არსებითად, ერთპარტიულად განვახორციელეთ ის ცვლილებები, რომელთა საფუძველზეც ახლა კანდიდატის სტატუსი გვენიჭება, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა.

ირაკლი კობახიძის თქმით, ჩაერთვება თუ არა ოპოზიცია ევროკომისიის მიერ გაცემულ ცხრა პრიორიტეტთან დაკავშირებულ სამუშაოებში, „ქართული ოცნება“ მაინც უზრუნველყოფს, რომ ევროინტეგრაციის მიმართულებით ქვეყანა წინ წავიდეს.

„ოპოზიცია იმასაც ამბობდა, რომ კანდიდატის სტატუსს ვერ მივიღებდით, თუმცა ვხედავთ, რომ ვიღებთ კანდიდატის სტატუსს და ეს არის სწორედ იმ ერთპარტიული მუშაობის დამსახურება, რომელიც „ქართული ოცნების“ მხრიდან წარიმართა. რა თქმა უნდა, არ მინდა, დამსახურება დავუკარგო რამდენიმე პოლიტიკურ პარტიას, რომლებიც იყვნენ წარმოდგენილი სამუშაო ჯგუფებში, მაგრამ შეგახსენებთ, რომ ყველაზე მსხვილი ოპოზიციური ფრაქციების სუბიექტები არ იყვნენ წარმოდგენილი სამუშაო ჯგუფებში. ამიტომ, არსებითად, ერთპარტიულად განვახორციელეთ ის ცვლილებები, რომელთა საფუძველზეც ახლა კანდიდატის სტატუსი გვენიჭება.

რაც შეეხება ცხრა პრიორიტეტს, შევთავაზებთ, მაგრამ ენდომებათ, ჩაერთვებიან, არ ენდომებათ, არ ჩაერთვებიან. ერთპარტიულად თუ მრავალპარტიულად, ჩვენ მაინც უზრუნველვყოფთ, რომ ქვეყანა მეტად წავიდეს წინ ევროინტეგრაციის მიმართულებით. ეს არის ჩვენი ერთ-ერთი უმთავრესი საგარეო პოლიტიკური პრიორიტეტი და ჩვენ, ერთპარტიულ თუ მრავალპარტიულ რეჟიმში, ამას აუცილებლად გავაკეთებთ“, – განაცხადა ირაკლი კობახიძემ.

ამასთან, ირაკლი კობახიძემ განმარტა, რომ სამოქმედო გეგმაში კონკრეტული პუნქტების მიხედვით სხვადასხვა ვადაა გაწერილი, თუმცა გეგმა 2024 წელს არ სცილდება.

„უკრაინისა და მოლდოვის დასაწევი ჩვენ არაფერი გვაქვს. პირიქით, ორივე ქვეყანას ყველა თვალსაზრისით მნიშვნელოვნად ვუსწრებთ წინ. რაც შეეხება სამოქმედო გეგმას, არის გარკვეული საკითხები, რომლებიც მოწესრიგდება დეკემბრის დასაწყისისთვისაც კი, ან გარკვეული საკითხები – დეკემბრის ბოლომდე. არის გარკვეული საკითხები, სადაც ვადები მითითებულია იანვრამდე, თებერვლამდე, არის გარკვეული საკითხები, რაზეც 2024 წლის ბოლომდე იქნება საჭირო მუშაობა. მაგალითად, ერთ-ერთია თვითონ არჩევნების ჩატარება. არჩევნების ჩატარება არის ის საკითხი, რასთან დაკავშირებითაც, ბუნებრივია, სურათი გვეცოდინება წლის ბოლომდე. დეზინფორმაციასთან ბრძოლაც გაგრძელდება, დაიწყება აქედან და გაგრძელდება 2024 წლის ბოლომდე. კიდევ ერთხელ გავიმეორებ, არის კონკრეტული პუნქტების მიხედვით გაწერილი სხვადასხვა ვადა. ზოგიერთ შემთხვევაში არის ამა წლის დეკემბერი, ზოგიერთ შემთხვევაში – იანვარი. სამოქმედო გეგმა 2024 წლის ბოლომდეა გაწერილი, 2024 წელს არ სცილდება“, – აღნიშნა ირაკლი კობახიძემ.

პოლიტსაბჭოს გაფართოება არის მნიშვნელოვანი კონსოლიდაციისთვის, მათ შორის, ესაა შესაძლებლობა იმ ადამიანებისთვის, ვინც, შესაძლოა, ეძებდნენ გზებს, გააგრძელონ რეჟიმის წინააღმდეგ ბრძოლა “ნაციონალური მოძრაობის” წიაღიდან, – ამის შესახებ პარლამენტში “ნაციონალური მოძრაობის” ფრაქციის თავმჯდომარე თინა ბოკუჩავამ განაცხადა.

მისი თქმით, “ნიკა მელიამ უარი თქვა ერთობის მანიფესტზე ხელმოწერაზე, რითაც დატოვა საკუთარი თავი პარტიის მიღმა, თუ ის შეცვლის ამ გადაწყვეტილებას და სურს პარტიაში დაბრუნება, კარი მუდმივად ღიაა ყველასთვის, ვინც საკუთარ თავს ნაციონალურ მოძრაობაში ხედავს“.

„მას გადაწყვეტილება უკვე მიღებული აქვს პარტიის დატოვებასთან დაკავშირებით. თუ ამ გადაწყვეტილებას შეცვლის და უარს აღარ იტყვის ერთობის მანიფესტზე ხელმოწერაზე, ალბათ, პოლიტსაბჭოც არ იქნება წინააღმდეგი, ეს მოცემულობა განიხილოს. მე არასერიოზულად და კონტრპროდუქტიულად მიმაჩნია საერთო დიდი მიზნებისთვის ყოველ სამ თვეში არჩევნების მოთხოვნის დაყენება. არასერიოზულია ეს მაშინ, როცა გველოდება დიდი, გადამწყვეტი გეოპოლიტიკური არჩევნები და ყველამ ერთმანეთს უნდა ჩავჭიდოთ ხელი, მიუხედავად აზრთა სხვაობისა არამხოლოდ პარტიაში, ზოგადად ოპოზიციაში, თუ გვინდა, რომ ეს გადამწყვეტი ბრძოლა მოვიგოთ.

პოლიტსაბჭოს გაფართოება არის ძალიან მნიშვნელოვანი ინიციატივა. პრეზიდენტი სააკაშვილის ინიციატივა, რომლისთვისაც მნიშვნელოვანია პარტიის კონსოლიდაცია, რომ ერთიანი ძალებით შევიდეთ ქვეყნისთვის უმნიშვნელოვანეს არჩევნებში. ამ თვალსაზრისით ვფიქრობ, ძალიან სწორი, კარგი ინიციატივაა პოლიტსაბჭოს გაფართოება, სადაც დაგვემატება ბევრი მებრძოლი ადამიანი, რომელსაც დიდი გამოცდილება აქვს „ნაციონალურ მოძრაობასთან“ ერთად ბრძოლის, ისევე, როგორც ახალგაზრდები, რომლებიც საინტერესო ხედვებს შემოგვთავაზებენ, რათა პარტიამ გაიმარჯვოს და შემდეგ მოხდეს პროდასავლური კოალიციის ფორმირება,“ – განაცხადა ბოკუჩავამ.

ამასთან, მან უპასუხა გოცირიძეს, რომელიც ამბობს, რომ ყრილობის მოწვევის გარეშე პოლიტსაბჭო ვერ გაფართოვდება და ამას ითვალისწინებს წესდება. ბოკუჩავა აცხადებს, რომ „წესდება შედგენილია ბევრი მაღალკვალიფიციური იურისტის მიერ და ყველა გადაწყვეტილება, რომელსაც იღებენ, არის წესდების შესაბამისი“.

„ქართული ოცნების“ თავმჯდომარე, ირაკლი კობახიძე არ გამორიცხავს, რომ ბიძინა ივანიშვილთან დაკავშირებით გაზეთ POLITICO-ში გამოქვეყნებულ სტატიაზე ვიღაცას თანხა ჰქონდეს გადახდილი.

როგორც მან განაცხადა, შეიძლება, ამ შემთხვევაში, ეს იყოს თუნდაც ლოკალური ქართული სუბიექტი.

მისვე განმარტებით, როგორც წესი, ასეთი სტატიები კონკრეტული თანხის სანაცვლოდ, შეკვეთით იწერება.

აღნიშნულის შესახებ კობახიძემ ჟურნალისტებთან ისაუბრა, როდესაც უპასუხა შეკითხვას, POLITICO-ს მიერ გავლენიანი ადამიანების სია გამოქვეყნდა, სადაც ბიძინა ივანიშვილზე ნეგატიურ კონტექსტშია საუბარი და არის თუ არ ეს ერთგვარი მინიშნება იმისა, რომ ივანიშვილი სანქციების მხრივ ყურადღების ქვეშ არის.

„ბიძინა ივანიშვილს ხომ არავითარი მინიშნება არ სჭირდება. მის მიმართ გაავრცელეს დე ფაქტო სანქციები, შვეიცარიულ ბანკში თანხები გაუყინეს. თუმცა, ბიძინა ივანიშვილი არ წავიდა ისეთ ნაბიჯებზე, რომელიც მის ქვეყანას პრობლემებს შეუქმნიდა და ზიანს მიაყენებდა. აქ არავითარი მინიშნებები არ არის საჭირო და არავითარი შანტაჟი, მითუმეტეს POLITICO-ში დაბეჭდილი სტატიების სახით აქ ვერაფერს შეცვლის. ამ შემთხვევაში ეს ლოკალური საკითხი მგონია, ვიღაცამ ფული გადაიხადა და გამოაქვეყნა ეს სტატია. შეიძლება, ამ შემთხვევაში, ეს იყოს თუნდაც ლოკალური ქართული სუბიექტი. ჩვენ ვიცით, რომ ვიღაცები დარბიან და თან ამას აღიარებენ, ვაშინგტონში, თუ ბრიუსელში კაბინეტებში და ითხოვენ ქართველი პოლიტიკოსების, თუ სხვა ადამიანების სანქცირებას. შეიძლება ასეთი ლოკალური პრობლემაც იყოს სახეზე“, – განაცხადა კობახიძემ.

თქვენ ქართულ ჯარს ისეთი მონდომებით ანგრევთ, შემოგზავნილი ხომ არ ხართ „ნაცებიდან“? – „ნაცების“ შეკვეთით შიგნიდან ხომ არ ანგრევთ „ქართულ ოცნებას“?! – ამ კითხვით „გირჩის“ დეპუტატმა იაგო ხვიჩიამ პლენარულ სხდომაზე თავდაცვის მინისტრის მოადგილეს გრიგოლ გიორგაძეს მიმართა.

როგორც ხვიჩიამ აღნიშნა, ის გიორგაძის CV-ს გაეცნო და აღმოაჩინა, რომ 2012 წელს „იმედის“ იურიდიული სამსახურის უფროსი იყო.

„თქვენ 2018 წელს სასამართლოში იმ საქმეზე დაგკითხეს, როცა „ნაცებმა“ ნატო ჩხეიძეს და მის ოჯახს „იბერია“ წაართვეს. თქვენ, როგორც „იმედის“ იურისტმა, 2012 წლის თებერვალში „იმედს“ გადაუფორმეთ კომპანია, რომელიც სხვას ეკუთვნოდა. თქვენ სასამართლოზე ამბობდით, რომ ამის შესახებ არ იცოდით და მჯერა, რომ ამის შესახებ მართლა არ იცოდით, მაგრამ მაინტერესებს, რატომ დაიწყეთ „იმედში“ იურიდიული სამსახურის უფროსად მუშაობა? – რატომ შეძვერით გიორგი არველაძესთან?“, – მიმართა ხვიჩიამ თავდაცვის მინისტრის მოადგილეს.

ხვიჩიას პასუხი პარლამენტის თავმჯდომარემ შალვა პაპუაშვილმა დაუბრუნა. როგორც პაპუაშვილმა აღნიშნა, ხვიჩიას სუსტი საპარლამენტო ხულიგნობით თავის გატანა სურდა.

„გინდათ, რომ განსახილველი საკითხი ეპატაჟში გადაიყვანოთ. რასაც თქვენ აკეთებთ, არის ის, რომ ცდილობთ ადამიანის ღირსებაზე მოქმედებას, რა პროვოკაციასაც ყოველთვის მიმართავთ. ეს კოლეგიალური არ არის – ამით მხოლოდ თქვენი სისუსტე ჩანს“, – განაცხადა პაპუაშვილმა ხვიჩიას პასუხად.

პარლამენტი, პირველი მოსმენით, „თავდაცვის კოდექსში“ დაგეგმილ ცვლილებებს იხილავს.

მინდა მადლობა გადავუხადო ნიკოლაე ჩუკას და რუმინეთის პარლამენტის წევრებს საქართველოს ევროპული პერსპექტივის შესახებ რეზოლუციის მიღებისთვის, – ამის შესახებ საქართველოს პარლამენტის თავმჯდომარე, შალვა პაპუაშვილი სოციალურ ქსელში წერს, რითაც ის რუმინეთის დეპუტატთა პალატისა და სენატის გაერთიანებულ სხდომაზე „მოლდოვის რესპუბლიკის, უკრაინის, საქართველოსა და დასავლეთ ბალკანეთის ევროპული პერსპექტივის შესახებ“ მიღებულ მხარდამჭერ რეზოლუციას ეხმიანება.

როგორც პარლამენტის თავმჯდომარე აღნიშნავს, რუმინეთის მხარდაჭერას და სოლიდარობას, ამ გადამწყვეტ დროს, უდიდესი მნიშვნელობა აქვს.

„მინდა გულითადი მადლობა გადავუხადო ნიკოლაე ჩუკას და რუმინეთის პარლამენტის პატივცემულ წევრებს საქართველოს ევროპული პერსპექტივის შესახებ რეზოლუციის მიღებით ჩვენი ქვეყნის ურყევი მხარდაჭერის გამოხატვისთვის. თქვენს სოლიდარობას, ამ გადამწყვეტ დროს, უდიდესი მნიშვნელობა აქვს. ევროკავშირში გაწევრიანებისკენ მიმავალ გზაზე რუმინეთის პარლამენტის ორივე პალატის მხარდაჭერა, ფასდაუდებელია“, – წერს პარლამენტის თავმჯდომარე.