დღეს საქართველო არის საინვესტიციო დანიშნულება, სადაც შესანიშნავ ბიზნეს კლიმატს შემცირებული რისკები ახლავს, დაბალი საოპერაციო ხარჯებით, მწვანე ენერგიის ხელმისაწვდომობითა და ორ მილიარდზე მეტი მოსახლეობის მქონე ბაზრებზე თავისუფალი სავაჭრო წვდომით, – ამის შესახებ საქართველოს პრემიერ-მინისტრმა ირაკლი ღარიბაშვილმა ჩინეთი-საქართველოს ბიზნეს ფორუმზე სიტყვით გამოსვლისას განაცხადა.

მთავრობის მეთაურის თქმით, საქართველო არის ნამდვილი სავაჭრო ცენტრი ევროპასა და აზიას შორის და რეგიონის წამყვანი ეკონომიკაა ზრდის თვალსაზრისით.

„ცალკე მსურს აღვნიშნო ქართული ღვინო. მოგეხსენებათ, საქართველო ღვინის აკვანია. ჩემი ქვეყნის მეღვინეობის უწყვეტი ტრადიცია 8000 წელს ითვლის. საქართველო ერთადერთი ქვეყანაა მსოფლიოში, სადაც უძველესი დროიდან განვითარებული მეთოდები არ მიტოვებულა და დღემდე გამოიყენება მეღვინეობაში. მისი კულტურული მნიშვნელობის დასტურად და UNESCO-ს პრინციპების შესაბამისად, თიხის ჭურჭელში – ქვევრში – ღვინის დაყენების უძველეს ქართულ ტრადიციას არამატერიალური კულტურული მემკვიდრეობის ეროვნული ძეგლის სტატუსი მიენიჭა. ძვირფასო მეგობრებო ქვევრი იყო პირველი ჭურჭელი, რომელიც გამოიყენებოდა მეღვინეობაში, არქეოლოგიური აღმოჩენებით, ის 8000 წლით თარიღდება. საქართველოს უძველესი ტრადიციები და მისი ღვინის კულტურა გადაჯაჭვულია ქვეყნის ეროვნულ იდენტობასთან.

ქვეყნის გამორჩეული ტრადიციები განპირობებულია 525-ზე მეტი ძირძველი ვაზის ჯიშის საოცარი მრავალფეროვნებით, რომელთაგან 10 გაშენებულია ჩინეთის ტერიტორიაზე, ნინგციას რეგიონში.

ბაზრის პოტენციალი, ეკონომიკური სარგებელი და ორმხრივი თანამშრომლობის პერსპექტივები ჩინეთს აქცევს ქართული ღვინის ექსპორტისთვის სტრატეგიულად მნიშვნელოვან ადგილად. 2013 წლიდან საქართველოს მთავრობა მიზნობრივ მარკეტინგულ კამპანიას ახორციელებს სტრატეგიულ საექსპორტო ბაზრებზე, მათ შორის ჩინეთში. ქართველი მეღვინეების გაზრდილი ჩართულობა საერთაშორისო გამოფენებში იმას ცხადყოფს, რომ ქვეყანა ერთგულია ჩინეთის ბაზარზე ყოფნის გაფართოების იდეისადმი და თან ხაზს უსვამს ქართული ღვინისადმი მზარდ ინტერესს. ჩვენ მოუთმენლად ველით აქ დამსწრე ქართული ღვინის კომპანიებს მიერ ურთიერთობების დამყარებას, ბრენდის ცნობადობის გაზრდას და საბოლოო ჯამში გაყიდვების გაზრდილ მაჩვენებლებსა და ასევე გაზრდილ საბაზრო წილს ჩინეთში. იმედი გვაქვს, რომ ეს ძალისხმევა ხელს შეუწყობს ქართული ღვინის დამკვიდრებას, როგორც აღიარებულ და ღირებულ არჩევანს ჩინელ მომხმარებლებს შორის.

დასასრულისკენ, ნება მომეცით განვაცხადო, რომ საქართველოს მთავრობა სრულად არის მოწოდებული დახმარება გაუწიოს ჩვენს ქვეყანაში ინვესტიციით დაინტერესებული ბიზნესის წარმომადგენლებს. 2014 წელს ჩვენ დავაარსეთ ქვეყნის მოწინავე დაწესებულება – „აწარმოე საქართველოში” – რომელიც კერძო სექტორის განვითარებას ისახავს მიზნად. ეს სააგენტო მოქმედებს როგორც შუამავალი უცხოელ ინვესტორებსა და საქართველოს მთავრობას შორის და გთავაზობთ უახლეს ინფორმაციაზე წვდომას, თან ხელს უწყობს ეფექტურ კომუნიკაციას სამთავრობო ორგანოებთან. ის ფუნქციონირებს როგორც ყოვლისმომცველი „ერთი ფანჯრის” სისტემა და მზადაა მხარი დაუჭიროს ინვესტორებს მთელი საინვესტიციო პროცესის განმავლობაში.

პრინციპში, რამდენიმე ჩინური კომპანია უკვე სარგებლობს საქართველოში შექმნილი ხელსაყრელი გარემოთი და ყველა იმ მხარდაჭერით, რასაც ჩვენი მთავრობა სთავაზობს კერძო სექტორს. ჩვენ მზად ვართ აქტიურად ჩავერთოთ უფრო მეტ ჩინურ კომპანიებთან ურთიერთობაში და ქვეყანაში უხვად-არსებული ბიზნეს შესაძლებლობები გავაცნოთ მათ. მივესალმებით ამ მიმართულებით არსებულ შესაძლებლობებს, ხოლო „აწარმოე საქართველოში” მზადაა დახმარება და მხარდაჭერა გაუწიოს ჩინურ კომპანიებს, რომლებიც ჩვენი ქვეყნის სამეწარმეო შესაძლებლობებში გარკვევას ცდილობენ.

ძვირფასო მეგობრებო, დღეს საქართველო არის საინვესტიციო დანიშნულება, სადაც შესანიშნავ ბიზნეს კლიმატს შემცირებული რისკები ახლავს, დაბალი საოპერაციო ხარჯებით, მწვანე ენერგიის ხელმისაწვდომობითა და ორ მილიარდზე მეტი მოსახლეობის მქონე ბაზრებზე თავისუფალი სავაჭრო წვდომით. ჩემი ქვეყანა არის ნამდვილი სავაჭრო ცენტრი ევროპასა და აზიას შორის და რეგიონის წამყვანი ეკონომიკაა ზრდის თვალსაზრისით.

საქართველო არის „სარტყელისა და გზის” ინიციატივისა და შუა დერეფნის უცილობელი კვანძი. შესაბამისად, მსურს გამოვიყენო ეს შესაძლებლობა და მოვიწვიო ჩინური კომპანიები, შეისწავლონ საქართველოს საინვესტიციო პოტენციალი და ისარგებლონ არსებული შესაძლებლობებით, მათ შორის ისეთი სარგებლით, რომელიც მოაქვს (პირველადი, გადამამუშავებელი და საკომპლექტაციო) წარმოების საქართველოში გადმოტანას ან/და გაფართოებას.

ძვირფასო მეგობრებო, ბატონო თავმჯდომარე, დღეს მოკლედ წარმოვადგინე ჩვენი ყველაზე მნიშვნელოვანი მიღწევები, უზარმაზარი პოტენციალი და ძალისხმევა ჩვენი ეროვნული ინტერესების ჩინეთთან – ამ დიდებულ ქვეყანასა და შესანიშნავ ხალხთან – ასამაღლებლად და მის ბიზნეს სექტორთან პარტნიორობით სარგებლობისთვის. მტკიცედ მჯერა, რომ ჩვენი ღირებული თანამშრომლობის გაღრმავების სურვილი ორმხრივია და საშუალებას მოგვცემს თანამშრომლობის ახალი შესაძლებლობები დიდი შემართებით გამოვიყენოთ.

ვიმედოვნებ, ჩემი ვიზიტი იქნება ტრამპლინი უფრო ღრმა თანამშრომლობისკენ, გრძელვადიანი მეგობრობის გასაძლიერებლად და ჩვენი ერისთვის ნათელი ხვალინდელი დღის შესაქმნელად”, – განაცხადა პრემიერმა.

ინფორმაციას მთავრობის ადმინისტრაციის პრესსამსახური ავრცელებს.

ევროპული კრუიზის ნაცვლად, მივიღეთ რუსული კრუიზი ბათუმში, ბიძინა ივანიშვილს, კობახიძეს, ღარიბაშვილს სურთ, საქართველო გადააქციონ რუსეთის უკანა ეზოდ, გუშინ საღამოდან ვიხილეთ გმირი ბათუმელების, აჭარლების, ადგილობრივების, სხვადასხვა მუნიციპალიტეტიდან ჩამოსული ადამიანების გმირული პროტესტი მთელი ღამის განმავლობაში, – ამის შესახებ „ნაციონალური მოძრაობის“ თავმჯდომარემ, ლევან ხაბეიშვილმა განაცხადა.

ხაბეიშვილის თქმით, სახალხო დამცველმა უნდა შეისწავლოს ყველა იმ ადამიანის დაზიანება, რომლებიც ბათუმის პორტში მიმდინარე აქციისას დააკავეს.

„განსაკუთრებით ახალგაზრდებმა იაქტიურეს და ჩვენდა სამწუხაროდ, ამ დროისთვის დაკავებულია პუტინის, ოკუპანტის გაპროტესტებისთვის 23 ადამიანი. აქედან 10-მდე არის „ნაციონალური მოძრაობის“ წევრი, სხვა პარტიის წარმომადგენლებიც, არიან სამოქალაქო აქტივისტები, არიან რიგითი მოქალაქეები. ჩვენ ვითხოვთ ამ ადამიანების დაუყოვნებლივ გათავისუფლებას. წარმოუდგენელია, ქვეყნის 20% იყოს ოკუპირებული და ოკუპაციის გაპროტესტებისთვის, პუტინის გაპროტესტებისთვის ადამიანებს ციხეში უშვებდნენ. აქედან მოვუწოდებ, თუ რამე ასეთი ინსტიტუტი არსებობს სახალხო დამცველის, ხანდახან ხმას თუ ამოიღებს, კარგი იქნება, შეისწავლოს თითოეული ადამიანის დაზიანება. ადგილზე ვუყურეთ ამ ყველაფერს, როგორ უსწორდებოდნენ ფიზიკურად დგებუაძე, ბესელია, მაღრაძის ტროიკა ჩვენს მოქალაქეებს. მინიმალური გამარჯვება უკვე მოპოვებულია, ამ კრუიზის ქალაქებიდან ამოღებულია ბათუმი. ჩამოვა თუ არა კიდევ ორ კვირაში, ეს არავინ იცის, თუმცა სიიდან რომ ამოიღეს, ეს უკვე კარგია. ბრძოლას ყოველთვის აქვს აზრი. მოგვიწევს, ყოველდღიურ რეჟიმში გავაგრძელოთ ბრძოლა რუსული რეჟიმის წინააღმდეგ“, – განაცხადა ხაბეიშვილმა.

ლევან ხაბეიშვილის განცხადებით, „ანწუხელიძის მკვლელებს საქართველოში ია-ვარდით ვერ დახვდებიან.

„ყველა ჯერზე, ხმელეთით შემოსულსაც გააპროტესტებს ქართველი ხალხი, ზღვით შემოსულსაც და თვითმფრინავით შემოსულსაც. თქვენ გინახავთ ყველა სახის პროტესტი ხმელეთით შემოსულ პუტინისტებზეც, ზღვით შემოსულ პუტინისტებზე და ცით შემოსულ პუტინისტებზეც. ანწუხელიძის მკვლელებს ამ ქვეყანაში ია-ვარდით ვერ დახვდებიან, ამას უნდა შეეგუოს რუსული პარტიაც. გემი კანონდარღვევით შემოვიდა. ვნახე უმძიმესი კადრები რუსული კრუიზის გემზე ქართველი პოლიციელების, წარმოუდგენელი რამეა, რა ესაქმებოდათ საქართველოს მოქალაქეების დამცველებს და კანონის დამცველებს რუსულ კრუიზზე, იქ იცავდნენ პუტინისტებს, რუსებს და მათ შორის იმ ადამიანებს, ვინც არ აღიარებს საქართველოს ტერიტორიულ მთლიანობას, არ აღიარებს იმას, რომ პუტინი ტერორისტია, ჩვენს ოკუპაციას, ანწუხელიძის მკვლელობას, ტერიტორიის მითვისებას და ამ ადამიანებს, რომლებიც არღვევენ ოკუპაციის შესახებ კანონს, აქ ფიანდაზად ეგებიან. ყველა ასეთი ტექნიკური უკანონობა ადასტურებს იმას, რომ ბიძინა ივანიშვილს აქვს პირადი დაპირება მიცემული პუტინისთვის, რომ აქ ფიანდაზად გაეგებიან ყველა პუტინისტს“, – განაცხადა ხაბეიშვილმა.

ბიზნესის კეთების ჭრილში საქართველო სასურველი ქვეყანაა და ეს შემთხვევითობა არ არის. ბოლო ათწლეულის განმავლობაში ქვეყანამ განიცადა მნიშვნელოვანი ტრანსფორმაცია, უფრო ლიბერალური და თავისუფალი ბაზრის ეკონომიკა შექმნა, – ამის შესახებ საქართველოს პრემიერ-მინისტრმა ირაკლი ღარიბაშვილმა ჩინეთი-საქართველოს ბიზნეს ფორუმზე სიტყვით გამოსვლისას განაცხადა.

მთავრობის მეთაურის თქმით, მსოფლიო ბანკის მონაცემებით, საქართველო მე-3 ადგილზეა მსოფლიოში ყველაზე ნაკლები საგადასახადო წნეხის მქონე ქვეყნებს შორის, საშუალოდ ჯამში 9.9 პროცენტიანი საგადასახადო განაკვეთით.

„საქართველოს შთამბეჭდავი უპირატესობების ხაზგასასმელად, უვიზო მიმოსვლის უფლებას ვანიჭებთ 98 ქვეყნის მოქალაქეებს, რაც მათ საშუალებას აძლევს დარჩნენ ქვეყანაში მთელი წლის განმავლობაში. გარდა ამისა, პირებს, რომლებსაც აქვთ ვიზა ან ბინადრობის ნებართვა 50 სხვა ქვეყნიდან, ასევე შეუძლიათ ისარგებლონ საქართველოში უვიზო მიმოსვლის კომფორტით.

მსოფლიო ბანკის მონაცემებით, საქართველო მე-3 ადგილზეა მსოფლიოში ყველაზე ნაკლები საგადასახადო წნეხის მქონე ქვეყნებს შორის, საშუალოდ ჯამში 9.9 პროცენტიანი საგადასახადო განაკვეთით. საქართველო გთავაზობთ მიმზიდველ შეღავათებს მსოფლიოში ყველაზე დაბალი საგადასახადო განაკვეთებით და გამარტივებული ბიუროკრატიით, რაც მას მიმზიდველ დანიშნულების ქვეყნად აქცევს ინვესტორებისთვის, რომლებიც დიდ სარგებელს ეძებენ. უაღრესად მიმზიდველი ბიზნეს კლიმატის გარდა, დაინტერესებულ კომპანიებს ვთავაზობთ მხარდაჭერის ისეთ მიმზიდველ მექანიზმებს როგორიცაა პირდაპირი უცხოური ინვესტიციების გრანტი. საქართველოში მოქმედ და ექსპორტზე ორიენტირებულ ინფორმაციული ტექნოლოგიების კომპანიებს ვთავაზობთ შეღავათებს ე.წ. საერთაშორისო კომპანიის სტატუსის მეშვეობით, რომელიც მოიცავს შეღავათიან საგადასახადო რეჟიმს (მხოლოდ 5% საშემოსავლო გადასახადი (ზოგადად არსებული 15% განაკვეთის ნაცვლად) და 5% მოგების გადასახადი. (ზოგადად არსებული 20% განაკვეთის ნაცვლად).

ბიზნესის კეთების ჭრილში საქართველო სასურველი ქვეყანაა და ეს შემთხვევითობა არ არის. ბოლო ათწლეულის განმავლობაში ქვეყანამ განიცადა მნიშვნელოვანი ტრანსფორმაცია, უფრო ლიბერალური და თავისუფალი ბაზრის ეკონომიკა შექმნა.

გასულ წელს დავამტკიცეთ საქართველოს განვითარების სტრატეგია – ხედვა 2030. ეს არის მასშტაბური ეროვნული პოლიტიკის დოკუმენტი, რომელიც ასახავს საქართველოს მთავრობის განვითარების ხედვას. ეს შორსმიმავალი პერსპექტივა აქცენტირებულია მდგრადი ეკონომიკური ზრდის, სოციალური თანასწორობის, უსაფრთხოებისა და სტაბილურობის ხელშეწყობაზე.

ეფექტური და ეფექტიანი პოლიტიკის განხორციელებამ და ჩვენმა დაუღალავმა მუშაობამ მიგვიყვანა ხელშესახებ შედეგებამდე. კერძოდ, მიუხედავად იმისა, რომ რეგიონი რთული გეოპოლიტიკური ლანდშაფტი გააჩნია და გლობალური ეკონომიკური ვარდნის პირობებში უწევს ცხოვრება, საქართველომ აჩვენა გამძლეობა ეკონომიკური სტაბილურობის შენარჩუნებით. ჩვენ მივაღწიეთ საქართველოს ეკონომიკის მნიშვნელოვან ზრდას და მნიშვნელოვან საეტაპო მოვლენები ვიქონიეთ. დღესდღეობით. საქართველო ყველაზე სწრაფად მზარდი ეკონომიკაა მსოფლიოში; ერთ-ერთი ყველაზე.

შემდეგი სტატისტიკა ნათლად ასახავს ჩვენი პროგრესის მტკიცებულებას. ისეთ სექტორებში, როგორიცაა ტრანსპორტი, ლოჯისტიკა, ფინანსური მომსახურება, მშენებლობა, ენერგეტიკა და ტურიზმი ძლიერი ეკონომიკური პოლიტიკისა და გაზრდილი აქტივობის წყალობით მივაღწიეთ ორნიშნა ეკონომიკურ ზრდას ზედიზედ ორი წლის განმავლობაში, მთლიანი შიდა პროდუქტის (მშპ) ზრდის ტემპი 10.1 პროცენტია 2022 წელს, წინა წლის 10.5%-იანი მნიშვნელოვანი ზრდის შემდეგ. ეს დადებითი ტრაექტორია გრძელდება 2023 წელსაც და საშუალო ეკონომიკური ზრდის ტემპი იანვრიდან ივნისამდე პერიოდში 7.6 პროცენტია.

სამომავლო პერსპექტივასაც გაგაცნობთ. საერთაშორისო სავალუტო ფონდის პროგნოზები მიუთითებს იმაზე, რომ საქართველოს ექნება ყველაზე სწრაფი ეკონომიკური ზრდა რეგიონის და ევროპულ ქვეყნებს შორის საშუალოვადიან პერიოდში (2023 – 2028 წწ.) პროგნოზირებული ზრდის ტემპით -5.1%”, – განაცხადა პრემიერმა.

ჩინეთსა და საქართველოს შორის თანამშრომლობა გადავიდა სრულიად ახალ, ძალიან მაღალ საფეხურზე და ეს მნიშვნელოვანია ჩვენი ქვეყნისთვის, – ამის შესახებ სოფლის მეურნეობის მინისტრმა, ოთარ შამუგიამ განაცხადა.

მისი თქმით, ორ ქვეყანას შორის ურთიერთობების ახალ ეტაპზე გადასვლა ხელს შეუწყობს ექსპორტის ზრდას ჩინეთის ბაზარზე.

„ხაზი მინდა გავუსვა პრემიერ-მინისტრის წარმატებულ ვიზიტს. თქვენ იცით, რომ შედგა მნიშვნელოვანი შეხვედრები პრეზიდენტთან, პრემიერ-მინისტრთან, გაფორმდა მემორანდუმები სხვადასხვა მიმართულებით. დღეს გამოქვეყნდა ორ ქვეყანას შორის ერთობლივი განცხადება სტრატეგიული პარტნიორობის გამყარების შესახებ. ეს დოკუმენტი გულისხმობს თანამშრომლობის გაღრმავებას როგორც პოლიტიკური, ასევე ეკონომიკური და სხვადასხვა მიმართულებით სავაჭრო-ეკონომიკური კავშირების გაძლიერებას და ვფიქრობ, რომ ორ ქვეყანას შორის თანამშრომლობა გადავიდა სრულიად ახალ, ძალიან მაღალ საფეხურზე და ეს ძალიან მნიშვნელოვანია ჩვენი ქვეყნისთვის. პრემიერის ვიზიტის ფარგლებში გამართულ ბიზნესფორუმზე წარმოდგენილია როგორც საქართველოს, ასევე ჩინეთის ბიზნესსექტორი. აქ არიან ასევე ღვინის მწარმოებელი კომპანიები, რომლებიც, წლებია, ახორციელებენ ღვინის ექსპორტს ჩვენთვის მნიშვნელოვან ბაზარზე. ბოლო წლებია, ჩვენ აქტიურად ვმუშაობთ, რომ ქართული ღვინის პოპულარიზაცია მოვახდინოთ ამ ბაზარზე. შედეგად, ყოველწლიურად დაახლოებით ოთხი მილიონი ლიტრი ღვინის ექსპორტი ხორციელდება ჩინეთში, თუმცა ეს პროცესები, რომელსაც ვაკვირდებით, მნიშვნელოვან სტიმულს მისცემს როგორც ღვინის, ისე  სხვა პროდუქციის ექსპორტის ზრდას ჩინეთის ბაზარზე და ჩვენს პარტნიორებთან, ბიზნესსექტორთან ერთად გავაგრძელებთ აქტიურ მუშაობას, რათა ექსპორტი ყოველწლიურად მნიშვნელოვნად გაიზარდოს“, – განაცხადა ოთარ შამუგიამ.

არსებული ურთიერთობების ამაღლება სტრატეგიული პარტნიორობის პატივსაცემ დონეზე წარმოადგენს მნიშვნელოვან ეტაპს და გზას უკვალავს ჩინეთსა და საქართველოს უფრო ნაყოფიერი თანამშრომლობისკენ, – ამის შესახებ საქართველოს პრემიერ-მინისტრმა, ირაკლი ღარიბაშვილმა ჩინეთი-საქართველოს ბიზნესფორუმზე სიტყვით გამოსვლისას განაცხადა.

მთავრობის მეთაურმა ჩინეთის პრეზიდენტს და პრემიერს განსაკუთრებული სტუმართმოყვარეობისა და თბილი მიღებისთვის მადლობა გადაუხადა.

„ბატონო თავმჯდომარე, თქვენო აღმატებულებავ ბატონო ელჩო, ძვირფასო მეგობრებო, ქალბატონებო და ბატონებო, უპირველეს ყოვლისა, უაღრესად მადლობელი ვარ პრეზიდენტ სი ძინპინის, რომ მოგვიწვია მე და ჩემი დელეგაცია ჩინეთის სახალხო რესპუბლიკაში და ზაფხულის მსოფლიო საუნივერსიტეტო თამაშების გახსნის ცერემონიაზე ჩენგდუში. გასულ კვირას დიდი პატივი იყო პრეზიდენტ სისთან, სამაგალითო პოლიტიკოსთან, ბრძენ და მასშტაბური ხედვის მქონე ეროვნულ ლიდერთან შეხვედრა. მინდა გულწრფელი მადლობა გადავუხადო პრეზიდენტ სის და პრემიერ ლის განსაკუთრებული სტუმართმოყვარეობისა და თბილი მიღებისთვის. არსებული ურთიერთობების ამაღლება სტრატეგიული პარტნიორობის პატივსაცემ დონეზე წარმოადგენს მნიშვნელოვან ეტაპს და გზას უკვალავს ჩინეთსა და საქართველოს უფრო ნაყოფიერი თანამშრომლობისკენ. საქართველოს მთავრობისა და ქართველი ხალხის სახელით, უზომოდ მოხარული ვარ თქვენს შესანიშნავ ქვეყანაში ასეთი პროდუქტიული და მეგობრული ვიზიტის გამო. ასევე პატივია დღეს ვესწრებოდე ამ ღირებულ ბიზნეს ფორუმს, წარმოვადგენდე ჩვენს ქვეყანას – საქართველოს და სიტყვით მივმართავდე გამორჩეულ ოფიციალურ პირებს, ისევე როგორც ჩინეთისა და საქართველოს ბიზნესის წარმომადგენლებს”, – განაცხადა ირაკლი ღარიბაშვილმა.

მინდა, ხელმოცარულ ოპოზიციას მოვუწოდო, რომ უპასუხისმგებლო ქმედებებისგან თავი შეიკავონ, ეს წარმატებული ვერასდროს იქნება, მოსახლეობის უმრავლესობა დესტრუქციულ პოლიტიკას მხარს არ დაუჭერს, – ამის შესახებ ვიცე-პრემიერმა ლევან დავითაშვილმა ბათუმის პორტში გამართულ აქციაზე კომენტირებისას განაცხადა.

როგორც ლევან დავითაშვილმა აღნიშნა, საქართველოს მთავრობა იქნება თანმიმდევრული, რომ უზრუნველყოფილი იყოს სტაბილური გარემო ეკონომიკური განვითარებისთვის და ამ ეკონომიკურ განვითარებაში ერთ-ერთი მნიშვნელოვანი როლი აქვს ტურიზმს.

„არ შეიძლება, რომ ამ საკითხზე არ გაკეთდეს ძალიან მკაფიო განმარტება, საქართველოს ხელისუფლება ყველა საერთაშორისო შეთანხმებებს იცავს ძალიან მკაფიოდ, ამაზე ჩვენმა სტრატეგიულმა პარტნიორებმა განაცხადეს, რომ საქართველოში სანქციების გვერდის ავლის არცერთი ფაქტი არ ფიქსირდება. ეს გემი საქართველოში შემოვიდა და გადამოწმდა. მჭიდრო თანამშრომლობა არსებობს საზღვაო სააგენტოსა და საბაჟო სტრუქტურებს შორის, არც გემის მფლობელი და არც გემი სანქციებში არ იმყოფება, ეს ერთი, მკაფიო არის, რომ ჩვენ ეს დავიცვათ. ძალიან მნიშვნელოვანია, რომ ჩვენ თანმიმდევრული ვიყოთ განცხადებებსა და პოლიტიკაში, თანმიმდევრულობა ნიშნავს იმას, რომ ჩვენ მივესალმებით საქართველოში ტურიზმის განვითარებას“, – განაცხადა დავითაშვილმა.

მისივე თქმით, ტურიზმი ქვეყნის ეკონომიკის ზრდის ერთ-ერთი მნიშვნელოვანი ნაწილია და მოსახლეობის შემოსავლებსა და კეთილდღეობაზე პირდაპირ აისახება.

„უპასუხისმგებლო აქციები დაორგანიზებულია უპასუხისმგებლო ოპოზიციის მხრიდან და ეს არის სუფთა პოლიტიზებული აქცია. სამწუხაროდ, ჩვენი ქვეყნის მოსახლეობის შეცდომაში შეყვანით ისინი ახერხებენ, დესტრუქციული ქმედებები მოახდინონ ქვეყანაში და ხელი შეუშალონ არა მხოლოდ ტურიზმის განვითარებას, სტაბილურობის უზრუნველყოფას, რაც პირდაპირ ეკონომიკურ კეთილდღეობას უშლის ხელს, ჩვენი მოსახლეობისა და მთლიანად ქვეყნის ინტერესების წინააღმდეგ არის მიმართული. ჩვენ ამას არ დავუშვებთ, რადგან ეს არის ყოვლად მიუღებელი, ეს თითოეული ჩვენი მოქალაქის წინააღმდეგ გადადგმული ნაბიჯია. კიდევ ერთხელ მინდა, ხელმოცარულ ოპოზიციას მოვუწოდო, რომ მსგავსი უპასუხისმგებლო ქმედებებისგან თავი შეიკავონ, ეს წარმატებული ვერასდროს იქნება. ჩვენი ქვეყნის მოსახლეობის უმრავლესობა დესტრუქციულ პოლიტიკას მხარს არ დაუჭერს. ჩვენ ვიქნებით თანმიმდევრული, რომ საქართველოში უზრუნველვყოთ სტაბილური გარემო ეკონომიკური განვითარებისთვის და ამ ეკონომიკურ განვითარებაში ერთ-ერთი მნიშვნელოვანი როლი აქვს, მათ შორის, ტურიზმს. ეს ყველაფერი, რაც ახლა ხდება, არის ჩვენი ქვეყნის მოსახლეობის წინააღმდეგ მიმართული ნაბიჯები, ხოლო ის, თუ რას აკეთებს საქართველოს ხელისუფლება, ჩვენ ვართ პასუხისმგებლიანი როგორც საერთაშორისო საზოგადოებასთან, ისე ჩვენი ქვეყნის მოქალაქეებთან“, – განაცხადა დავითაშვილმა.

დღეს გამოქვეყნებულ ერთობლივ კომუნიკეში ხაზგასმულია ხალხთა შორის, კულტურული, მჭიდრო დაახლოება, მათ შორის, უმაღლესი განათლებისა და მეცნიერების კუთხით მჭიდრო თანამშრომლობა, – ამის შესახებ განათლებისა და მეცნიერების მინისტრმა გიორგი ამილახვარმა ჩინეთში განაცხადა, სადაც პრემიერ-მინისტრთან ერთად იმყოფება.

მისი თქმით, აქტიურად გაგრძელდება მუშაობა ერთობლივი პროგრამების შემუშავებისათვის ქართულ და ჩინურ უნივერსიტეტებს შორის.

„სტრატეგიული თანამშრომლობის ეტაპზე ღრმავდება განათლების და მეცნიერების კუთხით თანამშრომლობა. დღეს გამოქვეყნებულ ერთობლივ კომუნიკეში ხაზგასმულია ხალხთა შორის, კულტურული, მჭიდრო დაახლოება, მათ შორის, უმაღლესი განათლებისა და მეცნიერების კუთხით მჭიდრო თანამშრომლობა. ქართული და ჩინური ენების სწავლების გაძლიერების მიმართულებით, როგორც საქართველოში, ისე ჩინეთში. ასევე, კვლევით ინსტიტუტებს შორის ერთობლივი კვლევების დაგეგმვა. ბუნებრივია, ჩვენ აქტიურად გავაგრძელებთ და დავიწყებთ მუშაობას ერთობლივი პროგრამების შემუშავებისათვის როგორც ქართულ, ასევე ჩინეთის უნივერსიტეტებს შორის, რაც ბუნებრივია, მეტ შესაძლებლობებს მისცემს ჩვენს ახალგაზრდებს, რომელთა რიგებშიც ჩინური ენით დაინტერესება წლიდან წლამდე იზრდება, რომ გააგრძელონ სწავლა ჩინეთის წამყვან უნივერსიტეტებში. ეს არის ის ძირითადი საკითხები, რომლის ფარგლებშიც ჩვენ ჩინეთის მხარესთან აქტიურად გავაგრძელებთ მუშაობას”, – განაცხადა გიორგი ამილახვარმა.