რაც არ უნდა ისაუბროს მელიამ, ვერაფერი გაათეთრებს ვერც მას და ვერც იმ პარტიას, სადაც იყო, არის და რომელსაც ხელმძღვანელობდა, – ამის შესახებ იურიდიულ საკითხთა კომიტეტის თავმჯდომარე ანრი ოხანაშვილმა განაცხადა, რითაც “ნაციონალური მოძრაობის” ყოფილი თავმჯდომარის, ნიკა მელიას განცხადებებს გამოეხმაურა დავით კეზერაშვილის მიერ პარტიის არაფორმალურ მართვაზე.

ოხანაშვილმა “სტრატეგია აღმაშენებლის” და “ნაციონალური მოძრაობის” გაერთიანებაზეც ისაუბრა და აღნიშნა, რომ არც გიორგი ვაშაძე და არც ლევან ხაბეიშვილი გადაწყვეტილების მიმღები პირები არ არიან.

“მელიას ამ ნათქვამით დადასტურდა, რასაც ჩვენ აქამდეც ვამბობდით, რომ “ნაციონალური მოძრაობა” ვიწროპარტიულ ინტერესებზე ორიენტირებული პარტიაა. მეორე, რაც დადასტურდა, არის ის, რომ მელიამ ამის შესახებ ან გვიან შეიტყო (და ეს ერთი უბედურებაა, თუ პარტიის თამჯდომარემ არ იცის, რა ხდება პარტიაში) ან მან ძალიან კარგად იცოდა, ვის რა ინტერესები ჰქონდა, მაგრამ იყო იმ მოცემულობაში და სიხარბესა და ანგარებაზე ორიენტირებულ ადამიანებთან ერთად აკეთებდა იმ საქმეს, რასაც ჰქვია ქვეყნის წინააღმდეგ მოქმედება. ამიტომ რაც არ უნდა ისაუბროს, ვერაფერი გაათეთრებს ვერც მას და ვერც იმ პარტიას, სადაც იყო და არის და რომელსაც ხელმძღვანელობდა.

გაერთიანებას რაც შეეხება, ხმამაღალი ნათქვამია, რომ ხაბეიშვილი და ვაშაძე გაერთიანდნენ. რა თქმა უნდა, არც ხაბეიშვილს და არც ვაშაძეს არ ეკითხებიან ამ პარტიაში გადაწყვეტილებებს. ისინი არიან გამხმოვანებლები და რადიკალიზაციის მუხტის შემქმნელები დავალებების გათვალისწინებით. ვაშაძე დიდი ხანია არის ამ პარტიის აქტივისტი. ის ამ პარტიაში იყო მაღალ თანამდებობაზე და არაერთ საქმეში იყო პოლიტიკურად ჩართული, როცა კონკრეტულ ქმედებებს ჰქონდა ადგილი მოქალაქეების საწინააღმდეგოდ,” – განაცხადა ოხანაშვილმა.

დავით კეზერაშვილს, ვანო მერაბიშვილს და ზაზა გოროზიას „ნაციონალურ მოძრაობაში“, ფულის შოვნის გარდა, არაფერი უნდათ, – ამის შესახებ „ნაციონალური მოძრაობის“ ყოფილმა თავმჯდომარემ, ნიკა მელიამ განაცხადა.

მელიას თქმით, ოპოზიციაში რომ არიან ადამიანები, რომლებიც არანაკლებ მდიდრდებიან, ვიდრე სახელისუფლებო შტოების წარმომადგენლები, ახალი არ არის.

ამასთან, როგორც მელიამ აღნიშნა, ჰქონდა შესაძლებლობა, პარტიისგან მსგავსი ადამიანები ჩამოეშორებინა.

„კეზერაშვილმა და ბატონმა მერაბიშვილმა უნდა გადაწყვიტონ, ნიკა მელია, უამრავ სხვა ადამიანთან ერთად, რომელ გზას დაადგება? გგონიათ, ამისკენ მივისწარფით? ადამიანებს, რომლებსაც დროის აღქმა აქვთ დაკარგული და არ იციან, მომავალ წელს კალენდრით რომ 2024 წელია, ჰგონიათ, გარეთ 2004 წელია. მიხეილ სააკაშვილმა ის პროცესი, რომელიც დააგვირგვინა გამარჯვებით, სიმართლით, ღირსებით, ახლებური მიდგომით დაიწყო და არა სიძველით, სიყალბით, სიყალბის ლაბორატორიად გადაქცეული ორგანიზმიდან იდეების მსხვრევით. ამიტომ დაგვირგვინდა მაშინ წარმატებით. ვანო მერაბიშვილს, დავით კეზერაშვილს, ზაზა გოროზიას რა უნდათ ენმ-ში? ფულის შოვნის გარდა, არაფერი არ უნდათ. ვერცერთ მეგრელს ვერ იპოვი, რომელიც ალალად გეტყვის, ზაზა გოროზია იბრძვის იმიტომ, რომ ნებისმიერი მეგრელის, ქართველის თუ არაქართველის კეთილდღეობა გაზარდოსო. ხშირად მეკითხებიან, რა არის პრობლემა, რომლის განვითარებისთვის ხელის შეშლა შემეძლო, რაზეც ჩემი პასუხია: შემეძლო პარტია სარეველასაგან გამეთავისუფლებია, რიგი ადამიანები ჩამომეშორებია, მაგრამ ერთობა მიმაჩნდა ძალიან ძვირფასად ბიძნა ივანშვილის წინააღმდეგ საბრძოლველად, მაგრამ ახლა უკვე დავრწმუნდი, რომ სწორი ერთობაა მნიშვნელოვანი, რომელიც 24 საათი იმაზე კი არ ფიქრობენ, როგორ იშოვონ და მოიპარონ ფული. სამწუხაროდ, ოპოზიციაში არიან ადამიანები, რომლებიც არანაკლებ მდიდრდებიან, ვიდრე სახელისუფლო შტოების წარმომადგენლები, ეს ახალია? შეუძლებელია, იყო ბიძინა ივანიშვილის წინააღმდეგ ბრძოლაში ათი წლის განმავლობაში და მილიონობით შეფასებულ სახლს მიმდინარე წელს ამთავრებდე. ანატომიურად ვიცნობ ამ ადამიანებს“, – განაცხადა მელიამ „ტვ პირველის“ ეთერში.

მისივე თქმით, ზაზა გოროზია ფრიდონ ინჯიას უახლოესი ბიზნესპარტნიორია.

„ივანიშვილი არის ბედნიერი, როდესაც ამათ უყურებს, რადგან იცის, გოროზია არის უახლოესი მოკავშირე ფრიდონ ინჯიასი. ზაზა გოროზიასთან ერთად სამეგრელოში რა უნდა მოხდეს? ადგილობრივი თვითმმართველობის არჩევნების დროს გოროზიამ, ინჯიას უახლოესმა ბიზნესპარტნიორმა, „ნაციონალური მოძრაობის“ კანდიდატები რამდენიმე სოფელში არ დააყენა. ადგილობრივ პარტიას მოელაპარაკა, ინჯიას პარტიის წარმომადგენლები დაეყენებინათ. დაუჯერეს, „ნაციონალურმა მოძრაობამ“ საკუთარი კანდიდატები არ დააყენა ინჯიასა და გოროზიას შეთანხმების საფუძველზე. ოპოზიციამ ჯამურად მეტი მანდატი მოიპოვა მარტვილის საკრებულოში, მაგრამ ინჯია-გოროზიას კანდიდატებმა, რომლებიც დეპუტატები გახდნენ, რა ქნეს პირველივე დღეს? ხმა მისცეს „ქართულ ოცნებას“, – განაცხადა ნიკა მელიამ.

ხან მელია დაიმალება და ხაბეიშვილი ეძებს, მერე გამოვარდება მელია და ამბობს – „დაგასტუკე“, ახლა ვაშაძემ „დაასტუკა” ხაბეიშვილი და ასე არასერიოზულად მივლენ 2024 წლამდე. საბოლოოდ საქართველოს მოსახლეობა „დაასტუკებს” ამ რადიკალებს,- ამის შესახებ ხალხის ძალის” წევრმა დეპუტატმა გურამ მაჭარაშვილმა განაცხადა, რითაც გამოეხმაურა ნიკა მელიას განცხადებებს „სტრატეგია აღმაშენებლის“ „ნაციონალურ მოძრაობასთან“ გაერთიანებაზე და დავით კეზერაშვილის არაფორმალურ მართვაზე.

მისივე თქმით, კეზერაშვილს და მერაბიშვილს პარტია ფინანსური მაქინაციების განსახორციელებლად სურთ.

„მას შემდეგ, რაც „რუსული კანონის” მეშვეობით სახელმწიფო დეპარტამენტმა საჯარო გახადა რადიკალური ოპოზიციის დღის წესრიგი, რომ საკუთარი ქვეყნის წინააღმდეგ და მისი დასანქცირებისთვის იბრძვიან, პოლიტიკურ შოკში ჩავარდნენ ოპოზიციის წარმომადგენლები და გადაწყვიტეს პოლიტიკური დახუჭობანას თამაში – ხან მელია დაიმალება გარკვეული ვადით და ხაბეიშვილი ეძებს, მერე მელია გამოვარდება და ამბობს – „დაგასტუკე”, ახლა ვაშაძემ “დაასტუკა” ხაბეიშვილი და ასე არასერიოზულად მივლენ 2024 წლამდე. საბოლოოდ საქართველოს მოსახლეობა “დაასტუკებს” ამ რადიკალებს, რომლებსაც საკუთარი ქვეყნის წინააღმდეგ ბრძოლა სურთ,”- განაცხადა მაჭარაშვილმა.

საქართველოს პრეზიდენტმა ხელი მოაწერა ორ კანონში შეტანილ ცვლილებებს, რომლებიც ქვეყნისთვის ორ უმნიშვნელოვანეს სფეროს – სამედიცინო სექტორსა და ინტელექტუალური უფლებების დაცვას ეხება,- ამის შესახებ ინფორმაციას პრეზიდენტის ადმინისტრაცია ავრცელებს.

როგორც ადმინისტრაციის განცხადებაშია აღნიშნული, ამ ორივე დარგის წინაშე არსებული გამოწვევებისა და ახალი საჭიროებების გათვალისწინებით, პრეზიდენტმა მიიღო გადაწყვეტილება, არ გამოეყენებინა ვეტოს უფლება იმის მიუხედავად, რომ ორივე კანონში შეტანილი ცვლილებები გარკვეულ კითხვებს ბადებს.

„ჯანმრთელობის დაცვის კანონში შეტანილი ცვლილებები სექტორში ჯანმრთელობისა და სიცოცხლის შესაძლო რისკების შემცირებას და ხარისხის კონტროლის გაუმჯობესებას ემსახურება, ორივე მიზანი მისასალმებელია და არა სადავო, თუმცა სექტორის კონტროლის გახშირება და გამკაცრება შეიძლება საქმიანობის შემაფერხებელი აღმოჩნდეს.

სასამართლოს წინასწარი ნებართვის გარეშე არაგეგმური კონტროლის ჩატარება და გახშირებული გეგმური კონტროლი ადმინისტრაციულ ზედამხედველობას გარკვეულ ბერკეტს აძლევს, რომ თუ მოისურვა, სექტორზე გავლენა მოახდინოს. ამდენად, საჭირო იქნება, რომ ამ ახალი მექანიზმების აღსრულების პირობებს დიდი ყურადღება მიექცეს, რათა არ მოხდეს კანონის შერჩევითი გამოყენება და ცვლილებებმა საფრთხე არ შეუქმნას ჯანდაცვის სექტორის სრულფასოვან და დამოუკიდებელ საქმიანობას.

საავტორო უფლებების შესახებ კანონში ცვლილებებთან დაკავშირებით კი, შეიძლება ითქვას, რომ მათი მიღებით ჩვენი კანონმდებლობა ევროსტანდარტებს დაუახლოვდება, რადგან ის გარკვეულწილად, ავტორების უფლებების დაცვის გაუმჯობესებას ემსახურება.

თუმცა, ცვლილებების შედეგად ჩნდება რისკი და ალბათობა, რომ ამ სივრცეში ექსკლუზიური ადგილი ისეთმა ორგანიზაციამ დაიმკვიდროს, რომელიც უშუალოდ რუსეთის სათავო კომპანიას დაექვემდებარება, როგორც ეს სხვა ქვეყნებში მოხდა.

ეს სქემა ქვეყნისთვის გარკვეულ საფრთხეებს შეიცავს: ეს მექანიზმი შესაძლოა, რუსეთის ხელში ინსტრუმენტი გახდეს, რათა ფინანსური ბერკეტების კონტროლით, საკუთარი რბილი ძალა და გავლენა გააძლიეროს იმ შემოქმედებით და ინტელექტუალურ სექტორზე, რომელიც პრინციპში, ყველაზე თავისუფალი და მიუკერძოებელი უნდა იყოს.

ამდენად, ამ კანონის ძალაში შესვლის შემდგომ, დიდი პასუხისმგებლობა ეკისრებათ ცვლილებების ავტორებს, ხელისუფლებასა და ამ ცვლილებების მხარდამჭერებს, რათა თავიდან იქნეს აცილებული ყველა ეს საფრთხე.

პრეზიდენტი ორივე მიმართულებით სექტორისა და საზოგადოების წარმომადგენლებთან თანამშრომლობის მზადყოფნას გამოთქვამს“,- ნათქვამია პრეზიდენტის ადმინისტრაციის ინფორმაციაში.

რაც არ უნდა კარგი იყოს ავტომობილი, თუ დროის გასვლის შემდეგ ამ ავტომობილს ზეთს არ გამოვუცვლით, მისი ძრავა აუცილებლად გაჩერდება, ასევეა პოლიტიკაშიც – თუ ასე გააგრძელებს მუდმივად მისი პრობლემის მოყოლას, ეს უფრო გააღრმავებს მის დეპრესიას, – ასე გამოეხმაურა „ნაციონალური მოძრაობის“ თავმჯდომარე ლევან ხაბეიშვილი „ნაციონალური მოძრაობის“ ყოფილი თავმჯდომარის, ნიკა მელიას მიერ გაკეთებულ განცხადებებს.

როგორც ხაბეიშვილმა აღნიშნა, ერთი ადამიანის ჯუჯღუნი, წუწუნი და მის პირად პრობლემებზე მოთქმა არ არის მისთვის საინტერესო.

„ქვეყანაში არის უამრავი პრობლემა. იმ ქვეყანაში, სადაც 100 ათასი ბავშვი შიმშილობს, 400 ათას პენსიონერს აწუხებს საპენსიო სესხის პრობლემა, აწუხებს დაბალი პენსია, ადამიანებს არ აქვთ სამსახური, გულწრფელად გეუბნებით, ერთი ადამიანის ჯუჯღუნზე, წუწუნზე, მის პირად პრობლემებზე მოთქმა არ არის ჩემთვის საინტერესო და არ მგონია ხალხისთვისაც. ამ საეთერო დროის გამოყენება ბევრად ეფექტურად შეიძლება, მათ შორის, ჩვენი ხალხის პრობლემებზე რომ ისაუბრონ ადამიანებმა, მათ შორის პოლიტიკოსებად ვინც მიიჩნევენ თავს და არა საკუთარი პრობლემების მოსაყოლად. რამდენიმე საათის განმავლობაში ურთულესი საყურებელია კონკრეტული ადამიანის წუწუნის, მოთქმის და ჯუჯღუნის ყურება. შესაბამისად, დიდი სერიოზული კომენტარის გაკეთება ამ თემაზე ჩემი მხრიდან არ იქნებოდა მართალი.

რუსულ პარტიას, პუტინის დავალებით, ბიძინა ივანიშვილს, დიახ, ტყვეობასა და იზოლაციაში ჰყავს პრეზიდენტი სააკაშვილი. ეს არის ისეთი ჭეშმარიტება, რომელზეც არათუ ქვეყნის შიგნით, ქვეყნის გარეთაც ჩვენ დასავლელ პარტნიორებში არის კონსენსუსი, ეს არის სიმართლე. დანარჩენი, კონკრეტული ადამიანები პირადი გამორჩენის გამო, პირადი წუწუნის, წუხილის, ჯუჯღუნის გამო აკეთებენ გარკვეულ განცხადებებს, რაც მათი საქმეა. თუ რამე დამატებით იციან, სჯობს მათ ისაუბრონ თავის წუწუნსა და ჯუჯღუნზე, ვიდრე ვაკეთო კომენტარი. ჩემთვის მნიშვნელოვანია 100 ათასამდე ბავშვი რომ შიმშილობს, 7 ათასამდე სტუდენტს რომ აქვს სტატუსი შეჩერებული, პენსიონერებს საპენსიო სესხის განულებას რომ ვპირდები და ასეთი 400 ათასი რომაა, საპენსიო ასაკმა როგორ დაიწიოს, ეს არის ჩვენთვის მნიშვნელოვანი. რაც არ უნდა კარგი იყოს ავტომობილი, თუ დროის გასვლის შემდეგ ამ ავტომობილს ზეთს არ გამოვუცვლით, მისი ძრავა აუცილებლად გაჩერდება, ასევეა პოლიტიკაშიც. წარმოუდგენელია ერთი და იგივე წუწუნით გინდოდეს ხალხის მხარდაჭერის მოპოვება, ასე არ გამოვა. ამიტომ კონკრეტულმა ადამიანებმა მიიღონ ეს გზავნილი. ავტომობილს ზეთს გამოცვლა სჭირდება, რომ ძრავა არ გაჩერდეს და თუ ასე გააგრძელებს მუდმივად მისი პრობლემის მოყოლას, ეს უფრო გააღრმავებს მის დეპრესიას“, – განაცხადა ხაბეიშვილმა.

ამასთან, ლევან ხაბეიშვილმა, ნიკა მელიას განცხადების ის ნაწილი შეაფასა, რომლის მიხედვითაც გიორგი ვაშაძის პარტიაში ინტეგრირება ლევან ხაბეიშვილის გადაწყვეტილება არ ყოფილა.

„რომ არ დამიზუსტოთ ვინ ისაუბრა, აუცილებლად გეტყოდით, რომ ეს განცხადება გააკეთა კობახიძემ, ზარქუამ, ან „პოსტივიზე“ გავიდა, ან ტელეკომპანია „იმედზე“ და რომ მეუბნებით, ეს გააკეთა „ნაციონალური მოძრაობის“ ყოფილმა თავმჯდომარემ, ეს მხოლოდ წუხილს აღძრავს ჩემში“, – განაცხადა ხაბეიშვილმა.

როგორც ხაბეიშვილმა აღნიშნა, თუ ნიკა მელია გააგრძელებს კობახიძის, ზარქუას „პოსტივის“ ნარატივებით, “სფიჩებით” და მესიჯბოქსით საუბარს, გაუღრმავდება დეპრესია.