„ნაცმოძრაობაში“ პარტიის თავმჯდომარის არჩევნებს ისეთი სიხშირით ატარებენ, რომ, მგონი, პარლამენტის მორიგი არჩევნები საერთოდ გამორჩებათ, – ამის შესახებ „ხალხის ძალის“ წევრმა, გურამ მაჭარაშვილმა განაცხადა.

„ნაციონალური მოძრაობის“ მიმართ რეკომენდაცია მაქვს – თავმჯდომარის ერთი პოსტი დაამატონ, ლუწ რიცხვებში ხაბე იქნება, კენტ რიცხვებში – მელია, შაბათ-კვირას კი ხელჩაკიდებულებმა იარონ ხან კვიპროსში, ხან „ვივამედში“. ასე ერთიანად პარტიას გადაარჩენენ და არჩევნებამდე მივლენ. სხვა გამოსავალი არ არის, თუმცა ერთი მაინც არის: თავმჯდომარის პოსტი გააუქმონ და თავმჯდომარის სკამი მავზოლეუმში, სააკაშვილთან მიიტანონ, სადაც დახვდებათ ბოტასები და ამ თანამდებობისთვის ბრძოლა აღარ იქნება“, – განაცხადა მაჭარაშვილმა.

„ნაციონალურ მოძრაობაში“ პოლიტიკური საბჭოს სხდომა იმართება. პარტიამ პოლიტიკური საბჭოს გაფართოების გადაწყვეტილება მიიღო. როგორც „ნაცმოძრაობის“ წევრები აცხადებენ, ყველა, ვინც მიხეილ სააკაშვილის ერთობის მანიფესტს გაიზიარებს, საბჭოს შემადგენლობას დაემატება.

ყველა რედაქციაში, მათ შორის, საქართველოშიც არის ერთი-ორი უნიჭო, რომელიც თავის თავს ჟურნალისტს უწოდებს და ამ დროს არის თხუპნია – ურჩევნიათ ენას კბილი დააჭირონ, კალმები ჩაიდონ ჯიბეებში, – ამის შესახებ ჟურნალისტებთან საპარლამენტო უმრავლესობის წევრმა ბექა ოდიშარიამ POLITICO-ს სტატიასთან დაკავშირებით განაცხადა, სადაც ბიძინა ივანიშვილი ე.წ. ამრევი პირების სიაშია და ოლიგარქად არის მოხსენიებული.

ოდიშარია მიიჩნევს, რომ ავტორს ან წარმოდგენა არ აქვს ჟურნალისტიკაზე ან სტატია მილიონებით არის დაფინანსებული. ოდიშარია ასევე არ გამორიცხავს მის მიერ დასახელებული ორივე მიზეზის არსებობას.

„ვიცნობ ამ უნიჭო, აბსოლუტურად არაკორექტულ და არაპროფესიონალ პუბლიკაციას, რომელიც დარწმუნებული ვარ, განპირობებულია ერთი ან მეორე მიზეზით ან ორივეთი ერთად. ერთი არის ის, რომ ადამიანი (ავტორი) არის გაუთვითცნობიერებელი და ყველა რედაქციაში, მათ შორის, საქართველოშიც არის ერთი- ორი უნიჭო, არაპროფესიონალი, რომელიც თავის თავს ჟურნალისტს უწოდებს და ამ დროს არის თხუპნია და წარმოდგენა არ აქვს ჟურნალისტიკაზე ანდა დაფინანსებულია მილიონებით, რომლითაც ფინანსდებოდა სააკაშვილის გამოცხადებული სიკვდილის ვითომცდა ეს ქრონიკა. ფულს იხდის ხალხი, რომ დაზიანდეს ქვეყანა. ჰო, ბიძინა ივანიშვილი თურმე ქართველი ხალხის საწინააღმდეგოდ მიგვიძღვის რუსეთისკენ და ამ დროს მისი გაპრემიერების შემდგომ საქართველომ მიიღო ვიზალიბერალიზაცია, ასოცირების ხელშეკრულება, ღრმა და ყოვლისმომცველი ვაჭრობის შეთანხმება, ახლა კანდიდატის სტატუსს მივიღებთ. Politico- ს, ვიღაცის მიერ ნაყიდ ხელის ბიჭს თუ გოგოს თუ რედაქციის იმ ნაწილს, რომელიც წარმოდგენას არ იქონიებს და არც აინტერესებს საქართველოს ბედ-იღბალი, ნამდვილად სერიოზულად ვერ აღვიქვამთ. ურჩევნიათ ენას კბილი დააჭირონ, კალმები ჩაიდონ და შეინახონ თავიანთ ჯიბეებში,”- განაცხადა ოდიშარიამ.

„ნაციონალური მოძრაობა“ იმდენად ძლიერი ორგანიზმია, რომ კონკრეტული ერთი ადამიანი ან ადამიანთა ჯგუფი ვერ მოერევა იმ წარმატებას, რომლისკენაც მივდივართ, – ამის შესახებ „ნაციონალური მოძრაობის“ თავმჯდომარე, ლევან ხაბეიშვილმა პოლიტსაბჭოს სხდომის დასრულების შემდეგ განაცხადა.

ლევან ხაბეიშვილის თქმით, ვისაც პარტიასთან ერთად ბრძოლა უნდა, კარი ყველასთვის ღიაა.

„ყველა ადამიანს აქვს ინდივიდუალურად მოქმედების უფლება. ჩვენი კარი ღიაა, ვისაც უნდა პარტიასთან ერთად ბრძოლა, იბრძოლოს პარტიასთან ერთად. ვინც „არც იქანა მიიღონ, არც აქანა მიიღონ“ და არსად არ უნდათ, ამას მე, ლევან ხაბეიშვილი ვერ მოვაგვარებ.

ძალიან მარტივს რამეს გეტყვით, ყველა ადამიანი მნიშვნელოვანია, მაგრამ მთავარი ინსტრუმენტი ივანიშვილის, კორუფციის და რუსული ოცნების დამარცხებისთვის არის გამარჯვების კოალიცია „ნაციონალური მოძრაობა“. კონკრეტული ადამიანები მაწუხებს თუ არა? ყველა ადამიანი მაწუხებს აბსოლუტურად და მინდა, რომ ყველა ერთად ვიყოთ, თუმცა თუ მათ ეს არ სურთ, ეს დაგვაზიანებს თუ არა? ყველას კარგად უნდა ესმოდეს, რომ „ნაციონალური მოძრაობა“ იმდენად ძლიერი ორგანიზმია, რომ კონკრეტული ერთი ადამიანი ან ადამიანთა ჯგუფი, როცა იდეოლოგიაზე და ღირებულებებზე ვსაუბრობთ, ვერ მოერევა ამ წარმატებას, რომლისკენაც მივდივართ ჩვენ. ამიტომ როცა კონკრეტულ სახელსა და გვარებზე ვლაპარაკობთ, მათზე მნიშვნელოვანი ადამიანებიც არიან სხვადასხვა რეგიონში და ქალაქებში, რომლებიც ხმის ამოუღებლად 24 საათი მუშაობენ. ამიტომ ჩვენი საქმე ის კი არ არის, რომ კონკრეტულ ადამიანებს ნერვებზე მასაჟები ვუკეთოთ, ჩვენი საქმეა ბრძოლა და ამას ვაკეთებთ. ვისაც უნდა მოგვყვება. სხვა ბრძოლის ხერხს ირჩევს? ღმერთმა გაუმარჯოს. ჩვენ მხოლოდ დავეხმარებით ყველას და საარჩევნო უბნებზე ჩვენს ინფრასტრუქტურას ვთავაზობთ. დავიცვათ ყველას ხმა“, – განაცხადა ლევან ხაბეიშვილმა.

ლევან ხაბეიშვილის განცხადებით, უახლოეს პერიოდში კიდევ შეიკრიბება პოლიტსაბჭო და 23 ნოემბრის მანიფესტს კონკრეტული ადამიანები შემოუერთდებიან, მათ შორის მოლაპარაკებები მიმდინარეობს პოლიტსაბჭოს ყოფილ წევრებთან.

„23 ნოემბერს ძალიან კარგი ღონისძიება ჩატარდა, რომელიც ეძღვნებოდა „ვარდების რევოლუციას“ 20 წლისთავს. ზოგი კონკრეტული ლიდერი დაიმალა ამ დროის განმავლობაში. ყველა მიხვდება რაზეც ვსაუბრობ.

ამის შემდეგ ჩვენ ვმუშაობდით ამ კონკრეტულ ადამიანებთან, ვინც დღეს თქვენს წინაშე იყო და მათ აქვთ განსხვავებული პოზიციები, თუმცა ყველა ერთად ვაპირებთ ბიძინა ივანიშვილის წინააღმდეგ ბრძოლას. ყველა ადამიანთან იყო საჯარო და პირადი კომუნიკაცია. ვინც თვლის, რომ ბიძინა ივანიშვილის წინააღმდეგ უნდა იბრძოლოს, დღეს თქვენ აქ ნახეთ ეს ადამიანები. გარწმუნებთ, უახლოეს პერიოდში, შემდეგ პოლიტიკურ საბჭოზე კიდევ კონკრეტული ადამიანები ამ მანიფესტს შემოუერთდებიან. მიმდინარეობს მოლაპარაკებები პოლიტიკური საბჭოს ყოფილ წევრებთან. კარი არის ღია.

ღია კარის მტვრევას ყველა უნდა შეეშვას. „ნაციონალური მოძრაობა“ შანტაჟს არ ექვემდებარება. ვისაც უნდა ბიძინა ივანიშვილის წინააღმდეგ ბრძოლა, შეუძლიათ ეს აკეთონ „ნაციონალურ მოძრაობასთან ერთად“, – განაცხადა ლევან ხაბეიშვილმა.

საქართველოს პრეზიდენტი დღეს წნორში, „ცოდნის კაფეს“ ესტუმრა და ახალგაზრდებსა და ადგილობრივ მოსახლეობას შეხვდა, რომლებიც ხელმოწერების კამპანიას „ჩვენი ხმა ევროპას“ შეუერთდნენ და კიდევ ერთხელ გამოხატეს მხარდაჭერა საქართველოს ევროპული გზის მიმართ.

„ყველას ძალიან დიდ მადლობას გიხდით, რომ აქ ხართ და აქტიურობთ „ცოდნის კაფეში“. აქ ჩამოსვლა გადავწყვიტე, რადგან სწორედ ის ადგილებია აღსანიშნავი, სადაც ადგილობრივი მოსახლეობა საკუთარი ინიციატივით იწყებს მოქმედებას.

თავისთავად მნიშვნელოვანია, თვითონ „ცოდნის კაფის“ დაარსება, რაც იმის ნიშანია, რომ აქ ცოცხალი, მოქალქეობრივი წამოწყებებია, ამისთვის ძალიან დიდი მადლობა თქვენ და არა მხოლოდ თქვენ, ყველას, ვინც ამაში მონაწილეობს, ახალგაზრდებსა თუ ხანშიშესულებს. აქ ყველა გულით ახალგაზრდაა და გულით ახალგაზრდობა სწორედ ამას ნიშნავს, როცა მზად ხართ გაიზიაროთ ახალი წამოწყება და ჩაერთოთ მასში.

ჩვენ აქ, თქვენთან ერთად ვაგრძელებთ კამპანიას „ჩვენი ხმა ევროპას“ რომლითაც გვინდა, რომ ევროკავშირს მივაწვდინოთ არამხოლოდ ხელისუფლებისა თუ პოლიტიკური პარტიების ხმა, არამედ მოქალაქეების ხმა, რადგან ევროპა, პირველ რიგში, იმისთვისაა, რომ ის კეთილდღეობა, რისთვისაც გვინდა ევროპა, ევროპის სტანდარტები და ევროპის წესები მოქალაქეებს შეეხოს, შემოვიდეს ჩვენთან და არა ის, რომ ჩვენ გადავიდეთ ევროპაში. ჩვენ შევალთ ევროპაში როგორც სახელმწიფო, მაგრამ ევროპა იმას ნიშნავს, რომ ყველა ადგილზე და პირველ რიგში, რეგიონსა და სოფელში, სადაც თავისუფალი ადამიანები ცხოვრობენ, იქ დამკვიდრდეს ის სტანდარტები, რისთვისაც მოგვწონს ევროპა, რისთვისაც ევროპაში  მიდიხართ სასწავლებლად და მიგაჩნიათ, რომ იქ შეიძლება შეიძინოთ გამოცდილება და თავისუფლება, რასაც შემდეგ თქვენს სოფელს, ქალაქს და ქვეყანას მოახმართ.

მე ვთქვი სიტყვა –  „თავისუფლება“ და ალბათ, ეს არის ის პირველი ღირებულება, რომელიც გვაერთიანებს ევროპასთან. თუ საქართველო დღემდე მოვიდა და დღემდე ასე ძლიერად დგას, რადგან ყოველთვის იყო თავისუფლებისმოყვარე, ჩვენ არასოდეს არ უნდა დავთმოთ ეს თავისუფლება, რადგან თავისუფალი ადამიანის გარდა, არაფერს არ აქვს ფასი. თავისუფალი ადამიანი არის ის, ვინც შემოქმედი ადამიანია და ჩვენ როცა ვსაუბრობთ ჩვენს კულტურაზე, იმიტომ ვაფასებთ მას, რომ იყო თავისუფალი შემოქმედება და ამან შექმნა ქართული კუტლურა. ეს არის ის თავისუფლება და ის თავისუფლების სიყვარული, რომელმაც არავის დაუთმო ეს კულტურა. თავისუფალი ქიზიყი – ტყუილად არ არის ნათქვამი – იბრძოდნენ ბოლომდე იმისათის, რომ დაეცვათ ჩვენი იდენტობა და კულტურა. ეს ძალიან მნიშვნელოვანია და მინდა, რომ ახალგაზრდებმა კარგად გაიგონ, რომ არ არის არანაირი წინააღმდეგობა ჩვენს კულტურას, ჩვენს იდენტობასა და ევროპულ ღირებულებებს შორის. პირიქით – ეს სრული თავსებადობაა – ერთი მეორეს აძლიერებს“, – განაცხადა სალომე ზურაბიშვილმა.

მისივე თქმით, ევროკავშირი ის გაერთიანებაა, სადაც ყველაზე მეტადაა დაცული სხვადასხვა ქვეყნის იდენტობა, სხვადასხვა ქვეყნის კულტურა, სხვადასხვა ქვეყნის ენა და ასევე, რეგიონული ენები.

„ეს ყველაფერი არის ის, რაც ქმნის ევროპულ მრავალფეროვნებას, რადგან ყველას ერთი მეორის მიმართ აქვს პატივისცემა.

ეს არის სახელმწიფოებისა და ერების გაერთიანება, სადაც არცერთი არ შესულა ძალითა და ძალადობით და ჩვენი შესვლაც ასეა განპირობებული – რომ ეს არის ჩვენი, თავისუფალი არჩევანი. არ იქნება ეს ჩვენი არჩევანი? არ შევალთ! მაგრამ დღეს, ქართველი ხალხი და კიდევ უფრო საქართველოს ახალგაზრდობა ადასტურებს, რომ ჩვენ გვინდა ევროპა როგორიც არის და არა რაღაც სხვა თავსმხოვეული იდეოლოგია, ამიტომ ეს  პირველ რიგში, თქვენი დასაცავია, თქვენი გასაკეთებელია. მე ამ შემთხვევაში, ამ კამპანიის წამომწყები ვარ, რადგან ვიღაცამ უნდა წამოიწყოს. მე ასევე ვიცი სხვადასხვა ინიციატივები, რომლებიც სხვადასხვა ფორმითა წამოწყებული სრულიად თავისუფლად. ყველა ინიციატივა, რომელიც ამ კუთხით იქნება ნამდვილად მისასალმებელია. „ცოდნის კაფე“ თავიდანვე ჩერთო  და მონაწილეობს ხელმოწერების კამპანიაში „ჩვენი ხმა ევროპას“, რაც ასევე მნიშვნელოვანია. მე ძალიან ოპტიმისტი ვარ და მიმაჩნია, რომ ეს არის ის საკითხი, რომელზეც ქვეყანაშსა და საზოგადოებაში ეროვნული თანხმობა არსებობს და ამიტომ ეს გვაძლიერებს და გვაძლევს იმედს, რომ ასე გავაგრძელებთ“,  – განაცხადა საქართველოს პრეზიდენტმა.

სამეცნიერო კონფერენცია -თემაზე “საქართველოს ტერიტორიის სამხედრო საინჟინრო უზრუნველყოფის შესაძლებლობების ამაღლება ოპერატიული სივრცის სპეციფიკის გათვალისწინებით”

მიმდინარე წლის 29 ნოემბერს, ვეტერანების საქმეთა სახელმწიფო სამსახურის, საქართველოს თავდაცვის სამინისტროს, სამხედრო სამეცნიერო კვლევითი ინსტიტუტის და საქართველოს ტექნიკური უნივერსიტეტის, ნაგებობების, სპეციალური სისტემების და საინჟინრო უზრუნველყოფის ინსტიტუტის ორგანიზებით, ვეტერანების საქმეთა სახელმწიფო სამსახურში, გაიმართა სამეცნიერო კონფერენცია -თემაზე “საქართველოს ტერიტორიის სამხედრო საინჟინრო უზრუნველყოფის შესაძლებლობების ამაღლება ოპერატიული სივრცის სპეციფიკის გათვალისწინებით.”

კონფერენცია, ვეტერანების საქმეთა სახელმწიფო სამსახურის დირექტორის პირველმა მოადგილემ, ნიკოლოზ კვეზერელმა გახსნა და სტუმრებს მისასალმებელი სიტყვით მიმართა. კონფერენციაზე მომხსენებლები გახლდნენ გენერალ-მაიორი, თენგიზ შუბლაძე, გენერალ-ლეიტენანტი, დავით თევზაძე, გენერალ-ლეიტენანტი, ჯონი ფირცხალაიშვილი, ეროვნული გვარდიის უფროსის მოადგილე, კობა ახვლედიანი, პოლკოვნიკი, გიორგი დანელია, ბრიგადის გენერალი, გიორგი სურმავა, სამხედრო მეცნიერებათა დოქტორი, ვიცე-პოლკოვნიკი, ირაკლი ბუაშვილი, საქართველოს მეცნიერებათა აკადემიის აკადემიკოსი, გენერალ-მაიორი, ელგუჯა მეძმარიაშვილი.

როგორც ვეტერანების საქმეთა სახელმწიფო სამსახურის დირექტორის მრჩეველმა, ვლადიმერ იმნაძემ განაცხადა, მსგავსი შინაარსის სამეცნიერო კონფერენციები მომავალშიც ჩატარდება და ვეტერანების საქმეთა სახელმწიფო სამსახური მასში აქტიურად იქნება ჩართული.

ანალიზი მარტივი გასაკეთებელია – „ნაციონალური მოძრაობა“ როგორც დიდი პარტია დასრულებულია. იმ პერიპეტიებს, რაც მთავარ ოპოზიციურ პარტიაში განვითარდა, საჩუქარსაც ვერ დაარქმევ, გვეუხერხულება კიდეც კომენტარების გაკეთება. მე ერთი პირადი თემა მაქვს, რომ არ უნდა დაიჩაგროს ჩემი „ხაბე“, – ამის შესახებ „ქრონიკის“ ეთერში რეგიონული პოლიტიკისა და თვითმმართველობის კომიტეტის თავმჯდომარის პირველმა მოადგილემ, ირაკლი ზარქუამ განაცხადა.

„ბელადი რომ იქიდან გამოსცემს ხან ბრძანებებს და ხან მანიფესტს, მერე განსხვავებული ინტერპრეტაციით საუბრობენ პარტიაში არსებული დაჯგუფებები. რეალობა ისაა, რომ ჩემი „ხაბე“ გამოიყენეს. ის, რომ შენს პარტიაში, როდესაც მთელი ეს წლები ერთად მოდიხართ, მიტინგებზე, დარში თუ ავდარში, და ამის შემდეგ ფარულად ჩამოაგდებ [თავმჯდომარეს], ეს რაზე მეტყველებს? ამაზე ხელი მოაწერინეს „ხაბეს“. მეორე თემა ეხება ნიკა მელიას: „ხაბე“ რომ ჩამოგაგდებს და მაინც იმ პარტიაში იქაჩები და არ ანებებ თავს, აქ შენი, როგორც პოლიტიკოსის ამბავი, დამთავრებულია. რეალურად ხომ ვიცით, რატომ კეთდება ეს – „ნაცმოძრაობის“ თავმჯდომარის თანამდებობას ამზადებენ სხვისთვის, სავარაუდოდ, პეტრე ცისკარიშვილისთვის. პეტრემ ამის გაკეთება ვერ იკადრა და „ხაბემ“ მოაწერა ხელი ამას. ერთმანეთს რაც მოუწყვეს: დასმენები, „ჩაშვებები“, კომპრომატების ომი – ეს ხომ „ნაციონალების“ ხელწერაა. ეს ორ თვეში მოხდება, სამ თვეში თუ 2024 წლის იანვარში, გარდამავალ ეტაპზე იყო ჩემი „ხაბე“ ამ თანამდებობაზე“, – აღნიშნა ზარქუამ.