„ევროკომისიის მიერ საქართველოსთვის დადებითი რეკომენდაციის გაცემამ მძიმე მდგომარეობაში ჩააგდო „რუსული პროპაგანდა“, ვინაიდან ევროპა შეუქცევადი პროცესია და ეს ჩვენი არჩევანია. ახლა გინდათ, რომ თქვენც გადმოხვიდეთ ამ ნათელ მხარეს. მანამდე 18 თვის განმავლობაში ვხედავდით აღვირახსნილ კამპანიას, რომ ევროკავშირი სათაგურია, თავი ძალით შეგვაყოფინეს, ევროკავშირს ჩალის ფასი აქვს, არაფერს არ იძლევა და ასე შემდეგ – ეს ფართომასშტაბიანი პროპაგანდა დამარცხდა, ეს ყველაფერი არის ქართველი ხალხის მონდომებითა და დამსახურებით, რომელიც არ აჰყვა პროპაგანდას, რომ თურმე დასავლეთი არის მტერი და რუსეთი არის მეგობარი“, – ამის შესახებ საპარლამენტო ოპოზიციის წარმომადგენელმა პაატა მანჯგალაძემ პლენარულ სხდომაზე განაცხადა.

მისივე თქმით, ქართველი ხალხი ძალიან კარგად არჩევს მტერს და მოყვარეს და სწორედ ამის გამოხატულებაა, რომ საქართველო ელოდება ევროპული საბჭოსგან დადებით რეკომენდაციას.

„რადგან არ არსებობს იმაზე მეტი მშვიდობა და უსაფრთხოება, რომელიც არის გარანტირებული ევროპით და ნატო-თი და საქართველოსაც აქვს რეალური შესაძლებლობა, რომ გახდეს ამ თანამეგობრობის ნაწილი“, – განაცხადა პაატა მანჯგალაძემ.

მისივე თქმით, საქართველოს ევროკავშირსა და ნატო-ში შეყვანა შეუძლია მხოლოდ კოალიციურ მთავრობას.

„ვერანაირ ევროპას თქვენ ვერ მოუტანთ საქართველოს, ამიტომ გამოსავალი მარტივია – პროდასავლური ოპოზიციის მოსვლა. ორი თვე სჭირდება ყველა იმ რეფორმის მიღებას, რომელიც საქართველოს გაუხსნის პერსპექტივას გახდეს ევროპის ნაწილი. არც კი მოვიკითხავთ თქვენ სად იქნებით, რას გააკეთებთ, მთავარია ხელი არ შეგვიშალოთ“, – მიმართა პაატა მანჯგალაძემ საპარლამენტო უმრავლესობას.

ერთი კაცი, ის ჯიგარი ევროპელებს რომ ძარცვავს [კეზერაშვილი], იქიდან დირიჟორობს და ჩვეულებრივ მასხარად ჰყავს დაქირავებული ჩემი „ხაბე“. რაღაც შტერობებს აკეთებინებს, – ამის შესახებ პარლამენტის რეგიონული პოლიტიკისა და თვითმმართველობის კომიტეტის თავმჯდომარის პირველმა მოადგილემ, ირაკლი ზარქუამ ​„ნაციონალურ მოძრაობაში“ არსებულ დაპირისპირებაზე განაცხადა.

ზარქუას თქმით, დავით კეზერაშვილს ლევან ხაბეიშვილი მასხარად ჰყავს დაქირავებული.

„მტრისას – ასე იტყვიან ხოლმე ჩვენთან იმაზე, რაც ხდება „ნაციონალურ მოძრაობაში“. ჩვეულებრივი ბარდაგია. ბატონ გუბაზს [სანიკიძეს] უყვარს ეს სიტყვა. ვინ – ვისთან, ვინ – როგორ, რატომ, რანაირად, სად მიდიოდა [გაუგებარია]. ერთი კაცი, ის ჯიგარი ევროპელებს რომ ძარცვავს [კეზერაშვილი], იქიდან დირიჟორობს და ჩვეულებრივ მასხარად ჰყავს დაქირავებული ჩემი „ხაბე“. რაღაც შტერობებს აკეთებინებს. გაკოტრებულ, მწვალებელთა პარტიას [„ნაციონალური მოძრაობა“] ჩაუყენეს „ხაბე“. რა უნდა ქნას ახლა, რეიტინგი არ აქვს პარტიას „ხაბე“ ხომ არ აამოძრავებდა?!“ – აღნიშნა ზარქუამ.

აფხაზეთის ოკუპირებულ ტერიტორიაზე რუსული სამხედრო ბაზის მშენებლობის პროექტი სრულიად უკანონო და მიუღებელია, – ამის შესახებ საქართველოში ევროკავშირის ელჩმა პაველ ჰერჩინსკიმ განაცხადა.

როგორც ელჩმა აღნიშნა, პასუხი იმაზე, რაც საქართველოს ოკუპირებულ რეგიონებში ხდება, საქართველოს ხელისუფლებამ უნდა გადაწყვიტოს.

„ევროკავშირის პოზიცია ძალიან ნათელია. ჩვენ მხარს ვუჭერთ საქართველოს დამოუკიდებლობას, საქართველოს სუვერენიტეტს და საქართველოს ტერიტორიულ მთლიანობას. პასუხი იმაზე, თუ რაც ხდება საქართველოს ოკუპირებულ რეგიონებში, საქართველოს ხელისუფლებამ უნდა გადაწყვიტოს. რა თქმა უნდა, აფხაზეთის ოკუპირებულ ტერიტორიაზე რუსული სამხედრო ბაზის მშენებლობის პროექტი სრულიად უკანონო და მიუღებელია“, – აღნიშნა საქართველოში ევროკავშირის ელჩმა.

ხალხი ფიქრობს – „კაცო, ამ რუსეთის გავლით ევროპა აღარ გაგვიგიაო“, ვეღარ ხვდებიან უკვე რაშია საქმე, ოპოზიციის მომხრეებიც დაბნეულები არიან,- ამის შესახებ ფრაქცია „ქართული ოცნების“ თავმჯდომარე მამუკა მდინარაძემ განაცხადა.

მისი თქმით, ოპოზიციის გეგმა, რომ „ქართული ოცნება“ რუსულ ხელისუფლებად წარმოეჩინა, ჩავარდა.

„ჩვენი მხრივ ვუერთდებით ევროკავშირის ელჩის განცხადებას და ჩვენც მოვუწოდებთ (ოპოზიციას ერთობლივად მუშაობისკენ), თუმცა, პოზიტიური მოლოდინი არ გვაქვს. მათ შეუძლიათ არაფერი ქნან, საერთოდ გაჩერდნენ, ამითაც კი დაეხმარებიან ხელისუფლებას პრიორიტეტების შესრულებაში. თუმცა, მათი წარსული ქმედებებიდან გამომდინარე, გვაქვს მოლოდინი, რომ სიტყვით თითქოსდა იზრუნებენ პრიორიტეტების შესრულებაზე, საქმით კი დაიქირავებენ ლობისტებს და საბოტაჟის რეჟიმში იქნებიან. თუმცა, მათი გეგმები ჩავარდა. ჩავარდა ეს პიარული გარუსების გეგმა ხელისუფლების, ქვეყნის, საზოგადოების არჩევანის, რადგან რუსეთისკენ მიაქანებთ ქვეყანასო და ამ დროს შემდეგ ეტაპზე გადავდივართ დაწყებული ასოცირების შეთანხმებით, ვიზალიბერალიზაციით და კანდიდატის სტატუსამდე მოვედით, ამ გზაზე დავდივართ და მიაქანებთ ქვეყანას რუსეთისკენო. ეს ხალხი ფიქრობს – „კაცო, ამ რუსეთის გავლით ევროპა აღარ გაგვიგიაო“, ვეღარ ხვდებიან უკვე რაშია საქმე, მათი მომხრეებიც დაბნეულები არიან. გარუსების გეგმა აბსოლუტურად ჩავარდნილია, აბსოლუტურად გაცვეთილი, გოიმური მესიჯია და ამ დროს მათგან პოზიტიური მოლოდინი ვერ იქნება, მაგრამ როგორც მინიმუმ, იქნებ, ხელი მაინც არ შეგვიშალონ“, – განაცხადა მდინარაძემ.

ნიკა მელია ფიზიკურად როგორ დარჩება „ნაციონალურ მოძრაობაში“, აღარ მესმის. შეანგრევს ოფისის კარს და თავის კაბინეტში დაჯდება? ცალკე გასვლა მოუწევს. აჯობებდა, ეს გადაწყვეტილება თვითონ მიეღო, – ამის შესახებ „გირჩის“ წევრმა, ჰერმან საბომ საქართველოს პირველ არხს განუცხადა.

ჰერმან საბოს თქმით, „ნაციონალურ მოძრაობაში“ პრობლემები ღრმავდება.

„არ ვიცი, საბოლოოდ რა ბედი ეწევა „ნაციონალურ მოძრაობას“, მაგრამ პრობლემები, რომლებიც მათ აქვთ, უფრო და უფრო ღრმავდება. ეს იმის შედეგია, რომ საჯაროდ არ საუბრობენ თუნდაც იმ პრობლემებზე, რომლებზეც ნიკა მელია, ამდენი ხანია, აპელირებს. რეალურად ხომ არაფერი ვიცით, მელიასთან რა პრეტენზიები აქვთ. პასუხისმგებლობის არაღება საბოლოოდ მიგვიყვანს ამ შედეგამდე, რა შედეგიც აქვს „ნაციონალურ მოძრაობას“. არ ვიცი, რამდენად მოახერხებენ ერთად დარჩენას. მიუხედავად იმისა, რომ სამი წევრი გარიცხეს, ალბათ ეს ხალხი პარტიაში დარჩება და პრეტენზია ექნებათ გარიცხვის ამ ფორმასთან დაკავშირებით.

ნიკა მელია ფიზიკურად როგორ დარჩება „ნაციონალურ მოძრაობაში“, აღარ მესმის. შეანგრევს ოფისის კარს და თავის კაბინეტში დაჯდება? ცალკე გასვლა მოუწევს. ალბათ აჯობებდა, რომ ეს გადაწყვეტილება თვითონ მიეღო და ლაპარაკი დაეწყო კონკრეტულ თემებზე, რატომ, ვის გამო, რის გამო წამოვიდა „ნაციონალური მოძრაობიდან“ და არა ახლა, გარიცხული რომ დაიწყებს რაღაცაზე ლაპარაკს. ცოტა განაწყენებულის ლაპარაკს უფრო ჰგავს, ვიდრე საქმიან საუბარს“, – განაცხადა ჰერმან საბომ.

რაც არ უნდა იყოს, მთავრობა, ლიდერები მოდიან-მიდიან და რჩება საზოგადოება და თუ საზოგადოება თავის თავში არის დარწმუნებული, თუ იცის, რეალურად, რა მომავალი უნდა თავისი შვილებისთვის, შემდეგი თაობისთვის, მაშინ ის საზოგადოება მიაღწევს მიზანს, – ამის შესახებ პრეზიდენტმა სალომე ზურაბიშვილმა ყვარელში, „ევროკლუბში“

ხელმოწერების კამპანიის ,,ჩვენი ხმა ევროპას” ფარგლებში გამართულ ღონისძიებაზე სიტყვით გამოსვლისას განაცხადა.

მისივე თქმით, სამოქალაქო ჩართულობის გარეშე არც ერთი ქვეყანა არ დგას თავის მყარ საფუძველზე.

„იმისთვის, რომ ჩვენი მიზანი მიღწეული იყოს, საჭიროა ყველას ჩართულობა. რაც არ უნდა იყოს, მთავრობა, ლიდერები მოდიან-მიდიან და რჩება საზოგადოება და თუ საზოგადოება თავის თავში არის დარწმუნებული, თუ იცის, რეალურად, რა მომავალი უნდა თავისი შვილებისთვის, შემდეგი თაობისთვის, მაშინ ის საზოგადოება მიაღწევს მიზანს. ეს იწყება ყოველ ქალაქში, სოფელში, თემში, საიდანაც წამოწყებული ყველა ინიციატივა არის ძლიერი. საქართველოს ისტორია მე ძალიან კარგად ვიცი. ხშირად კითხვას ვსვამთ, როგორ გადავრჩით და როგორ მოვედით დღემდე? – იმიტომ გადავრჩით, რომ ყველა ადგილს ჰქონდა თავისი ძალა, თავისი იდენტობა, თავისი თავდაჯერებულობა…

თურმე ყვარელში ბიბლიოთეკაც არ არის, ეს ძალიან შემაშფოთებელია. ის, რომ დღეს აქ ადგილობრივი მმართველობა არ მოსულა სხვადასხვა მიზეზის გამო, ესეც გამაოგნებელია მაშინ, როცა ასეთი საზოგადოება ჩამოვიდა თბილისიდან და პატივს სცემს თქვენს წამოწყებას. თქვენი წამოწყება არის პირველ რიგში ადგილობრივი ინიციატივა, ახალგაზრდების ინიციატივა, სამოქალაქო ჩართულობა, რომლის გარეშე არც ერთი ქვეყანა არ დგას თავის მყარ საფუძველზე. რაც შეგვიძლია თქვენს გვერდით ვიდგებით“, – განაცხადა პრეზიდენტმა.

ჩვენ გარკვეული პოლიტიკა გვაქვს სანქციებთან დაკავშირებით, არ ვაწესებთ სანქციებს, მაგრამ სანქციების გვერდის ავლასაც არ ვუშვებთ, – ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა.

მისივე თქმით, ხელისუფლება თავიდან ბოლომდე იცავს იმ პოლიტიკას, რომელიც გაცხადებული აქვს.

„ჩვენ გარკვეული პოლიტიკა გვაქვს სანქციებთან დაკავშირებით. სანქციებს არ ვაწესებთ, მაგრამ სანქციების გვერდის ავლასაც არ ვუშვებთ. ამ პოლიტიკის ფარგლებში იდება ნებისმიერი გარიგება. სადმე გადახვევა თუ იქნება, ნებისმიერმა სუბიექტმა უნდა წარმოადგინოს მტკიცებულება, მაგრამ გადახვევა თუ არ არის, პრეტენზიებსაც ვერ ექნება საფუძველი. ჩვენ თავიდან ბოლომდე ვიცავთ იმ პოლიტიკას, რომელიც გაცხადებული გვაქვს“, – განაცხადა ირაკლი კობახიძემ.

ბოლო პერიოდში სალომე ზურაბიშვილმა ამოიჩემა, ჩვენი ხმა ევროპასო. მის ხმას ევროპა ვერ გაიგებს. კონსტიტუციის დამრღვევი პრეზიდენტის ხმას ევროპა ვერ გაიგებს, – ამის შესახებ მოძრაობა „ხალხის ძალის“ წევრმა, გურამ მაჭარაშვილმა განაცხადა.

მაჭარაშვილის თქმით, დღის წესრიგიდან გამომდინარე, სალომე ზურაბიშვილის ხმას გაიგებს რადიკალური ოპოზიცია.

„მის ხმას მხოლოდ ნიკა გვარამია გაიგებს, რომლის ხმა გაიგო და ციხიდან გამოუშვა. მის ხმას გაიგებს რადიკალური ოპოზიციაც, რომელიც მის დღის წესრიგშია. მის ხმას ვერც ქართველი ხალხი და ვერც ევროპა ვერ გაიგებს. სჯობს, დროზე მოეგოს გონს და გაჩერდეს, სულ რამდენიმე თვე აქვს დარჩენილი და შეირგოს. სალომე ზურაბიშვილს ემიგრანტები არ უშველის. სჯობს, საარჩევნო კანონმდებლობას ჩახედოს, სადაც წერია, რომ ხმის მიცემა უზრუნველყოფილია და გაყალბება ნულოვან დონეზეა დაყვანილი. ამას საერთაშორისო აუდიტი ამბობს. ვის დაუჯერებს ევროპული საზოგადოება, კონსტიტუციის დამრღვევ ზურაბიშვილს თუ საერთაშორისო აუდიტს?“, – განაცხადა გურამ მაჭარაშვილმა.