საქართველოში ჩინეთის ელჩმა, ჭოუ ციენმა საქართველოსა და ჩინეთის ურთიერთობებზე საუბრისას აღნიშნა, რომ ჩინეთი საქართველოს მესამე ყველაზე დიდი სავაჭრო პარტნიორია.

ჩინეთის ელჩმა ასევე ყურადღება გაამახვილა სამომავლოდ გადასადგმელ ნაბიჯებზე.

„საქართველოს და ჩინეთის ურთიერთობებზე საუბრისას, მინდა, ვთქვა, რომ ჩვენ ვართ საქართველოს მესამე ყველაზე დიდი სავაჭრო პარტნიორი და ყველაზე დიდი საექსპორტო ბაზარი. ეს არის მცირე პროექტი, რომელიც საელჩომ განახორციელა. ჩვენ ვცდილობთ, ჩვენი ძალისხმევა ჩავდოთ პირობების გასაუმჯობესებლად. ჩვენ ასევე ვცდილობთ ჩვენი წვლილის შეტანას საქართველოს განვითარებაში და ახლა გვსურს პროექტების განხორციელება იძულებით გადაადგილებული პირებისთვის გორში“, – განაცხადა ჩინეთის ელჩმა.

ვისაც ვისთან სურს თანამშრომლობა პოლიტიკურ კონტექსტში, ითანამშრომლოს, ჩვენთვის მთავარია ის, რომ ყველა ოპოზიციურმა პარტიამ გადალახოს საარჩევნო ბარიერი, იმისთვის, რომ ოპოზიციურად განწყობილი ჩვენი მოქალაქეების საარჩევნო ხმა არ დაიკარგოს, – ამის შესახებ ჟურნალისტებს „ნაციონალური მოძრაობის“ დეპუტატმა, თინა ბოკუჩავამ განუცხადა.

მისივე თქმით, „ნაციონალური მოძრაობის“ კარი ღიაა თანამშრომლობისთვის, რადგან გამარჯვების გზა არის კოალიციურ მთავრობაში

„იცით, რომ „ერთიანი ნაციონალური მოძრაობისთვის” ეს არ არის პრინციპული საკითხი, ჩვენი პოლიტიკური პარტიისთვის ბარიერის საკითხი ელექტორალურად გადამწყვეტი არ არის, მაგრამ პოლიტიკური პლურალიზმისთვის, მიგვაჩნია, რომ მნიშვნელოვანია. ამიტომ იყო, მათ შორის, 19 აპრილის შეთანხმების ნაწილი, რომელსაც მხარი დაუჭირა “ოცნებამაც”, მეტიც, კენჭიც უყარეს საკონსტიტუციო ცვლილებებს, რომელიც ბარიერს დაწევდა 2%-მდე, მაგრამ მერე გააჩერეს. გააჩერეს, იმიტომ, რომ ივანიშვილმა საარჩევნო არითმეტიკით გამოთვალა, რომ 5%-იანი ბარიერით უფრო დიდი შანსი აქვს ძალაუფლების შენარჩუნების. რა საარჩევნო ბარიერიც არ უნდა იყოს, ივანიშვილი ვერ შეინარჩუნებს ძალაუფლებას. ვისაც ვისთან სურს თანამშრომლობა პოლიტიკურ კონტექსტში, ითანამშრომლოს, ჩვენთვის მთავარია ის, რომ ყველა ოპოზიციურმა პარტიამ გადალახოს საარჩევნო ბარიერი, იმისთვის, რომ ოპოზიციურად განწყობილი ჩვენი მოქალაქეების საარჩევნო ხმა არ დაიკარგოს. ეს არის ჩვენი ამოსავალი წერტილი.

ყველა კვლევითი ორგანიზაცია გვიჩვენებს, რომ ამ 5%-იან ბარიერს ვერ ლახავს ბევრი ოპოზიციური პარტია, ამიტომ მნიშვნელოვანია გაერთიანება. ვინ რა კონფიგურაციით გაერთიანდება, ვის ვისთან სურს საკუთარი საარჩევნო თუ პოლიტიკური ბედის დაკავშირება, ეს ყველას ინდივიდუალური გადაწყვეტილებაა. მე შემიძლია ვთქვა, რომ მე წარმოვადგენ ყველაზე ძლიერ, მსხვილ პოლიტიკურ პარტიას, რომელმაც შექმნა გამარჯვების კოალიცია და რომელიც აუცილებლად იქნება იმ დიდი გამარჯვების ნაწილი, რომელიც ქართველ ხალხთან ერთად უნდა მივაღწიოთ. ჩვენი კარი ღიაა თანამშრომლობისთვის, თუმცა ვინ გამოიყენებს ამ შესაძლებლობას, ეს მათი პრეროგატივაა. გამარჯვების გზა არის კოალიციურ მთავრობაში”, – განაცხადა ბოკუჩავამ.

ცხენზე ამხედრებული ოპოზიციონერის მანტიიდან ქვეყნის დაცვა მგონია საკმაოდ ვადაგასული ამბავია, – ამის შესახებ პარტია „გირჩის“ წევრმა, იაგო ხვიჩიამ განაცხადა, რითაც „ლელოს“ ინიციატივას გამოეხმაურა.

„მგონია, „ლელო“ 5-პროცენტიანი ბარიერის გადალახვას არც უნდა, მაგათ უნდათ პოლიტიკიდან ღირსეული წასვლა და ამისთვის ემზადებიან. „ლელოს“ პოლიტიკოსები აკლია. ვინც არიან „ლელოს“ რეალური ლიდერები, ისინი პოლიტიკაში მგონია რომ გასართობად არიან, ბევრი ფული აქვთ და საკუთარ გართობაში ფულს იხდიან“, – აღნიშნა იაგო ხვიჩიამ.

„ლელომ“ პარლამენტს რეზოლუციის პროექტი – „საქართველოს დაცვის აქტი“ წარუდგინა. აღნიშნული რეზოლუციის პროექტი ცხრა პუნქტისაგან შედგება, რაც „ლელოს“ განმარტებით, დაუყოვნებლივ შესასრულებელია იმისთვის, რათა საქართველო რუსეთისგან და მისგან მომდინარე საფრთხეებისგან იყოს დაცული.

პარტია „ლელოს“ გენერალური მდივნის, ირაკლი კუპრაძის განცხადებით, ბოლო ორ წელში, საქართველოში, 25 333 რუსული კომპანია დარეგისტრირდა, მათგან 22 582 სუბიექტის საქმიანობის შესახებ ინფორმაცია უცნობია.

როგორც კუპრაძემ აღნიშნა, შესაბამისი მონაცემები სტატისტიკის ეროვნული სამსახურიდან გამოითხოვეს და აცხადებს, რომ აღნიშნული ინფორმაცია ეროვნული ინტერესების საფრთხეს წარმოადგენს.

კერძოდ, ოპოზიციონერი პოლიტიკოსის თქმით, „საქსტატის“ მიერ მიწოდებული ინფორმაცია 2022 წლის 24 თებერვლიდან 2023 წლის ოქტომბრამდე პერიოდს მოიცავს.

კუპრაძე სახელმწიფო უწყებების მოუწოდებს, სასწრაფო რეჟიმში დაიწყოს იმის დადგენა, თუ რა საქმიანობას ეწევა 22 582 რუსული კომპანია საქართველოში.

„25 333 რუსული სუბიექტიდან, რომელიც საქმიანობს და ოპერირებს საქართველოში, მხოლოდ რამდენიმე შემთხვევაა, როცა სახელმწიფომ იცის მათი საქმიანობის პროფილი. 25 333 რუსული სუბიექტიდან 22 582 სუბიექტის საქმიანობის შესახებ ინფორმაცია უცნობია. საქართველოს სახელმწიფო „ქართული ოცნების“ პირობებში არ სწავლობს რუსული კომპანიების და ბიზნეს სუბიექტების საქმიანობას ამ ქვეყანაში. ეს ცალსახად ნიშნავს, რომ მათი საქმიანობა არ არის შემოწმებული შრომის ინსპექციის მიერ, საგადასახადო სამსახურების მიერ. ეს არის ეროვნული ინტერესებისთვის საფრთხე. ეს არის საფრთხე საქართველოს მოსახლეობისთვის, ეკონომიკისთვის.

ისინი არ იხდიან გადასახადებს, მათ არ აქვთ სამუშაო ნებართვები, ისინი ძარცვავენ „ქართულ ოცნებასთან“ ერთად, საქართველოს ბიუჯეტს და ისინი უთანასწორო მდგომარეობაში გაყენებენ თქვენ – საქართველოს მოქალაქეებს“, – განაცხადა კუპრაძემ.