„ფაქტი ერთია, ამ ქვეყანაში მდიდარი „ენჯეოები“ ჩამოყალიბდნენ, როგორც უცხოური გავლენის აგენტები“, – ამის შესახებ, მედიასთან ისაუბრა „ხალხის ძალის“ ერთ-ერთმა ლიდერმა სოზარ სუბარმა, რომელიც „საერთაშორისო გამჭვირვალობის“ ინიციატივას გამოეხმაურა.

როგორც სუბარმა აღნიშნა, „ენჯეოებს“ სურთ, არჩეულმა პარტიებმა პარლამენტში ის კანონები მიიღონ რაც მათ სურთ, რაც ვერანაირად ვერ მოხდება.

„საქართველოში თუ რამეა გაუმჭვირვალე, ეს „ენჯოების“ დაფინანსებაა. ყველა არჩეულმა პარტიამ უნდა მოუსმინოს მათ და პრაქტიკულად პარლამენტმა ბეჭედი უნდა დაარტყას იმ კანონებს, რომლებსაც ისინი ჩათვლიან, რომ უნდა მიიღოს ქვეყანამ. ამ ფონზე სრულიად გაუმჭვირვალეა მთელი მათი საქმიანობა. ფაქტი ერთია, ამ ქვეყანაში მდიდარი „ენჯეოები“ ჩამოყალიბდნენ, როგორც უცხოური გავლენის აგენტები. მათი ინტერესის გათვალისწინება ვერანაირად ვერ მოხდება, ვერცერთ კანონში. ზოგადად, თუ მათი ლოგიკით ვიმსჯელებთ, გამჭვირვალობა ეს რუსული პროექტი და თემაა და გამჭვირვალობის შესახებ კანონი იყო რუსული კანონი. გამოდის, მათი დღევანდელი კანონიც, ყოფილა რუსული კანონი“ – განაცხადა სოზარ სუბარმა.

მან ასევე ისაუბრა ოპოზიციის სტრატეგიაზე და აღნიშნა, რომ ლევან ხაბეიშვილს „ნაცმოძრაობის“ დაშლის გარდა სხვა გასაღები არ გააჩნია და ამას პოლიტიკური პარტიები და საზოგადოებაც ხედავს.

„ლევან ხაბეიშვილი არის გასაღები დაშლის. როგორ უნდა დაშალოს პარტია, სხვა გასაღები მას არ აქვს და ვერავის ვერაფერს ვერ ასწავლის.მაგრამ, მე ამ ფონზე რომ ვუყურებ მართლა საცოდავ დღეშია ვაშაძე – მანჯგალაძის ჯგუფი იმიტომ, რომ ერთადერთი პოლიტიკური ჯგუფი დარჩა, რომელიც დღემდე რაღაცნაირად ებღაუჭება „ნაცმოძრაობას“. პარტიების უმრავლესობა აფასებს საღად, რომ აღარ გამოვა მათი გაერთიანება „ნაციონალური მოძრაობის“ ირგვლივ. ალბათ, დაიწყებენ ახალი ალიანსების ძებნას. თუმცა, ჯერჯერობით რასაც ვუყურებთ ეს მაინც არის – „მკვდარი, მკვდარს აეკიდა“ თემა იმიტომ, რომ არანაირი იდეა, რეიტინგი, შანსი მათი მხრიდან არ მოდის“, – განაცხადა, სოზარ სუბარმა.

ჩვენი პრინციპული პოზიციაა, რომ შიდა ოპოზიციურ გარჩევებსა და კინკლაობებში არ ვმონაწილეობთ, – ამის შესახებ „სტრატეგია აღმაშენებლის“ გენერალურმა მდივანმა, დეპუტატმა პაატა მანჯგალაძემ განაცხადა.

„ამ საკითხს რაც შეეხება, „ლელოს“ რა სურს, აქ მარტივი გადაწყვეტა არის – არ სურს და არც არავინ აძალებს. ისე არ უნდა დაგვიტაცოს შიდა ოპოზიციურმა კინკლაობამ და ტალახის სროლამ, რომ დაგვავიწყდეს მთავარი პრობლემა „ქართული ოცნების“ სახით. მაშინ, როდესაც ხალხის დაკვეთაა ერთიანობა საქართველოსთვის, ჩვენ კიდევ ერთხელ თავს ვესხმით ერთმანეთს – ეს „ქართული ოცნების“ წისქვილზე წყლის დასხმა“, – განაცხადა მანჯგალაძემ.

„ნაციონალური მოძრაობის“ ფაქტორი ოპოზიციურ სპექტრში აზრთა სხვადასხვაობის მიზეზი გახდა. ვიდრე ოპოზიციური პოლიტიკური პარტიები 2024 წლის არჩევნების სამოქმედო გეგმაზე შეთანხმდებიან, წინასწარ ცნობილია, რომ ნაწილი „ნაცმოძრაობას“ პირდაპირ ემიჯნება.

ეს იყო ტელეკომპანია „ფორმულას“ მიერ მოწყობილი პროვოკაცია, ისინი იყვნენ მოსული და იღებდნენ ამ ე.წ. ინციდენტს. სინამდვილეში, მოსული იყო რამდენიმე ფორმულასთან აფილირებული ახალგაზრდა, რომლებსაც ყველანაირი ორიენტაცია აქვთ არეული, – ასე გამოეხმაურა „ქართული ოცნების“ თავმჯდომარე, ირაკლი კობახიძე თბილისის სახელმწიფო უნივერსიტეტში მომხდარ ინციდენტს.

კობახიძის განცხადებით, აღნიშნული ახალგაზრდები, რომლებიც ტელეკომპანია „ფორმულასთან“ არიან დაკავშირებული, რამდენიმე დღის წინ პრემიერ-მინისტრის მისამართით შეურაცხმყოფელ განცხადებებს აკეთებდნენ პარლამენტის წინ გამართული აქციიდან. “ჩვენი მიზანი უნდა იყოს ამ ახალგაზრდების გადარჩენა, მე მგონია, რომ მათი გადარჩენა შესაძლებელია, დარწმუნებული ვარ, მათი ორიენტაციის სწორ რელსებზე მოქცევა შესაძლებელია. ეს ახალგაზრდები, რომლებიც პარლამენტის წინ იდგნენ, რამდენიმე დღის წინ და პრემიერის მიმართ შეურაცხმყოფელ განცხადებებს აკეთებდნენ, არაფერ შუაშია მათი სტუდენტობა ამ შემთხვევაში. კიდევ ერთხელ ვიტყვი, რომ მათი ორიენტაცია, სამწუხაროდ, ყველანაირად არის არეული.

მგონია, რომ ეს ადამიანები სწორ რელსებზე უნდა მოექცნენ, საჭიროა, ბიჭებმა ცოლები მოიყვანონ, გოგონები დაქორწინდნენ, გამრავლდნენ და ა.შ. მათი ყველანაირი ორიენტაცია პოლიტიკურიდან დაწყებული, უნდა გამოსწორდეს, ეს არის ჩვენი ამოცანა, ყველაფერს გავაკეთებთ ამისთვის და ყველაფერს გავაკეთებთ, მათ შორის, ამ ახალგაზრდების გადასარჩენად.” – განაცხადა ირაკლი კობახიძემ. მისივე თქმით, საჭიროა, ამ ახალგაზრდების ორიენტაცია სწორ რელსებზე დადგეს და ისინი ჩადგნენ არა უცხოელი აგენტების, არამედ ქვეყნის სამსახურში. “როცა ხარ “ნაცი”, “გირჩელი” და ა.შ.

ეს ნიშნავს პოლიტიკური ორიენტაციის არევას, ჩვენი მიზანია, რომ ეს ახალგაზრდები სწორ გზას დაადგნენ, ჩადგნენ საკუთარი ქვეყნის სამსახურში და არა იმ პოლიტიკური ძალების სამსახურში, რომლებიც არიან უცხოელი აგენტები და ასევე, მათი ყველანაირი ორიენტაცია არის გამოსასწორებელი, ჩვენ ყველანაირად ვეცდებით, სწორ ჩარჩოებში მოვაქციოთ.“ – განაცხადა ირაკლი კობახიძემ.

წელს დაინიცირდა კანონი, რომელიც ითვალისწინებდა არასამთავრობო ორგანიზაციების, „კოლექტიური გიგაურების“ გამჭვირვალობას და ამ კანონს დაარქვეს რუსული კანონი. დღეს ისინი ითხოვენ იმავეს საჯარო მოხელეებისგან, რასაც ასე აქტიურად გაურბოდნენ თავის დროზე, როცა რუსულ კანონად მონათლეს ამერიკულიკანონი, – ამის შესახებ ჟურნალისტებს „ქართული ოცნების“ თავმჯდომარემ, ირაკლი კობახიძემ განუცხადა.

„ეს მეტყველებს მათ პოლიტიკურ მიზნებზე: თვითონ არ სურთ გამჭვირვალობა და მათი ფინანსური საქმიანობა ბუნდოვანი უნდა დარჩეს. დღეს ვერავინ იტყვის, თუ ვინ, რისთვის და საიდან იღებს დაფინანსებას. ეს არის სამწუხარო მოვლენა, არასამთავრობო ორგანიზაციებთან დაკავშირებით გვაქვს ასეთი მოცემულობა. ამ დროს, როდესაც თვითონ გაურბიხარ გამჭვირვალობას და ითხოვ მეტ გამჭვირვალობას საჯარო მოხელეებისგან, ეს არის ორმაგი სტანდარტი, ძალიან რბილად რომ ვთქვათ“, – აცხადებს კობახიძე.