გავაგრძელებთ უკრაინის მხარდაჭერას, როგორც აქამდე იყო. აქტიურად ვეხმარებოდით უკრაინას ჰუმანიტარული თვალსაზრისით, პოლიტიკური, დიპლომატიური ხაზით, ეს არის ჩვენი პასუხისმგებლობა, ჩვენი ღირსეული დამოკიდებულება პარტნიორის მიმართ. ჩვენ მიმართ ვერცერთი უპასუხისმგებლო დამოკიდებულება, თუ გადაწყვეტილება ამ ხაზს ვერ შეგვაცვლევინებს, – ამის შესახებ საქართველოს საგარეო საქმეთა მინისტრმა, ილია დარჩიაშვილმა განაცხადა.

დარჩიაშვილის თქმით, ყოფილ პრეზიდენტ მიხეილ სააკაშვილთან დაკავშირებით ყველაფერი ნათელია და უკრაინის გადაწყვეტილება საფუძველს არის მოკლებული.

„გაუგებარი და საფუძველს მოკლებული იყო გადაწყვეტილება, რომელიც უკრაინისგან მოვისმინეთ. მეგობრები ასეთ დამოკიდებულებას არ იმსახურებენ. ჩვენ ტრადიციულად აქამდე გვქონდა ძალიან ბევრი შემთხვევა, როდესაც ზოგიერთი უკრაინელი პოლიტიკოსისგან გაუგებარი, უსამართლო დამოკიდებულება მოვისმინეთ საქართველოს მისამართით. ჩვენ ტრადიციულად ვინარჩუნებთ სიმშვიდეს. ეს ჩვენი დამოკიდებულებაა მეგობარი ხალხის და ქვეყნის მისამართით. ჩვენ აუცილებლად გვექნება დრო მომავალში, რათა ვიმსჯელოთ ამ საკითხებზე ორმხრივ ფორმატებში, თუმცა დღეს ტრადიციულად ჩვენ ვარჩევთ იმ პოზიციას, რომელიც გვაქვს, რომელიც გამოვხატეთ. ჩვენ ამაზე რეაგირება არ გვექნება. შესაბამისად, როგორც ვისაუბრეთ, ელჩი დაბრუნდება უახლოეს პერიოდში საქართველოში. ასევე, ძალიან მნიშვნელოვანია საფუძველი, რომელიც გახდა განმაპირობებელი ამ გაუგებარი გადაწყვეტილების, ვფიქრობთ, რომ ყოფილ პრეზიდენტთან დაკავშირებით ნათელია ყველაფერი, ყველა საკითხი იმასთან დაკავშირებით, რაოდენ პასუხისმგებლობით ეკიდება სახელმწიფო ყველა პატიმრის, მათ შორის სააკაშვილის უფლებებს. შესაბამისად, თავად ეს საკითხიც საფუძველს მოკლებულია, როგორც მოვისმინეთ, გადაწყვეტილება განპირობებული იყო სწორედ ამ საკითხით.

შესაბამისად, ჩვენ გავაგრძელებთ უკრაინელი ხალხის, უკრაინის მხარდაჭერას ჩვენი შესაძლებლობების ფარგლებში, როგორც აქამდე იყო. ჩვენ ძალიან აქტიურად ვეეხმარებოდით უკრაინას ჰუმანიტარული თვალსაზრისით, პოლიტიკური, დიპლომატიური ხაზით, ეს არის ჩვენი პასუხისმგებლობა, ჩვენი დამოკიდებულება, ღირსეული დამოკიდებულება ჩვენი პარტნიორის მისამართით და ამას გავაგრძელებთ. ვერცერთი უპასუხისმგებლო დამოკიდებულება, თუ გადაწყვეტილება ჩვენ მიმართ, ამ ხაზს ვერ შეგვაცვლევინებს“, – აღნიშნა ილია დარჩიაშვილმა.

უკრაინის პრეზიდენტმა, ვოლოდიმირ ზელენსკიმ 3 ივლისს განაცხადა, რომ სთხოვს საქართველოს ელჩს, 48 საათის განმავლობაში დატოვოს უკრაინა, რათა კონსულტაციები გამართოს თბილისში მიხეილ სააკაშვილის უკრაინაში დაბრუნებაზე. ზელენსკის თქმით, რუსეთი საქართველოს ხელისუფლების ხელით კლავს უკრაინის მოქალაქე მიხეილ სააკაშვილს.

საქართველოს საგარეო უწყების განცხადებით, სამწუხაროა, რომ ოფიციალური კიევი მეგობარი სახელმწიფოსა და ხალხის მიმართ დიპლომატიური ურთიერთობების გამწვავების უკიდურეს ფორმას მიმართავს. როგორც უწყების განცხადებაშია ნათქვამი, აღნიშნულ გადაწყვეტილებას განსაკუთრებით გაუგებარს ხდის უკრაინის ხელისუფლების მიერ დასახელებული საფუძველი.

დედაქალაქის მერი კახა კალაძე  მედიასთან საუბრისას  გამოეხმაურა  „ხალხის ძალის“ მიერ მაიკლ მაკფოლის განცხადების შეფასებას, სადაც აღნიშნულია, რომ  მაკფოლის განცხადება არა გადამოწმებულ ფაქტებს, არამედ რადიკალური ოპოზიციის ნარატივს ეფუძნება.

კახა კალაძის განცხადებით, საქართველოს მხრიდან სანქციების გვერდის ავლასთან დაკავშირებით ქვეყნის შიგნით თუ გარეთ გაკეთებული რიგი განცხადებები ყოველგვარ კონკრეტიკას და მტკიცებულებებს მოკლებულია.

მისივე თქმით, საქართველოში იმყოფებოდა სანქციების საკითხების შემსწავლელი ტექნიკური ჯგუფი, რომლის დასკვნა  აბათილებს სანქციებთან დაკავშირებულ ბრალდებებს.

„ერთი, რაც  ცხადია – ძალიან დიდი მოწოდებები და ზეწოლა იყო მეორე ფრონტთან და  სანქციების მიერთებასთან დაკავშირებით. მიუხედავად ამ ზეწოლისა, ჩვენ არაერთხელ განვმარტეთ, თუ რატომ არ ვუერთდებით სანქციებს და აქ პირდაპირ არის ნათქვამი, რომ პირველ რიგში, ვითვალისწინებთ ჩვენი ქვეყნის ინტერესს,  ხალხის ინტერესს და არ მივიღებთ ისეთ გადაწყვეტილებას, რომელიც თავიდანვე ვიცით, რომ დამაზიანებელი იქნება. სანქციების მიზანი უნდა იყოს სხვისი დაზიანება. მგონი, ყველა ვხვდებით, რომ თუ ქართული პროდუქტები არ გავა რუსულ ბაზარზე, ამით ჩვენ რუსულ ეკონომიკას ვერაფერს ვერ ვუზამთ, პირიქით – დავაზიანებთ საკუთარს, დავაზიანებთ ჩვენი ქვეყნის მოქალაქეს, ჩვენს ეკონომიკას. რატომ უნდა გავაკეთოთ და მივიღოთ ისეთი გადაწყვტილება, რომელიც ვიცით, რომ დამაზიანებელი იქნება. რაც შეეხება განცხადებებს, რომ საქართველო ხშირად არის გამოყენებული სანქციების გვერდის ავლისთვის, ამის დამადასტურებელი ვერანაირი ფაქტი, ვერანაირი კონკრეტიკა და მაგალითი  ვერ იყო მოყვანილი. ჯგუფმა, რომელიც ჩამოსული იყო და სანქციებზე მუშაობს, მადლობა გამოუცხადა საქართველოს ხელისუფლებას თანამშრომლობისთვის და ამ მიმართულებით გადადგმული ნაბიჯებისთვის.

კიდევ ერთხელ მინდა ხაზი გავუსვა, ჩვენ არაფერს გავაკეთებთ ისეთს, რომელიც დამაზიანებელი იქნება ჩვენი ქვეყნისთვის, ყველა თვალსაზრისით, გინდ ეკონომიკურად, გინდ პიარულად და ასე შემდეგ“, – განაცხადა კახა კალაძემ.

პარტია „პროგრესი და თავისუფლებას“ ლიდერი კახა ოქრიაშვილი განცხადებას ავრცელებს, რომელსაც „ჯორჯიან თაიმსი“ უცვლელად გთავაზობთ:

„უკიდურესად დაიძაბა უკრაინასა და საქართველოს შორის სახელმწიფოთაშორისი ურთიერთობა. ამის მთავარი მიზეზი „რუსული ოცნების“ მოღალატეობრივი პრორუსული პოლიტიკაა!

ამ დაპირისპირების ერთ მხარეს წარმოვადგენთ ჩვენ, ქართველი ხალხი, უკრაინელ ხალხთან და მთავრობასთან ერთად, ხოლო მეორე მხარეს წარმოადგენს პუტინ-ივანიშვილი და მოღალატეობრივი „რუსული ოცნება“.

დრო ჩართულია – ქართველი ხალხი მალე ჩარეცხავს „რუსულ ოცნებას“! – აცხადებს კახა ოქრიაშვილი.

შეგვიძლია პირდაპირი პარალელი გავავლოთ სანქციების შესახებ მაკფოლის განცხადებასა და ვლადიმირ ზელენსკის გუშინდელ გადაწყვეტილებას შორის. როგორც მაკფოლის განცხადებით სცადეს ტექნიკური ჯგუფის დასკვნების გადაფარვა, ზუსტად ასევე სცადეს იგივე ძალებმა ზელენსკის მიერ ჩვენი ელჩის გაძევებით სააკაშვილის შესახებ სტრასბურგის სასამართლოს გადაწყვეტილების გაუფერულებაც, – ამის შესახებ „ხალხის ძალის“ მიერ გავრცელებულ განცხადებაშია ნათქვამი, რომლითაც ისინი რუსეთში ამერიკის შეერთებული შტატების ყოფილი ელჩის და უკრაინის პრეზიდენტის მიერ შექმნილი რუსეთის სანქციების ჯგუფის კოორდინატორის, მაიკლ მაკფოლის მიერ „რადიო თავისუფლებისთვის“ მიცემულ ინტერვიუს ეხმიანებიან.

„ხალხის ძალის“ შეფასებით, მაკფოლის და მისი მეგობრების პროვოკაციულ მოწოდებებს არავითარ შემთხვევაში არ უნდა აყვნენ და ხელისუფლებამ კვლავ ის პოლიტიკა უნდა შეინარჩუნოს, რომლის წყალობითაც საქართველო დღემდე მშვიდობას ინარჩუნებს.

„გვინდა გამოვეხმაუროთ, მაიკლ მაკფოლის მიერ „რადიო თავისუფლებისთვის” მიცემულ ინტერვიუს, საიდანაც რამდენიმე ყურადსაღები პასაჟი ამოვიკითხეთ.

პირველ რიგში, აშკარაა, რომ რადიკალურ ოპოზიციას და მის უფროსებს არ მოეწონათ ამერიკულ-ევროპული ტექნიკური ჯგუფის ვიზიტის შედეგები, რომელმაც დაადგინა, რომ საქართველო სანქციების გვერდის ავლის საშუალებას არავის აძლევს. ტექნიკურმა ჯგუფმა საქართველოში რამდენიმე დღე გაატარა და ეს დასკვნა ფაქტებისა და დოკუმენტების გადამოწმების საფუძველზე გამოიტანა, რის შემდეგაც ხელისუფლებას საგანგებო მადლობაც გადაუხადა. როგორც ჩანს, ამ შედეგით შეშფოთდა „გლობალური ომის პარტია” და საკუთარ აგენტურას მაკფოლის ინტერვიუ წააშველა, რომელმაც უაპელაციოდ, ყოველგვარი ფაქტებისა და დოკუმენტების გარეშე განაცხადა, სანქციების გვერდის ავლის მტკიცებულებები გვაქვს და მომავალში კონკრეტული კომპანიები და ადამიანები შეიძლება დავასანქციროთო. ამგვარი მტკიცებულებები მაკფოლს ტექნიკური ჯგუფისგან უნდა მიეღო, თუმცა, ტექნიკურმა ჯგუფმა ვითარების სიღრმისეული შეფასებიდან სრულიად სხვა დასკვნა გამოიტანა, საიდანაც ჩანს, რომ მაკფოლის განცხადება რადიკალური ოპოზიციის მცირეოდენ გამაგრებას ისახავდა ერთადერთ მიზნად.

შეგვიძლია პირდაპირი პარალელი გავავლოთ სანქციების შესახებ მაკფოლის განცხადებასა და ვლადიმირ ზელენსკის გუშინდელ გადაწყვეტილებას შორის. როგორც მაკფოლის განცხადებით სცადეს ტექნიკური ჯგუფის დასკვნების გადაფარვა, ზუსტად ასევე სცადეს იგივე ძალებმა ზელენსკის მიერ ჩვენი ელჩის გაძევებით სააკაშვილის შესახებ სტრასბურგის სასამართლოს გადაწყვეტილების გაუფერულებაც. გარდა ამისა, ზელენსკის გუშინდელი გადაწყვეტილება იყო არაჟნების კონტეინერის ჩავარდნილი სპეცოპერაციის გადაფარვის უსუსური მცდელობაც. ყველას გვახსოვს აღიარებითი ჩვენებები იმასთან დაკავშირებით, რომ კონტეინერში სააკაშვილის მოთავსებისა და საქართველოში გამოგზავნის სპეცოპერაცია დაგეგმა და აღასრულა უკრაინის ხელისუფლების მაღალჩინოსანმა, გია ლორთქიფანიძემ, რომელიც მოგვიანებით უკრაინის კონტრდაზვერვის სამსახურის უფროსის მოადგილედაც კი დააწინაურეს. აშკარაა, რომ სააკაშვილის თემის წინ წამოწევით, უკრაინის ხელისუფლება მოშლილი ქართული რადიკალური ოპოზიციის გაცოცხლებას ცდილობს. სამწუხაროა, რომ ამ ყველაფრით ჩვენს ქვეყნებსა და ხალხებს შორის ისტორიული მეგობრობა ზიანდება. შესაბამისად, უკრაინის ხელისუფლების გადაწყვეტილება არა მხოლოდ ქართული სახელმწიფოს, არამედ ქართველი ხალხის მიმართ უპატივცემულობის გამოხატულებაცაა. საქართველოში მეორე ფრონტის მისაღწევად სააკაშვილის თემის გამოყენებით უკრაინის ხელისუფლება იმდენად არის დაინტერესებული, რომ არ გამოვრიცხავთ, ისინი სააკაშვილის ლიკვიდაციასაც კი განიხილავდნენ, რაზეც პირდაპირი მინიშნებები გუშინ დავით არახამიამ გააკეთა.

მაკფოლის ინტერვიუს რომ მივუბრუნდეთ, ჩვენი ქვეყნის წარსულსა და აწმყოზე ამ კაცმა განაცხადა, საქართველო ადრე იყო რეგიონის ლიდერი დემოკრატიული ქვეყანა, რომლისგანაც რეფორმებს ვსწავლობდით, ახლა კი აუტსაიდერი გახდაო. როგორც ჩანს, მაკფოლს აოცებდა სააკაშვილის ციხეები, ადამიანების წამება და გაუპატიურება, ქუჩაში დახვრეტილი ახალგაზრდები, ბიზნესის რეკეტი, ელიტური კორუფცია, ტელევიზიების მიტაცება და მრავალი სხვა „რეფორმა”, რომელიც სააკაშვილის რეჟიმმა თავის დროზე „გაატარა”.

შეიძლება მაკფოლი ყველაზე მეტად 2008 წლის ომმა გააოცა, რომელსაც სააკაშვილი 2005 წლიდან მოყოლებული დიდი რუდუნებით ამწიფებდა: სააკაშვილმა ე.წ. სამხრეთ ოსეთის საზღვრები აღადგინა, ცხინვალის რეგიონში პარალელური სეპარატისტული არჩევნები ჩაატარა, კოდორის ხეობას ზემო აფხაზეთი უწოდა, ერთდროულად მილიტარიზაციით ტრაბახობდა და კეზერაშვილს ქართული ჯარი გააძარცვინა, კონსტიტუციური წყობილების აღდგენა დააანონსა და ბოლოს… ხელი მოაწერა ევროსაბჭოს რეზოლუციას, რითაც 2008 წლის აგვისტოს ომის დაწყება თავის თავზე აიღო, ქართულ ჯარს კი საერთაშორისო ჰუმანიტარული სამართლისა და ადამიანის უფლებათა დარღვევა დააბრალა. შეიძლება მაკფოლს ყველაზე მეტად სააკაშვილის ის დანაშაული მოსწონდა, რომელმაც საქართველოს ამხელა უბედურება დაატეხა თავს. მართალია 2008 წლის ომმა ჩვენი ქვეყანა ყველაზე მეტად დააზარალა, მაგრამ ფაქტია, რომ ომმა რუსეთსაც უმძიმესი რეპუტაციული და ეკონომიკური ზიანი მიაყენა. იქნებ, ამისათვის ემადლიერება და აქებს მაკფოლი სააკაშვილს, ანუ ესკალაციის დავალების პირნათლად შესრულებისთვის, რაზეც მოქმედი ხელისუფლება ასე ჯიუტად ამბობს დღეს უარს.

სინამდვილეში, მაკფოლის ეს განცხადება იმის კიდევ ერთი მტკიცებულებაა, რომ ზემოთ ჩამოთვლილ ყველა დანაშაულს, ესკალაციისა და რუსული სამხედრო აგრესიის პროვოცირების ჩათვლით, ნაცმოძრაობა არა საკუთარი იმპროვიზაციით, არამედ მაკფოლის მეგობრების კარნახით სჩადიოდა.

კიდევ ერთი და ყველაზე საინტერესო თემა, რასაც მაკფოლი შეეხო, რუსეთთან ესკალაცია და ამასთან დაკავშირებული საფრთხეები იყო. პრიგოჟინის აჯანყებაზე კომენტირებისას, მაკფოლმა თქვა, დავინახეთ, რომ პუტინი არც ისეთი მაგარია, უკან დახევა და მოლაპარაკებაც შეუძლია და ესკალაციის შემთხვევაში, არათუ მოლაპარაკებაზე, კაპიტულაციაზეც კი შეიძლება წამოვიდესო. მაკფოლი ამბობს, ეს საინტერესო უნდა იყოს იმ ქვეყნებისთვის, რომლებიც უკრაინას ეხმარებიან, მაგრამ ესკალაციისგან დღემდე თავს იკავებენო. მეტიც, მაკფოლმა ამას მოწოდებაც კი მიაყოლა, ეს ქვეყნები ესკალაციას არ უნდა შეუშინდნენო.

როდესაც ამ ყველაფერს ქართველ ჟურნალისტს ეუბნები, ცხადია, ვინ არის ამ მოწოდების ადრესატი და რა არის მისი მიზანი. ჩვენ დიდი ხანია ვამტკიცებთ, რომ „გლობალური ომის პარტიისთვის” საკმარისი არაა ის მხარდაჭერა, რომელსაც საქართველო უკრაინის მიმართ გამოხატავს. მათ სურთ ამაზე მეტი, რაშიც მხოლოდ მეორე ფრონტი შეიძლება იგულისხმებოდეს და სწორედ ამ თემაზე საუბრობს ასე გულწრფელად ბატონი მაკფოლი.

პრიგოჟინის თემაზე განცხადება გუშინწინ „ქართული ოცნების” თავმჯდომარემაც გააკეთა. თუმცა, მან მაინც ვერ გარისკა იმის დაკონკრეტება თუ ვის გულისხმობდა იმ ძალებში, რომელთა დავალებითაც რადიკალური ოპოზიცია, პრიგოჟინის აჯანყების ფონზე, საქართველოში მეორე ფრონტის გახსნაზე და აფხაზეთსა და ცხინვალში ტანკებით შესვლაზე საუბრობდა. ჩვენი მოსახლეობის უდიდესი უმრავლესობისთვის, ალბათ, უკვე ცხადია, რომ რადიკალური ოპოზიცია ამ შემთხვევაშიც მაკფოლის უფროსების კარნახით მოქმედებდა.

ვინც ესკალაციისკენ გვიბიძგებს, მისი ერთადერთი მიზანია, საქართველოს განადგურების ხარჯზე, რუსეთს პირველ ფრონტზე პოზიციები შეუსუსტოს. ამიტომ, მაკფოლის და მისი მეგობრების პროვოკაციულ მოწოდებებს არავითარ შემთხვევაში არ უნდა ავყვეთ და ხელისუფლებამ კვლავაც ის პოლიტიკა უნდა შეინარჩუნოს, რომლის წყალობითაც საქართველო დღემდე მშვიდობას ინარჩუნებს“, – ნათქვამია განცხადებაში.

ინფორმაციისთვის, აშშ-ის ყოფილი ელჩი რუსეთში, სტენფორდის უნივერსიტეტის პროფესორი და უკრაინის პრეზიდენტის მიერ შექმნილი რუსეთის სანქციების ჯგუფის კოორდინატორი მაიკლ მაკფოლი „რადიო თავისუფლებისთვის“ მიცემულ ინტერვიუში აცხადებს, რომ საკმაოდ მყარი მტკიცებულებები არსებობს, რომელიც მიუთითებს, რომ ისინი ეხმარებიან რუსეთს სანქციებზე გვერდის ავლასა ან, ასე ვთქვათ, „გზის მოჭრაში”.

„ჩვენ გვსურს ამას ნათელი მოვფინოთ. იმაზე, რომ საქართველო ნამდვილად არის ჩართული ამაში, ისიც მიუთითებს, რომ დავასახელებთ ცნობილ გვარებს. ჯერ საბოლოო გადაწყვეტილება არ გვაქვს მიღებული, და ამიტომაც ვფრთხილობ“,- აცხადებს მაიკლ მაკფოლი.

დედაქალაქის მერის, კახა კალაძის განცხადებით, ოპოზიციის წარმომადგენლები ასრულებენ დავალებებს და შესაბამის განცხადებებს აკეთებენ. ამის შესახებ მან მედიასთან ისაუბრა.

როგორც კახა კალაძემ აღნიშნა, ოპოზიციის მოწოდებების მიუხედავად, რომ ქვეყანა მიუერთდეს სანქციებს, საქართველოს ხელისუფლება არ გადადგამს ისეთ ნაბიჯებს, რაც ქვეყანას დააზიანებს.

„ოპოზიცია არც საკუთარ თავს ეკუთვნის, არც საკუთარ ქვეყანას. ეს ადამიანები ყოველთვის ცდილობენ, სხვა ქვეყნის ინტერესები გაატარონ. მათ  უბრალოდ ავალებენ, რომ ეს განცხადებები გააკეთონ. ავალებენ, რომ ისე მოიქცნენ, როგორც დღეს იქცევიან.

ჩვენ არ გადავდგამთ ისეთ ნაბიჯს, რაც თავიდანვე ვიცით, რომ ჩვენი ქვეყნისთვის დამაზიანებელი იქნება. ევროკავშირის ქვეყნებს, რა თქმა უნდა, სავაჭრო ურთიერთობები გააჩნიათ რუსეთის ფედერაციასთან. სანქციებთან მიერთება კი, ვიცით, რომ ჩვენი ეკონომიკისთვის პრობლემა იქნება. რატომ უნდა გავაკეთოთ ის, რაც დაგვაზიანებს?!“, – აღნიშნა თბილისის მერმა.