პრეზიდენტმა თანხმობა განაცხადა, რომ საგაზაფხულო სესიის პირველ სხდომაზე მოვა და შესაბამისად, 6 თებერვალს იქნება მისი ყოველწლიური მოხსენება, – ამის შესახებ საქართველოს პარლამენტის თავმჯდომარე შალვა პაპუაშვილმა ჟურნალისტებს განუცხადა.

„როგორც იცით, საქართველოს პარლამენტის რეგლამენტით, მათ შორის ბოლო ცვლილების საფუძველზე დადგენილია, რომ პრეზიდენტის მოხსენება არის საგაზაფხულო სესიის პირველ სხდომაზე. სხვა შემთხვევაში, პარლამენტის თავმჯდომარესთან უნდა შეთანხმდეს. პრეზიდენტმა თანხმობა განაცხადა, რომ ის პირველ სხდომაზე მოვა და შესაბამისად, 6 თებერვალს იქნება მისი ყოველწლიური მოხსენება“, – განაცხადა შალვა პაპუაშვილმა.

საქართველოს პრეზიდენტმა პარლამენტს წლიური ანგარიში 6 თებერვალს უნდა წარუდგინოს. აღნიშნული თარიღი რეგლამენტით არის განსაზღვრული. რეგლამენტში ნათქვამია, რომ პარლამენტი საგაზაფხულო სესიის პირველი პლენარული სხდომის დღეს, საქართველოს კონსტიტუციის შესაბამისად, ისმენს პრეზიდენტის ყოველწლიურ მოხსენებას ქვეყნის მდგომარეობის უმნიშვნელოვანეს საკითხებზე. აღნიშნული თარიღის შეცვლა შესაძლებელია პარლამენტის თავმჯდომარესთან შეთანხმებით. რეგლამენტის მიხედვით, პრეზიდენტის გამოსვლის დასრულების შემდეგ სიტყვით გამოდიან ფრაქციათა თავმჯდომარეები და საპარლამენტო უმრავლესობის ლიდერი.

გამოსვლების დასრულების შემდეგ საქართველოს პრეზიდენტი უფლებამოსილია, გამოვიდეს დასკვნითი სიტყვით. სალომე ზურაბიშვილის მიერ პრეზიდენტის რანგში ეს ბოლი წლიური ანგარიში იქნება.

არანაირი მნიშვნელობა არ აქვს, რომელი მინიონი გამოვა და რას იტყვის, რადგან ეს ადამიანები ვერ შეძლებენ, გადაეფარონ ბიძინა ივანიშვილს, – ამის შესახებ განაცხადა პარტია „საქართველოსთვის“ წევრმა, ანა ბუჩუკურმა პარტია „ქართული ოცნების“ თავმჯდომარის, ირაკლი კობახიძის განცხადების საპასუხოდ.

„ეს როგორი ფოლოვერი მყოლია „ტიკ-ტოკზე“. ვურჩევ ირაკლი კობახიძეს, გააგრძელოს ჩემი „ტიკ-ტოკ“ ვიდეოების ყურება, კიდევ უფრო მძიმე პერიოდი დაუდგება და იქნებ, რაღაცნაირად განიმუხტოს. ეს ნახევრად ხუმრობით. შედარებით სერიოზულზე რომ გადავიდეთ, არანაირი მნიშვნელობა არ აქვს, რომელი მინიონი გამოვა და რას იტყვის, რადგან ეს ადამიანები ვერ შეძლებენ, გადაეფარონ ბიძინა ივანიშვილს. მთავარი აქ არის, რომ გამოვა თუ არა ბიძინა ივანიშვილი, საზოგადოებას აჩვენებს ანგარიშვალდებულებას და იმ მნიშვნელოვან კითხვებს გასცემს თუ არა თავად პასუხს, თუ კვლავ დაიმალება.

გუშინ მინიონთა ერთი ჯგუფი გამოიყვანეს, დღეს მეორე და ალბათ გაგრძელდება მინიონების მცდელობები, მაგრამ არანაირი მნიშვნელობა არ აქვს, ეს ადამიანები რას იტყვიან. მთავარია, ანგარიშვალდებულებას აიღებს თუ არა ბიძინა ივანიშვილი, თუ ისევ დაიმალება“, – განაცხადა ანა ბუჩუკურმა.

პარტია „ქართული ოცნების“ თავმჯდომარემ, ირაკლი კობახიძემ დღეს განაცხადა: „გიორგი გახარიას ვურჩევთ, დებატებზე დიდად ნუ გაიქაჩება, ეტიკტოკოს ბუჩუკურს და ლილუაშვილს, რომლებიც პარლამენტარობანას თამაშის უკანასკნელ თვეებს ითვლიან“.

შობის ღამიდან მოყოლებული რასაც ვხედავთ, ფაქტობრივად, ეს არის დაგეგმილი კამპანია რელიგიური კონფესიის წინაააღმდეგ, – ამის შესახებ საქართველოს პარლამენტის თავმჯდომარე შალვა პაპუაშვილმა ჟურნალისტებს განუნცხადა.

პაპუაშვილის თქმით, რელიგიური კონფესიის წინააღმდეგ კამპანია, როგორც ჩანს, წინასწარ იყო დაგეგმილი.

„მინდა, ზოგადი კომენტარი გავაკეთო იმ პროცესებთან დაკავშირებით, რომელსაც შობის ღამიდან ვადევნებთ თვალყურს. რასაც ვხედავთ, ფაქტობრივად, ეს არის დაგეგმილი კამპანია რელიგიური კონფესიის წინაააღმდეგ. ეს რელიგიური კონფესია ჩვენს ქვეყანაში არის საქართველოს მართლმადიდებელი ეკლესია, რომელიც არის ყველაზე დიდი რელიგიური ორგანიზაცია. ეს არის ეკლესია, რომელიც კონსტიტუციის მიერ არის აღიარებული, როგორც საქართველოს ისტორიაში და განვითარებაში განსაკუთრებული როლის მქონე რელიგია. სწორედ ამ რელიგიური კონფესიის წინააღმდეგ მიდის კამპანია, რომელიც ჩანს, რომ იყო წინასწარ დაგეგმილი.

ფაქტია, რომ შობის აღნიშვნის დღესთან დაკავშირებით ჩვენ ვნახეთ პირდაპირი ისტერიული მცდელობა, რომ სამოქალაქო პირები, ენჯეოს წარმომადგენლები და პოლიტიკოსები, სხვა დროს სეკულარიზმს რომ ქადაგებენ, ჩაერიონ საეკლესიო კალენდრის განსაზღვრებაში. რაც არის მათივე პრინციპებიდან გამომდინარე, წითელი ხაზების გადასვლა და ჩარევა ეკლესიის შიდა საკითხებში“, – განაცხადა შალვა პაპუაშვილმა.

როგორც პარლამენტის თავმჯდომარემ აღნიშნა, ყველამ ნახა წმინდა მატრონას ხატთან დაკავშირებით ისტერია.

„ერთი, რომ საეკლესიო კალნედრის სპეციალისტი აღმოჩნდა რატომღაც ყველა ენჯეოს წარმომადგენელი და პოლიტიკოსი, მეორე – უცებ ყველა იკონოგრაფიის სპეციალისტებიც აღმოჩნდნენ. ჩვენ ვნახეთ, რომ მათ შორის ეკლესიის მხრიდანაც იყო განცხადება, რომ ეს ხატი უკვე თვეებია, თუ წლებია, რაც იქ არის. დიდი ალბათობით, ფაქტია, რომ ამ შემთხვევაში, როგორც ყოველთვის, ასეთ ანტიქართულ საქმეებში გიორგი კანდელაკი გამოირჩევა და ვნახეთ, რომ მან დაიწყო ეს კამპანია და „სოვლაბმა“. ესეც ცალკე ისტორიაა, რომ გიორგი კანდელაკი ახლა ენჯეოშნიკად გვევლინება და „სოვლაბის“ სახით საუბრობს. ეს იყო დაგეგმილი კამპანია. დაგეგმეს, რომ შობის საღამოსთვის ისტერია აეტეხათ სოციალურ ქსელში, როგორც აკეთებენ ხოლმე ამ ყველაფერს, რათა ის დღესასწაული, რომელიც უნდა ეზეიმა ქართველ ხალხს, ჩაეშხამებინათ.

სინამდვილეში, მათ არც ის აინტერესებთ, შობა რომელ დღეს აღინიშნება, ისინი არც 25-ში აღნიშნავენ და არც 7-ში, სანთელი ხელში მათ არ უჭირავთ და არც ის ადარდებთ, ხატზე რა არის გამოსახული. სინამდვილეში, ეს არის კამპანია ეკლესიის წინააღმდეგ და სინამდვილეში, ქართველი ფსევდოლიბერალები არიან მაუზერიანი ბოლშევიკების რეინკარნაცია თანამედროვე ეპოქაში, რომელთაც ერთი სული აქვთ, გუმბათები მოანგრიონ ქართულ ეკლესიას.

პოლიტიკოსების განმარტებები, „ნაციონალური მოძრაობა“ და გარშემო მისი მთელი ანტურაჟი, ის, რომ ქართული ეკლესია არის რუსული ინტერესების გამტარებელი, შობა რომ რუსულია და იმაში ვერ ერკვევიან, რუსული ეკლესია როდის ჩამოყალიბდა და საერთოდ რუსეთი როდის ჩამოყალიბდა, ავტოკეფალია როდის მიიღო, ეს ცალკე საკითხია. ის, რომ ვასალები არიან და მათ შორის პატრიარქზე მიდის უშუალოდ დარტყმა, ეს არის ჩვეულებრივი კამპანია. ყველამ უნდა შევხედოთ, ვინ დგას ამ ყველაფრის უკან. პოლიტიკოსი გიორგი კანდელაკი და „სოვლაბის“ წარმომადგენელი. შევხედოთ, ვინ აფინანსებს „სოვლაბს“ და ვინ დგას ამ კამპანიების უკან. ასე რომ, კითხვები მიემართება მათკენ, ვინც აფინანსებს ამ კამპანიას ქართული ეკლესიის წინააღმდეგ“, – განაცხადა შალვა პაპუაშვილმა.

გიორგი გახარიას და მისი პარტიის აქტივობები უკვე კომიკურობამდე არის მისული განცხადებებში, აბსოლუტურად,  დამსგავსებული არიან კომიკური ჟანრის მხატვრულ თუ მულტიპლიკაციური ფილმის პერსონაჟებს, უბრალოდ, თავად საყურებლადაც კი აღარ არის საინტერესო, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა, რითაც გიორგი გახარიას მიერ ბიძინა ივანიშვილის დეპატებში გამოწვევას გამოეხმაურა.

მისი თქმით, რენეგატის გზა რთულია, ეს ის გზაა, როდესაც შუბლის ძარღვი წყდება და ამ დროს უკვე ბევრი რამის კადრება შეიძლება.

„მას შემდეგ, რაც ბიძინა ივანიშვილი ქართულ პოლიტიკაში დაბრუნდა, აბსოლუტურ ისტერიას ვხედავთ – „ნაციონალური მოძრაობის“ ყველა ფლანგი რამდენად აქტიურად არის ჩართული, იქნება ეს თავად „ნაციონალური მოძრაობა“, თუ მისი ფლანგები „ლელოს“, გახარიას პარტიის სახით. რაც შეეხება გიორგი გახარიას და მის პარტიას, ვფიქრობ, მათი აქტივობები უკვე კომიკურობამდე არის მისული განცხადებებში, ქცევებში, სტილში, ტონალობაში, აბსოლუტურად დამსგავსებული არიან კომიკური ჟანრის მხატვრულ, თუ მულტიპლიკაციური ფილმის პერსონაჟებს. უბრალოდ, თავად საყურებლადაც კი აღარ არის საინტერესო. რენეგატის გზა რთულია, ეს ის გზაა, როდესაც შუბლის ძარღვი წყდება და ამ დროს უკვე ბევრი რამის კადრება შეიძლება. მგონი, ვინმე თუ დააკვირდება გიორგი გახარიას და აღწერს მის სახეცვლილებას, ვფიქრობ, კარგი აღწერა გამოვა, რას ნიშნავს შუბლის ძარღვის გაწყვეტა და რენეგატის გზაზე შედგომა. საბოლოო ჯამში, ასეთი პერსონაჟები ამთავრებენ იმით, რომ ხდებიან კომიკური პერსონაჟები. წინა და ძველ საკითხებთან დაკავშირებით გუნდის ის წევრები უფრო კომპეტენტურად ისაუბრებენ, რომლებიც მაშინ იყვნენ. ის გუნდიდან წავიდა მას შემდეგ, რაც იკადრა და აკადრა საქართველოს, საკუთარ გუნდს. ვგულისხმობ ნიკა მელიას დაკავება-არდაკავების საგას“, – აღნიშნა პაპუაშვილმა.

ეროვნული ბიბლიოთეკა არაფერ შუაშია  პოლიტიკასთან და არც უნდა იყოს, – ამის შესახებ საქართველოს პარლამენტის თავმჯდომარე, შალვა პაპუაშვილმა განაცხადა.

მისი თქმით, საკადრო გადაწყვეტილებები თავად ეროვნული ბიბლიოთეკის სამომავლო განვითარების მიზნებიდან გამომდინარე მიიღება.

„გუშინ შეხვედრა მქონდა ბატონ გიორგი კეკელიძესთან. ეროვნული ბიბლიოთეკა არის უფრო დიდი, უფრო მეტი, ვიდრე ვართ თითოეული ჩვენგანი, ინდივიდები, თითქმის 200 წლოვანი ისტორიით, ამიტომ ის საქმე, რომელიც ეროვნულ ბიბლიოთეკაში წლების განმავლობაში კეთდებოდა, არის მნიშვნელოვანი საქმე. ამის უკან დგას ეროვნული ბიბლიოთეკის დიდი კოლექტივი, რომელმაც ეროვნული ბიბლიოთეკა ჩვენამდე მოგვიტანა იმ სახით, როგორიც არის და ასევე მომავლის ხედვით, რომელიც მას აქვს. მე ბატონი გიორგის მადლობელი ვარ, ყველა იმ კარგი საქმისთვის, რომელიც მან მის კოლექტივთან ერთად გააკეთა. რაც შეეხება გადაწყვეტილებას, ეს არის საკადრო გადაწყვეტილება, რომელიც მნიშვნელოვანია ეროვნული ბიბლიოთეკის შემდგომი განვითარებისთვის. მე დამატებით განცხადებას, განმარტებებს ამ საკითხთან დაკავშირებით არ ვაპირებ, რადგან საქმე ეხება საკადრო გადაწყვეტილებას, რომელიც პარლამენტის თავმჯდომარის მისაღებია. კონსტანტინე გამსახურდია იქნება ახალი ხელმძღვანელი. ეროვნული ბიბლიოთეკა არაფერ შუაშია საერთოდ პოლიტიკასთან და არც უნდა იყოს რაიმე შუაში. ეს მცდელობები, რაღაცნაირად დააკავშირონ ეროვნული ბიბლიოთეკა პოლიტიკასთან, აჩვენებს იმ ადამიანების არაკეთილსინდისიერებას, რომლებიც ასეთ დაკავშირებას ცდილობენ. ეროვნული ბიბლიოთეკა არის ჩვენი საერთო, ქართველი ხალხის მემკვიდრეობა და მომავალი, მათ შორის ერთ ორგანიზაციაში და ერთ შენობაში. რაც შეეხება, ცვლილებას ეროვნული ბიბლიოთეკის დირექტორის პოზიციაზე, ეს ცვლილებების საკითხი არის და მინდა, წარმატება ვუსურვო ბატონ კონსტანტინე გამსახურდიას. უახლოეს დღეებში მოხდება მისი ოფიციალური დანიშვნა“, – აღნიშნა შალვა პაპუაშვილმა.

მისივე თქმით, კონსტანტინე გამსახურდია, რომელიც ეროვნული ბიბლიოთეკის ხელმძღვანელად ინიშნება, მნიშვნელოვან როლს შეასრულებს საქართველოს ეროვნული ბიბლიოთეკის შემდგომ განვითარებაში.

„ყველა ორგანიზაციას სჭირდება ახალი ენერგია და სწორედ ამ ახალი ენერგიით გააგრძელებს ახალი ხელმძღვანელი მუშაობს. მე მგონი, არ სჭირდება ახსნა, კონსტანტინე გამსახურდია რამდენად შეეფერება ამ ახალ თანამდებობას. ვფიქრობ, საზოგადოებაში ამ მხრივ კითხვები არ არსებობს. არ მინდა, დეტალებზე ვისაუბრო. ეროვნული ბიბლიოთეკა არის დიდი კოლექტივი, პროფესიონალები, რომლებიც წლებია, ათწლეულებია, მუშაობენ, ემსახურებიან ჩვენს საერთო კულტურულ მემკვიდრეობას, ემსახურებიან ჩვენი მომავალი თაობის განათლებას. ეს არის, უპირველესად, დამსახურება მთლიანად კოლექტივის. იმ მიღწევებში, რომელიც არის, რა თქმა უნდა, ბატონ გიორგი კეკელიძის, როგორც ამ ორგანიზაციის ხელმძღვანელის, წვლილიც არის. დეტალებში არ შევდივარ, რადგან ეს არის საკადრო გადაწყვეტილება“, – განაცხადა პაპუაშვილმა.

პაპუაშვილმა კეკელიძეს უთხრა, კარგად მუშაობ, მაგრამ 11 წელი ბევრია და განახლების დროაო და ეს არაფრისმაქნისები რომ 12 წელი არიან ხელისუფლებაში, კიდევ უნდა იყვნენ?! – კეკელიძის მსგავს ადამიანებს „სუპერ პაკში“ ვისურვებდი, ასეთი ადამიანებია საჭირო პოლიტიკაში,- ამის შესახებ „სტრატეგია აღმაშენებლის“” დეპუტატმა პაატა მანჯგალაძემ განაცხადა.

როგორც მან აღნიშნა, კონსტანტინე გამსახურდიას ადგილზე, ასეთი ფორმით თანამდებობაზე დანიშვნას არ ისურვებდა.

„კეკელიძე გამორჩეული ადამიანია, კეთილსინდისიერი და პროფესიონალი თავის საქმის. ხშირად მეკითხებიან „სუპერ პაკში“ როგორი ადამიანები უნდა იყვნენ, ვისურვებდი კეკელიძის მსგავსი კეთილსინდისიერი ადამიანები იყვნენ. ასეთი ადამიანებია საჭიროა, მათ შორის პოლიტიკაში. არჩევნები მოდის და თუ სადმე რაიმე გავლენის ჯგუფია, „ქართული ოცნება“ მის კონსოლიდირებას ცდილობს. როგორც ვიცი დადასტურდა, რომ კოკო გამსახურდია უნდა დაინიშნოს, „ქართულ ოცნებას“ ახლა ზვიადისტების ხმებზე ნადირობა დასჭირდა, მანამდე სტალინისტების ხმებზე ნადირობდნენ. არ უშველით მათ კოსმეტიკური ცვლილებები, „ქართული ოცნება“ განწირულია. რაც შეეხება კოკო გამსახურდიას, ამ ფორმით, მის ადგილზე არ ვისურვებდი თანამდებობაზე დანიშვნას. წესიერი კაცია, ბევრი კარგი საქმე გააკეთა, კარგი იდეები ჰქონდა, ამ ფორმით დანიშვნას რაც შეეხება, თავს ვიკავებ მასთან დაკავშირებით, რადგან უდიდეს პატივს ვცემ ზვიად გამსახურდიას, ამ ოჯახს და არ მაქვს განწყობა რაიმე ნეგატიური ვთქვა ახლა მასზე. თუმცა, მე მის ადგილას არ ვისურვებდი, ამ ფორმით ვინმეს დავენიშნე თანამდებობაზე“, – განაცხადა მანჯგალაძემ.

საქართველოს პარლამენტის ეროვნული ბიბლიოთეკის დირექტორის, გიორგი კეკელიძის განცხადებით, პარლამენტის თავმჯდომარე შეხვდა და უთხრა, რომ უნდა წავიდეს დაკავებული თანამდებობიდან, რადგან 11 წელი ბევრია, მიუხედავად იმისა, რომ კარგად მუშაობდა და განახლების დროა. მისივე თქმით, აღნიშნული გადაწყვეტილება „ძალიან დიდი უსამართლობაა“. გიორგი კეკელიძეს თანამდებობაზე კონსტანტინე გამსახურდია შეცვლის, ამის შესახებ მან “ინტერპრესნიუსს” განუცხადა.