პარლამენტის პირველი ვიცე-სპიკერი გიორგი ვოლსკი აცხადებს, რომ ვერანაირი გარე ძალების დახმარებით, ქართული ოპოზიცია ვერ შეძლებს ქვეყანაში არეულობისა და დესტაბილიზაციის შემოტანას. მისი თქმით, ეს არის სცენარი, რომელიც მიხეილ სააკაშვილმა ჯერ კიდევ დიდი ხნის წინ დაგეგმა.

„ყველაფერი ერთად უნდა განვიხილოთ – კონსტიტუციის დარღვევა, იქ რაღაცა ტრენინგების ჩატარება იმისათვის, რათა ახალგაზრდები მოამზადონ დაპირისპირებისათვის. სამოქალაქო სისხლის ღვრის მზადება მიდის ჩვენს თვალწინ. სუს-მა გამოაქვეყნა ზოგიერთი ფაქტი და დეტალი გამოძიებისა, რომელიც ჩაატარა, თუმცა ჩვენ თვალწინაც ხდებოდა ის პროცესები, რომელიც შემდეგ გადაიზარდა პარლამენტზე, ცესკო-ზე შეტევაში, „მოლოტოვის კოქტეილების“ სროლაში და ა.შ. ესეც დასამალი არ არის, რომ ინტელექტუალურ რესურს გამოცლილმა ოპოზიციამ გადაწყვიტა, რომ განავითაროს ის რევოლუციური სცენარი, რომელიც ჯერ კიდევ სააკაშვილმა 2014 წელს განაცხადა“, – აღნიშნა ვოლსკიმ.

სახელმწიფო უსაფრთხოების სამსახურში შესაძლო დესტაბილიზაციისა და არეულობის მოწყობის საქმეზე გამოძიება გრძელდება. გამოძიების შედეგებს ელოდებიან მმართველ პარტიაში.

ჩვენ დავრჩებით საქართველოში მანამ, სანამ საჭირო იქნება , -ამის შესახებ საქართველოში ევროკავშირის სადამკვირვებლო მისიის ხელმძღვანელმა დიმიტრიოს კარაბალისმა ევროკავშირის სადამკვირვებლო მისიის დაარსებიდან მე-15 წლისთავთან დაკავშირებით სიტყვით გამოსვლისას განაცხადა.

მისი განმარტებით, საქართველოში ევროკავშირის სადამკვირვებლო მისიის ყოფნა ბოლო 15 წლის განმავლობაში ადასტურებს ევროკავშირის გრძელვადიან ერთგულებას მშვიდობისა და უსაფრთხოების ხელშეწყობისთვის.

„ევროკავშირის უმაღლესმა წარმომადგენელმა, ჯოზეფ ბორელმა თავად იხილა ხურვალეთში, თუ რას ნიშნავს ბაღში ბასრწვერიანი მავთულხლართის ღობის ქონა ან იმ სასაფლაოზე მისვლის შეუძლებლობა, სადაც შენი ოჯახის წევრები არიან დაკრძალული. ის ამან ძალიან შეძრა. ეს მოგონება მას თან გაყვება ბრიუსელში.

კიდევ ერთხელ მინდა გავიმეორო ჩვენი მთავარი გზავნილი: თხუთმეტი წლის განმავლობაში, ევროკავშირის სადამკვირვებლო მისია გადამწყვეტ როლს თამაშობს სტაბილურობის უზრუნველყოფაში და დაძაბულობის შემცირებაში საქართველოში და ფართო რეგიონში. ჩვენი ადგილზე ყოფნა ბოლო 15 წლის განმავლობაში ადასტურებს ევროკავშირის გრძელვადიან ერთგულებას მშვიდობისა და უსაფრთხოების ხელშეწყობისთვის. ჩვენ კვლავ ვრჩებით ერთგულები ადგილობრივი თემების სიცოცხლისა და უსაფრთხოების გაუმჯობესების ჩვენი მისიისადმი. ჩვენ დავრჩებით საქართველოში მანამ, სანამ საჭირო იქნება“, – განაცხადა კარაბალისმა.

ჩვენ ავირჩიეთ ეს სამართლებრივი გზა იმისთვის, რომ ქვეყანაში ყველა დონეზე დავაბრუნოთ საკონსტიტუციო წესრიგი. ჩვენი მთავარი მიზანი სწორედ ეს გახლავთ, – ამის შესახებ საპარლამენტო უმრავლესობის წევრმა, საპროცედურო საკითხთა კომიტეტის თავმჯდომარემ, ირაკლი ქადაგიშვილმა პრეზიდენტის იმპიჩმენტის საკითხზე საუბრისას განაცხადა.

„რაც შეეხება პარლამენტში 100 ხმის შეგროვებას, ჩვენ რა თქმა უნდა ამასთან დაკავშირებით არავისთან არანაირ მოლაპარაკებას არ ვაწარმოებთ. მთავარი ამოცანაა, რომ სწორედ ეს სამართლებრივი შეფასება არსებობდეს“, – აღნიშნა ქადაგიშვილმა.

დაარღვია თუ არა პრეზიდენტმა სალომე ზურაბიშვილმა, საქართველოს კონსტიტუცია – საკონსტიტუციო სასამართლოს სხდომა 3 ოქტომბერს არის ჩანიშნული. სწორედ საკონსტიტუციოს გადაწყვეტილებაზეა დამოკიდებული, იმსჯელებს თუ არა პარლამენტი პრეზიდენტის იმპიჩმენტის საკითხზე.

ეს თემა ხალხს არ აინტერესებს, არც „ნაციონალურ მოძრაობას“ – პარტიის პოლიტიკურ საბჭოს გადაწყვეტილი აქვს, რომ ამ სხდომაში მონაწილეობის მიღებას და მისთვის ყურადღების მიქცევას არ ვაპირებთ, – ამის შესახებ „ნაციონალური მოძრაობის“ თავმჯდომარემ, ლევან ხაბეიშვილმა საქართველოს პრეზიდენტის, სალომე ზურაბიშვილის იმპიჩმენტის საკითხთან დაკავშირებით განაცხადა.

მისივე განმარტებით, აღნიშნული თემა ბიძინა ივანიშვილს და „რუსულ პარტიას“ აწყობთ.

„ყოველ ჯერზე ერთი და იმავეს თქმა შემიძლია, რომ ეს თემა მხოლოდ ბიძინა ივანიშვილს და რუსულ პარტიას აწყობს. თავად მოიგონეს იმპიჩმენტი, თავად ითვლიან ხმებს, ვიღაცა მისცემს-არ მისცემს. ეს თემა ხალხს არ აინტერესებს, არც „ნაციონალურ მოძრაობას“ – პარტიის პოლიტიკურ საბჭოს გადაწყვეტილი აქვს, რომ ამ სხდომაში მონაწილეობის მიღებას და მისთვის ყურადღების მიქცევას არ ვაპირებთ. იმავეს ვთხოვ ყველა პროდასავლურ მედიას, რომ მაქსიმალურად ვეცადოთ, იმ თემას აქტუალიზაცია არ გავუკეთოთ, რომელიც ბიძინა ივანიშვილს და რუსულ პარტიას აწყობს. პლუს ამას, ეს ქვეყნის გარეთ გვაზიანებს. ქვეყნის შიგნით კი, საზოგადოებას საერთოდ არ აინტერესებს სალომე ზურაბიშვილთან დაკავშირებული და მოგონილი ამბავი, რომელზეც ბრიფინგებს თავად რუსული პარტიის ლიდერები მართავენ. მონაწილეობის მიღებას არ ვაპირებთ“,- აღნიშნავს ხაბეიშვილი.

დაარღვია თუ არა პრეზიდენტმა სალომე ზურაბიშვილმა, საქართველოს კონსტიტუცია – საკონსტიტუციო სასამართლოს სხდომა 3 ოქტომბერს არის ჩანიშნული. სწორედ საკონსტიტუციოს გადაწყვეტილებაზეა დამოკიდებული, იმსჯელებს თუ არა პარლამენტი პრეზიდენტის იმპიჩმენტის საკითხზე.