ბათუმში, კორპუსიდან გადმოვარდნის შედეგად დაშავებული 15 წლის გოგონა კლინიკაში გარდაიცვალა.
ცნობისთვის, ბათუმში, ლორიასა და პუშკინის ქუჩების კვეთაზე მდებარე კორპუსიდან 15 წლის გოგო გვიან ღამით გადმოვარდა. მოზარდი სასწრაფო-სამედიცინო დახმარების ბრიგადამ კლინიკაში გადაიყვანა.
თვითმხილველების თქმით, 15 წლის მოზარდი მსუბუქ ავტომობილს დაეცა.
სახალხო დამცველის, ლევან იოსელიანის განცხადებით, ადამიანის ორიენტაციაზე მინიშნება მისთვის მიუღებელია.
ამ განცხადებით იოსელიანი გამოეხმაურა „ქართული ოცნების“ თავმჯდომარის, ირაკლი კობახიძის განცხადებას, რომ თსუ-ში მომხდარ ინციდენტში მონაწილე ახალგაზრდებს „ყველანაირი ორიენტაცია აქვთ არეული“.
„ადამიანის ორიენტაციაზე ნებისმიერი მინიშნება ჩემთვის მიუღებელია, ვინაიდან ეს არის საქართველოს კონსტიტუციით და კანონმდებლობით დაცული“, – განაცხადა ლევან იოსელიანმა.
გარდა ამისა, იოსელიანი გამოეხმაურა ჭიათურის მაღაროელების პროტესტს და ხელისუფლებას მოუწოდა, რომ დამსაქმებელსა და დასაქმებულებს შორის მედიაცია მოახდინოს.
„ყოველთვის მზად ვართ, მედიატორის როლი შევასრულოთ ასეთ პროცესში, მაგრამ აქ, რამდენადაც ჩემთვის ცნობილია, პრობლემა არის კერძო სუბიექტებს შორის და ჩვენ მოვუწოდებთ სახელმწიფოს, რომ ამ თვალსაზრისით მაქსიმალური გააკეთოს – მოახდინოს მედიაცია დამსაქმებელსა და დასაქმებულებს შორის, რომ მათი პირობები გაუმჯობესდეს და შეთანხმება მოხდეს კონკრეტულ საკითხებზე. ჩვენი მანდატის ფარგლებში, თუ საჭირო იქნება, მონაწილეობას მივიღებთ“, – განაცხადა ლევან იოსელიანმა.
ცნობისთვის, ცნობისთვის, „ქართული ოცნების“ თავმჯდომარის, ირაკლი კობახიძის განცხადებით, თბილისის სახელმწიფო უნივერსიტეტში მომხდარი ინციდენტი, რა დროსაც სტუდენტებმა კობახიძეს კიბეზე ჩასვლისას რუსული ვალუტა ესროლეს, ტელეკომპანია „ფორმულას“ მოწყობილი პროვოკაციაა. კობახიძის განმარტებით, ინციდენტში მონაწილე ახალგაზრდები, სწორედ ამ ტელეკომპანიასთან არიან აფილირებულები და ამ შემთხვევაში მათი სტუდენტობა არაფერ შუაშია. ამასთან, მისივე თქმით, ამ ახალგაზრდებს ყველანაირი ორიენტაცია არეული აქვთ.
„მგონია, რომ ეს ადამიანები უნდა მოექცნენ სწორ რელსებზე, საჭიროა, რომ ბიჭებმა ცოლები მოიყვანონ, გოგოები დაქორწინდნენ, გამრავლდნენ და ა.შ. მათი ყველანაირი ორიენტაცია, პოლიტიკურიდან დაწყებული, უნდა გამოსწორდეს, ეს არის ჩვენი ამოცანა. ჩვენ ყველაფერს გავაკეთებთ ამისთვის, ჩვენ ყველაფერს გავაკეთებთ ამ ახალგაზრდების გადასარჩენად“, – განაცხადა კობახიძემ.
2023 წელს ხელისუფლებების „აყირავების“ მცდელობაში აშშ-ის ბრალდება არაერთმა ქვეყანამ წაუყენა: თურქეთი (პრეზიდენტი რეჯეფ თაიპ ერდოღანი, „მეორე ფრონტი“), ისრაელი (სასამართლოს რეფორმირების ირგვლივ აქციები), მექსიკა („შპიონაჟი“). პარალელურად, „აყირავების“ პროექტები გააქტიურდა საქართველოშიც, სადაც აშშ-ის მაღალი ხარისხის ჩართულობა დაფიქსირდა მარტში მიმდინარე აქციების ორგანიზება-მიმდინარეობასა და შემდგომ პერიოდში რა დროსაც ღონისძიებები გატარდა ხელისუფლების სამივე შტოს (აღმასრულებელი, საკანონმდებლო, სასამართლო) წინააღმდეგ, – ამის შესახებ „ხალხის ძალის“ წევრი, დავით ქართველიშვილი, სოციალურ ქსელში წერს.
მისი თქმით, ამერიკის შეერთებული შტატები ცდილობს, სხვადასხვა სახელმწიფოდან მისთვის არასასურველი ხელისუფლების მოშორებას, ამ ქვეყნებს შორის კი, სამწუხაროდ, საქართველოც აღმოჩნდა, რაშიც მარტში მომხდარი ფაქტები გვარწმუნებს.
„2023 წელს ხელისუფლებების „აყირავების“ მცდელობაში აშშ-ის ბრალდება არაერთმა ქვეყანამ წაუყენა: თურქეთი (პრეზიდენტი რეჯეფ თაიპ ერდოღანი, „მეორე ფრონტი“), ისრაელი (სასამართლოს რეფორმირების ირგვლივ აქციები), მექსიკა („შპიონაჟი“). პარალელურად, „აყირავების“ პროექტები გააქტიურდა საქართველოშიც, სადაც აშშ-ის მაღალი ხარისხის ჩართულობა დაფიქსირდა მარტში მიმდინარე აქციების ორგანიზება-მიმდინარეობასა და შემდგომ პერიოდში რა დროსაც ღონისძიებები გატარდა ხელისუფლების სამივე შტოს (აღმასრულებელი, საკანონმდებლო, სასამართლო) წინააღმდეგ. ამ თემას ჩვენ გავყოფთ რამდენიმე ნაწილად და დავუთმობთ რამდენიმე დღეს განსახილველად. დესტრუქციული ქმედებების ანალიზისას მათში აშშ-ის მოქმედი ადმინისტრაციის როლისა და ადგილის განსაზღვრის მიზნით ჯერჯერობით განვიხილოთ ძირითადი გამოვლენილი ტენდენციები: ამერიკული მხარისთვის სულ უფრო მიუღებელი ხდება ხელისუფლების სათავეში „ქართული ოცნების“ ყოფნა, ამიტომ იყენებს საქართველოსა და მის ფარგლებს გარეთ მის ხელთ არსებულ ყველა ბერკეტს ქვეყანაში ხელისუფლების შესაცვლელად;
ამ ეტაპისთვის შტატების მიერ გამოყენებული „მოდუს ოპერანდი“ ანალოგიურია იმისა, რაც მათ 2014 წლის „მაიდანის“ რევოლუციის შემდეგ გამოიყენეს უკრაინაზე ფართომასშტაბური კონტროლის დასამყარებლად;
„აქტორები“, რომლებიც ჩართული იყვნენ 2014 წლის და შემდგომ მოვლენებში, ამჟამად მოსული არიან აშშ-ის სათავეში (ჯო ბაიდენი, ვიქტორია ნულანდი, ჯეიკ სალივანი) და, დიდი ალბათობით, ფორსირებენ რევოლუციურ პროცესებს იმ ქვეყნებში, რომლებითაც დაინტერესებულნი არიან;
საქართველოში განვითარებული პროცესი („რუსული კანონი“) დაფიქსირდა ისრაელში, სადაც პროტესტი დაიწყო „საერთო სასამართლოების“ კანონპროექტის წინააღმდეგ, თუმცა რეალურად მიმართული იყო ნეთანიაჰუს მთავრობის „ასაყირავებლად“, რომელიც, ჩვენი მთავრობის მსგავსად, მიუღებელია ბაიდენისთვის;
ვითარება აჩვენებს, რომ აშშ აშანტაჟებს და ზეწოლას ახდენს (მათ შორის ფინანსებისა და სანქცირების ინსტრუმენტების გამოყენებით) სხვადასხვა უწყებებზე, ხელს უწყობს იქ საკუთარი გავლენის აგენტების ინტეგრაციას;
ამ ეტაპისთვის აშშ-ის მიერ გატარებული პოლიტიკის შედეგად იქმნება დაპირისპირება როგორც ასაკობრივ (ახალგაზრდების დაპირისპირება „პენსიონერებთან“), ასევე შიდა ინსტიტუციურ საფეხურებზე, რაც ქმნის სამომავლოდ ვითარების გამწვავების რისკებს;
იმის თვალსაჩინო მაგალითს, რომ საკუთარ მიზნებს ამა თუ იმ ქვეყანაში აღარც ნიღბავენ „დემოკრატიის განვითარების“ მანტიით, გვაძლევს 9 თვის წინ ნიკარაგუაში განვითარებული მოვლენები, სადაც ადგილობრივმა ხელისუფლებამ უარი განაცხადა „აგრემანის“ გადაწყვეტილებაზე, ქვეყანაში აშშ-ის ახალი ელჩის, უგო როდრიგესის მისაღებად. ეს მოხდა მას შემდეგ, რაც სენატის საკომიტეტო მოსმენებზე ელჩობის კანდიდატი პირდაპირ საუბრობდა ნიკარაგუაში ხელისუფლების „აყირავებაზე“ და ამ საქმეში საყრდენ ძალად პირდაპირ ასახელებდა ორ ორგანიზაციას: USAID და Freedom House.
ამერიკის მოქმედი ადმინისტრაციის ძირითადი სტრატეგია, „გათიშე და იბატონე“, არახალია და მის ფარგლებში ბაიდენის „თეთრი სახლი“ იყენებს „მათრახისა და თაფლაკვერის“ ტაქტიკას. კერძოდ, გავლენის აგენტურა მასობრივად ინტეგრირდება სხვადასხვა სახელმწიფო უწყებებში, ხოლო შემდგომ ამ უწყებების ერთმანეთთან აპირისპირებენ. მათთვის არასასურველი გადაწყვეტილების არმიღების უზრუნველსაყოფად გამოიყენება ე.წ. ფერადი რევოლუციების ტექნოლოგია, რაც 2023 წელს დატესტეს ისრაელსა („სასამართლო რეფორმა“) და საქართველოში („რუსული კანონი“).
ამ ეტაპისთვის უკვე გამოვლენილია ორი სავარაუდო აქტორი, რომლებიც, დიდი ალბათობით, კურირებენ საქართველოში მიმდინარე პროცესებს: ვიქტორია ნულანდი (სახდეპი) და ტომ პალმერი (ლიბერტარიანული ფრთა, Atlas Network-ის ქსელის ხელმძღვანელი). ამ მომენტიდან ჩვენს „სერიალში“, ალბათ, ყველაზე საინტერესო ნაწილი იწყება. „დარჩით ჩვენთან, არ გადართოთ“, – წერს დავით ქართველიშვილი.
რუსეთ -უკრაინის ომის 474-ე დღე
უკრაინის თავდაცვის ძალებსა და საოკუპაციო ძალებს შორის, გასული დღე-ღამის განმავლობაში 25 შეტაკება მოხდა, – ამის შესახებ უკრაინის შეიარაღებული ძალების გენერალური შტაბის დილის ანგარიშშია აღნიშნული.
„მტრის ძირითადი ძალისხმევა მიმართულია ლიმანის, ბახმუტის, ავდიივკასა და მარინკას მიმართულებებზე, მძიმე ბრძოლები გრძელდება. გასული დღის განმავლობაში 25 საბრძოლო შეტაკება მოხდა“, – აცხადებენ გენშტაბში.
უწყების ცნობით, რუსულმა ძალებმა, გასული დღე-ღამის განმავლობაში, ერთი სარაკეტო და 36 საჰაერო დარტყმა განახორციელეს და უკრაინის ჯარების პოზიციები და სამოქალაქო დასახლებები მრავალჯერადი სარაკეტო სისტემებიდან 38-ჯერ დაბომბეს.
“სარაკეტო და საავიაციო დარტყმების განხორციელების რისკი მთელი უკრაინის ტერიტორიაზე მომავალშიც მაღალი რჩება“, – აცხადებენ უკრაინის გენშტაბში.
უწყების ცნობით, უკრაინის თავდაცვის ძალების ავიაციამ, გასული დღე-ღამის განმავლობაში, 6 დარტყმა განახორციელა იმ ადგილებში, სადაც რუსეთის შეიარაღებული ძალების პირადი შემადგენლობა იყო დისლოცირებული.
ამასთან, უკრაინის სარაკეტო და საარტილერიო ქვედანაყოფებმა რუსული ძალების მართვის 2 პუნქტს, ორ საარტილერიო ქვედანაყოფსა და მტრის სარადარო სადგურს დაარტყეს.
“უკრაინამ რუსეთის ტყვეობიდან 95 ჯარისკაცი გაათავისუფლა” – ინფორმაციას უკრაინული მედია ტყვეებთან დაკავშირებულ საკითხებზე მომუშავე საკოორდინაციო შტაბზე დაყრდნობით ავრცელებს.
მათივე ინფორმაციით, გათავისუფლებულებს შორის არიან უკრაინის შეიარაღებული ძალების 51 წარმომადგენელი (მათ შორის თავდაცვის ძალების 15 წევრი), ეროვნული გვარდიის 29 წევრი, 11 მესაზღვრე და ოთხი სამხედრო მეზღვაური. მათგან ორი ოფიცერია, დანარჩენები კი რიგითები და სერჟანტები არიან.
საკოორდინაციო შტაბში აცხადებენ, რომ შესაძლებელი გახდა დამცველების დაბრუნება, რომლებიც კერძო სამხედრო დაჯგუფება „ვაგნერის“ და ქვედანაყოფ „ახმატის“ ტყვეობაში იმყოფებოდნენ.
გათავისუფლებულებს შორის არიან მარიუპოლის (მათ შორის „აზოვსტალის“) და კუნძულ „ზმეინის“ დამცველები, ტყვეები ჩერნობილის ატომური ელექტროსადგურიდან. 27 გათავისუფლებული დამცველი დონეცკის მიმართულებას (მათგან ხუთი ქალაქ ბახმუტის მახლობლად) იცავდა. ასევე არიან ხარკოვის, ზაპოროჟიეს, ხერსონის, ლუგანსკის და სუმის მიმართულებების დამცველები.
კახოვკას კაშხლის განადგურებასთან დაკავშირებით სისხლის სამართლის საერთაშორისო სასამართლომ გამოძიება დაიწყო, – ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.
„ბოლო დღეებში, სისხლის სამართლის საერთაშორისო სასამართლოს წარმომადგენლები ხერსონის ოლქს ეწვივნენ. სტიქიის შემდეგ პირველივე დღეს გენერალურმა პროკურორმა სტიქიის გამოძიების თხოვნით ICC-ის პროკურატურას მიმართა და მუშაობა უკვე დაწყებულია. ძალიან მნიშვნელოვანია, რომ საერთაშორისო მართლმსაჯულების წარმომადგენლებმა საკუთარი თვალით ნახეს რუსეთის ტერორისტული აქტის შედეგები და თავად გაიგეს, რომ რუსული ტერორი გრძელდება და გრძელდება დატბორილი ტერიტორიის, ევაკუაციის ზონის ყველაზე ცინიკური და სასტიკი დაბომბვით“, – აღნიშნა ზელენსკიმ.
მისი თქმით, მთავრობა ხელს უწყობს სისხლის სამართლის საერთაშორისო სასამართლოს გამოძიებას დაზარალებულ რაიონებში, მოწმეებზე, ყველა ინფორმაციასა და მტკიცებულებაზე სრული წვდომით.
ვოლოდიმირ ზელენსკიმ ასევე ხაზი გაუსვა, რომ მისი მთავრობა დატბორილი ტერიტორიებიდან ევაკუაციაში 4 000 ადამიანს დაეხმარა.
„უმძიმესი მდგომარეობაა ხერსონის ოლქის დროებით ოკუპირებულ ნაწილში“, – აღნიშნა უკრაინის პრეზიდენტმა.
ცნობისათვის, უკრაინის ხელისუფლების წარმომადგენლებმა გუშინ განაცხადეს, რომ კახოვკას ჰესის განადგურებას მინიმუმ 14 ადამიანის სიცოცხლე ემსხვერპლა.
12 ივნისს ქუთაისში +30 გრადუსი და მზიანი დღეა მოსალოდნელი, ღამით კი +18 გრადუსი იქნება. ოზურგეთში იწვიმებს. დღისით +29 გრადუსი დაფიქსირდება, ღამით კი +18 გრადუსია ნავარაუდევი. ბათუმში დღისით ჰაერი +27 გრადუსამდე გათბება, ღამით კი +19 გრადუსი დაფიქსირდება. იწვიმებს.
ფოთში დღისით +28 გრადუსი დაფიქსირდება, ღამით კი +18 გრადუსია მოსალოდნელი. ზუგდიდში დღისით ტემპერატურა +30 გრადუსს მიაღწევს, ღამით კი +19 გრადუსია ნავარაუდევი. +28 გრადუსი და წვიმიანი დღეა მოსალოდნელი სოხუმში, ღამით +18 გრადუსი დაფიქსირდება.
მესტიაში დღისით +26 გრადუსი, ღამით კი +10 გრადუსი დაფიქსირდება. იწვიმებს. ამბროლაურში ჰაერი დღისით +29 გრადუსამდე გათბება, ღამით კი +16 გრადუსი დაფიქსირდება. მოსალოდნელია ნალექი.
ჭიათურაშიც იწვიმებს. დღისით +30 გრადუსია მოსალოდნელი, ღამით კი +18 გრადუსი. ახალციხეში დღისით ჰაერი +29 გრადუსამდე გათბება, ღამით კი ტემპერატურა +12 გრადუსამდე დაიწევს. მოსალოდნელია წვიმა.
ბორჯომშიც იწვიმებს. დღისით +30 ღამის ღამით კი +12 გრადუსი დაფიქსირდება. ბაკურიანში დღისით +25 გრადუსია მოსალოდნელი, ღამით +10 გრადუსი დაფიქსირდება. მოსალოდნელია ნალექი.
გორში დღისით +28 გრადუსია მოსალოდნელი, ღამის განმავლობაში კი +17 გრადუსი დაფიქსირდება. იწვიმებს. ცხინვალში დღისით ჰაერს ტემპერატურა +27 გრადუსი იქნება, ღამით კი +16 გრადუსი დაფიქსირდება. მოსალოდნელია ნალექი.
გუდაურშიც წვიმას ვარაუდობენ. დღისით +20 გრადუსია ნავარაუდევი, ღამით კი ჰაერის ტემპერატურა +9 გრადუსი იქნება. ანალოგიური ამინდია მოსალოდნელი ომალოშიც, სადაც დღისით +22, ღამით კი +7 გრადუსი დაფიქსირდება.
ლაგოდეხში ჰაერის ტემპერატურა დღის განმავლობაში +32 გრადუსი იქნება, ღამით კი +17 გრადუსი დაფიქსირდება. თელავში დღისით +30 გრადუსი დაფიქსირდება, ღამით კი +16 გრადუსია ნავარაუდევი. მოსალოდნელია წვიმა.
გურჯაანში დღისით +31 გრადუსი, ღამით კი +16 გრადუსი დაფიქსირდება. სიღნაღში დღისით +28 გრადუსი მოსალოდნელი, ღამით +17 გრადუსი დაფიქსირდება.
რუსთავში დღისით +32 გრადუსია მოსალოდნელი, ღამით კი +19 გრადუსი დაფიქსირდება.
თბილისში ჰაერის ტემპერატურა დღისით +31 გრადუსს მიაღწევს, ღამით კი +19 გრადუსი იქნება. მოსალოდნელია მცირე ნალექი.
მოსკოვი კიევთან დიალოგის დამყარების სუსტ საფუძველსაც კი ვერ ხედავს, – ამის შესახებ რუსეთის პრეზიდენტის პრესმდივანმა, დიმიტრი პესკოვმა ტელეარხ „რუსეთი 1“-ისთვის მიცემულ ინტერვიუში განაცხადა.
„ფაქტობრივად, ახლა შეთანხმების წინაპირობები არ არსებობს. უფრო მეტიც, ახლა არ არსებობს თუნდაც სუსტი საფუძველი, რათა ვაწარმოოთ რაიმე სახის დიალოგი“, – განაცხადა პრეზიდენტის პრესმდივანმა.
პესკოვის თქმით, რუსეთთან მოლაპარაკებების დაწყების საშუალებას კიევს „მისი პატრონები“ არ აძლევენ.
„ჩვენ ვხედავთ – ა) – რეჟიმის მხრიდან სურვილის არქონას; ბ) – მოუმზადებლობას; გ) – რეჟიმისთვის ნებართვაზე უარის თქმას პატრონების მხრიდან. ამის თქმა ალბათ ყოველგვარი დიპლომატიური ორაზროვნების გარეშე შეიძლება. ამიტომ მოლაპარაკების წინაპირობები ახლა არ არსებობს”, – აღნიშნა პესკოვმა.
მიხეილ ყაველაშვილის თქმით, აგენტების ამერიკულ კანონს „რუსული“ საქართველოში აშშ-ის საელჩოში დაერქვა. ამ თემაზე „ხალხის ძალის“ წევრმა მედიასთან ისაუბრა.
„სანამ ამ კანონპროექტზე დავიწყებდით საუბარს, წლის ბოლოს გავაკეთეთ კომენტარი, რომ ვიწყებთ ამ საკითხზე მუშაობას. შემდეგ ბრიფინგი გვქონდა, სადაც პირდაპირ დავაანონსეთ, რომ არის კანონი გამჭვირვალობის შესახებ, არასამთავრობო სექტორს ეხება და ა.შ. და პირდაპირ იყო შეტევა. გვქონდა კულუარული ინფორმაცია, რომ როგორც კი გაიგეს ამ კანონის შესახებ, ამერიკის საელჩოს წარმომადგენელმა პირდაპირ თქვა: „ჩვენ ამ კანონს დავარქმევთ რუსულს, ასე მოვნათლავთ და ასე იქნება საზოგადოებისთვის მიწოდებული“, – განაცხადა ყაველაშვილმა.
ვერძი
შესაძლოა, მიმდინარე მოვლენებმა მთლიანად მიიპყროს თქვენი ყურადღება და გაგაღიზიანოთ, რითაც საფრთხის ქვეშ დააყენებთ აღებული საქმის, თუ სამსახურებრივი მოვალეობის შესრულებას. იყავით წინდახედული და უფრო მეტად მოქნილი.
კურო
ნუ დაელოდებით ყველაფრის თავისთავად დალაგებას, თუმცა ზედმეტი შფოთი და აჟიოტაჟიც არაფერს გარგებთ, გულისყურით მოეკიდეთ საქმეს და იზრუნეთ ყველაფრის ხარისხიანად შესრულებაზე.
ტყუპები
მეტი იფიქრეთ და ნუ იჩქარებთ გადაწყვეტილებების მიღებას. სხვათა დაპირებებსაც ნუ მიაქცევთ დიდ ყურადღებას, რადგან შეიძლება, დიდი სურვილის მიუხედავად, ვერ შეძლონ მოცემული პირობის შესრულება.
კირჩხიბი
შესაძლოა, დღეს გაუმკლავდეთ ისეთ საკითხებს, რომლებზეც სხვებს გაბედულება და სითამამე არ ჰყოფნით, თქვენი შეუპოვრობა და ძალისხმევა თავადვე გაგაკვირვებთ, სხვები კი თქვენს შესაძლებლობებში ეჭვის შეტანასაც ვერ გაბედავენ.
ლომი
მოერიდეთ აზარტულ თამაშებს, საჭიროების შემთხვევაში, რჩევისთვის მეგობრებს მიმართეთ. ნუ შეგეშინდებათ გული გაუხსნათ ახლობლებს, მათი თანადგომა დაგეხმარებათ ნებისმიერი სიტუაციის დალაგებაში.
ქალწული
შესაძლოა, დღეს არაკეთილმოსურნეებს გადაეყაროთ, რომლებსაც სურვილი ექნებათ, თქვენი გეგმების რეალიზაციას ხელი შეუშალონ. ღირსეულად იბრძოლეთ თქვენი პოზიციების დასაცავად და ყველაფერი თქვენს სასიკეთოდ დასრულდება.
სასწორი
იმისათვის, რომ აღებული ვალდებულება პირნათლად შეასრულოთ, დიდი ძალისხმევა და ზედმეტი სამუშაოს გაწევაც შეიძლება, მოგიწიოთ. მაგრამ ამას ნუ იდარდებთ. შედეგები მრავლისმეტყველი და სასიამოვნო იქნება.
მორიელი
როგორი კარგი მიზანი, ან განზრახვაც უნდა გამოძრავებდეთ, შესაძლოა, დღეს ისეთ გარემოში მოხვდეთ, რომ უმჯობესი იქნება, თუ საკუთარი გეგმების განხორციელებაზე დროებით უარს იტყვით. მშვიდად დაელოდეთ უკეთესს დროს.
მშვილდოსანი
კარგი იქნება, თუ სამსახურებრივ კონფლიქტს გაერიდებით და არ ჩაერევით გაუგებრობებსა და გარჩევებში, სასურველია, გადახედოთ თქვენს გეგმებს და საქმე სანდო ადამიანებზე გადაანაწილოთ.
თხის რქა
ნუ იქნებით ზედმეტად პრაგმატული და ანგარიშიანი, მოდუნდით და გახალისდით, ცხოვრება სავსეა სასიამოვნო მოულოდნელობებით.
მერწყული
ნებისმიერი საკითხისადმი ფილოსოფიურად მიდგომა და სიტუაციების დადებითი მხრიდან განხილვა, დაგეხმარებათ საქმეების მოგვარებასა და წინსვლაში.
თევზები
დღეს, ზომიერების ფარგლებში, რისკი გამართლებულია, მთავარია, თქვენი სურვილები და შესაძლებლობები ერთმანეთს არ ეწინააღმდეგებოდეს.
„ოპოზიცია არ უნდა იყოს მთხლე, ქუჩა უნდა გრგვინავდეს“, – ამის შესახებ პარტია „კანონის და სამართლის“ ლიდერმა თაკო ჩარკვიანმა განაცხადა.
მისი თქმით, ოპოზიციამ უნდა აიძულოს ხელისუფლება, გადადგას ნაბიჯები და არა ისაუბროს დანაწევრებაზე.
„ახლა რა დროს საუბარია, რომ არ დავდგები ამასთან, იმასთან, მინუს „ნაციონალური მოძრაობა“ და ა.შ. უკვე ეჭვი მაქვს ხელისუფლებას ხომ არ უნდა 12 პუნქტის შესრულება? მგონი ხაზარაძესაც უნდა. როდესაც ხედავ, ხელისუფლება არაფერს აკეთებს, შენ რას ელოდები? რატომ არ გინდა, აიძულო და აიძულო ნიშნავს ქუჩის მომძლავრებას, დანაწევრებაზე საუბარს კი არა. ისეთი განცხადებები კეთდება, შეიძლება, არ მოგვანიჭონ სტატუსი, თუ ვხედავთ, ხელისუფლება არაფერს აკეთებს, მაშინ ოპოზიცია არ უნდა იყოს მთხლე, ქუჩა უნდა გრგვინავდეს“, – აცხადებს თაკო ჩარკვიანი.
ვერსად ნახავთ ჩემს განცხადებას, რომ რუსეთთან ეკონომიკური ურთიერთობის წინააღმდეგი ვარ, პრობლემაა, როდესაც რუსეთთან აღრმავებ ურთიერთობას, ჩართული გაქვს ანტიდასავლური პროპაგანდა და დასავლეთს შორდები, – ამის შესახებ „გირჩი-მეტი თავისუფლების“ ლიდერმა, ზურაბ ჯაფარიძემ საქართველოს პირველ არხს განუცხადა. ჯაფარიძის თქმით, არაერთხელ უთქვამს, რომ რუსეთთან მიმართებით პრობლემა ეკონომიკა არ არის. „არაფერი საწინააღმდეგო არ მითქვამს. რუსეთთან მიმართებით პრობლემა ეკონომიკა არ არის, არაერთხელ მითქვამს. მათ შორის ფრენები იქნებოდა, თუ რუსების შემოსვლა, ჩემი პოზიცია სულ ეგ იყო. პრობლემაა, რომ ევროკავშირი, რომლისკენაც მივდივართ, გვეუბნება, რომ ჩვენი საგარეო უსაფრთხოების პოლიტიკა უნდა იყოს მათთან თანხვედრაში. გვეუბნებიან, რომ მათ ფრენები აკრძალული აქვთ, დასანქცირებულია ავიაციის სექტორი და ჩვენც უნდა ვიყოთ ამის ნაწილი. ამას ვეთანხმები და არა იმას, რომ ზოგადად ეკონომიკური ურთიერთობები არ ასწორებს. მეორე პრობლემა არის ის, რომ როდესაც რუსეთთან აღრმავებ ეკონომიკურ ურთიერთობას და ამ დროს, ჩართული გაქვს ანტიდასავლური პროპაგანდა და დასავლეთს შორდები, ეგ არის პრობლემა. თქვენ ვერსად ნახავთ ჩემს ნათქვამს, რომ მე რუსეთთან ეკონომიკური ურთიერთობის წინააღმდეგი ვარ. მე ეგ არასდროს მითქვამს. შეიძლება, სხვა ოპოზიციურ პარტიებში გეშლებით, რადგან სხვა ოპოზიციური პარტიები გამოდიან ეგეთი განცხადებებით. ეკონომიკური ურთიერთობა ჯამში კარგია და სწორია, მხოლოდ ერთი – ჩვენ არ უნდა ვაღრმავებდეთ ეკონომიკურ ურთიერთობას რუსეთთან და არ უნდა ვშორდებოდეთ ევროპას, პირიქით, ევროპისკენ უფრო უნდა ვაღრმავებდეთ და მეორე, ჩვენ უნდა ვიყოთ თანხვედრაში ევროკავშირთან საგარეო და უსაფრთხოების საკითხებში, მათ შორის ეს კავშირი არის ევროკავშირის სტატუსის მიღება-არ მიღებასთანაც“, – განაცხადა ზურაბ ჯაფარიძემ.
კონსერვატიული პორტალის „საქართველო უპირველეს ყოვლისა” დამფუძნებელი ვატო შაქარიშვილი სოციალურ ქსელში 12 ივნისს, რუსთაველის თეატრში დაგეგმილ შეხვედრასთან დაკავშირებით მიმართვას ავრცელებს იმ ადამიანებისთვის, ვინც საზოგადოებრივი მოძრაობის შექმნის იდეით არიან დაინტერესებულები.
შაქარიშვილი მოუწოდებს საზოგადოებას, ერთობლივად შეიქმნას მძლავრი ორგანიზებული ძალა, რომელიც ღირსეულად შეხვდება ჩვენი ქვეყნის წინაშე არსებულ და მომავალ საფრთხეებს.
„საღამომშვიდობის მეგობრებო, ნაცნობებო, უცნობებო, თანამოაზრეებო, უბრალოდ ახალი საზოგადოებრივი მოძრაობის შექმნის იდეით დაინტერესებულებო! შევხვდებით ხვალ, 20:00 საათზე, რუსთაველის თეატრში. დავიწყოთ, ერთად ვიფიქროთ, ერთად ვიმოქმედოთ, ერთად შევქმნათ მძლავრი ორგანიზებული ძალა, რომელიც ღირსეულად შეხვდება ჩვენი ქვეყნის წინაშე არსებულ და მომავალ საფრთხეებს. არ დავუშვათ საქართველოში რევოლუციური სცენარების განხორციელება! დავიცვათ ჩვენი ქვეყანა აგრესიული ლიბერალური შემოტევისგან! წერტილი დავუსვათ ადამიანების შეურაცხყოფას, ბულინგს, ცილისწამებას! P.S. ნაც-ლიბერალური პროპაგანდისტული საშუალებები ღონისძიებაზე არ დაიშვებიან. პროვოკაციებზე იქნება ადეკვატური პასუხი. საქართველო უპირველეს ყოვლისა!” – წერს ვატო შაქარიშვილი.
შოტლანდიის ყოფილი პირველი მინისტრი 52 წლის ნიკოლა სტერჯენი დააკავეს. ინფორმაციას BBC ავრცელებს.
მედიის ცნობით, საქმე ეხება შოტლანდიის ნაციონალური პარტიის დაფინანსების შესახებ მიმდინარე გამოძიებას.
პოლიციის განცხადებით, ქალი არის ეჭვმიტანილი შოტლანდიის ნაციონალური პარტიის დაფინანსების საქმეზე მიმდინარე გამოძიებაში.
მედიის ცნობით, ახლა ნიკოლა სტერჯენს პოლიცია ჰკითხავს.
სტერჯენის სპიკერმა დაადასტურა, რომ იგი თანამშრომლობდა გამოძიებასთან.
„ნიკოლა გამუდმებით ამბობდა, რომ ითანამშრომლებდა გამოძიებასთან, თუ მას სთხოვდნენ და ასე გააგრძელებს“, – სტერჯენის სპიკერმა.
შოტლანდიის პოლიციამ გამოძიება 2021 წელს წამოიწყო, როდესაც სამართალდამცველებმა მიიღეს საჩივარი 600 000 გირვანქა სტერლინგის არამიზნობრივი ხარჯვის თაობაზე. ეს თანხა აქტივისტებმა შოტლანდიის დამოუკიდებლობის საკითხზე რეფერენდუმის კამპანიის ჩასატარებლად შეაგროვეს.
სტერჯენი შოტლანდიის მთავრობას 2014 2023 წლებში მეთაურობდა. ის მესამე მაღალჩინოსანია, რომელიც შოტლანდიის ნაციონალური პარტიის დაფინანსების საკითხზე მიმდინარე გამოძიების ფარგლებში დააკავეს.
მის: ქ.თბილისი, მ.კოსტავას 59
ტელ: +995 32 93 44 05
ელ.ფოსტა: editor@geotimes.ge
© Geotimes.ge | By view.ge