Home Blog Page 19

კატარმა ისრაელსა და „ჰამასს“ შორის შუამავლობა შეწყვიტა

კატარმა ისრაელსა და „ჰამასს“ შორის ცეცხლის შეწყვეტისა და მძევლების გათავისუფლების შესახებ მოლაპარაკებებში შუამავლის როლი შეაჩერა , – ინფორმაციას BBC-ი ავრცელებს.

გამოცემის ცნობით, ქვეყნის საგარეო უწყებაში განაცხადეს, რომ მუშაობას მაშინ განაახლებენ, როდესაც „ჰამასი“ და ისრაელი მოლაპარაკებისთვის მზადყოფნას გამოავლენენ.

„კატარმა შეთანხმების მიღწევის ბოლო მცდელობისას, 10 დღის წინ მხარეებს განუცხადა, რომ შეაჩერებდა ძალისხმევას „ჰამასსა“ და ისრაელს შორის შუამავლობის საქმეში, თუ შეთანხმების მიღწევა ამ რაუნდში მოხდებოდა. კატარი განაახლებს ამ ძალისხმევას, როცა მხარეები გამოავლენენ მზადყოფნას და სერიოზულობას სასტიკი ომის დასასრულებლად“, – აღნიშნულია კატარის საგარეო საქმეთა სამინისტროს განცხადებაში.

რამდენიმე საინფორმაციო სააგენტომ გუშინ გაავრცელა ინფორმაცია, რომ კატარმა და შეერთებულმა შტატებმა მიაღწიეს შეთანხმებას დოჰაში „ჰამასის“ პოლიტიკური ოფისის დახურვასთან დაკავშირებით იმის გამო, რომ „ჰამასმა“ „უარი თქვა კეთილსინდისიერად მოლაპარაკებაზე“. კატარის საგარეო საქმეთა სამინისტრომ განაცხადა, რომ ინფორმაცია არაზუსტია.

უკრაინამ მოსკოვზე დრონებით შეტევა განახორციელა – შეზღუდვები დაწესდა  აეროპორტებში – მოსკოვის მერი

საჰაერო თავდაცვის სისტემები დედაქალაქ მოსკოვზე უკრაინული დრონების თავდასხმას იგერიებენ, – რუსული მედიის ინფორმაციით, ამის შესახებ მოსკოვის მერი, სერგეი სობიანინი იუწყება.

მისი თქმით, ამ დროისთვის მოსკოვის მიმართულებით მფრინავი 32 დრონი განადგურდა.

მოსკოვის ოლქის გუბერნატორის, ანდრეი ვორობიოვის განცხადებით, ჩამოგდებული დრონების ნასმხვრევების გამო სტანოვოეს დასახლებაში ორ სახლს და ავტომობილებს ცეცხლი გაიჩნდა. დაშავდა ერთი ქალი, რომელიც საავადმყოფოში გადაიყვანეს.

დრონებით თავდასხმის გამო, დედაქალაქის დომოდედოვოს, ჟუკოვსკისა და შერემეტევოს აეროპორტებში შეზღუდვები დაწესდა.

მიწის სისტემური რეგისტრაციის რეფორმა 2025 წლის ბოლომდე გაგრძელდება

იუსტიციის სამინისტრო 2022 წლიდან ახორციელებს მიწის სისტემური რეგისტრაციის რეფორმას, რომელიც მთელი ქვეყნის მასშტაბით 59 მუნიციპალიტეტში მიმდინარეობს.

იუსტიციის სამინისტროს ცნობით, რეფორმის ფარგლებში სახელმწიფო მოქალაქეებს უსასყიდლოდ ურეგისტრირებს, როგორც საკუთრებაში ან სარგებლობაში არსებულ, ისე თვითნებურად დაკავებულ მიწის ნაკვეთებს.

ინფორმაციის მიხედვით, პროექტის დაწყებიდან დღემდე აიზომა 1 500 000-ზე მეტი მიწის ნაკვეთი, ხოლო საკუთრების უფლება დარეგისტრირდა 1 000 000-ზე მეტ მიწის ნაკვეთზე. გადამზადდა და დასაქმდა 1000-მდე ადამიანი.

„მიმდინარე რეფორმის ამ დროისათვის არსებული შედეგები იუსტიციის სასწავლო ცენტრის სააკაძის სასწავლო ბაზაზე გამართულ ღონისძიებაზე შეაჯამეს. მონაწილეებს სიტყვით მიმართეს საქართველოს პრემიერ-მინისტრმა, ირაკლი კობახიძემ და იუსტიციის მინისტრმა, რატი ბრეგაძემ. პრეზენტაცია საჯარო რეესტრის ეროვნული სააგენტოს თავმჯდომარემ, დავით დევიძემ წარადგინა.

პროექტის დაწყებიდან დღემდე აიზომა 1 500 000-ზე მეტი მიწის ნაკვეთი, ხოლო საკუთრების უფლება დარეგისტრირდა 1 000 000-ზე მეტ მიწის ნაკვეთზე. გადამზადდა და დასაქმდა 1000-მდე ადამიანი.

წარმატებული შედეგების გათვალისწინებით და იმ მიზნით, რომ სახელმწიფოში არ დარჩეს არცერთი დაურეგისტრირებელი ნაკვეთი, სისტემური რეგისტრაციის რეფორმა 2025 წლის ბოლომდე გაგრძელდება.

მისი დასრულების შემდეგ შეიქმნება ერთიანი, სრულყოფილი საკადასტრო მონაცემთა ბაზა და საბოლოოდ იდენტიფიცირდება კერძო, სახელმწიფო თუ მუნიციპალური საკუთრება.

ღონისძიების ბოლოს იუსტიციის მინისტრმა სტუმრებს რეფორმის განხორციელებისთვის საჭირო ტექნიკა და ინვენტარი, აგრეთვე – ახლად გახსნილი სასწავლო ცენტრი – სააკაძის სასწავლო ბაზა დაათვალიერებინა.

მიწის სისტემური რეგისტრაციის რეფორმის შედეგების პრეზენტაციას აღმასრულებელი და საკანონმდებლო ხელისუფლების წევრები, იუსტიციის მინისტრის მოადგილეები, სახელმწიფო რწმუნებულები, იუსტიციის სამინისტროს, საჯარო რეესტრის ეროვნული სააგენტოს, რეფორმის მონაწილე უწყებებისა და თვითმმართველობების წარმომადგენლები ესწრებოდნენ”,- აღნიშნულია ინფორმაციაში.

აშშ-მა, შესაძლოა, ცეცხლის შეწყვეტის თარიღი და უკრაინის უსაფრთხოების გარანტიები უახლოეს მომავალში გამოაცხადოს – დონალდ ტუსკი

ამერიკის შეერთებული შტატებიდან უახლოეს მომავალში, შესაძლოა, ველოდოთ განცხადებებს უკრაინაში ცეცხლის შეწყვეტის თარიღსა და უსაფრთხოების გარანტიებთან დაკავშირებით , – უკრაინული მედიის ცნობით, ამის შესახებ პოლონეთის პრემიერ-მინისტრმა, დონალდ ტუსკმა განაცხადა.

ტრამპის უკრაინის სამშვიდობო გეგმის შესახებ მედიაში გავრცელებული ინფორმაციის კომენტირებისას, ტუსკმა აღნიშნა, რომ ასეთი გეგმა, მოსამზადებელ ეტაპზეა.

მისი აზრით, უახლოეს მომავალში მოსალოდნელია დეკლარაცია, კერძოდ ცეცხლის შეწყვეტის თარიღთან დაკავშირებით, რომელ საზღვარზე იმოქმედებს ის და ასევე უკრაინის უსაფრთხოების გარანტიებთან დაკავშირებით.

”ეს იქნება გადაწყვეტილებები, რომლებიც გაითვალისწინებს აშშ-ის ნაკლებ ჩარევას უკრაინის საქმეებში,” – განმარტა ტუსკმა.

10 ნოემბრის ასტროლოგიური პროგნოზი

ვერძი

თქვენი მატერიალური მდგომარეობა ან გაუმჯობესდება, ან გამყარდება, ეს კი თქვენი შრომის დამსახურება იქნება. გაუფრთხილდით ჯანმრთელობას და ნურაფერს დააყენებთ მასზე წინ. სიყვარულის პლანეტა ვენერა მოგიტანთ სიმშვიდეს და ჰარმონიას. თქვენ შეიძლება იგრძნოთ გარკვეული ზეწოლა და გაგიჭირდებათ, ამოიცნოთ, სხვა ადამიანების განზრახვები. ეცადეთ, იყოთ ყურადღებით და არ მიიღოთ ნაჩქარევი გადაწყვეტილებები.

კურო

თქვენი პლანეტარული მმართველი ვენერა ჰარმონიზდება ძალაუფლების მქონე პლანეტა პლუტონთან, რაც გააძლიერებს თქვენს ემოციურ მდგომარეობას. სურვილი გექნებათ, რომ ვინმეს გული გადაუშალოთ. გირჩევთ პარტნიორი ამ შემთხვევაში ფრთხილად შეარჩიოთ. ეს კვირა ჰარმონიული იქნება სამსახურის ჭრილში. სიმშვიდე გელით პირად ურთიერთობებშიც. თუ წინა პერიოდიდან გაქვთ გამოყოლილი კონფლიქტი და დაძაბულობა, ნუ გაამწვავებთ მას.

ტყუპები

იყავით მშვიდი უცნობებთან და ეცადეთ, აკონტროლოთ თქვენი ემოციები. ამ კვირაში განსხვავებული როლების მორგება მოგიწევთ, მაგრამ არაფერი დააყენოთ საკუთარ სურვილებზე წინ. კარგი კვირა გელით ფინანსური კუთხით, თუმცა თქვენი პასუხისმგებლობებიც იზრდება. თუკი ჩათვლით, რომ საქმეს ვერ უმკლავდებით, ნუ მოგერიდებათ დახმარების თხოვნა.

კიბო

ამ კვირაში გელით ღრმა საუბრები ურთიერთობების შესახებ. შესაძლოა, გაიგოთ სხვების საიდუმლოებები ან მნიშვნელოვანი ამბები. დაუკვირდით თქვენს ყველა სიტყვას, იყავით გულწრფელი. პლანეტა ვენერა ოჯახში ჰარმონიას და სიმშვიდეს მოგიტანთ. გახდებით უფრო თავდაჯერებული და იპოვით გზას პირად ურთიერთობებში სიმშვიდის შესანარჩუნებლად. მოერიდეთ კონფლიქტს მეგობრებთან.

ლომი

მოგიწევთ სხვა ადამიანების ისტორიების მოსმენა, იქნებით უფრო გულჩვილი და ემოციური. უმჯობესია, თუ გონებას დაეყრდნობით და არა გულს. მოგიწევთ, რომ სხვა ადამიანების პრობლემების მოგვარებაში მიიღოთ მონაწილეობა. ეს კვირა თქვენთვის ქაოსური იქნება, თუმცა კვირის ბოლოს შეძლებთ სიმშვიდის მოპოვებას.

ქალწული

გამოიყენეთ თქვენი მომხიბვლელობის ძალა, რადგან სიყვარულის პლანეტა ვენერა ჰარმონიზდება ძალაუფლების მქონე პლანეტა პლუტონთან. ამ კვირაში თქვენ შეგიძლიათ იყოთ ძალიან თავდაჯერებული და გააკეთოთ ის, რაც დიდი ხანია, ჩაფიქრებული გაქვთ. გაძლიერდება თქვენი სასიყვარულო და მეგობრული კავშირები. შესაძლოა, მოგიწიოთ ზოგიერთი გეგმის გაუქმება, გირჩევთ, ამის გამო არ შეიქმნათ ნეგატიური განწყობა და მოერიდოთ კონფლიქტს ახლობლებთან.

სასწორი

ამ კვირაში მნიშვნელოვან ამბავს გაიგებთ, რაც თქვენს ცხოვრებას მნიშვნელოვნად შეცვლის. იქნებით უფრო ძლიერი, თავდაჯერებული, ჰარმონიული როგორც სხვებთან, ისე საკუთარ თავთან ურთიერთობაში. ნუ მოგერიდებათ თქვენი გრძნობების გამოხატვა, სწორად გაანაწილეთ დრო და ნუ დახარჯავთ რესურსს არასწორ ადამიანებთან ურთიერთობაში.

მორიელი

კრეატიული იდეებით სავსე კვირა გელით, გაგიჩნდებათ ახალი მიზნები და ოცნებები. ნუ მოერიდებით თქვენი გრძნობების გამოხატვას და საყვარელ ადამიანებთან გაზიარებას. ეს დაგეხმარებათ სურვილების რეალიზებაში. გექნებათ კონფლიქტური სიტუაციებიც, თუმცა თქვენი თავდაჯერებულობა დაგეხმარებათ, ყველაფერი უმტკივნეულოდ მოაგვაროთ.

მშვილდოსანი

სწორად გაანაწილეთ თქვენი ფინანსები. ეცადეთ უფრო მეტად საკუთარ სურვილებზე კონცენტრირდეთ და არ მოუსმინოთ სხვებს. გექნებათ სურვილი, გააფართოოთ თქვენი სანაცნობო წრე, გამოხატოთ თქვენი აზრები და იდეები. გაუფრთხილდით ჯანმრთელობას, ამ მხრივ, შესაძლოა, მცირე პრობლემებმა იჩინოს თავი.

თხის რქა

გექნებათ შანსი, გამოხატოთ თქვენი სურვილები, იდეები, ის, რაც დიდი ხანია გულში გაქვთ. შეძლებთ, ჰარმონია შეიტანოთ გარშემომყოფთა ურთიერთობებში. წინ წამოსწევთ ისეთ საკითხებს, რომლებიც აქამდეც გაწუხებდათ და მათ მოგვარებასაც შეძლებთ. განსაკუთრებული პატივისცემა გამოიჩინეთ საკუთარი თავის მიმართ. იყავით თავდაჯერებული, რადგან ზოგიერთი ახლობელი თქვენს კრიტიკასა და მხილებას ეცდება. ეცადეთ, დათმოთ და ამ სიტუაციიდან კონფლიქტის გარეშე გამოხვიდეთ,

მერწყული

კონცენტრირდით თქვენს დიდი ხნის ოცნებაზე. გააფართოვეთ მეგობრების წრე. ეს დაგეხმარებათ ახალი შესაძლებლობების აღმოჩენასა და წინსვლაში. კარგი დროა საკუთარი თავის პატიებისთვის. გამოხატეთ მწუხარება, სევდა და ნუ ჩაიდებთ დარდს გულში. მოერიდეთ აგრესიის გამოხატვას.

თევზები

რადგან სასიყვარულო პლანეტა ვენერა ჰარმონიზდება ძალაუფლების მქონე პლანეტა პლუტონთან, ინტერპერსონალური დინამიკა შესაძლოა პროპორციულად გადაიზარდოს და შემდეგ დონეზე გადავიდეს. აბსტრაქტული საუბრები ახალ აღმოჩენებს გაგაკეთებინებთ. დაგჭირდებათ ემოციების კონტროლი და თავშეკავება.

ჯო ბაიდენის და დონალდ ტრამპის შეხვედრა თეთრ სახლში 13 ნოემბერს გაიმართება

აშშ-ის პრეზიდენტის, ჯო ბაიდენის და არჩეული პრეზიდენტის, დონალდ ტრამპის შეხვედრა თეთრ სახლში 13 ნოემბერს გაიმართება. ამის შესახებ თეთრი სახლის პრესმდივნის, კარინ ჟან-პიერის განცხადებაშია ნათქვამი.

„პრეზიდენტ ბაიდენის მიწვევით, ბაიდენი და არჩეული პრეზიდენტი ტრამპი ერთმანეთს ოვალურ კაბინეტში ოთხშაბათს შეხვდებიან“, – ნათქვამია თეთრი სახლის წარმომადგენლის განცხადებაში.

დონალდ ტრამპის ინაუგურაცია 20 იანვარს გაიმართება.

„საქართველოს ტერიტორიაზე პირველ რიგში მოქმედებს ქართული კანონმდებლობა”- გიორგი გამსახურდია

როდესაც კოლექტიურ „ნაციონალურ მოძრაობას“ ქვეყნის შიგნით პოლიტიკური რესურსი ამოწურული აქვს, გადადიან დაბეზღების რეჟიმში და გარბიან ზოგიერთ უცხოელ დამკვეთთან და დახმარებას სთხოვენ, – განაცხადა გიორგი გამსახურდიამ „დღის ქრონიკაში“, რითაც გამოეხმაურა ოპოზიციის ნაწილის მოთხოვნას, ევროკავშირის ეგიდით არჩევნებთან დაკავშირებით გამოძიების ჩატარებას.

„საქართველოს ტერიტორიაზე პირველ რიგში მოქმედებს ქართული კანონმდებლობა და მერე, რა თქმა უნდა ყველა ჩვენს მეგობარსა და პარტნიორს დამკვირვებლად მივესალმებით. მენტორული ტონით, ჩვენ ვინმემ რამე გვიკარნახოს და ჩვენს შიდა პროცესებში ჩარევები იყოს, ეს შედეგს არ გამოიღებს. მსოფლიოში პოლიტიკური პროცესები იმგვარად ვითარდება, რომ ბევრ რაღაცას სხვანაირად გადაეხედება და ყველა სახელმწიფოს თავისი სუვერენიტეტის ფარგლებში სრული მოქმედების უფლება ექნება.

დღეს ამერიკის სათავეში მოვიდა ღირსეული ადამიანი, კონსერვატიული შეხედულების კაცი და მთელს მსოფლიოში კონსერვატიული ძალები ამოისუნთქებენ. ჩვენი სუვერენიტეტი იქნება ხელშეუხებელი ყველანაირი გარე ჩარევისგან“, – აღნიშნა გიორგი გამსახურდიამ.

,,დემონსტრაციები აუცილებლად გადაიზრდება მშვიდობიან ჯანყში, ჩვენთან დგანან ევროპელი მეგობრები”- იგორ ნარმანია

ბაბუაჩემმა იგორ ნარმანიამ დამოუკიდებლობის აქტს ხელი მოაწერა 1991 წლის 9 აპრილს და მინდა, რომ ზეციურ საქართველოში მას პირობა მივცე, რომ არ გავატან მის სისხლით მოპოვებულ დამოუკიდებლობას ბიძინა ივანიშვილს, – ამის შესახებ „ნაციონალური მოძრაობის“ წევრმა, იგორ ნარმანიამ გმირთა მოედანზე მიმდინარე აქციაზე განაცხადა.

მისი თქმით, საზოგადოება გამოვიდა ნიჰილიზმიდან.

„თბილისის ქუჩებში დაიწყო მასობრივი დემონსტრაციები და ეს დემონსტრაციები, რომელიც მიმდინარეობს ახლა თბილისის ქუჩებში, აუცილებლად გადაიზრდება მშვიდობიან ჯანყში, ამ ჯანყს მიიღებს რუსული ოცნება. მინდა, ვუთხრა რუსულ ოცნებაში ჩაბუდებულ რუსულ ნაგავს, რომ თუ ისინი არ შეისმენენ ქართველი ხალხის ნებას და არ დანიშნავენ ვადამდელ არჩევნებს, დიახ, აქვე და გაბედულად უნდა ვთქვათ, რომ ისინი მიიღებენ მშვიდობიან რევოლუციას ქართველი ხალხისგან. არანაირად არ უნდა მოვერიდოთ სიტყვებს, უნდა მიიღონ ჯანყი. არ დაგვავიწყდეს, ჩვენთან დგანან ჩვენი ევროპელი მეგობრები. შეგვიძლია, გავეცნოთ გერმანიის საელჩოს დღევანდელ განცხადებას, რომ ჩვენი ხმა ყველაზე მნიშვნელოვანია, რომ ჩვენი ბრძოლა განგრძობადია და ჩვენი მიზანია, რომ არ შედგეს ეს ვირთხებისგან შემდგარი რუსული პარლამენტი“, – განაცხადა ნარმანიამ.

ცნობისთვის, ბერლინის კედლის დანგრევის 35 წლისთავთან დაკავშირებით საქართველოში გერმანიის საელჩომ სოციალურ ქსელში განცხადება გამოაქვეყნა: „მშვიდობიანი რევოლუცია შესაძლებელია, ბერლინის კედლის დაცემა ამის მაგალითს წარმოადგენს“.

,,35 წლის წინათ მშვიდობიანმა რევოლუციონერებმა მიაღწიეს რაღაც დიდს, ერთიან, თავისუფალ და დემოკრატიულ ევროპას”- ოლაფ შოლცი

გერმანიაში ბერლინის კედლის დაცემის 35 წლისთავს აღნიშნავენ. გერმანიის დედაქალაქში ამ დღეს „თავისუფლების ფესტივალი“ იმართება. იმ ადგილას, სადაც ერთ დროს კედელი იდგა გამოფენა ეწყობა, სადაც წარმოდგენილია პლაკატები, რომლებზეც 1989 წლის დემონსტრაციის მოთხოვნებია ასახული.

ბერლინის კედლის დაცემის წლისთავთან დაკავშირებით ვიდეომიმართვა გაავრცელა კანცლერმა, ოლაფ შოლცმა. მისი თქმით, „35 წლის წინათ მშვიდობიანმა რევოლუციონერებმა მიაღწიეს რაღაც დიდს: ერთიან, თავისუფალ და დემოკრატიულ ევროპას“.

„ბერლინის კედლის დანგრევა 35 წლის წინ იყო ზოგადევროპული განვითარების ბედნიერი კულმინაცია. იღბლიანი დღე, რომლისთვისაც ჩვენ, გერმანელები დღესაც მადლობელი ვართ. 35 წლის წინათ რევოლუციით მშვიდობიანმა რევოლუციონერებმა მიაღწიეს რაღაც დიდს: ერთიან, თავისუფალ და დემოკრატიულ ევროპას. განსაკუთრებით ახლა, როცა გლობალური პოლიტიკური ვითარება ძალიან რთულია – იქნება ეს უკრაინაში თუ ახლო აღმოსავლეთში, იქნება ეს კლიმატის დაცვის კუთხით თუ ეკონომიკის თვალსაზრისით, სწორედ ახლა ჩვენ, ევროპელები ერთად უნდა ვიყოთ“ , – განაცხადა შოლცმა.

როგორც გერმანიის კანცლერმა განაცხადა, 1989 წლის თავისუფლების რევოლუციის გზავნილი დღეს აქტუალურია, როგორც არასდროს.

„1989 წლის შემოდგომის ჩვენი საერთო ისტორია გვაჩვენებს, როგორ შეგვიძლია, მივაღწიოთ ჩვენს მიზნებს: ერთად დგომით – მშვიდობისთვის და თავისუფლებისთვის, უსაფრთხოებისა და კეთილდღეობისთვის, კანონის უზენაესობისა და დემოკრატიისთვის. ჩვენ, ევროპელებს შეგვიძლია, ჩვენი თავი იღბლიანებად ჩავთვალოთ, რადგან დღეს ჩვენ ამ ღირებულებებით ვცხოვრობთ. ჩვენი ისტორია და მსოფლიო ჩვენს გარშემო აჩვენებს, რომ ეს არ შეიძლება, აღქმული იყოს, როგორც რამე თავის თავად არსებული. სწორედ ამიტომ 1989 წლის თავისუფლების რევოლუციის გზავნილი დღეს აქტუალურია, როგორც არასდროს – გამბედაობას, თავდაჯერებულობას და ერთიანობას შედეგი მოაქვს. ჩვენ არ შეგვიძლია რამის მიღწევა ერთმანეთის წინააღმდეგ, მხოლოდ ერთად ვართ ძლიერები“, – განაცხადა ოლაფ შოლცმა.

,,გერმანიის საელჩოს განცხადება არის უხეში ჩარევა საქართელოს შიდა საქმეებში ”- სოზარ სუბარი

გერმანიის საელჩოს განცხადება შეფასებების საგანი ხდება.

“მშვიდობიანი რევოლუცია შესაძლებელია. თავისუფლება თავისთავადად არ მოდის, ჩვენ მისთვის უნდა ვიბრძოლოთ” – წერია საქართველოში გერმანიის საელჩოს განცხადებაში, რომელიც ბერლინის კედლის დანგრევის თარიღს მიეძღვნა.

საპარლამენტო პოლიტიკური ჯგუფის ”ხალხის ძალა” თავმჯდომარე სოზარ სუბარი აცხადებს, რომ გერმანიის მხრიდან მათი განცხადება საქართველოს შიდა საქმეებში ჩარევაა.

“გერმანიის საელჩოს განცხადება არის უხეში ჩარევა საქართელოს შიდა საქმეებში და არამეგობრული განწყობა. შეფარულად ეს უკვე დაუკავშირეს ბერლინის კედლის დაცემას, მაგრამ დაახლოებით იგივე შინაარსის ტექსტი გამოაქვეყნეს მოლდოვაშიც, თუმცა იქ რევოლუზიცაზე არ არის საუბარი, საიდანაც ჩანს რომ ისინი პირდაპირ რევოლუციისკენ მოუწოდებენ საქართველოს,” – აცხადებს სოზარ სუბარი. 

,,ოპოზიცია ისე იყო, საერთოდ პულსი არ ესინჯებოდა”-მეუფე იაკობი

ოპოზიცია ისე იყო, საერთოდ პულსი არ ესინჯებოდა, – ამის შესახებ ბოდბელმა მთავარეპისკოპოსმა, მეუფე იაკობმა ქადაგებისას განაცხადა.

ქადაგებისას მეუფემ საქართველოში ჩატარებულ საპარლამენტო არჩევნებზე ისაუბრა.

„არჩევნები ჩატარდა. ქართველების დაკვეთა იყო, რომ 150 კაცი აგვერჩია პარლამენტში, ავირჩეთ. შევიკრიბოთ და ვაკეთოთ ის საქმე, რაც ქართველ ერს წაადგება. ღვთის ნება რომ არ ყოფილიყო, ასე ხომ არ დამთავრდებოდა?! ოპოზიცია ისე იყო, საერთოდ პულსი არ ესინჯებოდა, მათ საზღვარგარეთის დახმარების გარდა არაფერი ჰქონდათ. ჩართეს საქართველოს პრეზიდენტიც. როგორ შეიძლებოდა, გაემარჯვა იმ ძალას, რომელიც მხარს უჭერს იმას, რომ ბიჭი ბიჭი არ არის და გოგო გოგო რომ არ არის, როგორ შეიძლებოდა, მეტი ხალხი ჰყოლოდათ. მე ისედაც მიკვირს, ხალხმა ეტყობა ვერ გააცნობიერა, იმიტომ მისცა მაგათ ხმა. ან ღმერთი უნდა აგვერჩია, ან – ვიოლა ფონ კრამონი, ან ღმერთი უნდა აგვერჩია, ან – ბატონი შოლცი, ​ან ღმერთი უნდა აგერჩია, ან – მაკრონი. კანონიც გაიწვიეთ და მერე დაგელაპარაკებითო. რისთვის იკლავენ თავს ჩვენთვის? – იმიტომ, რომ აქ ცოტა ხანში ძალიან დიდი ფულის შოვნა იქნება შესაძლებელი და თავიანთთვის უნდათ და არა ქართველებისთვის. იცოდეთ, რომ ეკლესია ყოველთვის იქნება ხალხთან“, – აღნიშნა მეუფე იაკობმა.

აშშ-ის კონგრესის წარმომადგენელთა პალატის არჩევნებში რესპუბლიკელები მცირე უპირატესობას ინარჩუნებენ

აშშ-ის კონგრესის წარმომადგენელთა პალატის არჩევნებში რესპუბლიკელები მცირე უპირატესობას ინარჩუნებენ. „როიტერის“ ცნობით, ამჟამად გრძელდება ბოლო ხმების დათვლა, რომელთა შედეგები გადაწყვეტს წარმომადგენელთა პალატის კონტროლს.

Edison Research-ის პროგნოზით, რესპუბლიკელებს 435-ადგილიან წარმომადგენელთა პალატაში ამ დროისთვის გარანტირებული აქვთ სულ მცირე 211 ადგილი. მათ უმრავლესობამდე 7 მანდატი აშორებთ. ჯერ კიდევ არ არის გადაწყვეტილის 24 ადგილის ბედი.

ამასთან, უკვე ცნობილა, რომ რესპუბლიკელებს 100-წევრიან სენატში 53-მანდატიანი უმრავლესობა ექნებათ.

როგორც „როიტერი“ წერს, რესპუბლიკელების მიერ კონგრესის ორივე პალატაზე კონტროლის მოპოვება არჩეულ პრეზიდენტს, დონალდ ტრამპს გაუმარტივებს პოლიტიკური დღის წესრიგის გატარებას, მათ შორის გადასახადების შემცირებას, ენერგეტიკული რეგულაციების დამტკიცებასა და საზღვრის კონტროლის უზრუნველყოფას.

ცნობისთვის, დემოკრატებმა წარმადგენელთა პალატაში უმრავლესობა რომ მოიპოვონ, ამ დროისთვის გადაუწყვეტელი 24 ადგილიდან 18 უნდა მიიღონ.

1...181920...2,306Page 19 of 2,306
ჩვენი არქივი

კონტაქტი

მის: ქ.თბილისი, მ.კოსტავას 59

ტელ: +995 32 93 44 05

ელ.ფოსტა: editor@geotimes.ge

ნავიგაცია

ონლაინ გაზეთი Geotimes.ge

დამატებითი რესურსი