სწორად აქვს ანალიზი გაკეთებული სუს- ის ანალიტიკოსს, რომ ომის რიტორიკას ოკუპირებულ ტერიტორიებზე იყენებენ რუსეთის ანექსიის პოლიტიკის გამართლებისთვის – ამ დეზინფორმაციის გამავრცელებლები არიან რუსეთის წარმომადგენლები, მათ შორის “ქართული ოცნება”,- ამის შესახებ პარლამენტში გამართულ ბრიფინგზე “სტრატეგია აღმაშენებლის” დეპუტატმა პაატა მანჯგალაძემ განაცხადა.

მისივე თქმით, ოკუპანტები, საოკუპაციო რეჟიმი და “ქართული ოცნების” ლიდერები სინქრონიზებულად მოქმედებენ.

“სუს- ის ანგარიშში ოკუპირებულ ტერიტორიებზე მიმდინარე მოვლენები სამართლიანად არის შეფასებული. კერძოდ, ანგარიშის მიხედვით, უკრაინაში მიმდინარე ომის ფონზე, საქართველოს ოკუპირებულ ტერიტორიებზე აქტიურად ვრცელდებოდა დეზინფორმაცია, თითქოს საქართველო მათ მიმართ ძალის გამოყენებისთვის ემზადებოდა, ომისთვის და მეორე ფრონტის გახსნისთვის. შემდეგ ვკითხულობთ სუს-ის ძალიან საინტერესო ანალიტიკას, რომ ომის და მეორე ფრონტის ნარატივი საოკუპაციო რეჟიმის წარმომადგენლებმა გამოიყენეს ადგილობრივი მოსახლეობის დაშინებისთვის და მათში რუსეთის ანექსიური პოლიტიკის შემრიგებლობის დანერგვისთვის. ეს თუ ხდებოდა ოკუპირებულ ტერიტორიაზე, ახლა დავსვათ კითხვა, ვინ ავრცელებდა ამ ნარატივს ქვეყანაში? – საქართველოს ხელისუფლება, “ქართული ოცნება”, ირაკლი კობახიძე და ირაკლი ღარიბაშვილი. თუ საოკუპაციო რეჟიმები ამას იყენებენ მოსახლეობის დათრგუნვისთვის, იგივე მიზნები ხომ არ გააჩნია შემთხვევით ღარიბაშვილს და კობახიძეს? თვითმარქვია პრეზიდენტი ასლან ბჟანია ეხმაურება საქართველოში მიმდინარე მოვლენებს და ამბობს, რომ ოპოზიციას სურდა, პროცესებით ესარგებლა და აფხაზეთის რეგიონში საკონსტიტუციო წესრიგი დაემყარებინა. ანუ სინქრონიზებულად მოქმედებენ ოკუპანტები, საოკუპაციო რეჟიმი და სამწუხაროდ, “ქართული ოცნების” ლიდერები. სწორად აქვს ანალიზი გაკეთებული სუს- ის ანალიტიკოსს (არ ვიცი, ვინ შეასრულა ეს სამუშაო), რომ ომის რიტორიკას იყენებენ მოსახლეობის დაშინებისთვის და რუსეთის ანექსიის პოლიტიკის გამართლებისთვის. დასკვნა უნდა გავაკეთოთ, რომ ამ დეზინფორმაციის გამავრცელებლები არიან რუსეთის წარმომადგენლები, მათ შორის “ქართული ოცნება”,- განაცხადა მანჯგალაძემ.

პრაქტიკულად, საკითხი არ არსებობს, სადაც უკრაინის პოზიციას, სულ მცირე, არ აქვს საკმაოდ სერიოზული, ფართო განხილვა და რასაკვირველია, მათ მოსაზრებასაც ანგარიშს უწევენ, ბევრი ფაქტორის გათვალისწინებით, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა, რომელმაც უპასუხა კითხვას, ექნება თუ არა გავლენა უკრაინას საქართველოსთვის სტატუსის მინიჭების საკითხზე.

გია ვოლსკის თქმით, საქართველო ყველა მონაცემით უსწრებს უკრაინას და მოლდოვას.

ამასთან, როგორც ვოლსკიმ აღნიშნა, სამართლიანი განხილვის პირობებში უკრაინის პოლიტიკურად ანგაჟირებულ პოზიციას მხარდაჭერა არ ექნება.

„ევროკომისიის პრეზიდენტმა, ურსულა ფონ დერ ლაიენმა თქვა, რომ უკრაინელები იღუპებიან ევროპისთვის. ეს არის თემა, რომელიც მუდმივად მუსირებს ბრიუსელში, ამ სტრუქტურებში. საქართველოს ყველა მონაცემით აქვს უკეთესი პოზიცია, ვიდრე უკრაინას, მოლდოვას და ბევრ სხვა ქვეყანას, მათ შორის ევროკავშირის წევრ ქვეყნებს. უკეთესი მონაცემები აქვს მთელი რიგი მიმართულებით, იქნება ეს მართლმსაჯულება, კორუფციის დამარცხების საკითხი თუ ინსტიტუტები და მთავრობის გამჭვირვალეობა, კრიმინალთან ბრძოლა, გენდერული თანასწორობის საკითხები. სამართლიანი განხილვის პირობებში უკრაინის პოლიტიკურად ანგაჟირებულ პოზიციას შესაბამისი გამოძახილი და მხარდაჭერა არ ექნება“, – განაცხადა გია ვოლსკიმ.

კიდევ ერთ კითხვაზე, დააფიქსირებს თუ არა უკრაინა საქართველოს სტატუსის მინიჭების საკითხზე ნეგატიურ პოზიციას, ვოლსკიმ აღნიშნა:

„ნეგატიური პოზიცია უკვე დააფიქსირა. უკრაინის პოლიტიკური ისტებლიშმენტის და „ნაცმოძრაობის“ ყოფილი და ახლანდელი წევრების გაერთიანებული ორგანიზაცია მოქმედებს საქართველოს წინააღმდეგ იმ მოტივით, რომ როგორმე დესტაბილიზაციის პროცესი განვითარდეს. ამას არასდროს მალავდნენ და არც ახლა მალევენ. ხელისუფლების შეცვლა, მეორე ფრონტის გახსნა და პროცესების ისე განვითარება, რომელიც მნიშვნელოვნად დააზიანებს საქართველოს ინტერესებს, მათ შორის სამხედრო თუ ეკონომიკური დაპირისპირება რუსეთთან, არის მექანიზმები, რომლებსაც ლობირებენ გარკვეული პოლიტიკური ძალები, სამწუხაროდ, უკრაინაშიც“, – აღნიშნა გია ვოლსკიმ.