ვერძი

დროა, საკუთარი გეგმებისა და ოცნებების განხორციელება დაიწყოთ. გამორიცხული არ არის, საკუთარი წარსულიდან ვიღაც მნიშვნელოვან ადამიანს შეხვდეთ ან გაწყვეტილი კავშირები აღადგინოთ.

კურო

ზოგი თქვენი წამოწყება ან იდეა ჩიხში აღმოჩნდება ან, უბრალოდ, დასრულდება. ამაზე არ უნდა ინერვიულოთ – ამ გზით ვარსკვლავები სწორ გზას გაჩვენებენ და შეცდომებისგან გიცავენ. თუ კითხვებზე პასუხებს ეძებთ, დღეს ამისთვის არახელსაყრელი დღეა. ცოტა ხანს მოცდა მოგიწევთ. სავარაუდოდ, ამ დღეს გაიცნობთ ადამიანს, ვისგანაც მომავალში ბევრს ისწავლით.

ტყუპები

მთელ დღეს ქაოსური მოვლენების შუაგულში ატარებთ და მნიშვნელოვან საკითხებზე ყურადღების გამახვილება გიჭირთ. სტრესული სიტუაციის თავიდან ასაცილებლად ეცადეთ, დაისვენოთ და თქვენ გარშემო განვითარებულ მოვლენებში არ ჩაერიოთ. უბრალოდ, დამკვირვებლის პოზიცია დაიკავეთ და ნახეთ, სად მიგიყვანთ.

კირჩხიბი

შეგიძლიათ, საკუთარი კარგად შესრულებული სამუშაოსთვის შეაქოთ, დაისვენოთ და მიღებული შედეგებით ისიამოვნოთ. ამ დღეს დაწყებული პროექტი ძლიერ წინააღმდეგობას წააწყდება, ამიტომ მისი დაწყება რამდენიმე დღე უნდა გადადოთ. იფიქრეთ თქვენს ამჟამინდელ მდგომარეობაზე და განთავისუფლდით ყველაფრისგან, რაც წინსვლაში ხელს გიშლით.

ლომი

ნაყოფიერი დღეა, რომელსაც თქვენი მომავლისთვის დიდი მნიშვნელობა აქვს. ყველა გადაწყვეტილებას, რომელსაც ამ დღეს მიიღებთ, სერიოზული შედეგები მოჰყვება. ამიტომ, ვარსკვლავები გირჩევენ, ყოველი ნაბიჯი კარგად აწონ-დაწონოთ. ეცადეთ, აქტიურობა შეამციროთ და მეტი დაისვენოთ.

ქალწული

ხელსაყრელი დღეა პირადი ცხოვრების პრობლემების მოსაგვარებლად. გირჩევთ, ეჭვით შეხედოთ შეთავაზებას, რომელსაც ამ დღეს მიიღებთ – დიდი ალბათობით, ეს უიმედო საქმეა. მოერიდეთ გარშემო მყოფთა კრიტიკას, რაც თქვენს ურთიერთობაზე უარყოფითად აისახება. რაც უფრო ადრე იტყვით უარს ფუჭ მოლოდინებზე, თქვენთვის მით უფრო უკეთესი იქნება.

სასწორი

დამღლელი კვირის შემდეგ თავს უენერგიოდ გრძნობთ და დაწყებული საქმის დასრულება გიჭირთ. ახლობელ ადამიანთან ურთიერთობაში მოსალოდნელია სამწუხარო გაუგებრობა, ამიტომ ყველანაირად ეცადეთ, ეს დღე განმარტოებით, სიმშვიდეში გაატაროთ – ძალებსაც აღიდგენთ და კამათსაც აარიდებთ თავს.

მორიელი

დილიდან მელანქოლიურ განწყობას ებრძვით. ნუ მისცემთ თავს წარსულში დარჩენის უფლებას. ეცადეთ, ახალი გეგმები შეადგინოთ და საკუთარი ოცნებისკენ ნაბიჯ-ნაბიჯ იაროთ. პირად ურთიერთობებში არსებული პრობლემები შეიძლება გულწრფელი საუბრით და სადავო საკითხების განხილვით მოაგვაროთ. გირჩევთ, იმედი არ გაუცრუოთ ადამიანს, რომელსაც თქვენი დახმარება სჭირდება.

მშვილდოსანი

ამ დღის ემოციური ფონი ნაჩქარევი და დაუფიქრებელი გადაწყვეტილებების მიღებისკენ გიბიძგებთ. ეცადეთ, კარგად გაიაზროთ ამა თუ იმ ქმედების აუცილებლობა და მხოლოდ ამის შემდეგ განახორციელოთ. პატივი ეცით საყვარელი ადამიანის სურვილებს და გადაწყვეტილებებს. დღის განმავლობაში უსიამოვნო შემთხვევებისგან შინაგანი წინდახედულობა და გაძლიერებული ინტუიცია დაგიცავთ.

თხის რქა

გირჩევთ, ეს დღე ოჯახს და საყოფაცხოვრებო საკითხების მოგვარებას დაუთმოთ. ახალი ან მნიშვნელოვანი საქმის დაწყებას მოერიდეთ და ვალდებულებების შესრულება სამომავლოდ გადადეთ. დაწყებული საქმის დასრულებაში მოულოდნელად ისეთი ადამიანები დაგეხმარებიან, ვისგანაც მხარდაჭერას არ ელოდით. ეცადეთ პლანეტების კეთილგანწყობა ფინანსური საკითხების მოგვარებისა და მნიშვნელოვან ადამიანებთან ურთიერთობისთვის გამოიყენოთ.

მერწყული

ამ დღეს ყველაზე მეტად კამათში ჩართვას და საკუთარი სიმართლის მტკიცებას უნდა მოერიდოთ. ურთიერთობა მხოლოდ მაშინ გაუმჯობესდება, თუ ნაკლებს ისაუბრებთ და საყვარელი ადამიანების სურვილებს მეტად მოუსმენთ. დროა თქვენს ყოფაში ჯანსაღი ცხოვრების წესი დანერგოთ და ფიზიკური მდგომარეობა გაიძლიეროთ.

თევზები

შოპინგი იმედებს გაგიცრუებთ, ამიტომ სასურველია, რომ ეს დღე მაღაზიებისგან მოშორებით გაატაროთ. შეგიძლიათ ამ დღეს პროფესიული პრობლემები დროებით დაივიწყოთ და მთელი დრო საკუთარ თავს მიუძღვნათ. შესაძლოა, ბრწყინვალე იდეა მოგივიდეთ, რომელიც დამატებითი შემოსავლის მიღებაში დაგეხმარებათ.

წყალტუბოში, ოტია იოსელიანის სახლ-მუზეუმში ხანძარი იყო. ინფორმაციას და კადრებს სოციალურ ქსელში იოსელიანების რძალი ნუცა ცისკარიშვილი ავრცელებს.

მისივე ცნობით, ცეცხლი მუზეუმის ზედა ნაწილში გაჩნდა. მწერლის რძალი ამბობს, რომ სახანძრო დროულად მივიდა და მეხანძრეების დახმარებით, მუზეუმი გადარჩა.

„ბუხრის საკვამურიდან გადავიდა სახურავზე ნაპერწკალი, რამაც გამოიწვია გამომშრალი ხის წვა. საბედნიეროდ, გადავრჩით, ძალიან მცირე ნაწილია დაზიანებული და ექსპონატებიც დიდად არ შელახულა.

არ იყო განზრახ გაჩენილი ხანძარი, არც დიდი დაუდევრობა მომხდარა. იყო პატარ-პატარა შეცდომების ბრალი, რომელზეც ხმამაღლა ვისაუბრებთ, რომ არც ერთ ბუხრიან სახლში იგივე არ განმეორდეს.

ყველაფერი კარგად არის, არავინ დაზიანებულა და სახლ-მუზეუმს არანაირი საშიშროება არ ემუქრება, – ამბობს ვიდეოში ნუცა ცისკარიშვილი.

ვრცლად, ნახეთ ვიდეო:

თბილისის მერია განცხადებას ავრცელებს. როგორც განცხადებაშია ნათქვამი, ეხმაურებიან ერთ-ერთი მედიასაშუალების მიერ გავრცელებულ ინფორმაციას, თითქოს საჯარო ბაღების აღსაზრდელების საკვებით უზრუნველყოფასთან დაკავშირებული ტენდერი თბილისის საბავშვო ბაგა-ბაღების მართვის სააგენტომ გასული წლის 30 დეკემბერს გამოაცხადა, რის გამოც ტენდერი ჩაიშალა და სააგენტო იძულებულია, საკვები გამარტივებული წესით შეიძინოს.

„რადგან საქმე პატარებს, მათ უსაფრთხოებასა და სკოლამდელი აღზრდის პროცესის გამართულად წარმართვას ეხება, სრული პასუხისმგებლობით ვაცხადებთ, რომ აღნიშნული ინფორმაცია არის სრული სიცრუე და საზოგადოების, განსაკუთრებით კი მშობლების შეცდომაში შეყვანას ისახავს მიზნად.

გამომდინარე იქიდან, რომ ბაღებზე „სახელმწიფო შესყიდვების შესახებ“ საქართველოს კანონი 2024 წლიდან პირველად გავრცელდა, თითოეული ბაღი შემსყიდველ ორგანიზაციად დარეგისტრირდა და ერთობლივი ტენდერი გამოცხადდა. უფრო კონკრეტულად, ბაღების საკვებით მომარაგებასთან დაკავშირებული ბაზრის კვლევა ჩატარდა გასული წლის 17-28 ნოემბრის პერიოდში, ორივე ტენდერი კი (მტკვრის მარცხენა სანაპირო და მარჯვენა სანაპიროები) გამოცხადდა ამავე წლის 30 ნოემბერს.

სატენდერო პროცედურების მიმდინარეობისას, ორივე ტენდერი გასაჩივრდა კონკურენტი კომპანიების წარმომადგენლების მიერ, რაც გარკვეულ პროცედურულ საკითხებთანაა დაკავშირებული. იმის გამო, რომ საბავშვო ბაგა-ბაღებში სააღმზრდელო პროცესი 15 იანვარს იწყება, გადაუდებელი აუცილებლობით შესყიდულია საკვები პროდუქტების მიწოდება 29 თებერვლის ჩათვლით.

გვინდა, ხაზგასმით აღვნიშნოთ, რომ არცერთი ტენდერი არ ჩავარდნილა. სატენდერო პროცედურები გადაწყვეტილების მიღების შემდგომ, ჩვეულ რეჟიმში გაგრძელდება. გადაუდებელი აუცილებლობით გამოწვეული შესყიდვის განხორციელებამდე ჩატარებულია ბაზრის კვლევა და ხელშეკრულებები გაფორმებულია უმცირესი შემოთავაზების მქონე კომპანიასთან.

ამ ეტაპზე, თბილისში 189 საჯარო ბაგა-ბაღია, რომელიც 60 000-მდე ბავშვს ემსახურება, აღსაზრდელების საკვებით უზრუნველყოფა კი, მათ შორის, პანდემიის პირობებში, მუნიციპალიტეტისთვის მნიშვნელოვანი საკითხია.

კიდევ ერთხელ მოვუწოდებთ მედიის წარმომადგენლებს, რომ მუნიციპალიტეტთან დაკავშირებული საკითხები, განსაკუთრებით თუ ეს პატარებს ეხება, გადაამოწმონ თბილისის მერიის პრესსამსახურთან“, – ნათქვამია განცხადებაში.

საქართველოს 2024 წლის ევროვიზიის სიმღერის კონკურსზე ნუცა ბუზალაძე წარადგენს.

ნუცა ბუზალაძე დაიბადა 1997 წლის 28 იანვარს. 5 წლიდან დადიოდა ანსამბლ „მართვეში“, შემდეგ იყო საბავშვო ანსამბლ „მზიურის“ მთავარი ვოკალისტი, ასევე უკრავდა გიტარაზე. 8 წლიდან დაიწყო ფორტეპიანოს შესწავლა.

წლების განმავლობაში მონაწილეობა აქვს მიღებული 10-ზე მეტ კონკურსში და ბევრჯერ მოიპოვა აღიარება როგორც საქართველოში, ასევე მის ფარგლებს გარეთ.

ევროვიზია 2024 შვედეთის ქალაქ მალმეში 7, 9 და 11 მაისს გაიმართება.

ქვემო ქართლში, ავტოსაგზაო შემთხვევის შედეგად 4 ადამიანი დაშავდა.

შემთხვევა მარნეულთან მოხდა. ერთმანეთს ორი ავტომანქანა შეეჯახა. შემთხვევის ადგილზე სასწრაფო სამედიცინო დახმარება და პოლიცია იყო მობილიზებული.

როგორც შინაგან საქმეთა სამინისტროში განაცხადეს, გამოძიება სისხლის სამართლის კოდექსის 276-ე მუხლით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

12 იანვარს დღის ბოლოდან 14 იანვრის დღის მეორე ნახევრამდე საქართველოში მოსალოდნელია დროგამოშვებით ნალექი, უმეტესად თოვლის სახით, ზოგან ძლიერი, ქარბუქი, გზებზე ლიპყინული, ელექტროგადამცემ ხაზებზე შემოყინულობა, – ამის შესახებ ინფორმაციას გარემოს ეროვნული სააგენტო ავრცელებს.

მათივე ცნობით, 13 იანვარს იქროლებს დასავლეთის მიმართულების ძლიერი ქარი, ზღვაზე შესაძლებელია 3-4 ბალიანი შტორმული ღელვა.

„14-15 იანვარს ღამის საათებში გაძლიერდება ყინვა. დასავლეთ საქართველოს დაბლობ რაიონებში ჰაერის ტემპერატურის -3, -5 გრადუსამდე მოსალოდნელმა დაწევამ შესაძლოა, ციტრუსოვანი კულტურების (განსაკუთრებით ლიმონის) დაზიანება გამოიწვიოს.

საავტომობილო გზების ცალკეულ მონაკვეთებზე შესაძლებელია, შეიზღუდოს ტრანსპორტის მოძრაობა“, – აცხადებენ გარემოს ეროვნულ სააგენტოში.