ამ ადამიანების განცხადებებს არანაირი ფასი არ აქვს, – ასე აფასებს დედაქალაქის მერი კახა კალაძე რვა ქვეყნის საგარეო ურთიერთობათა კომიტეტის თავმჯდომარეების დელეგაციის ვიზიტის ფარგლებში გაკეთებულ განცხადებებს.

მისი თქმით, მათ საქართველოს მოსახლეობას თავი სიცრუით დაამახსოვრეს.

„ესენი არიან უსაქმური ადამიანები, რომლებიც ხან ერთ, ხან სხვა ქვეყანაში ჩადიან. ჩვენ გვახსოვს მათი ჩამოსვლა, როდესაც ოპოზიციის აქციები იყო, სიტყვით გამოსვლებიც ჰქონდათ. ამ ადამიანებმა რითი დაამახსოვრეს თავი ჩვენი ქვეყნის მოსახლეობას? – სიცრუით. იმ სიცრუის პროპაგანდას, რასაც ვისმენდით მთელი ამ ხნის განმავლობაში, დღესაც აგრძელებენ. ყველამ კარგად ვიცით, რას წარმოადგენენ ისინი და, როგორც ვთქვი, არანაირი ფასი არ აქვს მათ განცხადებებს“, – განაცხადა კახა კალაძემ.

მისივე თქმით, აღნიშნული დელეგაციის წევრები პატივს არ სცემენ საქართველოს სახელმწიფოებრიობას და ქართველ ხალხს.

„ევროკავშირი დაფუძნებულია სხვადასხვა ღირებულებაზე, ერთ-ერთია მშვიდობა. ეს ადამიანები გველაპარაკებიან ევროპის სახელით და ამ დროს ყველაფერს აკეთებენ იმისთვის, რომ ქვეყანაში მოხდეს არეულობა, დაძაბულობა. არამხოლოდ ახლა, ადრეც, თუ გავიხსენებთ, რამდენიმე თვის წინ რა გაცხადებებს აკეთებდნენ. ჩვეულებრივი მავნებლები არიან, ყველაფერს უნდა დავარქვათ თავისი სახელი. ეს ადამიანები პატივს არ სცემენ ჩვენს ქვეყანას, სახელმწიფოებრიობას და ქართველ ხალხს. მათ განცხადებებს, ქმედებებს, ყველაფერს აქვს ჩალის ფასი. ზურაბიშვილი და სხვა წვრილფეხა პოლიტიკოსები – რადიკალები, რომლებიც ოპოზიციას წარმოადგენენ და ისინი, ვინც გარედან აკეთებენ მსგავს განცხადებებს, ერთნი არიან, ერთი ფრთის ქვეშ არიან და ერთი პატრონი ჰყავთ. ხალხმა ძალიან კარგად დაინახა სრული სურათი და მინდა, გითხრათ, რომ ძალიან ბევრი რამ შეიცვლება, არა მხოლოდ ქვეყანაში, არამედ მთელ მსოფლიოში გარკვეული ცვლილებები უკვე დაიწყება და ეს საკმაოდ საინტერესო პროცესი იქნება“, – აღნიშნა კახა კალაძემ.

თუ, როგორც თქვენ ამბობთ, ფარულობა იყო დარღვეული, რვა საათზე რა გაზეიმებდათ? რატომ ზეიმობდით რვა საათზე, ტაშ-ფანდური რომ გქონდათ გამართული? – ასე მიმართა „ქართული ოცნების“ გენერალურმა მდივანმა, კახა კალაძემ ჟურნალისტებს.

ამასთან, კალაძე საარჩევნო პროცესში ფარულობის პრინციპის დარღვევასთან დაკავშირებულ საზოგადოების ნაწილის კრიტიკას გამოეხმაურა და აღნიშნა, რომ „ეს ყველაფერი სისულელეა“.

„სისულელეა ეს ყველაფერი. უამრავი ფაქტი იქნა მოყვანილი, როგორ ტარდება მოლდოვაში, პოლონეთში. იცით რა არის მთავარი? – მილიონ 120 ათასმა მოქალაქემ მკვლელებს, მწამებლებს და აგენტურას უთხრა არა. თუ, როგორც თქვენ ამბობთ, ფარულობა იყო დარღვეული, რვა საათზე რა გაზეიმებდათ? რატომ ზეიმობდით რვა საათზე, ტაშ-ფანდური რომ გქონდათ გამართული? – თუ ეს პრობლემა იყო მთელი დღის განმავლობაში, რამდენი უცხოელი დამკვირვებელი იყო, ზოგადად, 25 ათას დამკვირვებელზეა საუბარი, რატომ კეთდებოდა მხოლოდ და მხოლოდ პოზიტიური განცხადებები, რატომ კეთდებოდა მხოლოდ და მხოლოდ კარგი შეფასებები? რატომ დადო ეუთო/ოდირმა კარგი შუალედური დასკვნა? თქვენ იზეიმეთ ნაადრევად. ჯერ მთელი საარჩევნო კამპანიის განმავლობაში თქვენ გატყუებდნენ, რომ საოცარი პროცენტები ჰქონდათ. თუ დააკვირდებით თქვენი კვლევების სტატისტიკას 2012 წლიდან, ის აცდენილია რეალობას, ეგზიტპოლები აცდენილია რეალობას. გატყუებდნენ და დღესაც იმავეს აგრძელებენ, რომ როგორმე სახე შეინარჩუნონ. თქვენც მიყვებით ამ ყველაფერს და იჯერებთ. მერწმუნეთ, სხვა რეალობა გვაქვს და მოგიწევთ ამ რეალობაზე შეგუება“, – განაცხადა კახა კალაძემ.

მისივე თქმით, არასერიოზულია კითხვები საარჩევნო უბნებზე კამერებთან დაკავშირებითაც.

„კამერები არ ვიცი, მაგრამ ყველაზე საშიში იყო ბეჭდებიანი მილიონერი ქალბატონი. ეს ქალბატონი ძალიან საშიში იყო, ბეჭდებით ასხივებდა და თვალებში არჩევანის გაკეთების შესაძლებლობას აძლევდა ამომრჩეველს, რომელიც შემოდიოდა არჩევანის გასაკეთებლად. არასერიოზულია ეს ყველაფერი!“, – აღნიშნა კახა კალაძემ.

ოპოზიციის სახელით მოქმედი ჯგუფები და მათი წამქეზებლები ითხოვენ, გამოიგონონ ისეთი „საერთაშორისო“ მექანიზმი, რომელიც აიძულებს „ქართულ ოცნებას“, აჩუქოს მათ ხელისუფლება, სანაცვლოდ მილიონზე მეტ საქართველოს მოქალაქეს „რუსის“ იარლიყს მიაკერებენ, მერე სანიმუშოდ დასჯიან, – ამის შესახებ საქართველოს პარლამენტის ევროპასთან ინტეგრაციის კომიტეტის თავმჯდომარე მაკა ბოჭორიშვილი სოციალურ ქსელში წერს.

როგორც ბოჭორიშვილი წერს, „ამგვარად ამოაბრწყინებენ კავკასიის მთებიდან დემოკრატიის ახალ შუქურას“.

„ოპოზიციის სახელით მოქმედი ჯგუფები საქართველოში და მათი წამქეზებლები ითხოვენ, სასწრაფოდ გამოიგონონ ისეთი „საერთაშორისო“ მექანიზმი, რომელიც აიძულებს ქართველი ხალხის მიერ არჩეულ „ქართულ ოცნებას“, აჩუქოს მათ ხელისუფლება, ისე რომ ამისთვის არც ხალხის მხარდაჭერა იყოს საჭირო, არც საარჩევნო ადმინისტრაცია და არც არჩევნების სამართლიანობის მტკიცება. სანაცვლოდ ისეთ დემოკრატიას ჰპირდებიან სამყაროს, სადაც მილიონზე მეტ საქართველოს მოქალაქეს, რომელმაც გაბედა და 41 გააფერადა, მიაკერებენ „რუსის“ იარლიყს და მერე სანიმუშოდ დასჯიან. ასე და ამგვარად ამოაბრწყინებენ კავკასიის მთებიდან დემოკრატიის ახალ შუქურას. სადმე common sense თუ არის შემორჩენილი, ამ ხალხს შველა სჭირდება“, – წერს მაკა ბოჭორიშვილი.

26 ოქტომბრის არჩევნებში “ქართულმა ოცნებამ” დამაჯერებლად გაიმარჯვა – ამიტომ ჩვენს გარე თუ შიდა მეგობრებს, პარტნიორებს მოვუწოდებთ, შეეგუონ და მიიღონ ეს ფაქტი! – აღნიშნული განცხადება “ქართული ოცნების” დეპუტატმა დავით მათიკაშვილმა, ევროკავშირის რვა ქვეყნის პარლამენტების საგარეო ურთიერთობათა კომიტეტების თავმჯდომარეების ვიზიტზე საუბრისას გააკეთა.

როგორც მათიკაშვილმა აღნიშნა, არჩევნებში რადიკალური ოპოზიციის “მწარე მარცხის შემდეგ”, რეალობის გააზრების ნაცვლად, ოპოზიციას გამხნევება ხდება.

“ფიცი მწამს, ბოლო მაკვირვებს – როცა ეს პოლიტიკოსები იმაზე საუბრობენ, რომ ქვეყანას არ მტრობენ, მათი საქმე საპირისპიროს ამტკიცებს.

ჩვენი მეგობარი ქვეყნების პარლამენტის წევრები არჩევნების წინ, აშკარად ანტიქართული განცხადებებით, აქციებზე დგომით და სხვა მსგავსი ნაბიჯებით ჩვენი ქვეყნის კანონმდებლობას არღვევდნენ, წინასაარჩევნო პროცესებში ერეოდნენ, ხოლო დღეს, როცა რადიკალურმა ოპოზიციამ არჩევნებში მწარე მარცხი იწვნია, ეს ადამიანები კვლავ ჩამოვიდნენ, რადიკალურ ოპოზიციას მაშველ რგოლად შეეგებნენ და მათ გამხნევებას ცდილობდნენ.

დიპლომატია საკმაოდ რთული და ფაქიზი საქმეა. ვიდრე ისეთ პროცესში ჩაერევი, რომელიც ამა თუ იმ ქვეყნისთვის მიუღებელია, ნებისმიერ მხარეს ბევრი დაფიქრება მართებს.

არავის აქვს ისეთ საქმეებში ჩარევის უფლება, სადაც მათ არ ესაქმებათ, რადგან ეს არის შიდა პოლიტიკური დუღილი და უცხო ქვეყნის პოლიტიკოსის ჩარევა არის კონტრპროდუქტიული და ასევე კანონით აკრძალული”, – განაცხადა მათიკაშვილმა.

საქართველოში გერმანიის, ფინეთის, შვედეთის, საფრანგეთის, ლიეტუვის, ლატვიის, ესტონეთისა და პოლონეთის პარლამენტების საგარეო ურთიერთობათა კომიტეტების თავმჯდომარეები იმყოფებიან. ევროპელ პოლიტიკოსებს საქართველოს პრეზიდენტმა სალომე ზურაბიშვილმა უმასპინძლა.

მათთან შეხვედრაზე უარი თქვა პარლამენტის თავმჯდომარე შალვა პაპუაშვილმა.

თბილისის მერის კახა კალაძის შეფასებით, ქვეყანაში იქნება მშვიდობა და უახლოეს მომავალში მე-11 მოწვევის პარლამენტიც დაიწყებს მუშაობას.

ასეთია კახა კალაძის შეფასება „კოალიცია ცვლილებებისთვის“ ერთ-ერთი ლიდერის, ნიკა გვარამიას მიერ გაკეთებულ განცხადებასთან დაკავშირებით.

„გვარამიას რადიკალური გეგმები არ გაიშვას არსად. რეალურად, არაფერი ხდება. ყველაფერი იქნება ისე, როგორც ჩვენ ქვეყანას და მის მომავალს ეკადრება. ქვეყანაში იქნება მშვიდობა, მოხდება ეკონომიკური განვითარება, პარლამენტიც დაიწყებს ძალიან მალე მუშაობას, მთავრობაც დამტკიცდება. ოპოზიციაც შევა პარლამენტში, დაიმახსოვრეთ ჩემი სიტყვა. ცხოვრება და მუშაობა ჩვეულებრივად გაგრძელდება“, – აღნიშნა კახა კალაძემ.

რაც შეეხება ცენტრალურ საარჩევნო კომისიაში სხვადასხვა ორგანიზაციის მიერ შეტანილ სარჩელებს, თბილისის მერი აცხადებს, რომ ოპოზიცია საპარლამენტო არჩევნებში დამარცხდა და ამის აღიარება არ სურს.

„უსუსურია ის განცხადებები, რომელთაც ვისმენთ. მხოლოდ და მხოლოდ სიტყვების ბრახაბრუხია. არანაირი კონკრეტიკა, არგუმენტი არ არსებობს. უბრალოდ, მცდელობა აქვთ, თავიანთი მხარდამჭერები აცხოვრონ ტყუილში. ძალიან კარგად იციან, რომ დამარცხდნენ და ამის დაჯერება არ უნდათ. თავს იმაგრებენ მსგავსი ტიპის განცხადებებით, რომ თურმე არჩევნები გაყალბდა. წარმოუდგენელია – ერთი კონკრეტული ფაქტი, მტკიცებულება არ არსებობს. ვისმენთ სულელურ განცხადებებს, რომლებიც სიცრუითაა გაჯერებული და არანაირი კონკრეტიკა, ფაქტი არ აქვთ“, – განაცხადა კახა კალაძემ.

იმ ადამიანების მიმართ, რომლებიც პატივს არ სცემენ ჩემს ქვეყანას, ჩემს სამშობლოს, ჩემი ქვეყნის მოსახლეობას, მე მაქვს სხვა დამოკიდებულება – მათ განცხადებებს, მათ ქმედებებს აქვს ნულის ფასი, – ასე პასუხობს თბილისის მერი კახა კალაძე ჟურნალისტის კითხვას იმასთან დაკავშირებით, თუ რატომ არ ხვდებიან ხელისუფლების წარმომადგენლები საქართველოში ვიზიტით მყოფ ევროკავშირის ქვეყნების საგარეო კომიტეტების თავმჯდომარეებს.

„ჩვენ რამდენიმე თვის წინ მოვისმინეთ ევროკავშირის მაღალი თანამდებობის პირების განცხადება, რომ საქართველოს მთავრობის წევრებს არ შეხვდებოდნენ. ეს საბჭოური მიდგომაა, ეს დამოკიდებულება მოდის ამ რადიკალებისგან, რომელთა ნაწილი დღეს საქართველოშია და ნაწილის განცხადებებს ვისმენდით გარედან. იმ ადამიანების მიმართ, რომლებიც პატივს არ სცემენ ჩემს ქვეყანას, ჩემს სამშობლოს, ჩემი ქვეყნის მოსახლეობას, მე მაქვს სხვა დამოკიდებულება. მათ განცხადებებს, მათ ქმედებებს აქვს ნოლის ფასი“, – განაცხადა კახა კალაძემ.

რაც შეეხება საქართველოში ჩატარებული არჩევნების ლეგიტიმაციის საკითხს, თბილისის მერი პასუხობს, რომ ლეგიტიმაციას ქართველი ხალხი იძლევა და არა სხვა ქვეყნების მაღალჩინოსნები.

„რაც შეეხება ლეგიტიმაციას, მას იძლევა ქართველი ხალხი. მე მესმის, რომ რადიკალებისთვის ქართველი ხალხი არაფერს წარმოადგენს, ისინი ყველა ერთი ფრთის ქვეშ არიან და ერთი პატრონი ჰყავთ, იმართებიან გარედან. არც საკუთარ თავს ეკუთვნიან, არც საკუთარ ოჯახს, არც ამ ქვეყანას, მათ სხვა ინტერესები აქვთ, თუმცა, ერთი რამ ცხადია-ლეგიტიმაციას იძლევა ქართველი ხალხი. შესაბამისად, მადლობა იმ 1 120 000 ადამიანს, ვინც ღირსეულად დადგა, მხარი დაუჭირა ქვეყანაში მშვიდობას, ეკონომიკურ განვითარებას, წინსვლას, რაც პრინციპულად მნიშვნელოვანია საქართველოსთვის“, – აღნიშნა დედაქალაქის მერმა.

ამასთან, კახა კალაძე მიიჩნევს, რომ ევროპელი მაღალჩინოსნები ღიად ცდილობენ ქვეყნის საშინაო საქმეებში ჩარევას.

„ჩვენ ბოლო თვეების განმავლობაში პირდაპირ ვისმენთ და ვხედავთ ქვეყნის შიდა პოლიტიკურ საქმეებში ჩარევას. ყველაფერს რომ თავი დავანებოთ, პირდაპირ საარჩევნო კამპანიაში მონაწილეობდნენ, თავიანთი განცხადებებით, ქმედებებით. წარმოუდგენელია ეს ყველაფერი, თუმცა მერწმუნეთ, ძალიან მალე ყველაფერი დადგება თავის ადგილზე, ყველა მიიღებს საკადრის პასუხს, ყველას გარედან აუცილებლად ექნება ღირსეული დამოკიდებულება ჩვენი ქვეყნის და ხალხის მიმართ“, – განაცხადა კახა კალაძემ.

სხვადასხვა ქვეყნის კომიტეტების თავმჯდომარეებთან საუბარი იყო მექანიზმებზე, რომლებიც რეაქციის სახით უნდა წამოვიდეს ევროკავშირის მხრიდან. განხილული იყო მაგალითები, როდესაც სწორედ მოპარული არჩევნების გამო გაუუქმდათ ქვეყნებს უვიზო მიმოსვლა, – კოალიცია „ძლიერი საქართველოს“ ერთ-ერთმა ლიდერმა, ანა დოლიძემ განაცხადა.

ანა დოლიძის თქმით, დარჩენილია შიდა სამუშაოს ჩატარება, რათა ამ მექანიზმების გამოყენება დაიწყოს.

„ჩვენ წინაშე იყვნენ ევროკავშირის მხრიდან პოლიტიკური გადაწყვეტილების მიმღებები. სხვადასხვა ქვეყნიდან სხვადასხვა კომიტეტის თავმჯდომარეები, მაგრამ, რეალურად, ესენი არიან, ვინც ქმნიან ევროკავშირის პოლიტიკას. მათ ძალიან კარგად იციან, რომ არჩევნები გაყალბდა.

საუბარი იყო მექანიზმებზე, რომლებიც რეაქციის სახით უნდა წამოვიდეს ევროკავშირის მხრიდან. რა უნდა ქნან? სანქციები მაღალ დონეზე, სანქციები იმ ხალხის მიმართ, ვინც არჩევნები გააყალბა, შესაძლებლობა, რომ შეჩერდეს ვიზების თავისუფალი მიმოსვლის საკითხი. იყო განხილული მაგალითები, როდესაც სწორედ მოპარული არჩევნების გამო გაუუქმდათ ქვეყნებს უვიზო მიმოსვლა. ყველა მექანიზმი დევს მაგიდაზე. ისინი დარწმუნებულები არიან, რომ არჩევნები გაყალბდა, უბრალოდ დარჩა შიდა სამუშაოს ჩატარება, რათა ამ საშუალებების გამოყენება დაიწყოს. დღეს საუბარი იყო წნეხის ყველა მექანიზმზე, რათა არაღიარებული იყოს არჩევნები“, – განაცხადა ანა დოლიძემ.

პირდაპირ ვამბობ, რომ „ქართულ ოცნებას“ ძალიან მძიმე დღე ელოდება ქვეყნის შიგნით და გარეთ. ამას აუცილებლად დაინახავთ, – ამის შესახებ „ერთიანობა – ნაციონალური მოძრაობის“ ერთ-ერთმა ლიდერმა, გიორგი ვაშაძემ ევროკავშირის რვა ქვეყნის საგარეო ურთიერთობათა კომიტეტის თავმჯდომარეების დელეგაციასთან შეხვედრის შემდეგ განაცხადა.

ვაშაძის თქმით, შეხვედრაზე ისაუბრეს გადასადგმელ ნაბიჯებზე, მათ შორის სანქციების საკითხზე.

„ვისაუბრეთ გამოძიების მექანიზმებზე, ყველაფერზე, მათ შორის, სანქციებზე, ევროპის მხრიდან გადასადგმელ ნაბიჯებზე, მაგრამ ვისაუბრეთ ისეთ ახალ მექანიზმებზე, რომლებზეც ჯერ  საჯაროდ საუბარს არ ვაპირებთ. საზოგადოება დაინახავს, რომ გვაქვს მკაფიო გეგმა, საბოლოო ჯამში, როგორ მივაღწიოთ სამართლიანობას, რომ არჩევნები ხელახლა ჩატარდეს. პირდაპირ ვამბობ, „ქართულ ოცნებას“ ძალიან მძიმე დღე ელოდება ქვეყნის შიგნით და გარეთ. ამას აუცილებლად დაინახავთ“, – განაცხადა გიორგი ვაშაძემ.

როგორც ვაშაძემა აღნიშნა, ევროპელი პარლამენტარები საქართველოში ჩატარებულ არჩევნებთან დაკავშირებით საერთაშორისო გამოძიებას მხარს უჭერენ.

„ისინი საერთაშორისო გამოძიებას მხარს უჭერენ. ხელისუფლება ამაზე უარს როცა ამბობს, კიდევ ერთი ნათელი მტკიცებულებაა, რომ ეს ადამიანები დამნაშავეები არიან, ცდილობენ, დაფარონ საკუთარი ორგანიზებული სისტემური დანაშაული, რომელიც საქართველოს წინააღმდეგ ჩაიდინეს“, – განაცხადა გიორგი ვაშაძემ.

ოპოზიციას ვერანაირი გეგმა ვერ ექნება, რადგან საზოგადოების მხარდაჭერა არ აქვს, – პარლამენტის ადამიანის უფლებათა დაცვის კომიტეტის თავმჯდომარემ რატი იონათამიშვილმა განაცხადა.

იონათამიშვილის თქმით, საზოგადოება ხედავს, ოპოზიცია როგორი გაკოტრებულია.

„მათ ათკაციან სეირნობებს ვხედავთ, რაც უშინაარსო და უსახურია. მათი აქტივობა კარგია, საზოგადოება ხედავს, ოპოზიცია როგორი გაკოტრებულია. ისინი რაც უფრო დასუსტდებიან და გაქრებიან, მით მეტი სივრცე გაჩნდება რეალური ოპოზიციის ჩამოსაყალიბებლად, რაც კარგი იქნება. ამას კოლექტიური „ნაცმოძრაობა“ ყოველთვის ხელს უშლიდა. ჩვენ ოპოზიცია კი არა, უცხო ძალების აგენტები გვყავს, რომელთა მიზანია საქართველოს განადგურება და ქართველ ხალხზე შურისძიება. ეს ვერ განახორციელეს და სასოწარკვეთას ვხედავთ“, – განაცხადა რატი იონათამიშვილმა.

ვხედავთ, რომ ზოგიერთი ევროპული სახელმწიფოს ხელმძღვანელები საქართველოს მიმართ პირდაპირ შეურაცხმყოფელი განცხადებებით არიან დაკავებული და რადიკალურ ოპოზიციას ღიად უჭერენ მხარს. თავიანთ ქვეყნებს მიხედონ, სადაც როგორც ეკონომიკური, ასევე პოლიტიკური კრიზისებია, – ამის შესახებ პარტია „ხალხის ძალის“ აღმასრულებელმა მდივანმა, გურამ მაჭარაშვილმა განაცხადა.

მისივე თქმით, ამ ხალხის მიზანია, რადიკალურ ოპოზიციას აჩვენონ, რომ მათ ჟანგბადით ამარაგებენ.

„ვხედავთ, რომ ზოგიერთი ევროპული სახელმწიფოს ხელმძღვანელები საქართველოს მიმართ პირდაპირ შეურაცხმყოფელი განცხადებებით არიან დაკავებული და რადიკალურ ოპოზიციას ღიად უჭერენ მხარს, რომელსაც, მარცხის მიუხედავად, რევოლუციური პროცესების განვითარება უნდა. მინიმუმ, თავმოყვარეობა უნდა გქონდეს, რომ ასეთი სახის ადამიანებს მას შემდეგ შეხვდე, რაც მილიონ 200 ათასმა ადამიანმა ხმა მმართველ პარტიას მისცა და გადაწყვიტა, რომ საქართველო სუვერენული ქვეყანაა. ამ ხალხის მიზანია, რადიკალურ ოპოზიციას აჩვენონ, რომ მათ ჟანგბადით ამარაგებენ, რაც მათ არ უშველით, მაგრამ ეს მცდელობა აქვთ. თავიანთ ქვეყნებს მიხედონ, სადაც როგორც ეკონომიკური, ასევე პოლიტიკური კრიზისებია. ოპოზიციას ჰგონია, რომ მათ ჟანგბადს აძლევენ, მაგრამ, რეალურად, ეს ნახშიროჟანგია. ოპოზიცია ვერ სუნთქავს და უკვე რეანიმაციაში არიან, მათ პოლიტიკური პერსპექტივა არ აქვთ. რაც შეეხება მიხეილ როთს, ხუმრობით თუ გეტყვით, ის ჩვენი საჩუქარია, რადგან სიმბოლო და იდეოლოგია რადიკალური ოპოზიციის. ვამბობდით, რომ ლგბტ დროშა და როთი ოპოზიციას არჩევნებს წააგებინებდა. ეს მოხდა და ამას აგრძელებენ“, – განაცხადა მაჭარაშვილმა.

„კოალიცია ცვლილებისთვის“ ერთ-ერთი ლიდერის, ელენე ხოშტარიას განცხადებით, 8 ქვეყნის საპარლამენტო დელეგაციის წევრები არიან ძალიან კონკრეტული ნაბიჯებისთვის მზად, რომელიც იქნება „ქართულ ოცნებაზე“ ზეწოლა და ქართველი ხალხის მხარდაჭერა.

ამის შესახებ მან 8 ქვეყნის საპარლამენტო დელეგაციის წევრებთან შეხვედრის დასრულების შემდეგ განაცხადა.

„გამოჩნდა ქართველი ხალხის უპრეცედენტო მხარდაჭერა. აბსოლუტურად მკაფიო პოზიციაა არჩევნების მოპარვასთან დაკავშირებით. არცერთი კითხვის ნიშანი იმასთან დაკავშირებით რა მოხდა, ამ ადამიანებს არ გააჩნიათ. ისინი ხედავენ, რომ ბიძინა ივანიშვილმა არჩევნები მოიპარა. ასევე, ისინი ხედავენ, რომ ქართველი ხალხი იბრძვის. ასევე, ხედავენ ოპოზიციურ ერთობას და არიან ძალიან კონკრეტული ნაბიჯებისთვის მზად, კონკრეტული ნაბიჯებისთვის ევროპის მხრიდან, რომელიც იქნება „ქართულ ოცნებაზე“ ზეწოლა და რომელიც იქნება მხარდაჭერა ქართველი ხალხისთვის. დღეს, 19:00 საათზე რუსთაველზე უნდა შევიკრიბოთ, მოვლენ ჩვენი პარტნიორები, მიმართავენ ხალხს და ვაჩვენოთ, რომ ჩვენ ვართ ევროპა, ევროპელები.

ძალიან ბევრ, კონკრეტულ და შედეგიან ნაბიჯებზე იყო საუბარი, რაზეც ისინი იმუშავებენ. მათ შორის საუბარი იყო საერთაშორისო გამოძიებაზე. აბსოლუტურად ყველა ინსტრუმენტი, რომელიც იქნება „ქართული ოცნების“ ზეწოლისა და ქართველი ხალხის მხარდაჭერისთვის მძლავრი, არის განხილული“,- განაცხადა ელენე ხოშტარიამ.