შესაბამისი ძალები ხედავენ, რომ კეზერაშვილი, ხაბეიშვილი, მერაბიშვილი არ ფლობენ აქ ვითარების არევის რესურსს და აქედან გამომდინარე, ამ ძალებს აქვთ სააკაშვილისა და გვარამიას იმედი, რომ ისინი მოახერხებენ საკუთარი რესურსით იმის მიღწევას, რასაც ვერ აღწევს კეზერაშვილი, ვერ აღწევს ხაბეიშვილი, – ამის შესახებ „ქართული ოცნების“ თავმჯდომარემ, ირაკლი კობახიძემ გადაცემაში „იმედი LIVE“ განაცხადა.

საპარლამენტო უმრავლესობის ლიდერის თქმით, ხელისუფლება არ იმსჯელებს არც სააკაშვილის უკრაინისთვის გადაცემაზე და არც მისთვის ელექტრონული სამაჯურის გაკეთების სანაცვლოდ ციხიდან გამოშვებაზე.

„გინდ სამაჯურით, გინდ სამაჯურის გარეშე, გინდ ქვეყნის გარეთ – თუ საუბარია ადამიანის გათავისუფლებაზე, ეს არის გათავისუფლება და ჩვენი პოზიციაა, რომ მიხეილ სააკაშვილმა კუთვნილი სასჯელი სათანადოდ უნდა მოიხადოს. კანონი უნდა აღსრულდეს ამ ქვეყანაში. ეს არის საჭირო მათ შორის იმისთვის, რომ არ შესრულდეს პოდოლიაკისა და დანილოვის მოწოდებები. რომ გითხრათ, სააკაშვილი გამოვა და ქვეყანას დააქცევს – რა თქმა უნდა, ამის რესურსი არ აქვს, მაგრამ გათვლა ეს არის“, – განაცხადა კობახიძემ.

გვარამიას რა რესურსი აქვს, ამაზე დიდი წარმოდგენა მაინცდამაინც არ მაქვს. „გოუ გოუ ჟენიათი“ დაიწყო თავისი განახლებული პოლიტიკური კარიერა. „გოუ გოუ ჟენიამ“ რას უნდა მიაღწიოს პოლიტიკაში, საზოგადოება ამას ნახავს, – ამის შესახებ ირაკლი კობახიძემ გადაცემაში „იმედი LIVE“ განაცხადა.

„ქართული ოცნების“ თავმჯდომარის და საპარლამენტო უმრავლესობის ლიდერის თქმით, პრეზიდენტი გვარამიას შეწყალების გადაწყვეტილების მიღებისას დამოუკიდებელი არ იყო, და ძალიან გაუჭირდა იმ ბრიფინგის ჩატარება, რომელზეც ეს გადაწყვეტილება გააჟღერა.

„თვითონ არ სიამოვნებდა იმ გადაწყვეტილების გახმოვანება, რომელიც მიიღეს – არ მინდა ვთქვა „მიიღო“. მისთვის ადამიანურადაც მიუღებელი იქნებოდა ამ გადაწყვეტილების გახმოვანება, როდესაც კონკრეტული ადამიანი რეზიდენტს გეძახის და პირდაპირ ბილწსიტყვაობს შენ მიმართ, ასეთი კაცის შეწყალების დროს ვერ გამოხვალ სხვანაირად. ფერი არ ედო სახეზე პრეზიდენტს, როცა ამ გადაწყვეტილებას აცხადებდა. დამოუკიდებელი არ იყო ის ამ ქმედებაში, ეს ცხადია“, – განაცხადა კობახიძემ.

ეს იქნება პოლიტიკური გადაწყვეტილება და ამ ვითარებაში რისკები არის მაღალი. ამ მაღალი რისკების პირობებში, რადიკალურ ოპოზიციას აქვს იმის იმედი, რომ ჩვენთვის დაიბლოკება კანდიდატის სტატუსი პოლიტიკურად, ყოველგვარი 12 პუნქტისგან დამოუკიდებლად, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა.

კობახიძის თქმით, ოპოზიციის გეგმები აწყობილია იმაზე, რომ საქართველომ არ მიიღოს კანდიდატის სტატუსი, რათა შემდეგ რევოლუციური სცენარის განხორციელება შესაძლებელი გახდეს.

მან ასევე აღნიშნა, რომ ბაკურიანის ცნობილ შეკრებაზე ტრენინგი სწორედ რევოლუციის შესახებ ჩატარდა, ხოლო რადიკალებს რომ იგივე გეგმა აქვთ დეკემბრისთვის, რაც გასული წლის ივნისისთვის ჰქონდათ, ზურაბ ჯაფარიძემ გაამხილა.

„შეგახსენებთ, ბაკურიანში როდესაც გაიმართა ცნობილი შეკრება, ეს იყო მალევე, როცა ჩვენ წარვადგინეთ განაცხადი, მაშინ ტრენინგი ჩაუტარეს რევოლუციაში, ამერიკელი ექსპერტი ჰყავდათ ჩამოყვანილი. გეგმავდნენ რევოლუციას და პირდაპირ საუბარი ჰქონდათ შემდეგზე: არავითარი „თუ“, ივნისში როცა საქართველოს არ მიენიჭება კანდიდატის სტატუსი, ჩვენ უნდა მოვიყვანოთ მოქმედებაში რევოლუციური გეგმა. პირდაპირ ამაზე იყო საუბარი ბაკურიანის შეკრებაზე, იგივე გეგმა გაამხილა, მაგალითად, ზურა გირჩი ჯაფარიძემ ახლა უკვე დეკემბერთან მიმართებით.

რადიკალური ოპოზიციის მთელი გეგმები არის აწყობილი იმაზე, რომ ჩვენ დეკემბერში არ უნდა მოგვენიჭოს კანდიდატის სტატუსი. არამარტო გეგმები, თავიდან ბოლომდე მუშაობენ ამაზე, რომ საქართველოს არ მიენიჭოს დეკემბერში კანდიდატის სტატუსი, რომ ეს შემდეგ რევოლუციური პროცესებისთვის გამოიყენონ“, – აღნიშნა ირაკლი კობახიძემ გადაცემაში „იმედი LIVE“ .

„ქართული ოცნების“ თავმჯდომარის განცხადებით, მთავარია, ხელისუფლებამ და საზოგადოებამ სიმყარე აჩვენოს, რაც კანდიდატის სტატუსის მინიჭების შანსს უფრო გაზრდის.

როგორც კობახიძემ განმარტა, გლობალური ომის პარტია თუ დაინახავს, რომ საზოგადოება მერყეობს და იმის მცირე შანსი მაინც არსებობს, სტატუსის არმინიჭების შემთხვევაში რევოლუცია მოხდეს, ამ შემთხვევაში კანდიდატის სტატუსის მინიჭების შანსები მცირდება.

„მთავარია, რაც უფრო მეტ სიმყარეს აჩვენებს ხელისუფლება და, პირველ რიგში, საზოგადოება, მით უფრო მეტი შანსი იქნება, რომ ჩვენ მოგვენიჭოს კანდიდატის სტატუსი. დარწმუნებული ვარ, რომ დეკემბერში ასეთი მდგომარეობით მივალთ, როგორიც დღეს არის. დღეს ხელისუფლება, საზოგადოება არის მყარად, სათანადო პოზიციებზე, ამ მდგომარეობას თუ შევინარჩუნებთ, ამ შემთხვევაში ბევრად უფრო მაღალი იქნება ჩვენთვის კანდიდატის სტატუსის მინიჭების შანსი. გლობალური ომის პარტია თუ დაინახავს მცირე მერყეობას მაინც და დაინახავს იმის შანსს, რომ არმინიჭების შემთხვევაში მოხდეს ამ ქვეყანაში რევოლუცია, რა თქმა უნდა, ამ შემთხვევაში, შანსები მცირდება. ამიტომ მთავარია, ჩვენ შევინარჩუნოთ სიმყარე და ეს აუცილებლად ასე იქნება. დარწმუნებული ვარ, როგორც ხელისუფლება, ისე საზოგადოება მყარად იქნება იმ პოზიციებზე, რომლებიც შედის ქვეყნის ინტერესებში“, – განაცხადა ირაკლი კობახიძემ.

უკრაინაში საქართველოს ელჩის, გიორგი ზაქარაშვილის განცხადებით, მისთვის მიცემული 48-საათიანი ვადა 6 ივლისს, 12 საათზე იწურება და უკრაინის საზღვრის გადაკვეთას იქამდე შეეცდება.

როგორც ელჩმა აღნიშნა, კიევიდან საზღვრამდე, ავტომობილის ან მატარებლის გარდა, სხვა ტრანსპორტი არ მოძრაობს და უკრაინის დატოვება სირთულესთან არის დაკავშირებული.

„დროის ათვლა დაიწყო ჩემი გუშინდელი შეხვედრის შემდეგ. უხეშად რომ ვთქვათ, 48 საათი გადის 6 ივლისის 12 საათზე. ბუნებრივია, მაქსიმალურად ვეცდები, 6 ივლისის 12 საათამდე უკრაინის ტერიტორია დავტოვო. მოგეხსენებათ, კიევიდან საზღვრამდე, მანქანის ან მატარებლის გარდა, სხვა ტრანსპორტი არ მოძრაობს, შესაბამისად, ეს საკმაო სირთულეებთან არის დაკავშირებული“, – განაცხადა გიორგი ზაქარაშვილმა „რუსთავი 2“-ის ეთერში.

უკრაინის პრეზიდენტმა, ვოლოდიმირ ზელენსკიმ 3 ივლისს განაცხადა, რომ სთხოვს საქართველოს ელჩს, 48 საათის განმავლობაში დატოვოს უკრაინა, რათა კონსულტაციები გამართოს თბილისში მიხეილ სააკაშვილის უკრაინაში დაბრუნებაზე. ზელენსკის თქმით, რუსეთი საქართველოს ხელისუფლების ხელით კლავს უკრაინის მოქალაქე მიხეილ სააკაშვილს.

უკრაინის ხელისუფლების პოზიცია საქართველოსთან მიმართებით ცხადია, თვითონ ღიად საუბრობდნენ თავის დროზე, რა სურთ საქართველოსგან და ამისთვის მადლობა ეკუთვნის უკრაინის ხელისუფლებას, რადგან არიან ძალები, რომლებსაც იგივე სურთ საქართველოსგან, მაგრამ ამაზე ღიად არ საუბრობენ, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ „იმედის“ ეთერში განაცხადა.

„მადლობა უკრაინის ხელისუფლებას, რომელიც გულახდილია. პირდაპირ საუბრობდა უკრაინის ხელისუფლება იმასთან დაკავშირებით, რა უნდათ საქართველოსგან. მაგალითად, უშიშროების საბჭოს მდივანი დანილოვი, ასევე ზელენსკის მთავარი მრჩეველი პოდოლიაკი პირდაპირ მოგვიწოდებდნენ მეორე ფრონტისკენ. რა თქმა უნდა, ყველა მათი ნაბიჯი უკავშირდება ამ ინტერესს, არ მალავენ. გახსოვთ, ელჩის გაწვევა საქართველოდან. ბელარუსიდან არ ჰყავდათ ელჩი გაწვეული, მაშინ როდესაც მთავარი შეტევა განხორციელდა ბელარუსიდან კიევზე. ელჩი გაიწვიეს საქართველოდან და არ გაუწვევიათ ბელარუსიდან, ვინმეს დღემდე მოუსმენია ამის რაიმე დასაბუთება? მაშინ იყო მძიმე ემოციური ფონი და გათვლა იყო იმაზე, რომ ამ ფონზე ზელენსკის ეს გადაწყვეტილება საზოგადოებაში გამოიწვევდა მღელვარებას, არეულობას, ხელისუფლების შეცვლას. „ნაციონალური მოძრაობა“ რომ ყოფილიყო ხელისუფლებაში, ისინი პირდაპირ გახსნიდნენ მეორე ფრონტს“, – განაცხადა კობახიძემ.

რა არის ჩემთვის უკრაინა? ეს ჩემი ცხოვრებისა და ბრძოლის მნიშვნელოვანი ნაწილია, ჩემთვის საქართველოს გადარჩენა უკრაინის გარეშე ყოველთვის წარმოუდგენელი იყო, – ამის შესახებ საქართველოს ყოფილი პრეზიდენტი მიხეილ სააკაშვილი წერს ავტობიოგრაფიულ წერილში – „მე და უკრაინა“, რომელიც „უკრაინსკაია პრავდამ“ გამოაქვეყნა.

„უკრაინა ჩემი ცხოვრებისა და ბრძოლის მნიშვნელოვანი ნაწილია. ჩემი შეგნებული ცხოვრების უმეტესი ნაწილი უკრაინაში გავატარე. ახლა უკრაინულად უფრო კარგად ვლაპარაკობ, ვიდრე რუსულად. უკრაინა ჩემი სახლია კიევში, პატარა მიწის ნაკვეთი – მირგოროდში. უკრაინა ჩემი განსაკუთრებული სიყვარულია – ქალაქი ოდესა. უკრაინაში ჩემი მეგობრების უმეტესი ნაწილია, ამ ბოლო დროს უკრაინა ჩემი პატარა ქალიშვილი ჟასმინია, რომლის ნახვისა და ხელში აყვანის საშუალება ჯერ არ მქონია.

ჩემთვის საქართველოს გადარჩენა და წარმატება ყოველთვის წარმოუდგენელი იყო უკრაინის გარეშე, ახლა კი საუბარია ევროპის კონტინენტის გადარჩენაზე და ჩემს გადარჩენაზე, პუტინის ოლიგარქიული ციხიდან გადარჩენაზე“, – წერია სააკაშვილის წერილში.