებელი. ჩვენ რომ გავიხსენოთ 3-4 წლის წინანდელი პერიოდი, ეს კლება იქნებოდა ბევრად უფრო დიდი. ერთი ევროპარლამენტარი რომ რაღაც ცუდს იტყოდა, ამაზეც კი სერიოზული მღელვარება იყო საზოგადოებაში. დღეს ისე იღებენ ევროპარლამენტის უსამართლო რეზოლუციებს, საერთოდ არავითარი რეაქცია აღარ აქვს საზოგადოებას. მოსამართლეებზე დააწესეს სანქციები და პრაქტიკულად ნულოვანი რეაქცია იყო. ამ კუთხითაც გაჯანსაღებულია ვითარება. საზოგადოების უდიდესი უმრავლესობა პირველ რიგში უყურებს, სად არის სიმართლე და მერე აქცევს ყურადღებას იმას, თუ ვინ რას ამბობს ამ სიმართლესთან დაკავშირებით. იგივე ეხება ვენეციის კომისიას”, – განაცხადა პრემიერმა.

ირაკლი კობახიძე – გაუმჭვირვალობა იყო ერთ-ერთი მთავარი ინსტრუმენტი, რომელმაც კონკრეტულ სუბიექტებს შეაძლებინა, ორჯერ ეცადათ რევოლუციის მოწყობა ამ ქვეყანაში

გაუმჭვირვალობა იყო ერთ-ერთი მთავარი ინსტრუმენტი, რომელმაც კონკრეტულ სუბიექტებს შეაძლებინა, ორჯერ ეცადათ რევოლუციის მოწყობა ამ ქვეყანაში, – ამის შესახებ საქართველოს პრემიერ-მინისტრმა ირაკლი კობახიძემ პირველი არხის გადაცემაში „გადაწყვეტილება” განაცხადა.

მთავრობის მეთაურის თქმით, ხელისუფლებას ყველა სცენარი წინასწარ ჰქონდა გათვლილი. ირაკლი კობახიძის განცხადებით, პოლარიზაციის დასასრულებალად საჭიროა პოლიტიკური პროცესის გამჭვირვალობა და NGO-ების გამჭვირვალობაც სწორედ ამას ნიშნავს.

„ჩვენ ყველა სცენარი გვქონდა გათვლილი. არსებული სცენარიც იყო აბსოლუტურად გათვლადი და ერთ-ერთი ვერსია, რაც განვიხილეთ, თუ რა შეიძლებოდა ყოფილიყო პროცესის გაგრძელება, იყო  სწორედ ეს, მათ შორის აქციები, რაც გაიმართა, არა ჯანსაღი რეაქციები, მათ შორის, უცხოელების მხრიდან, ბრძოლა გამჭვირვალობის წინააღმდეგ, ეს აბსოლუტურად მოსალოდნელი იყო. საბოლოო ჯამში, აქ ხდება ლუსტრაცია. როდესაც იბრძვი გამჭვირვალობის წინააღმდეგ, გამოდის, რომ კიდევ გაქვს განზრახული ის, რასაც აკეთებდი წინა წლების განმავლობაში.

გაუმჭვირვალობა იყო ერთ-ერთი მთავარი ინსტრუმენტი, რომელმაც კონკრეტულ სუბიექტებს შეაძლებინა, ორჯერ ეცადათ რევოლუციის მოწყობა ამ ქვეყანაში. როცა ამის შემდეგაც იბრძვი გამჭვირვალობის წინააღმდეგ, რჩება ლოგიკური აღქმა, შეგვიძლია გამოვიტანოთ ლოგიკური დასკვნა, რომ ვიღაცეებს უნდათ კიდევ ერთხელ სცადონ რევოლუციების მოწყობა ამ ქვეყანაში. რაც უბრალოდ არასწორია, ეს არ არის სწორი მიდგომა ჩვენი საზოგადოების და ქართული სახელწმიფოს მიმართ. არ შეიძლება ყოველწლიურად ქვეყანა, მუდმივად, ცხოვრობდეს ამ გაუთავებელი ე.წ. პოლარიზაციის რეჟიმში.

მე კიდევ ერთხელ გავიხსენებ 2016 წლის არჩევნები გახსოვთ, 2017 იყო ერთადერთი შედარებით მშვიდი წელი, 2018 წლის არჩევნები გახსოვთ, 2019 წლის მოვლენები – ორჯერ სხვადასხვა დროს როდესაც უხეშად გაღვივდა პოლარიზაცია, შემდეგ 2020 წლის არჩევნები, 2021 წლის მოვლენები, 2022 წელი, როდესაც არ მოგვანიჭეს, უსამართლოდ, კანდიდატის სტატუსი და ამის საფუძველზე სცადეს რევოლუციის მოწყობა, შემდეგ ეს გაგრძელდა 2023 წელს. ანუ, ყოველ წელს ჩვენ გვაქვს მუდმივი, ხელოვნურად შექმნილი ტურბულენტობა, არ დაასვენეს ეს ქვეყანა. ამ ვითარებაში, ჩვენ ვერ ვხედავთ სხვა გზას იმისათვის, რომ ქვეყანა დავამშვიდოთ, არ შეიძლება ყოველწლიურად ვცხოვრობდეთ მუდმივი პოლარიზაციის რეჟიმში, რაც მთლიანად ხელოვნურად არის გარედან თავს მოხვეული. ეს რადიკალური ოპოზიციაც მთლიანად არის ხელოვნურად, გარედან თავს მოხვეული, რადიკალური NGO-ები,  ტელევიზიები, ყველაფერი ის უმსგავსობა, რაც ხდებოდა ქვეყანაში 2012 წლამდე ხელისუფლების სახით, იყო გარედან თავს მოხვეული და რაც ხდება უკვე ოპოზიციის რიგებიდან ამ სუბიექტების შესრულებით, იმავე NGO-ებით, იმავე პოლიტიკოსებით, იმავე მედიასაშუალებებით, ესეც არის გარედან თავს მოხვეული, ხელოვნურად. იმისათვის, რომ ეს დასრულდეს, ერთხელ და სამუდამოდ, ჩვენ გვჭირდება პოლიტიკური პროცესის გამჭვირვალობა. NGO-ების გამჭვირვალობაც ნიშნავს პოლიტიკური პროცესის გამჭვირვალობას,”- აღნიშნა პრემიერმა.

საქართველოში ნიდერლანდების საელჩო აცხადებს, რომ „Financial Times-ის სტატიაში გამოქვეყნებული ინფორმაცია სწორად არ ასახავს არც ნიდერლანდების პოზიციას და არც ევროკავშირში ნიდერლანდების წარმომადგენლების განცხადებებს“.

ცნობისთვის, The Financial Times-მა გაავრცელა ინფორმაცია, რომ ევროპული დედაქალაქები „საქართველოს მთავრობაზე ზეწოლის განსხვავებულ ზომებს“ განიხილავენ. კერძოდ, FT-ის ცნობით, მომავალ კვირას გასამართ ევროკავშირის საგარეო საქმეთა მინისტრების შეხვედრაზე საქართველოსთვის შემაკავებელი ზომების განხილვის ინიციატივით ესტონეთი, ნიდერლანდები, ჩეხეთი და შვედეთი გამოდიან. ვარიანტები საქართველოს მოქალაქეებისთვის ევროკავშირში უვიზო მიმოსვლის შეჩერებას, მიზანმიმართულ სანქციებსა და ევროკავშირის ფულადი სახსრების გაყინვას მოიცავს.

ევროკავშირის ოფიციალურმა პირებმა გამოცემას განუცხადეს, რომ ევროპული დედაქალაქები „საქართველოს მთავრობაზე ზეწოლის განსხვავებულ ზომებს“ განიხილავენ.

საქართველოს პრეზიდენტმა, სალომე ზურაბიშვილმა იტალიის პარლამენტის საგარეო და ევროგაერთიანების საქმეთა კომიტეტის დელეგაციასთან საქართველოს ევროინტეგრაციის პროცესი და ქვეყანაში მიმდინარე პროცესები განიხილა. ინფორმაციას საქართველოს პრეზიდენტის ადმინისტრაციის პრესსამსახური ავრცელებს.

პრესსამსახურის ინფორმაციითვე, შეხვედრაზე, რომელიც ორბელიანების სასახლეში გაიმართა, პრეზიდენტმა მიმდინარე პროცესების ფონზე, მაღალი დონის ვიზიტების განხორციელების მნიშვნელობაზე ისაუბრა, რაზეც დელეგაციამ აღნიშნა, რომ დღეს მათი ვიზიტი სწორედ საქართველოსადმი გამოხატული მხარდაჭერის ხაზგასმაა.

„პრეზიდენტმა ქვეყანაში განვითარებული მოვლენებზე საუბრისას ყურადღება გაამახვილა საქართველოს ევროპული მომავლისთვის. ქართველი ხალხის ურყევ და მტკიცე ბრძოლაზე და აღნიშნა, რომ ოქტომბრის საპარლამენტო არჩევნები იქნება ნამდვილი რეფერენდუმი ევროპულ და რუსულ საქართველოს შორის, რომელშიც კიდევ ერთხელ, ევროპული არჩევანი გაიმარჯვებს.

ამასთანავე, ხაზი გაესვა წინასაარჩევნო პერიოდში საერთაშორისო პარტნიორებთან მჭიდრო თანამშრომლობის და სადამკვირვებლო მისიების საქართველოში ყოფნის მნიშვნელობას.

პრეზიდენტმა ისაუბრა ევროპული პლატფორმის შესახებ მის ინიციატივაზე, რომელიც საქართველოს ევროპული სამოქმედო გეგმა იქნება.

დელეგაციამ მადლობა გადაუხადა პრეზიდენტს ქვეყნის ევროპული გზის წინსვლისათვის გაწეული ძალისხმევის გამო”, – აღნიშნულია ინფორმაციაში.

კეთილი ინებოს ყველამ და პატივი სცეს ჩვენი ხალხის ნებას, – ამის შესახებ იურიდიულ საკითხთა საპარლამენტო კომიტეტის თავმჯდომარე, საპარლამენტო უმრავლესობის წევრმა ანრი ოხანაშვილმა ჟურნალისტებს განუცხადა.

ამასთან, მისივე თქმით, ყველამ უნდა გაითავისოს და გაითვალისწინოს, რომ ამ ქვეყანას აქვს ძალიან მძიმე და რთული გამოწვევები.

„კეთილი ინებოს ყველამ და პატივი სცეს ჩვენი ხალხის ნებას. რაც მთავარია, ყველამ გაითავისოს და გაითვალისწინოს, რომ ამ ქვეყანას აქვს ძალიან მძიმე და რთული გამოწვევები ჩვენი ქვეყნის ტერიტორიების 20 პროცენტიანი ოკუპაციის პირობებში და იმ გეოპოლიტიკურ ვითარებაში, რაც ჩვენს გარშემო ხდება“, – აღნიშნა ანრი ოხანაშვილმა.

ევროპის საბჭოს საპარლამენტო ასამბლეის (PACE) საქართველოს შესახებ მომხსენებლები ოფიციალურ პირებს მოუწოდებენ არ დაძლიონ პრეზიდენტის ვეტო და “უცხოური გავლენის გამჭვირვალობის შესახებ” კანონი გაიწვიონ.

ამის შესახებ განცხადებას PACE-ის საქართველოს შესახებ მომხსენებლები კლოდ კერნი (საფრანგეთი) და ედიტე ესტრელა (პორტუგალია) ავრცელებენ.

“ჩვენმა ქართველმა კოლეგებმა “უცხოური გავლენის გამჭვირვალობის შესახებ” კანონზე ჩვენს შეშფოთებებთან დაკავშირებით ავტორიტეტული იურიდიული არგუმენტები გვთხოვეს. ეს არგუმენტები ახლა ვენეციის კომისიის ერთმნიშვნელოვან მოსაზრებაში გახმოვანდა, რომელიც ასამბლეის პრეზიდენტის თხოვნის შედეგად შედგა. შესაბამისად, ჩვენ მმართველ უმრავლესობას მოვუწოდებთ არ დაძლიონ პრეზიდენტის ვეტო და ეს კანონი გაიწვიონ, რისი რეკომენდაციაც ვენეციის კომისიამ გასცა,” – ნათქვამია განცხადებაში.

ასევე აღინიშნება, რომ ევროპის საბჭოს საპარლამენტო ასამბლეა საქართველოში დემოკრატიისთვის არსებული საფრთხეების შესახებ დებატებს 2024 წლის 24 მაისს ვილნიუსში შეხვედრის დროს განიხილავს.

ლიეტუვის სეიმმა მიიღო რეზოლუცია, რომელშიც საქართველოს ხელისუფლებას მოუწოდებს, „უცხოური გავლენის გამჭვირვალობის შესახებ“ კანონი გაიწვიოს. დოკუმენტის ტექსტი სოციალურ ქსელში ლიეტუვის სეიმის საგარეო ურთიერთობათა კომიტეტის თავმჯდომარემ, ჟიგიმანტას პავიოლიონისმა გამოაქვეყნა.

რეზოლუციაში ლიეტუველი დეპუტატები შეშფოთებას გამოთქვამენ საქართველოს პარლამენტის მიერ „უცხოური გავლენის გამჭვირვალობის შესახებ“ კანონის მიღების გამო. მათი თქმით, კანონი მიმართულია არასამთავრობო ორგანიზაციებისა და სამოქალაქო საზოგადოების საქმიანობის შეზღუდვისკენ და არსებითად რუსეთის ფედერაციის მიერ მიღებული „უცხოეთის აგენტების შესახებ“ კანონის ეკვივალენტურია. ლიეტუველის დეპუტატების თქმით, საქართველოში მიღებული კანონი არ შეესაბამება ევროპულ ღირებულებებს და დემოკრატიულ პრინციპებს.

დოკუმენტში გამოთქმულია წუხილი, რომ საქართველოს მთავრობის ნაბიჯები არ არის თანხვედრაში საქართველოს მოქალაქეების მისწრაფებებთან და საქართველოს გაცხადებულ მიზნებთან, ქვეყანა ევროკავშირისა და ნატოს წევრი გახდეს. მათვე თქმით, საქართველოს მთავრობის ქმედებებს შესაძლოა, სეროზული გრძელვადიანი შედეგი მოჰყვეს საქართველოს გეოპოლიტიკური ორიენტაციისა და დემოკრატიისთვის.

რეზოლუციაში ლიეტუველი დეპუტატები მხარდაჭერას უცხადებენ ქართველ ხალხს, რომელიც იცავს საკუთარი მოსაზრების გამოხატვის თავისუფლებას და საქართველოს ევროპულ მომავალს. დოკუმენტში მკაცრად არის დაგმობილი მშვიდობიანი დემონსტრანტებისა და ჟურნალისტების მიმართ ძალის გამოყენება, ასევე, ცილისმწამებლური, დაშინების ორგანიზებული კამპანია და სამოქალაქო საზოგადოების წარმომადგენელთა მიმართ ძალადობა. ლიეტუველი დეპუტატების თქმით, მსგავსი ქმედებები, რომლებიც მიმართულია მშვიდობიანია შეკრებების და გამოხატვის თავისუფლების ჩახშობისკენ, მიუღებელია ევროკავშირის წევრობის კანდიდატ ქვეყანაში.რეზოლუციაში ლიეტუვის სეიმის წევრები შეახსენებენ საქართველოს მმართველ პარტიას, რომ მას მოუწევს პასუხისმგებლობის აღება დემოკრატიული საზოგადოებების პრინციპების დარღვევებზე, რომლებიც შეუსაბამოა ევროკავშირის წევრობის კანდიდატი ქვეყნებისთვის დაწესებულ პოლიტიკურ კრიტერიუმებთან.

ლიეტუველი დეპუტატები მოუწოდებენ საქართველოს პარლამენტს გაიწვიოს „უცხოური გავლენის გამჭვირვალობის“ შესახებ კანონი, უზრუნველყოს შეკრებისა და გამოხატვის თავისუფლება, გააძლიეროს სამოქალაქო საზოგადოება, ჩაერთოს მასთან დიალოგში და დაიცვას კონსტიტუციური ვალდებულება, რომელიც გულისხმობს ევროკავშირსა და ნატოში ინტეგრაციასა და საჭირო რეფორმების გაგრძელებას. ამასთან, ლიეტუვის სეიმის წევრები მოუწოდებენ ევროკავშირის ინსტიტუტებს განიხილონ საპასუხო ნაბიჯების გადადგმის შესაძლებლობა, თუ საქართველოს მთავრობა უარყოფს პრეზიდენტ სალომე ზურაბიშვილის ვეტოს, გააგრძელებს კანონის იმპლემენტაციას და სამოქალაქო საზოგადოების დევნას.