ხაბე, გამაგრდი, გიტევენ, მაგრამ ვიცი, რომ შენც მედგრად დგახარ და აბა, შენ იცი, – ამის შესახებ საპარლამენტო უმრავლესობის წევრმა, ირაკლი ზარქუამ განაცხადა, რომლითაც უპასუხა ჟურნალისტების კითხვას წალენჯიხაში გიორგი მუმლაძისა და ლევან ხაბეიშვილის ფრთის დაპირისპირებასთან დაკავშირებით.

ზარქუას თქმით, „ლევან ხაბეიშვილის წინააღმდეგ შეთქმულებას აქვს ადგილი“.

„ჩემი ხაბეს წინააღმდეგ შეთქმულებას აქვს ადგილი, ცუდას რად უნდა მტერობა, ამას გეტყვით. ხაბე, გამაგრდი, გიტევენ, მაგრამ ვიცი, რომ შენც მედგრად დგახარ და აბა, შენ იცი. სხვათა შორის, ხაბეს ისევ ჰყავს 17-კაციანი ამალა, გუშინ ვიხილე, „ვივამედთან“ მივიდნენ. შემორჩენილი ჰყავს ჩემს ხაბეს ის 17-კაციანი ამალა და მას ერთი კაცი არ უნდა დააკლდეს. რა გითხრათ, ხაბე რომ თავმჯდომარეა და მთავარი ოპოზიციური პარტია ჰქვია, თემა დამთავრებულია. ხაბე რომ თავმჯდომარეა, იმაზე მეტად პარტია რა უნდა დაზიანდეს“, – განაცხადა ირაკლი ზარქუამ.

უკრაინის ხელისუფლების გადაწყვეტილებას მორალური თვალსაზრისით პრობლემები აქვს, თუმცა ჩვენ მოგვიწევს თავშეკავებულები ვიყოთ, ასეთი განცხადებების შემდეგ ურთიერთობის დარეგულირება რთულია, მაგრამ ამას მცდელობას არ დავაკლებთ, – ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, მიხეილ სარჯველაძემ განაცხადა.

„აშკარად შეიმჩნევა, რომ პრიორიტეტების ახლებურად გადალაგება ხდება, ამ შემთხვევაში უკრაინის მხრიდან. როგორც ჩანს, პრიორიტეტების კონფიგურაცია შეიცვალა და ქართულ-უკრაინულ ურთიერთობებზე უფრო ღირებული სააკაშვილისა და „ნაცმოძრაობის“ მხარდაჭერა გახდა. ეს რა მიზნებს შეიძლება ისახავდეს, ამაზე დასკვნების გაკეთება ჩვენს საზოგადოებას არ გაუჭირდება. ეს გადაწყვეტილება არათუ გასაკვირი იყო, არამედ ყველას უჩნდება კითხვები, მათ შორის იქიდან გამომდინარე, რომ ეს იყო ელჩი, რომელიც ღირსეულად იქცეოდა და უკრაინაში საკუთარი სამსახური ერთი დღეც არ დაუტოვებია, რაც ვაჟკაცური ჟესტი იყო უკრაინის მხარდასაჭერად, როცა კიევს შეიძლება ყველაზე მეტად უჭირდა. შესაბამისად, ეს გადაწყვეტილება არის უსამართლო და მორალური თვალსაზრისით გადაწყვეტილებას პრობლემები აქვს, თუმცა ჩვენ მოგვიწევს თავშეკავებულები ვიყოთ. ამ ყველაფერს კარგი სახელი მოეძებნა – ცალმხრივი მეგობრობის რეჟიმში ვიქნებით.

ალბათ მცდელობა გვექნება, რომ ეს ყველაფერი დარეგულირდეს, რადგან ასეთი გადაწყვეტილებები არც უკრაინის ინტერესებში არ არის და არც საქართველოსი, არც ევროპის. ასეთი განცხადებების შემდეგ ურთიერთობის დარეგულირება რთულია, მაგრამ ჩვენ ამას მცდელობას არ დავაკლებთ, თუმცა შედეგი მხოლოდ ჩვენს მცდელობაზე დამოკიდებული ვერ იქნება“, – განაცხადა მიხეილ სარჯველაძემ.

უკრაინის პრეზიდენტმა, ვოლოდიმირ ზელენსკიმ 3 ივლისს განაცხადა, რომ სთხოვს საქართველოს ელჩს, 48 საათის განმავლობაში დატოვოს უკრაინა, რათა კონსულტაციები გამართოს თბილისში მიხეილ სააკაშვილის უკრაინაში დაბრუნებაზე. ზელენსკის თქმით, რუსეთი საქართველოს ხელისუფლების ხელით კლავს უკრაინის მოქალაქე მიხეილ სააკაშვილს.

როგორც უკრაინაში საქართველოს ელჩი გიორგი ზაქარაშვილი აცხადებს, მზად არის, უკრაინა მისთვის მიცემულ ვადაში დატოვოს.

სუს-ის ანგარიშში ძალიან ბევრი ბუნდოვანი ჩანაწერია და ძალიან ჰგავს „ქართული ოცნების“ პოლიტიკურ განცხადებებს, – ასე აფასებს პოლიტიკურ ჯგუფ „ევროოპტიმისტების“ დეპუტატი რომან გოცირიძე სუს-ის ანგარიშს, რომელსაც პარლამენტი ხვალ განიხილავს.

როგორც გოცირიძე აღნიშნავს, დოკუმენტში გარე საფრთხეებთან დაკავშირებით ნახსენებია უცხო ქვეყანა და არა რუსეთი.

„არის ერთი ასეთი დებულება, რომ თურმე სუს-მა თავიდან აიცილა უცხო ქვეყნის სპეცსამსახურების აქტივობა და რომელი ქვეყანაა ეს, არ ასახელებს. თუ რუსეთია, ახსენონ პირდაპირ რუსეთი, მაგრამ რუსეთს არ ჰგავს, რადგან თურმე მერე სუს-მა აიცილა ამ რომელიღაც უცხო ქვეყნის ინტერვენცია ანუ შემოჭრა საქართველოში. რომ იტყვიან – „გვარს არ დავასახელებ და ჩვენი კოლმეურნეობის თავმჯდომარეო“, ასე არ ასახელებენ რომ რუსეთია, მაგრამ მერე თურმე სუს-მა აიცილა „მეორე ფრონტის“ გახსნა – ეს სიტყვა არაა გამოყენებული, მაგრამ ასე იკითხება. „ქართული ოცნების“ ლიდერების პოლიტიკური განცხადებების გამეორებაა. ანგარიშის მოსმენისას გამოვკითხავ დაწვრილებით, რა იგულისხმება ამაში, ვინ აპირებდა პროვოკაციას და ვინ აპირებდა საქართველოში შემოჭრას. სადაც საკითხი ეხება რუსეთს, ირიბად არის ნათქვამი და არ არის ნახსენები, ვინ და რა იგულისხმება.

რაც შეეხება სახელმწიფო თანამდებობის პირის მოსალოდნელ ლიკვიდაციას, ნათლად უნდა იყოს ნათქვამი, ვინ არის ეს პირი, დაუნიშნეს თუ არა დაცვა, რატომ, რა მოტივით, შიდა არეულობის მოწყობა უნდოდათ, თუ ამ პირის მიმართ განსაკუთრებული ინტერესი ჰქონდათ და ბოლოს და ბოლოს ვინ არის, ვინც მოკვლას აპირებდნენ. აგერ, „მეორე ფრონტის“ გახსნა უნდაო ევროპას და ამერიკას და ამიტომ შესაძლებელია ორაზროვნად იქნას წაკითხული, ბუნებრივია, აქ უნდა იგულისხმებოდეს რუსეთი, თუ სხვას არ გულისხმობენ,“ – განაცხადა გოცირიძემ.

სუს-ის საქმიანობის ამსახველი ყოველწლიური ანგარიში პარლამენტში აპრილის თვეში შევიდა.

დოკუმენტს პარლამენტის სამი კომიტეტი – თავდაცვისა და უშიშროების, იურიდიულ საკითხთა და ადამიანის უფლებათა დაცვის კომიტეტები ერთობლივი სხდომაზე 7 ივლისს განიხილავს. არსებული ინფორმაციით, სუს-ის ხელმძღვანელს ანგარიშით რიგგარეშე სესიის ფარგლებში მოუსმენენ.

“ნაბიჯი, რომელიც უკრაინის ხელისუფლების მხრიდან ვნახეთ, მძიმეა და, ბუნებრივია, დიპლომატიურ ურთიერთობებზე პოზიტიურად ვერ იმოქმედებს. მიხეილ სააკაშვილთან დაკავშირებით რა მდგომარეობაა, ყველასთვის ცნობილია, ეს თემა არის დახურული”, – ამის შესახებ საპარლამენტო უმრავლესობის წევრმა, გიორგი კახიანმა განაცხადა.

მისივე თქმით, სააკაშვილთან მიმართებით არსებობს კანონიერ ძალაში შესული გამამტყუნებელი გადაწყვეტილება, კითხვები არ არსებობს ქვეყნის შიგნით და ამ ფონზე კიდევ უფრო გაუგებარია უკრაინის ხელისუფლების გადაწყვეტილება, რაც მეგობრული ურთიერთობის განმტკიცების თვალსაზრისით არ არის კარგი ნაბიჯი.

„უკრაინის ხელისუფლების გადაწყვეტილება, რბილად რომ ვთქვათ, უსამართლო და ყოვლად უსაფუძვლოა. მიხეილ სააკაშვილთან დაკავშირებით რა მდგომარეობაც არის ქვეყნის შიგნით, საზოგადოებისთვის ცნობილია და კითხვები ამაზე მგონია, რომ არ ჩნდება. ამ ფონზე კიდევ უფრო მეტად გაუგებარია ასეთი გადაწყვეტილება. მიუხედავად ყველაფრისა, ჩვენ გავაგრძელებთ იმ ღირსეულ დამოკიდებულებას, რომელიც ჩვენი მეგობარი ქვეყნის მიმართ გვაქვს, მით უმეტეს, რომ ომის მდგომარეობაში იმყოფება. ჩვენ გავაგრძელებთ მხარდაჭერას, რომელიც გვქონდა და იმედი მაქვს, ასეთი შემთხვევები მეტი აღარ იქნება და პირიქით, გადაიდგმება ნაბიჯები, რაც გაამყარებს ჩვენ ურთიერთობებს. ასეთი ნაბიჯი, რაც უკრაინის ხელისუფლების მხრიდან ვნახეთ, მძიმე ნაბიჯია და, ბუნებრივია, დიპლომატიურ ურთიერთობებზე პოზიტიურად ვერ იმოქმედებს, მაგრამ ჩვენი მხრიდან არ ხდება ეს, რატომღაც ასეთი გადაწყვეტილება მიიღო უკრაინის ხელისუფლებამ. მიხეილ სააკაშვილთან დაკავშირებით რა მდგომარეობაა, ყველასთვის ცნობილია, ეს თემა არის დახურული. მასთან მიმართებით არსებობს კანონიერ ძალაში შესული გამამტყუნებელი გადაწყვეტილება და, აქედან გამომდინარე, ის იმყოფება პენიტენციურ დაწესებულებაში, თუმცა, იცით, რომ სამკურნალო დაწესებულებაშია და იქ იხდის სასჯელს. კითხვები არ არსებობს ქვეყნის შიგნით და ამ ფონზე კიდევ უფრო გაუგებარია უკრაინის ხელისუფლების გადაწყვეტილება, რაც მეგობრული ურთიერთობის განმტკიცების თვალსაზრისით არ არის კარგი ნაბიჯი”, – განაცხადა კახიანმა.

უკრაინის პრეზიდენტმა, ვოლოდიმირ ზელენსკიმ საქართველოს ხელისუფლებას მოუწოდა, მიხეილ სააკაშვილი უკრაინას გადასცეს.

უკრაინის ხელისუფლების მხრიდან არის მცდელობა, რომ როგორმე საქართველოს სტატუსი არ მიეცეს, რათა ამან საზოგადოებაში დაძაბულობა გამოიწვიოს და დესტაბილიზაციის ახალი ტალღა წარმოიშვას, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.

ვოლსკის განცხადებით, უკრაინის გადაწყვეტილება უსამართლო და უსაფუძვლოა.

„უკრაინის მხრიდან უსამართლო გადაწყვეტილება არის მიღებული. ეს, უსამართლოსთან ერთად, უსაფუძვლოცაა, რაც საკმაოდ გამაღიზიანებელი და გულდასაწყვეტია. უკრაინაში კარგად იციან, თუ რაოდენ მძლავრი პოლიტიკური, სამართლებრივი და ჰუმანიტარული დახმარება მიიღეს საქართველოსგან ყველა კრიტიკულ მომენტში. უკრაინისთვის საგანგებო თემაა საქართველოში ხელისუფლების შეცვლა და ამას არც მალავენ. საქართველო საომარ მოქმედებებში არ ჩაერთო და მოხალისეების წასვლას ორგანიზება არ გაუკეთა და უკრაინამ ელჩი მაშინ გაიწვია, როცა აშკარა პოლიტიკურ თემებზე საუბარი საერთოდ არ იყო. „შავ ხვრელებთან“ ყბადაღებული თემები მოიგონეს, რაც ტყუილი აღმოჩნდა. შემდეგ კი, ახალი ვერსია „მოხარშეს“ – სააკაშვილის „მოწამვლის“, რომელმაც ასევე არ იმუშავა და მას სტრასბურგის სასამართლომ წერტილი დაუსვა.

ახლა მცდელობაა იმის, რომ როგორმე საქართველოს სტატუსი არ მიეცეს, რათა ამან საზოგადოებაში დაძაბულობა გამოიწვიოს და დესტაბილიზაციის ახალი ტალღა წარმოიშვას. ეს იმდენად აშკარაა, რომ „ქართული ოცნების“ მხრიდან პოლიტიკური განცხადებებიც არაა საჭირო. „ნაცმოძრაობა“ ამას უკვე ღიად აცხადებს“,–  განაცხადა გია ვოლსკიმ.

უკრაინის პრეზიდენტმა, ვოლოდიმირ ზელენსკიმ 3 ივლისს განაცხადა, რომ სთხოვს საქართველოს ელჩს, 48 საათის განმავლობაში დატოვოს უკრაინა, რათა კონსულტაციები გამართოს თბილისში მიხეილ სააკაშვილის უკრაინაში დაბრუნებაზე. ზელენსკის თქმით, რუსეთი საქართველოს ხელისუფლების ხელით კლავს უკრაინის მოქალაქე მიხეილ სააკაშვილს.

როგორც უკრაინაში საქართველოს ელჩი გიორგი ზაქარაშვილი აცხადებს, მზად არის, უკრაინა მისთვის მიცემულ ვადაში დატოვოს.