თბილისის საჯარო საბავშვო ბაღებში 2023-2024 სასწავლო-სააღმზრდელო წლისთვის რეგისტრაცია იწყება

12:20 - 04/07/2023

თბილისის საჯარო საბავშვო ბაღებში 2023-2024 სასწავლო-სააღმზრდელო წლისთვის რეგისტრაცია იწყება.

როგორც დედაქალაქის მერმა, კახა კალაძემ აღნიშნა, პირველი ეტაპი, 10 ივლისს, 10:00 საათზე დაიწყება.

„თბილისის საჯარო საბავშვო ბაღებში, 2023-2024 სასწავლო-სააღმზრდელო წლისთვის რეგისტრაცია იწყება. რეგისტრაცია ელექტრონულად, სამ ეტაპად წარიმართება.

თბილისის საბავშვო ბაღების მართვის სააგენტოს ვებ-გვერდზე იქნება შესაძლებელი რეგისტრაციის გავლა.

პირველი ეტაპი დაიწყება 10 ივლისს, 10:00 საათზე და გაგრძელდება 15 ივლისის 24:00 საათამდე. რეგისტრაციის პირველ ეტაპზე რეგისტრაციას გაივლიან მიზნობრივი სოციალური ჯგუფების წარმომადგენელი ბავშვები: სოციალურად დაუცველი ოჯახის წევრი ბავშვები, რომელთა სარეიტინგო ქულა არ აღემატება 100 ათასს ქულას, სპეციალური საგანმანათლებლო საჭიროების მქონე ბავშვები, ჩვილ ბავშვთა სახლის ბენეფიციარები, მარტოხელა მშობლების შვილი, მრავალშვილიანი ოჯახის შვილები, ან ნაშვილები ბავშვები, სამხედრო მოსამსახურეების შვილები, საჯარო ბაღის აღსაზრდელთა დედმამიშვილები, საბავშვო ბაღებში დასაქმებულ თანამშრომელთა შვილები.

მეორე ეტაპზე დარეგისტრირდებიან ქალაქ თბილისის მუნიციპალიტეტზე რეგისტრირებული ბავშვები, ვინც დედაქალაქშია რეგისტრირებული. 17 ივლისს, დილით 10:00 საათზე დაიწყება და გაგრძელდება 23 ივლისს, 24:00 საათამდე.

რეგისტრაციის მესამე ეტაპია საყოველთაო რეგისტრაციაა, რომელიც 25 ივლისს, დილით 10:00 საათზე დაწყება. რეგისტრაციის გავლას შეძლებს ყველა ის ბავშვი, რომელიც სასწავლო სააღმზრდელო წლის დასაწყისში, 18 სექტემბრის მდგომარეობით შეუსრულდება 2 წელი“, – აღნიშნა კალაძემ.

ველისციხეში კაცმა ორი მეზობელი მოკლა

12:01 - 04/07/2023

გურჯაანის მუნიციპალიტეტის სოფელ ველისციხეში მკვლელობა მოხდა. არსებული ინფორმაციით, მამაკაცმა ორი მეზობელი ცეცხლსასროლი იარაღით მოკლა.

შემთხვევა 1 საათის წინ მოხდა. მკვლელობის მოტივი უცნობია, თუმცა, როგორც ადგილობრივები ამბობენ, მომხდარს წინ ურთიერთშელაპარაკება უძღოდა.

ადგილზე მობილიზებულია პოლიცია.

“ექსპლუატაციის სტატუსი, 2020 წლის აგვისტომდე აშენებულ 400-მდე შენობას მიენიჭა, 700-მდე ობიექტის საქმე კი განხილვაშია” – კალაძე

11:55 - 04/07/2023

ქალაქ თბილისის მერის, კახა კალაძის განცხადებით, ადამიანებს, რომლებიც ექსპლუატაციის სტატუსის არმქონე შენობებში ცხოვრობენ, მიმდინარე თვის 27 რიცხვამდე შეუძლიათ მერიას მიმართონ.

როგორც კახა კალაძემ თბილისის მუნიციპალიტეტის მთავრობის სხდომაზე აღნიშნა, 2 წლის წინ მიღებული კანონმდებლობის თანახმად, შენობებს, რომლებიც 2020 წლის 18 აგვისტოს მდგომარეობით დასრულებულია, თუმცა ავტოსადგომების რაოდენობასთან, სიმაღლის რეგულირებასთან და სხვა მსგავს საკითხებთან დაკავშირებული დარღვევები აქვთ, ექსპლუატაციაში მაინც მიიღებენ.

კახა კალაძის თქმით, კანონმდებლობის დამტკიცების შემდეგ, ექსპლუატაციის სტატუსი 400-მდე შენობას მიენიჭა და 700-მდე ობიექტის საქმე ახლაც განიხილება.

„იცით, რომ დედაქალაქისთვის ერთ-ერთ უდიდეს პრობლემასა და გამოწვევას დაუსრულებელი ობიექტების მშენებლობა წარმოადგენდა. უფრო კონკრეტულად, შენობების მშენებლობა დასრულებული იყო, თუმცა ექსპლუატაციაში არ იყო მიღებული. ათეულობით წლების განმავლობაში ადამიანები ცხოვრობდნენ შენობებში, რომლების ექსპლუატირებული არ იყო. ამის მიზეზი შეიძლება ყოფილიყო უკანონო მშენებლობა იმ მიზნით, რომ კომპანიებს მეტი სარგებელი მიეღოთ, ასევე, გადამეტებული k1 და k2 კოეფიციენტები, ნებართვისაგან განსხვავებული პროექტით მშენებლობა და ა.შ. ეს, პირველ რიგში, პრობლემა იყო იმ ადამიანებისთვის, რომლებიც მსგავს კორპუსებში ცხოვრობდნენ. ქონებას მშენებარე ობიექტის სტატუსი ჰქონდათ, რაც იურიდიულად სრულფასოვანი მფლობელობის უფლებას მათ არ აძლევდა. ასევე, იქ მცხოვრები ადამიანები ვერ ქმნიან ამხანაგობებს და ამ ამხანაგობების განვითარების მიმართულებით არსებული პროექტებით ვერ სარგებლობენ.

ამ პრობლემის გადასაჭრელად, ორი წლის წინ, პარლამენტში, საქართველოს სივრცით-დაგეგმარებით, არქიტექტურული და სამშენებლო საქმიანობის კოდექსში ცვლილებები შევიდა. ამ ცვლილებების მიხედვით, შესაძლებელი გახდა, რომ ექსპლუატაციაში მიიღონ ისეთი შენობებიც, რომლებიც 2020 წლის 18 აგვისტოს მდგომარეობით დასრულებულია, თუმცა აქვს რაღაც დარღვევები, მაგალითად, ავტოსადგომების რაოდენობა, სიმაღლის რეგულირების ხაზი და სხვა. მიუხედავად ამისა, ადამიანების სიცოცხლესთან დაკავშირებული რისკიდან გამომდინარე, იქვე დაზუსტდა, რომ ექსპლუატაციაში მიიღება მხოლოდ ის შენობა-ნაგებობები, რომლებიც შესაბამისი საექსპერტო დასკვნების მიხედვით, უსაფრთხოების ნორმებს აკმაყოფილებენ. ამ კანონმდებლობის მიღების შემდეგ, ექსპლუატაციაში 400-მდე ობიექტი მივიღეთ და განხილვის პროცესში 700-მდე საქმეა.

მერიაში განცხადებების წარმოსადგენად ადამიანებს 2 წელი ჰქონდათ. მიმდინარე თვის 27 რიცხვში ეს ვადა იწურება და მათ, ვისაც ამ შესაძლოებით არ უსარგებლიათ, შეუძლიათ შეაგროვონ შესაბამისი დოკუმენტები და მოგვმართონ“, – განაცხადა თბილისის მერმა.

“ნებისმიერ აგრესიას სამოქალაქო აქტივიზმს ეძახიან და თქვენი ტელევიზიები ამას პოზიტიურ კონტექსტში აშუქებენ”- კობახიძე ჟურნალისტს

11:54 - 04/07/2023

“იმის თქმა, რომ 12 რეკომენდაციიდან შესრულდა მხოლოდ 3 არის მანიპულაცია. ყურადღებით რომ მოგესმინათ, ნახავდით, რომ 12-დან 3 არ შესრულებულა. სიღრმისეული ინფორმაციაც იმისთვის წარმოგიდგინეთ, რომ ასეთი მშრალი ციფრებით არ გესაუბრათ, – ამის შესახებ „ქართული ოცნების“ თავმჯდომარემ, საპარლამენტო უმრავლესობის ლიდერმა ირაკლი კობახიძემ ჟურნალისტის კითხვის პასუხად განაცხადა.

„ევროკომისიამ იქვე წარმოადგინა 18 პუნქტი, რაც სამომავლოდ არის გასაკეთებელი. თუ ამ 18 პუნქტს ჩავუღრმავდებით, ნახავთ, რომ მთლიანობაში, ხარისხობრივად რაც იყო 12 პრიორიტეტი, იმის 80% არის გაკეთებული. ეს დასტურდება საიდან: 18 პუნქტია, საიდანაც 13, 14 ეხება პრაქტიკის გაუმჯობესებას. რაც შეიძლება დღემდე გაკეთებულიყო, ყველაფერი გავაკეთეთ, რაც ამ პრეზენტაციიდან ჩანდა.

რაც შეეხება ჟურნალისტების უსაფრთხოების დაცვას და კონკრეტულად მშვილდაძის შემთხვევას – ჩვენ გავაკეთეთ არაერთი განცხადება, რომ ძალადობა არის კატეგორიულად მიუღებელი. მე ყველას მოვუწოდე, ნუ შეაქვთ თავისი წვლილი აგრესიის გაღვივებაში, პოლარიზაციაში. მნიშვნელოვანია ის, რომ სამოქალაქო აქტივიზმს ეძახიან ნებისმიერ აგრესიას. მაგალითად, იყო აჭარაში შემთხვევა საპარლამენტო არჩევნების შემდეგ, როდესაც ერთ-ერთი ოპოზიციონერი დეპუტატი შევიდა უმაღლეს საბჭოში და მას თავზე ჩამოამხეს ნაგვის ურნა. თქვენი ტელევიზიები ამას პოზიტიურ კონტექსტში აშუქებდნენ“, – აღნიშნა კობახიძემ.

ყოფილი იპოდრომის ტერიტორიაზე ჩოგბურთის კორტების მშენებლობა იწყება

11:40 - 04/07/2023

ყოფილი იპოდრომის მიმდებარე ტერიტორიაზე ჩოგბურთის კორტების მშენებლობა იწყება

ყოფილი იპოდრომის მიმდებარე ტერიტორიაზე ჩოგბურთის კორტების მშენებლობა იწყება, – ამის შესახებ თბილისის მერმა, კახა კალაძე მუნიციპალიტეტის მთავრობის დღევანდელ სხდომაზე განაცხადა.

მისი თქმით, აღნიშნული ტერიტორია წინა ხელისუფლების დროს საცხოვრებელი კორპუსების ასაშენებლად გასხვისდა, რომელიც მუნიციპალიტეტის ამჟამინდელმა მთავრობამ გამოისყიდა.

„ადგილობრივ მოსახლეობას დავპირდით, რომ დაგეგმილი მშენებლობა არ განხორციელდებოდა. დავიწყეთ ამ მიმართულებით მუშაობა. მოვახდინეთ ადგილმონაცვლეობა, რაც საკმაოდ ძვირი დაუჯდა მერიას და აღნიშნული ტერიტორია მოსახლეობას დაუბრუნდა“, – განაცხადა კახა კალაძემ.

მისივე თქმით, აღნიშნული პროექტი დასრულდება და ექსპლუატაციაში შევა 2025 წლის 1-ელი ივლისისთვის.

„აღნიშნული ტერიტორია ისტორიულად საჩოგბურთო კორტებს წარმოადგენდა. 2021 წელს გამოცხადდა აუქციონი, რომელიც მიზნად ისახავდა მიწის ნაკვეთზე საჩოგბურთო კორტების აღდგენასა და სპორტულ-გამაჯანსაღებელი ინფრასტრუქტურის განვითარებას – ჯამში, 5 000 000 ლარის ოდენობის ინვესტიციის განხორციელებას. დღეის მდგომარეობით, მესაკუთრეს მოპოვებული აქვს სამშენებლო ნებართვა და იწყებს მშენებლობას“, – აღნიშნა კახა კალაძემ.

“საქართველოსთვის სტატუსის მინიჭება პოლარიზაციას ვერ დაასრულებს”-კობახიძე

11:34 - 04/07/2023

ქვეყნისთვის სტატუსის მინიჭება პოლარიზაციას ვერ დაასრულებს, მაგრამ ფუნდამენტურ ცვლილებას შეიტანს საერთო პოლიტიკურ გარემოში, – ამის შესახებ პარტია „ქართული ოცნების“ თავმჯდომარე ირაკლი კობახიძემ პრესკონფერენციაზე განაცხადა, სადაც რეკომენდაციების შესრულებასთან დაკავშირებით ანგარიშს წარადგენს.

მისივე თქმით, რადიკალური ოპოზიცია კანდიდატის სტატუსის საკითხს ბოროტად იყენებს, რათა პოლარიზაცია გააღვივოს.

„ხედავთ, რომ ბოლო ერთი წლის, თვეების განმავლობაში მთავარი თემა, რაზეც რადიკალური ოპოზიცია აგებს პოლარიზაციის კამპანიას, სწორედ კანდიდატის სტატუსია. სამწუხაროდ, ამ მნიშვნელოვან თემასაც კი ბოროტად იყენებენ, რათა პოლარიზაცია გააღვივიონ. ეს არის მთავარი ინსტრუმენტი მათ ხელში, რომლითაც აღვივებენ პოლარიზაციას. რა თქმა უნდა, კანდიდატის სტატუსის მინიჭება ჩვენი ქვეყნისთვის ავტომატურად შეცვლის ამ მდგომარეობას. ბოლომდე ვერ დაასრულებს პოლარიზაციას, მაგრამ არსებით ცვლილებას შეიტანს იმ მდგომარეობაში, რაც დაკავშირებულია პოლარიზაციასთან. ამ კუთხითაც უნდა გვქონდეს იმედი, რომ საბოლოო ჯამში, კანდიდატის სტატუსი მოგვენიჭება“, – განაცხადა ირაკლი კობახიძემ.

ამასთან, როგორც კობახიძემ აღნიშნა, ნებისმიერი ქვეყნის ხელისუფლების ინტერესებშია სიმშვიდე, ქვეყანაში არ ირსებობდეს პოლარიზაცია.

„უხეშ რიტორიკას რაც შეეხება, ძალიან რთული საკითხია, ცალმხრივად ამ პრობლემას ვერ მოაგვარებ. როცა მეორე მხრიდან, რა თქმა უნდა, ოპოზიციაზე ვსაუბრობ, ხან პრორუსულს გეძახიან, ხან რუსულს, პუტინისტს და ასე შემდეგ, შეუძლებელია, ამ ყველაფერს პასუხი არ გასცე. აქედან გამომდინარე, რთული საკითხია პრობლემის მოგვარება. სუბიექტურადაც დაინტერესებულია ნებისმიერი ხელისუფლება ნებისმიერ ქვეყანაში, რომ არ ჰქონდეს პოლარიზაცია, ოთხი წლის განმავლობაში მშვიდად მართოს ქვეყანა. ეს არის არა მარტო ობიექტური ინტერესი, არამედ ხელისუფლების სუბიექტური ინტერესია, სიმშვიდე ხელისუფლების სუბიექტურ ინტერესებშია. აქედან გამომდინარე, ნათელია, ვის აწყობს პოლარიზაცია. რასაც ეძახიან პოლარიზაციას, სინამდვილეში არის რადიკალიზმი. პოლარიზაცია არის ტერმინი, რომელიც უბრალოდ პასუხისმგებლობას ანაწილებს ოპოზიციასა და ხელისუფლებაზე. სინამდვილეში, პრობლემა არის რადიკალიზმი. ოპოზიცია როცა გეძახის რუსს, პუტინისტს და ასე შემდეგ, შენ იძულებული ხარ, უპასუხო. სამწუხაროდ, ასე გრძელდება. ეს პროცესი არის ჩაკეტილი წრე. არ ვიცი, როგორ უნდა გავარღვიოთ ჩაკეტილი წრე, მაგრამ კანდიდატის სტატუსის მინიჭება ყველა შემთხვევაში, ძალიან დადებით როლს შეასრულებს პოლარიზაციის ხარისხის შემცირებაში“, – განაცხადა ირაკლი კობახიძემ.

თიბისის მხარდაჭერით, თბილისში საერთაშორისო ტექნოლოგიური კონფერენცია Change Inspire ჩატარდება

11:17 - 04/07/2023

სულ ცოტა დრო რჩება 7 ივლისამდე, როდესაც თბილისში, თიბისის მხარდაჭერით და HT Solutions – ის ორგანიზებით, საერთაშორისო ტექნოლოგიური კონფერენცია Change Inspire გაიმართება. კონფერენციის მიზანია ტექნოლოგიური კომუნის წევრებს მისცეს ინსპირაცია, რომ ცვლილებების ლიდერები გახდნენ.

კონფერენცია 2018 წლიდან ტარდება და მასში მონაწილე IT მენეჯერები, ინჟინრები და სხვადასხვა კომპანიის IT მიმართულების ხელმძღვანელები ერთმანეთს უახლეს ტექნოლოგიურ მიღწევებს უზიარებენ. წელს კონფერენციას 500 ადამიანი დაესწრება. ასევე ეყოლება ადგილობრივი და უცხოელი სპიკერები, რომლებიც 4 ძირითად თემაზე ისაუბრებენ, ესენია: ციფრული ტრანსფორმაცია, კიბერუსაფრთხოება, Big Data და DevOps.

თიბისი, როგორც ტექნოლოგიური კომპანია, კონფერენციაში Game Changer Partner-ის სტატუსით მონაწილეობს და წარმოდგენილი იქნება საკუთარი სივრცით, სადაც თიბისის ტექ გუნდი, 200 პროფესიონალს საკუთარ DevOps გამოცდილებას გაუზიარებს. ამ სივრცეში ტექნოლოგიებით დაინტერესებული ადამიანები ძირითადად ტექნიკურ ნაწილს მოისმენენ, რადგან სცენა DevOps-სის გაშლას დაეთმობა.

თუ ხართ ტექნოლოგიების სფეროში დასაქმებული და გსურთ, გაერკვეთ უახლეს ტექნოლოგიურ პროცესებში და გადაწყვეტებში, ასევე გაიცნოთ და მოუსმინოთ წამყვან ექსპერტებს მსოფლიოს ტექნოლოგიური კომპანიებიდან, მაშინ მოინიშნეთ 7 ივლისი და დარეგისტრირდით კონფერენციაზე აქ: https://changeinspire.ge/#about-conference

“უკრაინის ხელისუფლების პოზიცია ჩვენთვის არის შეურაცხმყოფელი” – ირაკლი კობახიძე

10:58 - 04/07/2023

უკრაინის ხელისუფლების პოზიცია ჩვენთვის არის, რა თქმა უნდა, შეურაცხმყოფელი – ჩვენი სურვილია, რომ თუნდაც ცალმხრივი მეგობრობის რეჟიმში დავრჩეთ უკრაინის ხელისუფლებასთან, იმიტომ, რომ ეს ქვეყანა არის დღეს ომის მდგომარეობაში, – ამის შესახებ “ქართული ოცნების” თავმჯდომარემ ირაკლი კობახიძემ უკრაინის პრეზიდენტის გადაწყვეტილებასთან დაკავშირებით განაცხადა, რომელმაც უკრაინაში საქართველოს ელჩს მოუწოდა დატოვოს ქვეყანა, საქართველოს ხელისუფლებასთან მოლაპარაკების მიზნით.

როგორც კობახიძემ აღნიშნა, შეურაცხმყოფელი იყო ის, რომ უკრაინის ხელისუფლების კონკრეტული მაღალჩინოსნები ჩართულები იყვნენ სააკაშვილის საქართველოში ჩამოსვლაში და ახლა იმავე ხელისუფლების წარმომადგენლები მისი უკრაინისთვის გადაცემას ითხოვენ, რაც კობახიძის შეფასებით, ასევე შეურაცხმყოფელია.

„რაც შეეხება უკრაინის პრეზიდენტის გუშინდელ ნაბიჯს, რაც უკავშირდებოდა მიხეილ სააკაშვილს, მე არ მინდა ღრმად შევიდე ამ თემაში მარტივი მიზეზის გამო, რომ თემა ეხება იმ ქვეყნის პრეზიდენტს, რომელიც არის ომის მდგომარეობაში. მაგრამ ზოგადად ხელისუფლების ეს პოზიცია ჩვენთვის არის, რა თქმა უნდა, შეურაცხმყოფელი. შეურაცხმყოფელი იყო თავისთავად ისიც, რომ, როგორც თავადვე აღიარეს ჩვენმა ოპონენტებმა, უკრაინის ხელისუფლების კონკრეტული მაღალჩინოსნები იყვნენ ჩართულნი სააკაშვილის საქართველოში გამოგზავნაში, დღესაც იგივე ხელისუფლება ითხოვს სააკაშვილის უკრაინაში დაბრუნებას. ეს, რა თქმა უნდა, შეიცავს შეურაცხყოფის ნიშნებს, თუმცა ამაზე ღრმად მე არ მინდა შევიდე. ჩვენი სურვილია, რომ თუნდაც ცალმხრივი მეგობრობის რეჟიმში დავრჩეთ უკრაინის ხელისუფლებასთან, იმიტომ, რომ ეს ქვეყანა არის დღეს ომის მდგომარეობაში”, – განაცხადა კობახიძემ.

“ხომ გახსოვთ ის კადრები, სააკაშვილი სახურავზე რომ დააკავეს?”- ამირან სალუქვაძე

10:37 - 04/07/2023

“უაღრესად შემაშფოთებელი და შეურაცხმყოფელია ზელენსკის გადაწყვეტილება ჩვენი ელჩის გამოწვევასთან დაკავშირებით” – ასე ეხმაურება სოციალურ ქსელში ანალიტიკოსი, ამირან სალუქვაძე

უკრაინის პრეზიდენტის,ვოლოდიმირ ზელენსკის მიერ Twitter-ზე გამოქვეყნებულ სტატუსს, სადაც ზელენსკი სთხოვს საქართველოს ელჩს, 48 საათის განმავლობაში დატოვოს უკრაინა, რათა კონსულტაციები გამართოს თბილისში მიხეილ სააკაშვილის უკრაინაში დაბრუნებაზე.

“სააკაშვილი, ზელენსკი…
უაღრესად შემაშფოთებელი და შეურაცხმყოფელია ზელენსკის გადაწყვეტილება ჩვენი ელჩის გამოწვევასთან დაკავშირებით.

უკვე ბევრჯერ ითქვა და დაიწერა, რომ ერთადერთი საელჩო იყო, რომელიც კიევის ალყის დროს აგრძელებდა საქმიანობას და ეს იყო არა საელჩოს, არამედ საქართველოს ხელისუფლების გადაწყვეტილება. ამერიკამაც კი თავისი საელჩოს ევაკუაცია მოახდინა და ლვოვში გადაიტანა.

თუ ოპოზიცია ხარ, ხელისუფლებასთან ბრძოლა შენი დანიშნულებაა, მაგრამ როცა ებრძვი სახელმწიფოს, მის ინტერესებს და პრესტიჟს, მე-5 კოლონა ხარ.

ეს მათი მისამართით, ვისაც სიხარული მოგანიჭათ. არცაა გასაკვირი, როცა წინაპრების და ჩვენი თანამედროვეობის გმირების სისხლით გაჟღენთილ მიწას, ქვების გროვას უწოდებთ.

ზელენსკის კომენტირება არც ღირს.

რაც შეეხება სააკაშვილს, ერთ თვეში სტრასბურგში ორი საქმე წააგო. ერთი ეხებოდა მის ყოფნას ვივა მედში და სამკურნალოდ უცხოეთში გადაყვანას, რაზეც უარი მიიღო, მეორე კი ჯერ კიდევ პეტრო პოროშენკოს დროს მის დაკავებას.

ჰოდა, ასეთი კითხვა მაქვს. ხომ გახსოვთ ის კადრები, სახურავზე რომ დააკავეს?

აი ეს საქმე წააგო ახლა, ერთი თუ ორი კვირის წინ. ამ საქმეში ხომ სააკაშვილი უკრაინის სახელმწიფოს წინააღმდეგ დაობდა?

საინტერესოა უკრაინის ხელისუფლებამ რატომ არ შეაშველა ერთი სიტყვა, რომ პოროშენკომ სააკაშვილი უკანონოდ დააკავა?
ანუ, რა გამოდის, უკრაინამ 2017 წელს კანონიერად დააკავა და საქართველომ ორგზის მსჯავრდებული და სამგზის ბრალდებული, რომელიც ფარულად შემოიპარა, უკანონოდ დააპატიმრა? სადაური ლოგიკაა?
საპატიმროში, ანუ ვივა მედში ყოფნის სამართლებრივი შეფასება დადო სტრასბურგმა.
განაჩენებს არც ასაჩივრებენ, არც აღიარებენ, ხალხს ბოდიშს არ უხდიან. ფიქრობენ ხალხს ყველაფერი მოეჩვენა და მათ მიმართ უსამართლო პრეტენზიები აქვთ.
ვკითხულობ პოსტებს, კომენტარებს, რა მდგომარეობამდე მიიყვანეს სააკაშვილიო. მდგომარეობამდე მიიყვანეს სერგო თეთრაძე, სულხან მოლაშვილი და უამრავი სხვა. გამოუფინეთ ახლიდან ფოტოები. სააკაშვილს ვინმე თითით ეხება, ან კვების, ან მკურნალობის უფლებას უზღუდავს? 24 საათიანი ვიდეო თვალთვალის ქვეშაა. მოწამვლა არ დადასტურდა. დადეთ ვიდეო, რომ კლინიკაში ცუდად ექცევიან და პირველი დავუჭერ მხარს მის გამოშვებას. თუ ეს ასე არაა, დანარჩენი სამართლებრივი დავის საკითხია.
არავის ციხეში ყოფნით არ ვხალისობ, გინდათ სააკაშვილი იყოს, გინდათ ქარდავა, გინდათ სხვა ვინმე. ხალისობა ის იყო, საღამოს რომ იკრიბებოდა ღამის მთავრობა და ხალხის ჩაგვრის ისტორიებით ხალისობდნენ. სხვათაშორის, ქარდავა და მისი კოლეგები რომ სხედან, სააკაშვილის ბრალია და არა მხოლოდ მისი. მისი შექმნილი და წახალისებულია როგორც სიტყვიერად, ისე თანამდებობებით, მედლებით და ორდენებით. ეს ისე…”-წერს სოციალურ ქსელში ამირან გამყრელიძე.

საქართველოში მიწისძვრა მოხდა

10:35 - 04/07/2023

საქართველოში მიწისძვრა მოხდა. დედამიწის შემსწავლელ მეცნიერებათა ინსტიტუტის სეისმური მონიტორინგის ეროვნული ცენტრის ინფორმაციით, მიწისძვრის ეპიცენტრი ქალაქ დმანისის სოფელი სამება იყო.

მიწისძვრის სიმძლავრემ 3.1 მაგნიტუდა შეადგინა.

ერთი კომპანიის სამი ხელმძღვანელი თანხების გაფლანგვისა და ქონების გადამალვის ფაქტებზე პასუხისგებაში მისცეს

10:29 - 04/07/2023

საქართველოს ფინანსთა სამინისტროს საგამოძიებო სამსახურის მიერ გატარებული საგამოძიებო მოქმედებების შედეგად, მოქალაქეთა კუთვნილი დიდი ოდენობით თანხების გაფლანგვისა და დიდი ოდენობით ქონების გადამალვის ფაქტებზე, ერთ-ერთი კომპანიის სამი ხელმძღვანელი პირი პასუხისგებაში იქნა მიცემული.

ამის შესახებ ფინანსთა სამინისტროს საგამოძიებო სამსახურის მიერ გავრცელებულ ინფორმაციაშია ნათქვამი.

„გამოძიებით დადგინდა, რომ ბრალდებულებმა, რომელთა სამეწარმეო საქმიანობის სფეროს წარმოადგენდა ავტომანქანების ყიდვა-გაყიდვა, მოქალაქეებისგან მიიღეს ჯამში 568 120 ლარი, რომლითაც უნდა შეეძინათ ავტომანქანები და ჩამოეყვანათ საქართველოში. ნაცვლად აღნიშნულისა, ბრალდებულების მიერ მიღებული თანხები გაფლანგული და არამიზნობრივად იქნა გახარჯული. ამავე დროს, მოქალაქეებთან არსებული და მოსალოდნელი ვალდებულებისთვის თავის არიდების მიზნით, ბრალდებულებმა მოჩვენებითი გარიგებით გადამალეს კომპანიის საკუთრებაში არსებული დიდი ოდენობით, დაახლოებით, 740 000 ლარის ღირებულების ქონება, რათა დაზარალებულებს არ ჰქონოდათ ზიანის ანაზღაურების მოთხოვნის შესაძლებლობა.

გამოძიება მიმდინარეობს საქართველოს სისხლის სამართლის კოდექსის 182-ე და 205-ე პრიმა მუხლებით, რაც სასჯელის სახით ითვალისწინებს თავისუფლების აღკვეთას 7-დან 11 წლამდე ვადით”, – ნათქვამია უწყების მიერ გავრცელებულ ინფორმაციაში.

PSP აგრძელებს თურქული იაფი მედიკამენტების შემოტანას

10:11 - 04/07/2023

კომპანია PSP აგრძელებს თურქეთიდან იაფი ევროპული მედიკამენტების შემოტანას.

ამჯერად კომპანიამ 25 დასახელების მედიკამენტი, 44 766 კოლოფი, შემოიტანა. ყოველდღიურად PSP-ს სააფთიაქო ქსელი მომხმარებელს მთელი საქართველოს მასშტაბით 200-ზე მეტი დასახელების თურქულ მედიკამენტს სთავაზობს.

„თურქეთიდან მედიკამენტების პროაქტიულად და გამარტივებული „აღიარებითი“ რეჟიმით შემოტანის დაშვებამ, შესაძლებლობა მოგვცა იაფი თურქული მედიკამენტები ჩვენი ქევყნის ყველა მოქალაქისთვის ხელმისაწვდომი გაგვეხადა.

ახალი რეგულაციის ამოქმედების შედეგად, 2022 წლის თებერვლიდან PSP ყოველდღიურ რეჟიმში ვახორციელებთ კომუნიკაციას თურქეთის სადისტრიბუციო კომპანიებთან ყველა მოთხოვნადი მედიკამენტის ხელმისაწვდომ ფასად შემოტანის მიზნით; ამ ეტაპზე ის 25 დასახელების მედიკამენტი შემოვიტანეთ, რომელზეც თურქეთიდან ექსპორტის ნებართვა აქვთ დისტრიბუტორებს. ამ მიმართულებით მუშაობას კვლავ აქტიურ რეჟიმში ვაგრძლებეთ, რომ მომხმარებლებს, არა მარტო საკუთარი სააფთიაქო ქსელის მეშვეობით, საქართველოს ყველა კუთხეში უწყვეტად მივაწოდოთ გარანტირებული ხარისხის მედიკამენტების ყველაზე ფართო არჩევანი“ – აცხადებენ PSP-ში.

1...1,9221,9231,924...2,318 Page 1,923 of 2,318