„ქართული ოცნების” პირობებში, ყოველდღე დივერსიას რომ აწყობს, როგორ უნდა თქვა, მოგვცემენ თუ არა სტატუსს? – თვითონ კობახიძე იძახის 50/50 – ზეაო და რატომ გავხადეთ ასე საქმე? – ამის შესახებ ჟურნალისტებთან “სტრატეგია აღმაშენებლის” დეპუტატმა პაატა მანჯგალაძემ განაცხადა.

მისი თქმით, რეკომენდაციები რომ შესრულებული იყოს და პარტნიორებთან მჭიდრო თანამშრომლობა არსებობდეს, კითხვაზე პასუხის გაცემა მარტივი იქნებოდა.

“ახლა რომ ოპოზიცია ვიყოთ ხელისუფლებაში, 3 რეკომენდაცია კი არ გვექნებოდა შესრულებული, როგორც ამას ევროპელები გვეუბნებიან, გვექნებოდა 12- ვე, “ქართული ოცნების” მსგავსად რუსეთთან კი არ ვიქნებოდით ჩახუტებულები, ჩავეხუტებოდით ევროპას. ამას რომ გავაკეთებდით, მარჩიელობას კი არ დავიწყებდით, პირდაპირ ვიტყოდით, რომ საქართველოს კანდიდატის სტატუსი ეკუთვნის, რადგან 12 – ვე რეკომენდაცია შესრულებულია. ახლა გეტყოდით, რომ კი, სტატუსს მივიღებთ, მაგრამ “ქართული ოცნების” პირობებში, ყოველდღე დივერსიას რომ აწყობს, როგორ უნდა თქვა, მოგვცემენ თუ არა სტატუსს? – არ ვიცი, რას იზამენ. თვითონ კობახიძე იძახის 50/50- ზეაო და რატომ გავხადეთ ასე საქმე? შეგვესრულებინა.

ევაჭრებიან დასავლეთს, ულტიმატუმებს უყენებენ, რას ჭრიან და რას კერავენ, არ ვიცი, მაგრამ რეკომენდაციების მიხედვით არ მოქმედებენ”, – განაცხადა მანჯგალაძემ.

ევროკომისია საქართველოს, უკრაინისა და მოლდოვის მიერ რეფორმების კუთხით მიღწეულ პროგრესთან დაკავშირებით ზეპირ ანგარიშს 22 ივნისს, ევროკავშირის გენერალურ საქმეთა საბჭოზე წარადგენს.

ცნობილია, რომ საქართველოს მიერ წევრობის კანდიდატის სტატუსის მოსაპოვებლად ევროკავშირის მიერ გაცემული 12 პრიორიტეტის შესრულებასთან დაკავშირებულ ოფიციალურ ანგარიშს ევროკომისია ოქტომბერში წარადგენს. დეკემბერში კი ევროკავშირის წევრი ქვეყნები საქართველოსათვის კანდიდატის სტატუსის მინიჭების შესახებ გადაწყვეტილებას მიიღებს.

საქართველოს პრემიერ-მინისტრი ირაკლი ღარიბაშვილი  თურქეთის რესპუბლიკის ეროვნული უსაფრთხოების საბჭოს გენერალურ მდივანს, გუბერნატორ სეიფულლაჰ ჰაჯიმუფთუოღლუს შეხვდა.

პრემიერ-მინისტრის პრესსამსახურის ინფორმაციით, შეხვედრაზე საუბარი ორ ქვეყანას შორის არსებულ სტრატეგიულ პარტნიორობას და თანამშრომლობის სამომავლო პერსპექტივებს შეეხო.

როგორც შეხვედრაზე აღინიშნა, მისასალმებელია, რომ მთავრობებს შორის არის მზაობა არსებული პარტნიორობის კიდევ უფრო გასაღრმავებლად და გასაძლიერებლად. ხაზი გაესვა, რომ საქართველო აფასებს თურქეთის მტკიცე მხარდაჭერას საქართველოს სუვერენიტეტის და ტერიტორიული მთლიანობის, ასევე, საქართველოს ევროატლანტიკური ინტეგრაციის მიმართ. აღინიშნა, რომ მნიშვნელოვანია ორმხრივი სტრატეგიული პარტნიორობის შემდგომი გაღრმავება, არამხოლოდ პოლიტიკურ და ეკონომიკურ, არამედ უსაფრთხოების მიმართულებითაც.

ყურადღება გამახვილდა საქართველოსა და თურქეთს შორის უსაფრთხოების სფეროში თანამშრომლობაზე. ხაზგასმით აღინიშნა ამ მიმართულებით ურთიერთქმედების კიდევ უფრო გაძლიერების მნიშვნელობა რეგიონის სტაბილური და მდგრადი განვითარების უზრუნველყოფის თვალსაზრისით.

მთავრობის ადმინისტრაციაში გამართულ შეხვედრას შინაგან საქმეთა მინისტრი ვახტანგ გომელაური და თურქეთის რესპუბლიკის საგანგებო და სრულუფლებიანი ელჩი საქართველოში ალი ქაან ორბაი  ესწრებოდნენ.

მაინტერესებს „ლგბტ პროპაგანდით” რომელიმე მინისტრმა ორიენტაცია შეიცვალა?! – პროპაგანდის შედეგების ერთი მაგალითი მოიყვანონ! უზნეო კამპანიას იწყებს „ქართული ოცნება” და პირდაპირ იმეორებს პუტინის გზას, – ამის შესახებ ჟურნალისტებთან ოპოზიციონერმა დეპუტატმა რომან გოცირიძემ განაცხადა.

გოცირიძე მიიჩნევს, რომ „ქართული ოცნება” უმცირესობების დევნის ლოზუნგით იწყებს საარჩევნო კამპანიას.

„კონფრონტაციას აღვივებს „ქართული ოცნება”, შუღლს თესავენ, პრემიერ – მინისტრი აბსურდულ რაღაცებს ამბობს, თურმე საფრანგეთში გამოკითხვა ჩაუტარებიათ და 22 პროცენტი თავს განსხვავებული ორიენტაციის ადამიანად მიაკუთვნებსო. პუტინის და ორბანის დროშა აიტაცა „ქართულმა ოცნებამ” და იწყებს უმცირესობების დევნის ლოზუნგით საარჩევნო კამპანიას. ისე მაინტერესებს თუ 22 პროცენტი განსხვავებული ორიენტაციის ადამიანები არიან, რამდენი გამოდის 88 დეპუტატიდან? 88- ის 22 პროცენტი ძალიან ბევრია. მაინტერესებს „ლგბტ პროპაგანდით” რომელიმე მინისტრმა ორიენტაცია შეიცვალა?! პროპაგანდის შედეგების ერთი მაგალითი მოიყვანონ! უზნეო კამპანიას იწყებს “ქართული ოცნება” და პირდაპირ იმეორებს პუტინის გზას, რომელმაც სწორედ მსგავს ლოზუნგებზე ააგო თავის პოლიტიკა,”- განაცხადა გოცირიძემ.

თბილისის მერის კახა კალაძის განცხადებით, საქართველოს 12-პუნქტიანი გეგმა გადმოეცა შეასრულებალდ, მიუხედავად იმისა, რომ ყველა მაჩვენებლით უსწრებდა იმ ქვეყნებს, რომლებსაც ევროკავშირის წევრობის კანდიდატის სტატუსი მიენიჭათ.

კალაძის თქმით, ოპოზიცია სამუშაო პროცესში არ ჩაერთო და პირიქით, ყველაფერს აკეთებენ, რათა აღნიშნულ პროცესს ხელი შეუშალონ.

კახა კალაძე ამბობს, რომ ამ ყველაფრის მიუხედავად, საქართველოს ხელისუფლება აკეთებს და გააკეთებს ყველაფერს, რომ 12-პუნქტიანი გეგმა ზედმიწევნით შესრულდეს.

„რაც შეეხება 12-პუნქტიან გეგმას, პირველ რიგში, თუ ვინმე აღნიშნულ სტატუსს იმსახურებდა, ეს იყო ჩვენი ქვეყანა. ყველანაირი თვალსაზრისით, ყველანაირი მაჩვენებლები ყველა იმ ქვეყანაზე წინ ვართ, ვისაც აღნიშნული სტატუსი მისცეს და ჩვენ არ მოგვცეს. მიუხედავად ამ ყველაფრისა, გასაგებია, მოგვცეს 12-პუნქტიანი გეგმა. როდესაც აღნიშნული გეგმა მოგვცეს, საუბარი იყო, რომ ოპოზიციაც უნდა ჩართულიყო ამ ყველაფერში. ისინი არათუ ჩართულან, ყველაფერს აკეთებენ, რათა აღნიშნულ პროცესს ხელი შეუშალონ. მიუხედავად ამ ყველაფრისა, საქართველოს ხელისუფლება აკეთებს და გააკეთებს ყველაფერს, რომ აღნიშნული 12-პუნქტიანი გზამკვლევი ზედმიწევნით იყოს შესრულებული, რომ არავის არაფერი სალაპარაკო არ დავუტოვოთ“, – განაცხადა კახა კალაძემ.

“მიხეილ სააკაშვილის ერთადერთი გზა „ვივამედიდან“ ციხეში მიდის”- ასე ეხმაურება “ხალხის ძალის” წევრი, გურამ მაჭარაშვილი,  ყოფილი პრეზიდენტის, მიხეილ სააკაშვილის ქართულ პოლიტიკაში შესაძლო დაბრუნებას

„ერთადერთი გზა არის „ვივამედიდან“ ციხეში. შესაძლოა, ესაა მისი ჩანაფიქრი, ციხიდან უფრო კარგად ჟღერს ალბათ, მისი ხმა. მოუწევს ციხიდან პოლიტიკური მოღვაწეობა, თუ აპირებს როგორც არა საქართველოს მოქალაქე“, – განაცხადა მაჭარაშვილმა.

გარეთ ახლა არის დღე საქართველოში, მაგრამ შეიძლება გამოჩნდეს პირი, რომელიც იტყვის, რომ ღამეა, აქედან გამომდინარე, რა ვქნათ ჩვენ? – რაც რეკომენდაციების შესრულებას ეხება, ყველაფერი ხელის გულზეა,- ამის შესახებ საპარლამენტო უმრავლესობის წევრმა ალუდა ღუდუშაურმა განაცხადა.

მისი თქმით, 12 რეკომენდაციიდან ყველა შესრულებულია დეპოლარიზაციის გარდა. ღუდუშაური ამბობს, რომ ამ პუნქტის შეუსრულებლობაში დასავლელი პარტნიორების როლსაც ხედავს.

„ვფიქრობ, ობიექტური შემფასებლისთვის, სრულიად ნათელი და ცხადი უნდა იყოს პროგრესი, რაც საქართველოს აქვს, პრაქტიკულად ყველა რეკომენდაცია გვაქვს შესრულებული, გარდა ერთისა. ამას, რაოდენ სამწუხაროც არ უნდა იყოს, მათ შორის, ჩვენი დასავლელი პარტნიორების ნაწილი პირდაპირ თუ ირიბად უწყობს ხელს, რომელიც „ნაციონალური მოძრაობის“ კონგლომერატის ქვეშ ხოშტარია-ჯაფარიძის, ამ რადიკალი ჯგუფების წისქვილზე ასხამს წყალს. ეს ადამიანები პირიქით, პოლარიზაციას აღვივებენ და მათი მიზანია ქვეყანამ როგორმე სტატუსი არ მიიღოს, რათა ამ გზით გამოიწვიონ ქაოსი და არეულობა, იქნებოდა ამ გზით მოვიდნენ ხელისუფლებაში. გარეთ ახლა არის დღე ჩვენთან, საქართველოში, მაგრამ შეიძლება გამოჩნდეს პირი, რომელმაც თქვას, რომ ღამეა, აქედან გამომდინარე, რა ვქნათ ჩვენ? – რაც რეკომენდაციების შესრულებას ეხება, ყველაფერი არის ხელის გულზე, შევაფასოთ ობიექტურად და ნებისმიერ შემთხვევაში დავინახავთ ამ რეკომენდაციების შესრულების მაჩვენებელს“, – განაცხადა ღუდუშაურმა.

ევროკომისია საქართველოს, უკრაინისა და მოლდოვის მიერ რეფორმების კუთხით მიღწეულ პროგრესთან დაკავშირებით ზეპირ ანგარიშს 22 ივნისს, ევროკავშირის გენერალურ საქმეთა საბჭოზე წარადგენს.