Home Blog Page 1679

ექიმი თავის საქმეს სიყვარულით უნდა ემსახურებოდეს!

აკაკი ნადარეიშვილი – პროფესორი, მედიცინის მეცნიერებათა დოქტორი,კლინიკური მედიცინის სამეცნიერო-კვლევითი ინსტიტუტის ურორადიოლოგი,თავის სფეროს გამორჩეული და პროფესიონალი სპეციალისტია. ის ქართული მედიცინის ძველ და გამორჩეულ მედიკოსთა რიცხვს მიეკუთვნება და დღემდე ამ პლეადის გამორჩეულ ექიმად ითვლება. წელს ბატონ აკაკი ნადარეიშვილს მედია-ჯგუფის ოქროს ვარსკვლავი გადაეცა , ქართულ მედიცინაში შეტანილი წვლილისთვის. ის მართლაც საამაყო ექიმია ქართული მედიცინის ისტორიაში.

ბიოგრაფია: აკაკი ნადარეიშვილმა უმაღლესი სამედიცინო განათლება 1962-1968 წლებში მიიღო თბილისის სახელმწიფო სამედიცინო ინსტიტუტის სამკურნალო ფაკულტეტზე. უროლოგიაში 1971 წელს გაიარა კიევის ექიმთა დახელოვნების ინსტიტუტში.1972-1974 წლებში მოსკოვის ი.სეჩენოვის სახელობის სამედიცინო ინსტიტუტის უროლოგიის კათედრაზე გაიარა ორდინატურის სრული კურსი.1981 წლიდან ამავე კლინიკის ონკოუროლოგიური განყოფილების ხელმძღვანელი გახლდათ.1985 წელს დაიცვა საკანდიდატო დისერტაცია.

მოსკოვში ნაყოფიერი მუშაობისა და უდიდესი გამოცდილების შემდეგ 1990 წელს, აკაკი ნადარეიშვილი სამშობლოში დაბრუნდა და დაინიშნა ახლად დაარსებულ მეცნიერებათა აკადემიის სამეცნიერო-კვლევითი ინსტიტუტის დირექტორის მოადგილედ სამეცნიერო დარგში. პარალელურად ხელმძღვანელობს საქართველოში პირველად შექმნილ ულტრაბგერით განყოფილებას. 1997 წელს დაიცვა სადოქტორო დისერტაცია. 2000წელს მიენიჭა პროფესორის წოდება. აკაკი ნადარეიშვილი ნაყოფიერად მოღვაწეობს სამეცნიერო სფეროშიც -გახლავთ 150-ზე მეტი სამეცნიერო ნაშრომის,10-ზე მეტი რაციონალიზატორული წინადადების ავტორი და საპატიო სიგელის მფლობელი სასარგებლო მოდელზე. ამავე დროს საქართველოს რადიოლოგთა გამგეობის,ევროპის რადიოლოგთა და უროლოგთა ასოციაციების და ECR და RSNA-ს წევრია. მისი ხელმძღვანელობით ასზე მეტი ახალდამთავრებული ექიმი დაეუფლა რადიოლოგიის სპეციალობას და ათზე მეტი ახალგაზრდა რადიოლოგმა დაიცვა დისერტაცია მედიცინის მეცნიერებათა კანდიდატის მოსაპოვებლად.

2000 წლიდან არის სამეცნიერო აკადემიის რადიოლოგიური კათედრის პროფესორი. 2018წელს მიენიჭა ღირსების ორდენი. 2022 წელს კი თბილისის საპატიო მოქალაქედ დასახელდა.

აკაკი ნადარეიშვილი: “ექიმი თავისი საქმის პროფესიონალი უნდა იყოს. უყვარდეს თავისი პროფესია და პაციენტი. მე ავირჩიე ისეთი პროფესია, რომელსაც უნდა ემსახურებოდე ერთგულად და ბოლომდე. ზოგადად, მიმაჩნია, რომ ცხოვრებაში მთავარია ადამიანებს შორის სიყვარული – ყველა საქმეს სიყვარულით უნდა ემსახურებოდე”.

“რუსული ბოროტება შეიძლება შეჩერდეს სანქციებით” – ვოლოდიმირ ზელენსკი

უკრაინის პრეზიდენტის, ვოლოდიმირ ზელენსკის განცხადებით, რუსეთის წინააღმდეგ გლობალური სანქციები უნდა გამკაცრდეს. ამის შესახებ ზელენსკი „ტვიტერზე“ წერს.

ზელენსკიმ განაცხადა, რომ რუსული ბოროტების შეჩერება იარაღით არის შესაძლებელი და ამას უკრაინელი მებრძოლები აკეთებენ, მაგრამ ამასთან ერთად, აუცილებელია, საერთაშორისო თანამეგობრობამ გააძლიეროს რუსეთის წინააღმდეგ სანქციები.

„ტერორის კიდევ ერთი ღამე. რაკეტები და უპილოტო საფრენი აპარატები. რუსეთის სარაკეტო დარტყმების შედეგად უმანში დაზიანდა ათი საცხოვრებელი კორპუსი. ერთ-ერთი კორპუსი მთლიანად დაინგრა. რუსული ბოროტება შეიძლება შეჩერდეს სანქციებით. გლობალური სანქციები უნდა გამკაცრდეს“, – წერს ვოლოდიმირ ზელენსკი.

ღამის განმავლობაში რუსეთის მიერ სარაკეტო თავდასხმის შედეგად, უკრაინის ქალაქ უმანში სულ მცირე 14, ხერსონისა და ხარკოვის რეგიონში კი სამი ადამიანი დაიღუპა.

„ბუშმა ავღანეთში მახინჯი სიტუაცია შექმნა, ბაიდენი კი მას უკრაინაშიც ახორციელებს“

„ჯო ბაიდენი უკრაინაში ჯორჯ ბუშ-უმცროსის პოლიტიკის ასლის რეალიზებას ახდენს, – ნათქვამია ამერიკული გაზეთ „ვაშინგტონ თაიმსში“ (The Washington Times) გამოქვეყნებულ სტატიაში სათაურით „ჯორჯ ბუშმა ავღანეთში მორალურად მახინჯი სიტუაცია შექმნა, ჯო ბაიდენი კი მას უკრაინაშიც ახორციელებს“ (ავტორი – ენდრიუ ნაპოლიტანო, Fox News-ის პოლიტიკური მიმომხილველი).

ბოლო 20 წლის განმავლობაში იმპერიის გაფართოების მცდელობის სამარცხვინო ჩაშლა, რომელიც ავღანეთთან მიმართებით გამოიხატა – ეს არის ის გაკვეთილი, რომელიც აშშ-ის ხელისუფლებამ ვერა და ვერ აითვისა. ეს კატასტროფა იმ დროს დაიწყო, როცა ჯორჯ ბუშ-უმცროსმა, რომელიც ძალიან გაღიზიანებული იყო საყვედურებით, რომ მან არ დაუჯერა დაზვერვის ცნობებს და შესაძლებლობა მისცა ტერორისტებს 2001 წლის 11 სექტემბერს თავიანთი გეგმა განეხორციელებინათ – დაარწმუნა როგორც ამერიკელი ხალხი და კონგრესი, ასევე ნატოელი მოკავშირეებიც იმაში, რომ ავღანელი მმართველებისათვის ჭკუა ესწავლებინა – განურჩევლად იმისა, ისინი იყვნენ დამნაშავენი ტერაქტის მოწყობაში თუ არა.

ჩვენმა მთავრობამ ამორალური კამპანია დაიწყო შურისძიებისათვის, თანაც ისეთი სახით, თითქოსდა ავღანელებს მათთვის საძულველი რეჟიმისაგან ათავისუფლებდა, სინამდვილეში კი საქმე ამერიკულ ქედმაღლობას უკავშირდებოდა.
აი, როგორ დაიწყო ყველაფერი:

11 სექტემბრის ტერაქტების შემდეგ ჯორჯ ბუშისათვის ცნობილი გახდა, რომ ისინი მომზადდნენ აშშ-ის მეგობრების მიერ, განსაკუთრებით კი საუდის არაბეთის მიერ. მაგრამ პრეზიდენტმა გადაწყვიტა ყველაფერი ავღანეთისთვის დაებრალებინა და ქვეყანაში ჯარი შეიყვანა, ამოხოცა მოსახლეობის მნიშვნელოვანი ნაწილი. ამით ვაშინგტონმა თითქოსდა მთელ მსოფლიოს დაანახა და გააფრთხილა – „ჩვენთან ხუმრობას არავის არ გირჩევთ, იცოდეთ, სამაგიეროს აუცილებლად მიიღებთო“.

ჯორჯ ბუშ-უმცროსის იმპულსური რეაქცია და მზადყოფნა იმისთვის, რომ გამოეყენებინა ამერიკელების შიში, დასაბამი მისცა მოვლენათა სერიას, რომლის კულმინაცია პირიქით – იმ მსოფლმხედველობის ტრიუმფი გახდა, რომლის განადგურებას ჯორჯ ბუში და მისი არმია ცდილობდა და რომლისთვისაც ორი ტრილიონი დოლარი დახარჯა.
საერთაშორისო საზოგადოება რომ მის სასარგებლოდ განწყობილიყო, ჯორჯ ბუშმა ისტორიის გამოწვევა სცადა და განაცხადა, რომ ავღანეთში დასავლური სახის დემოკრატიას დაამყარებდა. ამით მან თავის თავში ვუდრო ვილსონი იპოვა – აშშ-ის პრეზიდენტი, რომელიც პირველი მსოფლიო ომის დროს აცხადებდა, რომ ზოგჯერ უდანაშაულო ადამიანების სიკვდილი აუცილებელია, „მსოფლიო დემოკრატიული და უსაფრთხო რომ გახდესო“.

განა ჯორჯ ბუშ-უმცროსმა არ იცოდა, რომ მე-19 საუკუნეში ათი ათასობით ბრიტანელი ჯარისკაცი დაიღუპა ავღანეთში? განა არ იცოდა მან მე-20 საუკუნეში ასი ათასობით საბჭოთა ჯარისკაცის დაღუპვა იმავე ავღანეთში, რომლებმაც თანამედროვე იარაღის გამოყენებითაც კი ვერ შეძლეს ამ ღარიბი და მკაცრი ხალხის ნებისყოფის გატეხა და კულტურის შეცვლა?

ჯორჯ ბუშის გამბიტი მისი არაკომპეტენტურობის დადასტურებას წარმოადგენდა, რომელიც შემდეგ ბარაკ ობამამ გააგრძელა. ეს იყო აშშ-ის ერთ-ერთი ყველაზე მცდარი საგარეო პოლიტიკური გადაწყვეტილება ქვეყნის თანამედროვე ისტორიაში.

2016 წლის საპრეზიდენტო კამპანიის დროს დონალდ ტრამპმა თავისივე რესპუბლიკურ პარტიაში განხეთქილება გამოიწვია, როცა ავღანეთის ომი დაგმო და ამერიკელი ჯარისკაცების სამშობლოში დაბრუნების გეგმა გამოაცხადა. დონალდ ტრამპს, ალბათ, კეთილი განზრახვა ჰქონდა – ამერიკელები უკვე ომით ძალიან დაღლილები იყვნენ, მაგრამ მან ეს საკითხი, მიუხედავად იმისა, რომ თალიბებთან მოლაპარაკება დაიწყო, მაინც ბოლომდე ვერ მიიყვანა. სამაგიეროდ, ჯო ბაიდენმა „კარგად“ დააბოლოვა – იმის კვალობაზე, რომ აშშ-ის ჯარს წინააღმდეგობის გაწევა აღარ შეეძლო და იმის იმედად, რომ ავღანეთის პროამერიკულ ხელისუფლებას უამრავ იარაღს უტოვებდა თავდაცვისათვის, სასწრაფოდ დაიწყო ამერიკელების გამოყვანა ავღანეთიდან, რის შედეგადაც ხელისუფლება დაირღვა, ამერიკელების მიერ გაწვრთნილი ავღანეთის სახელისუფლებო არმია დაიშალა და ძალაუფლება ისევ თალიბებმა დაიბრუნეს. ყველას ახსოვს, თუ რა საშინელება სუფევდა ქაბულში იმ დროს.

შეუძლიათ თუ არა პრეზიდენტებს ადამიანების მოკვლა, როცა მათ მოესურვებათ – ეროვნული უშიშროების ან იმპერიის გაფართოების სახელით? მოკლედ, რომ ვთქვათ, არა.

მაგრამ ამერიკის პრეზიდენტები იმპერიის მშენებლობით ჯერ კიდევ იმ დროიდან იყვნენ დაკავებულები, როცა თომას ჯეფერსონი ნაპოლეონ ბონაპარტს ლუიზიანას ყიდვაზე შეუთანხმდა, თუმცა, ვუდრო ვილოსნის, ჯორჯ ბუშისა და ჯო ბაიდენისაგან განსხვავებით, თომას ჯეფერსონმა ეს ძალადობისა და სისხლისღვრის გარეშე გააკეთა.
ამერიკის იმპერიის თანამედროვე მშენებლები დარწმუნებულები არიან იმაში, რომ ადამიანების მოკვლა შეუძლიათ. ჯორჯ ბუში ამტკიცებდა, რომ მას ამის უფლებამოსილება აქვს. ჯო ბაიდენი რუსეთის წინააღმდეგ გამოუცხადებელ ომს აწარმოებს – თალიბების წინააღმდეგ კი არა, ბირთვული სახელმწიფოს წინააღმდეგ. ჯო ბაიდენი უკრაინაში ომს აგრძელებს იმის მიუხედავად, რომ ამერიკელი სამხედროები თვლიან – ამ ომში გამარჯვება შეუძლებელია. საინტერესოა, რისი იმედი აქვს ბაიდენს, როცა აშშ-მა მთელი 20 წლის განმავლობაში ავღანელი მწყემსების არმია ვერ გაანადგურა და ახლა მსოფლიოში ერთ-ერთ ძლიერ არმიას იწვევს ბრძოლაში? თანაც ვაშინგტონიდან ხუთი ათასი კილომეტრის მოშორებით. რისთვის? როგორც ჩანს, იმპერიის განდიდებისათვის.

სწორედ იმპერიის სახელით კლავს ამერიკის ხელისუფლება ადამიანებს უკრაინის ომში. ეს დანაშაულია, რადგან ვინც არ უნდა იყოს – ამერიკელი, უკრაინელი თუ რუსი, ყველას აქვს სიცოცხლის უფლება.

ავღანეთის გაკვეთილი ის გაფრთხილებაა, რომელსაც ჯო ბაიდენი იგნორირებას. ჯორჯ ნუშის მსგავსად, იფი არფიქრობს ადამიანების დაღუპვასა და რესურსების ხარჯვაზე. მას სურს იმპერია გააფართოოს, რომ ისევ პრეზიდენტად აირჩიონ. იგივე სურდა ჯორჯ ბუშსაც, რომლის რეპუტაცია დღეს ისტორიის სანაგვეზეა. სავარაუდოდ, სულ მალე ჯო ბაიდენიც იქ აღმოჩნდება.

წყარო

“საქართველოს მთავრობა მზარდად მიდის ავტოკრატიისკენ” – ჯინ შაჰინი

აშშ-ის რადიო „ამერიკის ხმა“ (Voice of America) თავის ვებ-გვერდზე აქვეყნებს სტატიას სათაურით „ჯინ შაჰინი: „საქართველოს მთავრობა მზარდად მიდის ავტოკრატიისკენ”, რომელშიც გარკვეული კრიტიკაა გამოთქმული საქართველოს ხელისუფლების მიმართ.

გთავაზობთ პუბლიკაციის სრულ ტექსტს:

დემოკრატი სენატორი ჯინ შაჰინი, რომელიც ბოლო თვეების განმავლობაში საქართველოში რამდენჯერმე იმყოფებოდა და შეხვედრები გამართა სამოქალაქო საზოგადოების, ოპოზიციისა და ხელისუფლების წარმომადგენლებთან ამბობს, რომ საქართველოში დემოკრატიასა და ავტორიტარიზმს შორის ბრძოლა მიმდინარეობს. მას მიაჩნია, რომ საქართველოს ხელისუფლება ავტოკრატიისკენ „მზარდად მიდის“.

„ერთ-ერთი ქვეყანა, სადაც მიმდინარეობს შიდა ბრძოლა ავტოკრატიასა და დემოკრატიას შორის არის საქართველო, სადაც აშკარად ჩანს, რომ საქართველოს მოსახლეობას სურს დასავლეთისკენ, ევროპისკენ გაიხედოს. მათ სურთ დემოკრატია. მე და სენატორი რიში იქ ვიმყოფებოდით 2012 წელს, რათა დავკვირვებოდით არჩევნებს, როდესაც ქვეყანაში “ქართული ოცნება” ხელისუფლებაში მოვიდა. [ახლა] რაც ჩვენ ვიხილეთ, ის არის, რომ საქართველოს მთავრობა მზარდად მიდის ავტოკრატიისკენ,“- ამბობს სენატორი შაჰინი დემოკრატიული პარტიიდან ამერიკის სენატის საგარეო ურთიერთობათა კომიტეტის სხდომაზე.

ჯინ შაჰინმა დასვა კითხვა იმის შესახებ, არის თუ არა შესაძლებელი საქართველოში, 2024 წლის საპარლამენტო არჩევნებისთვის გრძელვადიანი სადამკვირვებლო მისიის გაგზავნა. სხდომაზე ამერიკელი კანონმდებლები USAID-ის ხელმძღვანელს სამანტა პაუერს უსმენდნენ.

„ერთ-ერთი განმსაზღვრელი შესაძლებლობა იქნება მოახლოებული არჩევნები 2024 წელს. ჩვენ გვექნება კრიტიკული როლი და მხარს დავუჭერთ ამ არჩევნებს და გავგზავნით დამკვირვებლებს არჩევნებზე. შეგიძლიათ ისაუბროთ იმაზე, თუ რამდენად მნიშვნელოვანი იქნება ეს და ფიქრობს, თუ არა „იუესეიდი“ გრძელვადიანი სადამკვირვებლო მისიის გაგზავნას საქართველოს მხარდასაჭერად?”- იკითხა ჯინ შაჰინმა.

ამერიკელი სენატორის სულისკვეთება გაიზიარა სხდომაზე მყოფმა USAID-ის ხელმძღვანელმა სამანტა პაუერმაც, რომელმაც თქვა, რომ საქართველოში ბოლო დროს განვითარებული მოვლენები „უკიდურესად შემაშფოთებელია“.

„მე ჯერ არ ვიცი როგორი იქნება ეს პროგრამა, მაგრამ მთელი გულით გეთანხმებით, რომ თავდასხმები სამოქალაქო საზოგადოებაზე, ზოგიერთი კანონი, რომელიც დარეგისტრირდა ბოლო დროს უკიდურესად შემაშფოთებელია. მეორეს მხრივ, ეს უკანდახევა გვაჩვენებს სამოქალაქო საზოგადოების და მოქალაქეების სიძლიერეს საქართველოში, რათა გაამყარონ საკუთარი კურსი ან განახორციელონ საკუთარი დემოკრატიული მისწრაფებები. მაგრამ ვფიქრობ, ჩვენ ფართოდ უნდა მივმართოთ რესურსები არჩევნებისკენ, რადგან ეს არის შემდეგი რეალური შესაძლებლობა მოქალაქეებისთვის გააგონონ მათი ხმა. და მე ვფიქრობ, რომ ეს მოიცავს როგორც მოკლევადიან, ასევე გრძელვადიან სადამკვირვებლო მისიებს,“- თქვა USAID-ის ხელმძღვანელმა, რასაც სენატორი შაჰინი დაეთანხმა და აღნიშნა, რომ ამერიკის სენატის საგარეო ურთიერთობათა კომიტეტი ამ ინიციატივის მხარდამჭერი იქნება.

სხდომაზე, სადაც საქართველოს შესახებ ერთადერთი კითხვა დაისვა, ორ საათზე მეტ ხანს მიმდინარეობდა. შეხვედრაზე განიხილებოდა ამერიკის მთავრობის ბიუჯეტის საკითხები და 2024 წლის გეგმები.

მოსმენაზე საუბარი შეეხო ყარაბაღში არსებული ვითარებას და სუდანში მიმდინარე პროცესებს. განსახილველ მთავარ საკითხებს შორის იყო მსოფლიოს სხვადასხვა ქვეყანაში ჩინეთისა და რუსეთის ქმედებებიც.

წყარო

“მოლდოვა, როგორც ქვეყანა აღარ არსებობს”- დიმიტრი მედვედევი

რუსეთის უშიშროების საბჭოს თავმჯდომარის მოადგილის, დიმიტრი მედვედევის განაცხადებით, რუსეთის მიერ მოლდოვის ამჟამინდელ ლიდერებთან მოლაპარაკებებს აზრი არ აქვს, რადგან მოლდოვა, როგორ ქვეყანა აღარ არსებობს.

„ასეთი ქვეყანა აღარ არსებობს. ადგილობრივმა ბოსებმა ის რუმინეთს მიყიდეს, უღალატეს რა თავიანთ სამშობლოს და მათთან რაიმეზე ლაპარაკს აზრი არ აქვს“, – აღნიშნა მედვედევმა.

მან ეს განცხადება მას შემდეგ გააკეთა, რაც მოლდოვის პრემიერ-მინისტრმა, დორინ რეჩანმა გუშინ განაცხადა, რომ მთავრობა რუსეთის პრეზიდენტს, ვლადიმერ პუტინს ქვეყანაში შესვლა ეკრძალება.

რეჩანის თქმით, მოლდოვას აქვს რუსეთის მოქალაქეების შავი სია, რომელთაც არ აქვთ ქვეყანაში შესვლის უფლება.

„რაღაც მომენტში გავაკეთებთ საჯარო სიას, თუმცა ამ მომენტისთვის საკმარისია ის მექანიზმი, რაც დღეს გვაქვს. ზოგიერთი ოფიციალური პირი ამ სიაში მხოლოდ მაშინ ხვდება, როცა მოლდოვაში შესვლას ცდილობს“, – აღნიშნა რეჩანმა.

მოლდოვის პრემიერ-მინისტრის განცხადებით,   მოლდოვაში არავინ შესულა ისეთი, ვინც ამას არ იმსახურებდა და მოლდოვა არ დაუშვებს ქვეყანაში მათ, ვინც „პროპაგანდას და ომს თესავს“.

„პირველი კვარტლის მონაცემებით საერთაშორისო ტურიზმიდან შემოსავლების რაოდენობამ რეკორდულ მაჩვენებელს მიაღწია“

საქართველოს ტურიზმის ეროვნული ადმინისტრაციის ხელმძღვანელი მაია ომიაძე 2023 წლის 3 თვის სტატისტიკურ მონაცემებს აჯამებს. მაია ომიაძის განცხადებით იანვარი-მარტის პერიოდში შემოსავლები საერთაშორისო ტურიზმიდან რეკორდულად გაიზარდა.

„ტურიზმის ეროვნული ადმინისტრაცია მუდმივად ახორციელებს სტრატეგიულ ბაზრებზე მარკეტინგულ კამპანიებს, რასაც ძალიან ბევრი ტურისტი შემოჰყავს ჩვენს ქვეყანაში, ეს თავისთავად აისახება შემოსავლების ზრდაზე. პირველი კვარტლის მონაცემებით შემოსავლების რაოდენობამ რეკორდულ მაჩვენებელს მიაღწია,“-აცხადებს მაია ომიაძე.

2023 წლის პირველ კვარტალში მოგზაურობიდან (ტურიზმიდან) მიღებული შემოსავლები, 2022 წლის ანალოგიური პერიოდთან შედარებით, 102%- ით არის გაზრდილი და 795 მლნ. აშშ დოლარს აჭარბებს.

2023 წლის პირველ კვარტალში ტურიზმიდან მიღებულმა შემოსავლებმა 2019 წლის დონეს 37.5 %-ით გადააჭარბა.

ტურიზმიდან მიღებული შემოსავლები  2023 წლის პირველ კვარტალში 64.7%-ით გაიზარდა ევროკავშირიდან, 136.1%-ით  გაიზარდა  თურქეთიდან,  73.2%  ზრდა დაფიქსირდა ისრაელიდან და ა.შ.

2023 წლის 1 კვარტალში,  მოგზაურობიდან  მიღებული შემოსავლების მაღალი მაჩვენებლებით აღსანიშნია რამდენიმე ქვეყანა, მათ შორის ევროკავშირი, თურქეთი,  ისრაელი,  სომხეთი და სხვა, ამავე პერიოდში, 2019 წელთან შედარებით, ტურიზმიდან შემოსავლების აღდგენის დონით ასევე გამოირჩევა ევროკავშირი, ისრაელი, საუდის არაბეთი და სხვა სახელმწიფოები.

“ძალიან ადრეა საარჩევნო გაერთიანება-კოალიციებზე საუბარი”

ძალიან ადრეა საარჩევნო გაერთიანება-კოალიციებზე საუბარი, არც კონსულტაციები გვქონია, რომ უკვე მზა პასუხები მქონდეს ამასთან დაკავშირებით, – ამის შესახებ „ნაციონალური მოძრაობის“ გენერალურმა მდივანმა, პეტრე ცისკარიშვილმა ოპოზიციური პარტიების მოსალოდნელ გაერთიანებასთან დაკავშირებით ჟურნალისტის კითხვის პასუხად განაცხადა.

„დღესაც გვქონდა ჩვენს კოლეგებთან ერთად ინტერაქციის, დისკუსიის დროს პოლონეთის საგარეო საქმეთა მინისტრ ზბიგნევ რაუსთან საუბარი იმასთან დაკავშირებით, რომ აუცილებელია ოპოზიციის კოორდინირებული მოქმედება. იგივე ჩვენი დასავლელი პარტნიორების ჩართულობაც ამ საკითხში, რომ შემდეგი არჩევნები მაქსიმალურად სამართლიანად ჩატარდეს და იყოს თავისუფალი საარჩევნო გარემო. არ იყოს წინა თვეებში სუს-ის, პროკურატურის მხრიდან ამომრჩეველზე ზეწოლა, რომ ან დაგიჭერ, ან სამსახურიდან გაგათავისუფლებ“, – განაცხადა პეტრე ცისკარიშვილმა.

ცისკარიშვილის თქმით, ოპოზიციის გაერთიანებასთან დაკავშირებით პარტიაში გადაწყვეტილება არ აქვთ მიღებული.

„არა, ამასთან დაკავშირებით გადაწყვეტილება არ გვაქვს მიღებული, მაგრამ მინიმიზაცია რომ უნდა მოვახდინოთ იმ ზიანის, რაც შეიძლება, „ოცნებამ“ მოუტანოს შემდეგი თვეების განმავლობაში საქართველოს და საარჩევნო პროცესი ისევ ისეთი გაყალბებული და არასანდო არ იყოს, როგორიც წინა არჩევნებზე, ამასთან დაკავშირებით, რა თქმა უნდა, ვართ ერთიანი და კოორდინირებულად უნდა ვიმუშაოთ“, – განაცხადა ცისკარიშვილმა.

ამასთან, მისივე თქმით, „ვადამდელ არჩევნებს ოპოზიცია კი არა, მოითხოვს ქართველი ხალხი, ის პოლიტიკური ვითარება, წნევა და ინერცია, რომელიც აქედან გამომდინარე შეიქმნება“.

„ეს მოითხოვს ვადამდელ არჩევნებს და ძალიან ლოგიკური გაგრძელებაც იქნება იმ შემთხვევაში, თუ ჩვენ კანდიდატის სტატუსს ვერ მივიღებთ, ცხადიც იქნება, რატომაც ვერ მივიღებთ, რადგან ამ მტავრობამ, მიუხედავად ქართველი ხალხის მისწრაფებისა, პოლიტიკური ნებისა, არ განახორციელა ის რეფორმები, რომელიც აუცილებელი იყო ამ სტატუსის მისაღებად“, – განაცხადა პეტრე ცისკარიშვილმა.

აგვისტოს ომის საქმე – სტრასბურგმა რუსეთს საქართველოსთვის 130 მილიონამდე ევროს გადახდა დააკისრა

სტრასბურგის სასამართლოს რუსეთის ფედერაციას წინააღმდეგ კიდევ ერთი გამამტყუნებელი განაჩენი გამოიტანა.

ადამიანის უფლებათა ევროპულმა სასამართლომ რუსეთს შესაბამისი კომპენსაციები დააკისრა, რაც 129 827 500 ევროს ოდენობით განისაზღვრა.

სტრასბურგის სასამართლოს ოფიციალური ინფორმაციით, რუსეთს 2008 წელს საქართველოში შეჭრის შედეგად მოქალაქეების მიმართ მიყენებული დარღვევებისა და ზარალისთვის საქართველოსთვის კომპენსაცია სამი თვის ვადაში უნდა გადაეხადა.

ევროპის სასამართლოს დიდმა პალატამ 2008 წლის ომთან დაკავშირებით საქართველოს სარჩელის შესახებ სამართლიანი კომპენსაციის ნაწილთან მიმართებაში დამატებითი გადაწყვეტილება მიიღო ევროპული კონვენციის 41-ე მუხლის მიხედვით, რომელიც არ იყო გათვალისწინებული 2021 წლის მთავარი გადაწყვეტილებით. სასამართლოს დადგენილების მიხედვით, მას აქვს იურისდიქცია, განიხილოს საქართველოს მოთხოვნა კომპენსაციის თაობაზე, მიუხედავად იმისა, რომ რუსეთი ევროსაბჭოდან 2022 წელს გააძევეს და რუსულმა მხარე არ ითანამშრომლა სასამართლოსთან საკითხის განხილვისას.

სასამართლომ დაადგინა, რომ კონვენციის 41-ე მუხლი გამოიყენებოდა წინამდებარე საქმეზე სამხრეთ ოსეთის ქართულ სოფლებში და „ბუფერულ ზონაში“ მშვიდობიანი მოსახლეობის მკვლელობის ადმინისტრაციული პრაქტიკის მსხვერპლთა მიმართ. ასევე, „ბუფერულ ზონაში“ სახლების გადაწვისა და გაძარცვის ადმინისტრაციული პრაქტიკის, არაადამიანური და ღირსების შემლახველი მოპყრობის ადმინისტრაციული პრაქტიკის და ქართველი მშვიდობიანი მოქალაქეების თვითნებური დაკავების მსხვერპლთა მიმართ „სამხრეთ ოსეთის ძალების“ მიერ „სამხრეთ ოსეთის შინაგან საქმეთა სამინისტროს“ სარდაფში, ცხინვალში დაახლოებით 2008 წლის 10-27 აგვისტოს პერიოდში. ასევე, 2008 წლის 8-17 აგვისტოს ცხინვალში სამხრეთ ოსეთის ძალების მიერ დაკავებული ქართველი სამხედრო ტყვეების წამების ადმინისტრაციული პრაქტიკის მსხვერპლთა, ე.წ. სამხრეთ ოსეთსა და აფხაზეთში საქართველოს მოქალაქეებისთვის საკუთარ სახლებში დაბრუნების აღკვეთის ადმინისტრაციული პრაქტიკისა და მოპასუხე სახელმწიფოს მსხვერპლთა მიმართ, პროცედურულ ვალდებულების შეუსრულებლობისთვის, ჩაეტარებინა სათანადო და ეფექტური გამოძიება გარდაცვალების ფაქტებზე, რომელიც მოხდა საომარი მოქმედებების აქტიურ ფაზაში ან საომარი მოქმედებების შეწყვეტის შემდეგ.

სტრასბურგის სასამართლო ადგენს, რომ მოპასუხე სახელმწიფოს სამი თვის განმავლობაში უნდა გადაეხადა მომჩივანი სახელმწიფოს სასარგებლოდ 3 250 000 ევრო არამატერიალური ზიანისთვის, რომელიც განიცადა სულ მცირე 50-მა ადამიანმა ე.წ. სამხრეთ ოსეთის ქართულ სოფლებში მშვიდობიანი მოსახლეობის მკვლელობის შედეგად „ბუფერულ ზონაში“; ასევე, მოპასუხე მთავრობის მიერ თავისი პროცედურული ვალდებულების შეუსრულებლობის გამო, ჩაეტარებინა ადეკვატური და ეფექტური გამოძიება ამ მკვლელობებზე. სასამართლო ადგენს, რომ მოპასუხე სახელმწიფოს უნდა გადაეხადა მომჩივანი მთავრობისთვის სამი თვის ვადაში 2 697 500 ევრო არამატერიალური ზიანის გამო, რომელიც განიცადა სულ მცირე 166-მა ადამიანმა, საქართველოს მოქალაქეების არაადამიანური და დამამცირებელი მოპყრობის ადმინისტრაციული პრაქტიკის და თვითნებური დაკავების შედეგად, ე.წ. სამხრეთ ოსეთის ძალების მიერ ცხინვალში, 2008 წლის 10-27 აგვისტოს პერიოდში.

სასამართლოს გადაწყვეტილებით, მოპასუხე სახელმწიფოს სამი თვის ვადაში უნდა გადაეხადა 640 000 ევრო არამატერიალური ზიანისთვის, რომელიც განიცადა ქართველი სამხედრო ტყვეების წამების ადმინისტრაციული პრაქტიკის მსხვერპლმა სულ მცირე 16-მა ადამიანმა. ევროპული სასამართლოს გადაწყვეტილებით, მოპასუხე სახელმწიფოს უნდა გადაეხადა მომჩივანი მთავრობისთვის სამი თვის ვადაში 115 000 000 ევრო არამატერიალური ზიანისთვის, სულ მცირე 23 000 ადამიანისთვის სახლში დაბრუნების აღკვეთის ადმინისტრაციული პრაქტიკის საფუძველზე, ე.წ. სამხრეთ ოსეთსა და აფხაზეთში.

სასამართლოს გადაწყვეტილებით, მოპასუხე სახელმწიფოს სამი თვის განმავლობაში მოსარჩელე ქვეყნისთვის უნდა გადაეხადა 8 240 000 ევრო მოპასუხე მთავრობის სულ მცირე 412 მსხვერპლისთვის პროცედურულ ვალდებულების შეუსრულებლობისთვის, ჩაეტარებინა სათანადო და ეფექტური გამოძიება გარდაცვალების ფაქტებზე, რომელიც მოხდა საომარი მოქმედებების აქტიურ ფაზაში ან საომარი მოქმედებების შეწყვეტის შემდეგ.

სასამართლოს გადაწყვეტილებით, ევროპული კონვენციის 58-ე მუხლის (დენონსაცია) იურისდიქციას ექვემდებარება აღსრულებულიყო გამსაჩივრებელი ქვეყნის, ანუ საქართველოს მოთხოვნა 41-ე მუხლზე, ანუ სამართლიან დაკმაყოფილებაზე, მიუხედავად იმისა, რომ რუსეთის ფედერაციამ ევროპის საბჭო დატოვა.

სასამართლოს გადაწყვეტილებით ადამიანის უფლებათა ევროპული კონვენციის 41-ე მუხლი (სამართლიანი დაკმაყოფილება) მისაღებია მოცემულ საქმეში ოკუპირებულ ცხინვალის ქართულ სოფლებსა და „ბუფერულ ზონაში“ მშვიდობიანი მოსახლეობის მიმართ ჩადენილი დანაშაულების მიმართ.

დანაშაულები მოიცავს სეპარატისტული ძალების მიერ მშვიდობიანი მოსახლეობის დახოცვას, მათი სახლების დაწვასა და გაძარცვას, დამცირებასა და არაადამიანურ მოპყრობას, ომის ტყვეთა წამებას, დევნილთა საკუთარ სახლებში დაბრუნებაზე წინააღმდეგობას.

ფოტოგრაფების საქმე- სასამართლომ პროკურატურას მორალური ზიანის ანაზღაურება დააკისრა

თბილისის საქალაქო სასამართლომ 2011 წლის 26 მაისის მოვლენების გაშუქებასთან დაკავშირებით ე.წ. ფოტოგრაფების საქმეზე საქართველოს პროკურატურას მორალური ზიანის ანაზღაურება დააკისრა.

გამამტყუნებელი განაჩენი ზურაბ ქურციკიძის, გიორგი აბდალაძის, ირაკლი გედენიძისა და ნათია გედენიძის მიმართ საბოლოოდ გაუქმდა. ამასთან, პროკურატურას მორალური ზიანის ანაზღაურება დაეკისრა.

წლების წინ ჯაშუშობის საქმეზე დაკავებულმა და დღეს უკვე გამართლებულმა ფოტოგრაფებმა, მედიაჰოლდინგ „კვირას“ პრესკლუბში გამართულ   პრესკონფერენცია გამართეს და საქმის დეტალებზე ისაუბრეს.

„ჩვენ შეტანილი გვქონდა მოთხოვნა მორალური ზიანის ანაზღაურების თაობაზე და გუშინ საქალაქო სასამართლომ მიიღო გადაწყვეტილება, რომლის მიხედვით, საქართველოს პროკურატურას დაეკისრა წინა რეჟიმის მიერ დარღვეული დანაშაულებებისთვის ჩვენთვის მორალური ზიანის ანაზღაურება. მინდა განვმარტო, რომ სამწუხაროდ, დღევანდელ პროკურატურას უწევს გადაიხადოს ვალები იმისთვის, თუ რა რეჟიმში მუშაობდა მაშინდელი პროკურატურა. განვმარტავ, რომ პროკურატურამ 2016 წელს ხელახალი გამოძიება დაიწყო და ამის შედეგად დადგა ჩვენი გამამართლებელი განაჩენი. ამ მხრივ, ჩვენი რეაბილიტაცია ჯერ კიდევ 2016 წლიდან დაიწყო და გუშინ სასიხარულო გადაწყვეტილებით დასრულდა. აქ არ აქვს მნიშვნელობა კონკრეტულ ციფრებს, მნიშვნელობა აქვს იმას, რომ ეს არის პირველი პრეცედენტი საქართველოს სამართალწარმოების ისტორიაში. ეს არის პირველად, როცა არ არსებობდა არანაირი მექანიზმი, შაბლონი, ქეისი, არანაირი მსგავსი, მორალური ზიანი არ ანაზღაურებულა. მით უმეტეს, ასეთი მუხლით, რომელიც ჩვენ მიმართ იყო წარდგენილი. ძალიან დიდი მადლობა ამ გადაწყვეტილებისთვის და ჩვენ ყოველთვის გვჯეროდა, რომ სამართალი ყოველთვის იზეიმებდა. ეს შედეგი ჩვენ უკვე სახეზე გვაქვს და ამას ხმამაღლა ვაცხადებთ, ყველგან ვიტყვით, რომ სამართალი ყოველთვის იზეიმებს იქ, სადაც ტრიალებს სიმართლე“, – განაცხადა ნათია გედენიძემ.

ე.წ. ფოტოგრაფების საქმეზე ბრალდება შეთითხნილი იყო, ჩვენი უდანაშაულობა დავამტკიცეთ, მივიღეთ მორალური და ფინანსური კომპენსაცია, სამართალი ყოველთვის, ყველა შემთხვევაში მოიგებს“, – აცხადებს გიორგი აბდალაძე.

„თითოეული თქვენგანისთვის ცნობილია, რომ ჩვენ ფოტორეპორტიორები ვართ. ზოგიერთი ჩვენგანი საერთაშორისო მედიის სააგენტოებში მუშაობდა. ჩვენ 26 მაისის აქციის დარბევის ამსახველი ფოტოები გადავიღეთ. სასამართლო პროცესების მსვლელობისას დადგინდა, რომ 26 მაისი ის ძირითადი მიზეზი იყო, რის გამოც ჩვენ წინა ხელისუფლებამ დაგვსაჯა, ჯაშუშების იარლიყი მოგვაყენა. უმძიმესი მუხლით გლდანის ციხეში გაგვიშვეს, სადაც ჩვენ ყოველდღიურად, ყოველწამიერად განვიცდიდით წნეხს, ფიზიკურ და ფსიქოლოგიურ ძალადობას, რასაც, რა თქმა უნდა, ბრძანების საფუძველზე ჩადიოდნენ. მაშინდელი ხელისუფლების ყველა მაღალჩინოსანი საქმის კურსში იყო და დღემდე არცერთ მათგანს არ ეყო იმის ვაჟკაცობა, ადამიანობა, რომ ეღიარებინათ ეს უკანონო ბრძანება, რაც ჩვენთან მიმართებით გასცეს. მე ხაზგასმით მინდა, ვთქვა: რომ არა ჟურნალისტების მაშინდელი ვაჟკაცობა, გვერდში დგომა, ჩვენი მდგომარეობა ძალზე მძიმე იქნებოდა. ყოველდღიურად ციხის მაშინდელი მმართველი ე.წ „ქილერა“ სულ მაგას გვეუბნებოდა, თქვენ აქედან ცოცხლები ვერ გახვალთო.
გიორგი ბრეგვაძე არის ერთ-ერთი რედაქტორი, რომელმაც ეს ამბავი პირველმა რომ გაიგო, საპროტესტო აქციები დააანონსა. ყველა ის ჟურნალისტი, ვინც ჩვენ უდანაშაულობაში იყო დარწმუნებული, ყოველდღიურად ცდილობდა, გავემხნევებინეთ. დღევანდელი შედეგი თითოეული თქვენგანის იმ სიბოროტეზე გამარჯვებაა, რაც იმ პერიოდში ჩვენს მიმართ ხდებოდა.
ძალზე რთული პერიოდი გავიარეთ. თქვენი, ჟურნალისტების დახმარებით, იმ ცვლილებებით, რომელიც ქვეყანაში მოხდა, დღეს გვაქვს იმის შესაძლებლობა, რომ დავამტკიცეთ ჩვენი უდანაშაულობა, მივიღეთ მორალური და ფინანსური კომპენსაცია. ეს პირველი პრეცედენტია მსგავსი არ მახსოვს. იურისტებმაც აღნიშნეს, რომ ეს, ალბათ, ერთ-ერთი სამაგალითო გადაწყვეტილება იქნება, რომელიც შემდგომში სხვა მსგავს, წინა რეჟიმის პერიოდში ჩადენილ დანაშაულებზე, შეიძლება, ბევრს თავის საქმეში დაეხმაროს.
დღემდე Youtube-ზე უამრავი მტკიცებულებაა იმისა, რომ მიხეილ სააკაშვილი, ვანო მერაბიშვილი, ადეიშვილი ჩვენს ბედს უშუალოდ წყვეტდნენ. დღემდე არცერთ მათგანს არც კაცობა, არც ადამიანობა, არც არაფერი გააჩნიათ, რომ ერთი მაინც გამოსულიყო და ფოტოგრაფების საქმეზე თავისი დანაშაული ეღიარებინა. ეს შეთითხნილი ბრალდება იყო, ჩვენი აღიარება, ჩვენება იძულებით მიღებული იყო, ის ოჯახის ლიკვიდაციის დაშინებით, ჩვენი შეურაცხყოფით მიგვაცემინეს.
ჩვენ მოგიგეთ! სამართალი ყოველთვის, ყველა შემთხვევაში მოიგებს. ეს თითოეული ჟურნალისტის, ყველა იმ ადამიანის დამსახურებაა, ვინც ჩვენ ყოველდღიურად გვგულშემატკივრობდა. მათ ბრძოლა იყო გუშინდელი შედეგი. ეს მარტო ჩვენი გამარჯვება არ არის, ეს ქვეყნის გამარჯვებაა“, – განაცხადა აბდალაძემ.

სამართალდამცველებმა ოთხი ფოტორეპორტიორი 2011 წლის ივლისში დააკავეს. პროკურატურამ ე.წ. ფოტოგრაფების საქმე 2016 წელს გახსნა. უწყების განცხადებით, ფოტოგრაფები ჯაშუშობის გამოგონილი ბრალდებით დააკავეს და მათ ხელისუფლება 26 მაისის აქციის დაშლის აქტიური გაშუქების გამო გაუსწორდა.

თბილისის სააპელაციო სასამართლომ 2018 წელს ე.წ. ჯაშუშობის საქმეზე გამამტყუნებელი განაჩენი გააუქმა და ფოტორეპორტიორები სრულად გაამართლა. სააპელაციო სასამართლო 2011 წლის საქალაქო სასამართლოს განაჩენს განიხილავდა, რომლის მიხედვით, ფოტორეპორტიორები ირაკლი და ნათია გედენიძეები, ზურაბ ქურციკიძე და გია აბდალაძე ჯაშუშობის ბრალდებით დამნაშავედ ცნეს.

“ნეტა ქალბატონმა გიულიმ თუ იცის, რომ რამდენიც არ უნდა დახარჯოს, ტყუილს მოკლე ფეხები აქვს?”

ექსპერტი გია გაბრიჭიძე, აშშ-ის იუსტიციის დეპარტამენტის ვებ-გვერდზე, ყოფილი პრეზიდენტის, მიხეილ სააკაშვილის ლობისტურ კამპანიასთან დაკავშირებით გამოქვეყნებულ მასალებს სოციალურ ქსელში ეხმაურება.

მისი თქმით, მასალებით დასტურდება, რომ მსჯავრდებული ექსპრეზიდენტის შესახებ საერთაშორისო მედიაში განთავსებული სტატიების უმრავლესობა ლობისტური კამპანიის ნაწილია და შესაბამისად, ლობისტების დაკვეთით მომზადდა.

„აშშ-ის იუსტიციის დეპარტამენტის ვებ-გვერდზე მიხეილ სააკაშვილის ლობისტურ კამპანიასთან დაკავშირებული ახალი მასალები გამოქვეყნდა (რა ქნან, ამერიკაში მოქმედი „რუსული კანონი“ ავალდებულებს, თორემ… ) ამ მასალებში პირდაპირ წერია, რომ სააკაშვილის ჯანმრთელობის შესახებ საერთაშორისო მედიაში განთავსებული სტატიების უმრავლესობა სააკაშვილის ლობისტური კამპანიის ნაწილია და ის კომპანიების აკერმანისა და გლობალფოინთის მიერ არის მომზადებული.

ასევე, გამოქვეყნდა სააკაშვილის ჯანმრთელობის მდგომარეობის შესახებ ქართული მხარის მიერ 23 იანვარს გაცემული დასკვნის „საპასუხო დასკვნა“ რომელიც ლობისტური კომპანია „აკერმანის“ თანამშრომლების დაკვეთით იყო მომზადებული.

ნეტა ქალბატონმა გიულიმ თუ იცის, რომ რამდენიც არ უნდა დახარჯოს, ტყუილს მოკლე ფეხები აქვს და იმ ლობისტებში ფულის გადაყრას ჯობია თავის შვილს წესიერი საკვები მიუტანოს“, – წერს გაბრიჭიძე.

https://www.facebook.com/photo/?fbid=6489728701051063&set=a.164780673545929

“რა რიგგარეშე არჩევნები, ხვალ შუალედური არჩევნებია და ოპოზიციას არსად კანდიდატი არ ჰყავს”

„ქართული ოცნების“ წევრის, ბექა დავითულიანის განცხადებით, ოპოზიცია რიგგარეშე არჩევნებით უარეს შედეგს მიიღებს, ვიდრე დღეს აქვს.

„რა რიგგარეშე არჩევნები, ხვალ შუალედური არჩევნებია და არსად კანდიდატი არ ჰყავთ. რომელი რიგგარეშე არჩევნები ამ სიტუაციაში ან რისთვის? ოპოზიციასაც კი რაიმე პრაგმატიზმი თუ აქვს, რიგგარეშე არჩევნები თავისთვის არაფერში სჭირდება, უარეს შედეგს მიიღებს, ვიდრე დღესაა“, – განაცხადა ბექა დავითულიანმა.

დავითულიანს კითხვით მიმართეს, შეეფასებინა ოპოზიციის ნაწილის განცხადება, რომლის მიხედვითაც, იმ შემთხვევაში მოითხოვენ რიგგარეშე არჩევნებს, თუ საქართველო კანდიდატის სტატუსს ვერ მიიღებს. ბექა დავითულიანის თქმით, ეს მეტყველებს ოპოზიციის სურვილზე, ქვეყანამ კანდიდატის სტატუსი ვერ მიიღოს.

„მათი მხრიდან ეს მეტყველებს სურვილზე, რომ ამ ქვეყანამ ვერ მიიღოს კანდიდატის სტატუსი და ეს თავიანთი მიზნებისთვის გამოიყენონ. იმედი მაქვს, ყველაფერი პირიქით მოხდება“, – აღნიშნა ბექა დავითულიანმა.

“ამერიკის იუსტიციის დეპარტამენტის ვებგვერდებზე გამოქვეყნებაც არაა საჭირო იმის მისახვედრად, რომ ნაცსექტა დასპონსორებულ პუბლიკაციებს აქვეყნებს”

„აშშ-ს უცხოელი აგენტების რეგისტრაციის აქტი FARA, რომლის საქართველოში მიღებას აგენტოკრატია გააფთრებით ეწინააღმდეგება, სააკაშვილის მორიგ ლობისტურ საქმიანობაზე გვამცნობს,“ – წერს ანალიტიკოსი გია აბაშიძე სოციალურ ქსელში.

როგორც აბაშიძე აღნიშნავს, ოფიციალური ლობიზმი იგივეა, რაც დაკანონებული პოლიტიკური კორუფცია, ოღონდ ჩვენს შემთხვევაში, გარე აქტორების ღია ჩარევით, ეს თურმე რუსული აქტივობაა. თუმცა, დესტრუქციულთა მანკიერებები კანონის მიუღებლადაც ცნობილია საქართველოს ფართო საზოგადოებისთვის.

„აშშ-ს უცხოელი აგენტების რეგისტრაციის აქტი FARA, რომლის საქართველოში მიღებას აგენტოკრატია გააფთრებით ეწინააღმდეგება, სააკაშვილის მორიგ ლობისტურ საქმიანობაზე გვამცნობს. ამერიკის იუსტიციის დეპარტამენტის ვებგვერდებზე გამოქვეყნებაც არაა საჭირო იმის მისახვედრად, რომ ნაცსექტა დასპონსორებულ პუბლიკაციებს აქვეყნებს უცხოურ მედიაში. ოფიციალური ლობიზმი იგივეა, რაც დაკანონებული პოლიტიკური კორუფცია, ოღონდ ჩვენს შემთხვევაში, გარე აქტორების ღია ჩარევით, ეს თურმე რუსული აქტივობაა. თუმცა, დესტრუქციულთა მანკიერებები კანონის მიუღებლადაც ცნობილია საქართველოს ფართო საზოგადოებისთვის,“ – წერს აბაშიძე ფეისბუკზე.