საპარლამენტო უმრავლესობის წევრის, არჩილ თალაკვაძის განცხადებით, სტრასბურგის სასამართლომ დაადასტურა, რომ უსაფუძვლოა სპეკულაციები და ცილისწამება, რაც სააკაშვილის გარემოცვის მხრიდან იყო სახელმწიფოს მიმართ.

თალაკვაძის თქმით, სახელმწიფო ყველაფერს აკეთებს, რომ პატიმრების ჯანმრთელობა და მათი უფლებები დაცული იყოს.

„მინდა, კიდევ ერთხელ შევახსენო ჩვენს ოპონენტებს, რომ სტრასბურგის სასამართლომ მიიღო უკვე ორი გადაწყვეტილება მიხეილ სააკაშვილისა და მისი ჯანმრთელობის საკითხებთან დაკავშირებით. ამ გადაწყვეტილებებით ყველაფერი ნათქვამია. არავითარი პოლიტიკური დებატები და განმარტებები ამას უკვე აღარ სჭირდება. სტრასბურგის სასამართლომ პირდაპირ თქვა და დაადასტურა, რომ ის სპეკულაციები და ცილისწამება, რაც მათი, სააკაშვილის გარემოცვის მხრიდან იყო სახელმწიფოს მიმართ, აღმოჩნდა უსაფუძვლო.

რაც შეეხება მის ჯანმრთელობას, მინდა, პირველ რიგში, პატიმრობაში მყოფ ყველა პირს, მათ შორის, მიხეილ სააკაშვილსაც ვუსურვო ჯანმრთელობა. სახელმწიფო აკეთებს ყველაფერს, რომ პატიმრების ჯანმრთელობა და მათი უფლებები იყოს დაცული.

ყველაზე მთავარი და მნიშვნელოვანი, ვამბობდით და კიდევ ერთხელ გამოჩნდა სტრასბურგის გადაწყვეტილების შემდეგ, რომ არის ორი მთავარი პირობა – მიხეილ სააკაშვილმა ითანამშრომლოს ექიმებთან და შეასრულოს ყველა ის რეკომენდაცია, დანიშნულება, რასაც ექიმები აძლევენ, ასევე, მაქსიმუმი უნდა გააკეთოს კვების აღდგენის კუთხით. ეს ორი საკითხი ურთიერთდაკავშირებულია. როგორც ექიმები ამბობენ, ერთი მეორის გარეშე ვერ იქნება ეფექტური. არის სრული მზადყოფნა სამედიცინო სამსახურის მხრიდან, რომ მათ მაქსიმალურად უზრუნველყონ მისი ჯანმრთელობის დაცვა. მილიონები იხარჯება სპეკულაციების სიმართლედ გადაქცევაში, საკუთარი სახელმწიფოს იმაში დადანაშაულებაში, რაც არ მომხდარა და სტრასბურგმა თქვა, რომ ეს არ მომხდარა, ეს არის როგორც სახელმწიფოს, ისევე იმ პრინციპების წინააღმდეგ, რომელსაც თითქოს თავად ამტკიცებენ.

ამიტომ კიდევ ერთხელ მინდა, სააკაშვილის გარემოცვას მოვუწოდო, მთავარი ყურადღება უნდა იყოს იმაზე, რომ პაციენტმა მკურნალობის ნაწილში ექიმებთან ითანამშრომლოს, ასევე, აღადგინოს სრულფასოვანი კვება.

არ უნდა დაგვავიწყდეს, რომ ათასობით სხვა ადამიანი იმყოფება დღეს პატიმრობაში. არ უნდა დაგვავიწყდეს ისიც, რომ სააკაშვილის თანამებრძოლებმა, სხვა პოლიტიკოსებმა, რომლებმაც წარსულში დანაშაულები ჩაიდინეს, საპატიმრო დატოვეს ჯანმრთელობის ნორმალური მდგომარეობით, რადგან ისინი თანამშრომლობდნენ სამედიცინო სამსახურთან და იცავდნენ იმ პირობებს, რომელიც პატიმრობაში მყოფ პირს ჯანმრთელობის დაცვისთვის სჭირდება“, – განაცხადა არჩილ თალაკვაძემ.

რაც შეეხება საქართველოს ყოფილი პრეზიდენტის, მიხეილ სააკაშვილის მიერ სასამართლო სხდომაზე კლინიკა „ვივამედიდან“ ჩართვისას ხელისუფლების მიმართ გაკეთებულ განცხადებას, რომ მიეცეს დებატებში მონაწილეობის საშუალება, თალაკვაძის თქმით, ხელისუფლებას მასთან სადებატო არაფერი აქვს.

„სააკაშვილი არის დებატებში საკუთარ ქვეყანასთან და საკუთარ თავთან, ჩვენ მასთან სადებატო არაფერი გვაქვს. ის არის პატიმრობაში და ჩვენ, როგორც სახელმწიფო, ვზრუნავთ მაქსიმალურად, როგორც სახელმწიფოს წარმომადგენლები, ვზრუნავთ მაქსიმალურად, რომ მისი უფლებები იყოს დაცული“, – აღნიშნა არჩილ თალაკვაძემ.

საქართველოს საგარეო საქმეთა სამინისტროში საქართველოში უკრაინის საელჩოს წარმომადგენელთან შეხვედრა გაიმართა.

შეხვედრის მიზანს უკრაინის ხელისუფლების მიერ ავიაკომპანია “ჯორჯიან ეარვეისის” სანქციების სიაში შეყვანის საკითხი წარმოადგენდა.

საგარეო საქმეთა სამინისტროს ინფორმაციით, შეხვედრაზე გამოიხატა შეშფოთება აღნიშნული გადაწყვეტილების გამო, რომელიც ქართული მხარის შეფასებით საფუძველს მოკლებულია.

მათივე ცნობით, უკრაინულ მხარეს ეთხოვა განმარტებები აღნიშნულთან დაკავშირებით. ქართული ავიაკომპანიის დასანქცირების გამო შეშფოთება დააფიქსირა ქ. კიევში საქართველოს ელჩმაც.

მესამე პრეზიდენტის ამ მდგომარეობაში ყოფნა სასჯელაღსრულების დაწესებულებაში, საავადმყოფოში, არის ძალიან მძიმე. მისი ტრანსფერი საზღვარგარეთ არის აუცილებელი და საჭირო, – ამის შესახებ პარლამენტში პოლიტიკურ ჯგუფ „ევროოპტიმისტების“ დეპუტატმა ხატია დეკანოიძემ განაცხადა.

ამასთან, როგორც მან აღნიშნა, სერიოზული დარღვევაა ის, რომ დეპუტატებს მიხეილ სააკაშვილთან შესვლის უფლება შეზღუდული აქვთ. დეკანოიძე აცხადებს, რომ აუცილებელია მასთან შევიდნენ პოლონელი ექიმებიც.

„აუცილებლად უნდა აღვნიშნო პირველ რიგში, მისი ძალიან მძიმე ფიზიკური მდგომარეობა და ის ვიზუალური სურათი, რომელიც გვაქვს მისი ჩართვის შემდეგ სასამართლოზე, ჩემთვის არის ძალიან მძიმე და დარწმუნებული ვარ, ბევრი ადამიანისთვის. პოლიტიკური შეფასებების მიღმა ვიტყვი, რომ მის ჯანმრთელობის მდგომარეობას უნდა ჰქონდეს ადეკვატური შეფასება. იქ უნდა შევიდნენ პოლონელი ექიმები. ეს არის ევროკომისიის ინიციატივა, რომელიც რამდენიმე თვის წინ გაჟღერდა და მიხეილ სააკაშვილის დიაგნოზი, მათ შორის მკურნალობის კურსი, უნდა იყოს გამოკვლეული, თუ რატომ ხდება ასე კატასტროფულად წონაში კლება. მას არ აქვს სამართლიანი სასამართლოს უფლება, რადგან ჩვენ გვაქვს სასამართლო, რომელსაც მართავს სანქცირებული მოსამართლეების კლანი. მისი ვიზუალური გარეგნობა არის ძალიან მძიმე და ეს არის იმის ნიშანი, რომ ამ ხელისუფლებას მარტო პროპაგანდის ჭრილში აინტერესებს მიხეილ სააკაშვილი. ყველამ ნახა, რომ მისი ჯანმრთელობის მდგომარეობა არ არის ისეთი, როგორსაც ხატავდა „ქართული ოცნება“, – განაცხადა დეკანოიძემ.

დემოკრატიას სჭირდება სტაბილური და ნეიტრალური საარჩევნო ადმინისტრაცია, რომელიც არ არის პარტიების ვაჭრობის საგანი და რომლისთვის ძირის გამოთხრის ბერკეტი არ აქვს არცერთ პოლიტიკურ პარტიას, მით უმეტეს, თუ ეს პარტია უკვე მხილებულია დემოკრატიისთვის ძირის გამოთხრაში, – ამის შესახებ პარლამენტის ვიცე-სპიკერმა, არჩილ თალაკვაძემ განაცხადა.

თალაკვაძის თქმით, საქართველოს უნდა ჰქონდეს ნდობით აღჭურვილი, სტაბილური საარჩევნო ადმინისტრაცია.

„თავის დროზე „ქართულმა ოცნებამ“ გავითვალისწინეთ ოპოზიციის და მედიატორების შემოთავაზება და მათი არგუმენტები, რომ საჭირო იყო ცესკო-ს დაკომპლექტების იმგვარი მოდელის შემოღება, სადაც კონსენსუსით, ანუ შეთანხმებით მოხდებოდა ცესკო-ს დაკომპლექტება. გახსოვთ, ჯერ ოპოზიციამ არ მიიღო მონაწილეობა ამ შეთანხმების განხორციელებაში პარლამენტში და სამი თვის განმავლობაში „ქართული ოცნება“ ცალმხრივად ასრულებდა შეთანხმებას. ამის შემდეგ ყველაფერი გააკეთეს, რომ დაებლოკათ საქართველოს საარჩევნო ადმინისტრაციის დაკომპლექტების პროცესი და პრაქტიკულად საარჩევნო ადმინისტრაცია გადაიყვანეს ექვსთვიან სერიებში, როდესაც ყოველ ექვს თვეში, საარჩევნო ადმინისტრაცია-ცესკო ხდებოდა და უნდა გამხდარიყო პოლიტიკური ვაჭრობის საგანი. ამან გამოიწვია უკიდურესი არასტაბილურობა და ის საფრთხე, რომ მომდევნო საპარლამენტო არჩევნებში სწორედ ეს გამხდარიყო ისევ ამ ოპოზიციის მხრიდან სპეკულირების მთავარი საკითხი, თითქოს ცესკო არ იყო დაკომპლექტებული. შესაბამისად, ისინი ცდილობდნენ, რომ წინასწარ ძირი გამოეთხარათ უკვე მომდევნო არჩევნებისთვის. ამ არგუმენტებზე დაყრდნობით და ევროპული გამოცდილების ხელახლა დამუშავებით, განხილვით, ჩვენ შემოვიტანეთ ცვლილებები, რომ ჩვენს ქვეყანას ჰქონდეს სტაბილური საარჩევნო ადმინისტრაცია, რომელიც არ იქნება პოლიტიკური ვაჭრობის საგანი და მასზე პოლიტიკური შეტევის თუ სპეკულაციების საშუალება კანონში, როგორც მინიმუმ, არ ექნება არც ერთ პარტიას. ბუნებრივია, ეს არგუმენტები ძალაში დარჩა ვეტოს გამოგზავნის შემდეგაც. ჩვენ მივიღეთ გადაწყვეტილება, რომ დაგვეძლია ვეტო. საქართველოს უნდა ჰქონდეს და ექნება კიდეც ნდობით აღჭურვილი, სტაბილური საარჩევნო ადმინისტრაცია, როგორც აქვთ ევროპულ სახელმწიფოებს. მოდელი, რომელსაც ჩვენ დავუჭირეთ მხარი, არის დემოკრატიული და ის აქვს ევროპის ყველა დემოკრატიულ სახელმწიფოს ზუსტად ისე, როგორც დღეს აქვს საქართველოს. დემოკრატიას სჭირდება სტაბილური და ნეიტრალური საარჩევნო ადმინისტრაცია, რომელიც არ არის პარტიების ვაჭრობის საგანი და რომლისთვის ძირის გამოთხრის ბერკეტი არ აქვს არცერთ პოლიტიკურ პარტიას, მით უმეტეს, თუ ეს პარტია უკვე მხილებულია დემოკრატიისთვის ძირის გამოთხრაში“, – განაცხადა თალაკვაძემ.

პარლამენტმა „საარჩევნო კოდექსში“ ცვლილებებზე პრეზიდენტის ვეტო დაძლია.

დღეს მოსახლეობამ კიდევ ერთხელ იხილა უმძიმეს მდგომარეობაში მყოფი საქართველოს მესამე პრეზიდენტი, რომელსაც ბიძინა ივანიშვილი, ტერორისტი პუტინის დავალებით, ტყვეობაში ამყოფებს, – ამის შესახებ „ერთიანი ნაციონალური მოძრაობის“ თავმჯდომარემ, ლევან ხაბეიშვილმა ბრიფინგზე განაცხადა.

მისივე თქმით, „ნაციონალური მოძრაობა“ რამდენიმე თვეა, მოითხოვს, ევროკავშირის მისიას, პოლონელ ექიმებს, მიხეილ სააკაშვილთან შესვლის უფლება მიეცეთ.

ამასთან, ხაბეიშვილმა პარლამენტის თავმჯდომარეს, შალვა პაპუაშვილს კიდევ ერთხელ მოუწოდა, პარლამენტის წევრებს საქართველოს მესამე პრეზიდენტის მონახულების საშუალება მისცეს.

„დღეს კიდევ ერთხელ იხილა საქართველოს მოსახლეობამ უმძიმეს მდგომარეობაში მყოფი საქართველოს მესამე პრეზიდენტი, რომელსაც ბიძინა ივანიშვილი, ტერორისტი პუტინის დავალებით, ტყვეობაში ამყოფებს. ასევე, ჩვენ უკვე რამდენიმე თვეა ვითხოვთ ევროკავშირის მისიის შესვლას სააკაშვილთან, ვგულისხმობ, პოლონელ ექიმებს და რამდენიმე თვეა, სისხლის სამართლის დამნაშავე რატი ბრეგაძე, რომელსაც უამრავი დანაშაული აქვს ჩადენილი, უარს ამბობს და ევროკავშირის მისიას, პოლონელ ექიმებს არ აძლევს შესაძლებლობას, რომ მიხეილ სააკაშვილთან შევიდნენ და მისი ჯანმრთელობის მდგომარეობა გამოიკვლიონ და თუ საჭირო გახდა, ცხადია, მკურნალობის პროცესში ჩაერთონ.

ასევე, მეორე საკითხი, რომელიც პრეზიდენტ მიხეილ სააკაშვილს უკავშირდება – ჩვენ არა ერთხელ მოვითხოვეთ და დღეს კიდევ ერთხელ ვითხოვთ საქართველოს ე.წ. პარლამენტის თავმჯდომარისგან, შალვა პაპუაშვილისგან, პარლამენტის წევრის უფლებამოსილების განხორციელებაში ხელის არშეშლას. საქართველოს პარლამენტის წევრებს უკვე რამდენიმე თვეა არ გვეძლევა საშუალება მოვინახულოთ პრეზიდენტი სააკაშვილი და დღეს კიდევ ერთხელ მოვითხოვთ ჩვენი უფლების განხორციელებას,“ – განაცხადა ხაბეიშვილმა.