მედიასთან დაკავშირებით, დიდი ბრიტანეთის ელჩის მიერ გაკეთებულ მიმართვას საქართველოს პარლამენტის თავმჯდომარის პირველი მოადგილე გიორგი ვოლსკი გამოეხმაურა.

„მიკერძოებული განცხადებაა. არ შეიძლება, ასეთი განცხადების გაკეთება რაღაც ტრენდებზე დაყრდნობით. არავინ არავის სარედაქციო პოლიტიკაში არ ერევა და მედიას სრული საშუალება აქვს, დასვას ის შეკითხვა, რომელიც მას აინტერესებს. ამ რეალობას რომ ვერ ხედავ, ე.ი. ან გაკლია შესაბამისი ინფორმაცია, რაც არ მგონია, ან გამიზნულად არასწორ განცხადებას აკეთებ“, – აღნიშნა ვოლსკიმ.

თავისუფალი პრესის მსოფლიო დღეზე, დიდი ბრიტანეთის საელჩომ ელჩის მიმართვა გაავრცელა. ვიდეო ცრუ ნარატივებს შეიცავს. ბრიტანეთის ელჩი შეშფოთებას გამოთქვამს ფაქტებზე, რომელიც რეალობას არ ასახავს.

სჭირდებათ ჩინეთი, კარგი სახელმწიფოა, როდესაც სტრატეგიულ პარტნიორობაზეა საუბარი, კომუნისტურ სახელმწიფოს ეძახიან, – განაცხადა გარემოს დაცვისა და ბუნებრივი რესურსების საპარლამენტო კომიტეტის თავმჯდომარის პირველმა მოადგილემ, უმრავლესობის წევრმა ვლადიმერ ბოჟაძემ დოიაშვილზე საუბრისას.

მისივე თქმით, აღნიშნულიდანაც ჩანს მათი დამოკიდებულება და თუ რამდენად მნიშვნელოვანია და ღირებული სახელმწიფოს ინტერესები.

„მინდა დოისაც და ყველას წარმატებები ვუსურვო. ის ორმაგი სტანდარტი, რომელიც სამწუხაროდ, ჩვენს ქვეყანაში მოქმედებს, ერთხელ და სამუდამოდ უნდა დასრულდეს“, – აღნიშნა ბოჟაძემ.

რეჟისორმა დავით დოიაშვილმა „ქრონიკასთან“ სატელეფონო საუბრისას განაცხადა, რომ ჩინეთში დასის შესარჩევად კასტინგი ჰქონდა და ბეიჯინგში სპექტაკლი უნდა დადგას.

დისტანციური შეხვედრა გაიმართა „წინააღმდეგობის პლატფორმის“ და ჩვენი მეგობრების, რომლებიც არიან გაერთიანებული საქართველოს მეგობართა ჯგუფში, მათ წარვუდგინეთ ახალი პლატფორმა, მისი მიზნების, მოქმედების და მუშაობის მთავარი წესები, ასევე ის ჯგუფები, რომლებიც შეიქმნა და უშუალოდ მათთან კავშირზე იქნება, – ამის შესახებ საქართველოს ყოფილმა პრეზიდენტმა, სალომე ზურაბიშვილმა განაცხადა.

ზურაბიშვილის თქმით, დისტანციურ შეხვედრას ესწრებოდნენ ევროპარლამენტარები, ევროპის ქვეყნების ეროვნული პარლამენტების წარმომადგენლები, ასევე აშშ-ს კონგრესისა და საერთაშორისო ორგანიზაციის წარმომადგენელი.

„შეხვედრაზე ითქვა, რომ „წინააღმდეგობის პლატფორმა“ დაფუძნებულია ქართულ ქარტიაზე და ჩვენ ერთობლივი მიზანია ახალი არჩევნები, პატიმრების გათავისუფლება. ეს პლატფორმა უკვე სხვებთან ერთადაც მუშაობს. დღეს გვქონდა საშუალება, რომ პროტესტის ორგანიზაციებთან, არასამთავრობოებთან, კულტურის ორგანიზაციებთან ერთად ვგეგმავთ 26 მაისს და ასევე მოვიწვიეთ ჩვენი მეგობრები ამ დღეს, რომ ქართველ ხალსთან ერთად ამით გამოხატონ თავისი სოლიდარობა. ჩვენ ასევე აღვწერეთ დღევანდელი პოლიტიკური მდგომარეობა. განვიხილეთ ბოლო გადაწყვეტილებები, რომელსაც „ქართული ოცნება“ ასაღებს ბრიტანულად. ეს ყველაფერი არის ფორმა, რომლითაც ასაღებენ რუსულ კანონებს. ეს არის რეპრესიის გაგრძელება და ამას სჭირდება მეტი რეაგირება ჩვენი ევროპელი მეგობრებისგან. ამ დისტანციურ შეხვედრას ესწრებოდა ჯო უილსონის სტაფერი, რომელმაც მოგვახსენა ბოლო მოვლენები და ასევე იყო საუბარი „მეგობარი აქტის“ დღეს განხილვაზე. ეს იყო ძალიან ნაყოფიერი შეხვედრა და ამას გავაგრძელებთ“,- განაცხადა ზურაბიშვილმა.

„ლელო – ძლიერი საქართველოს“ ლიდერები მამუკა ხაზარაძე და ბადრი ჯაფარიძე სასამართლოში თეა წულუკიანის გამოკითხვას ითხოვენ.

როგორც პარტიის პრესსამსახურის მიერ გავრცელებულ ინფორმაციაშია აღნიშნული, „შესაბამისი წერილი წულუკიანის სახელზე ხაზარაძე-ჯაფარიძის ადვოკატებმა არალეგიტიმურ პარლამენტში უკვე შეიტანეს“.

„მამუკა ხაზარაძე და ბადრი ჯაფარიძე თეა წულუკიანს ე.წ საგამოძიებო კომისიის საქმეზე მოწმის სახით გამოკითხვაზე იბარებენ, რის გამოც მათ მიმართ პროკურატურამ გამოძიება დაიწყო. ადვოკატების განცხადებით, თეა წულუკიანსა და ე.წ. კომისიის წევრებს სასამართლოსთვის განმარტების მიცემა მოუწევთ ყველა იმ განცხადებასა თუ ქმედებაზე, რომელსაც ე.წ. საგამოძიებო კომისიის მუშაობისას ჰქონდა ადგილი. თეა წულუკიანს პასუხისთვის სამი დღე აქვს“, – აღნიშნულია პარტიის პრესსამსახურის ინფორმაციაში.

სახელმწიფო ენის მოფრთხილება და გაძლიერება არის ეგზისტენციალური საკითხი. მიმდინარე წლის სექტემბრიდან უკვე უმაღლეს სასწავლებლებში სავალდებულო წესით აღდგება ბაკალავრიატის დონეზე ქართული ენის სწავლება, – განაცხადა „დღის ქრონიკასთან“ განათლების, მეცნიერებისა და ახალგაზრდულ საქმეთა კომიტეტის თავმჯდომარე გივი მიქანაძემ, რომელმაც „უმაღლესი განათლების შესახებ“ საქართველოს კანონში შესატანი ცვლილებები განმარტა.

მისი თქმით, მნიშვნელოვანია სახელმწიფო ენის, ქართული ენის გაძლიერება, ამიტომ ახალი სასწავლო წლიდან ქართული ენის სწავლება უმაღლეს სასწავლებლებში აღდგება.

„მნიშვნელოვანი პროცესი მიმდინარეობს საქართველოს პარლამენტში.

სამწუხარო ფაქტია, მაგრამ რეალობას წარმოადგენს, რომ 2005 წელს მაშინდელი განათლებისა და მეცნიერების სამინისტროს ხელმძღვანელობის ზეპირსიტყვიერი მითითებით, მოხდა საბაკალავრო სასწავლო პროცესიდან ქართული ენის ამოღება. ის სავალდებულო წესით ისწავლებოდა ყველა სპეციალობის ქართულენოვან სექტორზე და მოხდა მისი ამოღება. ეს იყო ქართული ენის წინააღმდეგ მიზანმიმართულად გადადგმული ნაბიჯი. ეს არ იყო ერთადერთი ნაბიჯი. ამას გარდა მაშინ გაუქმდა პრეზიდენტთან არსებული სახელმწიფო ენის კომისია, პარლამენტში აღარ შეიქმნა ქვეკომიტეტი, რომელიც სახელმწიფო ენაზე იყო უშუალოდ ორიენტირებული. გაუქმდა ენის პალატა და ბევრი სხვა აქტივობა განხორციელდა, რომელმაც, რა თქმა უნდა შეზღუდა, პირდაპირ შეტევა მიიტანა მიზანმიმართულად ქართული ენის ცნობიერების ამაღლებაზე.

ჩვენი ხელისუფლების პირობებში პირველი, რაც გაკეთდა 2013-14 წელს შემუშავდა სახელმწიფო ენის კანონპროექტი, რომელიც 2015 წელს კანონის სახით იყო მიღებული და დამტკიცდა. 2019 წელს ზოგადი განათლების შესახებ კანონში შეტანილი ცვლილებების საფუძველზე, მოხდა იაკობ გოგებაშვილის დედაენის დაბრუნება, როგორც მთავარი სასწავლო სახელმძღვანელოს დაბრუნება სასწავლო პროცესში ზოგადსაგანმანათლებლო სკოლებში და ახლა ჩვენ მივიღეთ გადაწყვეტილება საკანონმდებლო წინადადებაზე დაყრდნობით, რომლის ინიციატორებიც იყვნენ მეცნიერების ინსტიტუტის ხელმძღვანელი და წამყვანი ენათმეცნიერები, რომ ქართული ენის სწავლება გავაძლიეროთ, გავაფართოოთ უმაღლეს სასწავლებლებში.

ეს მნიშვნელოვანია სახელმწიფო ენის უფრო გაძლიერებისთვის, უფრო მეტად დამკვიდრებისთვის. ჩვენ გვაქვს საკმაოდ კარგი შედეგები ეროვნულ უმცირესობებში. განსაკუთრებით ახალგაზრდებში. ბოლო წლების განმავლობაში გამოიკვეთა კვლევებით, რომ 93% უკვე კარგად ფლობს ქართულ სახელმწიფო ენას, თუმცა ამას სჭირდება უფრო მეტი გაძლიერება. მით უმეტეს ჩვენნაირი პატარა ერისთვის, საკუთარი სახელმწიფო ენის მოფრთხილება და გაძლიერება არის ეგზისტენციალური საკითხი. ჩვენ ამ კუთხით გვაქვს სრული მზაობა და პოლიტიკური მხარდაჭერა, რომ საგაზაფხულო სესიის ბოლომდე ეს საკითხი იყოს მიღებულ და მიმდინარე წლის სექტემბრიდან უკვე უმაღლეს სასწავლებლებში სავალდებულო წესით აღდგება ბაკალავრიატის დონეზე ქართული ენის სწავლება“, – განაცხადა გივი მიქანაძემ.