ქალბატონო თინა, მე თქვენთვის ერთი შეურაცხყოფაც არ მომიყენებია და ვისმენთ მხოლოდ და მხოლოდ თქვენს უზრდელობას. სირცხვილია, რომ ქალი ასეთ სიტყვებს კადრულობთ – დაგიორგანიზებთ იუსტიციის სასწავლო ცენტრში ზრდილობის გაკვეთილებს, – ასე მიმართა საქართველოს იუსტიციის მინისტრმა, რატი ბრეგაძემ პარლამენტის პლენარულ სხდომაზე ფრაქცია „ერთიანი ნაციონალური მოძრაობის“ თავმჯდომარეს, თინა ბოკუჩავას.

მისივე თქმით, ცუდია, რომ ოპოზიციონერები კონსტრუქციულად საუბარს ვერ მიეჩვივნენ და უზრდელურ ეპითეტებს იყენებენ.

„ამდენი შეურაცხმყოფელი სიტყვა ასე როგორ მოახერხეთ?! მე თქვენთვის ერთი შეურაცხმყოფელი სიტყვაც არ მითქვამს, თუმცა თქვენ ახლა ჩვეულ რეჟიმში, რა თქმა უნდა, თავი გამოიჩინეთ ისევ და ისევ ამ შეურაცხყოფებით. პრემიერთან დაკავშირებითაც გქონდათ გარკვეული კითხვა და ყველას მიმართ შეურაცხყოფასთან დაკავშირებითაც გეტყვით პირდაპირ – ნამდვილად ამაყი ვარ, რომ ვარ იმ გუნდში, რომელმაც, ქალბატონო თინა, დაასრულა ის სამარცხვინო პრაქტიკა, რაც თქვენს ხელისუფლებას ჰქონდა. ასევე ამაყი ვარ, რომ ვარ იმ პოლიტიკურ გუნდში, რომლის ფარგლებშიც ვიზალიბერალიზაცია მოხდა. ასევე, ამაყი ვარ, რომ ვარ იმ გუნდში, რომელმაც მისი მოქმედებების შედეგად, ევროკომისიამ მიიღო ის გადაწყვეტილება, რომ საქართველოს ევროკავშირის საბჭოს წინაშე რეკომენდაცია გაეწია, რომ მიიღოს კანდიდატის სტატუსი. ამით ნამდვილად ამაყი ვარ. ვიცი, რომ თქვენ ეს არ გსიამოვნებთ და მზად ხართ, შეურაცხყოთ ნებისმიერი ადამიანი, რომელიც ამ გზაზე ქმედით ნაბიჯებს გადადგამს, თუმცა მე ამით ნამდვილად ამაყი ვარ.

ქალბატონო თინა, თქვენი გამონათქვამი ახლა რასაც ამბობთ, არის უზრდელობა, პირდაპირ გეუბნებით და სირცხვილია, რომ ქალი ესეთ სიტყვებს კადრულობთ. ახლა მე არ შემოგყვებით ამაში, არ მინდა შემოგყვეთ ამ საუბარში, ეს არის უზრდელობა. იმედია, მედია აფიქსირებს თქვენს გამუდმებულ შეძახილებს – „მონა, მონა“. თქვენ სხვა არაფერი შეგიძლიათ ქალბატონო თინა, გეტყობათ. მე თქვენთვის ერთი შეურაცხყოფაც არ მომიყენებია, ვისმენთ მხოლოდ და მხოლოდ თქვენს უზრდელობას. დაასრულეთ, პარალელურ რეჟიმში ნუ საუბრობთ, ვერ გადაფარავთ, მიჩვეული ხართ ნასწავლი გაქვთ. გაჩუმდით.

ცუდია, რომ ეს ადამიანები ვერ მიეჩვივნენ კონსტრუქციულად საუბარს და იყენებენ უზრდელურ ეპითეტებს. დაგიორგანიზებთ იუსტიციის სასწავლო ცენტრში ზრდილობის გაკვეთილებს და თქვენ [ხაჯიშვილს] გაჩუქებთ წამზომს, რათა ტყუილებით არ ისაუბროთ. დაუკვირდით სიტყვებს, ჩემი მოწოდება იქნება. ქალბატონო თინა, ძალიან მაგარი ხართ, ყოჩაღ. სირცხვილია, ელემენტარულად ქალის ლექსიკაში არ ჯდება ის სიტყვები, რასაც საუბრობთ”, – განაცხადა რატი ბრეგაძემ.

ცნობისთვის, მანამდე, პარლამენტის პლენარულ სხდომაზე თინა ბოკუჩავამ მინისტრს ასე მიმართა: „თქვენ და თქვენი მთავრობის სტანდარტითაც ყველაზე სამარცხვინო პრემიერი ირაკლი ღარიბაშვილი პრეზიდენტ სააკაშვილს სიმულანტად მოიხსენიებდით და ყოვლად ამორალურ განცხადებებს აკეთებდით მისი ჯანმრთელობის შესახებ”.

“ბოლო რამდენიმე დღეა სხვა გზავნილის გაჟღერება დაგავალეს და ამასაც ჩვეული მონური მორჩილებით ასრულებთ. ახლა ირწმუნებით, რომ პრეზიდენტ სააკაშვილის ჯანმრთელობა გაუმჯობესებულია და მისი რუსთავის ციხეში გადაყვანით იმუქრებით. თქვენი უსაგნო და უგვანო მუქარის არავის ეშინია, ბატონო რატი, მაგრამ ერთ კითხვა ნამდვილად მაქვს – თუ წარსულში ადამიანი სიმულანტობდა და სინამდვილეში თავს ყოველთვის გადასარევად გრძნობდა ახლა რა გაუმჯობესებაზე გველაპარაკებით? ტყუოდით წარსულში და ტყუით ახლაც და ასეთ მატყუარად დაგიმახსოვრებთ ქართველი ხალხი,“ – განაცხადა ბოკუჩავამ.

საქართველოს პრეზიდენტის სალომე ზურაბიშვილის განცხადებით, ვაკის პარკში ბოლშევიკების მიერ ანტისაბჭოთა აჯანყების მომზადებისათვის დახვრეტილი 15 ქართველი სამხედროს ისტორია ყველა სკოლაში უნდა ისწავლებოდეს.

როგორც მან ვაკის პარკში სიტყვით გამოსვლისას განაცხადა, ახლა არ არის დაპირისპირებისა და დაყოფის დრო. როგორც პრეზიდენტმა აღნიშნა, თუ ასეთ საკითხებზე ვერ მოხდება გაერთიანება, „მაშინ საქმე ცუდად არის“.

„ამ ადამიანების ისტორია ჩვენს ყველა სკოლაში უნდა ისწავლებოდეს, სხვანაირად ჩვენ ვერ გავზრდით მომავალ თაობას, რომელიც რეალურად დაიცავს ამ ქვეყნის დამოუკიდებლობას და გააძლიერებს მას. ეს ამ ქვეყანას ნამდვილად გახდის ისეთ ძლიერს და ისეთ მისაბაძს, როგორიც ჩვენ ყველას გვსურს და როგორიც სურდათ მათ, ვინც იბრძოდნენ. ეს სკოლებში უნდა ისწავლებოდეს და ჩვენ ყველანი პატივს უნდა მივაგებდეთ. მგონია, რომ დღეს ეს უნდა ყოფილიყო ეროვნული სულის გამოხატულება, ყველა აქ უნდა ყოფილიყო. დღეს არ არის დაყოფის, დაპირისპირების დღე. აქ არანაირი პოლიტიკური, იდეოლოგიური ან სხვა ფორმის მიკერძოება არ შეიძლება არსებობდეს. ასეთ საკითხებზე თუ ვერ ვერთიანდებით, მაშინ ძალიან ცუდად გვაქვს საქმე, მაგრამ მჯერა, რომ ჩვენ შეგვიძლია წარსულზე, მომავალზე გაერთიანება“, – განაცხადა ზურაბიშვილმა.

პრეზიდენტი ასევე გამოდის ინიციატივით, რომ ვაკის პარკში განთავსდეს ყველა იმ მებრძოლის და გმირის მემორიალი, ვინც სამშობლოს შეეწირნენ.

„მინდა გავიხსენო ის შემოთავაზება, რაც მაქვს და ჯერ პასუხი არ მიმიღია. იმედი მაქვს და მჯერა, რომ აქაც ერთ მშვენიერ დღეს პასუხს მე თუ არ მივიღებ, საზოგადოება მიიღებს. მგონი, ვაკის პარკი, სადაც არსებობს უკვე მეორე მსოფლიო ომის მემორიალი, ამ მემორიალის ხეივანზე ცალ-ცალკე და ერთად უნდა გაერთიანდეს ყველა მემორიალი იმიტომ, რომ როდესაც ბავშვები ვაკის პარკში შემოვლენ, მხოლოდ სათამაშოებისკენ კი არ უნდა იხედებოდნენ, უნდა გაიცნონ და ისწავლონ, თუ რა არის ჩვენი ქვეყნის ის მთავარი ფურცელი, რითაც დღემდე მოვედით. ეს რომ ვიცით და ვხედავთ, მერე ვგრძნობთ, რომ ჩვენ სხვა გზა და სხვა ვალდებულება არ გაგვაჩნია გარდა იმისა, რომ ვიყოთ ერთად და გავუძლოთ ყველა მტერს, როგორც გუშინ გაუძლეს, თუნდაც სიკვდილით, მაგრამ გავუძლოთ ყველა მტერს მომავლისთვის”,-განაცხადა პრეზიდენტმა.

მივმართავ „ქართული ოცნების“ ლაჩარ კაც დეპუტატებს – ვნახეთ მცდელობა, რომ მგალობლიშვილს ფიზიკური შეურაცხყოფა მოეყენებინა, ამით აჩვენებენ მხოლოდ სისუსტეს და იმას, რომ სრულ ისტერიკაში არიან, – ამის შესახებ „ნაციონალური მოძრაობის“ დეპუტატმა ანა წითლიძემ ჟურნალისტებს განუცხადა.

მისი თქმით, ლევან მგალობლიშვილს სანქცია უნდა დაუწესდეს და ის ალკოჰოლურ ტესტზე შემოწმდეს.

„მინდა მივმართო „ქართული ოცნების“ ლაჩარ კაც დეპუტატებს, რომლებსაც ჰგონიათ, რომ ქალ დეპუტატებთან შეუძლიათ ფიზიკური და სიტყვიერი შეურაცხყოფა – ჩვენ ვნახეთ მცდელობა, რომ ფიზიკური შეურაცხყოფა მოეყენებინა მგალობლიშვილს. ამით აჩვენებენ მხოლოდ სისუსტეს და იმას, რომ არ აქვთ კითხვებზე პასუხები. ამით აჩვენებენ იმას, რომ არიან სრულ ისტერიკაში. თუ ეს არის პარლამენტი, ერთადერთი, რაც უნდა გააკეთოს ახლა ბატონმა ვოლსკიმ ის არის, რომ დაუწესოს სანქცია. ოპოზიციონერ დეპუტატებს ისე უწესებენ სანქციებს, როგორც უნდათ, მათ შორის, ფინანსურს. ამიტომ მგალობლიშვილს უნდა დაუწესონ სანქცია იმასთან დაკავშირებით, რაც მან იკადრა დარბაზში და ვითხოვთ დაუყოვნებლივ შეამოწმონ ალკოჰოლურ ტესტზე“, – განაცხადა წითლიძემ.

ინფორმაციისთვის პარლამენტის პლენარულ სხდომაზე “ქართული ოცნების” დეპუტატმა ლევან მგალობლიშვილმა ოპოზიციონერ კოლეგას, თინა ბოკუჩავას შეურაცხმყოფელი რეპლიკით მიმართა.

როგორც ჩანს, ეს არის ჩვენი ბედი, რომ სულ ამ თხოვნაში ვართ, რომ გაყვანილი იყოს ჩვენი ტერიტორიიდან უცხოეთის ჯარები და დაგვიბრუნდეს ტერიტორიული მთლიანობა, – ამის შესახებ პრეზიდენტმა სალომე ზურაბიშვილმა „ვაკის პარკში“ განაცხადა, სადაც ანტისაბჭოთა აჯანყების მომზადების გამო ბოლშევიკების მიერ დახვრეტილთა მემორიალთან იმყოფებოდა.

ბოლშევიკების მიერ ანტისაბჭოთა აჯანყების მომზადებისათვის დახვრეტილი „სამხედრო ცენტრის“ წევრების მემორიალთან სამოქალაქო პანაშვიდი გადაიხადეს, სადაც სალომე ზურაბიშვილმა სიტყვით გამოსვლისას 15 ქართველი სამხედროს ეროვნული გმირის ღვაწლზე ისაუბრა. ასევე აღნიშნა, რომ ქვეყანა, რომელიც საკუთარ ისტორიას არ იცნობს, თავის ისტორიას სათანადო პატივს არ სცემს, ნელ-ნელა კარგავს იდენტობას და სულიერ ძალას.

„100 წელი გავიდა მას შემდეგ, რაც აქ, „ვაკის პარკში“, ზუსტად რომელ ადგილას, მე მგონი, არავის ახსოვს და არ არის დანიშნული ეს ადგილი, დახვრიტეს ის ადამიანები, რომლებიც ნამდვილად საქართველოსთვის, დამოუკიდებლობის, თავისუფლებისთვის იბრძოდნენ. ჩვენ გვახსოვს იუნკრების უკანასკნელი ბრძოლა, რომელსაც შემდეგ მოჰყვა თბილისში საბჭოთა ჯარების, რუსეთის ჯარების შემოსვლა და რომლის შემდეგაც საქართველომ დამოუკიდებლობა დაკარგა, გახდა რუსეთის ოკუპაციის ქვეშ მყოფი ქვეყანა, მაგრამ ამას შემდგომ მოჰყვა და ჩვენ ამ ნაწილს ნაკლებად ვიხსენებთ, ამას შემდგომ მოჰყვა საზოგადოების პროტესტი. სხვათა შორის, ეს პროტესტი თბილისის უნივერსიტეტის სტუდენტებით დაიწყო, იქ იყო პირველი საზოგადოებრივი გამოსვლები და პროტესტი. ეს მუხტი იმდენად დიდი იყო, რომ იმ დროინდელმა საბჭოთა ხელისუფლებამ 26 მაისის აკრძალვა ვერ გაბედა, პირველ წელს, 1922 წელს. შემდგომ კი, 26 მაისის არა თუ აკრძალვა, არამედ, როგორც ვიცით, ხსენებაც ნებადართული არ იყო. 1922 წელს ეს მუხტი მთელს საქართველოში გაიშალა, ჯერ დაიწყო სვანეთით, ცნობილია სვანეთის აჯანყება, შემდეგ მოჰყვა რაჭა-ლეჩხუმის პროტესტი, შემდგომ გაიშალა დიდ ქალაქებზე- თბილისი, ქუთაისი, ბათუმი და არა მხოლოდ. ამ დროს, პატრიარქი ამბროსი ხელაია მიმართავს გენუის კონფერენციას და იქ, საჯაროდ ითხოვს რუსეთის საოკუპაციო ჯარების საქართველოდან გაყვანას. როგორც ჩანს, ეს არის ჩვენი ბედი, რომ სულ ამ თხოვნაში ვართ, რომ გაყვანილი იყოს ჩვენი ტერიტორიიდან უცხოეთის ჯარები და ჩვენ დაგვიბრუნდეს, საქართველოს დაუბრუნდეს ქვეყნის ტერიტორიული მთლიანობა. ამ დროს, 1922 წელს იქმნება სამხედრო ცენტრი, ერთი მხრივ და დამოუკიდებლობის კომიტეტი, რომელშიც შედიან იმ დროინდელი პოლიტიკური პარტიები და ეს სამხედრო ცენტრიც ამისი ნაწილი ხდება და ეს ჯგუფი ამზადებს მთავარ აჯანყებას. ეს არის ის მთავარი საფუძველი, როს გამოც აქ, ვაკის პარკში, 1923 წლის 21 მაისს, დილის 04:30 საათზე ის 15 პიროვნება, დახვრიტეს რომლებსაც დღეს, ჩვენ პატივს მივაგებთ. მგონია, რომ ეს პიროვნებები ჩვენს ისტორიაში ძალიან მნიშვნელოვანი არიან, ისინი არიან სიმბოლო იმ გაგრძელებული ბრძოლისა, რომელიც შემდეგ წლების მანძილზე გაიშალა, ამ ბრძოლის სხვადასხვა ძლიერი ეპიზოდები იყო, იმ სულისკვეთების, რომ საზოგადოებამ, თითოეულმა ქართველმა, არცერთმა არ დაკარგა იმედი, რომ დამოუკიდებლობის, თავისუფლების დრო დაბრუნდებოდა. ამიტომ, ამ ადამიანების მიმართ ჩვენ ვალდებულება გვაქვს, რომ არა მხოლოდ მათ, როგორც დღეს გადავცემთ მათ შთამომავლობას ეროვნული გმირის წოდებას და ამას საზოგადოებას ვაცნობთ, არამედ ჩვენ ვალდებულება გვაქვს, რომ მათი სახელები ვიცოდეთ, მათი ისტორია ვიცოდეთ და რაც მთავარია, მომავალ თაობებს მათი ისტორია გადავცეთ. ქვეყანა, რომელიც რომელიც თავის ისტორიას არ იცნობს, თავის ისტორიას სათანადო პატივს არ სცემს, ნელ-ნელა კარგავს თავის იდენტობას და სულიერ ძალას. ჩვენ გვაქვს ბევრი პრეტენზია იდენტობაზე, კულტურაზე, დიდ მომავალზე და დიდ წარსულზე, მაგრამ ეს ყველაფერი დამოკიდებულია, სწორედ იმაზე, თუ რამდენად ვიცით ჩვენი ისტორია“, – განაცხადა სალომე ზურაბიშვილმა.

პარლამენტის პლენარულ სხდომაზე ვითარება დაიძაბა. „ქართული ოცნების“ დეპუტატმა ლევან მგალობლიშვილმა ოპოზიციონერ კოლეგას, თინა ბოკუჩავას „ნაბიჭვარი“ უწოდა.

მგალობლიშვილის შეურაცხმყოფელ რეპლიკას, „ნაციონალური მოძრაობის“ დეპუტატის ანა წითლიძის მხრიდან რეაქცია მოჰყვა.

მან მმართველი პარტიის დეპუტატს ქაღალდები ესროლა.

ანა წითლიძის მიერ ლევან მგალობლიშვილის მისამართით ფურცლების სროლის შემდეგ,მგალობლიშვილმა მიკროფონი მოხსნა და ცდილობდა, ის ანა წითლიძისთვის ესროლა, თუმცა მანდატური ჩაერია. უმრავლესობის წევრებმა ლევან მგალობლიშვილი სხდომათა დარბაზიდან გაიყვანეს.

ვითარება მას შემდეგ დაიძაბა, როდესაც რატი ბრეგაძემ მიხეილ სააკაშვილის საქმეზე სტრასბურგის სასამართლოს გადაწყვეტილება შეაფასა, რა დროსაც ბოკუჩავამ მინისტრს სიტყვა გააწყვეტინა და მიმართა, რომ ის ტყუილს ამბობდა.

„რაც შეეხება მსჯავრდებულ მიხეილ სააკაშვილის საჩივრებს, პირველად 2022 წლის თებერვალში, ადამიანის უფლებათა ევროპულმა სასამართლომ განსახილველ საქმეთა სიიდან ამორიცხა სააკაშვილის საჩივარი პენიტენციურ სისტემაში მისი მკურნალობისა და მასთან მოპყრობის საკითხებთან დაკავშირებით. ევროპული სასამართლოს შეფასებით ამ საქმესთან დაკავშირებით არ არსებობდა ადამიანის უფლებები დაცვის თვალსაზრისით რაიმე განსაკუთრებული გარემოება. ბექა ძამაშვილს ვთხოვ, რომ ამობეჭდოს გადაწყვეტილება ახლავე, მარკერით გახაზეთ და თუკი რომელიმე სიტყვა, რომელსაც ვამბობ არ შეესაბამება სტრასბურგის გადაწყვეტილებას, მერე გააკეთოს თინა ბოკუჩავამ განცხადება. დამშვიდდით, ქალბატონო თინათინ, რატომ ღელავთ ასე ძალიან?!“- განაცხადა მინისტრმა გამოსვლისას. რატი ბრეგაძის ამ განცხადებას, თინა ბოკუჩავამ სიცრუე უწოდა და მინისტრს კორექტულობისკენ მოუწოდა.

საქართველოს პრემიერ-მინისტრ ირაკლი ღარიბაშვილის ხელმძღვანელობით მთავრობის ადმინისტრაციაში ევროინტეგრაციის კომისიის სხდომა გაიმართა.

მთავრობის ადმინისტრაციის ინფორმაციით, სხდომაზე იმსჯელეს საქართველოსთვის კანდიდატის სტატუსის მინიჭებასთან დაკავშირებით ევროკომისიის დადებით რეკომენდაციაზე. ხაზი გაესვა, რომ აღნიშნული გადაწყვეტილება უმნიშვნელოვანესი წინ გადადგმული ნაბიჯია საქართველოს ევროინტეგრაციის გზაზე და ქვეყანა გააგრძელებს რეფორმებს.

მათივე ცნობით, კომისიის სხდომაზე წარმოდგენილი იყო ყველა ის უწყება, რომლებიც წლების განმავლობაში მონაწილეობდნენ აღნიშნული რეფორმების განხორციელებაში. კომისიის წევრებმა იმსჯელეს რეკომენდაციების შესრულებაზე და ამ პროცესში სხვადასხვა უწყების კოორდინირებულ მუშაობაზე.

შეხვედრაზე განიხილეს მომავალი წლის დღის წესრიგი, ასევე − თუ როგორ უნდა გადაიდგას კონკრეტული ნაბიჯები იმისთვის, რომ საქართველომ განაგრძოს რეფორმების იმპლემენტაცია.