„დარწმუნებული ვარ და იმედი მაქვს, რომ პრეზიდენტ მიხეილ სააკაშვილი სახელი და გვარით იტყვის ვინ არის ის ადამიანი ან ადამიანები, რომლებიც აზიანებენ მთავარ ინტერესს, რომ ვებრძოლოთ ბიძინა ივანიშვილს და არა „ნაციონალურ მოძრაობას,“ – ამის შესახებ “ერთიანი ნაციონალური მოძრაობის” თავმჯდომარემ, ლევან ხაბეიშვილმა განაცხადა.

მისი თქმით, აღარ აპირებს, ვინმეს პარტიის დაზიანების შესაძლებლობა მისცეს.

„მიხეილ სააკაშვილმა თავად, მისივე განცხადებაში აბსოლუტურად არაორაზროვნად განაცხადა, რომ „ნაციონალური მოძრაობის“ ლანძღვა-გინებას პარტიის შიგნიდან უნდა მორჩნენ. სიტყვა-სიტყვით რამდენჯერმე, აბსოლუტურად ხაზს ვუსვამ, არა ორაზროვნად გააკეთა განცხადება თუ ვის ეხებოდა ეს წინადადებათა წყობა, დარწმუნებული ვარ, რომ ეს ეხებოდა ნიკა მელიას, რატომ? იმიტომ, რომ მთელი ამ თვეების განმავლობაში ის საუბრობს პოს ტვ-ის, იმედის, კობახიძის და ღარიბაშვილის ენით. მას ეხებოდა, მის გარდა არ არსებობს პარტიაში სხვა, რომელიც ამას კადრულობს, მან იკადრა და ის საუბრობს ამ ენით და მიხეილ სააკაშვილის განცხადება ეკუთვნის სწორედ მას პირადად. რაც შეეხება ფეისბუქსტატუსს, რომელიც ასევე პრეზიდენტ სააკაშვილის ფეისბუქზე გამოჩნდა, დარწმუნებული ვარ შემდეგ გამოსვლაზე, როგორც კი მას ამის შესაძლებლობა მიეცემა, პრეზიდენტი სააკაშვილი უკვე სახელს და გვარს იტყვის. დარწმუნებული ვარ და იმედი მაქვს, რომ სახელი და გვარით იტყვის ვინ არის ის ადამიანი ან ადამიანები, რომლებიც აზიანებენ მთავარ ინტერესს, რომ ვებრძოლოთ ბიძინა ივანიშვილს და არა „ნაციონალურ მოძრაობას“. ხაზს ვუსვამ, მე კი არ გავიგე, სრულიად საზოგადოებამ ასე გაიგო და არ არსებობს მეორე ადამიანი, ვინც არ იტყვის, რომ ეს არ ეხებოდა ნიკა მელიას, რატომ? იმიტომ, რომ ხაზგასმით საუბარი იყო იმაზე, რომ პარტიის ლანძღვა არ შეიძლება, ხაზგასმით საუბარი იყო, რომ თუ ვინმეს რამე არ მოსწონს პარტიაში, შეუძლია სხვა გადაწყვეტილება მიიღოს. ბუნებაში არ მოიძებნება ადამიანი, რომელმაც გაიგო სხვანაირად, ასე რომ მე კი არ გავიგე ასე, პრეზიდენტმა სააკაშვილმა თქვა ზუსტად ასე. ამიტომ მე დარწმუნებული ვარ, რომ სახელებით და გვარებით მოიხსენიებს ყველა იმ ადამიანს. ამით დასრულდება ყველანაირი გაურკვევლობა, რომელიც აზიანებს „ნაციონალურ მოძრაობას“. ყველამ კარგად უნდა იცოდეს, რომ აღარ ვაპირებ მივცე ვინმეს შესაძლებლობა გააგრძელოს პარტიის სახელის გამოყენება და დაზიანება, კატეგორიულად ვამბობ – აღარ ვაპირებ ვინმეს მივცე შესაძლებლობა, რომ დააზიანოს პარტია,“- განაცხადა ლევან ხაბეიშვილმა.

არავინ იფიქროს, რომ რადიკალურ ოპოზიციას უნდა, საქართველომ სტატუსი მიიღოს. პრაქტიკულად, სტატუსის მიღებით „ნაცმოძრაობა“ განიარაღებული რჩება, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.

ვოლსკის თქმით, საქართველოსთვის კანდიდატის სტატუსის მინიჭებით დესტაბილიზაციასთან დაკავშირებით ოპოზიციის მთავარი გეგმა იშლება.

„არავინ ელოდებოდა, რომ რადიკალური ოპოზიციის ფლანგზე ისტერია გაჩერდებოდა, სრული ისტერიკა აქვთ. მილიონები დახარჯეს იმისთვის, რომ საქართველოს კანდიდატის სტატუსი არ მიეღო და ეს დესტაბილიზაციის წინაპირობა გამხდარიყო. მათი მთავარი ნარატივია, რომ რუსეთს საქართველოს ხელისუფლებაზე აქვს გავლენა. არავითარ დათქმაზე ლაპარაკი არ არის. ყველა შეხვედრაზე, რომელიც პრემიერ-მინისტრმა და პარლამენტის თავმჯდომარემ ჩაატარეს, ამ საკითხებთან მიმართებით კონკრეტული მსჯელობა იყო. ახალი ნარატივი გამოჩნდა, თითქოს, „ქართულ ოცნებას“ არ უნდა, საქართველომ სტატუსი მიიღოს. არავინ არც იფიქროს, რომ ევროკავშირს შეუძლია, კანდიდატის სტატუსი შემოგვთავაზოს იმის სანაცვლოდ, რომ ქვეყანა ეკონომიკურად და სამხედრო თვალსაზრისით დაინგრეს.

რაც შეეხება დათქმებს, იმას დათქმა არ სჭირდება, რომ არჩევნები ნორმალურად და საერთაშორისო სტანდარტით უნდა ჩატარდეს, რომელიც ევროპულ ქვეყანას შეეფერება, ასეთი იყო წინა არჩევნებიც. სამადაშვილის, ხაბეიშვილისა და ზურაბიშვილის ფორმულა, რომ კანდიდატის სტატუსი ხალხს ეკუთვნის და არა – მთავრობას, არის მინიშნება, მითითება, რომ დღევანდელი ხელისუფლების პირობებში, საქართველოს კანდიდატის სტატუსი არ უნდა მიეცეს, რადგან მთავარი გეგმა იშლება, რასაც დესტაბილიზაცია ჰქვია და რასაც უნდა მოჰყვეს შეჯახებების, მძიმე პროცესების განვითარება. როგორც ჩანს, ამაზე უარის თქმას არ აპირებენ“, – განაცხადა გია ვოლსკიმ.

ღაზაში „ჰამასის“ მიერ მართული ჯანდაცვის სამინისტროს მტკიცებით, 7 ოქტომბრის შემდეგ ღაზაში დაღუპულთა რაოდენობამ 10000-ს გადააჭარბა. ამის შესახებ „ბიბისი“ იტყობინება.

გაეროს ჰუმანიტარული სააგენტოებისა და საქველმოქმედო ორგანიზაციების განცხადებით, ღაზაში მშვიდობიანი მოსახლეობის მკვლელობა შემაშფოთებელია.

ზოგიერთმა პოლიტიკოსმა, მათ შორის აშშ-ს პრეზიდენტმა ჯო ბაიდენმა, ეჭვქვეშ დააყენა ღაზას ჯანდაცვის სამინისტროს მონაცემების სიზუსტე.

ჯანდაცვის მსოფლიო ორგანიზაციამ თქვა, რომ მათ სჯერათ რიცხვების სიზუსტის.

„ღაზას სხვა სამთავრობო უწყებების მსგავსად, ჯანდაცვის სამინისტროს აკონტროლებს „ჰამასი“, აკრძალული ტერორისტული ორგანიზაცია დიდ ბრიტანეთში, აშშ-სა და ევროკავშირში“, – წერს „ბიბისი“.

ისრაელმა ღაზაზე თავდასხმები მას შემდეგ დაიწყო, რაც „ჰამასმა“ 7 ოქტომბერს ისრაელში 1400-ზე მეტი ადამიანი მოკლა და 200-ზე მეტი გაიტაცა.

ისრაელის არმია აცხადებს, რომ მისი ოპერაცია „ჰამასის“ სრულად განადგურებას ისახავს მიზნად.

ველით ევროკომისიის გადაწყვეტილებას, რომელიც ორ დღეში გაჟღერდება და კიდევ ერთი ისტორიული გადაწყვეტილება იქნება. ის საქართველოს ევროპულ მომავალს განსაზღვრავს, – ამის შესახებ საქართველოს პრემიერ-მინისტრი ირაკლი ღარიბაშვილი აღმოსავლეთ პარტნიორობის საკითხებში ევროკავშირისა და ევროკავშირის წევრი ქვეყნების სპეციალურ წარმომადგენლებთან შეხვედრისას განაცხადა

მთავრობის მეთაურის თქმით, ევროკავშირსა და საქართველოს შორის ძლიერი პარტნიორობა საერთო ძალისხმევის შედეგია და მან ძალიან კონკრეტული შედეგები მოიტანა.

„კიდევ ერთხელ მოგესალმებით და ყველას მადლობა მინდა გადაგიხადოთ სტუმრობისთვის.
უპირველეს ყოვლისა, ჩემი მთავრობის სახელით მადლობა მინდა გადაგიხადოთ ჩამობრძანებისთვის. დიდად ვაფასებ თქვენს მხარდაჭერას საქართველოს სუვერენიტეტის, ტერიტორიული მთლიანობისა და ევროატლანტიკური მისწრაფებებისადმი.
მიმაჩნია, რომ თქვენი ვიზიტი ევროკავშირსა და საქართველოს შორის – ასე ვიტყოდი, რომ – განმსაზღვრელ მომენტს ხდება. ეს არის საქართველოს ევროპული მომავლისადმი თქვენი მხარდაჭერის თვალსაჩინო დადასტურება.
ევროკავშირსა და საქართველოს შორის ძლიერი პარტნიორობა ჩვენი საერთო ძალისხმევის შედეგია და, როგორც ვიცით, მან ძალიან კონკრეტული შედეგები მოიტანა. ესენია: ასოცირების შეთანხმება, უვიზო მიმოსვლის რეჟიმი, ევროპული პერსპექტივა, რაც გასულ წელს მიღებული ისტორიული გადაწყვეტილებაა. ამჟამად, რა თქმა უნდა, ველით ევროკომისიის გადაწყვეტილებას, რომელიც ორ დღეში გაჟღერდება და კიდევ ერთი ისტორიული გადაწყვეტილება იქნება. ის საქართველოს ევროპულ მომავალს განსაზღვრავს.
ამდენად, კიდევ ერთხელ გულთბილად მოგესალმებით და მადლობა მინდა გადაგიხადოთ”, – განაცხადა პრემიერ-მინისტრმა.

ოპოზიციაში არიან პოლიტიკოსები, რომელთაც ქვეყანაში არანაირი პოლიტიკური რესურსი აღარ აქვთ და ისინი იშველიებენ თავიანთ კოლეგებს ევროპარლამენტიდან, მათ შორის მათ აწარმოებინებენ წინასაარჩევნო კამპანიებს, – ამის შესახებ ევროინტეგრაციის კომიტეტის თავმჯდომარემ, მაკა ბოჭორიშვილმა აღნიშნა ევროპარლამენტარ რასა იუკნევიჩიანეს იმ განცხადების შეფასებისას, სადაც იუკნევიჩიანე ამბობს: „საქართველოს მთავრობა თუ მოიქცევა ისე, როგორც იქცევა დღემდე, კანდიდატის სტატუსი არავითარი მნიშვნელობის არ იქნება, გარდა იმისა, რომ შეიძლება, „ქართულმა ოცნებამ“ მოიგოს არჩევნები მომავალ წელს“.

ბოჭორიშვილის თქმით, ევროპარლამენტის წევრი მსგავს განცხადებებს არ უნდა აკეთებდეს.

„სამწუხაროდ, ევროპარლამენტში არიან დეპუტატები, რომლებიც პირდაპირ არიან ჩართული ქართულ პოლიტიკაში. ასე ვიტყოდი, რომ ოპოზიციაში არიან პოლიტიკოსები, რომელთაც ქვეყანაში არანაირი პოლიტიკური რესურსი აღარ აქვთ და ისინი იშველიებენ თავიანთ კოლეგებს ევროპარლამენტიდან, მათ შორის მათ აწარმოებინებენ ქვეყანაში წინასაარჩევნო კამპანიებს. მხოლოდ და მხოლოდ ასე შეიძლება შეფასდეს ქალბატონი რასას განცხადებები. ის ჩართულია ქართულ პოლიტიკაში და მოქმედებს ისე, როგორც არ უნდა მოქმედებდეს ევროპარლამენტის წევრი და არ უნდა აკეთებდეს მსგავს განცხადებებს საქართველოს შიდა პოლიტიკასთან დაკავშირებით.

რაც შეეხება, ვის უნდა აძლევდეს ქართველი ხალხი ხმას, არცერთი ევროპარლამენტარის გადასაწყვეტი არ არის, ვის მისცემს ქართველი ამომრჩეველი ხმას. საქართველოს მოქალაქეები, ქართველი ხალხი არჩევნებში იღებენ გადაწყვეტილებას, ვინ სურთ მათ ხელისუფლებაში და ეს არის დემოკრატიის მთავარი საფუძველი, დემოკრატიის მთავარი საფუძველი კი არის ევროკავშირში გაწევრიანების მთავარი საფუძველი და წინაპირობა. შესაბამისად, ყველამ პატივი უნდა სცეს ამას, მათ შორის ევროპარლამენტის წევრებმაც, რომ საქართველოში ქართველი ხალხი ირჩევს იმ ხელისუფლებას, რომელიც მას სურს“, – განაცხადა მაკა ბოჭორიშვილმა.

პარტია „საქართველოსთვის“ წევრის, პარლამენტის დეპუტატის, ანა ბუჩუკურის განცხადებით, „ქალი პოლიტიკოსები საქართველოში განსაკუთრებული დარტყმის ობიექტები ხდებიან”.

მისივე შეფასებით, ეს ფაქტი ქვეყანაში ქალთა მიმართ ძალადობას ახალისებს.

„სამწუხაროდ, ქალი პოლიტიკოსები განსაკუთრებული ასე ვთქვათ, დარტყმის ობიექტები ხდებიან საქართველოშიც. ჩვენ, რაც საქართველოს პარლამენტში ვიხილეთ, არ იყო მხოლოდ, ვთქვათ თეონას [აქუბარდია] და ანას [წითლიძე] წინააღმდეგ გადადგმული ნაბიჯი, ან თეონას და ანას წინააღმდეგ განხორციელებული ვერბალური ძალადობა, არამედ, ეს იყო ყველა ქალი პოლიტიკოსის წინააღმდეგ გადადგმული ნაბიჯი. ეს არის ის, რაც ერთი მხრივ, ხელს უშლის ქალთა პოლიტიკურ გაძლიერებას და პოლიტიკაში ახალი ქალების შემოყვანას. იმიტომ, რომ, როდესაც უყურებენ როგორი თავდასხმის ობიექტი ხდება ქალი პოლიტიკაში, ძლიერი ქალი, შემდგომ თავს იკავებენ. მეორე მხრივ, ეს ნულოვანი რეაგირება – მეორე დღეს როგორ გადაეფარნენ, ამ შემთხვევაში, ბერაიას – როდესაც ხელისუფლების მხრიდან რეაქცია ნულია, ეს არის ის, რაც საბოლოოდ, ქვეყანაში ქალთა მიმართ ძალადობას ახალისებს”,- განაცხადა ანა ბუჩუკურმა.

ამასთან, ბუჩუკური ყოფილი პრეზიდენტის, მიხეილ სააკაშვილის მიერ თავის „ფეისბუქის” გვერდზე გამოქვეყნებულ პოსტსაც გამოეხმაურა, რომლის მიხედვითაც, „მომავალი არჩევნებისთვის, „ნაციონალური მოძრაობის” სიის აბსოლუტური უმრავლესობა უნდა შედგებოდეს იმ ადამიანებისგან, რომლებიც არასდროს ყოფილან პარლამენტის წევრები”.

აღნიშნულთან დაკავშირებით ბუჩუკურმა განაცხადა, რომ „მიხეილ სააკაშვილს, დიდი ალბათობით, პოლიტიკური აქტუალურობა აქვს დაკარგული და ამას განიცდის, ხან რა გზავნილს წერს და ხან რას”.

ცნობისთვის, პარლამენტის პლენარულ სხდომაზე საპარლამენტო უმრავლესობის დეპუტატმა ირაკლი ბერაიამ პარლამენტის დამოუკიდებელ დეპუტატ თეონა აქუბარდიას შეურაცხმყოფელი რეპლიკებით მიმართა. გარდა ამისა, სიტყვიერი დაპირისპირება იყო ალუდა ღუდუშაურსა და ანა წითლიძეს შორისაც. წითლიძემ ღუდუშაურს „დებილი”, “ქართული ოცნების” დეპუტატმა კი პარლამენტის ოპოზიციონერ წევრს “ბანძი” უწოდა: „შენ ხარ ბანძი ადამიანი, ჩვეულებრივი ბანძი ქალი ხარ”, – მიმართა ღუდუშაურმა წითლიძეს. აღნიშნულის შემდეგ, ირაკლი ბერაიამ ბოდიში მოიხადა.