ჩვენი ქვეყნის ინტერესებიდან გამომდინარე, არ ვუერთდებით სანქციებს და ყოველთვის ეს დამოკიდებულება გვექნება, – ამის შესახებ დედაქალაქის მერმა, კახა კალაძემ განაცხადა.

კალაძეს რუსეთის წინააღმდეგ დაწესებულ საერთაშორისო სანქციებზე და მასში საქართველოს მონაწილეობის საკითხზე დაუსვეს კითხვა.

„სანქციებთან დაკავშირებით იცით ჩვენი დამოკიდებულება. ჩვენ არ და ვერ ვუერთდებით სანქციებს, ისევ და ისევ ჩვენი ქვეყნის ინტერესებიდან გამომდინარე. ვიცავთ მოსახლეობის, ეროვნულ ინტერესებს და ყოველთვის გვექნება ეს დამოკიდებულება. სხვა მხრივ, რა თქმა უნდა, ყველანაირად ვთანამშრომლობთ და მადლობაც კი მიიღო საქართველოს ხელისუფლებამ ამასთან დაკავშირებით. ეს მომავალშიც გაგრძელდება, მაგრამ ტურისტი არ ჩამოვიდეს საქართველოში და ფული არ დახარჯოს, საქართველოში ნაწარმოები პროდუქტი შევზღუდოთ და არ გავიტანოთ, თუნდაც რუსულ ბაზარზე? რატომ უნდა შეიზღუდოს ეს ყველაფერი. ამით ვის ვზღუდავთ? საკუთარ თავს ვიზღუდავთ და ისევ გლეხს ვაყენებთ მძიმე მდგომარეობაში, მაგრამ ესეც გათვლილია. მიზანმიმართულად აკეთებენ, რომ როგორმე ქვეყანა ეკონომიკურად დააზიანონ, შეაჩერონ ეკონომიკური განვითარება, რომელიც დღეს ქვეყანაში გვაქვს“, – განაცხადა კახა კალაძემ.

„ვარდების რევოლუცია“ ვისაც ეზეიმება, ეზეიმოს და ვისაც არ ეზეიმება, იყოს სახლში, – ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.

მანჯგალაძის თქმით, წინა მთავრობისა და ხალხის დამსახურებით ქვეყანას პერსპექტივა აქვს, რომ ევროპის ნაწილი გახდეს.

„შალვა პაპუაშვილი პატარა ბიჭი არ არის და საკმაოდ დიდია იმ ასაკისთვის, რომ იცოდეს „ვარდების რევოლუციამდე“ რა ხდებოდა საქართველოში. რევოლუციამდე ქვეყანაში ადამიანებს გამოსყიდვის მიზნით იტაცებდნენ. კრიმინალი იყო და ტელეფონის გამო შეიძლება, ვინმეს ქუჩაში მოეკალი, ეს ჩვეულებრივი ამბავი იყო. ქუჩაში წესრიგს პოლიციის ნაცვლად, კრიმინალი ამყარებდა. შუქი ახალი წლის წინა დღეს მოდიოდა, ხოლო პენსია და ხელფასი ცხრა-ათი თვე იყო გაყინული და პენსია 12 ლარი იყო. წინა მთავრობისა და ხალხის დამსახურებით ქვეყანას პერსპექტივა აქვს, რომ ევროპის ნაწილი გახდეს. საქართველო კორუფციის ინდექსით იყო ცნობილი, რომელსაც გზა, შუქი, მომავალი და პერსპექტივა არ ჰქონდა. ასეთი ქვეყანა იყო 2003 წლამდე და შალვა პაპუაშვილი რას აპროტესტებს? – სისტემურ დანაშაულზე ლაპარაკობენ და სულ 20-25 კაცის პასუხისმგებლობაზეა საუბარი, ვისთანაც საპროცესო გარიგება დადეს. მართლა კრიმინალებთან, ვინც დანაშაული ჩაიდინა, ისინი საქართველოდან გააცილეს. ხმას მართლა როგორ იღებენ? – თითქოს, ქვეყანაში სიტუაცია უკეთესად იყო და „ვარდების რევოლუციამ“ დაანგრია, ეს არის სისულელე. კრიმინალმა პასუხი ყველა დროში უნდა აგოს. კრიმინალის დაცვა გამორიცხულია, მაგრამ ის, რომ პენსია 12 ლარი იყო, 300 ლარი გახდა და ეს ვერ დაინახო, წარმოუდგენელია. დანაშაულზე ყველამ პასუხი უნდა აგოს, მაგრამ „ვარდების რევოლუცია“ რა შუაშია? ვისაც ეზეიმება, ეზეიმოს და ვისაც არ ეზეიმება, იყოს სახლში, რა პრობლემაა? ათი წლის თავზე ახსენდებათ, რაღაც სისხლიანი ხდებოდა. პირდაპირ პასუხი აგებინონ“, – განაცხადა პაატა მანჯგალაძემ.

საქართველოს მოქალაქეები არ არიან ორიენტირებულები, რომ ოპოზიციურმა პარტიებმა ბარიერი გადალახონ, ხალხის მოლოდინი და მოთხოვნაა, შეიცვალოს რუსული ხელისუფლება, – ამის შესახებ ჟურნალისტებს „ლელოს” დეპუტატმა ანა ნაცვლიშვილმა განუცხადა.

მისივე თქმით, პოლიტიკურ პარტიებს გაცილებით მაღალი თამასა აქვთ დასაკმაყოფილებელი, ვიდრე უბრალოდ საარჩევნო ბარიერის გადალახვაა.

„არჩევნებთან დაკავშირებით საზოგადოების დაკვეთა და განწყობა ნათელია, ეს ჩანს ყველა კვლევაში.

საზოგადოება ოპოზიციური პოლიტიკური სპექტრისგან არ ითხოვს, რომ ბარიერი გადაილახოს ან მხოლოდ მრავალპარტიული პარლამენტი იყოს. საზოგადოების მკაფიო დაკვეთაა, რომ არჩევნების გზით შეიცვალოს რუსული ხელისუფლება და საქართველოს მოქალაქეების ინტერესებზე ორიენტირებული ძალები მოვიდნენ ხელისუფლებაში. ჩვენთვის, „ლელოსთვის“ მთავარია ამ დაკვეთას ვუპასუხოთ. ჩვენი პოლიტიკური გადაწყვეტილებები არის კონცენტრირებული იმ მთავარი ამოცანის ირგვლივ, რომელიც ხალხის დაკვეთაა. საქართველოს მოქალაქეები არ არიან ორიენტირებულები, რომ ოპოზიციურმა პარტიებმა ბარიერი გადალახონ, ხალხის მოლოდინი და მოთხოვნაა შეიცვალოს რუსული ხელისუფლება. გეგმა გვაქვს, რა თქმა უნდა. გაცილებით მაღალი თამასაა დასაკმაყოფილებელი, ვიდრე უბრალოდ ბარიერი იყოს გადალახული”- განაცხადა ნაცვლიშვილმა.

ჩვენ დეოლიგარქიზაციის სამოქმედო გეგმა ჰაერიდან არ მოგვიტანია. ის საკითხები, რაც ასახულია, ჩვენით არ მოგვიგონია. ეს იყო ვენეციის კომისიის რჩევა, – ამის შესახებ საპარლამენტო უმრავლესობის დეპუტატმა, ანრი ოხანაშვილმა ჟურნალისტებთან საუბრისას გამაცხადა.

მისივე თქმით, ოპოზიციამ არგუმენტირებულად უნდა თქვას, მათი აზრით, რა უნდა იყოს დამატებული, ან გამოკლებული.

„ჩვენ სამოქმედო გეგმა ჰაერიდან არ მოგვიტანია. ჩვენ ის საკითხები, რაც არის ასახული, ჩვენით არ მოგვიგონია. ეს იყო ვენეციის კომისიის რჩევა, რომ სისტემური გზით პარტიების დაფინანსების საკითხი, სასამართლოსთან დაკავშირებული საკითხები, ანტიკორუფციული მიმართულების ნაწილი და სხვა, ერთ დოკუმენტში აგვესახა. ჩვენ, ამ რჩევის გათვალისწინებით, ეს საკითხები ავსახეთ. რომელია მათი აზრით, ფასადური და რომელი უნდა იყოს დამატებული, ან გამოკლებული, გვითხრან არგუმენტირებული პოზიცია“, – განაცხადა ოხანაშვილმა.

ამასთან, უმრავლესობის დეპუტატმა საარჩევნო ბარიერზეც ისაუბრა და აღნიშნა, რომ ოპოზიციური ჯგუფები, იმდენად ვერ საზღვრავენ მათი ნათქვამის მეორე და მესამე სვლას, რომ ბარიერის დაწევაზე საუბრით რეალურად აღიარებენ, რომ „ქართული ოცნება“ 2024 წლის არჩევნებზე გაიმარჯვებს, ისინი კი ვერ გადალახავენ.

„ოპოზიციური ჯგუფები ვინც ამბობენ, რომ გაუნაწილებელი მანდატები მიდის ხელისუფლების სასარგებლოდ ხმებში და ა.შ. ამით პირდაპირ აღიარებენ, რომ 2024 წლის საპარლამენტო არჩევნებზე „ქართული ოცნება“ მოდის დამაჯერებლად და გამარჯვებით. იმდენად ვერ საზღვრავენ მათი ნათქვამის მეორე და მესამე სვლას, რომ რეალურად, ისინი დღეს აღიარებენ, რომ „ქართული ოცნება“ 2024 წლის საპარლამენტო არჩევნებზე გაიმარჯვებს, ისინი ვერ გადალახავენ. ჩვენ რასაც ვამბობთ, ამას გვიდასტურებენ მათი ნათქვამით. თუ ისინი ხელისუფლების შეცვლისთვის მზად არიან, მაშინ 5%-იანი ბარიერი როგორ ვერ უნდა გადალახონ?“ – განაცხადა ანრი ოხანაშვილმა.

ოკუპირებული აფხაზეთის ე.წ. პრეზიდენტი, ასლან ბჟანია მოსკოვში იმყოფება, – ამის შესახებ ინფორმაციას ოკუპირებული აფხაზეთის ე.წ. პრეზიდენტის პრესსამსახური ავრცელებს.

გავრცელებული ინფორმაციით, ოკუპირებული აფხაზეთის ე.წ. პრეზიდენტი მოსკოვში სამუშაო ვიზიტით ჩავიდა და მას თან, ე.წ. სახელმწიფო უშიშროების თავმჯდომარე თემურ აჰიბა ახლავს.

„ვიზიტის ფარგლებში, შეხვედრები სხვადასხვა სამთავრობო უწყებებში გაიმართება“, – ნათქვამია ოკუპირებული აფხაზეთის ე.წ. პრეზიდენტის პრესსამსახურის განცხადებაში.

„გირჩის“ ერთ-ერთი წევრის ვახტანგ მეგრელიშვილის განცხადებით, პოლიტიკური პარტიების გაერთიანებისთვის ჯერ საჭიროა დებატებისა და საჯარო პოლიტიკური დისკუსიის პროცესი დაიწყება, ვინაიდან ამომრჩეველმა იცოდეს, რატომ ერთიანდებიან პარტიები და საერთოდაც, რა უნდათ.

შესაბამისად, მისივე თქმით, ამ პროცესის შედეგად, რა გაერთიანებაც გამოდნება ის გაერთიანება იქნება ლეგიტიმური, წინააღმდეგ შემთხვევაში კი, მექანიკური გაერთიანება, ყველასთვის დამაზიანებელია.

„ვითხოვ, რომ დავიწყოთ დებატების და საჯარო პოლიტიკური დისკუსიის პროცესი. ამ პროცესის შედეგად, რა გაერთიანებაც გამოდნება ის გაერთიანება იქნება ლეგიტიმური. დღეს, მექანიკური გაერთიანება, ჩემი აზრით, არის ყველასთვის დამაზიანებელი. დახურულ კარს მიღმა მოლაპარაკებებით გაერთიანება ისე, როგორც მაგალითად, „დროას“ და „გირჩი-მეტი თავისუფლების“ გაერთიანება, ამან კი არ გაზარდა მათი ამომრჩეველი, არამედ შეამცირა, თუ იმ კვლევებს ვენდობით, რომელიც ქვეყნდება. ზუსტად ასე მგონია, მთავარი არის ის, რომ ჩვენ დავიწყოთ პოლიტიკური პროცესი, ამომრჩეველმა იცოდეს, ამ ხალხს დღეს მაინც, რა უნდა და თუ ეს გაარკვია, მაშინ გაერთიანება შეიძლება ბუნებრივი გამოვიდეს და ამას შედეგი ჰქონდეს, მაგრამ თუ ეს მოხდა ჩუმად, თქვენგან, საზოგადოებისგან მალულად მე დარწმუნებული ვარ, რომ ეს დააზიანებს თავად ოპოზიციას ვინც გაერთიანდება. ჩვენ მზად ვართ, რომ ამ პროცესში მონაწილეობა სრულად მივიღოთ, დისკუსიაში მივიღოთ მონაწილეობა ნებისმიერ პარტიასთან. მე დღეს არ შემიძლია ვთქვა, რომ ვიღაცასთან გავერთიანდები იმიტომ, რომ თვითონ ის აუცილებელი პროცესი არ გვაქვს, რომელიც საშუალებას მოგვცემდა შევქმნათ ისეთი კონფიგურაცია, რომელიც გასაგები იქნება ჩემი ამომრჩევლისთვის და იმ ხალხის ამომრჩევლისთვის ვისთანაც ეს შეთანხმება შედგა“, – განაცხადა მეგრელიშვილმა.

მან უპასუხა შეკითხვას „გირჩი“ განიხილავს თუ არა თანამშრომლობას გიორგი გახარიას პარტიასთან „საქართველოსთვის“ და „ნაციონალურ მოძრაობასთან“.

ჩვენ აბსოლუტურად არ გვაქვს არანაირი წინაპირობა, ჩვენ ვლაპარაკობთ ყველასთან, „ქართულ ოცნებასთანაც“, „ალტ ინფოსთანაც“, არ ვიცი, ნებისმიერ პოლიტიკურ აქტორთან“, – განაცხადა მეგრელიშვილმა.