ყველანაირი მცდელობა, პრეზიდენტს ხელი შეეშალოს ვიზიტების განხორციელებაში, არის სწორედ ანტიკონსტიტუციური ქმედება – „ქართულ ოცნებას“ მოსკოვში საკუთარი მმართველებისგან აქვს დავალება, რომ ჩვენმა ქვეყანამ არ მიიღოს სტატუსი, – ამის შესახებ „ლელოს“ დეპუტატმა სალომე სამადაშვილმა განაცხადა.

როგორც მან აღნიშნა, ერთადერთი შანსი, რომ ქვეყანამ სტატუსი მიიღოს, იქნება პოლიტიკური გადაწყვეტილება, რომ შეუსრულებელი ვალდებულებების პირობებში, გეოპოლიტიკური მოსაზრებებით მიიღოს ქვეყანამ სტატუსი და ამის ლობირებისთვის ნებისმიერი სახელმწიფო წარმომადგენლის ვიზიტი მნიშვნელოვანია, რასაც ხელს უშლის „ქართული ოცნება“.

„დღეს, საქართველოს ერთადერთი შანსი, რაც რჩება, რომ კანდიდატის სტატუსი მიიღოს, ეს არის, რომ ევროკავშირმა მიიღოს პოლიტიკური გადაწყვეტილება და ჩვენს ქვეყანას შეუსრულებელი ვალდებულებების პირობებში მიანიჭოს კანდიდატის სტატუსი. ამიტომ პრეზიდენტის და სახელმწიფოს ნებისმიერი წარმომადგენლის მხრიდან ლობირებას ამ პოლიტიკური გადაწყვეტილების, აქვს გადამწყვეტი მნიშვნელობა სტატუსის მინიჭების თვალსაზრისით. ამიტომ ყველანაირი მცდელობა პრეზიდენტს ხელი შეეშალოს აღნიშნული ვიზიტების განხორციელებაში, არის სწორედ ანტიკონსტიტუციური ქმედება, რადგან ჩვენი კონსტიტუცია ნათლად ამბობს, რომ საქართველო უნდა გახდეს ევროკავშირის წევრი სახელმწიფო. რაც შეეხება „ქართული ოცნების“ მოტივაციას, მას საკუთარი მმართველებისგან, მოსკოვიდან აქვს დავალება, რომ ჩვენმა ქვეყანამ არ მიიღოს სტატუსი. თუმცა, მათ შეიძლება ეს დავალება ვერ შეასრულონ და ევროკავშირმა გეოპოლიტიკური მოსაზრებებით გადაწყვიტოს მიანიჭოს ქვეყანას სტატუსი. თუ ასე მოხდება და ივანიშვილის რუსული რეჟიმი ხელს ვერ შეუშლის სტატუსის მინიჭებას, „ოცნებას“ მაშინ აქვს მეორე გეგმა, რომ ისარგებლოს ამით და შეასაღოს ქართველ ხალხს, თითქოს მათ რაიმე გააკეთეს ამისთვის, რომ სტატუსი მიგვეღო. ამ შემთხვევაში მათთვის ასევე არის დამაზიანებელი, სალომე ზურაბიშვილის აქტიურობა, რადგან თუ „ოცნების“ მიუხედავად მივიღეთ კანდიდატის სტატუსი, „ოცნება“ შეეცდება მიიწეროს ეს მიღწევა, იმის მიუხედავად, რომ არაფერს აკეთებს ხელის შეშლის გარდა,“ – განაცხადა სამადაშვილმა.

ა

რაც მეტად გაღვივდება დაპირისპირებები „ნაცმოძრაობის“ შიგნით, მით უფრო მეტად დაიკლებს მისი რეიტინგი, – ამის შესახებ „ქართული ოცნების“ თავმჯდომარემ ჟურნალისტებს განუცხადა, რითაც „ნაციონალურ მოძრაობაში“ არსებულ ვითარებაზე ისაუბრა.

კობახიძის თქმით, ეს არის ბრძოლა, „ნაციონალური მოძრაობის“ შიგნით პოზიციებისთვის.

„ვიცით, რომ რამდენიმე დაჯგუფებაა. გარდა ამისა, მათი ფორმალური თავმჯდომარე არის ძალიან სუსტი და შესაბამისად, იმედი აქვთ, რომ რაღაცნაირად მოახერხებენ მისი პოზიციების შერყევას. შესაბამისად, ეს ბრძოლები მიმდინარეობს „ნაცმოძრაობის“ შიგნით, რაც ძალიან კარგია. რაც მეტად გაღვივდება ასეთი დაპირისპირებები „ნაცმოძრაობის“ შიგნით, მით უფრო მეტად დაიკლებს მისი რეიტინგი. ჩვენი ძალიან მნიშვნელოვანი, ვიტყოდი, ეროვნული ამოცანაა, რომ საბოლოოდ განეიტრალდეს „ნაცმოძრაობა“, როგორც რისკფაქტორი ქართულ პოლიტიკაში“, – განაცხადა კობახიძემ და აღნიშნა, რომ რაც უფრო მეტი დაპირისპირება იქნება „ნაციონალური მოძრაობის“ შიგნით, მით უკეთესია.

რაც შეეხება თავდაცვის ყოფილ მინისტრ, დავით კეზერაშვილს, კობახიძის თქმით, ოპოზიციას ის აფინანსებს.

„კეზერაშვილი არის მთელი კოლექტიური „ნაცმოძრაობის“ და რადიკალური ოპოზიციის მთავარი დამფინანსებელი და დონორი. სწორედ მისი მეშვეობით ხორციელდება რადიკალური ოპოზიციის დაფინანსება. აქედან გამომდინარე, მისი ფინანსების გათვალისწინებით გამოკვეთილად რეალური ლიდერია რადიკალური ოპოზიციის შიგნით. ამიტომ, ამაზე საუბარი არის რეალური. ყველამ ვიცით, რომ ხაბეიშვილი არის მხოლოდ ფორმალური თავმჯდომარე, რეალური ლიდერი, მისი ფინანსებიდან გამომდინარე, რა თქმა უნდა, არის კეზერაშვილი“, -განაცხადა კობახიძემ.

ყველას გვახსენდება ის ხელწერა, რომლითაც გამორჩეული იყო 2004-2012 წლებში საქართველოს ხელისუფლება. კოლექტიური სააკაშვილები და ადეიშვილები იყვნენ გამორჩეული ამ ხელწერით და ალბათ სიმბოლურია, რომ დღესაც სააკაშვილები და ადეიშვილები იკავებენ ფორმალურ თუ არაფორმალურ თანამდებობებს უკრაინის ხელისუფლებაში, – „ქართული ოცნების“ თავმჯდომარე ირაკლი კობახიძე უკრაინაში, ქალაქ დნეპრში მომხდარ შემთხვევას ეხმიანება, სადაც პოლიციამ ქართველი ჯუმბერ სილაგავა მოკლა.

ვხედავთ იგივე ხელწერას, რაც იყო საქართველოში 2004-2012 წლებში. ეს არ არის მარტო ქუჩაში ადამიანების მკვლელობა, ეს არის იგივე ბიზნესის რეკეტი, ტელევიზიების გადაფორმება, ადამიანების მკვლელობა, სინამდვილეში, ომი ამ ყველაფრისთვის არის მხოლოდ საბაბი. ხელწერა არის იგივე, რაც არის ძალიან სამწუხარო, -აღნიშნა კობახიძემ.

კობახიძის თქმით, ქართველი ე.წ ლიბერალები ერთხმად ამართლებენ ამ საზარელ მკვლელობას, რომელიც ჩადენილ იქნა უკრაინაში. მისივე თქმით, ეს კიდევ ერთხელ აჩვენებს მათ ბუნებას.

„რაც უფრო მალე გათავისუფლდება უკრაინა სააკაშვილებისგან და ადეიშვილებისგან, მით უფრო უკეთ წარიმართება პროცესები ამ ქვეყანაში. ადამიანის მკვლელობას არც ნასვამობა ამართლებს და არც პოლიციელთან დაუმორჩილებლობა, მით უმეტეს, როდესაც ბავშვების და მეუღლის თვალწინ ხორციელდება მკვლელობა, ეს არის ამაზრზენი დანაშაული და ამასაც კი ამართლებდნენ ქართველი ე.წ. ლიბერალები, ქართველი ნაციონალები. დღეს ისინი არიან გამოფენილები და ერთხმად ამართლებენ ამ საზარელ მკვლელობას, რომელიც ჩადენილ იქნა უკრაინაში. ეს კიდევ ერთხელ აჩვენებს მათ ბუნებას. საზოგადოებას კიდევ ერთხელ მინდა შევახსენო, რომ თეორიულად ისინი რომ დაბრუნდნენ ხელისუფლებაში ზუსტად იმავეს გაიმეორებენ, რასაც აკეთებდნენ 2004-2012 წლებში. ყველაფერი უნდა გავაკეთოთ იმისათვის, რომ კოლექტიური სააკაშვილ ადეიშვილები არასდროს დაბრუნდნენ ხელისუფლებაში. რა თქმა უნდა ეს არასდროს მოხდება, ამაზე ჩვენ ვართ პასუხისმგებლები და პირველ რიგში, ის ხელწერა არ უნდა დაბრუნდეს საქართველოში, რომელიც ასე მძიმედ დაგვამახსოვრდა 2004-2012 წლებიდან“, – განაცხადა ირაკლი კობახიძემ.

უკრაინის ქალაქ დნეპრში პოლიციამ, სამობილიზაციო ღონისძიებების ფარგლებში, ჯუმბერ სილაგავა გააჩერა. ერთ-ერთმა პოლიციელმა სილაგავა მეუღლისა და ორი მცირეწლოვანი შვილის თვალწინ,ზურგში გასროლით მოკლა.

სალომე ზურაბიშვილი ეწევა კამპანიას საქართველოსთვის კანდიდატის სტატუსის მინიჭების წინააღმდეგ. აქედან გამომდინარე, რა თქმა უნდა, მთავრობა ვერ მისცემდა მას თანხმობას ამ კამპანიაზე, – ამის შესახებ პარტია „ქართული ოცნების“ თავმჯდომარემ, საპარლამენტო უმრავლესობის ლიდერმა, ირაკლი კობახიძემ ჟურნალისტებს სალომე ზურაბიშვილის ვიზიტებზე საუბრისას განუცხადა.

მან განმარტა, თუ რატომ ეთქვა უარი საქართველოს პრეზიდენტს ვიზიტების განხორციელებაზე.

„ჩვენ ყველას გვახსოვს სალომე ზურაბიშვილის განცხადებები პარლამენტში, პარლამენტს გარეთ. როდესაც სალომე ზურაბიშვილი აცხადებს, რომ საქართველო არც შარშან იმსახურებდა კანდიდატის სტატუსს, არც წელს იმსახურებს და მას სურს ამ თემასთან დაკავშირებით ვიზიტების განხორციელება, რა თქმა უნდა, მას უნდა ეთქვას უარი. ბუნებრივია, ჩვენ ვერ მივცემთ თანხმობას იმ კამპანიაზე, რომელიც უპირისპირდება ქვეყნის ევროპულ მომავალს. ეს არის ძალიან მარტივი საკითხი. მთავრობამ იცოდა, რომ სალომე ზურაბიშვილი ეწევა კამპანიას საქართველოსთვის კანდიდატის სტატუსის მინიჭების წინააღმდეგ. აქედან გამომდინარე, რა თქმა უნდა, მთავრობა ვერ მისცემდა მას თანხმობას ამ კამპანიაზე. ძალიან მარტივადაა აქ საკითხი“, – აღნიშნა ირაკლი კობახიძემ.

საქართველოს პრეზიდენტი სალომე ზურაბიშვილი 31 აგვისტოს გერმანიაში გაემგზავრება. როგორც პრეზიდენტის ადმინისტრაციის მიერ გავრცელებულ ინფორმაციაშია ნათქვამი, სალომე ზურაბიშვილი, ბერლინში, გერმანიის ფედერაციული რესპუბლიკის პრეზიდენტთან, ფრანკ-ვალტერ შტაინმაიერთან გამართავს შეხვედრას.

საქართველოს პრეზიდენტ სალომე ზურაბიშვილის გერმანიის ფედერაციულ რესპუბლიკაში დაგეგმილ ვიზიტთან დაკავშირებით, პრეზიდენტის ადმინისტრაციის მიერ გავრცელებულ ინფორმაციას საქართველოს მთავრობა გამოეხმაურა.