გახარიას პარტიის წარმომადგენელთა დღევანდელი განცხადება არის მცდელობა, საკუთარი თავი დაარწმუნონ იმაში, რომ მათ რაიმე შეუძლიათ, – ამის შესახებ იურიდიულ საკითხთა კომიტეტის თავმჯდომარის პირველმა მოადგილემ დავით მათიკაშვილმა „ქრონიკაში“ ჩართვისას განაცხადა.

იგი ბარიერის გადალახვის საკითხზე ოპოზიციური პარტიების წარმომადგენლების მიერ გაკეთებულ განცხადებებს გამოეხმაურა.

მისი თქმით, გახარიას პარტიის წარმომადგენელთა დღევანდელი განცხადება ასევე წარმოადგენს მცდელობას, თავიანთი მცირე რაოდენობის მხარდამჭერებიც დაარწმუნონ, რომ ყველაფერს შეძლებენ.

„რა ციფრსაც არ მიუთითებს ხელისუფლება, ჩვენ ყველაფერს გადავლახავთო, ეს ასე არ არის. მათი კარგად იციან, რომ მუშტებს ჰაერში იქნევენ და სინამდვილეში ეს მუშტები არავის მიმართ არ არის განკუთვნილი, გამიზნული და ეს ყველაფერი თვითდაჯერებისთვისაა“, – განაცხადა მათიკაშვილმა.

მისივე თქმით, კვლევებმა აჩვენა, თუ ვის ენდობა საზოგადოება და „ქართული ოცნება“ იქნება ის ძალა, რომელიც არჩევნებში დამაჯერებლად გაიმარჯვებს.

საქართველოს კულტურის მინისტრის თეა წულუკიანის თქმით, თემურ ალასანიას განცხადება ადასტურებს, რომ არავითარ შემთხვევაში არ უნდა დაუშვან „ნაციონალური მოძრაობის“ ხელისუფლებაში დაბრუნება.

წულუკიანმა კომენტარი გააკეთა საქართველოს ყოფილი პრეზიდენტის, მიხეილ სააკაშვილის ბიძის, თემურ ალასანიას იმ განცხადებაზე, სადაც მან აღნიშნა: „სად გინახავთ წართმეული ტერიტორიის მარტო მშვიდობიანი გზით დაბრუნება, დავიჭიროთ სანთელი, სამჯერ შემოვუაროთ აფხაზეთს, ვთქვათ „ფუი, ეშმაკს“ და დაგვიბრუნდება. ეს არ მოხდება“.

თეა წულუკიანის თქმით, ამგვარი განცხადებები მიზნად ისახავს საკუთარი ქვეყნის მშვიდობიანი მომავლისადმი მტრობას.

„თემურ ალასანია რომ ჩვენი ქვეყნის წინააღმდეგ ქმედებებში მავნებლობით სახელგანთქმულია, ეს უკვე ყველამ იცის ჩვენს ქვეყანაში. ის უბრალოდ თავისი ახალი განცხადებებით და გამონათქვამებით ადასტურებს, რომ არავითარ შემთხვევაში არ უნდა დავუშვათ არამც თუ მისი ოჯახის წევრების, უფრო ფართოდ „ნაცმოძრაობის“ და მსგავსების დაბრუნება ხელისუფლებაში, არამედ ქვეყნის მართვაში მონაწილეობაც კი უკიდურესად საშიშია. ამგვარი განცხადებები მიზნად ისახავს მტრობას საკუთარი ქვეყნისადმი, მტრობას საკუთარი სამშობლოს მშვიდობიანი, სტაბილური აწმყოსა და მომავლისადმი. ჩვენ ყველაფერს გავაკეთებთ პოლიტიკურად, რათა ამ ადამიანებს ქვეყნის ბედის მართვაში არავითარი ბერკეტი არ ჰქონდეთ, ვინაიდან ისინი ძალიან, ძალიან საშიშნი არიან“, – განაცხადა თეა წულუკიანმა.

გარემოს დაცვისა და სოფლის მეურნეობის მინისტრმა, ოთარ შამუგიამ მთავრობის სხდომის დასრულების შემდეგ მედიის წარმომადგენლებთან გამართულ შეხვედრაზე რაჭაში სამონადირეო მეურნეობის მოწყობის ლიცენზიის ძალადაკარგულად გამოცხადების მიმართულებით მიმდინარე პროცესები დეტალურად განმარტა.

როგორც მინისტრმა აღნიშნა, სამინისტროსთან მიმდინარე აქცია ლიცენზიის გაუქმების მოთხოვნით აბსოლუტურად უსაფუძვლოა.

„შვიდსაათიანი შეხვედრა შედგა ამბროლაურში, სადაც გარემოს ეროვნული სააგენტოს ხელმძღვანელმა, დაცული ტერიტორიების სააგენტოს ხელმძღვანელმა დეტალურად განუმარტეს პროტესტის მონაწილეებს, თუ რა პროცესები მიმდინარეობდა რაჭაში სამონადირეო მეურნეობის ლიცენზიის გაუქმებასთან დაკავშირებით და მოვუწოდეთ მათ, რომ ჩართულიყვნენ ახალი დაცული ტერიტორიების შექმნასთან დაკავშირებულ პროცესში. მიუხედავად ამ ყველაფრისა, ჩვენ ვხედავთ აქციას სამინისტროსთან, რაც, რა თქმა უნდა, არ არის სასურველი არავისთვის, მით უმეტეს ჩემთვის. ადამიანები სიცივეში ღამეს ათენებენ კარავში, როცა ამის არანაირი საჭიროება და აუცილებლობა არ არსებობს. ეს განვუცხადეთ არაერთხელ, როგორც სიტყვიერად, ასევე წერილობით მივაწოდეთ ინფორმაცია ამ ყველაფრის შესახებ. მინდა მოვუწოდო თითოეულ ჩვენს მოქალაქეს, რომლებიც დღეს პროცესის მონაწილეები არიან, ქალბატონებს, ბატონებს, რომ დაუბრუნდნენ თავიანთ ოჯახებს და დაველოდოთ გარემოს ეროვნული სააგენტოს გადაწყვეტილებას, რომელიც არის სამართლებრივი პროცესი და პირობას გაძლევთ, რომ ეს გადაწყვეტილება იქნება მიღებული ძალიან სწრაფად არაუგვიანეს თვის ბოლოს. კიდევ ერთხელ ვაცხადებ, რომ ყველანაირი წინაპირობა დღეს არის იმისი, რომ ლიცენზია გამოცხადდეს ძალადაკარგულად“, – განაცხადა ოთარ შამუგიამ.

გარემოს დაცვისა და სოფლის მეურნეობის სამინისტროსთან აქციას მოძრაობა „რიონის ხეობის მცველები“ მართავენ. როგორც აქციის წევრები აცხადებენ, ისინი მოითხოვენ 2022 წელს გაცემული ლიცენზიის გაუქმებას, რომლის მიხედვითაც, რაჭის ტყეები 49-წლიანი იჯარით ბიზნესმენ დავით ხიდაშელს გადაეცა.

ბაჩო დოლიძე ლევან ხაბეიშვილის განცხადებას გამოეხმაურა. „ნაცმოძრაობის“ წევრი პარტიის თავმჯდომარის მუქარას ნიკა მელიასთან დაკავშირებით სერიოზულად არ აღიქვამს.

„სანამ თვითონ მიხეილ სააკაშვილმა არ უთხრა, რომ კონკრეტული ადამიანები იყვნენ გარიყულები პოლიტსაბჭოდან, რაზედაც ამდენი ხნის განმავლობაში ვსაუბრობდით და უარყოფდა ახალი მენეჯმენტი, მანამდე ვერ გაიგეს. ​ხაბეიშვილის მუქარა სერიოზულად რანაირად უნდა აღიქვა? საერთო არ უხდება ეს როლი“, – აცხადებს დოლიძე.

„მელიას დიდი ხანია, გარიცხული ჰყავს საკუთარი თავი პარტიიდან, ან მოაწერს ხელს მანიფესტს, რომელსაც სააკაშვილი გაასაჯაროებს, ან კონკრეტული გადაწყვეტილების მიღება მოგვიწევს“, – განაცხადა ლევან ხაბეიშვილმა.

თავის მხრივ, მიხეილ სააკაშვილმა დღეს აღნიშნა, რომ საკუთარ თავზე იღებს „ნაციონალური მოძრაობის“ პოლიტსაბჭოს კოორდინაციას. ფიქრობს, რომ პარტიის გამოცდილი წევრები გარიყულები აღმოჩნდნენ საბჭოდან. მან საკუთარი მოსაზრებები სოციალურ ქსელშიც გამოაქვეყნა.

საქართველოს იუსტიციის მინისტრის რატი ბრეგაძის განცხადებით, მიხეილ სააკაშვილის განცხადებები მეტყველებს, რომ მას არ აქვს გააზრებული, რა დანაშაული ჩაიდინა და კვლავ ცდილობს 2007 წლის 7 ნოემბრის მოვლენების გამართლებას.

აღნიშნული კომენტარით რატი ბრეგაძემ უპასუხა ჟურნალისტის კითხვას, „როგორ შეაფასებდა სასამართლო პროცესზე მიხეილ სააკაშვილის განცხადებას, რომ 7 ნოემბრის მოვლენები პატარკაციშვილის ბრალი იყო“.

„თქვენგან მოვისმინე, ნამდვილად არ მინახავს დღეს სააკაშვილის სასამართლო პროცესზე გამოსვლა. რაც თქვენ განაცხადეთ, გააკეთეთ მისი განცხადების ციტირება, ცალსახად მეტყველებს, რომ ამ ადამიანს არ აქვს გააზრებული, რა დანაშაული ჩაიდინა. მით უმეტეს, ის ამას არც ინანიებს და კიდევ ერთხელ ცდილობს, გაამართლოს მედიაზე თავდასხმა. რაც შეეხება მაგალითად, ტელეკომპანია „იმედს“, 7 ნოემბერი სხვა არაფერი იყო, თუ არა მედიაზე სასტიკი თავდასხმა, ამ სიტყვის პირდაპირი მნიშვნელობით. რომელიმე ადამიანი თუ კიდევ ცდილობს, რომ ეს გაამართლოს, არაფერი აქვს საერთო დემოკრატიის თანამედროვე გაგებასთან“, – განაცხადა რატი ბრეგაძემ.

ამასთან, რატი ბრეგაძის თქმით, როცა ადამიანი ითხოვს შეწყალებას, მას გააზრებული უნდა ჰქონდეს ჩადენილი დანაშაული.

„რაც შეეხება მის მოთხოვნას შეწყალების შესახებ, რბილად რომ ვთქვათ, ცოტათი არათანმიმდევრულია, რადგან როდესაც ადამიანი ითხოვს შეწყალებას, მას გააზრებული და აღიარებული უნდა ჰქონდეს ჩადენილი დანაშაული. შესაბამისად, ეს ადამიანი არათუ აღიარებს ჩადენილ დანაშაულს, არამედ კიდევ ცდილობს, გაამართლოს 7 ნოემბერი, ასევე, თავისუფალ მედიაზე სასტიკი თავდასხმა, რა დროსაც მათ დალეწეს ტექნიკა, ფიზიკურად გაუსწორდნენ ჟურნალისტებს და ა.შ. შესაბამისად, როდესაც ადამიანი არ აღიარებს დანაშაულს, ჩემთვის სრულიად გაუგებარია, რა ფორმით უნდა იყოს ის შეწყალებული იმ დანაშაულის გამო, რომელიც მას „არ ჩაუდენია“. ის თავს მიიჩნევს უდანაშაულოდ იმ ქმედებაში, რაც მთელმა მსოფლიომ იხილა. ვგულისხმობ, იგივე ტელეკომპანია „იმედის“ დარბევას პირდაპირ ეთერში. ამაზე ადამიანმა როგორ უნდა მიიღოს დადებითი გადაწყვეტილება, ჩემთვის პირადად სრულიად წარმოუდგენელია“, – აღნიშნა რატი ბრეგაძემ.

ამავდროულად, რატი ბრეგაძის განცხადებით, მიხეილ სააკაშვილმა საკუთარი ნებით თქვა უარი საქართველოს მოქალაქეობაზე და ქართულ პოლიტიკაში მონაწილეობის არავითარი სამართლებრივი ბერკეტი არ აქვს.

„საზოგადოებას კიდევ ერთხელ უნდა შევახსენო, რომ როდესაც ვსაუბრობთ მსჯავრდებულ სააკაშვილზე, ის იყო მათ შორის მთავარსარდალი, ამ ქვეყნის სახელმწიფოს მეთაურობასთან ერთად და ყველას კარგად უნდა ახსოვდეს, რომ ამ ადამიანმა საკუთარი ნებით, ფაქტობრივად, უარი თქვა საქართველოს მოქალაქეობაზე. დღეს ეს ადამიანი არ არის საქართველოს მოქალაქე და ქართულ პოლიტიკაში მონაწილეობის არავითარი სამართლებრივი ბერკეტი არ აქვს. ის არ არის ამ პარტიის პოლიტიკური წევრიც. შესაბამისად, კიდევ ერთხელ დასტურდება, რასაც ჩვენ ყოველთვის ვამბობდით, რომ „ნაციონალური მოძრაობა“ არის არაფორმალურად მართული პოლიტიკური გაერთიანება, მათ შორის უცხო სახელმწიფოს მოქალაქის მიერ, რაც ვფიქრობ, ნათელი მაგალითია, როგორი არ უნდა იყოს პოლიტიკური პარტია. ალბათ საქართველოს მოსახლეობა კიდევ ერთხელ საკმაოდ მკაცრ პოლიტიკურ განაჩენს გამოუტანს არაფორმალურად მართულ პოლიტიკურ გაერთიანებას. რაც შეეხება მის ჯანმრთელობის მდგომარეობას და განცხადებებს, ვუსურვებ საუკეთესო ჯანმრთელობას“, – აღნიშნა რატი ბრეგაძემ.

რაც შეეხება მიხეილ სააკაშვილის პენიტენციურ დაწესებულებაში გადაყვანის საკითხს, რატი ბრეგაძე ამბობს, რომ როგორც კი იქნება ექიმების რეკომენდაცია, სააკაშვილი გადაყვანილი იქნება პენიტენციურ დაწესებულებაში.

„ჩვენთან პატიმრები არ იყოფიან იმ ნიშნით, როგორი იქნება მათი პოლიტიკური აქტივობა. ის ახლაც პოლიტიკურად აქტიურია და არის კლინიკა „ვივამედში“. როდესაც იქნება ექიმების დასკვნა, ის იქნება გადაყვანილი პენიტენციურ დაწესებულებაში. რა შუაში არის პოლიტიკა და კლინიკა ერთმანეთთან? ის ახლა თავისუფლებაში კი არ არის, ის არის პატიმარი, რომელიც გადის მკურნალობის კურსს და როდესაც დასრულდება მკურნალობის კურსი, უნდა იყოს დაბრუნებული პენიტენციურ დაწესებულებაში. ეს არის ორჯერ ორი ოთხი“, – განაცხადა რატი ბრეგაძემ.

ერევანმა და ბრიუსელმა ევროკავშირის სადამკვირვებლო მისიის სტატუსის შესახებ შეთანხმებას მოაწერეს ხელი, – ამის შესახებ ინფორმაციას Armenpress-ი ავრცელებს.

სომხური მედიის ინფორმაციით, ერევანსა და ბრიუსელს შორის ევროკავშირის მისიის სტატუსის შესახებ შეთანხმებას მოეწერა ხელი.

დოკუმენტი სომხეთის საგარეო საქმეთა მინისტრის მოადგილემ, პარუირ ოვანისიანმა და სომხეთში ევროკავშირის დელეგაციის ხელმძღვანელმა, ვასილის მარაგოსმა შეადგინეს.

„პირველ რიგში, მინდა მადლობა გადავუხადო სომხეთის ხელისუფლებას თებერვალში ამ მისიის მიღებისთვის. ამ მისიამ სომხეთს უკვე ბევრი რამ შესთავაზა სტაბილურობისა და უსაფრთხოების თვალსაზრისით. სტატუსის შესახებ შეთანხმება, რომელიც ჩვენ დღეს გავაფორმეთ, ხელს შეუწყობს უფრო მეტი სამართლებრივი სიზუსტის მოპოვებას, როდესაც საქმე ეხება ქვეყანაში მისიის ყოფნისას სხვადასხვა უფლებებისა და მოვალეობების რეგულირებას“, – განაცხადა ვასილის მარაგოსმა.

სომხეთის საგარეო საქმეთა მინისტრის მოადგილემ, პარუირ ოვანისიანმა აღნიშნა, რომ ევროკავშირის მისიის სტატუსის შესახებ შეთანხმება სომხეთში მისი საქმიანობის უფრო ეფექტურ განხორციელებას შეუწყობს ხელს.

ცნობისთვის, ევროკავშირის სამოქალაქო მისიამ სომხეთში მუშაობა 2023 წლის თებერვალში დაიწყო და სომხეთ-აზერბაიჯანის საზღვრის სომხურ მხარეს ევროპელი დამკვირვებლები პატრულირებენ.