ოქტომბრის მდგომარეობით, რეკორდულ ვადებში, მოქალაქეებისთვის სრულიად უფასოდ აიზომა 1.5 მლნ-ზე მეტი მიწის ნაკვეთი, ჯამური ფართობით 880 000 ჰა-ზე მეტი, – ამის შესახებ საქართველოს პრემიერ-მინისტრმა ირაკლი კობახიძემ მიწის სისტემური რეგისტრაციის რეფორმისადმი მიძღვნილ ღონისძიებაზე სიტყვით გამოსვლისას განაცხადა.

როგორც მთავრობის მეთაურმა აღნიშნა, რეფორმის მიზანია მიწის რესურსის ეკონომიკურ ბრუნვაში მოქცევა, ასევე საკუთრების უფლების მაქსიმალურად რეალიზება.

„ამ მიზნით, 2022 წლიდან, ჩვენმა ხელისუფლებამ დაიწყო რეფორმა. ყველა მუნიციპალიტეტში ხორციელდება მიწის სისტემური რეგისტრაცია. რეფორმა გულისხმობს მოქალაქეებისთვის მიწის უფასოდ აზომვას, ყველა საჭირო ინფორმაციის, დოკუმენტების, მონაცემების არქივში მოძიებას, უწყებათაშორის კოორდინაციას და საბოლოო ჯამში მიწაზე საკუთრების უფლების რეგისტრაციას”, – განაცხადა პრემიერმა.

ირაკლი კობახიძემ აღნიშნა, რომ მიწის სისტემური რეგისტრაცია დასკვნით ფაზაშია და ოქტომბრის მდგომარეობით, საკუთრების უფლება მილიონზე მეტ მიწის ნაკვეთზე დარეგისტრირდა.

„შესაბამისად, მილიონზე მეტი ადამიანი გახდა მიწის რეგისტრირებული მესაკუთრე. რეგისტრირებული მიწის ჯამური ფართობი არის 784 000 ჰა, რაც ძალიან შთამბეჭდავი მონაცემია. ასევე, გასული წლის პირველი ოქტომბრიდან გაფორმდა მემორანდუმი თბილისის მერიასთან, რომლის ფარგლებშიც სისტემური რეგისტრაცია დედაქალაქშიც დაიწყო. რეგისტრირდება არა მხოლოდ დაურეგისტრირებელი მიწის ნაკვეთები, არამედ სწორდება 15-20 წლის წინ არასწორად განხორციელებული რეგისტრაციებიც”,- აღნიშნა ირაკლი კობახიძემ.

პრემიერის თქმით, პროექტის მასშტაბების და შედეგების გათვალისწინებით, მთავრობამ მიიღო გადაწყვეტილება მიწის სისტემური რეგისტრაციის გაგრძელების თაობაზე.

„ჯერ კიდევ არიან მოქალაქეები, რომლებსაც არ დაურეგისტრირებიათ მიწის ნაკვეთები. ასეთია ნახევარ მილიონამდე მიწის ნაკვეთი მთლიანობაში და 2025 წლის ბოლომდე ამ მოქალაქეებსაც ექნებათ საშუალება, სრულიად უფასოდ დაირეგისტრირონ კუთვნილი მიწის ნაკვეთები. რეფორმის დასრულების შედეგად, დაურეგისტრირებელი მიწის ნაკვეთი აღარ იარსებებს ქვეყანაში, შეიქმნება ერთიანი, სრულყოფილი საკადასტრო მონაცემთა ბაზა, საბოლოოდ გაიმიჯნება ერთმანეთისგან კერძო, სახელმწიფო და მუნიციპალურ საკუთრებაში არსებული მიწის ნაკვეთების მდებარეობა და გაირკვევა მესაკუთრის ვინაობა. შესაბამისად, სახელმწიფოს მხრიდან სრულად იქნება უზრუნველყოფილი საკუთრების უფლების დაცვა,“- განაცხადა ირაკლი კობახიძემ.

პრემიერმა მადლობა გადაუხადა იუსტიციის მინისტრ რატი ბრეგაძეს, სამინისტროს თანამშრომლებს, საჯარო რეესტრის ეროვნულ სააგენტოს და ყველა ადამიანს, ვინც ჩართულია რეფორმის წარმატებით განხორციელებაში.

მჯერა, რომ მთელი ოპოზიცია ერთსულოვანი იქნება ბოლო წუთამდე. არ შეიძლება, ლეგიტიმაცია მისცე პარლამენტს, რომელსაც მსოფლიო, ქართველი ხალხი არ აღიარებს, – ამის შესახებ პარტია „ახალის“ ერთ-ერთმა ლიდერმა, ნიკა მელიამ ჟურნალისტებს განუცხადა.

მისი თქმით, ქართველმა ხალხმა გადაწყვიტა, რომ არ სურს ამ პარლამენტის ფუნქციონირება, რადგან „ეს არ არის პარლამენტი, რომელიც ხალხის ნებას ასახავს“.

„მნიშვნელოვანია, რომ ამ ეტაპზე მოპოვებულია მნიშვნელოვანი წარმატება. ეს არის ყველას დამსახურება, რომ საერთაშორისო საზოგადოებამ, წამყვანმა პროგრესულმა დემოკრატიულმა სახელმწიფოებმა გაყალბებული არჩევნები არ აღიარეს. ეს არაღიარების პოლიტიკა საერთაშორისო დონეზე იქნება მყარი და განგრძობადი. ამის პარალელურად, რა თქმა უნდა, ქართული საზოგადოება ქვეყნის შიგნით, ჩვენ პოლიტიკოსები მათთან ერთად, ვიქნებით იმდენად აქტიურები, რამდენადაც მოითხოვს შექმნილი უმძიმესი რეალობა. საქართველოს პარლამენტი არ არის საქართველოს პარლამენტი, ქართველმა ხალხმა გადაწყვიტა, რომ მას არ სურს ამ პარლამენტის ფუნქციონირება და ეს პარლამენტი საქმიანობას, როგორც საქართველოს პარლამენტი, ვერ დაიწყებს. ეს არ არის პარლამენტი, რომელიც ხალხის ნებას ასახავს. ივანიშვილის ნებას, კი ბატონო, გამოხატავს“, – განაცხადა ნიკა მელიამ.

ხალხი, რომელთაც საკუთარ თავზე მეტად ვენდობი, მრავალი წელია, ვიცნობ და იყო გადაწყვეტილების მიღების ცენტრში, ნათლად ამბობს, რომ სააკაშვილი მოატყუეს, მისი პროვოცირება მოახდინეს და აიძულეს, ჯარები სამხრეთ ოსეთში შეეყვანა, – ამის შესახებ უკრაინის პრეზიდენტის აპარატის ყოფილმა მრჩეველმა, ალექსეი არესტოვიჩმა რუს ჟურნალისტთან, იულია ლატინინასთან ინტერვიუში განაცხადა.

ჟურნალისტმა არესტოვიჩს ჰკითხა: „როგორ წამოეგო პუტინი აშშ-ის სატყუარას? როგორ იყო ეს საქართველოსთან დაკავშირებით? სააკაშვილი ხომ მზად იყო პუტინთან მოლაპარაკებისთვის, მას მშვენივრად ესმოდა, რომ საქართველო არ იყო რუსეთის ბუფერული სახელმწიფო, უზარმაზარ პრობლემებს განიცდიდა და მზად იყო ყველასთან მოლაპარაკებისთვის. თუმცა პუტინის რეალური დამოკიდებულება საქართველოს მიმართ, როგორც ჩანს, მას არ ესმოდა. Პუტინი რეალურად ფიქრობდა, რომ ეს უნდა იყოს პროვინცია, რომელიც მას ფეხებს უკოცნის. ვინ უნდა ყოფილიყავი, რომ უკრაინას პროვინციასავით მოქცეოდი, მიგეყვანა საქმე ომამდე და წამოგებულიყავი ამერიკულ ტყუილს?“

არესტოვიჩის თქმით, „მანიპულირებულმა მონაცემებმა და შეფასებებმა განაპირობა, რომ საქართველომ დაარტყა სამხრეთ ოსეთს“.

„ჩემი შეფასება პუტინსა და მის პოლიტიკაზე არ ემთხვევა თქვენს შეფასებას. რაც შეეხება საქართველოს, მე ვიცნობ ხალხს, ვინც პირდაპირ იყო გადაწყვეტილების მიღების ცენტრში 2008 წლის ომამდე. ეს ყველაფერი სააკაშვილთან დაკავშირებით ძალიან ჰგავს იმ სქემას, რაც გამოყენებული იყო უკრაინასთან მიმართებით. ხალხი, რომელთაც საკუთარ თავზე მეტად ვენდობი, მრავალი წელია, ვიცნობ და იყო გადაწყვეტილების მიღების ცენტრში, ნათლად ამბობს, რომ სააკაშვილი მოატყუეს, მისი პროვოცირება მოახდინეს და აიძულეს, ჯარები სამხრეთ ოსეთში შეეყვანა. შეკითხვაზე, ვინ მოატყუა, ზოგიერთი ამბობს, რომ ეს რუსეთმა გააკეთა. ამ ხალხს კი სხვა მოსაზრება აქვს, რომ არა იმდენად რუსეთიდან, არამედ უკრაინულის მსგავსი ტექნოლოგიის გამოყენებით. მანიპულირებულმა მონაცემებმა, შეფასებებმა განაპირობა, რომ საქართველომ დაარტყა სამხრეთ ოსეთს. ამ პროვოკაციაში არამხოლოდ რუსეთის პასუხისმგებლობაა. იყო თუ არა რუსული ჯარები მზად გვირაბთან ომის დასაწყებად, ეს სერიოზული შეკითხვაა. იქ ტყუილის ელემენტები იყო, ისევე, როგორც ახლა არის კორეელების თაობაზე ორივე მხრიდან, სააკაშვილმა კი თავს უფლება მისცა, ამაზე წამოგებულიყო, ამაში თითქმის დარწმუნებული ვარ. ვისთვის, როგორ და რა პროპორციით გამოვიდა, ამაზე დავა დიდხანს შეიძლება, თუმცა ეს იყო კლასიკური პროვოკაცია, ვერძის საბრძოლველად გაყვანა“, – განაცხადა არესტოვიჩმა.