რომის პაპი ფრანცისკე საერთაშორისო საზოგადოებას სუროგაციის „საზიზღარი“ პრაქტიკის საყოველთაო აკრძალვისკენ მოუწოდებს და ორსულობის „კომერციალიზაციის“ წინააღმდეგ გამოდის.

ამის შესახებ ინფორმაციას ბრიტანული გამოცემა Independent-ი ავრცელებს.

მისი თქმით, სუროგატი დედობა დედისა და ბავშვის უფლებების სერიოზულ დარღვევას წარმოადგენს და საერთაშორისო საზოგადოებამ ეს პრაქტიკა უნდა აკრძალოს.

„საზიზღრად მიმაჩნია ე.წ. სუროგატი დედობის პრაქტიკა, რომელიც წარმოადგენს ქალისა და ბავშვის ღირსების მძიმე შელახვას დედის მატერიალური საჭიროებების სიტუაციის ექსპლუატაციის საფუძველზე. ბავშვი ყოველთვის საჩუქარია და არასდროს არის კომერციული ხელშეკრულების საფუძველი“, – განაცხადა მან.

გზა რთული იქნება, მაგრამ მშვიდობას ალტერნატივა არ აქვს, – ამის შესახებ ევროკავშირის უმაღლესმა წარმომადგენელმა საგარეო საქმეთა და უსაფრთხოების საკითხებში, ჯოზეფ ბორელმა განაცხადა.

ისრაელ-პალესტინას კონტექსტში ბორელმა აღნიშნა, რომ საუდის არაბეთის საგარეო საქმეთა მინისტრთან ორი სახელმწიფოს პრინციპზე დაფუძნებული სამშვიდობო ინიციატივა განიხილა.

„ფეისალ ბინ ფარჰან ალ-საუდთან ჩვენი ერთობლივი სამშვიდობო ინიციატივა და ორი სახელმწიფოს პრინციპზე დაფუძნებული გადაწყვეტის შესახებ საერთაშორისო კონსენსუსის მოქმედებაში მოყვანის ნაბიჯები განვიხილე. გზა რთული იქნება, მაგრამ მშვიდობას ალტერნატივა არ აქვს“, – განაცხადა ჯოზეფ ბორელმა.

ბორელმა აღნიშნა, რომ პრინცი ფეისალი 22 იანვარს ბრიუსელში, ევროკავშირის საგარეო საქმეთა საბჭოს სხდომაზე მიიწვია.

ღაზაში ომის სწრაფად დასასრულებლად „დიდი შვიდეული“ ისრაელთან ერთად მუშაობს , – ამის შესახებ იტალიის საგარეო საქმეთა მინისტრმა, ანტონიო ტაიანიმ ბრიტანელ და ფრანგ კოლეგებთან სატელეფონო საუბრისას განაცხადა.

„ერთ მიზანს პალესტინელი მშვიდობიანი მოსახლეობის მსხვერპლის შემცირება წარმოადგენს, მეორეს კი ისრაელის მთავრობაზე ზეწოლა, რათა მან ღაზაში სამხედრო ოპერაციები დაასრულოს“, – განაცხადა ანტონიო ტაიანიმ.

იტალიის საგარეო საქმეთა მინისტრმა აღნიშნა, რომ მნიშვნელოვანია ორი სახელმწიფოს პრინციპზე დაფუძნებული გადაწყვეტის შესახებ მოლაპარაკებების თავიდან დაწყება.

ანტონიო ტაიანიმ დევიდ კამერონთან და კატრინ კოლონასთან სატელეფონო საუბრისას „დიდი შვიდეულის“ მიერ უკრაინის მხარდაჭერა კიდევ ერთხელ დაადასტურა.

ჩინეთში თოვლისგან დამზადებული ქანდაკებების საერთაშორისო კონკურსი მიმდინარეობს. ჰარბინის პროვინციაში საუკეთესო ნამუშევრის ტიტულის მოსაპოვებლად, 12 ქვეყნიდან ჩასული მოქანდაკეები იბრძვიან.

ყინულის ქანდაკებების საერთაშორისო კონკურსი, ჰარბინის ყინულის და თოვლის ფესტივალის ფარგლებში მიმდინარეობს.

ღონისძიება პანდემიის შემდეგ წელს პირველად იმართება. ფესტივალთან დაკავშირებით ჰარბინის პროვინცია რეკორდული რაოდენობის ტურისტს მასპინძლობს.

ჩრდილოეთში უსაფრთხოების აღსადგენად ყველაფერს გავაკეთებთ, – ამის შესახებ ისრაელის პრემიერ-მინისტრმა, ბენიამინ ნეთანიაჰუმ ჯარისკაცებთან შეხვედრისას განაცხადა.

„ჩვენ ყველაფერს გავაკეთებთ იმისთვის, რომ ჩრდილოეთში უსაფრთხოება აღვადგინოთ და თქვენს ოჯახებს, რადგან ბევრი თქვენგანი ადგილობრივია, სახლში უსაფრთხოდ დაბრუნების საშუალება მივცეთ. იცოდეთ, რომ ჩვენ ყველაფერს გავაკეთებთ. რა თქმა უნდა, გვირჩევნია ეს ფართო სამხედრო კამპანიის გარეშე გაკეთდეს, მაგრამ ხელს ვერაფერი შეგვიშლის“, – განაცხადა ისრაელის პრემიერ-მინისტრმა.

ნეთანიაჰუ ისრაელ-ლიბანის საზღვართან მდებარე ისრაელის თავდაცვის ძალების სამხედრო ბაზას ესტუმრა და ჯარისკაცებს გაწეული სამსახურისთვის მადლობა გადაუხადა.

„ჩვენ მათ იმის მაგალითი ვაჩვენეთ, თუ რა ემართებათ მათ მეგობრებს სამხრეთში, მსგავსი რამ მოხდება აქ, ჩრდილოეთშიც. ჩვენ უსაფრთხოების აღსადგენად ყველაფერს გავაკეთებთ“, – აღნიშნა ბენიამინ ნეთანიაჰუმ.

იაპონიის მიწისძვრისგან დაზარალებულ რაიონებში დიდთოვლობაა. უამინდობამ იშიკავის პრეფექტურაში, სტიქიური უბედურების ზონაში სამაშველო და სამძებრო ოპერაცია გაართულა.

ადგილობრივი ადმინისტრაცია მოსახლეობას მოუწოდებს, მოერიდონ მიწისძვრისგან დაზიანებულ შენობებს, რადგან ჰაერის დაბალმა ტემპერატურამ და თოვლის მაღალმა საფარმა შესაძლოა მათი ნგრევა გამოიწვიოს.

ოფიციალური მონაცემებით, ამ დროისათვის იშიკავის პროვინციაში მიწისძვრის დროს 168 ადამიანი დაიღუპა, 323 კი უგზო-უკვლოდ დაკარგულად მიიჩნევა. ადგილობრივი მეტეოროლოგიური სამსახურები უხვ ნალექს ვარაუდობენ, რაც გზებზე მიმოსვლის შეფერხებასა და სტიქიის ზონაში ჰუმანიტარული ტვირთის მიწოდებას გაართულებს.