წარმატებას ვუსურვებ ჩემს კოლეგებს, მაგრამ ეს გაერთიანება მაგონებს „ძალა ერთობაშია 2“-ს, – ამის შესახებ „გირჩის“ ლიდერმა, იაგო ხვიჩიამ განაცხადა, რომლითაც გამოეხმაურა „ნაციონალური მოძრაობის“ და „სტრატეგია აღმაშენებლის“ გადაწყვეტილებას, რომ ამ ორ პარტიას საერთო სტრატეგია ექნება და შეიქმნება „გამარჯვების პლატფორმა“ პროდასავლური პარტიების პლატფორმაზე.

ხვიჩიას თქმით, „ძალა ერთობაშია“-სგან განსხვავებით, გუშინ გამოიყურებოდნენ უფრო მოკრძალებულად, ვიდრე ამბიციურად.

„„ძალა ერთობაშია“ რამდენად წარმატებული იყო, ამაზე შეგვიძლია, ვიკამათოთ. მაგალითად, თაკო ჩარკვიანის პარლამენტში შეყვანა თუ წარმატება იყო, წარმატებული იყო, „ქართული ოცნების“ შეცვლა თუ იყო მიზანი, მაშინ არ იყო წარმატებული. თუმცა, „ძალა ერთობაშია“-სგან განსხვავებით, აქ უფრო ცოტა პარტიაა და უფრო მოკრძალებულად გამოიყურებოდნენ გუშინ, ვიდრე ამბიციურად. კი თქვეს, რომ ჩვენ მომავალში მოვიფიქრებთ გზასო, მაგრამ ჯერ მოფიქრებული არცერთი გზის პრეზენტაცია არ ყოფილა, რამაც ცოტა ელვარება დააკლო გუშინდელ ამ ღირსშესანიშნავ მოვლენას“, – განაცხადა იაგო ხვიჩიამ.

პროდასავლური პარტიების მსხვილი ცენტრის გაკეთება შესაძლებელია. უბრალოდ, „ნაციონალურ მოძრაობასთან“ ერთად ამ ცენტრში ყოფნა ჩვენთვის კატეგორიულად მიუღებელი და წითელი ხაზია, – ამის შესახებ პარტია „გირჩი – მეტი თავისუფლების“ წევრმა, ცოტნე კობერიძემ პირველ არხს განუცხადა.

მისივე თქმით, სწორედ ამიტომ „გირჩი – მეტი თავისუფლება“ „ნაციონალური მოძრაობისა“ და „სტრატეგია აღმაშენებლის“ პლატფორმას არ შეუერთდა.

ამასთან, ცოტნე კობერიძის თქმით, სხვა პარტიებთან გაერთიანების საკითხზე ამ ეტაპზე რაიმე სერიოზული კონსულტაციები არ მიმდინარეობს.

„აქედან გამომდინარე, გიორგი ვაშაძის ამ გადაწყვეტილებას არ განვავრცობთ ჩვენს პარტიაზე და დავემშვიდობეთ გიორგი ვაშაძეს, სამეული მოკვდა, აღარ არსებობს. ამის მიღმა წითელი ხაზები არ გვაქვს, არც, მათ შორის, „ლელოსთან“, არც სხვებთან. სერიოზულად თუ დაიძვრება ეს საკითხი, მზად ვართ. ამ ეტაპზე რაიმე სერიოზული კონსულტაციები არ მიმდინარეობს. ახლა ყველა პარტია მაინც გადასულია საკუთარი რეიტინგისა და რესურსების დათვლაზე“, – განაცხადა ცოტნე კობერიძემ.

კითხვაზე, როდის შეიძლება საზოგადოება კონსულტაციებსა და კონკრეტულ გადაწყვეტილებებთან დაკავშირებით ინფორმაციის მიღებას ელოდოს, ცოტნე კობერიძემ აღნიშნა, რომ ეს მხოლოდ „გირჩი – მეტი თავისუფლებაზე“ არ არის დამოკიდებული.

„მზად როცა იქნება, მათ შორის „ლელო“ და სხვა პარტიებიც, მაშინ გვექნება ჩვენც მზაობა. ზოგადად, ჩვენ გაერთიანებებზე საუბარი დავიწყეთ ერთი წლის წინ, როცა ყველა ალმაცერად გვიყურებდა, დასცინოდა ამ იდეას და ახლა ყველა დასწრებაზეა, დაიბრალოს, რომ თვითონაა ამ იდეის ინიციატორი“, – აღნიშნა ცოტნე კობერიძემ.

კიდევ ერთ კითხვაზე, პარტია „ლელოსგან“ ხომ არ ყოფილა კონკრეტული შემოთავაზება გაერთიანებასთან დაკავშირებით, ცოტნე კობერიძემ განაცხადა:

„გარდა საჯარო და ზოგადი თქმისა, რომ სურთ, მესამე ძალა გაკეთდეს, რაიმე სერიოზული კონსულტაცია არ ყოფილა. გიორგი ვაშაძის გადაწყვეტილებამ დააჩქარა ეს ამბავი, ყველა პოლიტიკოსს მედია უსვამს ამ შეკითხვას და შემდეგ ყველა პოლიტიკოსი სცემს პასუხს, რომ გაჩერებული კი არ არის, არამედ ამ თემებზე მიმდინარეობს კონსულტაციები. ეს შაბლონური პასუხია, სინამდვილეში, ჯერ სერიოზული საუბრები არ არის“, – აღნიშნა ცოტნე კობერიძემ.

დოკუმენტებით ირკვევა, რომ თურმე მიღებული რეზოლუციები, საქართველოს და ხელისუფლების წინააღმდეგ გაკეთებული განცხადებები, ფარსი იყო და ამ ყველაფერს ფულის გამო აკეთებდნენ – ცუდია ის, რომ ამაში ჩართულები იყვნენ ჩვენი უცხოელი მეგობარი ქვეყნების წარმომადგენლები, – ამის შესახებ “ქართული ოცნების” გენერალურმა მდივანმა, კახა კალაძემ განაცხადა, რითაც ის აშშ-ის იუსტიციის დეპარტამენტის ვებ-გვერდზე გამოქვეყნებულ ინფორმაციას გამოეხმაურა.

კალაძის თქმით, გავრცელებული დოკუმენტებით დადასტურდა ის, რასაც “ქართული ოცნების” წარმომადგენლები ამ ხნის განმავლობაში საუბრობდნენ.

„კიდევ ერთი სამწუხარო რეალობა, პრაქტიკულად, დადასტურდა ყველაფერი ის, რაზეც ჩვენ ვსაუბრობდით ამდენი ხნის განმავლობაში. მთელი ამ ხნის განმავლობაში აღნიშნული კამპანია, რომელიც ძალიან დიდ ტყუილს და სიბინძურეს შეიცავდა და მთლიანად ფარსი იყო, საქართველოს, ხელისუფლებისა და ქართველი ხალხის წინააღმდეგ მიმართული იყო. ასევე, ზოგადად, ქვეყნის გაშავებისკენ მიმართული იყო. კიდევ ერთხელ დადასტურდა და გამოიკვეთა ის სიბინძურე, რაც აღნიშნულ საქმესთან დაკავშირებით ხდებოდა. ეს ყველაფერი შენიღბულია ვითომ ლობიზმით, რაც ძალიან სამწუხაროა. აღნიშნული დოკუმენტებით ირკვევა, რომ თურმე მიღებული რეზოლუციები, საქართველოს და ხელისუფლების წინააღმდეგ გაკეთებული განცხადებები, ეს ყველაფერი ფარსი იყო და ამ ყველაფერს ფულის გამო აკეთებდნენ. ამას სამწუხარო პოლიტიკა ჰქვია, რაც ძალიან გულდასაწყვეტია. ცუდია ის, რომ ეს ყველაფერი ხდებოდა და ამაში ჩართულები იყვნენ ჩვენი უცხოელი მეგობარი ქვეყნების წარმომადგენლები”, – განაცხადა კალაძემ.

ამასთან, კახა კალაძის თქმით, შესაძლოა პოლონელი ექიმის მიერ მიხეილ სააკაშვილის ბიოლოგიური ნიმუშის კლინიკა „ვივამედიდან” გამოტანა, მონაცემების გაყალბებას და ახალი კამპანიის დაწყებას ემსახურებოდა.

„რა თქმა უნდა, კარგი თანამშრომლობის პრინციპს ეწინააღმდეგება ის ქმედებები, რაც კონკრეტულმა ექიმებმა განახორციელეს და მე არ ვარ იმაში დარწმუნებული და არ მჯერა, რომ ეს რაღაც მათი თვითშემოქმედება იყო. ეს არის ერთი დიდი ხაზი, მთლიანად დაწყებული სააკაშვილის საქართველოში შემოგორებით, ის კამპანია, მთლიანად ერთი დიდი ხაზისგან შედგება, ეს ყველაფერი, რაც იკვეთება ამერიკულ-რუსულ კანონში, ვგულისხმობ FARA-ს, სადაც დეტალურადაა გაწერილი, თუ რა ქმედებებს ეწეოდნენ, რა ე.წ. ლობიზმი მიმდინარეობდა, სინამდვილეში ეს ყველაფერი კორუფციაა, უბრალოდ ლობიზმად აქვთ შენიღბული. თეთრზე როდესაც შავს იძახიან და სიცრუეს ავრცელებენ, ამაზე დიდი უბედურება რა უნდა იყოს და ამას პოლიტიკას არქმევენ. შესაბამისად, იმ ექიმების ქმედებებიც სამარცხვინოა. ვფიქრობდი, რომ გამოვიდოდნენ და ბოდიშს მოიხდიდნენ იმიტომ, რომ თვითონაც იყვნენ ჩართულები. ეჭვი, რაც გვაქვს, კიდევ უფრო ღრმავდება, რომ ეს ყველაფერი გაკეთებული იყო იმისთვის, რომ აღნიშნული მონაცემები გაეყალბებინათ და ამასთან დაკავშირებით ახალი კამპანია დაეწყოთ”, – განაცხადა კალაძემ.

საქართველოს პრემიერ-მინისტრ ირაკლი ღარიბაშვილის ხელმძღვანელობით, მთავრობის ადმინისტრაციაში მთავრობის სხდომა გაიმართა.

მთავრობის ადმინისტრაციის ცნობით, მინისტრთა კაბინეტის წევრებმა დღის წესრიგით გათვალისწინებული 11 საკითხი განიხილეს.

განსახილველ საკითხთა შორის იყო საქართველოს მთავრობის განკარგულება „სახელმწიფო საკუთრებაში არსებული უძრავი ქონების უსასყიდლოდ საკუთრებაში გადაცემის ფორმით პრივატიზების შესახებ“. განკარგულების საფუძველზე 367 დევნილ ოჯახს საკუთრებაში გადაეცემა მათ მიერ ფაქტობრივად დაკავებული 409 ქონება, მათ შორის, საცხოვრებელი ბინები და როგორც სასოფლო, ისე არასასოფლო-სამეურნეო დანიშნულების მიწები.

დევნილებისთვის გადასაცემი ქონება მდებარეობს თბილისში, ქუთაისში, დაბა ჩხოროწყუში, შიდა ქართლში, თელავში, მცხეთაში, ბორჯომში, ქვემო ქართლში, სამეგრელოში, იმერეთში, ბათუმსა და რაჭა-ლეჩხუმში.

“ლელოს” გენერალური მდივანი, ირაკლი კუპრაძე “ნაციონალური მოძრაობის” და “სტრატეგია აღმაშენებლის” პოლიტიკური გაერთიანების საკითხს აფასებს და ამბობს, რომ მსგავსი გაერთიანება საინტერესო არ არის.

მისივე თქმით, მესამე ალტერნატიული ცენტრის შექმნა გარდაუვალია.

“არ არის საინტერესო მსგავსი გაერთიანება. “ნაციონალური მოძრაობის” გარშემო გადაჯგუფება არ ემსახურება საქართველოს საზოგადოების დაკვეთას. გარდაუვალია მესამე ალტერნატიული ცენტრის შექმნა, სადაც იმ პროდასავლურ პარტიებს ვეპატიჟებით, რომელიც ვერ ხედავს საკუთარ თავს “ნაციონალური მოძრაობის” გვერდით”, – აცხადებს კუპრაძე.

ქვეყანაში დღეს მშვიდობას ალტერნატივა არ აქვს და ერთადერთი პოლიტიკური გუნდი, რომელსაც მისი შენარჩუნება შეუძლია, „ქართული ოცნება – დემოკრატიული საქართველოა“, – ამის შესახებ თბილისის მერმა, კახა კალაძემ „ქართული ოცნების“ ყოფილი წევრების შესაძლო გაერთიანებასთან დაკავშირებული შეკითხვის საპასუხოდ განაცხადა.

როგორც მან აღნიშნა, საქართველოში, რომელმაც არაერთი ომი გამოიარა, მშვიდობის საკითხი საქილიკო არ შეიძლება იყოს.

„„ქართულ ოცნებას“ ამ ქვეყანაში ყველაზე მეტი მხარდამჭერი ჰყავს და ეს უბრალოდ, ისე არ ხდება. ხალხი ძალიან კარგად ხედავს არსებულ გამოწვევებს, რეალობას. ასევე, ძალიან კარგად ხედავს, კონკრეტული პოლიტიკური პარტია ან პოლიტიკოსი საიდან იმართება და რას, ვის ინტერესებს ემსახურებიან ეს ადამიანები. სრულიად გულწრფელად შემიძლია გითხრათ: მიუხედავად ზეწოლისა და შემოტევისა, ერთადერთი პოლიტიკური გუნდი, პარტია, ვინც ამ ქვეყანას ემსახურება, იცავს მისი და მოსახლეობის ინტერესს, ეს „ქართული ოცნება – დემოკრატიული საქართველოა“. ჩვენ ვართ ის გუნდი, ვისაც რეალურად შეუძლია, ქვეყანაში შეინარჩუნოს მშვიდობა. ვიღაცებისთვის ეს საქილიკოა, მაგრამ ჩვენ ვართ ქვეყანა, რომელმაც გამოიარა რამდენიმე ომი და გამოსცადა ის უბედურება, რაც მას მოაქვს. ვინ გამოიარა ეს საკუთარ თავზე და ყველაზე მეტად ვინ გამოსცადა? ჩვეულებრივმა, რიგითმა ადამიანებმა. 2008 წლის ომის დროს გინახავთ რომელიმე პოლიტიკოსი, რომელსაც ერთი ღერი თმა ჩამოვარდნოდა თავიდან? ეს ყველაფერი საკუთარ თავზე, რა თქმა უნდა, გამოსცადა ჩვეულებრივმა მოსახლეობამ და გმირმა ჯარისკაცებმა“, – განაცხადა კახა კალაძემ.

მისივე თქმით, მმართველი პოლიტიკური გუნდისთვის ქვეყნის ტერიტორიული მთლიანობის აღდგენა ერთ-ერთი უმნიშვნელოვანესი გამოწვევაა, თუმცა აღნიშნული შედეგის მიღწევა ომითა და დაპირისპირებით არ უნდა მოხდეს.

„გვყავს უამრავი გარდაცვლილი ადამიანი და გვაქვს დაკარგული ტერიტორიები. უცხოეთიდან კი რა იყო? შეშფოთება, აღშფოთება. ეს იყო შედეგი, რაც მივიღეთ. ამიტომ მშვიდობას დღეს არ აქვს ალტერნატივა. შეიძლება, ვიღაცამ იკითხოს, რას ვფიქრობთ ქვეყნის გაერთიანებასა და დღევანდელ ოკუპირებულ ტერიტორიებზე? ეს ჩვენთვის ერთ-ერთი უმნიშვნელოვანესი გამოწვევაა. კონსტიტუციაში პირველი, რაც გვიწერია, ქვეყნის ტერიტორიული მთლიანობის აღდგენაა. ეს კი უნდა გავაკეთოთ არა ომითა და დაპირისპირებით, არამედ ქვეყნის ეკონომიკური განვითარებით, მშვიდობით, გაძლიერებითა და გონიერებით. ეს არის ჩვენი პასუხი“, – აღნიშნა თბილისის მერმა.