ოპოზიციას ბოლომდე ვერც რევოლუციური გეგმები მიჰყავს. შედეგი არის ის, რომ ახალგაზრდა ადამიანი თავიდანვე გზას ააცდინეს და შემდეგ ის სასჯელაღსრულების დაწესებულებაში დატოვეს, – ამის შესახებ „ქართული ოცნების“ თავმჯდომარე ირაკლი კობახიძემ ჟურნალისტებთან განაცხადა.

ირაკლი კობახიძის განცხადებით, თბილისის საკრებულოში „გირჩის“ წარმომადგენლის, ცოტნე კობერიძის სიტყვებმა, რომ „ოპოზიციას პროცესები ბოლომდე არ მიჰყავს და უკან იხევს“, ის რევოლუციური გეგმა ამხილა, რაც ოპოზიციას ჰქონდა.

„გირჩელებს“ ერთი რამ ახასიათებთ – ხშირად წამოსცდებათ ხოლმე რაღაცები. ცოტნე კობერიძეს რეალურად წამოსცდა, თუ რა იყო მათი გეგმა. საზოგადოებამაც იხილა, რომ ცდილობდნენ ხელისუფლებისაგან მტრის ხატი შეექმნათ. ამის შემდეგ ადამიანები მოლოტოვების კოქტეილების სასროლად მოამზადეს და შემდეგ აღარ დაიცვეს. კონკრეტული ადამიანი სასჯელაღსრულების დაწესებულებაში დარჩათ. ეს იმიტომ, რომ ოპოზიციამ საქმე ბოლომდე არ მიიყვანა. ამით კობერიძემ ამხილა ის მარტივი გეგმა, რისთვისაც შარშან ბაკურიანში შეიკრიბნენ. როგორც კი სცენაზე დისკრედიტირებული ენჯეოები და პოლიტიკოსები აიყვანეს, ხალხი მაშინვე შემოეცალათ. ოპოზიცია სუსტია და ბოლომდე ვერაფერი მიჰყავთ, მათ შორის ვერც რევოლუციური გეგმები. შედეგი არის ის, რომ ახალგაზრდა ადამიანი თავიდანვე გზას ააცდინეს და შემდეგ ის სასჯელაღსრულების დაწესებულებაში დატოვეს. მთავარია, სამომავლოდ ასეთი მოწყვლადი ახალგაზრდები პოლიტიკური ნაცმოძრაობის მავნე ზეგავლენისგან დავიცვათ“, – განაცხადა კობახიძემ.

მისივე თქმით, „გირჩის“ ტრენინგების დაფინანსებას სახელმწიფო ეწინააღმდეგება და იმედი აქვთ, რომ მომავალში „მსგავსი ექსტრემისტული ჯგუფები“ არ დაფინანსდებიან.

„გირჩის“ ტრენინგების დაფინანსება ჩვენთვის კატეგორიულად მიუღებელია. ამის შესახებ ჩვენი აზრი საერთაშორისო პარტნიორებთანაც დაგვიფიქსირებია. დიდი იმედი მაქვს, რომ შემდეგი ელჩის პირობებში ექსტრემისტულ დაჯგუფებებს აღარ დააფინანსებენ“, – აღნიშნა ირაკლი კობახიძემ.

„თავდაცვის კოდექსი“ ქვეყნის თავდაცვისუნარიანობის გაძლიერებას სჭირდება, რაც შეეხება ერთ ან მეორე „გირჩს“, როცა თან სოჭისკენ იქაჩები, თან „თავდაცვის კოდექსს“ ბლოკავ, ეს ყველაფერზე მეტყველებს, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა.

მისივე თქმით, მმართველი პარტია „თავდაცვის კოდექსის“ ირგვლივ განხილვებისთვის მზად არის.

„გაიმართება საპარლამენტო განხილვა, რამდენი დროც უნდა დასჭირდეს. ამ კოდექსის მიღება პრინციპულად მნიშვნელოვანია, რათა თავდაცვის სისტემა გაძლიერდეს. რაც შეეხება „გირჩს“ – ერთს, მეორეს, როცა თან სოჭისკენ იქაჩები და თან „თავდაცვის კოდექსს“ ბლოკავ, სარეზერვო სისტემას და გაწვევის სისტემას, ეს ყველაფერზე მეტყველებს, რომ ან იქ არ უნდა იქაჩებოდე, ან ეს არ უნდა დაბლოკო.

„თავდაცვის კოდექსი“ ჩვენი ქვეყნის თავდაცვისუნარიანობის გაძლიერებას სჭირდება. აქედან გამომდინარე, ჩვენ მზად ვართ განხილვებისთვის და „თავდაცვის კოდექსი“ აუცილებლად იქნება მიღებული“, – აღნიშნა ირაკლი კობახიძემ.

პოლიტიკური ჯგუფი “ევროოპტიმისტები” ქვეყანაში საგანგაშო მიგრაციულ პროცესებზე საუბრობს და პარლამენტის ხელმძღვანელობას მოუწოდებს, ნუ ბლოკავს ოპოზიციის მიერ ინიციირებულ ისეთ მნიშვნელოვან პროექტებს, რომელიც მსგავს საკითხებს ეხება.

როგორც პარლამენტში გამართულ ბრიფინგზე  რომან გოცირიძემ განაცხადა, შრომისუნარიანი მოქალაქეები ქვეყანას ტოვებენ და მათ ადგილს იკავებენ უცხო ქვეყნის მოქალაქეები.

ხატია დეკანოიძის განცხადებით, 2022 წელს საზღვარგარეთ დარჩა 46 397-ით მეტი საქართველოს მოქალაქე ვიდრე დაბრუნდა, რაც ყველზე მაღალი მიგრაციის უარყოფითი სალდოა ბოლო 22 წლის განმავლობაში, რაც მსგავსი სტატისტიკა იწარმოება.

მისივე განცხადებით, მხოლოდ გასულ წელს 101 ათასი უცხო ქვეყნის მოქალაქე დარჩა საქართველოში საცხოვრებლად, აქედან 62 ათასი რუსეთის მოქალაქე.

დეკანოიძე და გოცირიძე აღნიშნავენ, რომ ამ კატასტროფული მდგომარეობის გამოსწორების ერთადერთი გზა არის სწორი ეკონომიკური პოლიტიკის გატარება და მაღალანაზღაურებადი სამუშაო ადგილების შექმნა.

“დღეს არის კატასტროფული მდგომარეობა. 2015 წლიდან 2022 წლის ჩათვლით საქართველო დატოვა და უცხოეთში დარჩა საცხოვრებლად 172 ათასი ჩვენი მოქალაქე, ეს იმას ნიშნავს, რომ ჩვენ დავკარგეთ ამ პერიოდში ერთი ბათუმი. ბათუმის მოსახლეობა არის 179 ათასი. წაემოიდგინეთ რომ არ არის ბათუმი, ეს გაცილებით უფრო დიდია, ვიდრე ქუთაისი, სიდიდით მესამე ქალაქი ქუთაისი, რომლის მოსახლეობა არის 140 ათასი, ქუთაისზე 30 ათასით მეტი საქართველოს მოქალაქე შეიძლება ითქვას, რომ გაქრა ამ ქვეყნიდან და როდის დაბრუნდება ან საერთოდ დაბრუნება თუ არა, არავინ იცის. დემოგრაფიული პროგრამა უნდა შემუშავდეს. გარდა ამისა მე და ხატიამ საკანონმდებლო ინიციატივა შევიტანეთ მიგრაციასთან დაკავშირებით, რომელიც შეიძლება არასდროს იქნას განხილული, რადგან ისეთი თემებზე, რომელიც ძალიან მტკივნეულია, უნდათ, რომ საერთოდ მსჯელობაც არ იყოს, იურიდიულ საკითხთა კომიტეტის თავმჯდომარემ ჩვენი შეტანილი კანონპროექტი, რომელიც მიგრაციას და სხვა საკითხებს ეხებოდა გადაავადა. უცნაური ისაა, რომ მოქალაქეებისგან იცლება ქვეყანა, მაგრამ ბოლო 8 წელია დემოგრაფიული სალდო დადებითია, აქ მხოლოდ რუსეთის მოქალაქეებში არ არის საქმე, ომამდეც შეინიშნებოდა ეს ტენდენცია და ეს ნიშნავს, რომ ბოლო 8 წლის განმავლობაში საქართველოში საცხოვრებლად დარჩა 181 ათასი სხვა ქვეყნის მოქალაქე. ეს იმას ნიშნავს რომ სამუშაო ძალა მიედინება უცხოეთში და ამას დემოგრაფიულად ჰქვია ერის დაბერება, ეს არის არამარტო სოციალური, არამედ სერიოზული პოლიტიკური პრობლემა უსაფრთხოების კუთხით. ამიტომ მოვიწოდებ პარლამენტის ხელმძღვანელობას, შეწყვიტონ მავნებლობა, ნუ ბლოკავენ კანონპროექტებს, რომლებიც ისეთ მნიშვნელოვან საკითხებს ეხება როგორიც მიგრაციაა, თუნდაც რუსეთის მოქალაქეების საკითხი და ა.შ.”, – განაცხადა გოცირიძემ.