სამხრეთ კორეის გაერთიანებული შტაბში აცხადებენ, რომ ჩრდილოეთ კორეამ დასავლეთ სანაპიროდან სამხრეთის კუნძულ იონპიონგის მიმართულებით 200-ზე მეტი საარტილერიო ჭურვი ისროლა.

BBC-ის ინფორმაციით, სამხრეთ კორეამ კუნძულზე მცხოვრები მშვიდობიანი მოსახლეობისთვის ევაკუაციის გაფრთხილება გამოსცა, მაგრამ ჯერ არ არის დადასტურებული, უკავშირდება თუ არა ევაკუაციის განკარგულება დაბომბვას.

სამხრეთ კორეა ჩრდილოეთ კორეის ამ ნაბიჯს გმობს და პროვოკაციულ ქმედებად აფასებს. გავრცელებული ინფორმაციით, საარტილერიო ჭურვებს სამხრეთ კორეის ტერიტორიაზე არ შეუღწევია, რადგან ყველა მათგანი ორ ქვეყანას შორის ბუფერულ ზონაში დაეშვა.

სამხრეთ კორეის გაერთიანებული შტაბის უფროსები აცხადებენ, რომ ინციდენტს ქვეყნის მოსახლეობისთვის, ან სამხედროებისთვის ზიანი არ მიუყენებია, თუმცა, მათი თქმით, ამგვარი ქმედება ემუქრება მშვიდობას კორეის ნახევარკუნძულზე და ზრდის დაძაბულობას.

აშშ-ის ოფიციალური პირები ადასტურებენ, რომ ბაღდადში, აშშ-ის საჰაერო იერიშის დროს, ირანის მიერ მხარდაჭერილი შიიტური დაჯგუფების, „ჰარაკატ ალ-ნუჯაბას“ ლიდერის, მუშტაკ ჯავად ქაზიმ ალ-ჯავარის ლიკვიდაცია განხორციელდა.

პენტაგონის ინფორმაციით, ალ- ჯავარი, რომელიც ასევე ცნობილია, როგორც აბუ თაკვა, რეგიონში ამერიკულ ძალებზე თავდასხმების დაგეგმვასა და განხორციელებაში მონაწილეობდა.

პენტაგონის წარმომადგენლის, გენერალ-მაიორ პატრიკ რაიდერის განცხადებით, აშშ-ის მიერ განხორციელებული საჰაერო თავდასხმის დროს „ჰარაკატ ალ-ნუჯაბას“ კიდევ ერთი წევრი დაიღუპა.

„არცერთი მშვიდობიანი მოქალაქე არ დაშავებულა. არანაირი ინფრასტრუქტურა და ობიექტი არ დაზიანებულა“, – აღნიშნა რაიდერმა.

აშშ-ის მიერ გუშინ ბაღდადში განხორციელებული ავიაიერიში ერაყის მთავრობაში საშიშ ესკალაციად და აგრესიად შეაფასეს.

აშშ-ის ეროვნული უსაფრთხოების საბჭოს სტრატეგიული კომუნიკაციების კოორდინატორმა, ჯონ კირბიმ განაცხადა, რომ ბოლო დღეებში რუსეთმა უკრაინის წინააღმდეგ ჩრდილოეთ კორეის მიერ მიწოდებული ბალისტიკური რაკეტები გამოიყენა.

ჯონ კირბის თქმით, აშშ-მა დაადგინა, რომ ჩრდილოეთ კორეამ რუსეთს ბალისტიკური რაკეტის გამშვები მოწყობილობა და რამდენიმე ბალისტიკური რაკეტა მიაწოდა.

თეთრი სახლის მაღალჩინოსანმა ასევე აღნიშნა, რომ რუსეთმა ამ რაკეტებიდან, სულ მცირე, ერთი 30 დეკემბერს გამოიყენა.

“ჩვენ მოველით, რომ რუსეთი გამოიყენებს ჩრდილოეთ კორეისგან მიღებულ დამატებით რაკეტებს უკრაინის სამოქალაქო ინფრასტრუქტურისა და მშვიდობიანი მოსახლეობის წინააღმდეგ”, – განაცხადა ჯონ კირბიმ.

უკრაინისთვის დამატებითი საჰაერო თავდაცვის სისტემებისა და რაკეტების მიწოდების უზრუნველყოფა ნომერ პირველი პრიორიტეტია, – ამის შესახებ უკრაინის პრეზიდენტმა, ვოლოდიმირ ზელენსკიმ ყოველდღიური მიმართვისას განაცხადა.

„ამ დღეებში ჩვენი ქვეყნის ბევრ რეგიონში – სხვადასხვა ქალაქსა და სოფელში განხორციელდა მასიური სარაკეტო დარტყმები, მუდმივი თავდასხმები „შაჰედებით“. აშკარაა, რომ ტერორისტული სახელმწიფოს ლიდერები ცდილობდნენ, გამოეყენებინათ ეს საახალწლო დღესასწაულები, ამ წლის პირველი დღეები ჩვენი სულისკვეთების გასატეხად და შარშანდელი საფრთხის დასაბრუნებლად. ჩვენი ცის დამცველები ყველაფერს აკეთებენ ჩვენი სახელმწიფოს დასაცავად. ჩვენი დიპლომატების მთელი გუნდი, ყველა, ვინც პასუხისმგებელია პარტნიორებთან კომუნიკაციაზე, უკრაინის წარმომადგენლები საზღვარგარეთ, ყველაფერს აკეთებენ, რათა უზრუნველყონ დამატებითი საჰაერო თავდაცვის სისტემებისა და რაკეტების მიწოდება უკრაინისთვის. ეს არის ნომერ პირველი პრიორიტეტი“, – განაცხადა ზელენსკიმ.

უკრაინის პრეზიდენტმა მადლობა გადაუხადა ყველას, ვინც იცავს უკრაინას და რუსული ტერორის წინააღმდეგ გაერთიანებისკენ მოუწოდა.

უკრაინის სამხედრო დახმარების გარეშე ომი უფრო ახლოს იქნება ჩვენთან. ამის შესახებ იტალიის პრემიერ-მინისტრმა ჯორჯია მელონიმ 4 იანვარს შემაჯამებელ პრესკონფერენციაზე განაცხადა.

იტალიის მთავრობის მეთაურმა ნეგატიურად შეაფასა განცხადებები, რომ “ჩვენ არ უნდა ვაგზავნიდეთ იარაღს უკრაინაში, რადგან ეს კონფლიქტის ესკალაციამდე მიგვიყვანს.”

“ჩვენ რომ გვექნა ის, რასაც ისინი გვთავაზობენ, ვინც ამბობს, რომ უკრაინას მხარი არ უნდა დავუჭიროთ, მაშინ მშვიდობა არ გვექნებოდა. შემოჭრა გვექნებოდა, მაშასადმე, ომი სახლთან უფრო ახლოს” , – განაცხადა მელონიმ.

უკრაინის შეიარაღებული ძალების გენერალური შტაბის სტრატეგიული კომუნიკაციების სამმართველოში განაცხადეს, რომ უკრაინის შეიარაღებულმა ძალებმა ოკუპირებულ ყირიმში რუსეთის სამხედრო ობიექტს დაარტყეს.

“დღეს დაახლოებით 15:00 საათზე უკრაინის შეიარაღებულმა ძალებმა სევასტოპოლთან რუსული საოკუპაციო ჯარების ფორმირების სამეთაურო პუნქტს დაარტყეს. დიდება უკრაინის შეიარაღებულ ძალებს”, – ნათქვამია უკრაინის შეიარაღებული ძალების გენერალური შტაბის სტრატეგიული კომუნიკაციების სამმართველოს განცხადებაში.

ისრაელის პრემიერ-მინისტრმა, ბენიამინ ნეთანიაჰუმ „რესპუბლიკელ“ სენატორ ლინდსი გრემთან შეხვედრის დროს განაცხადა, რომ ისრაელი ღაზაში ყველა მიზანს მიაღწევს.

ისრაელის მთავრობის მეთაურის თქმით, ისრაელის მიზნები „ჰამასის“ წინააღმდეგ ომში არის „ჰამასის“ განადგურება, მძევლების გათავისუფლება, იმის უზრუნველყოფა, რომ ღაზა აღარ გახდება საფრთხე და ასევე “დავრწმუნდეთ, რომ ჩვენ შეგვიძლია დავაბრუნოთ ჩვენი მოქალაქეები ჩრდილოეთსა და სამხრეთში”.

ანექსირებულ ყირიმში აფეთქებების ხმა გაისმა. ამის შესახებ ინფორმაციას ადგილობრივი “ტელეგრამ” არხები და რუსეთის თავდაცვის სამინისტრო ავრცელებენ.

კერძოდ, ოკუპირებული სევასტოპოლის ე.წ. “გუბერნატორმა” მიხაილ რაზვოჟაევმა განაცხადა, რომ ქალაქში საჰაერო თავდაცვა მუშაობს და “უკვე რამდენიმე საჰაერო სამიზნე იქნა ჩამოგდებული.”

მან აღნიშნა, რომ წინასწარი ინფორმაციით, ერთი ადამიანია დაშავებული.

ადგილობრივი “ტელეგრამ” არხების ცნობით, ერთი უკრაინული რაკეტა უკვე ჩამოაგდეს, ხოლო მეორე სევასტოპოლში მდებარე სამხედრო ნაწილს მოხვდა. თვითმხილველების ცნობით, ადგილზე უკვე სასწრაფო დახმარებისა და სახანძრო მანქანები მიემართებიან.

ასევე, თვითმხილველებზე დაყრდნობით, ვრცელდება ინფორმაცია, რომ აფეთქებები გაისმა ევპატორიასთან, სოფელ უიუტნოესთან მდებარე საჰაერო თავდაცვის სამხედრო ნაწილში. თვითმხილველების ინფორმაციით, სამხედრო ნაწილისკენ უკვე მიემართებიან სასწრაფო დახმარების მანქანები.

რუსეთის თავდაცვის სამინისტროს ცნობით, “აღკვეთილ იქნა კიევის რეჟიმის მცდელობა, განახორციელოს ყირიმში ობიექტებზე საავიაციო მართვადი რაკეტებით ტერორისტული თავდასხმა განახორციელოს”. მათი ცნობით, უკვე 10 რაკეტა ჩამოაგდეს.

ტერორისტულმა დაჯგუფება „ისლამურმა სახელმწიფომ“ ირანში მომხდარ აფეთქებაზე პასუხისმგებლობა აიღო. ინფორმაციას ამის შესახებ სააგენტო Reuters-ი ავრცელებს.

ირანის ქალაქ ქერმანში, გენერალ ყასემ სულეიმანის საფლავთან მომხდარი აფეთქების შედეგად დაღუპულთა რიცხვი 103-მდე გაიზარდა. ბოლო მონაცემებით, აფეთქების შედეგად, სულ მცირე, 188 ადამიანი დაშავდა.