„როდესაც ამბობთ, რომ ეს ხელისუფლება რუსული ინტერესების გამტარებელია, ამით თქვენ არამარტო ჩვენ გვაყენებთ შეურაცხყოფას, არამედ იმ ადამიანებსაც, რომლებიც მხარს უჭერენ „ქართულ ოცნებას“, – ასე გამოეხმაურა საკრებულოს სხდომაზე ოპოზიციის მიერ გაკეთებულ განცხადებებს თბილისის საკრებულოს თავმჯდომარის მოადგილე ზურაბ აბაშიძე.

ზურაბ აბაშიძემ ოპოზიციას და განსაკუთრებით მის ახალგაზრდა წარმომადგენლებს მოუწოდა შეწყვიტონ მსგავსი რიტორიკა, რათა ქვეყანაში პოლარიზაცია დასრულდეს.

თბილისის საკრებულოს თავმჯდომარის მოადგილემ ყურადღება ოპოზიციის იმ განცხადებებზეც გაამახვილა, თითქოს ხელისუფლება ყველა აზრის გაკონტროლებას ცდილობს.

ზურაბ აბაშიძე დაინტერესდა თუ რომელი მედიასაშუალებებით ცდილობს ხელისუფლება ამის გაკეთებას.

„თქვენ ამბობთ, რომ ხელისუფლება ქვეყანას მიაქანებს იქითკენ, რომ ყველა აზრი გაკონტროლდეს. თქვენი აზრით, რომელი მედიასაშუალებებით აკეთებს ამას ხელისუფლება? იმ პლურალისტური მედიით ხომ არა, რომელიც ქვეყანას სწორედ ჩვენმა ხელისუფლებამ მოუტანა? მსგავსი საუბრები ქვეყნისთვის დამაზიანებელია. პარტიაში გადიხართ ამ გზავნილებს, თუ მართლა ასე ფიქრობთ? თუ ასე ფიქრობთ, მაშინ ოპოზიციური ფლანგი დეგრადაციას განიცდის“, – განაცხადა ზურაბ აბაშიძემ.

თბილისის საკრებულოს თავმჯდომარის მოადგილის თქმით, მსგავსი იაფფასიანი განცხადებები და არაფრის მომცემი ეპატაჟი შედეგს ვერ მოიტანს. მისი თქმით, ამით საზოგადოებას შორის დაპირისპირება კიდევ უფრო გაღრმავდება.

„თქვენი აზრით, ჩვენ ვართ რუსები და თქვენ ევროპელები? შეწყვიტეთ საზოგადოების პოლარიზაცია, რადგან ამით ქვეყნის ინტერესებს აზიანებთ“, – განაცხადა ზურაბ აბაშიძემ.

ჩვენი კარი ღიაა, ვისაც უნდა, რომ შემოგვიერთდეს, შემოგვიერთდეს, ჩვენ გვაქვს ის ძალა და გამოცდილება, რომელიც მომავალ კოალიციურ მთავრობაში აუცილებლად მიიღებს წამყვან როლს, – ამის შესახებ „ლელოს“ ლიდერმა, მამუკა ხაზარაძემ განაცხადა.

ამასთან, როგორც მამუკა ხაზარაძემ აღნიშნა, „ლელო“ „ნაციონალურ მოძრაობასთან“ ვერანაირ კავშირს ვერ ხედავს, „თუ ქვეყანაში ისეთი რაღაც არ მოხდა, რომ მთელი საზოგადოება გამოვა ქუჩაში და მივხვდებით, რომ უკვე პარტიული ინტერესები ბოლო პლანზე გადადის“.

„ბოლო პერიოდში, რაც „ნაციონალურ მოძრაობაში“ ცვლილებები განვითარდა და წინა პლანზე წამოვიდნენ ადამიანები, რომლებიც დაკავშირებული არიან იმ ცხრაწლიან „ნაციონალურ მოძრაობასთან“, კერძოდ, მერაბიშვილი და ძმანი მისნი, ჩვენ ამ პარტიასთან ვერანაირ კავშირს ვერ ვხედავთ. თუმცა, ვხედავთ ძალიან დიდ პოტენციალს საზოგადოების, აკადემიური წრეების, დოპლომატიის წარმომადგენლებთან, სტუდენტებთან, რომელთაც უნდათ, აქტიურად ჩაერთონ ჩვენი ქვეყნის მომავლის მშენებლობაში და ჩვენ ახლა ამით ვართ დაკავებული.

რას ნიშნავს პოლიტიკურ პარტიებთან გაერთიანება -კანონმდებლობით ბლოკები აკრძალულია, შესაბამისად, სამი პარტიაც რომ გაერთიანდეს, სამი ნომერი და სამი სია ვერ იქნება, ამიტომ, თუ მივალთ ამ კონკრეტიკამდე, იქნება ერთი პარტია და იქნება ერთი ნომერი, ერთი სია. შესაბამისად, ჩვენი კარი ღიაა, ვისაც უნდა, რომ შემოგვიერთდეს, შემოგვიერთდეს. ვისაც ფერი არ მოსწონს, ყვითელი ან რაღაც სახელი, ეს არის ტექნიკა და შეგვიძლია, კომპრომისზე წავიდეთ. მაგრამ როდესაც ლაპარაკია, როგორ დავამარცხოთ ის რუსული მთავრობა, რომელიც დღეს ქვეყანას მართავს, ჩვენ ვხედავთ, რომ ჩვენი კარი არის ღია. მობრძანდნენ, კონსულტაციები დავიწყოთ. ზოგიერთთან ეს ყველაფერი დაწყებული გვაქვს.

აქვე მინდა გითხრათ, რომ პარტიას პლუს პარტია არ ნიშნავს ამომრჩევლის ავტომატურ გადმოტანას. ახლა რომ არის ლაპარაკი, გაერთიანდით, გაერთიანდით, „ნაციონალურ მოძრაობასთან“ არავითარ გაერთიანებაზე და თანამშრომლობაზეც არ არის საუბარი, თუ ქვეყანაში ისეთი რაღაც არ მოხდა, რომ მთელი საზოგადოება გამოვა ქუჩაში და მივხვდებით, რომ უკვე პარტიული ინტერესები ბოლო პლანზე გადადის“, – აღნიშნა ხაზარაძემ.

მისივე თქმით, „ლელო“ აგრძელებს დამოუკიდებელ განვითარებას.

„ჩვენი კარი ღიაა და მოვუწოდებ საზოგადოებას, შემოგვიერთდნენ, რადგან ჩვენ გვაქვს ის ძალა, ინტელექტი და გამოცდილება, რომელიც მომავალ კოალიციურ მთავრობაში აუცილებლად მიიღებს წამყვან როლს“, – აღნიშნა მამუკა ხაზარაძემ.

ყველა, ვინც ამბობს, რომ ოპოზიციასთან თანამშრომლობისა და კოორდინაციის გარეშე „ქართულ ოცნებას“ მარტო დაამარცხებს, არის ბრიყვი ან მიზანმინართული მავნებელი, – ამის შესახებ „სტრატეგია აღმაშენებლის“ წევრმა, პაატა მანჯგალაძემ განაცხადა.

„ამას ბევრი ლაპარაკი არ უნდა. ჩვენ ისე არ უნდა გაგვიტაცოს ერთმანეთის კრიტიკამ, რომ დაგვავიწყდეს მთავარი მტერი და საფრთხე – „ქართული ოცნება“ საქართველოში. რა დროს რაღაც რეიტინგების დატოლებაა, როდესაც ქვეყანას კარს მოადგა საფრთხე, რომ შეიძლება, რუსეთში გავიღვიძოთ. ამ დროს ვიღაცები საუბრობენ, რომ არ დადგებიან იმასთან, რადგან ვიღაცამ თქვა, რომ იმის უკან ვიღაც დგას.

ასეთი განცხადება სახელმწიფოებრივია? ეს არის ეროვნული პოლიტიკა? ზოგიერთი პარტიის ლიდერი გვმოძღვრავს, უარი ვთქვათ ვიწროპარტიულ ინტერესებზე და ვიწროპარტიული ინტერესი არ არის, როდესაც ამბობ, რომ საქართველოს გადარჩენა „ფეხებზე მკიდაო“ და მთავარია, მე რა მინდა, ის გაითვალისწინოთო?“ – განაცხადა პაატა მანჯგალაძემ.

კითხვაზე, არსებობს თუ არა ოპოზიციის გაერთიანების რესურსი, მანჯგალაძემ აღნიშნა, რომ „სტრატეგია აღმაშენებელი“ ამ კინკლაობაში არ მონაწილეობს.

„არც არაფრის გადაქაჩვას და გადმოქაჩვას არ ვაპირებთ. ყველა იძულებული გახდება, საქართველოს მოქალაქის დაკვეთას ანგარიში გაუწიოს და პრინციპულ საკითხებზე თანხმობას მივაღწიოთ. ქვეყანა კანდიდატის სტატუსს თუ ვერ მიიღებს, ყველამ უნდა იცოდეს, რომ უნდა დადგეს „ქართული ოცნების“ პასუხისმგებლობის საკითხი. უნდა გავიდეთ ქუჩაში და მოვითხოვოთ ვადამდელი არჩევნები. ეს არის „სტრატეგია აღმაშენებლის“ კრიზისიდან გამოყვანის ფორმულა“, – აღნიშნა პაატა მანჯგალაძემ.