თიბისის სერვისები ემიგრანტებისთვის

10:53 - 07/11/2023

დღეიდან, თიბისი ბანკის სერვისები ხელმისაწვდომი ხდება ემიგრანტებისთვის.

მხოლოდ ვიდეო ბანკით, მსოფლიოს ნებისმიერი წერტილიდან, შეძლებთ გახდეთ თიბისის ბანკის მომხმარებელი – გახსნათ ანგარიში, ისარგებლოთ პირადი კონსულტანტის მომსახურებით და მართოთ თქვენი ფინანსები დისტანციურად.

სურვილის შემთხვევაში, ემიგრანტებმა ვიდეო ბანკით სარგებლობისთვის უნდა მოგვწერონ თიბისი ბანკის facebook-ის ოფიციალური გვერდის მესენჯერში ან დაგვიკავშირდნენ ცხელ ხაზზე 032 227 27 27. მოთხოვნის დაფიქსირების შემდეგ, თქვენთვის სასურველ დროს ჩაგინიშნავთ ონლაინ შეხვედრას და გამოგიგზავნით ზარის ბმულს.

იმისათვის რომ გახდეთ თიბისი ბანკის მომხმარებელი დაგჭირდებათ მხოლოდ მობილური ტელეფონი ან ლეპტოპი, აგრეთვე საქართველოს მოქალაქის პასპორტი ან პირადობის მოწმობა.

ვიდეო ბანკის მეშვეობით, მარტივად შეძლებთ გახდეთ თიბისის მომხმარებელი და თავად მართოთ ფინანსები დისტანციურად.

“ქართული ოცნების” ე.წ. პოლიტიკა კიდევ უფრო დაუცველს ტოვებს მოქალაქეებს” – თეონა აქუბარდია

10:40 - 07/11/2023

„ქართული ოცნების“ ე.წ. პოლიტიკა კიდევ უფრო დაუცველს ტოვებს მოქალაქეებს – სუს- ის განცხადება ბმაშია „ქართული ოცნების” კაპიტულანტურ პოლიტიკასთან, – ამის შესახებ ოპოზიციონერმა დეპუტატმა, თეონა აქუბარდიამ განაცხადა.

მისი თქმით, „ქართული ოცნება” მშვიდობის მანტიას ირგებს, თუმცა, ქვეყანაში არ არის მშვიდობა. ამასთან, დეპუტატი აღნიშნავს, რომ ოკუპაციის კუთხით “ქართული ოცნების” წევრების მხრიდან წინა ხელისუფლებისკენ “თითის გაშვერა” მიუთითებს, რომ ისინი არ აღიარებენ საკუთარ პასუხისმგებლობას ოკუპაციასა და მის შედეგებთან გამკლავების თვალსაზრისით.

„გუშინ ოკუპანტებმა მოგვიკლეს ყოფილი სამხედრო და ეს კიდევ ერთხელ ხაზს უსვამს რუსულ ოკუპაციას, რომელიც არ არის დასრულებული შედეგი. პარლამენტში გვაქვს მიღებული შესაბამისი დადგენილება, ისევე როგორც არსებობს 2018 წელს მიღებული მთავრობის დადგენილება, ტატუნაშვილი – ოთხოზორიას სია და მაშინ, როცა ხელისუფლების წარმომადგენლები თითს იშვერენ წინა ხელისუფლებისკენ, ისინი არ აღიარებენ იმ პასუხისმგებლობას, რომელიც მოქმედ ხელისუფლებას აქვს რუსულ ოკუპაციასა და მის შედეგებთან გასამკლავებლად. წლის დასაწყისში ოკუპირებული ცხინვალის ახალგორის ე.წ. პროკურორად დაინიშნა ტატუნაშვილის მკვლელების სიაში მყოფი პირი – გურწიევი, მაშინ ხელისუფლებას მოვუწოდე რეაგირება გაეკეთებინა მთავრობის დადგენილების შესაბამისად, თუმცა ამაზე ხმა არ ამოუღიათ, რაც ნიშნავს, რომ ტატუნაშვილი- ოთხოზორიას სიაში მყოფი დამნაშავეების დაკავებაზე “ქართულ ოცნებას” არ უმუშავია და მათი ე.წ. პოლიტიკა კიდევ უფრო აძლიერებს რუსულ საფრთხეებს და კიდევ უფრო დაუცველს ტოვებს ჩვენს მოქალაქეებს. რუსეთთან მიმართებით ახორციელებს არასწორ პოლიტიკას, თითქოს მშვიდობის დამცველის მანტიის მორგება, ხოლო ჩვენ ვხედავთ, რომ მშვიდობა არ გვაქვს ქვეყანაში და არ გვექნება მანამ, სანამ რუსი ოკუპანტი დგას ჩვენს მიწაზე,”- განაცხადა აქუბარდიამ.

ის ასევე გამოეხმაურა სუს- ის განცხადებას და აღნიშნა, რომ სუს- მა თავდაპირველად, მკვლელობას უწოდა გარდაცვალება, ხოლო ადგილზე მყოფ მესამე მოქალაქეზე, რომელმაც გაქცევით უშველა თავს და გორის პოლიციაში კითხავდნენ, საზოგადოებას ინფორმაცია არ მიაწოდა.

„სუს- ის ორი განცხადება ორი საათის ინტერვალით, რა თქმა უნდა, გამოწვეული იყო იმ საჯარო პოზიციით, რასაც ჩვენი მოქალაქეები გამოხატავდნენ. მათ თქვეს, რომ ოკუპირებულ ტერიტორიაზე მოხდა ეს ფაქტი და მე არ მესმის, რატომ იყო ხაზგასმა ოკუპირებულ ტერიტორიაზე, მათ მკვლელობას უწოდეს გარდაცვალება და ორი საათის შემდეგ გადააკეთეს გარდაცვალება მკვლელობის ფაქტად, მაგრამ არ გვითხრეს საქართველოს მესამე მოქალაქეზე, რომელმაც თავი დააღწია გაქცევით და ის იკითხებოდა გორის პოლიციაში. ამის შესახებ არ მესმის რატომ უნდა ვიგებდეთ რადიო „თავისუფლების” ჟურნალისტისგან და რატომ არ გააკეთა ამაზე განცხადება სუს-მა. სუს- ის განცხადება ბმაშია „ქართული ოცნების” კაპიტულანტურ პოლიტიკასთან,”- განაცხადა აქუბარდიამ.

“რუსო ოკუპანტებო! გგონიათ, რომ ყველაფრის უფლება გაქვთ?” – მარნეულისა და ჰუჯაბის ეპისკოპოსი

10:35 - 07/11/2023

რუსო ოკუპანტებო! თქვენ გგონიათ, რომ ჩვენ მცირერიცხოვანი ერი ვართ და ამიტომ ყველაფრის უფლება გაქვთ – მოგვექცეთ ისე, როგორც გვექცევით?!- ამის შესახებ მარნეულისა და ჰუჯაბის ეპისკოპოსი გიორგი ჯამდელიანი სოციალურ ქსელში წერს.

მისივე თქმით, დადგება დრო, როდესაც „ყოველი ქართველის დაღვრილი სისხლისთვის დიდ ფასს გადაიხდიან“.

„რუსო ოკუპანტებო! თქვენ გგონიათ,რომ ჩვენ მცირერიცხოვანი ერი ვართ და ამიტომ ყველაფრის უფლება გაქვთ – მოგვექცეთ ისე, როგორც გვექცევით?! მოგვკლათ, გაიტაცოთ ჩვენი თანამემამულეები, დაიტაცოთ ჩვენი ტერიტორიები?! რით ვერ გაძეხით ჩვენი სისხლით?! ერთი რამ იცოდეთ, დადგება დრო, ყოველი ქართველის დაღვრილი სისხლისთვის დიდ ფასს გადაიხდით!

„ვინც ქვებს მიათრევს, წელს ქვავე მოსწყვეტს; ხის გამჩეხავს ხევე დაასახიჩრებს და ვინც მახვილს აიღებს მახვილითვე დაეცემა”,- აღნიშნავს მარნეულისა და ჰუჯაბის ეპისკოპოსი.

ინფორმაციისთვის, საოკუპაციო ხაზის მიმდებარედ რუსეთის საოკუპაციო ძალებმა ცეცხლსასროლი იარაღით სროლის შედეგად საქართველოს მოქალაქე მოკლეს. საქართველოს სახელმწიფო უსაფრთხოების სამსახური მომხდარზე განცხადებას ავრცელებს და აცხადებს, რომ რუსეთის საოკუპაციო ძალებმა უკანონოდ დააკავეს საქართველოს კიდევ ერთი მოქალაქე.

კერძოდ, სუს-ის ინფორმაციის თანახმად, “2023 წლის 6 ნოემბერს გორის მუნიციპალიტეტის სოფელ კირბალის მიმდებარედ, ოკუპირებულ ტერიტორიაზე, ადგილობრივი მცხოვრების უკანონოდ დაკავების მცდელობისას რუსეთის საოკუპაციო ძალების მიერ ცეცხლსასროლი იარაღით სროლის შედეგად გარდაიცვალა საქართველოს მოქალაქე და უკანონოდ დაკავებულ იქნა ერთი მოქალაქე”. შსს-მ გორის მუნიციპალიტეტის სოფელ კირბალთან, რუსეთის საოკუპაციო ძალის წარმომადგენლის მიერ ცეცხლსასროლი იარაღიდან გასროლის შედეგად საქართველოს მოქალაქის მკვლელობის და ერთი პირის გატაცების ფაქტებთან დაკავშირებით გამოძიება სისხლის სამართლის კოდექსის 109-ე და 143-ე მუხლებით დაიწყო, რაც განზრახ მკვლელობას და თავისუფლების უკანონო აღკვეთას გულისხმობს.

დამწუხრებული ვარ რუსი ოფიცრების მიერ საქართველოს მოქალაქის მკვლელობის გამო-მარია პეიჩინოვიჩ ბურიჩი

10:31 - 07/11/2023

ევროპის საბჭოს გენერალური მდივანი მარია პეიჩინოვიჩ ბურიჩი კირბალში რუსეთის საოკუპაციო ძალების მიერ სროლის შედეგად საქართველოს მოქალაქის მკვლელობის ფაქტს „ტვიტერზე“ ეხმაურება.

„დამწუხრებული ვარ საქართველოს ცხინვალი/სამხრეთ ოსეთის რეგიონში, საოკუპაციო ხაზთან, რუსი ოფიცრების მიერ საქართველოს მოქალაქის მკვლელობის გამო, ვუსამძიმრებ დაღუპულის ოჯახსა და საქართველოს მთავრობას. ასევე, მოვუწოდებთ მეორე მხარეს გაათავისუფლონ გატაცებული მოქალაქე“, – ნათქვამია განცხადებაში.

კირბალის მიმდებარედ, ოკუპირებულ ტერიტორიაზე რუსეთის საოკუპაციო ძალებმა საქართველოს მოქალაქე თამაზ გინტური მოკლეს და უკანონოდ დააკავეს ერთი მოქალაქე. მომხდართან დაკავშირებით საქართველოს ცენტრალური ხელისუფლების მოთხოვნით, ერგნეთში შეხვედრა გაიმართა.

“ჩვენ გვაქვს „ჰამასის“ ტერორის ამოფრქვევა ისეთი მასშტაბით, როგორსაც ვერ წარმოვიდგენდით”

10:23 - 07/11/2023

ისრაელს „ჰამასის“ წინააღმდეგ ომის დასრულების შემდეგ, ღაზის სექტორზე საერთო უსაფრთხოების პასუხისმგებლობა განუსაზღვრელი ვადით ექნება, – ამის შესახებ ისრაელის პრემიერ-მინისტრმა, ბენიამინ ნეთანიაჰუმ ABC News-თან ინტერვიუში განაცხადა.

„ვფიქრობ, ისრაელს განუსაზღვრელი ვადით დაეკისრება საერთო უსაფრთხოების პასუხისმგებლობა, რადგან ჩვენ ვნახეთ, რა ხდება იმ დროს, როცა ის არ გვაქვს. როდესაც ჩვენ არ გვაქვს ეს პასუხისმგებლობა უსაფრთხოების შესახებ, ჩვენ გვაქვს „ჰამასის“ ტერორის ამოფრქვევა ისეთი მასშტაბით, როგორსაც ვერ წარმოვიდგენდით“, – აღნიშნა ნეთანიაჰუმ.

ჟურნალისტის შეკითხვაზე, დაეთანხმება თუ არა აშშ-ის პრეზიდენტის, ჯო ბაიდენის მოწოდებას ჰუმანიტარული პაუზების შესახებ, ისრაელის პრემიერ-მინისტრმა აღნიშნა, რომ ეწინააღმდეგება გრძელვადიანი ცეცხლის შეწყვეტას იმ მოტივით, რომ ეს იქნება „ჰამასთან“ ბრძოლაში დანებება.

„რაც შეეხება პრაქტიკულს, მცირე პაუზები – ერთი საათი აქ, ერთი საათი იქ, ჩვენ ისინი ადრეც გვქონდა. ჩვენ შევამოწმებთ გარემოებებს, რათა მივცეთ საშუალება ჰუმანიტარული ტვირთის შესატანად ან ჩვენი მძევლების, ცალკეული მძევლების გამოსაყვანად“, – განაცხადა ნეთანიაჰუმ.

როგორც NBC News აღნიშნავს, ამ განცხადებით ნეთანიაჰუ გახდა ისრაელის პირველი ოფიციალური პირი, რომელმაც დაადასტურა, რომ იერუსალიმი დათანხმდა ბრძოლის დროებით შეჩერებას.

ამასთან, ისრაელის პრემიერ-მინისტრმა აღნიშნა, რომ ის დათანხმდება ცეცხლის შეწყვეტას იმ შემთხვევაში, თუ „ჰამასი“ გაათავისუფლებს დაახლოებით 240 მძევალს, რომლებიც ღაზაში არიან დაკავებული.

„ამ შემთხვევაში მოხდება ცეცხლის შეწყვეტა და ჩვენ ველოდებით ამას. ეს აქამდე არ მომხდარა“, – განაცხადა ნეთანიაჰუმ.

პრემიერ-მინისტრის თქმით, ისრაელს აქვს გარკვეული ინფორმაცია იმის შესახებ, თუ სად არიან მძევლები, მაგრამ დეტალებზე არ საუბრობს.

სახელმწიფოს კუთვნილი დიდი ოდენობით ფულადი თანხის მოტყუებით დაუფლების ფაქტზე მხილებულია პირთა ჯგუფი

10:21 - 07/11/2023

საქართველოს ფინანსთა სამინისტროს საგამოძიებო სამსახურის თანამშრომლების მიერ, გატარებული ოპერატიულ-სამძებრო ღონისძიებებისა და საგამოძიებო მოქმედებების შედეგად, ჯგუფურად, ყალბი საგადასახადო დოკუმენტების დამზადება-გამოყენების გზით, სახელმწიფო ბიუჯეტის კუთვნილი დიდი ოდენობით ფულადი თანხის მოტყუებით დაუფლების, სახელმწიფო ბიუჯეტის ქონებრივი დაზიანებისა და ცრუ მეწარმეობის ფაქტებზე, სისხლისსამართლებრივი დევნა სამი პირის მიმართ დაიწყო.

ფინანსთა სამინისტროს საგამოძიებო სამსახურის ინფორმაციით, გამოძიებით დადგინდა, რომ ბრალდებულებმა, წინასწარი შეთანხმებით, უკანონო მატერიალური სარგებლის მიღების მიზნით, მათ მმართველობაში არსებული კომპანიების სახელით, გაწერეს 2 345 524 ლარის ღირებულების დღგ-ს ყალბი საგადასახადო ანგარიშ-ფაქტურები, თითქოს და სამშენებლო-სარემონტო სამუშაოების შესრულების თაობაზე, რა გზითაც შეიქმნეს 357 791 ლარის ოდენობის დღგ-ს ყალბი აქტივი, საიდანაც 164 375 ლარი გამოიყენეს მიმდინარე საგადასახადო ვალდებულებების შესამცირებლად, ხოლო დარჩენილი თანხა – 193 416 ლარი დაიბრუნეს სახელმწიფო ბიუჯეტიდან.

„ტარდება შესაბამისი ღონისძიებები სახელმწიფო ბიუჯეტზე მიყენებული ზიანის ანაზღაურების მიზნით.

გამოძიება მიმდინარეობს საქართველოს სისხლის სამართლის კოდექსის 210-ე, 180-ე, 185-ე და 193-ე მუხლებით, რაც სასჯელის სახით ითვალისწინებს თავისუფლების აღკვეთას 6-დან 9 წლამდე ვადით“, – აღნიშნულია ინფორმაციაში.

ისრაელის სახმელეთო ოპერაციები, მუდმივი დაბომბვა ურტყამს მშვიდობიან მოსახლეობას -ანტონიო გუტერეში

10:05 - 07/11/2023

მშვიდობიანი მოსახლეობის დაცვა უმთავრესი უნდა იყოს, – ამის შესახებ გაერო-ს გენერალურმა მდივანმა, ანტონიო გუტერეშმა განაცხადა.

„ისრაელის თავდაცვის ძალების სახმელეთო ოპერაციები და მუდმივი დაბომბვა ურტყამს მშვიდობიან მოსახლეობას, საავადმყოფოებს, ლტოლვილთა ბანაკებს, მეჩეთებს, ეკლესიებსა და გაერო-ს ობიექტებს, თავშესაფრების ჩათვლით, არავინ არის დაცული. ამავდროულად, „ჰამასი“ მშვიდობიან მოსახლეობას ფარად იყენებს და განაგრძობს განურჩევლად რაკეტების გაშვებას ისრაელის მიმართულებით. მე ვიმეორებ ჩემს პოზიციას და ვგმობ 7 ოქტომბერს „ჰამასის“ მიერ განხორციელებული ამაზრზენ ტერორისტული აქტებს ისრაელის მიმართ და ვიმეორებ ჩემს მოწოდებას, დაუყოვნებლივ, უპირობოდ და უსაფრთხოდ გაათავისუფლონ ღაზაში მყოფი მძევლები“, – განაცხადა გუტერეშმა.

გუტერეშის თქმით, 89 ადამიანი, რომელიც მუშაობდა გაერო-ს პალესტინის ლტოლვილთა სააგენტოსთან, დაიღუპა ღაზაში, რაც გაერო-ს დამხმარე მუშაკების ყველაზე მაღალი მაჩვენებელია „ორგანიზაციის ისტორიის ნებისმიერ შესადარებელ პერიოდში“.

„ღაზა ბავშვების სასაფლაო ხდება. გავრცელებული ინფორმაციით, ყოველდღიურად ასობით გოგო და ბიჭი იღუპება ან ზიანდება. ოთხი კვირის განმავლობაში უფრო მეტი ჟურნალისტი დაიღუპა, ვიდრე ნებისმიერ კონფლიქტში, სულ მცირე, სამი ათწლეულის განმავლობაში. უფრო მეტი გაერო-ს დამხმარე მუშაკი დაიღუპა, ვიდრე ჩვენი ორგანიზაციის ისტორიის ნებისმიერ შესადარებელ პერიოდში. მივესალმები ყველას, ვინც აგრძელებს სიცოცხლის გადარჩენისთვის ბრძოლას დიდი გამოწვევებისა და რისკების მიუხედავად. განვითარებული კატასტროფა ყოველი გასული საათის განმავლობაში უფრო აუცილებელს ხდის ცეცხლის ჰუმანიტარულ შეწყვეტას. კონფლიქტის მხარეებს და, მართლაც, საერთაშორისო საზოგადოებას ეკისრებათ დაუყოვნებელი და ფუნდამენტური პასუხისმგებლობა, შეაჩერონ არაადამიანური კოლექტიური ტანჯვა და მკვეთრად გააფართოონ ჰუმანიტარული დახმარება ღაზაში“, – განაცხადა გუტერეშმა.

გაფართოების შესახებ ევროკომისიის ყოველწლიური მოხსენება ხვალ გამოქვეყნდება

09:56 - 07/11/2023

ევროკომისიის პასუხამდე ერთი დღე რჩება, ისტორიულ გადაწყვეტილებას კი ევროპელი ლიდერები 15 დეკემბერს მიიღებენ.

როგორ ასრულებს ქვეყანა რეკომენდაციებს და იმსახურებს თუ არა კანდიდატის სტატუსს – მმართველ გუნდს პოზიტიური მოლოდინები აქვს, ოპოზიციის ნაწილი პროგნოზირებს, რომ კანდიდატის სტატუსს გარკვეული დათქმებით მოგვანიჭებენ, ნაწილი კი რეკომენდაციებს შეუსრულებლად მიიჩნევს.

ახლა არჩევნებისთვის მომზადების დრო არ არის, უკრაინა ოკუპანტებთან ბრძოლაზე უნდა კონცენტრირდეს -ზელენსკი

09:48 - 07/11/2023

ახლა არჩევნებისთვის მომზადების დრო არ არის, უკრაინა ოკუპანტებთან ბრძოლაზე უნდა კონცენტრირდეს, – ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა.

„ყველას გვესმის, რომ ახლა ომის დროა, როცა ბევრი გამოწვევაა. აბსოლუტურად უპასუხისმგებლოა არჩევნების თემის საზოგადოებაში ასე უაზროდ და თამაშით გავრცელება. ყველა შესაბამისი სტრუქტურისა და თანამდებობის პირისგან ველოდები კონკრეტულ პასუხებს იმ ამოცანებთან დაკავშირებით, რაც გვაქვს, რომელიც ახლა ობიექტურად ჩვენი სახელმწიფოს წინაშე დგას. ეს ეხება სამოქალაქო ხელისუფლებას, სახელმწიფოს სამხედრო ელემენტებს, უკრაინის უმაღლეს რადას, უკრაინის უშიშროების სამსახურსა და სხვა სამართალდამცავ უწყებებს. მე მჯერა, რომ ახლა არ არის არჩევნების დრო. და თუ თქვენ გჭირდებათ, ბოლო მოუღოთ ამა თუ იმ პოლიტიკურ დავას და გააგრძელოთ მუშაობა ერთად, მაშინ სახელმწიფოში არის სტრუქტურები, რომლებსაც შეუძლიათ, ბოლო მოუღონ ამას და მივცეთ საზოგადოებას ყველა საჭირო პასუხი, რათა ადგილი არ დარჩეს კონფლიქტებისა და სხვისი თამაშისთვის უკრაინის წინააღმდეგ“, – აღნიშნა ზელენსკიმ.

აშშ გმობს რუსეთის საოკუპაციო ძალების მიერ საქართველოს მოქალაქის მკვლელობას – მეთიუ მილერი

09:37 - 07/11/2023

ამერიკის შეერთებული შტატები გმობს საქართველოში რუსეთის საოკუპაციო ძალების მიერ საქართველოს მოქალაქის, თამაზ გინტურის მკვლელობას და მწუხარებას გამოთქვამს, – ამის შესახებ ნათქვამია აშშ-ის სახელმწიფო დეპარტამენტის სპიკერის, მეთიუ მილერის განცხადებაში, რომელსაც საქართველოში აშშ-ის საელჩო ავრცელებს.

„ეს სიკვდილი არის ნათელი მაგალითი იმ ნგრევისა, რომელსაც რუსეთი იწვევს საქართველოსა და სხვა სუვერენული ტერიტორიების მიმდინარე ოკუპაციით“, – აღნიშნულია განცხადებაში.

სახელმწიფო უსაფრთხოების სამსახურის ინფორმაციით, კირბალის მიმდებარედ, ოკუპირებულ ტერიტორიაზე ადგილობრივი მცხოვრებლის უკანონოდ დაკავების მცდელობისას რუსეთის საოკუპაციო ძალების მიერ სროლის შედეგად გარდაიცვალა საქართველოს მოქალაქე.

https://www.facebook.com/photo.php?fbid=747894817380454&set=a.300589302111010&type=3&ref=embed_post

“თამაზ გინტურის მკვლელობა არის ოკუპაციის კიდევ ერთი უმძიმესი შედეგი, რომელზეც პასუხისმგებლობა ოკუპანტ მხარეს ეკისრება”-მამუკა მდინარაძე

09:00 - 07/11/2023

საქართველო ყველა არსებულ და შესაძლო ბერკეტს გამოიყენებს, რომ დამნაშავეებმა სათანადოდ აგონ პასუხი, – ამის შესახებ ფრაქცია „ქართული ოცნების“ თავმჯდომარე მამუკა მდინარაძე სოციალურ ქსელში წერს.

მდინარაძის თქმით, თამაზ გინტურის მკვლელობა არის ოკუპაციის კიდევ ერთი უმძიმესი შედეგი.

„ვუსამძიმრებ თამაზ გინტურის ოჯახის წევრებსა და ახლობლებს! მისი მკვლელობა არის უმძიმესი დანაშაული, უკიდურესად შემაშფოთებელი ფაქტი და რუსეთის მიერ საქართველოს ტერიტორიების ოკუპაციის კიდევ ერთი უმძიმესი შედეგი, რომელზეც სრული პასუხისმგებლობა ოკუპანტ მხარეს ეკისრება!

პასუხისმგებლობას ვერ გაექცევა ვერც ის პოლიტიკური ძალა, ვინც თავისი მოღალატეობრივი ქმედებებით რუსეთს ჩვენს ქვეყანაში ოკუპაციის საშუალება მისცა და ტერიტორიები გადაუფორმა.

დღეს ამ ტრაგედიით სარგებლობას ის ხალხი ცდილობს, ვინც ეს უმძიმესი მემკვიდრეობა დაგვიტოვა, ვინც ქართველ სამხედროებს ომის დაწყება და ომის დანაშაული დააბრალა.

მათი უამრავი გაფუჭებული გამოვასწორეთ, დამალული მტკიცებულებებისა და შეგნებულად არასწორად ნაწარმოები საქმეების მიუხედავად, ჰააგაც მოვიგეთ და სტრასბურგიც, თუმცა ჯერ კიდევ გადაუჭრელი რჩება ჩვენი ქვეყნის ყველაზე მთავარი, წინა ხელისუფლების მიერ და დროიდან დატოვებული უდიდესი პრობლემა – რუსული ოკუპაცია და მისი თანმდევი უმძიმესი შედეგები. კოლექტიური „ნაცმოძრაობა“ კი ბედავს, ამ თემაზეც სხვისკენ გაიშვიროს ხელი!..

საქართველო ყველა არსებულ და შესაძლო ბერკეტს გამოიყენებს, რომ დამნაშავეებმა სათანადოდ აგონ პასუხი!“ – წერს მამუკა მდინარაძე „ფეისბუქზე“.

7 ნოემბრის ასტროლოგიური პროგნოზი

00:53 - 07/11/2023

ვერძი

ფინანსური თვალსაზრისით ხელსაყრელი დღეა. გამორიცხული არ არის, რომ მოულოდნელი შემოსავალი მიიღოთ. პიროვნული მომხიბვლელობა საჭირო ადამიანების გაცნობასა და მათთან ურთიერთობის დამყარებაში დაგეხმარებათ. გირჩევთ საღამო სახლის გარეთ, ხალხმრავალ ადგილზე გაატაროთ და გაერთოთ.

კურო

თუ შესაძლებელია, საქმიანი აქტიურობა შეამცირეთ და ცოტა დაისვენეთ. ეს დაგეხმარებათ, პრობლემებს სხვა კუთხით შეხედოთ და შემდეგ დღეებში თქვენი შრომის ნაყოფიერება გაზარდოთ. მთლიანობაში, ეს დღე ნაყოფიერად ჩაივლის, მით უმეტეს, თუ წვრილმან გაუგებრობებზე ნერვებს და დროს არ დახარჯავთ.

ტყუპები

საბრძოლო განწყობის დამსახურებით, ამ დღეს ნებისმიერ საქმეს წარმატებით გაუმკლავდებით. შედეგის მისაღწევად ძალას არ იშურებთ, მაგრამ გარემოებები თქვენ წინააღმდეგაა. ნუ ინერვიულებთ, თუკი გეგმების შეცვლა მოგიწევთ. სამაგიეროდ, საღამოს რაღაც საკითხში ძალიან გაგიმართლებთ.

კირჩხიბი

თქვენი ოცნებები ნელ-ნელა სრულდება. დღის პირველი ნახევარი, საღამოსთან შედარებით, გაცილებით წარმატებული იქნება. თუმცა, სერიოზული საკითხების მოგვარება, უმჯობესია, მომავალი დღეებისთვის გადადოთ.

ლომი

ჰოროსკოპი გირჩევთ, ფულის დაგროვება დაიწყოთ – სავარაუდოდ, უახლოეს ხანებში დაუგეგმავი ხარჯი გელით. დილიდან უმიზეზო შფოთვას გრძნობთ, ამიტომ გირჩევთ, აქტიურობა შეამციროთ და ცოტა დაისვენოთ. საყვარელ ადამიანებთან საუბარი, საკუთარი გრძნობების და განცდების გაზიარება სტრესისგან გაგათავისუფლებთ.

ქალწული

ეცადეთ, ახალი პროექტის დაწყებამდე ძველი ვალდებულებები შეასრულოთ, რათა ყურადღება არ გაგეფანტოთ და მნიშვნელოვან საკითხებზე კონცენტრირება შეძლოთ. ამ დღეს მიღებული ნებისმიერი ინფორმაცია კარგად გადაამოწმეთ და საერთოდაც – ნუ დაუჯერებთ ყველაფერს, რასაც სხვები გეტყვიან.

სასწორი

ჰოროსკოპის ვარსკვლავები თქვენ მიმართ კეთილგანწყობას იჩენენ. ეს დღე მშვიდად, განსაკუთრებული რყევების გარეშე ჩაივლის. დრო საქმისთვისაც გექნებათ, დასვენებისთვისაც და მეგობრების დახმარებასაც შეძლებთ. დღის განმავლობაში სასიამოვნო სიურპრიზები გელით, უსიამოვნო მოულოდნელობისგან კი შინაგანი წინდახედულობა გიხსნით. თუ მარტოხელა ხართ, ამ დღეს შეიძლება ვიღაც განსაკუთრებული ადამიანი გაიცნოთ.

მორიელი

საკითხები, რომლებიც ცოტა ხნის წინ განიხილეთ, ისევ აქტუალური იქნება და მათთან დაბრუნება მოგიწევთ. ნერვიულობა სწორი გადაწყვეტილების მიღებაში ხელს გიშლით. საყვარელ ადამიანთან ურთიერთობა სტრესისგან გაგათავისუფლებთ. ბედმა შეიძლება საქმეში წინსვლისთვის შესანიშნავი შანსი მოგცეთ. ეცადეთ, ხელიდან არ გაუშვათ, თორემ დიდხანს ინანებთ.

მშვილდოსანი

დღის განმავლობაში თქვენი გეგმები რამდენჯერმე შეიცვლება. თუ პრობლემას სტანდარტული მეთოდებით ვერ აგვარებთ, შემოქმედებითი მიდგომა დაიხმარეთ და ოპტიმისტური განწყობაც შეინარჩუნეთ. შეგიძლიათ, რთულ დროს დახმარებისთვის მეგობრებს მიმართოთ. ახლობელი ადამიანების გარემოცვაში დასვენება თქვენს ჯანმრთელობაზე სასიკეთოდ აისახება.

თხის რქა

მომგებიანი შესაძლებლობა, რომელსაც ეს დღე გთავაზობთ, ხელიდან არ უნდა გაუშვათ. თუ ძალებს სწორად გაანაწილებთ, ზოგი თქვენი ჩანაფიქრი შეიძლება ასრულდეს. ეცადეთ, ძველი, დაუსრულებელი საქმეები დროულად დაასრულოთ და მომავლის გეგმები დასახოთ. თუ ცხოვრების მეგზური არ გყავთ, შეიძლება გრძნობა ისე მოულოდნელად გეწვიოთ, რომ დიდხანს ვერ გააცნობიეროთ.

მერწყული

ემოციურად რთული დღეა. დილიდან შინაგან შფოთვას და ნერვიულობას განიცდით. გირჩევთ, მნიშვნელოვანი გადაწყვეტილებების მიღება სხვა დღისთვის გადადეთ, ასევე ნუ დაიწყებთ საქმეს, რომელიც სიზუსტეს და ყურადღებას მოითხოვს. ენდეთ თქვენს ინტუიციას – ის განიშნებთ, მოულოდნელ სიტუაციებში როგორ უნდა იმოქმედოთ.

თევზები

ამ დღეს პლანეტების კეთილგანწყობა და ვარსკვლავების ხელსაყრელი განლაგება მიზნის მიღწევაში დაგეხმარებათ. ვერც ერთი გაუთვალისწინებელი გარემოება გზიდან ვერ აგაცდენთ და საქმის ბოლომდე მიყვანას შეძლებთ. მთავარია, ღრუბლებიდან მიწაზე დაეშვათ და უფრო რეალურად იაზროვნოთ.

1...1,8031,8041,805...2,722 Page 1,804 of 2,722