არ მესმის, 1%-იანი გახარია რატომ უნდა იყოს საინტერესო. არ არის საინტერესო 1%-იან პარტიაზე გავაკეთო კომენტარი – ყველაფერი იდეალურად იქნება, 2024 წელსაც გავიმარჯვებთ და 2028 წელსაც, – ამის შესახებ „ქართული ოცნების“ გენერალურმა მდივანმა, კახა კალაძემ განაცხადა.

აღნიშნულით მან ჟურნალისტის კითხვას უპასუხა, როგორც შეაფასებს პარტია „საქართველოსთვის“ წევრების განცხადებას, რომ საარჩევნოდ თანამშრომლობის საკითხზე მათი პარტიის ლიდერებს მოლაპარაკებები აქვთ ყოფილ მინისტრებსა და დეპუტატებთან, რომელთა შორისაც არიან „ქართული ოცნების“ ყოფილი მაღალჩინოსნებიც.

„არ მესმის, 1%-იანი გახარია, რატომ უნდა იყოს საინტერესო. არ არის საინტერესო 1%-იან პარტიაზე გავაკეთო კომენტარი. ყველაფერი იდეალურად იქნება, „ქართული ოცნება“ 2024 წელს აუცილებლად გაიმარჯვებს, კონსტიტუციური უმრავლესობით მოვა ხელისუფლებაში. დაიმახსოვრეთ დღევანდელი დღე და ჩემი სიტყვები. ასეთი მხარდაჭერა “ქართულ ოცნებას” 2012 წლის შემდეგ არ ჰქონია. 2024 წელსაც გავიმარჯვებთ და 2028 წელსაც”, – აღნიშნა კალაძემ.

ჩვენ საქართველოსა და მოლდოვას უსაფრთხო წარმოშობის ქვეყნების კატეგორიას მივაკუთვნებთ. ორივეს სურს გახდეს ევროკავშირის წევრი, ამიტომ არ არის მიზანშეწონილი ვივარაუდოთ, რომ ამ ქვეყნებში სისტემური შევიწროება ხდება, – ამის შესახებ გერმანიის კანცლერმა, ოლაფ შოლცმა განაცხადა.

მისი თქმით, გერმანიამ საზღვრებზე კონტროლი გაამკაცრა და სურს, ქვეყანაში წესების დარღვევით დარჩენის ფაქტები შეამციროს.

“გვსურს, შევამციროთ აქ წესების დარღვევით დარჩენის სტიმული. თუ გერმანიის ფედერალური მიწები განაცხადებენ, რომ მათ სურთ თანხის სანაცვლოდ სოციალური დახმარების ნატურალური ფორმით გაწევა, ჩვენ ამას მხარს დავუჭერთ. თუ მათ სურთ სადებეტო ბარათების შემოღება თავშესაფრის მაძიებლებისთვის (ნაღდი ფულის ნაცვლად, რომელსაც სახლში რიცხავენ ან კონტრაბანდისტებს უხდიან), ჩვენ ამასაც მხარს დავუჭერთ. მეტიც, სწორად მივიჩნევთ თავშესაფრის მაძიებლებისთვის საზოგადოებრივი მომსახურების სერვისების გახსნას”, – განაცხადა ოლაფ შოლცმა.

კითხვაზე, ფიქრობს თუ არა, რომ ეს საკმარისი იქნება გერმანიაში ჩასული ადამიანების რაოდენობის საგრძნობლად შესამცირებლად, ოლაფ შოლცმა უპასუხა:

“როგორც ვთქვი, ეს შეიძლება გაკეთდეს მხოლოდ ზომების პაკეტით და მე ჯერ კიდევ არ მიხსენებია ერთი მნიშვნელოვანი რამ: ჩვენ საბოლოოდ უნდა მოვახდინოთ მათი დეპორტაცია, ვისაც გერმანიაში დარჩენის უფლება არ აქვს. ისინი, ვინც სავარაუდოდ ვერ მიიღებენ გერმანიაში დარჩენის ნებართვას, რადგან მათ არ შეუძლიათ დაადასტურონ დაცვის საჭიროება, უნდა დაბრუნდნენ. პროცედურები უნდა დაჩქარდეს, თავშესაფრის განცხადებები და პირველადი გასაუბრება უნდა ჩატარდეს თავდაპირველ მიმღებ დაწესებულებაში. სასამართლო პროცესიც უნდა დაჩქარდეს. ზოგიერთ მიწაზე, დეპორტაციის საქმეებზე თავდაპირველი გადაწყვეტილებების მიღება ხდება ოთხი თვის შემდეგ, ხოლო ზოგში ამას 39 თვე სჭირდება. ეს მიუღებელია. ჩვენ უნდა განვახორციელოთ დეპორტაცია უფრო ხშირად და უფრო სწრაფად“.

კანდიდატის სტატუსს რომ მივიღებთ, ეს იქნება საქართველოში რადიკალური ოპოზიციის უმძიმესი მარცხი და ქართული სახელმწიფოს, „ქართული ოცნების“ ხელისუფლების და ქართველი ხალხის დიდი გამარჯვება, – აცხადებს საპარლამენტო უმრავლესობის წევრი, დავით მათიკაშვილი.

მისი თქმით, შარშანდელი გადაწყვეტილებით, რომლითაც სტატუსი არ მიენიჭა ქვეყანას, ევროკავშირმა გეოპოლიტიკური შეცდომა დაუშვა.

„რადიკალური ოპოზიციის მიზნები არ არის კანდიდატის სტატუსის მიღება. მათი მიზანია ხელისუფლების უკანონოდ შეცვლა, რისთვისაც უნდა გამოიყენონ ის ფაქტი, რომ არ მოგვცენ სტატუსი. იმიტომ იყო, რომ წელიწადზე მეტია ყველა ნაბიჯს დგამენ, ევროპის დედაქალაქების მოვლის ჩათვლით, ანტიქართულ პროპაგანდას აწარმოებენ მთელს მსოფლიოში, რომ სტატუსი არ მიიღოს ქვეყანამ და არჩევნებამდე მოახდინონ არალეგალურად, არაკონსტიტუციურად ხელისუფლების შეცვლა.

რა თქმა უნდა, საბოლოოდ, ეს არის პოლიტიკური გადაწყვეტილება. ჩვენ ველოდებით ევროკავშირისგან სწორ პოლიტიკურ გადაწყვეტილებას. იმედით ვუყურებთ მომავალს. გვჯერა, ევროკავშირი ამ კუთხით მეტ შეცდომას აღარ დაუშვებს – გეოპოლიტიკურ შეცდომას. სწორედ ასეთი იყო ერთი წლის წინ სტატუსის არმინიჭება საქართველოსთვის. დღეს იქნება სწორი, სამართლიანი გადაწყვეტილება. ჩვენი ქვეყანა მიიღებს სტატუსს და ამით მწარედ დამარცხდება რადიკალური ოპოზიცია,“ – განაცხადა მათიკაშვილმა.

პარტია „საქართველოსთვის“ დეპუტატის ანა ბუჩუკურის განცხადებით, საქართველო კანდიდატის სტატუსს მიიღებს, თუმცა ამ საქმეში თავად “ქართული ოცნების” ხელისუფლების დამსახურება ნულის ტოლფასია.

ბუჩუკურის განცხადებით, საქართველოს მიერ ევრორეკომენდაციების შესრულება “საკმაოდ მძიმედ გამოიყურება”.

“ის, რისთვისაც ქვეყანა სტატუსს მიიღებს, არის ქართველი ხალხის ბოლო 30-წლიანი ბრძოლა ევროპული მომავლისთვის და დასავლური ღირებულებებისთვის. თუ არ ჩავთვლით ბოლო ორ წელიწადს, საქართველო წლების განმავლობაში რეგიონში, განსაკუთრებით „ასოცირებული ტრიოს” ფარგლებში მოწინავე, ლიდერი ქვეყანა იყო, როცა საქმე დემოკრატიულ რეფორმებს ეხებოდა.

კიდევ ერთი ძალიან მნიშვნელოვანი ფაქტორი, გეოპოლიტიკური პროცესებია – ჩვენს პარტნიორებს ძალიან კარგად ესმით, რომ საქართველოს მარტო დატოვება ქვეყნის იზოლირებას და რუსეთის გავლენების გაზრდას ნიშნავს. ეს არის ის მიზეზები, რის გამოც საქართველო კანდიდატი ქვეყნის სტატუსს აუცილებლად მიიღებს, რაშიც “ქართული ოცნების” დამსახურება არის ნული.

გამობრძანდნენ ხელისუფლების წარმომადგენლები და განმარტონ, თუ რას აპირებენ იმისთვის, რომ საქართველო დაეწიოს მაგალითად მოლდოვას, რომელიც უკვე მზად არის დაიწყოს მოლაპარაკებები ევროკავშირთან გაფართოებაზე და ჩვენ კანდიდატის სტატუსის მიღება გვიხარია”, – განაცხადა ანა ბუჩუკურმა.

ჩვენ წლის ბოლოს მივულოცავთ საქართველოს კანდიდატის სტატუსის მიღებას, ოპოზიციას მივუსამძიმრებთ, – ამის შესახებ „ხალხის ძალის“ წევრმა გურამ მაჭარაშვილმა განაცხადა.

მაჭარაშვილის თქმით, კანდიდატის სტატუსი ქვეყანას ობიექტურად ეკუთვნის თუ რეფორმებს ატარებს და წელს ევროკავშირი შარშანდელისგან განსხვავებით, “სამართლიან გადაწყვეტილებას” მიიღებს.

„წლის ბოლოს აშშ და ევროკავშირი, სადაც გადაწყვეტილება უნდა იქნას მიღებული, მიიღებენ რაციონალურ, სწორ და სამართლიან გადაწყვეტილებას, რაც ისედაც ეკუთვნოდა შარშან საქართველოს, ეს არის კანდიდატის სტატუსის მინიჭება. ყველამ ვიცით, კანდიდატის სტატუსი ობიექტურად რა შემთხვევაში ენიჭება ქვეყანას: უნდა ტარდებოდეს რეფორმები, სახელმწიფო ინსტიტუტები უნდა მუშაობდნენ და მათი მუშაობა საერთაშორისო სტანდარტებთან შესაბამისობაში უნდა იყოს. ბუნებრივია, ამ შემთხვევაში შარშანაც ეკუთვნოდა საქართველოს. თუმცა, პოლიტიკური გადაწყვეტილება იყო არასამართლიანი. წელს დარწმუნებული ვართ, სამართლიანად იქნება შეფასებული საქართველოს როლი თანამედროვე მსოფლიოში და ევროკავშირი სწორ, ღირსეულ და რაც მთავარია, სამართლიან გადაწყვეტილებას მიიღებს.

ოპოზიციას გლოვა აქვს გამოცხადებული, რადგან მათ დღის წესრიგშია სტატუსის არმიღება და არეულობის მცდელობა ქვეყანაში, მაგრამ მე შემიძლია მათ ვუთხრა, რომ ჩვენ წლის ბოლოს მივულოცავთ საქართველოს და მივუსამძიმრებთ მათ კანდიდატის სტატუსის მიღებას,”- განაცხადა მაჭარაშვილმა.ა