ჩინეთის, ირანის და რუსეთის სამხედრო-საზღვაო ძალები მარტში ერთობლივ წვრთნებს ჩაატარებენ, – ინფორმაციას სააგენტო Xinhua ჩინეთის თავდაცვის სამინისტროზე დაყრდნობით ავრცელებს.

უწყების ცნობით, სწავლება, სახელწოდებით „უსაფრთხოების სარტყელი-2025“, დაგეგმილია ირანის ჩაბაჰარის პორტის მახლობლად მდებარე ტერიტორიებზე.

სწავლების გეგმა მოიცავს წვრთნებს საზღვაო დარტყმის სამიზნეებზე, დაზიანების კონტროლს, ასევე, ერთობლივ სამძებრო-სამაშველო სამუშაოებს.

ჩინეთის თავდაცვის სამინისტროს განმარტებით, წვრთნების მიზანია, სამხედრო ურთიერთნდობის გაძლიერება და მონაწილე ქვეყნების სამხედრო-საზღვაო ძალებს შორის პრაგმატული თანამშრომლობის გაღრმავება.

რუსეთმა, ამ კვირის განმავლობაში, ჩვენს ხალხზე სხვადასხვა ტიპის იარაღის გამოყენებით ასობით თავდასხმა განახორციელა, – ამის შესახებ უკრაინის პრეზიდენტი, ვოლოდიმირ ზელენსკი სოციალურ პლატფორმა X-ზე წერს.

მისი თქმით, მიმდინარე კვირაში რუსებმა უკრაინაზე თავდასხმისთვის 1 200-მდე მართვადი საჰაერო ბომბი, 870-მდე დრონი და 80-ზე მეტი სხვადასხვა ტიპის რაკეტა გამოიყენა.

„Shahed-ის ყველა დრონი და საჰაერო ბომბი, რომელსაც რუსეთი იყენებს, შეიცავს სანქციების გვერდის ავლით მიწოდებულ კომპონენტებს. ეს იარაღი მოიცავს 82 000-ზე მეტ უცხოურ კომპონენტს. ჩვენ ყოველდღიურად ვმუშაობთ ჩვენს პარტნიორებთან, რათა უზრუნველვყოთ გადაწყვეტილებების მიღება სიცოცხლის გადარჩენის მიზნით: საჰაერო თავდაცვის სისტემები, ინვესტიციები ჩვენს თავდაცვით წარმოებაში და სანქციების გამკაცრება რუსეთის წინააღმდეგ. ვაგრძელებთ ძალისხმევას სამართლიან მშვიდობასთან დასაახლოებლად და უსაფრთხოების საიმედო გარანტიების უზრუნველსაყოფად“, – აცხადებს ზელენსკი.

ვლადიმერ პუტინი, უკრაინის გამო, ფაქტობრივად, ფიზიკურ ორთაბრძოლაში გამოვიწვიე და ჩემი Starlink სისტემა უკრაინის არმიის ხერხემალია. მთელი მათი ფრონტის ხაზი ჩამოიშლება, თუ გავთიშე, – ამის შესახებ აშშ-ის მთავრობის ეფექტურობის დეპარტამენტის (DOGE) ხელმძღვანელი, ილონ მასკი სოციალურ პლატფორმა X-ზე წერს.

მისი თქმით, უკრაინაში მიმდინარე ომი უნდა შეჩერდეს და მშვიდობა უნდა დამყარდეს.

„რაც გულს მირევს, არის წლების ხოცვა-ჟლეტა ჩიხში, რომელსაც უკრაინა აუცილებლად წააგებს. ვისაც ნამდვილად აინტერესებს, ნამდვილად ფიქრობს და ნამდვილად ესმის, სურს ხორცსაკეპი მანქანის გაჩერება. მშვიდობა ახლავე!!“, – წერს მასკი.

2 დღე აშშ-უკრაინის მოლაპარაკებამდე. საუდის არაბეთში ჩანიშნულ შეხვედრაზე, ორი სახელმწიფოს უმაღლესი თანამდებობის პირები შეიკრიბებიან. საუდის არაბეთში მიემგზავრება, თუმცა მოლაპარაკებებში მონაწილეობას პირადად არ მიიღებს ვოლოდიმირ ზელენსკი.

უკრაინულ მხარეს პრეზიდენტის ოფისის ხელმძღვანელი ანდრეი ერმაკი, საგარეო საქმეთა მინისტრი ანდრეი სიბიგა და თავდაცვის მინისტრი რუსტემ უმეროვი წარმოადგენენ. შტატების დელეგაციის შემადგენლობაში კი, სახელმწიფო მდივანი- მარკო რუბიო, ახლო აღმოსავლეთში პრეზიდენტის წარმომადგენელი- სტივ ვიტკოფი და ეროვნული უსაფრთხოების საკითხებში დონალდ ტრამპის მრჩეველი, მაიკ უოლცი იქნებიან.

ომში მყოფი ქვეყნის პრეზიდენტი ამბობს, რომ შტატებთან ერთად ხანგრძლივი მშვიდობის მისაღწევად მზად არის. დონალდ ტრამპი კი, კონფლიქტში ჩართულ მხარეებს მოლაპარაკების მაგიდასთან დროულად დასხდომისკენ მოუწოდებს.

“ჩვენ მუდმივად ვინარჩუნებთ კავშირს ამერიკულ გუნდთან. ვემზადებით შეხვედრისთვის საუდის არაბეთში. მწამს, რომ ეს შეხვედრა მნიშვნელოვან შედეგებს მოიტანს: პოზიტიურად ვართ ამისთვის განწყობილნი — ეს უდავოა. უკრაინის მხრიდან წარმოდგენილი იქნებიან დიპლომატიური და სამხედრო წარმომადგენლები: პრეზიდენტის ოფისის ხელმძღვანელი ანდრეი იერმაკი, საგარეო საქმეთა მინისტრი ანდრეი სიბიჰა, უკრაინის დიპლომატიური კორპუსის რამდენიმე გამორჩეული წევრი, თავდაცვის მინისტრი რუსტემ უმეროვი და ოფისის ხელმძღვანელის მოადგილე პავლო პალისა — გამოცდილი საბრძოლო მეთაური, რომელიც სრულყოფილად იცნობს ფრონტის ხაზს და საფუძვლიანად ერკვევა ბრიგადების მდგომარეობაში. ყველა ღონეს ვხმარობთ, რათა უკრაინის ინტერესები სრულად იყოს გათვალისწინებული — გათვალისწინებული ზუსტად ისე, როგორც მათი მნიშვნელობა მოითხოვს.

ასევე, ველოდები თავდაცვის მინისტრის მოხსენებას დახმარების ახალ პაკეტზე, განსაკუთრებით, საჰაერო თავდაცვის სისტემებსა და ჩვენი თავდაცვითი წარმოებისთვის განკუთვნილ ინვესტიციებზე. ეს ჩვენთვის უმაღლესი პრიორიტეტებია, რაც უეჭველად ასეა. ამჟამად, თითქმის ყოველდღიურად, ჩვენი ევროპელი პარტნიორები იღებენ ახალ გადაწყვეტილებებს მხარდაჭერის შესახებ. გადამწყვეტია, რომ ეს გადაწყვეტილებები დაუყოვნებლივ განხორციელდეს. გულწრფელ მადლობას ვუხდი ყველას, ვინც უკრაინის გვერდით დგას”, – განაცხადა ვოლოდიმირ ზელენსკიმ.

ბრიტანეთში დაფუძნებული “სირიის ადამიანის უფლებათა ობსერვატორიის” ინფორმაციით, სირიის უსაფრთხოების ძალებმა, სავარაუდოდ, ასობით მშვიდობიანი მოქალაქე მოკლეს, – ინფორმაციას BBС-ი ავრცელებს.

ორგანიზაციის ცნობით, ორი დღის განმავლობაში 745 მშვიდობიანი მოქალაქე მოკლეს, რომლებიც „ალავიტების“ რელიგიურ უმცირესობას მიეკუთვნებოდნენ. აღსანიშნავია, რომ აღნიშნულ რელიგიურ სექტას მიეკუთვნება გადაყენებული პრეზიდენტი, ბაშარ ალ-ასადიც.

BBC-ი წერს, რომ “სირიის ადამიანის უფლებათა ობსერვატორიის” ცნობით, ბოლო ორი დღის განმავლობაში, სულ 1 000-ზე მეტი ადამიანი დაიღუპა. ეს რიცხვი მოიცავს ათობით სამთავრობო ჯარისკაცსა და ასადის მხარდამჭერ შეიარაღებულ პირს, რომელთა შორის შეტაკებები ლატაკიასა და ტარტუსის პროვინციებში ხუთშაბათიდან მიმდინარეობს.