არ შეიძლება, საზღვარგარეთ მყოფ თანამემამულეებს, ახალგაზრდებს, თუ ხანშიშესულ ადამიანებს მუდმივად ოჯახების თუ ქვეყნის დახმარებას ვთხოვდეთ და არ ვაძლევდეთ მათ ელემენტარულ უფლებას, არჩევნებში მონაწილეობის უფლებას, – ამის შესახებ საქართველოს პრეზიდენტმა, სალომე ზურაბიშვილმა “ჩვენი ხმა ევროპას” კამპანიის ფარგლებში მეცნიერებსა და აკადემიური წრის წარმომადგენლებთან შეხვედრისას განაცხადა.

მისივე თქმით, საზღვარგარეთ მყოფმა მოქალაქეებმა უნდა დაინახონ, რომ მის პოლიტიკურ ჩართულობაზეც არის დამოკიდებული ქვეყანა.

”არ არის საკმარისი იქ წასვლა და სწავლა, თუ არ არის შინაგანი მოთხოვნილება, რომ ამ ქვეყანას ნაწილობრივ მაინც დავუბრუნო ჩემი ახალი ცოდნა და მოვახმარო. ეს არ ნიშნავს ფიზიკურ დაბრუნებას. მაგალითად, გია დვალი თუ მაქს პლანკის ინსტიტუტშია, ეს ამ ქვეყნისთვის ძალიან მნიშვნელოვანია. ეს არ გამორიცხავს ჩამოდიოდეს და მისი ცოდნა გაზიარებული იყოს ახალგაზრდებთან. ასეთი თანამშრომლობა გვჭირდება. ამას ემსახურება ორმაგი მოქალაქეობის კანონი, ეს კავშირი ძალიან მნიშვნელოვანია ქვეყნის ყველა დარგისთვის. არამხოლოდ ცოდნის, ეკონომიკურ დარგშიც.

იქ {საზღვარგარეთ} ვინც ცხოვრობს ჩვენი თანამემამულე, უნდა დაინახოს და იცოდეს, რომ ეს ქვეყანა მის ჩართულობაზეა დამოკიდებული, პოლიტიკურ ჩართულობაზე. არ შეიძლება ვთხოვდეთ უცხოეთში მყოფ თანამემამულეებს, ახალგაზრდებს, თუ ხანშიშესულ ადამიანებს მუდმივად ოჯახების თუ ქვეყნის სხვა ფორმით დახმარებას და არ ვაძლევდეთ მათ ელემენტარულ უფლებას, არჩევნებში მონაწილეობის უფლებას“, – აღნიშნა პრეზიდენტმა.

როგორც პრეზიდენტმა განმარტა, იმისთვის, რომ დაცული იყოს საქართველოს იდენტობა, ის, რაც ყველაზე ძვირფასია, ამ იდენტობას სჭირდება ის თავისუფლება, რომელიც მხოლოდ ევროპასა და ევროსტრუქტურებშია დაცული.

„არცერთი სხვა ასეთი ორგანიზაცია არ არსებობს, რომელში გაწევრიანებულებიც მხოლოდ ნებაყოფლობით არიან. ისტორიამ არ იცის სხვა ასეთი ორგანიზაცია. ისტორიამ იცის იმპერიები. ძალიან კარგად ვიცით, თუ რა იმპერიები იყო ჩვენს ირგვლივ, რა შედეგი მოუტანა ამ ქვეყანას. ვხედავთ და ვიცით, თუ რამდენად მნიშვნელოვანია დღევანდელი ახალგაზრდებისთვის ის, რომ ევროპის კარები გაიხსნა. ჩვენ ხშირად ვფიქრობთ, რომ ვიზალიბერალიზაცია არის ის მთავარი, რაც მივიღეთ, მაგრამ არამხოლოდ, „ერასმუსი“ არის ერთ-ერთი დიდი მიღწევა, რითაც ძალიან ბევრი ჩვენი ახალგაზრდა სარგებლობს, ასევე სხვა მიზნობრივი პროგრამები. „ჰორაიზონ ევროპაც“ ძალიან მნიშვნელოვანია მეცნიერებისთვის, „შემოქმედებითი ევროპა“ კულტურის სფეროს ნაწილისთვის. ჩვენ ვიყავით ფრანკფურტში, როგორც მასპინძელი ქვეყანა, დღეს ვართ „ევროპალიის“ მასპინძელი ქვეყანა. ის, რომ მეტი შეიძლება ეს ჩვენზეა დამოკიდებული და არა იმათზე, ვინც ამ საშუალებას გვაძლევს, ზოგჯერ ჩვენ თავში ჩაკეტილები, ვერ ვახერხებთ გამოვიყენოთ ისე, როგორც საჭიროა.

ევროპა ასევე არის ჩვენი მომავალი, ეს არის საშუალება, რომ განვითარდეს ის, რაც მთავარია, ეს არის ჩვენი ადამიანური რესურსის, პოტენციალის განვითარება. განვითარება ნიშნავს, არამხოლოდ პიროვნულ განვითარებას, არამედ ნიშნავს პროფესიონალიზმს, იმ დარგების დაბრუნებას, რომელიც პრაქტიკულად ქრება საქართველოში. გეოლოგები, ვეტერინარები, არქეოლოგები – მეტი გვჭირდება. ძალიან ბევრი დარგია, სადაც ბევრად მეტი სპეციალისტი გვჭირდება. გავიარეთ შოვის ტრაგედია, ალბათ, ბევრად მეტი მყინვართმცოდნე გვჭირდება, 1-2 გვყავს და ასეთ ქვეყანაში წარმოუდგენელია. უამრავი გეოლოგი გვყავდა და ესეც ძალიან მნიშვნელოვანია მომავლისთვის. ასევე არიან გარემოსდაცვითი მცოდნეები, ყველა ეს მიმართულება, რაც ქვეყნის დაცულობას ნიშნავს, არის ის, რაც უნდა განვავითაროთ“,-აღნიშნა პრეზიდენტმა.

პარტია არ არსებობს და მისი წევრი როგორ უნდა არსებობდეს, წარმოუდგენელია, ვერსაიდან გარიცხავენ და ვერც მიიღებენ, რადგან პარტია არ არსებობს, პარტია მთლიანად დაშლილია, სატელევიზიო სივრცეში არსებობენ, – ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ განაცხადა.

მდინარაძის თქმით, კარგია ის, რაც ახლა „ნაციონალურ მოძრაობაში“ ხდება.

„ერთმანეთს რიცხავენ, ერთმანეთს ებრძვიან და ეს არის ბიუჯეტიდან მოპარული და შემდეგ სხვადასხვა ბიზნესში დატრიალებული ფულისთვის და გავლენებისთვის ბრძოლა. სამწუხაროდ, „ნაციონალურ მოძრაობას“, ამ არარსებულ პარტიასაც კი, რაღაც რეიტინგები აქვს შემორჩენილი, დრამატულად ეშვება რეიტინგი, მათი პარტნიორების მიერ ჩატარებული კვლევებითაც კი, დრამატული ვარდნა აქვთ. ეს ნიშნავს, რომ პარტია პრაქტიკულად აღარ არსებობს, თუმცა გავლენები, ტელევიზიები, ფული არსებობს და ამის გადანაწილებისთვის შიდა ბრძოლებია, სააკაშვილის კარზე ვინ მეტ ქულას დაიწერს, ამაზეც არის ცალკე ბრძოლები, მათ შორის მათი ოლიგარქების კარზეც ბრძოლა მიმდინარეობს, ვინ მეტ ქულას დაიწერს და ვინ უფრო გამოიჩენს რადიკალიზმში თავს. ეს პარტია იმის გარდა, რომ წარსულის მძიმე ცოდვებით არის დამძიმებული, დღეს უკვე მავნებლობით არის დაკავებული. თუ ამ მავნებლობის ხარისხს ამცირებენ ხოლმე და არ ჩანან, შიდა დაპირისპირებებით არიან დაკავებული. ასეთი დრამატული სიტუაცია აქვთ, თუმცა ეს კარგია, რაც მეტი ასეთი მოხდება, უფრო აჩენენ თავის სახეს. ბევრი გულწრფელი ადამიანი შეიძლება, მხარს უჭერდეს, შესაბამისად, ამ ადამიანის რწმენისთვის, რომ კიდევ შეიძლება, „ნაციონალურ მოძრაობას“ მხარს უჭერდე, ამ ადამიანების სამომავლო არჩევანისთვის კარგია. ისინი ამით თავის სახეს აჩენენ“, – განაცხადა მდინარაძემ.

სრული ბარდაგია, რაც ახლა „ნაციონალური მოძრაობის“ მხარეს ხდება, – ამის შესახებ „გირჩის“ წევრმა, ალექსანდრე რაქვიაშვილმა განაცხადა.

რაქვიაშვილის თქმით, აკვირდება პროცესს, როგორი კონფიგურაციით შენარჩუნდება „ნაციონალური მოძრაობა“.

„მაინტერესებს, როდის დამთავრდება. უკვე ნახევარი წელი თუ ცხრა თვეა, ეს გაუგებრობა გრძელდება, ძალიან ბევრი ყურადღებაა მიქცეული. შესაძლოა, ეს ახსნადია, მაგრამ საბოლოო ჯამში, ამის გამო სხვა უფრო მნიშვნელოვან თემებზე ვერ ვლაპარაკობთ. რაც მთავარია, არ გვესმის, „ნაციონალური მოძრაობა“ როგორი კონფიგურაციით შენარჩუნდება ან ვის უნდა დაელაპარაკო. ასეთი კონფლიქტი როცა გაქვს პარტიაში და ვერ აგვარებ, შესაძლოა, მმართველი გუნდის, თავმჯდომარის და სხვა მმართველების ლეგიტიმურობის პრობლემა დადგეს. ვაკვირდები ამას, წარმოდგენა არ მაქვს, როგორ დამთავრდება, თუმცა იმედია, სწრაფად დასრულდება“, – განაცხადა ალექსანდრე რაქვიაშვილმა.

პარტიიდან გარიცხვის ფაქტი ბოლოს რომ მოხდა, მე ვიყავი ძალიან ახალგაზრდა. კომუნისტური პარტიიდან რიცხავდნენ და ეს იბეჭდებოდა გაზეთებში, – ამის შესახებ “ევროოპტიმისტების” დეპუტატმა, ხატია დეკანოიძემ განაცხადა, რითაც „ნაციონალური მოძრაობის“ თავმჯდომარის, ლევან ხაბეიშვილის მიერ გაკეთებულ განცხადებას ეხმაურება იმის შესახებ, რომ „ნიკა მელია „ნაციონალური მოძრაობის“ რიგებში არ ირიცხება“.

ხატია დეკანოიძის თქმით, ძალიან სამწუხაროა, რომ ეს გადაწყვეტილება მიიღო პარტიამ, რომელსაც პროდასავლურ და დემოკრატიულ ღირებულებებზე აქვს პრეტენზია.

„ჩემთვის სრულიად მიუღებელი იყო ეს განცხადება. განსაკუთრებით წერილობითი განცხადება პირდაპირ ეთერში, რომელიც ნიკა მელიას საყოველთაო დასჯას უფრო ჰგავდა. არ ვიცი ეს იყო ერთი ადამიანის მიმართ განხორციელებული სადამსჯელო ღონისძიება თუ არა, ვინაიდან ამ მანიფესტს ძალიან ბევრმა ადამიანმა არ მოაწერა ხელი პარტიის შიგნით და ამ ადამიანების მიმართ მსგავსი გადაწყვეტილება არ ყოფილა.

როდესაც ჩვენ ვაკრიტიკებთ „ქართულ ოცნებას“, რომ განსხვავებული აზრის მიღება არ შეუძლიათ, რა თქმა უნდა, ჩვენ და ოპოზიციამ ძალიან სერიოზული მაგალითი უნდა აჩვენოს, როგორ შეუძლია განსხვავებული აზრის მიღება და მათ შორის შიდა პარტიული დემოკრატია გაცილებით სხვა სტანდარტების უნდა იყოს, ვიდრე ეს არის ახლა დამკვიდრებული „ქართული ოცნების“ პირობებში. სამწუხაროდ სრულიად საპირისპირო მივიღეთ ამ გადაწყვეტილებით.

მე არ მესმის, რა არის სამართლებრივად „თავი ამოირიცხა“, სამართლებრივად ასეთი რაღაც არ არსებობს. ადამიანმა განცხადებით უნდა მიმართოს ან თვითონ უნდა იყოს ინიციატორი. „თავი გაირიცხა, პარტიის გარეთ დააყენა“ ასეთი სამართლებრივი სტატუსი არ არსებობს და ვერც იარსებებს.

ეს ძალიან სამწუხაროა იმიტომ, რომ პარტიიდან გარიცხვის ფაქტი ბოლოს რომ მოხდა, მე ვიყავი ძალიან ახალგაზრდა. კომუნისტური პარტიიდან რიცხავდნენ და ეს იბეჭდებოდა გაზეთებში. ძალიან სამწუხაროა ეს გადაწყვეტილება და ძალიან სამწუხაროა, რომ ეს გადაწყვეტილება მიღო პარტიამ, რომელსაც პროდასავლურ და დემოკრატიულ ღირებულებებზე აქვს პრეტენზია“, – განაცხადა ხატია დეკანოიძემ.

„ერთიანი ნაციონალური მოძრაობის“ თავმჯდომარე, ლევან ხაბეიშვილი აცხადებს, რომ ყოფილი თავმჯდომარე ნიკა მელია პარტიის რიგებში არ ირიცხება. ამის შესახებ მან „ფორმულას“ ეთერში განაცხადა. გადაცემის წამყვანებმა ხაბეიშვილს წერილობით გააცნეს შეკითხვა: „ირიცხება თუ არა ნიკა მელია „ნაციონალური მოძრაობის“ რიგებში, არის თუ არა ის ოფიციალურად და ფორმალურად პარტიის წევრი“ და შესაბამისი ფურცელი გადასცეს, რაზეც ხაბეიშვილმა უპასუხა: „არ ირიცხება, არ ირიცხება, რა ვიცი. ეს თუ ამთავრებს ამ თემას…. არ არის. არ არის, არ წარმოადგენს [ნაციონალურ მოძრაობას]”.