ირანი აშშ-ს, გაერთიანებულ სამეფოსა და საფრანგეთს მათი სამხედრო ბაზებისა და გემების დაბომბვით ემუქრება, თუ ისრაელს ირანის მიერ საპასუხო იერიშის ფარგლებში გაშვებული რაკეტებისა და დრონების მოგერიებაში დაეხმარებიან. ამის შესახებ ინფორმაცია დასავლურ მედიაში ირანის სახელმწიფო მაუწყებელზე დაყრდნობით ვრცელდება.

აშშ-ს პრეზიდენტმა დონალდ ტრამპმა 13 ივნისს, ირანზე ისრაელის იერიშების პირველი ტალღის შემდეგ Fox News-თან საუბრისას თქვა, რომ “საჭიროების შემთხვევაში” აშშ ისრაელს თავდაცვაში დაეხმარება. პარალელურად, მედიაში ვრცელდებოდა ცნობები, რომ ამერიკული ძალები ისრაელს ირანის მიერ საპასუხოდ გაგზავნილი დრონების ჩამოგდებაში ეხმარებოდნენ.

საფრანგეთის პრეზიდენტმა ემანუელ მაკრონმა 13 ივნისს ასევე განაცხადა, რომ მისი ქვეყანა ისრაელს ირანის თავდასხმებისგან დაცვაში დაეხმარებოდა.

გაერთიანებული სამეფოს მთავრობამ 13 ივნისს განაცხადა, რომ მის შეიარაღებულ ძალებს ისრაელისთვის რაიმე სახის სამხედრო დახმარება არ გაუწევიათ. ბრიტანეთის პრემიერმინისტრმა კირ სტარმერმა დეესკალაციის საჭიროებას გაუსვა ხაზი.

ამასთან, The Times-ის ინფორმაციით, გაერთიანებულმა სამეფომ ისრაელის თავდაპირველი იერიშების გეგმის შესახებ წინასწარ არ იცოდა.

ახლო აღმოსავლეთში განვითარებულ მოვლენებთან დაკავშირებით, აშშ-სა და რუსეთის პრეზიდენტებს შორის სატელეფონო საუბარი შედგა.

ვლადიმერ პუტინის თანაშემწის იური უშაკოვის თქმით, ლიდერებმა 50 წუთის განმავლობაში ისაუბრეს. როგორც უშაკოვმა აღნიშნა, პრეზიდენტები არ გამორიცხავენ, ირანის ბირთვულ პროგრამასთან დაკავშირებით სამშვიდობო მოლაპარაკებების ფორმატში დაბრუნების საკითხს.

მისივე ინფორმაციით, საუბრის დროს, პუტინმა დაგმო, ირანის წინააღმდეგ ისრაელის ოპერაცია. უშაკოვის თქმით, სიტუაცია საკმაოდ საგანგაშოდ შეაფასა დონალდ ტრამპმაც, თუმცა ისრაელის მიერ განხორციელებული დარტყმები ეფექტიანად მოიხსენია.

უკრაინის პრეზიდენტი ვოლოდიმირ ზელენსკი მიიჩნევს, რომ უკრაინის საკითხი აშშ-სა და რუსეთს შორის მოლაპარაკებებში უკრაინის მონაწილეობის გარეშე არ უნდა განიხილებოდეს. მან ამის შესახებ ტელეარხ „Newsmax“-თან ინტერვიუში განაცხადა.

ზელენსკიმ აშშ-რუსეთის მოლაპარაკებებს „ძალიან თბილ დიალოგი“ უწოდა და ხაზგასმით აღნიშნა, რომ მას არ აქვს უფლება, აშშ-ს უთხრას, თუ როგორ აწარმოოს დიალოგი რუსეთთან.

„ვფიქრობ, რომ პუტინს არ სურს ომის დასრულება და, საბოლოოდ, ის ტრამპს მოატყუებს. თქვენც ნახავთ ამას, ყველა, მთელი მსოფლიო დაინახავს ამას. ის ასეთი ადამიანია“, – განაცხადა ზელენსკიმ. 

ზელენსკიმ დასძინა, რომ არასწორად მიიჩნევს ასეთ მოლაპარაკებებში უკრაინის საკითხის განხილვას უკრაინის გარეშე. 

„მე ვფიქრობ, რომ უკრაინაზე უკრაინის გარეშე საუბარი არასწორია, უკრაინაზე საუბარი და ზოგიერთი საკითხის ჩვენს გარეშე გადაწყვეტა, უსამართლობაა“, – აცხადებს ზელენსკი. 

ზელენსკიმ ცოტა ხნის წინ განაცხადა, რომ ტრამპს აქვს ბერკეტები რუსეთსა და უკრაინას შორის ომის დასასრულებლად, მაგრამ ამისათვის მან უნდა გაიგოს თუ რა თამაშს თამაშობს კრემლის ლიდერი ვლადიმერ პუტინი.

ისრაელმა ჩაატარა ყველაზე მასშტაბური საჰაერო ოპერაცია ირანის წინააღმდეგ, რომელიც მიზნად ისახავდა ქვეყნის ბირთვული პროგრამის შეჩერებას, – ამის შესახებ ისრაელის თავდაცვის ძალების ოფიციალურმა წარმომადგენელმა, ეფი დეფრინმა განაცხადა.

„70-ზე მეტმა საბრძოლო თვითმფრინავმა შეძლო ორსაათ-ნახევრის განმავლობაში თეირანის თავზე ფრენა და 40-ზე მეტ სამიზნეზე დარტყმა. თეირანამდე გზა გახსნილია“, – განაცხადა დეფრინმა.

ისრაელის სამხედროებმა განაცხადეს, რომ გაანადგურეს ირანის საჰაერო თავდაცვა. დეფრინის თქმით, ეს ირანის ყველაზე ღრმა ტერიტორიაა, სადაც ისრაელის საჰაერო ძალებს მანამდე უმოქმედიათ.

„ჩვენ დავამყარეთ საჰაერო თავისუფლება, რომელიც საშუალებას მოგვცემს, ვიმოქმედოთ და ავიცილოთ ისრაელის სახელმწიფოს წინააღმდეგ მიმართული საფრთხეები“, – განაცხადა დეფრინმა.