საქართველო იყენებს ყველა შესაძლებლობას, პლატფორმას, სადაც შესაძლებელია, რომ ჩვენი ქვეყნის ინტერესები გავატაროთ. ეს არის მიზეზი, მიზანი, თუ რატომ ვიმყოფებით ქალაქ სკოპიეში, – ამის შესახებ საქართველოს საგარეო საქმეთა მინისტრმა, ილია დარჩიაშვილმა საქართველოს პირველ არხს განუცხადა.

დარჩიაშვილის თქმით, გაუგებარია აჟიოტაჟი, რომელიც ეუთო-ს მინისტერიალზე საქართველოს მონაწილეობასთან დაკავშირებით არის შექმნილი.

„ჩემთვის გაუგებარია საფუძველს მოკლებული აჟიოტაჟი, რომელიც საქართველოში ოპონენტების მხრიდან არის შექმნილი. ჩემი აზრით, ამაზე კომენტარიც კი არ არის გასაკეთებელი. საქართველო იყენებს ყველა შესაძლებლობას, პლატფორმას, სადაც შესაძლებელია, რომ ჩვენი ქვეყნის ინტერესები გავატაროთ. ეს არის მიზეზი, მიზანი, თუ რატომ ვიმყოფებით აქ, ასევე ჩვენი დამოკიდებულება, პატივისცემა თავად ორგანიზაციის მიმართ, რომელიც ძალიან ღირებულ, მნიშვნელოვან როლს ასრულებს ჩვენი ქვეყნისთვის საჭირბოროტო და მნიშვნელოვანი საკითხების გადაჭრაში“, – განაცხადა ილია დარჩიაშვილმა.

ჩრდილოეთ მაკედონიაში ეუთო-ს ორდღიანი მინისტერიალი დღეს დაიწყო. სხდომაში მონაწილეობს რუსეთის საგარეო საქმეთა მინისტრი სერგეი ლავროვიც. ლავროვის მონაწილეობის გამო, ეუთო-ს საგარეო საქმეთა მინისტრების შეხვედრას ბოიკოტი გამოუცხადეს ბალტიის ქვეყნებმა, პოლონეთმა და უკრაინამ.

რიჟვაძეებმა და მისმა კლანმა გადაჭამეს აჭარა. ტიტე აროშიძე, რომელიც დაუპირისპირდა ლევან ანთაძეს და ელგუჯა ბაგრატიონს, სოფლის მეურნეობის მინისტრობის დროს ძალიან ბევრ კორუფციულ ფაქტშია მხილებული. დათო ბაციკაძე, რომელიც ახლაც კი უკანონო მშენებლობებში მონაწილეობს ბათუმში და ეს კრიმინალური დაჯგუფება, ბანდა, ცხადია ვერ იტანს და ვერ ეგუება, როცა „ნაციონალური მოძრაობის“ ლიდერები ახსენებენ ხალხს და ხალხის პრობლემებს, – განაცხადა „ერთიანი ნაციონალური მოძრაობის“ თავმჯდომარემ, ლევან ხაბეიშვილმა.

ლევან ხაბეიშვილის განცხადებით, აჭარის უმაღლესი საბჭოს წერებს თავს პუტინისტები დაესხნენ, რადგან ისინი ხალხის პრობლემებზე საუბრობდნენ.

მისივე თქმით, „ნაციონალური მოძრაობა“ თავს არავის დააჩაგვრინებს და მზადაა ხალხის ინტერესებისა და პუტინისტებისგან ფიზიკურად თავდაცვისთვის.

„საზოგადოებას კარგად უნდა ესმოდეს თუ რატომ უპირისპირდებიან რუსული პარტიის წარმომადგენლები „ნაციონალური მოძრაობის“ წევრებს ფიზიკურად. ყველამ კარგად ნახა აჭარაში განვითარებული მოვლენები, ჩვენს თანამებრძოლებს აჭარის უმაღლესი საბჭოს წერებს – ლევან ანთაძეს და ელგუჯა ბაგრატიონს ადგილობრივი პუტინისტები დაესხნენ თავს და საზოგადოებამ უნდა იცოდეს რა ახლდა ამას წინ. სანამ ეს ფიზიკური დაპირისპირება დაიწყებოდა „ნაციონალური მოძრაობა“ საუბრობდა 360 ათასი ადამიანი რომ ცხოვრობს აჭარაში და აქედან 147 ათასი არის სოციალურად დაუცველი. რომ სკოლებში მნიშვნელოვანია უფასო კვება ბავშვებისთვის და რომ ოფიციალურივე სტატისტიკით ათასობით ბავშვი შიმშილობს აჭარაში. სოფელ კვირიკეთში და გვარაში, საბავშვო ბაღები რომ უნდა აშენებულიყო და გაქრა, შეჭამა „რუსულმა ოცნებამ“ ფული. ასევე, ბათუმში, მდინარე ჭოროხზე ახალი გზის მშენებლობა რომ ვერასდროს ვერ დაასრულეს და ვერ მიიყვანეს ბოლომდე, ამ პრობლემებზე საუბრობდნენ ჩვენი წევრები და ლიდერები. ასევე, ხულოში, ქედაში, შუახევში, სხვადასხვა სამუშაოები, რომელიც იყო დაგეგმილი, ზოგი შუაში მიატოვეს, ზოგი ვერც დაიწყეს. ასევე, ჩვენი წევრები საუბრობდნენ საპენსიო სესხების ჩამოწერაზე ადგილობრივი პენსიონერებისთვის, რომლებიც კაბალურ პირობებში იღებენ ამ სესხებს და უწევთ 1000-1500 ლარზე, 3000-4000 ლარის გადახდა. ასევე, საუბარი შეეხებოდა გაბერილ შტატებს აჭარაში და ამის პარალელურად, როცა სეკვესტრირებული ბიუჯეტი შემოიტანეს, შევარდნაძისეული ბიუჯეტი შემოიტანეს აჭარაში და როცა გაბერილ შტატებზე საუბრობდნენ „ნაციონალური მოძრაობის“ წევრები, პარალელურად 30-მდე მოხუცი უსახლკარო ელოდებოდა ჩინოვნიკებს, ორი წელია რომ პრობლემის მოგვარებას სთხოვდნენ, ის პრობლემა მოეგვარებინათ და ნაცვლად იმისა, რომ ეს პრობლემები, რაზეც ვსაუბრობ, საქმიანი დებატები ყოფილიყო და პრობლემის გადაწყვეტაზე ემსჯელა რუსული პარტიის წარმომადგენლებს, გადავიდნენ ფიზიკურ ანგარიშსწორებაზე. გადაჭამეს აჭარა რიჟვაძეებმა და მისმა კლანმა და ეს კონკრეტული ადამიანიც უნდა იცოდეს საზოგადოებამ, ვინც დაუპირისპირდა ლევან ანთაძეს და ელგუჯა ბაგრატიონს. ეს არის ტიტე აროშიძე, რომელიც სოფლის მეურნეობის მინისტრობის დროს ძალიან ბევრ კორუფციულ ფაქტშია მხილებული, ასევე, ბაციკაძე, რომელიც ახლაც კი უკანონო მშენებლობებში მონაწილეობს ბათუმში და ეს კრიმინალური დაჯგუფება, ბანდა, ცხადია ვერ იტანს და ვერ ეგუება, როცა „ნაციონალური მოძრაობის“ ლიდერები ახსენებენ ხალხს და ხალხის პრობლემებს. ყველას უნდა ესმოდეს, რომ ჩვენ თავს არავის არ დავაჩაგვრინებთ, მზად ვართ ამ პუტინისტებთან ფიზიკურად დავიცვათ თავიც და ხალხის ინტერესებიც, თუმცა ძალიან მნიშვნელოვანია საზოგადოების ერთობა კონკრეტულ საკითხებთან დაკავშირებით, რომლებიც ახლა მე ჩამოვთვალე და ცხადია ჩვენი მოქალაქეებისთვის არის მნიშვნელოვანი. სოლიდარობა მინდა გამოვუცხადო ჩვენს თანამებრძოლებს, თანაგუნდელებს, ელგუჯა ბაგრატიონს, ლევან ანთაძეს, მინდა მადლობა გადავუხადო იმისთვის, რომ ისინი იბრძვიან ხალხის ინტერესებისთვის“, – განაცხადა ლევან ხაბეიშვილმა.

რაც შეიძლება შორს უნდა დაიჭიროს თავი პოლიტიკამ ბიზნესისგან. ორივე ერთობლივად უნდა ავითარებდეს ქვეყანას, მაგრამ რაც შეიძლება დამოუკიდებლად. ესეც ერთ-ერთი ევროპული წესია, – ამის შესახებ საქართველოს პრეზიდენტმა, სალომე ზურაბიშვილმა ორბელიანების სასახლეში, მცირე და საშუალო ბიზნესის წარმომადგენლებთან შეხვედრისას განაცხადა.

როგორც პრეზიდენტმა აღნიშნა, რაც უფრო მეტი დამოუკიდებლობა და თავისუფლება იარსებებს, მით უფრო გაშლის ფრთებს ბიზნესი.

„რაც შეიძლება შორს უნდა დაიჭიროს თავი პოლიტიკამ ბიზნესისგან. ორივე ერთობლივად უნდა ავითარებდეს ქვეყანას, მაგრამ რაც შეიძლება დამოუკიდებლად. ესეც ერთ-ერთი ევროპული წესია. მთელ მსოფლიოში ისიც არსებობს, რომ დიდი ბიზნესი და პოლიტიკა არ არიან ერთმანეთისგან ჩამოშორებული, მაგრამ, რაც მეტი დამოუკიდებლობა და თავისუფლება იარსებებს, მით უფრო გაშლის ფრთებს ბიზნესი. ეს არის ის, რაც შემიძლია თქვენ გისურვოთ“,- აღნიშნა პრეზიდენტმა.

ამასთან, პრეზიდენტმა განმარტა, რომ უფრო ხელმისაწვდომი უნდა იყოს ის სტანდარტები, რაც საჭიროა იმისთვის, რომ ევროკავშირის ბაზარმა მიიღოს ჩვენი პროდუქტი.

„ვიცი, აქ ვინც ხართ, ახსნაც არ არის საჭირო, თუ რამდენად სჭირდება ამ ქვეყანას ევროპასთან დაახლოება, გზის ბოლოს კი ევროკავშირში გაწევრიანება. თქვენ სწორედ იმ ქართული ბიზნესის წარმომადგენლები ხართ, რომლის მომავალი და განვითარება დამოკიდებულია, ერთი მხრივ ევროკავშირის სხვადასხვა ქვეყანასთან მჭიდრო კავშირზე, ასევე მათ აქ შემოსვლაზე, ევროკავშირის ბაზარზე უფრო აქტიურად გასვლაზე. ჩვენ კი გვაქვს თეორიულად მოცემულობა, რომ ჩვენი პროდუქცია გავიტანოთ, მაგრამ რეალურად ყველამ ვიცით, რომ პრაქტიკაში ეს არ არის ისე გამოყენებული, როგორც ამის შესაძლებლობა არსებობს. მეტი დაფინანსება სჭირდება, მეტი მხარდაჭერა, რომ ევროკავშირის სტანდარტები იყოს შესრულებული. უფრო ხელმისაწვდომი უნდა იყოს ის სტანდარტები, რაც საჭიროა იმისთვის, რომ ევროკავშირის ბაზარმა მიიღოს ჩვენი პროდუქტი. ამ ყველაფერს მეტი გავრცობა უნდა და ბიზნესის ინფორმირება“,- აღნიშნა პრეზიდენტმა.

რუსეთის საოკუპაციო ძალების მიერ საქართველოს მშვიდობიანი მოქალაქის, თამაზ გინტურის მკვლელობა ეთნიკური ქართველების წინააღმდეგ ძალადობის კიდევ ერთი აქტია, – ამის შესახებ საქართველოს საგარეო საქმეთა მინისტრმა ილია დარჩიაშვილმა ეუთო-ს მინისტრთა საბჭოს პლენარულ სხდომაზე განაცხადა.

„ძვირფასო კოლეგებო, საქართველოს წინააღმდეგ რუსეთის ომი ცივი ომის შემდეგ სუვერენული ქვეყნის საზღვრების ძალის გამოყენებით შეცვლის პირველი მცდელობა იყო. 15 წელზე მეტია უკვე რუსეთი აგრძელებს საქართველოს განუყოფელი რეგიონების – აფხაზეთისა და ცხინვალის რეგიონების – უკანონო ოკუპაციას. ეს საერთაშორისო სამართლის პრინციპებისა და ნორმების უხეში დარღვევაა.

ხალხი, რომელიც ოკუპირებულ ტერიტორიებზე ცხოვრობს, ადამიანის უფლებების მძიმე დარღვევების მსხვერპლი ხდება. ისინი მავთულხლართებით კილომეტრებით არიან იზოლირებულნი სასოფლო-სამეურნეო მიწებისგან, სალოცავი ადგილებისგან, წართმეული აქვთ გადაადგილების უფლება, ძირითადი საჭიროებებისადმი წვდომა.

უკანონო დაკავებები და გატაცებები მზარდი პრაქტიკაა, რომელიც მათ ჯანმრთელობასა და სიცოცხლეს საფრთხის ქვეშ აყენებს.

ცოტა ხნის წინ, რუსული საოკუპაციო ძალების მიერ საქართველოს მშვიდობიანი მოქალაქის, თამაზ გინტურის მის მშობლიურ სოფელ კირბალთან მკვლელობა, ეთნიკური ქართველების წინააღმდეგ ძალადობის კიდევ ერთი აქტია“, – განაცხადა დარჩიაშვილმა.

„ნაციონალურ მოძრაობაში“ მიმდინარე პროცესებს ბოლო არ უჩანს და ეს მთლიანად ოპოზიციას აზიანებს, – ამის შესახებ ოპოზიციონერმა დეპუტატმა, რომან გოცირიძემ განაცხადა.

გოცირიძის თქმით, „ნაციონალური მოძრაობის“ მიერ პოლიტსაბჭოს ახალი წევრების წარდგენამ მეტი დაძაბულობა და გაურკვევლობა შეიტანა პარტიაში.

„ჯერჯერობით, რაც ვნახეთ, ეს არის პოლიტსაბჭოს წევრობის კანდიდატები, ანუ მომავალი კანდიდატები, ვინაიდან, „ნაციონალური მოძრაობის“ წესდებით, პოლიტსაბჭოს ირჩევს ყრილობა. არ მგონია, ყრილობამ უარი უთხრას იმ ადამიანებს, რომლებიც წარდგენილი არიან, მაგრამ ამ პროცესმა არა თუ განმუხტა ვითარება, არამედ მეტი დაძაბულობა და გაურკვევლობა შემოიტანა. სამწუხაროდ, „ნაციონალურ მოძრაობაში“ მიმდინარე პროცესებს ბოლო არ უჩანს და ეს მთლიანად ოპოზიციას აზიანებს“, – განაცხადა რომან გოცირიძემ.