„მესაფლავე“ თავიდან რომ იწერებოდეს, ლევან ხაბეიშვილს და „ნაციონალურ მოძრაობას“ მიეძღვნებოდა, – ამის შესახებ საპარლამენტო უმრავლესობის წევრმა, ბექა ოდიშარიამ განაცხადა.

ოდიშარია „ნაციონალურ მოძრაობას“ სთხოვს, ლევან ხაბეიშვილი პარტიაში დატოვონ.

„ლევან ხაბეიშვილი “ნაციონალურ მოძრაობას” უკანასკნელ ლურსმნებს ურტყამს პოლიტიკურ კუბოში. ამ ადამიანს სხვა გაქანება არ აქვს, ის ვერასოდეს იქნება შემკრები. ადამიანს, რომელსაც შეუძლია სხვებს ცილი დასწამოს და ეს ყველამ ჩვენს თავზე ვიგემეთ, ის მოუვა, რაც ლევან ხაბეიშვილს დაემართა.

„ნაციონალური მოძრაობის” მიმართ ერთი თხოვნა მაქვს – ლევან ხაბეიშვილი 2024 წლამდე არაფრით არ გაუშვან და არჩევნებს მასთან ერთად შეხვდნენ, რადგან მისი დამფინანსებელი არჩევნების შედეგების შეტყობის შემდეგ, მას ერთი ტყვიით დამუხტულ იარაღს შეუტანს, კაბინეტში დაუტოვებს და შემდეგ რა მოხდება, არ ვიცი, ეგ სერია ნანახი არ მაქვს,”- განაცხადა ოდიშარიამ.

„გირჩის“ ლიდერი იაგო ხვიჩია აცხადებს, რომ უცხოური აგენტების შესახებ კანონთან დაკავშირებით თბილისსა და ბრიუსელში სხვადასხვა საკითხზე მსჯელობდნენ.

„რომელ ქვეყნებშიც ის [უცხოურ აგენტებთან დაკავშირებული] კანონი არსებობს, არსებობს იმისთვის, რომ არის ლობიზმის მომაწესრიგებელი კანონი. მოგეხსენებათ, ჩვენთან ლობიზმი აკრძალულია, შესაბამისად, ევროპასა და საქართველოში ერთი და იმავე კანონის მიღება ფუნდამენტურად განსხვავდება, რადგან ერთგან [ევროპაში] დაშვებულია ის, რის მოსაწესრიგებლადაც ეს კანონი უნდა მიიღონ და მეორეგან აკრძალულია. თუ საქართველოში „ქართული ოცნება“ შემოიტანს პაკეტს, რითაც ლობიზმიც იქნება დაშვებული და თან ამ კანონსაც მოაყოლებენ, მხარს დავუჭერ“, – აღნიშნა ხვიჩიამ.

ე.წ. რუსულ კანონს ევროკომისია ახალ წლამდე დაამტკიცებს. უცხოური აგენტების შესახებ პროექტის დეტალები მიმდინარე კვირას გასაჯაროვდება. ეს რომ ის ვერსიაა, რომელიც ოპოზიციისა და მესამე სექტორის ნაწილმა საქართველოში მწვავედ გააკრიტიკა, ევროპაშიც ადასტურებენ.

„ნაცმოძრაობაში“ პარტიის თავმჯდომარის არჩევნებს ისეთი სიხშირით ატარებენ, რომ, მგონი, პარლამენტის მორიგი არჩევნები საერთოდ გამორჩებათ, – ამის შესახებ „ხალხის ძალის“ წევრმა, გურამ მაჭარაშვილმა განაცხადა.

„ნაციონალური მოძრაობის“ მიმართ რეკომენდაცია მაქვს – თავმჯდომარის ერთი პოსტი დაამატონ, ლუწ რიცხვებში ხაბე იქნება, კენტ რიცხვებში – მელია, შაბათ-კვირას კი ხელჩაკიდებულებმა იარონ ხან კვიპროსში, ხან „ვივამედში“. ასე ერთიანად პარტიას გადაარჩენენ და არჩევნებამდე მივლენ. სხვა გამოსავალი არ არის, თუმცა ერთი მაინც არის: თავმჯდომარის პოსტი გააუქმონ და თავმჯდომარის სკამი მავზოლეუმში, სააკაშვილთან მიიტანონ, სადაც დახვდებათ ბოტასები და ამ თანამდებობისთვის ბრძოლა აღარ იქნება“, – განაცხადა მაჭარაშვილმა.

„ნაციონალურ მოძრაობაში“ პოლიტიკური საბჭოს სხდომა იმართება. პარტიამ პოლიტიკური საბჭოს გაფართოების გადაწყვეტილება მიიღო. როგორც „ნაცმოძრაობის“ წევრები აცხადებენ, ყველა, ვინც მიხეილ სააკაშვილის ერთობის მანიფესტს გაიზიარებს, საბჭოს შემადგენლობას დაემატება.

ყველა რედაქციაში, მათ შორის, საქართველოშიც არის ერთი-ორი უნიჭო, რომელიც თავის თავს ჟურნალისტს უწოდებს და ამ დროს არის თხუპნია – ურჩევნიათ ენას კბილი დააჭირონ, კალმები ჩაიდონ ჯიბეებში, – ამის შესახებ ჟურნალისტებთან საპარლამენტო უმრავლესობის წევრმა ბექა ოდიშარიამ POLITICO-ს სტატიასთან დაკავშირებით განაცხადა, სადაც ბიძინა ივანიშვილი ე.წ. ამრევი პირების სიაშია და ოლიგარქად არის მოხსენიებული.

ოდიშარია მიიჩნევს, რომ ავტორს ან წარმოდგენა არ აქვს ჟურნალისტიკაზე ან სტატია მილიონებით არის დაფინანსებული. ოდიშარია ასევე არ გამორიცხავს მის მიერ დასახელებული ორივე მიზეზის არსებობას.

„ვიცნობ ამ უნიჭო, აბსოლუტურად არაკორექტულ და არაპროფესიონალ პუბლიკაციას, რომელიც დარწმუნებული ვარ, განპირობებულია ერთი ან მეორე მიზეზით ან ორივეთი ერთად. ერთი არის ის, რომ ადამიანი (ავტორი) არის გაუთვითცნობიერებელი და ყველა რედაქციაში, მათ შორის, საქართველოშიც არის ერთი- ორი უნიჭო, არაპროფესიონალი, რომელიც თავის თავს ჟურნალისტს უწოდებს და ამ დროს არის თხუპნია და წარმოდგენა არ აქვს ჟურნალისტიკაზე ანდა დაფინანსებულია მილიონებით, რომლითაც ფინანსდებოდა სააკაშვილის გამოცხადებული სიკვდილის ვითომცდა ეს ქრონიკა. ფულს იხდის ხალხი, რომ დაზიანდეს ქვეყანა. ჰო, ბიძინა ივანიშვილი თურმე ქართველი ხალხის საწინააღმდეგოდ მიგვიძღვის რუსეთისკენ და ამ დროს მისი გაპრემიერების შემდგომ საქართველომ მიიღო ვიზალიბერალიზაცია, ასოცირების ხელშეკრულება, ღრმა და ყოვლისმომცველი ვაჭრობის შეთანხმება, ახლა კანდიდატის სტატუსს მივიღებთ. Politico- ს, ვიღაცის მიერ ნაყიდ ხელის ბიჭს თუ გოგოს თუ რედაქციის იმ ნაწილს, რომელიც წარმოდგენას არ იქონიებს და არც აინტერესებს საქართველოს ბედ-იღბალი, ნამდვილად სერიოზულად ვერ აღვიქვამთ. ურჩევნიათ ენას კბილი დააჭირონ, კალმები ჩაიდონ და შეინახონ თავიანთ ჯიბეებში,”- განაცხადა ოდიშარიამ.

„ნაციონალური მოძრაობა“ იმდენად ძლიერი ორგანიზმია, რომ კონკრეტული ერთი ადამიანი ან ადამიანთა ჯგუფი ვერ მოერევა იმ წარმატებას, რომლისკენაც მივდივართ, – ამის შესახებ „ნაციონალური მოძრაობის“ თავმჯდომარე, ლევან ხაბეიშვილმა პოლიტსაბჭოს სხდომის დასრულების შემდეგ განაცხადა.

ლევან ხაბეიშვილის თქმით, ვისაც პარტიასთან ერთად ბრძოლა უნდა, კარი ყველასთვის ღიაა.

„ყველა ადამიანს აქვს ინდივიდუალურად მოქმედების უფლება. ჩვენი კარი ღიაა, ვისაც უნდა პარტიასთან ერთად ბრძოლა, იბრძოლოს პარტიასთან ერთად. ვინც „არც იქანა მიიღონ, არც აქანა მიიღონ“ და არსად არ უნდათ, ამას მე, ლევან ხაბეიშვილი ვერ მოვაგვარებ.

ძალიან მარტივს რამეს გეტყვით, ყველა ადამიანი მნიშვნელოვანია, მაგრამ მთავარი ინსტრუმენტი ივანიშვილის, კორუფციის და რუსული ოცნების დამარცხებისთვის არის გამარჯვების კოალიცია „ნაციონალური მოძრაობა“. კონკრეტული ადამიანები მაწუხებს თუ არა? ყველა ადამიანი მაწუხებს აბსოლუტურად და მინდა, რომ ყველა ერთად ვიყოთ, თუმცა თუ მათ ეს არ სურთ, ეს დაგვაზიანებს თუ არა? ყველას კარგად უნდა ესმოდეს, რომ „ნაციონალური მოძრაობა“ იმდენად ძლიერი ორგანიზმია, რომ კონკრეტული ერთი ადამიანი ან ადამიანთა ჯგუფი, როცა იდეოლოგიაზე და ღირებულებებზე ვსაუბრობთ, ვერ მოერევა ამ წარმატებას, რომლისკენაც მივდივართ ჩვენ. ამიტომ როცა კონკრეტულ სახელსა და გვარებზე ვლაპარაკობთ, მათზე მნიშვნელოვანი ადამიანებიც არიან სხვადასხვა რეგიონში და ქალაქებში, რომლებიც ხმის ამოუღებლად 24 საათი მუშაობენ. ამიტომ ჩვენი საქმე ის კი არ არის, რომ კონკრეტულ ადამიანებს ნერვებზე მასაჟები ვუკეთოთ, ჩვენი საქმეა ბრძოლა და ამას ვაკეთებთ. ვისაც უნდა მოგვყვება. სხვა ბრძოლის ხერხს ირჩევს? ღმერთმა გაუმარჯოს. ჩვენ მხოლოდ დავეხმარებით ყველას და საარჩევნო უბნებზე ჩვენს ინფრასტრუქტურას ვთავაზობთ. დავიცვათ ყველას ხმა“, – განაცხადა ლევან ხაბეიშვილმა.

ლევან ხაბეიშვილის განცხადებით, უახლოეს პერიოდში კიდევ შეიკრიბება პოლიტსაბჭო და 23 ნოემბრის მანიფესტს კონკრეტული ადამიანები შემოუერთდებიან, მათ შორის მოლაპარაკებები მიმდინარეობს პოლიტსაბჭოს ყოფილ წევრებთან.

„23 ნოემბერს ძალიან კარგი ღონისძიება ჩატარდა, რომელიც ეძღვნებოდა „ვარდების რევოლუციას“ 20 წლისთავს. ზოგი კონკრეტული ლიდერი დაიმალა ამ დროის განმავლობაში. ყველა მიხვდება რაზეც ვსაუბრობ.

ამის შემდეგ ჩვენ ვმუშაობდით ამ კონკრეტულ ადამიანებთან, ვინც დღეს თქვენს წინაშე იყო და მათ აქვთ განსხვავებული პოზიციები, თუმცა ყველა ერთად ვაპირებთ ბიძინა ივანიშვილის წინააღმდეგ ბრძოლას. ყველა ადამიანთან იყო საჯარო და პირადი კომუნიკაცია. ვინც თვლის, რომ ბიძინა ივანიშვილის წინააღმდეგ უნდა იბრძოლოს, დღეს თქვენ აქ ნახეთ ეს ადამიანები. გარწმუნებთ, უახლოეს პერიოდში, შემდეგ პოლიტიკურ საბჭოზე კიდევ კონკრეტული ადამიანები ამ მანიფესტს შემოუერთდებიან. მიმდინარეობს მოლაპარაკებები პოლიტიკური საბჭოს ყოფილ წევრებთან. კარი არის ღია.

ღია კარის მტვრევას ყველა უნდა შეეშვას. „ნაციონალური მოძრაობა“ შანტაჟს არ ექვემდებარება. ვისაც უნდა ბიძინა ივანიშვილის წინააღმდეგ ბრძოლა, შეუძლიათ ეს აკეთონ „ნაციონალურ მოძრაობასთან ერთად“, – განაცხადა ლევან ხაბეიშვილმა.