დედაქალაქის მერმა კახა კალაძემ  მედიასთან  საუბრისას უპასუხა ჟურნალისტის კითხვას, რომელიც  ეხებოდა კონკრეტული დასავლელი პოლიტიკოსის შეფასებას სტატუსის საკითხზე  ხალხისა და მთავრობის გამიჯვნასთან დაკავშირებით.

თბილისის მერის განცხადებით, მსგავსი  მესიჯები სტატუსის თემაზე  პოლიტიკური მოტივებით არის დატვირთული და მიზნად ქვეყანაში დესტაბილიზაციის მოწყობას ისახავს. მისივე თქმით, საქართველოს ხელისუფლება მზად არის პარტნიორობისთვის, თუმცა მეგობრობა უნდა იყოს არა ცალმხრივი, არამედ ორმხრივი.

„როდესაც გადაწყვეტილება მიიღეს სტატუსის არმოცემასთან დაკავშირებით, ახსნა-განმარტება ვერაფერი მოძებნეს, არ იცოდნენ, რა უნდა ეთქვათ. ეს იყო ჩვეულებრივი პოლიტიკური მოტივებით განპირობებული და ამ ყველაფრის უკან  იდგა ქვეყანაში გადატრიალების, ხელისუფლების დამხობის მიზანი. გამოვიდნენ, ხალხს უთხრეს, რომ იცით, თქვენ კარგი ხალხი ხართ, სტატუსს იმსახურებთ, მაგრამ აი, ხელისუფლება გყავთ ცუდი. ამით უნდოდათ ქვეყანაში არეულობა და დესტაბილიზაცია მოეწყოთ, მაგრამ არ გამოუვიდათ. ქართველი ხალხი გონიერია, ყველაფერს ძალიან კარგად ხედავს და არავის მივცემთ შესაძლებლობას, ვინც არ უნდა იყოს, ჩვენი ხალხი და ქვეყანა გამოყენებული იქნეს საზარბაზნე ხორცად. ჩვენ მზად ვართ მეგობრობისთვის, პარტნიორობისთვის, არ გვეშლება ეს, თუმცა ეს ყველაფერი უნდა იყოს ორმხრივი. ცალმხრივად ვერ იქნება“, – განაცხადა თბილისის მერმა.

მედიასთან  კახა კალაძემ ასევე ისაუბრა  კონკრეტული პოლიტიკური პარტიების სახელმწიფო ინტერესებთან შეუსაბამო საქმიანობაზე  და აღნიშნა, რომ მათი ნაწილის მიზანი  ქვეყანაში არეულობის შექმნაა. მისივე თქმით, ხელისუფლება მათ ამის საშუალებას არ მისცემს და  ძალისხმევას არ დაიშურებს ქვეყანაში მშვიდობის და სტაბილურობის  დასაცავად.

„პოლიტიკური პარტიების დიდი ნაწილი პირდაპირ მტრობს ჩვენს სახელმწიფოს. მტრობს ჩვენი ქვეყნის მომავალს, ქართველ ხალხს. მესმის მათ ჰყავთ  პატრონები, აქვთ ინტერესები, რომელშიც საქართველო, რა თქმა უნდა, არ შედის. ისინი არც საქართველოს ეკუთვნიან, არც თავიანთ თავს. მათ აქვთ კონკრეტული დავალება, როგორც აგენტურას. ამიტომ, არავის არ უნდა მივცეთ შესაძლებლობა,  რომ ქვეყანაში რაიმე არეულობა მოაწყოს და დაძაბულობა შემოიტანოს. ჩვენ დღეს გვჭირდება მშვიდობა, ხედავთ, რა ხდება მსოფლიოში, რეგიონში, ახლო აღმოსავლეთში. დღეს, ისე, როგორც არასდროს, ჩვენს ქვეყანას სჭირდება მშვიდობა, სიმშვიდის შენარჩუნება და ერთადერთი პოლიტიკური ძალა, ვისაც ამის გაკეთება შეუძლია, არის „ქართული ოცნება-დემოკრატიული საქართველო“, – განაცხადა კახა კალაძემ.

„არ ვიცი, პრეზიდენტი რა გადაწყვეტილებას მიიღებს. თავად პრეზიდენტს უნდა ჰკითხოთ, რას ფიქრობს“ – ასე უპასუხა კახა კალაძემ მედიის შეკითხვას, რომელიც პრეზიდენტის მიერ მიხეილ სააკაშვილის შეწყალებას ეხებოდა.

დედაქალაქის მერის განცხადებით, თავად პრეზიდენტისთვის ამ გადაწყვეტილების მიღება ყველა თვალსაზრისით მძიმე იქნება, გარდა ამისა, გამოძიება სხვა საქმეებზეც მიმდინარეობს.

„არ ვიცი, პრეზიდენტი რა გადაწყვეტილებას მიიღებს. თავად პრეზიდენტს უნდა ჰკითხოთ, რას ფიქრობს. ერთი რამ მინდა ვთქვა: შეიძლება მიიღოს ეს გადაწყვეტილება, რაც მისთვის პირადად ძალიან მძიმე იქნება ყველანაირი თვალსაზრისით, თუმცა არის სხვა კონკრეტული საქმეები, რაზეც მიმდინარეობს გამოძიება. ამასთან დაკავშირებით არაერთხელ თქმულა პროკურატურის მხრიდან. ასე რომ, საგანგაშო არაფერია. კარგი იქნება, პრეზიდენტს დაუსვათ შეკითხვა და მისგან მოვისმინოთ. ისეთ რადიკალურ განცხადებებს აკეთებს, რაც ჩვეულებრივ რადიკალური ოპოზიციის დღის წესრიგშია“, – განაცხადა კახა კალაძემ.

თბილისის მერის, კახა კალაძის განცხადებით, ოპოზიციის წარმომადგენლები პირდაპირ ჩადიან ევროპარლამენტში და მუშაობენ, რომ ქვეყანამ ევროკავშირის წევრობის კანდიდატი ქვეყნის სტატუსი არ მიიღოს.

ამის შესახებ მან პარტია „ლელოს“ დეპუტატის, დავით უსუფაშვილის მიერ კანდიდატი ქვეყნის სტატუსთან დაკავშირებით გაკეთებული განცხადების შეფასებისას აღნიშნა.

„ხელისუფლებამ პარტნიორებთან ერთად, რეალურად ყველაფერი გააკეთა და შეასრულა ის მოთხოვნები, რაც იყო დასახელებული – 12-პუნქტიანი გეგმა და დამატებითი მიმართულებები. დღეს შეიძლება ითქვას, რომ არანაირი ლოგიკა, ახსნა-განმარტება არ არსებობს იმისთვის, თუ რატომ არ უნდა მიანიჭონ ქვეყანას ევროკავშირის წევრობის კანდიდატის ქვეყნის სტატუსი. ჩვენ, რა თქმა უნდა, აღნიშნულ სტატუსს თავიდანვე ვიმსახურებდით, რადგან თუ რომელიმე ქვეყანას რაიმე ჰქონდა გაკეთებული და თუ შევაფასებთ იმ კრიტერიუმებით, რაზეც არის საუბარი, საქართველო იყო და არის ამ ქვეყნებს შორის მოწინავე, თუმცა გვესმის, თუ რატომ მიიღეს ეს გადაწყვეტილება, რა იყო ამის მოტივი. ყველა ვხედავთ, რამდენი რამ გაკეთდა ევროინტეგრაციის ამ რთულ გზაზე. რეფორმები ჩვეულებრივად გრძელდება, ეს პროცესია და მჯერა, რომ თუ სამართლიანი მიდგომები იქნება, ქვეყანას კანდიდატის სტატუსს აუცილებლად მიანიჭებენ“, – განაცხადა კახა კალაძემ.

მისივე შეფასებით, ოპოზიციის წარმომადგენლები ყველანაირად ცდილობენ, ქვეყანაში ნიჰილიზმი დანერგონ და ევროინტეგრაციის პროცესს ხელი მაქსიმალურად შეუშალონ.

„ისინი არიან ჩვეულებრივი მავნებლები, ვიცით ეს და ამაზე ბევრი დრო არ უნდა დავკარგოთ. ეს ადამიანები ყველანაირად ეწინააღმდეგებიან ქვეყნის განვითარებას; გიჟდებიან იმაზე, რომ ქვეყანაში არის სიმშვიდე, ხდება ეკონომიკური განვითარება; ყველაფერს აკეთებენ იმისთვის, რომ ნიჰილიზმი გააჩინონ; როგორმე არეულობა, დაძაბულობა იყოს ქვეყანაში. არა მხოლოდ თავიანთი განცხადებებით, არამედ ქმედებებით – პირდაპირ ჩადიან ევროპარლამენტში და მუშაობენ იმაზე, რომ ქვეყანამ სტატუსი არ მიიღოს. შეიძლება, არ მოგწონდეს შენი ხელისუფლება და იყო მასთან ოპოზიციაში, გქონდეს განსხვავებული მოსაზრებები კონკრეტულ საკითხებზე, მაგრამ როდესაც ვსაუბრობთ ევროპულ მომავალსა და ევროინტეგრაციაზე, ამ დროს კი, ამ ყველაფრისთვის ხელის შეშლა ხდება, ჩვეულებრივი მავნებლები არიან. სამწუხაროა, რომ სახელმწიფოს, ქვეყნის წინააღმდეგ დგამენ ასეთ მოღალატეობრივ ნაბიჯებს“, – აღნიშნა დედაქალაქის მერმა.

ოპოზიციას ემიგრანტებში არჩევნების ელექტრონული წესით ჩატარება კი არა, ახტალის აბაზანებიც აღარ უშველის. აბაზანები მათ იმაში უშველით, რომ არჩევნების პირწმინდად წაგებას შეაგუებს, – ამის შესახებ მოძრაობა „ხალხის ძალის“ წევრმა, გურამ მაჭარაშვილმა განაცხადა.

მაჭარაშვილის თქმით, „სჯობს, მოდუნდნენ და არჩევნების წაგებას შეაგუონ“.

„ელექტრონულ არჩევნებს ხან აგინებენ, ხან ამბობენ, რომ დემოკრატიის შუქურაა, ხან დამანგრეველია დემოკრატიისთვისო. მათი რეალური განცდაა, რომ არჩევნები წააგეს და უნდათ, ხან ემიგრანტებს ჩაებღაუჭონ, ხან რადიკალიზმის სხვა სეგმენტი შემოაგდონ. ოპოზიციას არაფერი უშველის, გარდა იმისა, რომ ტაქტიკა შეცვალოს, პირველ რიგში, საქართველოს საზოგადოებასთან. საკანონმდებლო საქმიანობის ნაცვლად, ლანძღვა-გინებით არ უნდა იყვნენ დაკავებული. ელექტრონული არჩევნები როგორიც არ უნდა იყოს – ონლაინ, პირდაპირ თუ როგორიც არის საქართველოში, რომელიც პარტნიორებმა მოიწონეს, მათ ეს არ უშველით. რაც შეეხება ემიგრანტებს, მათ შესაძლებლობა აქვთ, არჩევნებში მონაწილეობა მიიღონ. ამ საკითხზე ემიგრანტებში არანაირი პრეტენზია არ ყოფილა, რომ მონაწილეობა უნდოდათ და ვერ მიიღეს. მონაწილეობას ძალით ვერავის მივაღებინებთ. მონაწილეობა თუ სურთ, გამორიცხულია, რაიმე პრობლემა ჰქონდეთ“, – განაცხადა გურამ მაჭარაშვილმა.

„სტრატეგია აღმაშენებლის“ ლიდერმა, გიორგი ვაშაძემ დღეს განაცხადა: „მზად ვართ, ნებისმიერ ძალასთან ერთად მონაწილეობა მივიღოთ ცვლილებაში და მომზადდეს კანონპროექტი, რომელიც ემიგრანტების არჩევნებში მონაწილეობას ეხება. ინიციატივას ორი მიმართულება აქვს – ერთია არჩევნებში ელექტრონული წესით მონაწილეობა და მეორეა საარჩევნო უბნების მაქსიმალურად გაზრდა“.