რა მოხდებოდა ივანიშვილი რომ ყოფილიყო 2008 წელს პრეზიდენტი, რთულად წარმოსადგენია, მაგრამ ივანიშვილი იმ პერიოდში ძალიან მჭიდროდ თანამშრომლობდა სააკაშვილთან, ეხმარებოდა რეფორმების ჩატარებაში და პირიქით, ამაყობდა ამით, – ამის შესახებ „გირჩის“ დეპუტატმა სანდრო რაქვიაშვილმა განაცხადა, რითაც 2008 წლის ომსა და წინა ხელისუფლებაზე ირაკლი ღარიბაშვილის განცხადებებს გამოეხმაურა.

რაქვიაშვილის თქმით, 2012 წლამდე რაც ხდებოდა, ივანიშვილის წვლილიც არის და თუ ამასაც სათანადოდ შეაფასებს ღარიბაშვილი, კარგი იქნება.

„ჩვენი პრემიერ-მინისტრი ყოველ ჯერზე გვაოცებს უნარით, როგორ შეაქოს ბიძინა ივანიშვილი, სი ძინ პინი და მისთვის მნიშვნელოვანი სხვა ადამიანები – ამ ნაწილში ნამდვილად ჩემპიონები ვართ. რაც ეხება, თუ რა მოხდებოდა ივანიშვილი რომ ყოფილიყო 2008 წელს პრეზიდენტი, რთულად წარმოსადგენია ეს, მაგრამ როგორც მახსოვს, ივანიშვილი იმ პერიოდში ძალიან მჭიდროდ თანამშრომლობდა სააკაშვილთან, ეხმარებოდა რეფორმების ჩატარებაში და პირიქით, ამაყობდა, რომ ბევრი რამ, რაც გაკეთდა, მისი დამსახურება იყო. იმდენად იყო ჩართული, რომ მერე ბევრი მაღალჩინოსანი „ნაციონალურ მოძრაობაში“ შეიფარა და დააწინაურა კიდეც, დაწყებული სასამართლოთი, დამთავრებული პროკურატურით და სხვადასხვა უწყებებით. ამიტომ მე მგონია, ივანიშვილის წვლილიც არის იმ ყველაფერში, რაც 2012 წლამდე მოხდა და თუ ამასაც სათანადოდ შეაფასებს ღარიბაშვილი, კარგი იქნება,“ – განაცხადა რაქვიაშვილმა.

დეპოლარიზაცია უნდა მოხდეს იმ ძალებთან, რომლებსაც აინტერესებთ ქვეყნის წინსვლა, მათ შორის, ევროინტეგრაციის მიმართულებით. ეს არის ყველაზე სწორი, – ამის შესახებ „ქართული ოცნების“ თავმჯდომარემ, ირაკლი კობახიძემ განაცხადა.

მანვე აღნიშნა, რომ სამოქმედო გეგმით გათვალისწინებულია ყველა საპარლამენტო პარტიის და ასევე არასამთავრობო ორგანიზაციების მონაწილეობა სამუშაო პროცესში.

„დეპოლარიზაცია ჩვენ გვაინტერესებს და გვჭირდება მხოლოდ იმ ძალებთან, რომლებიც არიან დაინტერესებული საქართველოს წინსვლით, მათ შორის ევროპულ გზაზე. სამოქმედო გეგმით გათვალისწინებულია ყველა საპარლამენტო პარტიის და ასევე არასამთავრობო ორგანიზაციების მონაწილეობა სამუშაო პროცესში. ეს არის სამოქმედო გეგმით გათვალისწინებული, როგორც ამას გვირჩევდა ევროკავშირი“, – განაცხადა ირაკლი კობახიძემ.

პარტია „ქართული ოცნების“ თავმჯდომარის ირაკლი კობახიძის განცხადებით, ცხრა პრიორიტეტი შესრულდება და „ქართული ოცნება“ წარადგენს დეტალურ გეგმას, როგორ ხედავს თითოეული პუნქტის შესრულებას.

ამასთან, რაც შეეხება ოპოზიციისა და არასამთავრობო ორგანიზაციების ჩართულობას, როგორც კობახიძემ აღნიშნა, ეს თავად სამოქმედო გეგმით არის გათვალისწინებული.

„სამოქმედო გეგმა დამტკიცებულია სამთავრობო კომისიის ფორმატში. შეგვიძლია, დეტალურად წარვადგინოთ თითოეული პუნქტი, როგორ არის ასახული ეს პუნქტები სამოქმედო გეგმაში. ამის მიხედვით, რა თქმა უნდა, მყისიერად დაიწყება ცხრავე პრიორიტეტის განხორციელება. ინტენსიურად წარიმართება სამუშაო პროცესი უკვე იანვრიდან. პარლამენტი ჩაერთვება აქტიურად სამუშაო პროცესში იანვარ-თებერვალში. შესაბამისად, ცხრავე პრიორიტეტის შესრულება იქნება უზრუნველყოფილი, რათა გადავიდეთ მომდევნო ეტაპზე, გაიხსნას მოლაპარაკებები და ა.შ. ეს არის შრომატევადი პროცესი, საბოლოო ჯამში ევროკავშირში გაწევრიანებას დასჭირდება არა ერთი და ორი წელი, მაგრამ მთავარია, ჩვენ თანმიმდევრულად ვიაროთ ამ მიზნისკენ“, – განაცხადა ირაკლი კობახიძემ.

თავდაცვის მინისტრის, ჯუანშერ ბურჭულაძის განცხადებით, პრემიერ-მინისტრ ირაკლი ღარიბაშვილის ანგარიში შთამბეჭდავი იყო.

როგორც მან ჟურნალისტებს განუცხადა, ძალიან ეფექტური იყო პრემიერის მხრიდან დღევანდელი მთავრობის საქმიანობის წინა ხელისუფლების პერიოდთან შედარება.

„საზოგადოებამ დღეს მოისმინა პრემიერის წლიური ანგარიში, რომელიც ძალიან შთამბეჭდავი იყო. თქვენ მოისმინეთ კონკრეტული ციფრები. აქ არ შეიძლება ცდომილების რაიმე დიაპაზონი იყოს იმიტომ, რომ ჩვენ დღეს მოვისმინეთ აბსოლუტური არითმეტიკა. ძალიან ეფექტური იყო განვლილ პერიოდთან შედარებაც. ჩვენმა საზოგადოებამ ნახა, თუ რა ცვლილება მოიტანა ჩვენმა ხელისუფლებამ ამ 10 წლის განმავლობაში“,-განაცხადა ბურჭულაძემ.

გარდა ამისა, მან საზოგადოებას კანდიდატის სტატუსის მიღება მიულოცა.

უპირველეს ყოვლისა, ეს იყო დიდი ისტორია, რომელიც საქართველოს ისტორიის ფურცელზე დაიწერა. ბოლო დეკადების განმავლობაში ვერ ვიხსენებ ანალოგიური მასშტაბის მოვლენას, რომელიც ასე გასახარებელი და მისალოცია ჩვენი ხალხისთვის“, – განაცხადა ბურჭულაძემ.

მისი თქმით, ევროკავშირმა პირველად საქართველოს თავდაცვის უწყებას თანხა 2021 წელს გამოუყო.

„ჩვენ ევროკავშირის დახმარებით 2022 წელს თითქმის გაორმაგებული დახმარება მივიღეთ. შემდეგ 30 მლნ ევრო და ეს პროგრესულად გაგრძელდება. რაც შეხება ამ თანხებს, ძირითადად მიემართება საინჟინრო საშუალებების და სხვა მობილური საშუალებების განვითარებას“, -განაცხადა ბურჭულაძემ.

„ქართული ოცნება“ არის პოლიტიკური ძალა, რომელიც 2024 წელს დიდი მხარდაჭერით გაიმარჯვებს, – ამის შესახებ დედაქალაქის მერმა, კახა კალაძემ განაცხადა.

კალაძეს კითხვა დაუსვეს წინასაარჩევნოდ ბიძინა ივანიშვილის შესაძლო პოლიტიკაში დაბრუნების საკითხზე.

„ბიძინა ივანიშვილი დიდი ხანია, პოლიტიკაში არ არის. ადამიანმა თავისი ნებით დატოვა პრემიერ-მინისტრის თანამდებობა, შემდეგ პარტიის ხელმძღვანელი იყო, დატოვა პარტია. „ქართული ოცნება“ დღეს არის პოლიტიკური ძალა, რომელიც 2024 წელს დიდი მხარდაჭერით გაიმარჯვებს. ამის თქმის საშუალებას მაძლევს დამოკიდებულება, განწყობა, რაც საზოგადოებაშია და ყველა კვლევა მეტყველებს, რომ დღეს „ქართულ ოცნებას“ ალტერნატივა არ ჰყავს. 2024 წელს საზოგადოების მხარდაჭერით, კონსტიტუციური უმრავლესობით მოვა“, – განაცხადა კახა კალაძემ.

პროგრამამ „აწარმოე საქართველოში“ მცირე და საშუალო ბიზნესის მხარდასაჭერად 900 მილიონ ლარამდე მიმართა. პროგრამის ამოქმედების დღიდან, სხვადასხვა პროგრამის ფარგლებში დაფინანსდა 12 000-მდე პროექტი, შეიქმნა 70 000-ზე მეტი სამუშაო ადგილი და გაიცა 400 მლნ ლარზე მეტი დაფინანსება, – ამის შესახებ საქართველოს პრემიერ-მინისტრმა ირაკლი ღარიბაშვილმა მთავრობის მუშაობის 2023 წლის ანგარიშის წარდგენისას განაცხადა.

მთავრობის მეთაურის თქმით, ასევე მცირე მეწარმეობის საგრანტო პროგრამის ფარგლებში ჯამში დაფინანსებულია 12 000-ზე მეტი ბენეფიციარი.

„ბოლო 11 წელიწადში არაერთი პროგრამა დავნერგეთ და განვახორციელეთ, რომელიც ახლაც გრძელდება. გავიხსენებდი პროგრამას „აწარმოე საქართველოში“, რომელიც შეიქმნა 2014 წელს. დღემდე სააგენტომ მცირე და საშუალო ბიზნესის მხარდასაჭერად 900 მილიონ ლარამდე მიმართა. ამ პროგრამის ამოქმედების დღიდან, სხვადასხვა პროგრამის ფარგლებში დაფინანსდა 12 000-მდე პროექტი, შეიქმნა 70 000-ზე მეტი სამუშაო ადგილი და გაიცა 400 მლნ ლარზე მეტი დაფინანსება. ასევე, მინდა, შევეხო მიკრო და მცირე მეწარმეობის საგრანტო პროგრამას. ჯამში დაფინანსებულია 12 000-ზე მეტი ბენეფიციარი, 9 000-ზე მეტი ბიზნესპროექტი. ბენეფიციარების 43 პროცენტი ქალი მეწარმეა. წელს პროგრამის ფარგლებში დაფინანსდა 1 140 პროექტი, მათი 50 პროცენტი ასევე ქალი მეწარმეა. ჯამურად გაცემული გრანტების მოცულობა შეადგენს 116 მილიონ ლარს. ჩვენ ასევე დავიწყეთ სრულიად ახალ სექტორებზე მუშაობა, უმსხვილესი კომპანიების მოზიდვით ქვეყანაში შეიქმნა ორი ახალი მიმართულება – ეს არის IT მიმართულება და ბიზნესპროცესების აუთსორსინგი, ე.წ. BPO. დღეს ეს მიმართულებები საქართველოში ათი ათასობით ადამიანს ასაქმებს. ბოლო წლებში ქვეყანაში დაიწყეს ოპერირება მსოფლიოს წამყვანმა ცნობილმა კორპორაციებმა, როგორებიცაა: Girteka, Concentrix-ი, Indorama, Teleperformanc-ი და სხვა“, – განაცხადა პრემიერმა.

2012 წელს საქართველოს საავიაციო ბაზარზე საქმიანობდა 28 ავიაკომპანია, წელს – 50 ავიაკომპანიაა შემოსული საქართველოში, 67 მიმართულებით ახორციელებენ ფრენებს, – ამის შესახებ საქართველოს პრემიერ-მინისტრმა ირაკლი ღარიბაშვილმა წლიური ანგარიშის წარდგენისას განაცხადა.

მთავრობის მეთაურის თქმით, ქუთაისის აეროპორტმა სექტემბერში მემილიონე მგზავრს უმასპინძლა, რეკორდული მაჩვენებელი იყო ბათუმშიც და წელს ბათუმის აეროპორტი 650 000 მგზავრს მოემსახურება.

„ასევე შედარებისთვის, მეგობრებო, 2012 წელს საქართველოს საავიაციო ბაზარზე საქმიანობდა 28 ავიაკომპანია, წელს – 50 ავიაკომპანიაა შემოსული საქართველოში, 67 მიმართულებით ახორციელებენ ფრენებს.

ქუთაისის აეროპორტი 2023 წელს მგზავრების რეკორდულ რაოდენობას მოემსახურება – 1.7 მილიონ მგზავრს ველოდებით წელს, აეროპორტმა სექტემბერში მემილიონე მგზავრს უმასპინძლა, მოგეხსენებათ; ბათუმშიც ასევე რეკორდული მაჩვენებელი იყო, 650 000 მგზავრს მოემსახურება ბათუმის აეროპორტი წელს.

ეს ტენდენციები გრძელდება, ძლიერდება. უვიზო რეჟიმი დამატებითი სტიმულია, ჩვენ ჩინეთთანაც გავხსენით ახლა, რამდენიმე თვის წინ უვიზო რეჟიმი, მსოფლიოში ყველაზე დიდ ტურისტულ ბაზართან თანამშრომლობის გაღრმავებას, რა თქმა უნდა ძალიან დიდი მნიშვნელობა აქვს.

ჩვენ ასევე აქტიური მუშაობის შედეგად, ჩინეთის ერთ-ერთი წამყვან ავიაკომპანიასთან მოვახერხეთ მოლაპარაკება და დაინიშნა უკვე რეგულარული ფრენები, სექტემბრიდან გაიზარდა, დაიწყო პირდაპირი ფრენები ინდოეთშიც. ჩვენ ცხადია გვჭრდება აეროპორტების მეტი განვითარება, იცით, რომ ჩვენ დავაანონსეთ ახალი აეროპორტის განვითარების შესახებ, რომელზეც რამდენიმე ასეული მილიონი დოლარი დაიხარჯება და ჩვენი ამბიცია და მიზანი არის რომ შექიმნას ქვეყანაში საერთაშორისო დონის კლასის აეროპორტი, რომელიც შეიძლება იყოს ტრანზიტულ-ლოგისტიკური ცენტრი, მაღალი დონის სატვირთო და სამგზავრო ტერმინალებით.

ქუთაისის აეროპორტში აშენდება 3.5 კმ სიგრძის ასაფრენ-დასაფრენი ზოლი, რომელიც მოემსახურება ნებისმიერი ზომის საჰაერო ხომალდს, მიიღებს მეტ ავიარეისს, უზრუნველყოფს სატვირთო საჰაერო ხომალდების შეუზღუდავ ოპერირებას.

ჩვენ თელავში უკვე დავიწყეთ და ვიწყებთ აქტიურად უკვე მშენებლობას, ახალი სამგზავრო ტერმინალის მშენებლობას, რომლის გამტარუნარიანობაც იქნება 50 000-ამდე მგზავრი და ოთხივე სეზონის განმავლობაში შესრულდება შიდა ფრენები ქუთაისის, ბათუმის, მესტიისა და ამბროლაურის მიმართულებით”, – განაცხადა ირაკლი ღარიბაშვილმა.