ასარჩევია მშვიდობა და განვითარება ან ომი და ნგრევა. ბოლო 11 წელია, საქართველო წინსვლაზე ორიენტირებული ქვეყანა გახდა და ღრმად ვარ დარწმუნებული, სისხლიანი წარსულის მქონე „ნაციონალურ მოძრაობას“, მის ირგვლივ შემოკრებილ ოპოზიციასა და რეალურად ქვეყნისთვის მომუშავე სახელისუფლებო გუნდს შორის ხალხი არჩევანს მარტივად გააკეთებს, – ამის შესახებ „ხალხის ძალის“ წარმომადგენელმა, დიმიტრი ხუნდაძემ პარლამენტის პლენარულ სხდომაზე განაცხადა.

მისი თქმით, „ვარდების რევოლუციის“ ავტორი, მაწვნის ქილებთან ერთად, საზღვარს კვლავ ქვეყანაში დესტრუქციის მოსაწყობად კვეთს, ხოლო სააკაშვილის ბიძა, რომელიც ქართველთა ლანძღვით გამოირჩევა, ისევ ომზე საუბრობს.

„ამერიკაში ალასანიას სალექციო კურსი ომსა და რევოლუციებზე იმის დასტურია, რომ „ნაციონალური მოძრაობა“ 20 წლის შემდეგაც იმავეს ფიქრობს და იმავეს გეგმავს და თუ ეს ვინმეს მაინც არ სჯერა, ან უგუნურია, ან ცხელი ბომბების მომხრეა საქართველოში. რამდენიმე დღეა, „ნაციონალური მოძრაობა“ ამაყად საუბრობს „ვარდების რევოლუციაზე“ და საზოგადოებას აყვედრის ამ წარსულს. 20 წელი გავიდა მას შემდეგ, მაგრამ „ნაციონალური მოძრაობა“ სისხლის ფერს და სიბნელეს მაინც ვერ იცილებს“, – აღნიშნა დიმიტრი ხუნდაძემ.

ხუნდაძის განცხადებით, „ეს თარიღი არ ეზეიმება ხალხს, რომელთა მეხსიერებაში „ნაცმოძრაობა“ და მიხეილ სააკაშვილი ასოცირდება ქუჩაში გამოტანილ განაჩენებთან, ჩაცხრილულ ბიჭებთან, მოლაშვილების, გირგვლიანების, თეთრაძეების და სხვების წამებასთან, ვალერი გელაშვილისა და კობა დავითაშვილის სასიკვდილოდ ცემასთან, ორი გვამის მოთხოვნასთან, ბიზნესის ტერორთან და ქონების წართმევასთან, სიტყვის თავისუფლების ჩახშობასთან, „იმედის“ პირდაპირ ეთერში შევარდნასთან, ტერიტორიების დაკარგვასთან, ბრძოლის ველზე მიტოვებულ მეომრებთან, საკუთარ სამხედროებზე ომის გადაბრალებასთან“.

​„უბედურების სია ძალიან გრძელია და გასახსენებლად ძალიან მძიმე. მთავარი უბედურება კი ის არის, რომ ამის ჩამდენები დღეს ისევ ეპოტინებიან ქვეყნის მართვას და არათუ ნანობენ, არამედ ზეიმობენ. ეს იმას ნიშნავს, რომ მათ ეს ცოდვები ეცოტავებათ და სურთ ამაზე მეტი. ამის დასტურია სააკაშვილის მიერ გამოცემული მანიფესტი, სადაც, ამ წარსულით, ადამიანის უფლებებზე, სიტყვისა და გამოხატვის თავისუფლებაზე, ქვეყანასა და საზოგადოებაზე ზრუნვას გვპირდება ადამიანის უფლებების დამრღვევი, თავისუფალი სიტყვის ჩამხშობი და ქვეყნის გამანადგურებელი „ნაციონალური მოძრაობა“. რამდენჯერ და რამდენმა უნდა გვირჩიოს ომში ჩართვა – დანილოვი, არესტოვიჩი, პოდოლიაკი, არახამია და მათი უფროსი ძმები – ხან სანქციების მოთხოვნა, ხან მეომრების გაგზავნა, ხან „რუსეთუმეობის“ დაბრალება. მეგობრებო, როგორც 2008 წლის ომია გამოსაძიებელი, ისე საქართველოს ომში ჩართვის ინტენსიური მცდელობაა გამოსაძიებელი“, – განაცხადა დიმიტრი ხუნდაძემ.

„ნაციონალური მოძრაობის“ წევრის, თინა ბოკუჩავას განცხადებით, სამ თვეში ერთხელ პარტიის თავმჯდომარის არჩევნები ვერ ჩატარდება და ეს საკითხი არ განიხილება.

თინა ბოკუჩავას თქმით, სერიოზულ თემებზე უნდა დაიწყოს მსჯელობა.

„ნაცვლად იმისა, რომ მთავარი ოპოზიციური პარტია საქართველოში ებრძოდეს რუსულ რეჟიმს და ემზადებოდეს გეოპოლიტიკური, უმნიშვნელოვანესი არჩევნებისთვის, ამ ადამიანების ლოგიკით, ყოველ სამ თვეში ერთხელ არჩევნები უნდა ვატაროთ? ალოგიკურია, ეს საკითხი ჩვენთვის ამოწურულია, გადავიდეთ სერიოზულ თემებზე. ამ თემის მუდმივი პედალირება მობეზრდა ჟურნალისტების აბსოლუტურ უმრავლესობას, მაყურებელს, ამომრჩეველს, სიამოვნებას იღებს მხოლოდ ივანიშვილი და მისი რეჟიმი. არ განიხილება და ყოველ სამ თვეში ერთხელ არჩევნები ვერ ჩატარდება მაშინ, როდესაც ჩვენ გენერალური არჩევნები უნდა ჩავატაროთ და მოვიგოთ რუსული რეჟიმის წინააღმდეგ“, – განაცხადა თინა ბოკუჩავამ.

რაც შეეხება კითხვას, „ლევან ხაბეიშვილმა პირდაპირ ეთერში მოაწერა ხელი ნიკა მელიას გარიცხვას, მაგრამ არსებობს ოფიციალური დოკუმენტი?“ – ბოკუჩავას განცხადებით, ამ ფორმალურ, ტექნიკურ დეტალებში არ შესულა.

„მელია თუ ითხოვს ცნობას, დარწმუნებული ვარ, რომ შეუძლია, გააკეთოს ასეთი განცხადება, რადგან სხვა პირზე ასეთი განცხადება არ გაიცემა. ნიკა მელიას მაგივრად მე არ გავაკეთებ განცხადებას. მან მიიღო კონკრეტული გადაწყვეტილება და აირჩია პოლიტიკური გზა. ყველას, ვინც ებრძვის ივანიშვილის რეჟიმს ან მომავალში აირჩევს ივანიშვილის რეჟიმთან ბრძოლის გზას, ვუსურვებ წარმატებას, ჩვენთვის ეს საკითხი ამოწურულია“, – აღნიშნა თინა ბოკუჩავამ.

ზუგდიდის საკრებულოში „ნაციონალური მოძრაობის“ ფრაქციის წევრები პარტიის თავმჯდომარეს, ლევან ხაბეიშვილს გადადგომისკენ მოუწოდებენ.

როგორც ფრაქციის წევრების განცხადებაშია აღნიშნული, „ერთიან ნაციონალურ მოძრაობაში“ შექმნილ დაპირისპირებაზე პასუხისმგებელია მოქმედი მენეჯმენტი.

რუსეთისთვის სანქციების დაწესება თავის მოტყუებაა და საქართველოს მოქალაქეების სანქცირებას ნიშნავს – გიჟები ხომ არ ვართ ეს გავაკეთოთ?! – ნამდვილად არ ვართ გიჟები, საგარეო ურთიერთობებზე ოპოზიციის ინიციატივებს მხარს არ დავუჭერთ , – ამის შესახებ ფრაქცია „ქართული ოცნების“ თავმჯდომარე მამუკა მდინარაძემ განაცხადა.

მდინარაძე რუსეთის მოქალაქეებისთვის შეზღუდვების დაწესების თაობაზე „ლელოს“ რეზოლუციას გამოეხმაურა და აღნიშნა, რომ „ერთადერთი მიზანი რაც „ლელოს“ ინიციატივას შეიძლება ჰქონდეს, არის ქართული ინტერესების დაზიანება“.

მისივე თქმით, ოპოზიცია რუსეთთან დაკავშირებული ინიციატივებით ცდილობს, ეკონომიკა ჩამოშალოს და ამ გზით პოლიტიკურ წარმატებას მიაღწიოს.

„ზოგჯერ შეცდომით ამბობენ ხოლმე, ხან განზრახ, რომ საქართველო სანქციებს არ უერთდება და ამით იძლევა საშუალებას, რომ ვიღაცამ გვერდი აუაროს სანქციებს. ეს სწორად უნდა განვუმარტოთ მოქალაქეებს. სანქციების მიერთება თუ იმას გულისხმობს, რომ არავის ეძლევა საშუალება საქართველოში სანქციებს გვერდი აუაროს, ამ შემთხვევაში ჩვენ სანქციებს მიერთებული ვართ, ჩვენი მხრიდან თუ ცალკე აღებული სანქციების დაწესებაზეა საუბარი, ბუნებრივია, ჩვენ ამას არ ვაკეთებთ, რადგან 0.3 პროცენტიან წილში რუსეთის ეკონომიკასთან მიმართებით, როცა საქართველოდან ექსპორტზეა ლაპარაკი, ამით რუსებს საერთოდ ვერაფერს უზამ, მაგრამ პირიქით, 10 პროცენტზე მეტი ზიანი უნდა მიიღო. ე.ი. რუსეთისთვის სანქციების დაწესება ნიშნავს თავის მოტყუებას და საქართველოს მოქალაქეებისთვის სანქციების დაწესებას. არ ვაპირებთ საქართველოს მოქალაქეებისთვის სანქციების დაწესებას, სიტყვით იქნება ისე, რომ თითქოს რუსეთს დაუწესდა და ამ დროს საქართველოს მოქალაქეებს უნდა დაუწესო და გიჟები ხომ არ ვართ?! ნამდვილად არ ვართ გიჟები და ამიტომ არის რომ კონკრეტულ წარმატებებს ვაღწევთ. შესაბამისად, საგარეო ურთიერთობებთან დაკავშირებით არც ერთ მათ ინიციატივას მხარს არ დავუჭერთ, რადგან ყველა შემთხვევაში მტკიცდება, რომ ეს მიმართულია საქართველოს წინააღმდეგ და ეკონომიკის ჩამოშლით ფიქრობენ, რომ მიაღწევენ უფრო მეტ წარმატებას და არ ვაპირებთ, რომ ასე დავეხმაროთ მათ და არც საქართველოს მოსახლეობის დაზარალებას ვაპირებთ”, – განაცხადა მდინარაძე

„ევროკომისიის მიერ საქართველოსთვის დადებითი რეკომენდაციის გაცემამ მძიმე მდგომარეობაში ჩააგდო „რუსული პროპაგანდა“, ვინაიდან ევროპა შეუქცევადი პროცესია და ეს ჩვენი არჩევანია. ახლა გინდათ, რომ თქვენც გადმოხვიდეთ ამ ნათელ მხარეს. მანამდე 18 თვის განმავლობაში ვხედავდით აღვირახსნილ კამპანიას, რომ ევროკავშირი სათაგურია, თავი ძალით შეგვაყოფინეს, ევროკავშირს ჩალის ფასი აქვს, არაფერს არ იძლევა და ასე შემდეგ – ეს ფართომასშტაბიანი პროპაგანდა დამარცხდა, ეს ყველაფერი არის ქართველი ხალხის მონდომებითა და დამსახურებით, რომელიც არ აჰყვა პროპაგანდას, რომ თურმე დასავლეთი არის მტერი და რუსეთი არის მეგობარი“, – ამის შესახებ საპარლამენტო ოპოზიციის წარმომადგენელმა პაატა მანჯგალაძემ პლენარულ სხდომაზე განაცხადა.

მისივე თქმით, ქართველი ხალხი ძალიან კარგად არჩევს მტერს და მოყვარეს და სწორედ ამის გამოხატულებაა, რომ საქართველო ელოდება ევროპული საბჭოსგან დადებით რეკომენდაციას.

„რადგან არ არსებობს იმაზე მეტი მშვიდობა და უსაფრთხოება, რომელიც არის გარანტირებული ევროპით და ნატო-თი და საქართველოსაც აქვს რეალური შესაძლებლობა, რომ გახდეს ამ თანამეგობრობის ნაწილი“, – განაცხადა პაატა მანჯგალაძემ.

მისივე თქმით, საქართველოს ევროკავშირსა და ნატო-ში შეყვანა შეუძლია მხოლოდ კოალიციურ მთავრობას.

„ვერანაირ ევროპას თქვენ ვერ მოუტანთ საქართველოს, ამიტომ გამოსავალი მარტივია – პროდასავლური ოპოზიციის მოსვლა. ორი თვე სჭირდება ყველა იმ რეფორმის მიღებას, რომელიც საქართველოს გაუხსნის პერსპექტივას გახდეს ევროპის ნაწილი. არც კი მოვიკითხავთ თქვენ სად იქნებით, რას გააკეთებთ, მთავარია ხელი არ შეგვიშალოთ“, – მიმართა პაატა მანჯგალაძემ საპარლამენტო უმრავლესობას.

ერთი კაცი, ის ჯიგარი ევროპელებს რომ ძარცვავს [კეზერაშვილი], იქიდან დირიჟორობს და ჩვეულებრივ მასხარად ჰყავს დაქირავებული ჩემი „ხაბე“. რაღაც შტერობებს აკეთებინებს, – ამის შესახებ პარლამენტის რეგიონული პოლიტიკისა და თვითმმართველობის კომიტეტის თავმჯდომარის პირველმა მოადგილემ, ირაკლი ზარქუამ ​„ნაციონალურ მოძრაობაში“ არსებულ დაპირისპირებაზე განაცხადა.

ზარქუას თქმით, დავით კეზერაშვილს ლევან ხაბეიშვილი მასხარად ჰყავს დაქირავებული.

„მტრისას – ასე იტყვიან ხოლმე ჩვენთან იმაზე, რაც ხდება „ნაციონალურ მოძრაობაში“. ჩვეულებრივი ბარდაგია. ბატონ გუბაზს [სანიკიძეს] უყვარს ეს სიტყვა. ვინ – ვისთან, ვინ – როგორ, რატომ, რანაირად, სად მიდიოდა [გაუგებარია]. ერთი კაცი, ის ჯიგარი ევროპელებს რომ ძარცვავს [კეზერაშვილი], იქიდან დირიჟორობს და ჩვეულებრივ მასხარად ჰყავს დაქირავებული ჩემი „ხაბე“. რაღაც შტერობებს აკეთებინებს. გაკოტრებულ, მწვალებელთა პარტიას [„ნაციონალური მოძრაობა“] ჩაუყენეს „ხაბე“. რა უნდა ქნას ახლა, რეიტინგი არ აქვს პარტიას „ხაბე“ ხომ არ აამოძრავებდა?!“ – აღნიშნა ზარქუამ.