Home Blog Page 17

,,ვიქტორ ორბანთან საუბრისას კიდევ ერთხელ დავადასტურეთ მზადყოფნა, განვამტკიცოთ პარტნიორობა, რომელიც მიზნად ისახავს ჩვენი პოლიტიკური და ეკონომიკური კავშირების გაძლიერებას”- ირაკლი კობახიძე

უნგრეთის პრემიერ-მინისტრ ვიქტორ ორბანთან საუბრისას  განსაკუთრებული ყურადღება გავამახვილეთ ორმხრივი თანამშრომლობის გაღრმავების მნიშვნელობაზე,- ამის შესახებ საქართველოს პრემიერ-მინისტრი ირაკლი კობახიძე სოციალურ ქსელ X-ში წერს.

მთავრობის მეთაური აღნიშნავს, რომ შეხვედრა უნგრეთის პრემიერ-მინისტრთან ანტალიის დიპლომატიის ფორუმის ფარგლებში გაიმართა.

“საუბრისას  განსაკუთრებული ყურადღება გავამახვილეთ ორმხრივი თანამშრომლობის გაღრმავების მნიშვნელობაზე და კიდევ ერთხელ დავადასტურეთ მზადყოფნა, განვამტკიცოთ პარტნიორობა, რომელიც მიზნად ისახავს ჩვენი პოლიტიკური და ეკონომიკური კავშირების გაძლიერებას”,- აღნიშნავს ირაკლი კობახიძე.

„მე მაქვს კარგი გული, კარგი სული”- ტრამპის სამედიცინო შემოწმების და კოგნიტიური ტესტის შედეგები ცნობილია

აშშ-ის პრეზიდენტი დონალდ ტრამპი აცხადებს, რომ გეგმური სამედიცინო შემოწმების ფარგლებში კოგნიტური ტესტი წარმატებით ჩააბარა.

78 წლის პრეზიდენტის თქმით, მისი წინამორბედისგან, ჯო ბაიდენისგან განსხვავებით, რომელიც უარს ამბობდა ასეთ შემოწმებაზე, გადაწყვიტა, ტესტი ჩაებარებენა.

„არ ვიცი კიდევ რა გითხრათ, გარდა იმისა, რომ ყველა კითხვას სწორად გავეცი პასუხი“, – განუცხადა ტრამპმა ჟურნალისტებს.

აშშ-ის პრეზიდენტს არ დაუკონკრეტებია, რა ტიპის ტესტი გაიარა და არც კონკრეტული შედეგები დაუსახელებია.

როგორც მან აღნიშნა, წარსულშიც არაერთხელ გაიარა კოგნიტური ტესტი და არასდროს დაუშვია შეცდომები.

ტრამპის მტკიცებით, მისი საერთო მდგომარეობაც დადებითია.

„საერთო ჯამში, მე ვიგრძენი, რომ ძალიან კარგ ფორმაში ვარ. კარგი გული, კეთილი სული. ძალიან კეთილი სული“, – აღნიშნა ტრამპმა.

აშშ-ის პრეზიდენტმა პირობა დადო, რომ სამედიცინო შემოწმების შედგები 13 აპრილს გამოქვეყნდება.

ცნობისთვის, კანონი არ ავალდებულებს აშშ-ის პრეზიდენტს საკუთარი ჯანმრთელობის შესახებ ინფორმაციის გასაჯაროებას, თუმცა აშშ-ის პოლიტიკაში ეს გარაკვეულწილად ტრადიციად იქცა.

პრეზიდენტის ჯანმრთელობის მდგომარეობის მიმართ განსაკუთრებული ინტერესი არსებობდა ჯო ბაიდენის პრეზიდენტობის დროს, რადგანაც მისი ვადის მიწურულს გაჩნდა ეჭვები, რომ მას გონებრივ შესაძლებლობებთან დაკავშირებით პრობლემები აქვს. შედეგად ბაიდენს 2024 წლის საპრეზიდენტო არჩევნებში მონაწილეობაზე უარი თქმა მოუწია.

,,ევროპელებმა და შტატებმა თავი უნდა დაანებონ ქართულ პოლიტიკას, ვფიქრობ, გავლენები და ჩარევები არანაირი სარგებლის მომტანი არ არის”- ჯეფრი საქსი

ევროპელებმა და შტატებმა თავი უნდა დაანებონ ქართულ პოლიტიკას, ვფიქრობ, გავლენები და ჩარევები არანაირი სარგებლის მომტანი არ არის, – ამის შესახებ ამერიკელმა პროფესორმა, კოლუმბიის უნივერსიტეტის მდგრადი განვითარების ცენტრის დირექტორმა, ჯეფრი საქსმა ანტალიაში ქართველ ჟურნალისტებს განუცხადა.

როგორც საქსმა აღნიშნა, სამხრეთ კავკასიის ქვეყნებმა ერთად უნდა იმუშაონ, რადგან, მისი შეფასებით, ეს რთული რეგიონია.

„იმედი მაქვს, ეს ხალხი საქართველოს საშუალებას მისცემს, ჰქონდეს საკუთარი პოლიტიკა, შიდა საქმეები იმ შფოთვის გარეშე, რომელიც ბრიუსელიდან, თუ სხვა მხრიდან მოდის. მეორე – მჯერა, სამხრეთ კავკასიის ქვეყნებმა, საქართველომ, აზერბაიჯანმა და სომხეთმა ერთად უნდა იმუშაონ, როგორც აღმოსავლეთ-დასავლეთისა და ჩრდილოეთ-სამხრეთის კორიდორების ეკონომიკურ სტრატეგიაზე, ისე უსაფრთხოებაზეც, ვინაიდან ეს ცოტათი რთული რეგიონია. მჯერა, ერთობლივი ძალისხმევით სამხრეთ კავკასიას შეუძლია, ეფექტურად იმუშაოს.

ამერიკელი პროფესორის თქმით, რეგიონისთვის დესტაბილიზაციის ფაქტორად იქცა აშშ-ის მიერ საქართველოში ნატო-ს იდეის განვითარება.

„მთელი ეს გარედან მომავალი შფოთვა და მღელვარება ნამდვილად არ იყო კარგი. ისტორიულ ჭრილში, გულწრფელად რომ გითხრათ, როდესაც აშშ-მა საქართველოში ნატო-ს იდეის განვითარება დაიწყო, სამწუხაროდ, ეს ნამდვილად იქცა მთელი რეგიონისთვის დესტაბილიზაციის ფაქტორად. ეს ჩემი პირადი მოსაზრებაა. ნატო შორს უნდა დარჩენილიყო, უკრაინიდანაც და ახლა მთელი მსოფლიო გაცილებით უსაფრთხო იქნებოდა, რადგან არ შეიქმნებოდა რუსეთთან ჯერ ეს უკიდურესი დაძაბულობა და ახლა ომი, რამაც დესტაბილიზაცია მოიტანა ყველასთვის“, – აღნიშნა საქსმა.

,,ეს იყო უცხოური აგენტურა, ხშირ შემთხვევაში, აქ იყვნენ წარმოდგენილები ჩვეულებრივი სადისტები”- ირაკლი კობახიძე

საგამოძიებო კომისიის მუშაობის პროცესი ჩვენ კიდევ ერთხელ გვახსენებს იმას, თუ რა ხალხი მართავდა ჩვენს ქვეყანას 2003 წლის ბოლოდან 2012 წლის ჩათვლით. ეს იყო უცხოური აგენტურა, ხშირ შემთხვევაში, აქ იყვნენ წარმოდგენილები ჩვეულებრივი სადისტები, – ამის შესახებ საქართველოს პრემიერ-მინისტრმა ირაკლი კობახიძემ ჟურნალისტებს ანტალიაში განუცხადა.

მისივე თქმით, ესენი იყვნენ არა მხოლოდ უპრინციპო ადამიანები, არამედ სადისტურად ეპყრობოდნენ სხვებს და სწორედ ამ საერთო სულისკვეთებით გამოირჩეოდა მაშინდელი ხელისუფლება.

“მინდა, შევახსენო საზოგადოებას, რომ ე.წ. “დიფ სთეითი” ევროპული ბიუროკრატიის ხელით, მანამდე ამერიკული ბიუროკრატიის ხელით ცდილობდა, მთელი ამ დროის განმავლობაში, საქართველოში ხელისუფლებაში დაებრუნებინა ეს ადამიანები, ადამიანები, რომლებიც გამოირჩეოდნენ სადიზმით, ადამიანების მკვლელობით, წამებით, რომლებმაც ჩააბარეს ქვეყნის ტერიტორიების 20 % და ა.შ. ასეთი ადამიანების ხელისუფლებაში დაბრუნებას ცდილობს “დიფ სთეითი”, მანამდე ცდილობდა ამერიკული სტრუქტურების ხელით. საზოგადოებამ კიდევ ერთხელ უნდა გაიხსენოს ყველაფერი, რაც დაკავშირებულია წინა ხელისუფლების მიერ ჩადენილ დანაშაულებთან და რაც მთავარია, უნდა დადგეს შედეგი. ეს შედეგი უნდა იყოს იმ ძალების ჩამოშორება ქართული პოლიტიკიდან, რომლებმაც არა მხოლოდ წარსულში ჩაიდინეს დანაშაულები, არამედ მომავლისთვისაც უქადდნენ ასეთი დანაშაულების ჩადენას ჩვენს ქვეყანას. იმისათვის, რომ გაჯანსაღდეს ჩვენი დემოკრატიული სისტემა, არ შეიძლება, რომ ასეთი პოლიტიკური ძალები დარჩეს პოლიტიკურ სპექტრში”, – განაცხადა პრემიერმა.

ზაზა ოქუაშვილი დიდი ბრიტანეთის სასამართლოში ბიძინა ივანიშვილთან სამართლებრივ დავაში დამარცხდა

2025 წლის 7 აპრილს, ინგლისისა და უელსის უზენაესმა სასამართლომ საბოლოო წერტილი დაუსვა სკანდალურ საქმეს, რომელიც უკავშირდებოდა ზაზა ოქუაშვილის მიერ 2018 წლის 30 სექტემბერს ტელეკომპანია „რუსთავი 2“-ის ეთერში გაჟღერებულ ბრალდებებს. „ომეგა ჯგუფის“ დამფუძნებელი ბიძინა ივანიშვილს 4 მილიონი დოლარის გამოძალვაში სდებდა ბრალს.

საქმე განიხილებოდა სახელწოდებით: „Okuashvili & Ors v Ivanishvili & Ors, BL-2023-000“ და მასში მოცული იყო ბრალდებების ფართო სპექტრი, მათ შორის – ქართული პატენტის გარშემო წარმოშობილი დავა, სავარაუდო კორპორატიული იძულება და პოლიტიკური ჩარევა. მოსარჩელეთა მოთხოვნები დაყრდნობილი იყო კონტრაქტის დარღვევის, დელიქტური(ზიანის ანაზღაურების) პასუხისმგებლობისა და არამართლზომიერი გამდიდრების სამართლებრივ საფუძვლებზე.

დავაში მოპასუხეებად ფიგურირებდნენ თავად ბიძინა ივანიშვილი, კომპანია „თბილისის თამბაქო“ და ბიზნესმენი ვანო ჩხარტიშვილი.

სასამართლომ არ გაიზიარა მოსარჩელეთა არგუმენტები და მათი მოთხოვნები არასაკმარის მტკიცებულებებზე დაყრდნობილად და ფალსიფიცირებულად მიიჩნია. გარდა ამისა, მოსამართლემ დაადგინა სერიოზული პროცედურული ხარვეზები, რაც სარჩელის წარდგენის სწორ ფორმასა და სასამართლოს იურისდიქციის განსახორციელებლად საჭირო სამართლებრივ სტანდარტებს შეეხებოდა.

სასამართლომ განსაკუთრებული ყურადღება გაამახვილა იმაზე, რომ მოსარჩელეთა მიერ წარდგენილ მთავარ პრეტენზიებს – მუქარას, უკანონო შეთქმულებასა და არაკეთილსინდისიერ ხელშეწყობას – არ გააჩნდა სერიოზული სამართლებრივი საფუძველი და ხშირ შემთხვევაში იყო გამონაგონი. სასამართლომ ამ ბრალდებებს ვადაგასული და არსობრივად მცდარი უწოდა.

სასამართლომ ასევე სრულად უარყო მოსარჩელეთა მოთხოვნა ფიდუციური (ნდობით აღჭურვილი) ვალდებულებების დარღვევისა და ამ დარღვევაში ხელშეწყობის შესახებ. სასამართლოს დასკვნით, სარჩელით მოცულ მხარეებს შორის არ არსებობდა ფიდუციური ურთიერთობა.

მოსარჩელეთა მცდელობა, დაეყრდნონ ქართულ პატენტს, რომელიც საქართველოში უკვე გაუქმებულია, სასამართლომ არასწორად მიიჩნია. აღნიშნულთან დაკავშირებით მიღებულ იქნა ის არგუმენტი, რომ საქართველოს სასამართლოებმა კანონიერ ძალაში შესული გადაწყვეტილებებით დაადგინეს აღნიშნული პატენტის არაკანონიერება, რის გამოც გამორიცხული გახდა პატენტთან დაკავშირებული ნებისმიერი სამართლებრივი მოთხოვნის წარდგენა.

რაც შეეხება არამართლზომიერი გამდიდრების ცალკეულ პრეტენზიას, რომელიც უკავშირდებოდა გაუქმებული პატენტით მიღებულ სავარაუდო სარგებელს, მოსარჩელეებმა ვერ დაასაბუთეს სამართლებრივი საფუძველი, რის გამოც სასამართლომ საქმეზე ინგლისსა და უელსში იურისდიქციის განხორციელება დაუშვებლად მიიჩნია.

ინგლისისა და უელსის უზენაესი სასამართლოს 2025 წლის 7 აპრილის გადაწყვეტილება საბოლოოა და გასაჩივრებას არ ექვემდებარება.

ეუთო-ს წევრი 37 ქვეყანა საქართველოსთან დაკავშირებით განცხადებას ავრცელებს

ეუთო-ს წევრი 37 სახელმწიფო საქართველოსთან დაკავშირებით განცხადებას ავრცელებს.

როგორც განცხადებაშია ნათქვამი, კვლავ გამოხატავენ ღრმა შეშფოთებას საქართველოში ადამიანის უფლებათა მდგომარეობის გაუარესების გამო და მათი მთავარი შეშფოთება სამი მიმართულებით ვლინდება.

„თებერვალში ჩვენი ბოლო დისკუსიის შემდეგ, სამწუხაროდ, ვხედავთ, რომ საქართველოს ხელისუფლება კიდევ უფრო შორდება დემოკრატიულ და ადამიანის უფლებათა ვალდებულებებს. ჩვენი მთავარი შეშფოთება სამი მიმართულებით ვლინდება: სამოქალაქო სივრცის საკანონმდებლო შეზღუდვა; დამოუკიდებელი მედიის წინააღმდეგ მიმართული ქმედებები, პოლიციის მხრიდან ძალის გადამეტება, უცნობი ჯგუფების მიერ მშვიდობიანი დემონსტრანტების წინააღმდეგ განხორციელებული ძალადობა; აგრეთვე გაუმართლებლად ხანგრძლივ წინასწარი პატიმრობის პერიოდები და წინასწარ პატიმრობაში მყოფ პირთა მიმართ სავარაუდო არასათანადო მოპყრობა.

„უცხოელი აგენტების“ რეგისტრაციის აქტი მოითხოვს, რომ ყველა პირი და ორგანიზაცია, რომელიც უცხოურ დაფინანსებას იღებს, დარეგისტრირდეს როგორც ე.წ. უცხოელი აგენტი. ეს მოიცავს ფინანსურ სანქციებსა და სისხლის სამართლის პასუხისმგებლობას მათთვის, ვინც რეგისტრაციაზე უარს აცხადებს. ჩვენ ვიზიარებთ ოდირის შეშფოთებას, რომ „ამ კანონმა, სხვა ბოლოდროინდელ საკანონმდებლო ინიციატივებთან ერთად, შეიძლება, კიდევ უფრო შეზღუდოს სამოქალაქო საზოგადოების ორგანიზაციებისა და ადამიანის უფლებათა დამცველების საქმიანობა მათი საქმიანობის განხორციელებისთვის საჭირო გარანტიების მოხსნით“. ამ კანონს არ გააჩნია სამართლებრივი გარანტიები, რაც ხელს შეუშლიდა სამოქალაქო საზოგადოების, მედიისა და კერძო პირების უცხოური გავლენის ინსტრუმენტებად მონათვლას მხოლოდ დაფინანსების წყაროების საფუძველზე, რაც მკაფიოდ მიუთითებს, რომ ეს კანონი არ ეხება გამჭვირვალობას, არამედ მიმართულია განსხვავებული აზრის ჩახშობასა და სამოქალაქო საზოგადოებაზე ზეწოლისკენ. ეს განსაკუთრებით საგანგაშოა მოახლოებული ადგილობრივი არჩევნების გათვალისწინებით“, – აღნიშნულია განცხადებაში.

როგორც განცხადებაშია აღნიშნული, ყურადღებით აკვირდებიან საქართველოს საარჩევნო კანონმდებლობაში შეტანილ ბოლოდროინდელ ცვლილებებს.

„აუცილებელია, რომ საარჩევნო ჩარჩოს ნებისმიერი ცვლილება აძლიერებდეს გამჭვირვალობასა და საზოგადოების ნდობას, რეფორმები შემუშავდეს ინკლუზიური დიალოგის გზით და ეუთო-ს ვალდებულებების შესაბამისად. ამასთან დაკავშირებით, ჩვენ შეშფოთებას გამოვთქვამთ კანონმდებლობაში შეტანილი ცვლილებების გამო, რაც ზღუდავს მშვიდობიანი შეკრების თავისუფლებას, მათ შორის სისხლის სამართლისა და ადმინისტრაციულ სამართალდარღვევათა კოდექსებში, შეკრებებისა და მანიფესტაციების შესახებ კანონში შეტანილი ცვლილებები. ეს ცვლილებები ძირს უთხრის ხმის მიცემის თანასწორობის პრინციპს და ზღუდავს შეკრების თავისუფლებას, როგორც ეს აღნიშნულია ოდირისა და ვენეციის კომისიის ბოლო დასკვნებში. ჩვენ მოვუწოდებთ საქართველოს ხელისუფლებას,  განახორციელოს ამ ორგანიზაციების მიერ გაცემული რეკომენდაციები.

შეშფოთებულნი ვართ საქართველოში ჟურნალისტების წინააღმდეგ მზარდი მუქარისა და დაშინების გამო. სახალხო დამცველის 2024 წლის ადამიანის უფლებათა ანგარიში ხაზს უსვამს მედიის თავისუფლების მნიშვნელოვან შემცირებას, რასაც ამწვავებს შემზღუდველი კანონები, როგორიცაა მაუწყებლობის შესახებ კანონში შეტანილი ცვლილებები და ჟურნალისტების მიმართ მზარდი მტრული დამოკიდებულება. განსაკუთრებით აღსანიშნავია შემთხვევები, როდესაც პოლიცია მიზანმიმართულად ესხმოდა თავს ჟურნალისტებს პროტესტის გაშუქებისას, მათ შორის ფიზიკური თავდასხმებისა და აღჭურვილობის ჩამორთმევის შემთხვებები. გარდა ამისა, ცნობები დევნილობაში მყოფი ჟურნალისტების დევნისა და მაღალი რანგის მოხელეების, პოლიტიკოსების მხრიდან ნეგატიური რიტორიკის შესახებ, კიდევ უფრო ძირს უთხრის მედიის თავისუფლებას და ზრდის საფრთხეებს ჟურნალისტებისთვის. ჩვენ მოვუწოდებთ ამ პრაქტიკის დაუყოვნებლივ შეწყვეტისკენ და თვითნებურად დაკავებული ყველა ჟურნალისტის დაუყოვნებლივ გათავისუფლებისკენ, მათ შორის მზია ამაღლობელის, რომელიც კვლავ პატიმრობაში რჩება და შვიდ წლამდე პატიმრობა ემუქრება. დაბოლოს, ჩვენ კვლავ ღრმად შეშფოთებულნი ვართ პოლიციის ძალადობაზე პასუხისმგებლობის მუდმივი დანაკლისით. ჩვენ არ გვინახავს რაიმე მტკიცებულება, რომ საქართველოს ხელისუფლება სანდოდ იძიებს მშვიდობიანი დემონსტრანტების წინააღმდეგ არაპროპორციული ძალის გამოყენების, თვითნებური დაკავებების, გაუმართლებლად ხანგრძლივი წინასწარი პატიმრობისა და დაკავებულთა მიმართ არასათანადო მოპყრობის შემთხვევებს“, – ნათქვამია განცხადებაში.

განცხადების მიხედვით, ეუთო-ს წევრი 37 ქვეყანა მოუწოდებს საქართველოს ხელისუფლებას, დაიწყოს ინკლუზიური დიალოგი ყველა პოლიტიკურ პარტიასთან და სამოქალაქო საზოგადოების ორგანიზაციებთან.

„ჩვენ მოვუწოდებთ საქართველოს ხელისუფლებას, დაუყოვნებლივ მიიღოს ზომები იმ პირთა უფლებების დასაცავად, რომლებიც  იყენებენ თავიანთ ფუნდამენტურ თავისუფლებებს და ჩაატაროს საფუძვლიანი გამოძიება 2024 წლის 28 ნოემბრიდან მშვიდობიანი პროტესტის დროს პოლიციის ძალის გამოყენების შესახებ, რათა პასუხისმგებლობა დაეკისროთ ადამიანის უფლებათა დარღვევებში დამნაშავეებს. ამის გარეშე საზოგადოების ნდობა საქართველოს ინსტიტუტების მიმართ კიდევ უფრო ზიანდება.

მიუხედავად საქართველოს მხრიდან არაერთი განცხადებისა, რომელიც ადასტურებს მათ მზადყოფნას დიალოგისთვის და ეუთო-ს პრინციპებისა და ვალდებულებებისადმი ერთგულებას, ჩვენ ჯერ კიდევ არ გვინახავს კონკრეტული და გულწრფელი ნაბიჯები მნიშვნელოვანი ჩართულობისკენ. პირიქით, საქართველოს ხელისუფლების ბოლოდროინდელი ქმედებები საქართველოს კიდევ უფრო აშორებს დემოკრატიას. ჩვენ მოვუწოდებთ საქართველოს ხელისუფლებას, დაიწყოს ინკლუზიური დიალოგი ყველა პოლიტიკურ პარტიასთან და სამოქალაქო საზოგადოების ორგანიზაციებთან, რათა მოიძებნოს მიმდინარე კრიზისის მშვიდობიანი და დემოკრატიული გადაწყვეტა.

ჩვენ მივესალმებით ოდირისა და ეუთო-ს მედიის თავისუფლების საკითხებისი წარმომადგენლის ბოლოდროინდელ განცხადებებს და მტკიცედ მოვუწოდებთ საქართველოს, განაგრძოს კონსტრუქციული თანამშრომლობა ეუთო-ს ინსტიტუტებთან და გამოიყენოს მათი ექსპერტიზა. როგორც ეუთო-ს წევრი სახელმწიფოები, სამომავლოდ ამ მიმართულებით ჩვენ მოვიძიებთ ყველა ხელმისაწვდომ ინსტრუმენტსა და მექანიზმს, ეუთო-ს კონტექსტში. ჩვენ მოვუწოდებთ საქართველოს ხელისუფლებას, განახორციელოს ოდირის რეკომენდაციები მოახლოებულ არჩევნებთან დაკავშირებით.

ჩვენი ურყევი ვალდებულება საქართველოს სუვერენიტეტისა და ტერიტორიული მთლიანობის მიმართ უცვლელი რჩება. ჩვენ მტკიცედ ვუჭერთ მხარს ქართველ ხალხს და მათ სწრაფვას დემოკრატიული, სტაბილური და ევროპული მომავლისკენ და მზად ვართ, ვითანამშრომლოთ საქართველოსთან, რათა უზრუნველვყოთ, რომ იგი ასრულებს საკუთარ საერთაშორისო ვალდებულებებს და უზრუნველყოფს ადამიანის უფლებებისა და ფუნდამენტური თავისუფლებების სრულ პატივისცემას“, – ნათქვამია განცხადებაში.

აღნიშნული განცხადება გავრცელდა შემდეგი ქვეყნების სახელით: ალბანეთი, ავსტრია, ბელგია, ბოსნია და ჰერცეგოვინა, ბულგარეთი, კანადა, ხორვატია, კვიპროსი, ჩეხეთი, დანია, ესტონეთი, ფინეთი, საფრანგეთი, საბერძნეთი, ისლანდია, ირლანდია, იტალია, ლატვია, ლიხტენშტეინი, ლიტვა, ლუქსემბურგი, მალტა, მონტენეგრო, ნიდერლანდები, ჩრდილოეთ მაკედონია, ნორვეგია, პოლონეთი, პორტუგალია, მოლდოვა, რუმინეთი, სლოვენია, ესპანეთი, შვედეთი, შვეიცარია, გაერთიანებული სამეფო, უკრაინა და გერმანია.

როგორი ამინდი იქნება უქმეებზე?

12-14 აპრილს საქართველოში შენარჩუნებული იქნება გრილი და დროგამოშვებით ნალექიანი ამინდი.

თბილისში შესაძლოა ხანმოკლე წვიმა ელჭექით აღინიშნოს. ჰაერის ტემპერატურა დღისით +12, +14 გრადუსი დაფიქსირდება.

სანაპირო რაიონებში (ბათუმი, ქობულეთი, ანაკლია, ფოთი): 12 აპრილს გრილი და წვიმიანი ამინდი იქნება. ჰაერის ტემპერატურა +9, +11 გრადუსი დაფიქსირდება. 13-14 აპრილს შედარებით გამოიდარებს და +14,+16 გრადუსამდე დათბება.

დასავლეთ საქართველოს დაბლობ რაიონებში (ზესტაფონი, ქუთაისი, სამტრედია, ზუგდიდი, მარტვილი, ოზურგეთი) 12 აპრილს გრილი და წვიმიანი ამინდი იქნება. ჰაერის ტემპერატურა +8, +10 გრადუსი დაფიქსირდება. 13-14 აპრილს შედარებით გამოიდარებს და +16,+18 გრადუსამდე დათბება.

დასავლეთ საქართველოს მთიან რაიონებში (ამბროლაური, ონი, ცაგერი, შოვი, ჭიათურა, საჩხერე, ხულო, რიკოთის უღელტეხილი): ზოგან ხანმოკლე წვიმა და ელჭექია მოსალოდნელი. ჰაერის ტემპერატურა 12 აპრილს დღისით +7, +9 გრადუსი დაფიქსირდება, ხოლო 13-14 აპრილს +14, +16 გრადუსამდე მოიმატებს.

დასავლეთ საქართველოს მაღალმთიან რაიონებში (მესტია, ბახმარო): 12 აპრილს ზოგან მოთოვს. ჰაერის ტემპერატურა დღისით +0, +5 გრადუსი დაფიქსირდება. 13-14 აპრილს გამოიდარებს და ტემპერატურა +7, +12 გრადუსამდე მოიმატებს.

ქართლში (რუსთავი, ბოლნისი, მარნეული, გარდაბანი, გორი, ცხინვალი): ზოგან ხანმოკლე წვიმა და ელჭექია მოსალოდნელი. ჰაერის ტემპერატურა დღისით +10, +15 გრადუსი დაფიქსირდება.

კახეთში (საგარეჯო, თელავი, გურჯაანი, სიღნაღი, ლაგოდეხი, ყვარელი, ახმეტა, დედოფლისწყარო): ზოგან ხანმოკლე წვიმა და ელჭექია მოსალოდნელი. ჰაერის ტემპერატურა დღისით +9, +14 გრადუსი დაფიქსირდება.

აღმოსავლეთ საქართველოს მთიან რაიონებში (ახალციხე, ბორჯომი, დუშეთი, თიანეთი, ფასანაური): ზოგან ხანმოკლე წვიმა და ელჭექია მოსალოდნელი. ჰაერის ტემპერატურა დღისით +7, +12 გრადუსი დაფიქსირდება.

აღმოსავლეთ საქართველოს მაღალმთიან რაიონებში (ახალქალაქი, წალკა, ბაკურიანი, გუდაური, ომალო): ზოგან მოთოვს. ჰაერის ტემპერატურა დღისით 0, +5 გრადუსი დაფიქსირდება.

“ლაზარეს შაბათი” – მართალი ლაზარეს მკვდრეთით აღდგინება

მართლმადიდებელი ეკლესია დღეს ლაზარეს შაბათს აღნიშნავს.  სადღესასწაულო წირვა-ლოცვა ყველა მოქმედ ტაძარში აღევლინება.

წმინდა სახარების მიხედვით, უფალმა მისი მეგობარი, ოთხი დღის მკვდარი ლაზარე მკვდრეთით აღადგინა. “ლაზარე” ებრაული სახელია და ქართულად “ღვთის წყალობას” ნიშნავს. ლაზარე ბეთანიაში დაიბადა, იერუსალიმის მახლობლად. იგი მართასა და მარიამის ძმა იყო. უფალ იესო ქრისტეს ძლიერ უყვარდა მართალი ლაზარე და მას თავის მეგობარს უწოდებდა.

საეკლესიო წესით, ლაზარეს შაბათი ხსნილია თევზით და ხიზილალით, ხოლო ბზობის დღესასწაულზე ვიხმევთ თევზსაც. ამ დღეს მორწმუნეებს ურიგდებათ ნაკურთხი ბზის ტოტები გასახსენებლად იმისა, თუ როგორ უფენდნენ ოდესღაც იესო ქრისტეს მწვანე რტოებს ებრაელები მისი იერუსალიმში დიდებით შესვლისას, პასექის უკანასკნელ დღესასწაულზე.

ლაზარეს შაბათი გარდამავალია და ბზობის წინა შაბათს აღინიშნება.

ქართველ ხალხს ლაზარეს მკვდრეთით აღდგინება ძველთაგანვე ქართული ენისა და სრულიად საქართველოს აღდგინების სიმბოლოდ მიაჩნია. იოანე ზოსიმეს “ქებაჲ და დიდებაჲ ქართულისა ენისაჲ”-ს მიხედვით, “დამარხულ არს ენაჲ ქართული დღემდე მეორედ მოსვლისა მისისა საწამებლად, რაჲთა ყოველსა ენასა ღმერთმა ამხილოს ამით ენითა. და ესე ენაჲ მძინარე არს დღესამომდე, და სახარებასა შინა ამას ენასა ლაზარე ჰრქჳან!”.

ტროპარი:
ყოველსა აღდგომასა პირველ ვნებისა შენისასა მოასწავებდი, ამისთჳსცა მეგობარი შენი ლაზარე მკუდრეთით აღადგინე, ქრისტე ღმერთო, რომლისათჳს ჩუენცა, ვითარცა შვილნი ებრაელთანი, შევწირავთ შენდა ძლევისა გალობასა, რომელმან დასთრგუნე სიკუდილი: ოსანნა მაღალთა შინა, კურთხეულ არს მომავალი სახელითა უფლისათა.

კონდაკი:
ჭეშმარიტად ყოველთათვის მხიარულებაი არს ქრისტე, ნათელი და ცხოვრებაი სოფლისა, რამეთუ აღდგომაი მკვდართა ცხად-ჰყო სახიერებითა თვისითა და სახე გვექმნა აღდგომისა, და ყოველთა ღმრთაებრ მიმადლებს ცოდვათა მიტევებასა.

კონდაკი:
ყოველთა არსთა ცნობისა უფსკრულო მიუწვდომელო, იკითხევდ დღეს საფლავსა ლაზარესსა, მირახვედ და აღადგინე იგი მკვდრეთით, ოთხ0დღე დამარხული და დაყროლებული, ვითარცა ღმერთმან ყოვლადძლიერმან, და შეიწირე იგი ცრემლნი მართას და მარიამისნი.

მოსალოდნელია ტემპერატურის დაკლება -6 გრადუსამდე – გარემოს ეროვნული სააგენტოს გაფრთხილება

გარემოს ეროვნული სააგენტო მოსახლეობას, ხვალ, საქართველოში მოსალოდნელი ამინდის შესახებ აფრთხილებს.

„13 აპრილს, ღამისა და დილის საათებში, შიდა ქართლში მოსალოდნელია ჰაერის ტემპერატურის დაკლება -2, -4, ხოლო ქვეყნის მთიან რაიონებში -4, -6 გრადუსამდე. უარყოფითმა ტემპერატურამ შესაძლებელია ყვავილობის ფაზაში მყოფი ხეხილის და საშემოდგომო ხორბლის ნათესების დაზიანება გამოიწვიოს (საფრთხის დონე საშუალო)“, – ნათქვამია ინფორმაციაში. 

12 აპრილის ასტროლოგიური პროგნოზი

ვერძი

წარმატება გელით ნებისმიერ სფეროში. ამ დღეს საქმეს თუ დაიწყებთ დიდი ფინანსური სარგებლის მომტანი იქნება. კარგი დღეა ძველი პრობლემების მოსაგვარებლად. სიტუაცია თქვენ სასარგებლოდ იცვლება.

კურო

საინტერესო მოვლენებით დატვირთული დღეა. რთული საქმის დასრულების საშუალება გეძლევათ. დროა იფიქროთ საკუთარ თავსა და ჯანმრთელობაზე.

ტყუპები

საინტერესო იდეების განხორციელების შესაძლებლობა მოგეცემათ. ეცადეთ, ყურადღება მხოლოდ მნიშვნელოვან საკითხებზე გაამახვილოთ. თავი შორს დაიჭირეთ შურიანი ადამიანებისგან.

კირჩხიბი

ექსპერიმენტებისთვის არახელსაყრელი დღეა. ყურადღება ყველაზე მნიშვნელოვან საქმეზე გადაიტანეთ და იმოქმედეთ! ეცადეთ, საყვარელ ადამიანებთან ერთად მეტი დრო გაატაროთ და მათი არც ერთი თხოვნა უყურადღებოდ არ დატოვოთ.

ლომი

არ აჩქარდეთ. განსაკუთრებული ყურადღება მიაქციეთ ფინანსებთან დაკავშირებულ საქმეებს. პირად ცხოვრებასა და ურთიერთობებში სრული იდილია და ჰარმონიაა.

ქალწული

ეს დღე, ცვლილებების დასაწყისად შეიძლება ჩაითვალოს. იზრუნეთ საკუთარ და ოჯახის წევრთა ჯანმრთელობაზე – დროა, პროფილაქტიკური მკურნალობის დაწყება დაგეგმოთ.

სასწორი

დღეს ემოციურად გადაიღლებით. სტრესისგან საყიდლებზე სიარული გაგათავისუფლებთ. საყვარელ ადამიანებთან ურთიერთობისა და სპორტული ვარჯიშებისთვის მეტი დრო გამონახეთ.

მორიელი

თქვენთვის მნიშვნელოვანი პროექტი წარმატებით დასრულდება და საშუალება გექნებათ, საკუთარი შრომის შედეგი შეაფასოთ. 

მშვილდოსანი

დღეს თამამი ნაბიჯები უნდა გადადგათ. მნიშვნელოვანი გადაწყვეტილებები თქვენს ცხოვრებას მთლიანად შეცვლის. დროა სამსახური შეიცვალოთ, მოსაწყენი ურთიერთობა დაასრულოთ და საინტერესო მოგზაურობაში გაემგზავროთ.

თხის რქა

დღეს იღბალი თქვენ მხარესაა. კარგი დღეა, გაჭიანურებული საქმეების დასასრულებლად. პირად ცხოვრებაში სასიამოვნო სიახლე გელით.

მერწყული

სერიოზული საკითხების გადაწყვეტილების წინ, სასურველია, რჩევა ჰკითხოთ კომპეტენტურ და გამოცდილ ადამიანს, არის ალბათობა, არასაკმარისი ინფორმაციის გამო, გამოუსწორებელი შეცდომა დაუშვათ, იყავით ფრთხილად.

თევზები

მოულოდნელი შემოსავლების, რომანტიკული შეხვედრის დღეა. შეგიძლიათ, გაბედულად დაგეგმოთ დიდი პროექტები და საპასუხისმგებლო მოლაპარაკებები.

იყო მცდელობა, რომ საქართველოც გამოყენებულიყო როგორც ტერიტორია, შეიარაღებული ურთიერთობის გარკვევისათვის დასავლეთსა და რუსეთს შორის – დიმიტრი ხუნდაძე პროქსი ომზე

ასეთი დაპირისპირებისთვის იყო მცდელობა, რომ საქართველოც გამოყენებულიყო როგორც ტერიტორია, შეიარაღებული ურთიერთობის გარკვევისათვის დასავლეთსა და რუსეთს შორის, – განუცხადა ჟურნალისტებს საპარლამენტო პოლიტიკური ჯგუფის „ხალხის ძალის“ ხელმძღვანელმა დიმიტრი ხუნდაძემ ამერიკელი ჟურნალისტის ტაკერ კარსონის მოსაზრებასთან დაკავშირებით, რომ ბაიდენის ადმინისტრაციამ უკრაინის მეშვეობით რუსეთთან პროქსი ომი აწარმოვა და რომ ეს ბირთვული ომის საფრთხეს ზრდიდა.

დიმიტრი ხუნდაძის თქმით, ხელისუფლებამ გამოიყენა ყველა რესურსი იმისა, რომ საქართველო არ ქცეულიყო პოლიგონად.

„ასეთი დაპირისპირებისთვის იყო მცდელობა, რომ საქართველოც გამოყენებულიყო როგორც ტერიტორია, შეიარაღებული ურთიერთობის გარკვევისათვის დასავლეთსა და რუსეთს შორის.

ჩვენ გამოვიყენეთ ყველა რესურსი იმისა, რომ საქართველო არ ქცეულიყო პოლიგონად, მაგრამ, უკრაინამ ეს ვერ გამოიყენა“, – აღნიშნა დიმიტრი ხუნდაძემ.

„საზოგადოებრივი მაუწყებელი” ვასილ ივანოვ-ჩიქოვანისა და ნინო ზაუტაშვილის გათავისუფლებასთან დაკავშირებით განცხადებას ავრცელებს

მიღებული გადაწყვეტილება არის სამართლიანი, მიუკერძოებელი და სამართლებრივად დასაბუთებული. საზოგადოებრივი მაუწყებელი მიჰყვება შესაბამისი კანონმდებლობით განსაზღვრულ პროცესს, – ამის შესახებ განცხადებას „საზოგადოებრივი მაუწყებელი” ავრცელებს, რითაც ტელეწამყვანების ვასილ ივანოვ-ჩიქოვანისა და ნინო ზაუტაშვილის გათავისუფლებას ეხმაურება.

განცხადების თანახმად, საჯარო სივრცეში გავრცელებული განცხადებებით, ზემოაღნიშნულ თანამშრომელთა ნაწილმა სრულად ამოწურა დამსაქმებელთან საქმიანი და კონსტრუქციული ურთიერთობის რესურსი, რაც შეუძლებელს ხდის ნორმალურ თანამშრომლობას.

„რამდენიმე თვის განმავლობაში ამ პროცესში ჩართულ თანამშრომელთა მცირე ნაწილის მხრიდან გამოვლინდა მათსა და საზოგადოებრივ მაუწყებელს შორის გაფორმებული ხელშეკრულებების პირობების, მაუწყებლის თანამშრომელთა ორგანიზაციული სახელმძღვანელოს (შრომის შინაგანაწესის), ასევე შიდა ლოკალური აქტების მოთხოვნების დარღვევის ფაქტები.

აღსანიშნავია, რომ საზოგადოებრივი მაუწყებლის საინფორმაციო სამსახურის, ანალიტიკური პროგრამების, თუ სოციალური თემატიკის გადაცემების წამყვანებსა და ჟურნალისტებს განსაკუთრებული პასუხისმგებლობა და სტანდარტების დაცვის ვალდებულება ეკისრებათ როგორც აუდიტორიის, ასევე ორგანიზაციის წინაშე. ჟურნალისტის პროფესია თავის თავში აერთიანებს ჟურნალისტის არა მარტო უფლებებსა და თავისუფლებას, არამედ ასევე ითვალისწინებს მათ ვალდებულებებსა და პასუხისმგებლობას. აღნიშნული სტანდარტის დაცვა განსაკუთრებით მნიშვნელოვანია ისეთი მედიასაშუალებისათვის, როგორიცაა საზოგადოებრივი მაუწყებელი და მისი გადაცემების/პროგრამების წამყვანი არც ერთ შემთხვევაში არ უნდა იქცეს ისეთი საზოგადოებრივი თუ პოლიტიკური მოვლენების მხარედ, რაც გამორიცხავს, ან თუნდაც ეჭვის ქვეშ დააყენებს მაუწყებლის ან/და მისი, როგორც წამყვანის მიუკერძოებლობასა და ობიექტურობას.

გასათვალისწინებელია ის, რომ საჯარო სივრცეში გავრცელებული განცხადებებით, ზემოაღნიშნულ თანამშრომელთა ნაწილმა სრულად ამოწურა დამსაქმებელთან საქმიანი და კონსტრუქციული ურთიერთობის რესურსი, რაც შეუძლებელს ხდის ნორმალურ თანამშრომლობას.

საზოგადოებრივ მაუწყებელთან გაფორმებული შრომითი ხელშეკრულებების და ორგანიზაციის შრომის შინაგანაწესის შესაძლო დარღვევის გამოვლენის მიზნით, დისციპლინური წარმოება დაიწყო ორგანიზაციის ექვსი თანამშრომლის მიმართ.

მიგვაჩნია, რომ ნებისმიერ ორგანიზაციაში მუშაობა და თანამშრომლობა არის ორმხრივი ნების გამოვლენისა და სურვილის შედეგი, რასაც არ ჰქონდა ადგილი მოცემულ შემთხვევაში, რის გამოც, საქართველოს პირველი არხის მიერ მიღებულ იქნა გადაწყვეტილება გადაცემის – „რეალური სივრცე“ წამყვანთან, ნინო ზაუტაშვილთან და საინფორმაციო გადაცემის – „მოამბე“ წამყვანთან, ვასილ ივანოვ-ჩიქოვანთან შეწყდეს შრომითი ურთიერთობა. აღნიშნული დისციპლინური წარმოების ფარგლებში მაუწყებლის სხვა თანამშრომლების: გადაცემა „რეალური სივრცის“ კორესპონდენტის, თამარ მშვენიერაძის, ამავე გადაცემის წამყვანის, იოსებ კაციტაძის, პულტის რეჟისორის და შეთავსებით სპორტული არხის რეჟისორის, კახაბერ მელიქიძის, ბრენდინგისა და პრომოციის ჯგუფის რეჟისორის, ირმა ჩუბინიძის მიმართ გამოყენებულია სხვა სახის დისციპლინური სანქციები.

მოკვლევის პროცესის შედეგების შეფასება რამდენიმე დასაქმებულთან მიმართებაში კვლავ მიმდინარეობს და პროცესის დასრულების შემდგომ საზოგადოებას მიეწოდება დამატებითი ინფორმაცია დისციპლინარული წარმოების შედეგების შესახებ.

ხაზგასმით გვინდა აღვნიშნოთ, რომ საზოგადოებრივი მაუწყებელი არის დამოუკიდებელი მედიაორგანიზაცია, რომელიც ხელმძღვანელობს მოქმედი კანონმდებლობით, მის მიერ საერთაშორისო სტანდარტის გათვალისწინებით შემუშავებული რეგულაციებით. საზოგადოებრივი მაუწყებელი კიდევ ერთხელ აცხადებს, რომ მის სარედაქციო დამოუკიდებლობაზე თავდასხმა, ცრუ ბრალდებების ტირაჟირების კამპანია, რომელიც აზიანებს მის იმიჯსა და რეპუტაციას, მიუხედავად იმისა, ვისგანაც არ უნდა მომდინარეობდეს იგი, არ დარჩება სათანადო რეაგირების გარეშე.

ორგანიზაციის შეფასებით, მიღებული გადაწყვეტილება არის სამართლიანი, მიუკერძოებელი და სამართლებრივად დასაბუთებული. საზოგადოებრივი მაუწყებელი მიჰყვება შესაბამისი კანონმდებლობით განსაზღვრულ პროცესს“, – ნათქვამია განცხადებაში.