ევროკავშირმა გაუხსნა კარი საქართველოს წევრობის კანდიდატის სტატუსის მისაღებად. ვიმედოვნებ, საქართველო, რომელიც ეკუთვნის ევროპულ ოჯახს, შეძლებს ამ მნიშვნელოვანი ნაბიჯის გადადგმას მომავალ კვირას, – ამის შესახებ საქართველოში საფრანგეთის ელჩმა, შერაზ გასრიმ განაცხადა.

„როგორც საქართველოში ყველამ იცის, ევროკავშირმა გაუხსნა კარი საქართველოს წევრობის კანდიდატის სტატუსის მისაღებად. ვიმედოვნებ, საქართველო, რომელიც ეკუთვნის ევროპულ ოჯახს, შეძლებს ამ მნიშვნელოვანი ნაბიჯის გადადგმას წლის ბოლოს, მომავალ კვირას. მე არ მაქვს მოლოდინები, მე მაქვს იმედი და მნიშვნელოვანია, რომ ყველა ქართულმა პოლიტიკურმა ძალამ, სამოქალაქო საზოგადოებამ იმუშაონ ამ მნიშვნელოვანი მიზნისთვის, რადგან ეს არის გრძელვადიანი მიზანი და საჭიროებს ძალების გაერთიანებას გრძელვადიან პერსპექტივაში.

იმედი მაქვს, რომ მთავრობა, ოპოზიციის პოლიტიკური ძალები და მთელი სამოქალაქო საზოგადოება გააორმაგებენ თავიანთ ძალისხმევას ერთად, კონსტრუქციულად და და ინკლუზიურად მუშაობისთვის, რათა განახორციელონ საქართველოს მოსახლეობის ევროპული მისწრაფებები“, – განაცხადა საქართველოში საფრანგეთის ელჩმა.

როდესაც ხედავენ ჩვენი ოპონენტები, რომ რეფორმები დაიძრა, პრობლემები იჭრება, პოზიტივი მოდის სისტემიდან, ბუნებრივია, ჩვენს ოპონენტებს სხვა ამოცანა არ ამოძრავებთ, როგორმე დააზიანონ პროცესი, იქნება ეს ხელფასების მატება, თუ დირექტორების კონკურსი, – ამის შესახებ განათლების მინისტრმა, გიორგი ამილახვარმა განაცხადა.

მისი თქმით, სკოლების 92%-ში, სადაც კონკურსები ჩატარდა, სამეურვეო საბჭოებმა, ანუ სკოლებმა თავად აირჩიეს კანდიდატები.

„მხოლოიდ 8% დარჩა ისეთი, სადაც არ აურჩევიათ და ჩვენ გამიზნულად, მიზანმიმართულად არც ერთი დისკრეცია არ გამოგვიყენებია, რომლის სრული კანონისმიერი უფლება გვაქვს, არანაირი უკანონო ან უსაფუძვლო ქმედება ამაში არ არის. ახლაც გაისმის ერთეული ადამიანებისგან, რომ თითქოს ეს დისკრეცია უნდა გამოვიყენოთ. რისთვის უნდა გამოვიყენოთ? რაზე უნდა გამოვიყენოთ, რომ კვალიფიციურმა კომისიამ მიიღო ის გადაწყვეტილება, რაც მიიღო. შესაბამისად, ჩვენ მხოლოდ წარდგენის უფლება გამოვიყენეთ და იყო ადგილები, სადაც აირჩიეს კანდიდატები, მაგრამ იყო ადგილები, სადაც არ აურჩევიათ. თუ ვინმე არ იქნა წარდგენილი, ის დასაბუთებულია შესაბამის ოქმებში და ნებისმიერ ადამიანს უფლება აქვს, მიმართოს სასამართლოს თუ ფიქრობს, რომ რაიმე მათი უფლებები შეილახა. ერთ ადამიანს ვერ ასახელებენ, დაახლოებით 900 სკოლაა, სადაც ახალი დირექტორი შეირჩა, რომ ვინმე არის ან არაკვალიფიციური, ან გარკვეული სუბიექტური მიზნებით იქ გამწესებული, პოლიტიკურად დაკავშირებული ხელისუფლებასთან ან რაიმე მსგავსი. აქ არის ერთი სიმართლე, რომ როგორც ხალხია ბრძენი, ასევე არიან პედაგოგები, ასევე არიან ის სასკოლო საზოგადოება, ვინც დღეს ქმნის ქართულ განათლებას. ბუნებრივია, არასდროს აყვებიან იმ ვიწრო ინტერესებს, რომლის უკანაც არ ვიცი, შესაძლოა იყოს გულისწყრომა. ამისთვის არ არის გარკვეული პროტესტები საჭირო, ამისთვის სამართლებრივად მოქმედებაც შესაძლებელია სხვადასხა ორგანოებში. თუ ამის უკან დგას დიდი პოლიტიკური ამოცანები, გასაგებია რატომაც, რომ უნდათ დააზიანონ ის დიდი რეფორმები, რომელიც ახლა ჩვენ განათლების სისტემაში დავიწყეთ“, – განაცხადა მინისტრმა.

გიორგი ამილახვარმა ისაუბრა მასწავლებლების პროტესტთან დაკავშირებით, რომელიც ბოლო დღეების განმავლობაში მიმდინარეობს.

„შევხვდი ამ ადამიანებს, ჩემს მოადგილეებთან ერთად. მოვუსმინე მათ არგუმენტებს და პირადად გავაცანი სახელფასო პოლიტიკისა და დირექტორების არჩევნების შესახებ ჩემი მოსაზრებები. ჩვენ ყველას ვხვდებით. კონკრეტულად ამ ადამიანებს ადრეც არაერთხელ შევხვდი. თითოეულის გულისწუხილი ჩვენთვის მნიშვნელოვანია და ვთვლი, რომ ადამიანი, რომელსაც აქვს რაიმე პრობლემა, მოსმენასაუცილებლად იმსახურებს.

ჩვენ არ მივეკუთვნებით იმ კატეგორიას, რომელიც არ ითვალისწინებს საზოგადოების აზრს. ვიცით როგორია უმრავლესობის განწყობა, ვიცით, რომ ყველაფერი კარგად მიდის, თუმცა ერთი ადამიანიც თუ აპროტესტებს რაღაცას მას აუცილებლად შევხვდებით და მოვუსმენთ.

მინდა, აღვნიშნო, რომ თავად სასკოლო საზოგადოება, მასწავლებლები და მშობლები, სცემს პასუხს დირექტორობის მსურველთა კონკურსის ირგვლივ დასმულ კითხვებს, რომ არსად არ გამოკვეთილა არანაირი სამართალდარღვევა და ამ პროცესს უკმაყოფილება არ გამოუწვევია. თუ კონკრეტული პირები თვლიან, რომ დაირღვა მათი უფლებები, ამისთვის არსებობს სასამართლო, ასე ხდება ნებისმიერ დემოკრატიულ სახელმწიფოში. პირველები ვართ, ვინც დავიწყეთ სკოლების ავტონომიის ზრდაზე მუშაობა, ასე რომ მათი არგუმენტები ამ კუთხით მიუღებელია“,- განაცხადა ამილახვარმა.

საქართველოს ყოფილი პრემიერ-მინისტრი, პარლამენტის ყოფილი თავმჯდომარე ზურაბ ჟვანია თავისუფლების საპარლამენტო ორდენით დაჯილდოვდება, – ამის შესახებ პარლამენტის თავმჯდომარე შალვა პაპუაშვილმა დღეს ბიუროს სხდომაზე განაცხადა.

„მიმდინარე წლის 9 დეკემბერს სრულდება ზურაბ ჟვანიას დაბადებიდან 60 წლის იუბილე და პარლამენტში ვგეგმავთ, რომ ეს იუბილე აღვნიშნოთ. ზურაბ ჟვანია გახლდათ სამი მოწვევის პარლამენტის წევრი, ორი მოწვევის პარლამენტის თავმჯდომარე, საქართველოს პრემიერ-მინისტრი, მას დიდი ღვაწლი მიუძღვის საქართველოს პარლამენტარიზმის განვითარებაში. ფაქტობრივად, მან პარლამენტი აქცია ისეთ ინსტიტუციად, სადაც კანონშემოქმედების სისტემატიზაცია და ასევე პარლამენტის საზედამხედველო ფუნქციების გაძლიერება მოხდა”, -განაცხადა შალვა პაპუაშვილმა.

მინდა, მივმართო კახი კალაძეს, გავიდეთ ქალაქში და გავარკვიოთ, რას ფიქრობს ხალხი ჩემზე და შენზე. ჩვენ საზოგადოებრივი ტრანსპორტის კოლაფსი გვაქვს, რაც გამოწვეულია კორუფციული ქმედებებით, – ასე გამოეხმაურა „სტრატეგია აღმაშენებლის“ თავმჯდომარე გიორგი ვაშაძე თბილისის მერის, კახი კალაძის განცხადებას.

საუბარია განცხადებაზე, სადაც კახა კალაძემ აღნიშნა: „გიორგი ვაშაძე არის დეგრადირებული, გაქსუებული პოლიტიკოსი. მას ჰგონია, ისევ ის წლებია, როდესაც ყალბ პირადობის მოწმობებს ბეჭდავდნენ, ვერ მოიშალა ტყუილების თქმა“.

ვაშაძის განცხადებით, „სისტრას“ დოკუმენტში კონკრეტულად არის განმარტებული, რომ, „ბასლაინთან“ ერთად, სულ მცირე, ორი სამანქანო ზოლი უნდა იყოს.

„მინდა, მივმართო კახი კალაძეს, მე ნამდვილად ვერ აგყვები უზრდელობაში, რადგან არ მგონია, ეს არის ის სტანდარტი, რითიც პოლიტიკაში უნდა მოქმედებდე. კახი, იმისთვის, რომ გავარკვიოთ, რას ფიქრობს ხალხი ჩემზე და შენზე, გთავაზობ, როცა შენ გინდა, დღეს ან ხვალ, ექვს საათზე გავიდეთ ქალაქში, დავდგეთ იმ ადგილზე, სადაც შექმენი მართლაც სატრანსპორტო კოლაფსი. თუ გინდა, ჩავსხდეთ საზოგადოებრივ ტრანსპორტში, თუ გინდა გავესაუბროთ ხალხს და გავარკვიოთ, რას ფიქრობენ თბილისში მცხოვრებლები შენზე და ჩემზე. მგონი, კარგი იქნება, შენივე ყურით მოისმინო, რა წარმოდგენის არის ხალხი შენზე. უზრდელობა კი უვიცების მახასიათებელია და უვიცობაში ნამდვილად ვერ შეგეჯიბრები ვერცერთ შემთხვევაში.

რაც შეეხება თბილისში არსებულ სატრანსპორტო კოლაფსს, რომელსაც უნდა დავარქვათ „კალაძის საცობები“, რომელიც არის საზოგადოებრივ ტრანსპორტში, ასევე მანქანებით გადაადგილების დროს, კითხვა არ გიყვარს, ამიტომ წამოგიღე ფოტო, რომელიც „სისტრამ“ გააკეთა და მოგცა რეკომენდაცია. აქ ძალიან კონკრეტულად არის ნათქვამი, რომ ორი სამანქანო ზოლი უნდა იყოს და ე.წ. ბასლაინი. რომელი ქუჩა შეესაბამება ამ ვერსიას? ფოტოს გაჩვენებ, რადგან კითხვა არ გიყვარს ან არ იცი. წაგიკითხავ „სისტრას“  რეკომენდაციას, რომელიც ოფიციალურ დოკუმენტაციაშია მოცემული: „მინიმალური შეზღუდვა სამანქანო მოძრაობისთვის – ყოველთვის შესაძლებელი უნდა იყოს, სულ მცირე, ორი სამანქანო ზოლი თითოეული მიმართულებით“. სად არის ეს ჭავჭავაძეზე, ქეთევან წამებულსა და წერეთელზე ან სხვა მიმართულებებზე, სადაც „ბასლაინებს“ აკეთებთ? „ბასლაინების“ წინააღმდეგი კი არ ვართ, პირიქით, მომხრე ვართ, რომ საზოგადოებრივი ტრანსპორტი იყოს გამართული, რასაც სისტემური მიდგომა სჭირდება. კახი, 2017 წელს შენთან ერთად დებატებში ვიდექი, სადაც ვამბობდი, რომ ქალაქს სჭირდება სისტემური, სწორი მენეჯმენტი, მართვა, რათა კოლაფსი არ იყოს ქალაქში. დღეს კოლაფსი გვაქვს საზოგადოებრივ ტრანსპორტში, სამშენებლო სექტორში, რაც გამოწვეულია შენი კორუფციული ქმედებებით. ქუჩაში ხალხთან თუ არ გამომყვები, ნებისმიერ დროს მზად ვარ, შენთვის სასურველ ტელეარხზე, მაგალითად, „იმედზე“, „რუსთავი 2“-ზე, სადაც შენ თავს კომფორტულად გრძნობ, დავსხდეთ და ხალხის თვალწინ გავარჩიოთ ყველა რეკომენდაცია, როგორ უნდა იმართებოდეს სატრანსპორტო პოლიტიკა ქალაქში“, – განაცხადა ვაშაძემ.

რაც შეეხება „კამარა ჰესს“, როგორც ვიცი, დიალოგის პროცესია, რომელიც უნდა შედგეს მოსახლეობასთან. თუ იქნება მხარდაჭერა მოსახლეობის მხრიდან, პროექტი განხორციელდება, – ამის შესახებ საქართველოს ეკონომიკისა და მდგრადი განვითარების მინისტრმა ლევან დავითაშვილმა განაცხადა.

მისივე თქმით, მიუხედავად იმისა, რომ სახელმწიფო ენერგეტიკის განვითარებას მხარს უჭერს, შესაძლოა, ყველა პროექტი არ განხორციელდეს.

„რა თქმა უნდა, ენერგეტიკის განვითარებას მხარს ვუჭერთ, ძალიან მნიშვნელოვანია, მაგრამ ყველა პროექტი შეიძლება ვერ განხორციელდეს. შესაძლოა, ბევრი საკითხი გარკვეულ შემთხვევებში ეკონომიკურად მიზანშეწონილი იყოს, მაგრამ გარემოსდაცვით მიზანშეწონილობაში სხვადასხვა ტიპის პრობლემა იყოს. რაც შეეხება „კამარა ჰესს“, როგორც ვიცი, დიალოგის პროცესია, რომელიც უნდა შედგეს მოსახლეობასთან. თუ იქნება მხარდაჭერა მოსახლეობის მხრიდან, პროექტი განხორციელდება. ეს ინვესტორის პასუხისმგებლობაა, ინვესტორმა თავის დროზე მიიღო გადაწყვეტილება, რომ მონაწილეობა მიეღო კონკურსში. როდესაც საუბარია მოსახლეობასთან ურთიერთობებზე, არის სოციალური საკითხები, კომპენსაციის საკითხები, ეკონომიკური საკითხები და ასე შემდეგ. თუ ინვესტორი თვლის, რომ მას ახალი პაკეტით შეუძლია უფრო მეტი შესთავაზოს მოსახლეობას და მხარდაჭერა ჰქონდეს, ამას მივესალმებით, თუმცა, ჰესი აშენდება თუ ამ ნაწილში კონსენსუსი იქნება“,- აღნიშნა დავითაშვილმა.