ვერავინ გაბედავს, მოგპაროთ ხმები, ვერავინ გაბედავს თქვენი თავისუფლების მიტაცებას, საქართველო იქნება თავისუფალი, იქნება ევროპაში, – ამის შესახებ პოლონეთის პარლამენტის საგარეო ურთიერთობათა და ევროკავშირის საქმეთა კომიტეტის წევრმა, მიჰაუ კამინსკიმ პარლამენტთან მიმდინარე ოპოზიციის აქციაზე სიტყვით გამოსვლისას განაცხადა.

ამასთან, მიჰაუ კამინსკიმ აქციაზე აღნიშნა, რომ მიხეილ სააკაშვილი უნდა იყოს თავისუფალი.

„საქართველო გვიყვარხარ. თბილისო, მე აქ ვიდექი თქვენს ბრწყინვალე პრეზიდენტ სააკაშვილთან და პოლონეთის დიდ პრეზიდენტ, ლეხ კაჩინსკისთან ერთად. ჩვენ აქ ვიდექით, როდესაც რუსული ტანკები უახლოვდებოდნენ თბილისს და თბილისი გადარჩა. საქართველო გადარჩა, საქართველო გადაურჩა რუსეთის აგრესიას.

ვერავინ გაბედავს, მოგპაროთ ხმები, ვერავინ გაბედავს თქვენი თავისუფლების მიტაცებას, საქართველო იქნება თავისუფალი, იქნება ევროპაში. ნება მომეცით, ბოლოში მოგახსენოთ, მიშა სააკაშვილი უნდა იყოს თავისუფალი“, – განაცხადა მიჰაუ კამინსკიმ.

გლობალური ომის პარტია რუსეთია, რუსული იმპერიალიზმია , – ამის შესახებ გერმანიის პარლამენტის (ბუნდესტაგის) საგარეო ურთიერთობათა კომიტეტის თავმჯდომარემ, მიხაილ როთმა თბილისში, საპროტესტო აქციაზე – „ჩვენ ვართ ევროპა“ სიტყვით გამოსვლისას განაცხადა.

მან მოუწოდა ქართველებს, არ დანებდნენ.

„ჩვენი სურვილია მხარი დაგიჭიროთ. ქართველი მეგობრებისგან ვიცი, რომ დაღლილები ხართ, მაგრამ არ დანებდეთ ძვირფასო მეგობრები. ჩვენ თქვენს გვერდით ვართ. მე სრულიად ვეთანხმები მმართველ პარტიას, რომელიც აკრიტიკებს გლობალურ ომის პარტიას, დიახ, ასეთი გლობალური ომის პარტია არსებობს და ეს გლობალური ომის პარტია საფრთხეს მხოლოდ თქვენთვის არ წარმოადგენს. ეს გლობალური ომის პარტია საფრთხეს წარმოადგენს გერმანიისთვის, საფრანგეთისთვის, ესპანეთისთვის, იტალიისთვის, საბერძნეთისთვის, რუმინეთისთვის, ბულგარეთისთვის. გლობალური ომის პარტია რუსეთია, რუსული იმპერიალიზმია“, – განაცხადა მიხაილ როთმა.

მისივე თქმით, „თუ უკრაინელი მეგობრები ვერ გაიმარჯვებენ, შემდეგი თქვენ იქნებით, შემდეგი მოლდოვა იქნება, სომხეთი იქნება შემდეგი“.

„ჩვენ ყველანი ისტორიის ერთ ფურცელზე ვიმყოფებით და თქვენ ჩვენს გვერდით ხართ. თუ თქვენ გაიმარჯვებთ, ჩვენც გავიმარჯვებთ. თუ თქვენ გადარჩებით, ევროკავშირიც გადარჩება. აქ სწორედ ამიტომ ვართ“, – აღნიშნა მიხაილ როთმა.

რუსთაველის გამზირზე აქცია ლოზუნგით „ჩვენ ვართ ევროპა“ დაიწყო.

დღევანდელი აქცია საქართველოსა და ევროკავშირის ჰიმნებით გაიხსნა. აქციის მონაწილეები აპირებენ მსოფლიოს კიდევ ერთხელ ხმამაღლა უთხრან: „საქართველო ევროპაა!“.

რუსთაველის გამზირზე მიმდინარე აქციას უკვე შეუერთდნენ საქართველოში ვიზიტად მყოფი ევროკავშირის 8 ქვეყნის პარლამენტის საგარეო ურთიერთობათა კომიტეტის თავმჯდომარეები. დელეგაციის წევრები პარლამენტის შენობის წინ მიმდინარე აქციაზე მსვლელობით მივიდნენ. მათ აქციის მონაწილეებმა სპეციალური კორდონი მოუწყვეს, დემონსტრანტები დელეგაციის წევრებს ოვაციებით და ტაშით შეხვდნენ. ევროპელი პარლამენტარები სცენაზე ევროკავშირის ჰიმნის ფონზე ავიდნენ. კიდევ ერთხელ შესრულდა საქართველოს ჰიმნი.

შეკრებილ საზოგადოებას ქართული ოპოზიციური პარტიების და სამოქალაქო საზოგადოების წარმომადგენლების სიტყვით გამოსვლების შემდეგ, 8 ქვეყნის პარლამენტის საგარეო კომიტეტების თავმჯდომარეები მიმართავენ.

პროტესტის მონაწილეები საპარლამენტო არჩევნების შედეგებს და შესაბამისად, პარლამენტის ლეგიტიმაციას არ აღიარებენ და ითხოვენ, რომ ხელახალი არჩევნები დაინიშნოს.

საქართველო სამართლიან და დემოკრატიულ არჩევნებს იმსახურებს , – ამის შესახებ შვედმა ეკოაქტივისტმა, გრეტა თუნბერგმა თბილისში, მის მიერ ორგანიზებულ აქციაზე განაცხადა.

„საქართველო სამართლიან და დემოკრატიულ არჩევნებს იმსახურებს. ეს ასე მარტივად არის“, – განაცხადა გრეტა თუნბერგმა.

ამასთან, ეკოაქტივისტმა ისაუბრა მის მიერ ორგანიზებული აქციის მიზანზე და კლიმატის ცვლილებებზე. თუნბერგის თქმით, კლიმატური სამართლიანობა სოციალური სამართლიანობის გარეშე შეუძლებელია და ასევე, აღნიშნა, რომ პარლამენტის წინ, აქციას ლოზუნგით „ჩვენ ვართ ევროპა“-ს შეუერთდება.

„ჩვენ ვერ გვექნება კლიმატური სამართლიანობა სოციალური სამართლიანობის გარეშე. ეს პროტესტი აზერბაიჯანის რეპრესიული ავტორიტარული რეჟიმის წინააღმდეგ არის, კონკრეტულად კლიმატის ცვლილების კონფერენციის წინააღმდეგ, ასევე, მთელი კავკასიის რეგიონის სამართლიანობისთვის და დემოკრატიისთვის“, – აღნიშნა შვედმა აქტივისტმა.

შვედი ეკოაქტივისტი გრეტა თუნბერგი სხვა აქტივისტებთან ერთად რუსთაველის გამზირზე, პარლამენტის წინ მიმდინარე აქციას შეუერთდა. ცნობისთვის, მანამდე შვედი ეკოაქტივისტი აზერბაიჯანში მიმდინარე კლიმატის ცვლილებების კონფერენციას აპროტესტებდა თავისუფლების მოედანზე. როგორც აქტივისტები აცხადებენ, აზერბაიჯანში აღნიშნული კონფერენციის ჩატარება არ შეიძლება, რადგან აზერბაიჯანი ავტორიტარული ქვეყანაა, სადაც კრიტიკული სამოქალაქო საზოგადოება იდევნება. ასევე, რუსთაველის გამზირზე 19:00 საათიდან მოქალაქეები იკრიბებიან, რომლებიც 26 ოქტომბრის საპარლამენტო არჩევნებში დამდგარ შედეგებს აპროტესტებენ.

დარწმუნებული ვარ, რომ ჩვენი პარტნიორები მიხვდებიან და დარწმუნდებიან იმაში, რომ მსგავსი ტიპის ინტერვენციები, მსგავსი ტიპის მიკერძოებული დამოკიდებულება და უპატივცემულობა, რომელსაც ჩვენ ხშირ შემთხვევაში ვხედავთ და გვესმის, ჩვენთვის მიუღებელია, – ამის შესახებ საქართველოს საგარეო უწყების ხელმძღვანელმა, ილია დარჩიაშვილმა განაცხადა.

„მე მოვისმინე პარლამენტის თავმჯდომარის განცხადება [ევროპელი დეპუტატების ვიზიტთან დაკავშირებით] და სრულად ვეთანხმები იმ პათოსს, რომელიც მან გააჟღერა. ჩვენ პარტნიორობა გვესმის იმ ჭრილში, რომ ჩვენმა პარტნიორებმა აუცილებლად უნდა მოისმინონ და გაიზიარონ ყველა ის გამოწვევა, რომელიც ჩვენს ქვეყანას აქვს და რომელმაც შექმნა იმის საჭიროება, რომ ჩვენს ქვეყანაში მიგვეღო ეს სამართლებრივი რეგულაციები“, – განაცხადა დარჩიაშვილმ.

მინისტრმა აღნიშნა, რომ საქართველო და ქვეყნის ხელისუფლება ყოველთვის მზადაა კონსტრუქციული დიალოგისთვის.

„დარწმუნებული ვარ, ადრე თუ გვიან, ის ხალხი, რომელიც მსგავსი უხეში ფორმით ერევა ქვეყნის შიდა საკითხებში, მიხვდება, რომ ეს არ არის ურთიერთობის მისაღები ფორმა. კიდევ ერთხელ მინდა, ვთქვა, ჩვენ ყოველთვის გვაქვს მზაობა კონსტრუქციული დიალოგისთვის და არა მიკერძოებული დიალოგისთვის. შესაბამისად, ჩვენ ყოველთვის გამოვხატავთ ინტერესს, რომ ღიად და გულწრფელად ვესაუბროთ ჩვენს პარტნიორებს“,- აღნიშნა საქართველოს საგარეო უწყების ხელმძღვანელმა.

ამასთან, ილია დარჩიაშვილის განცხადებით, საქართველოს ჰყავს ძალიან ბევრი პარტნიორი, რომელიც ყოველთვის მზად არის, მოისმინოს არგუმენტები.

„ეს არის გზა, რომელიც აუცილებლად მიგვიყვანს იქამდე, რომ ჩვენ, ჩვენს პარტნიორებთან ურთიერთსტრატეგიული ინტერესების პოლიტიკას უფრო მეტად შევუწყობთ ხელს, რომელიც სასარგებლო იქნება ყველასთვის,“ – განმარტა საგარეო უწყების ხელმძღვანელმა.

„ქართული ოცნების“ წევრმა თენგიზ შარმანაშვილმა, „დღის ქრონიკასთან“ საუბრისას ის მიზეზები განმარტა, რის გამოც „ქართულმა ოცნებამ“ უარი თქვა ევროკავშირის რვა ქვეყნის საგარეო ურთიერთობათა კომიტეტის თავმჯდომარეების დელეგაციასთან შეხვედრაზე.

მისი თქმით, ჩამოსული სტუმრები წარმოადგენენ მათ საკუთარ პოზიციას და ისინი ვერ ისაუბრებენ ევროპის სახელით. თენგიზ შარმანაშვილის განმარტებით, დელეგაციის წევრები, საქართველოს კანონმდებლობის დარღვევით, უხეშად იყვნენ ჩართულები საარჩევნო კამპანიაში და მხარს უჭერდნენ კონკრეტულ საარჩევნო სუბიექტს, ამიტომ ისინი ვერ იქნებიან ნეიტრალურები.

„რა თქმა უნდა, ისინი დამოუკიდებლად მოქმედებენ. ევროპის სახელით ვის შეუძლია ილაპარაკოს, ეს ევროპის ფუნდამენტური დოკუმენტებით არის განსაზღვრული. რაც შეეხება კონკრეტულად ამ ადამიანების უმრავლესობას, რომლებიც აქ არიან ჩამოსულები, სამწუხაროდ, ისინი წინასაარჩევნო კამპანიაში იყვნენ ჩართული პირდაპირ, საქართველოს კანონმდებლობის უხეში დარღვევით. პოლიტიკური საქმიანობა უცხოელებს ეკრძალებათ საქართველოში მაგრამ არად დაგიდევენ ამას. ისინი თავისუფლად გამოდიოდნენ მიტინგებზე, აკეთებდნენ განცხადებებს, მოუწოდებდნენ ქართველ ხალხს რა არჩევანი უნდა გაეკეთებინათ.

ეს ადამიანები არიან ჩვეულებრივი საარჩევნო სუბიექტები, ისინი კონკრეტულ სუბიექტებს უჭერდნენ მხარს და ისინი ვერ იქნებიან ვერც ნეიტრალური პირები ამ ურთიერთობებში, ვერც დამოუკიდებელი დამკვირვებლები და ვერც ნეიტრალური მოთამაშეები. ამიტომ მათ აზრს არანაირი მნიშვნელობა ჩვენთვის არ აქვს. იმიტომ, რომ ისინი ერთ სუბიექტს, კრებით „ნაციონალურ მოძრაობას“ უჭერდნენ მხარს, დაუფარავად, პირდაპირ და საქართველოს კანონმდებლობის დარღვევით. რა ფასი უნდა ჰქონდეს მათთან ურთიერთობას და ასეთი დამოკიდებულების დროს მათთან შეხვედრას მნიშვნელობა არ აქვს“, – განაცხადა თენგიზ შარმანაშვილმა.