პრემიერ-მინისტრის იმპიჩმენტის მოთხოვნა არის უბრალოდ იმ საკითხების გადაფარვის მცდელობა, რომელიც აქტუალურია, მაგალითად, პრეზიდენტის იმპიჩმენტი, რადგან რეალურად გვაქვს დიდი დანაშაული, – ამის შესახებ „ქართული ოცნების“ გენერალურმა მდივანმა, კახა კალაძემ ზუგდიდში განაცხადა.

„მიზანმიმართული ბინძური კამპანიაა პრემიერის და მისი ოჯახის წინააღმდეგ. ძალიან ბევრი განცხადება იქნა გაკეთებული აღნიშნულ ჩარტერთან დაკავშირებით, თუ ვინ გადაიხადა ეს თანხები, პირდაპირ მთავრობის მხრიდან განცხადებაც იყო გაკეთებული, რომ ეს იყო პრემიერ-მინისტრის პირადი ხარჯი, ბიუჯეტიდან არც ერთი თეთრი არ დახარჯულა.

რაც შეეხება პრემიერ-მინისტრის იმპიჩმენტის საკითხს, რეალურად რომ შევხედოთ, ეს არის უბრალოდ იმ საკითხების გადაფარვის მცდელობა, ყოველ შემთხვევაში, რომელიც დღეს აქტუალურია, მაგალითად, როდესაც პრეზიდენტის იმპიჩმენტზეა საუბარი, რადგან რეალურად გვაქვს ძალიან დიდი დანაშაული. როდესაც პრეზიდენტი არღვევს კონსტიტუციას, ეს არის უმძიმესი საკითხი. ქვეყნის მაღალი თანამდებობის პირი, რომელიც პირველი უნდა იცავდეს კონსტიტუციას, კანონს, პატივს უნდა სცემდეს ჩვენს ქვეყანას, ხალხს – არღვევს კონსტიტუციას, ეს ძალიან მძიმეა. რეალურად პოლიტიკური საკითხებით ხდება ასეთი საკითხების გადაფარვის მცდელობა“,- განაცხადა კახა კალაძემ.

პრეზიდენტს აქვს „ნაცმოძრაობის“ იმედი და მათი იმედით არღვევდა კონსტიტუციას, – ამის შესახებ პარტია „ქართული ოცნების“ თავმჯდომარე ირაკლი კობახიძემ განაცხადა.

მისივე თქმით, მოლოდინი არ აქვთ, რომ „ნაცმოძრაობა“ მხარს დაუჭერს სალომე ზურაბიშვილის იმპიჩმენტს.

პრეზიდენტს აქვს „ნაცმოძრაობის“ იმედი და „ნაცმოძრაობის“ იმედით არღვევდა კონსტიტუციას. რა თქმა უნდა, არავითარი ილუზია არ გვაქვს, რომ კოლექტიური „ნაცმოძრაობა“ მხარს დაუჭერს სალომე ზურაბიშვილის იმპიჩმენტს, მიუხედავად იმისა, რომ ისინი თავის დროზე მოღალატედ აფასებდნენ სალომე ზურაბიშვილს, ანუ სამმილიონიან ამომრჩეველს ატყუებდნენ, რომ სალომე ზურაბიშვილი იყო მოღალატე. შემთხვევით, ახლა ხომ არ ატყუებენ, რომ „ქართული ოცნება“ არის რუსული პარტია და ასე შემდეგ. ანუ, როცა „ნაცმოძრაობა“ არ დაუჭერს მხარს პრეზიდენტის იპიჩმენტს, ამით თვითონვე აღიარებს, რომ თავის დროზე სამმილიონიანი ამომრჩეველი უბრალოდ მოატყუა. ესეც ერთ-ერთი აღიარება, ლუსტრაცია, სალომე ზურაბიშვილისა და რადიკალური ოპოზიციის ერთიანობის გაშიშვლებაა.  ეს არის ძალიან ბევრი პლუსი, რაც თან ახლავს იმპიჩმენტის პროცედურას“, – განაცხადა ირაკლი კობახიძემ.

„ნაციონალური მოძრაობა“ საგამოძიებო ორგანოებს მოუწოდებს, შოვის ტრაგედიასთან დაკავშირებით მაღალი პოლიტიკური თანამდებობის პირების, პრეიერ-მინისტრ ირაკლი ღარიბაშვილის, შს მინისტრის ვახტანგ გომეაურის და ეკონომიკის მინისტრის, ლევან დავითაშვილის დანაშაულებრივ გულგრილობაზე გამოძიება დაიწყონ. შოვში განვითარებულ პროცესებზე პრესკონფერენცია ლევან ხაბეიშვილმა, ლაშა ფარულავამ, გიორგი ვაშაძემ და პაატა მანჯგალაძემ გამართეს.

ხაბეიშვილმა აღნიშნა, რომ შოვის ტრაგედია „ქართული ოცნების“ დანაშაულებრივი უმოქმედობის, გულგრილობის და კორუფციული ინტერესების შედეგია. მთავარი დამნაშავე კი, პრემიერ-მინისტრია. მისი თქმით, განვითარებულ პროცესებში მთავარი დამნაშავეა ასევე შს მინისტრი ვახტანგ გომელაური, რომლის ბრძანებითაც ვერტმფრენმა სამაშველო ღონისძიება 22:00 საათზე შეწყვიტა, რის გამოც სამძებრო-სამაშველო ღონისძიება მთლიანად ჩავარდა.

„საგამოძიებო ორგანოებმა უნდა დაიწყონ გამოძიება ზემოთ ხსენებული მაღალი პოლიტიკური თანამდებობის პირების დანაშაულებრივ გულგრილობაზე, წინააღმდეგ შემთხვევაში, მათი მხრიდან დანაშაულის დაფარვაც იქნება შემდგომში გამოძიების საგანი, როცა ქვეყანაში იქნება დამოუკიდებელი საგამოძიებო სისტემა”, – აღნიშნეს „ნაციონალური მოძრაობის“ წევრებმა.

პრეზიდენტის მხრიდან კონსტიტუციის უხეში დარღვევის ფაქტის რეაგირების გარეშე დატოვება არ შეიძლებოდა, დღეს  ოფიციალურად შედის საკონსტიტუციო სასამართლოში ჩვენი კონსტიტუციური წარდგინება და სასამართლო ამ თემასთან დაკავშირებით ერთი თვის განმავლობაში იმსჯელებს, – ამის შესახებ პარტია „ქართული ოცნების“ თავმჯდომარემ, ირაკლი კობახიძემ განაცხადა.

კობახიძის თქმით, საქართველოს პრეზიდენტის მხრიდან კონსტიტუციის უხეში დარღვევა არის ძალიან მძიმე ფაქტი.

„ამის რეაგირების გარეშე დატოვება მმართველი გუნდის მხრიდან უბრალოდ არ შეიძლებოდა. ეს ჩვენი მხრიდანაც უპატივცემულობა იქნებოდა ქვეყნის ძირითადი კანონის მიმართ. შესაბამისად, დღეს უკვე ოფიციალურად შედის საკონსტიტუციო სასამართლოში ჩვენი კონსტიტუციური წარდგინება და საკონსტიტუციო სასამართლო მომდევნო ერთი თვის განმავლობაში იმსჯელებს ამ თემასთან დაკავშირებით.

პრინციპში, სამსჯელო არც არაფერია. იმდენად უხეშია და თვალნათელი კონსტიტუციის დარღვევა, რომ მარტივად სჭირდება ამას უბრალოდ დადასტურება და მეტი არაფერი. ეს არის პირველი კურსის პირველი ლექციის კაზუსი“, – განაცხადა ირაკლი კობახიძემ.

ყიფიანი ბიძინა ივანიშვილის ადვოკატი იყო, რაშიც ძალიან დიდ ანაზღაურებასაც იღებდა. თუმცა, იმდენი მოახერხა, რომ ივანიშვილის ადვოკატობას თაღლითობა და ივანიშვილის მტრებთან „დამეგობრება“ შეუთავსა. ზუსტად ასეთ ადამიანებს ეძებს გლობალური ომის პარტია, ადამიანებს, რომელთათვისაც უცხოა სინდისი, – ამის შესახებ საზოგადოებრივი მოძრაობა „ხალხის ძალის“ განცხადებაშია აღნიშნული.

„გლობალური ომის პარტია „ქართულ ოცნებას“ მეორე ფრონტის არგახსნას არ პატიობს. ემოციური მხარე გვერდზეც რომ გადავდოთ, ისინი წინ იყურებიან და ბუნებრივია, ყველანაირად ცდილობენ, სამომავლოდ მაინც მოიყვანონ ხელისუფლებაში საკუთარი აგენტურა, რომელიც მათ ყველა დავალებას უპირობოდ მოაწერს ხელს. ეს ამოცანა მით უფრო აქტუალურია, რომ გლობალურ ომის პარტიას უკრაინაში კონფლიქტის გაყინვის შემდეგ ცეცხლის ახალი კერა აუცილებლად დასჭირდება.

ამ კუთხით, სიმბოლურია, რომ მათი ერთ-ერთი მთავარი ფავორიტი ნინო ლომჯარიაა, რომელიც სულ ცოტა ხნის წინ საქართველოში „ბომბებით წვას“ საჯაროდ ნატრობდა. ლომჯარია ქართველი ფსევდოლიბერალის ტიპიური ნიმუშია: აგენტი ნული ინტელექტით, ნული სინდისით და ნული სამშობლოს სიყვარულით. ლომჯარიას შემთხვევაში, ამას ნული ქარიზმაც ემატება. შესაბამისად, რამდენი ორდენიც არ უნდა ჩამოკიდონ, ლომჯარიასგან პოლიტიკური ლიდერი ვერ გამოითლება. ამიტომ, მისი პერსონა მაინცდამაინც დიდ ინტერესს არ იწვევს. თუმცა, ლომჯარიას პლატფორმის შექმნა საინტერესოა იმდენად, რამდენადაც ეს მოვლენა გლობალური ომის პარტიის საარჩევნო სტრატეგიას კიდევ ერთხელ შიფრავს.

2024 წლის საპარლამენტო არჩევნებისთვის გლობალური ომის პარტიის ერთ-ერთი უმთავრესი პრიორიტეტი ფსევდოშუაშისტური პარტიის შექმნა იქნება. მთავარი მიზანი „ქართული ოცნების“ ხელისუფლებიდან გაშვება და ნაცმოძრაობის, ანუ საკუთარი აგენტურის დაბრუნებაა. ისინი კარგად ხვდებიან, რომ თუ ბარიერს მხოლოდ „ქართული ოცნება“ და პარტია „ნაციონალური მოძრაობა“ გადალახავენ, ნაციონალები ძალაუფლებას ვერ დაიბრუნებენ. ამიტომ, საჭიროა შუაშისტის ტყავში გადაცმული ნაცების ახალი პლატფორმა, რომელიც ბარიერს გადალახავს და პარტია „ნაციონალურ მოძრაობასთან“ ერთად ე.წ. კოალიციას შექმნის.

ყველას გვახსოვს, ზუსტად იგივე მიზნით, როგორ შეაქმნევინეს 2021 წელს პარტია გიორგი გახარიას. ისიც შუა ხაზის დაჭერას ცდილობდა და საარჩევნო კამპანიას „არც ნაცი, არც ქოცის“ მესიჯით ატარებდა. თუმცა, საზოგადოებამ თამაში იოლად გაშიფრა და საბოლოოდ, გახარიამ არჩევნებში 7 პროცენტი მიიღო, საიდანაც „ქართული ოცნების“ ხმები ნახევარიც არ იყო. სინამდვილეში, გახარიას ხალხისთვის არავითარი ახალი ძალა და იდეოლოგია არ შეუთავაზებია და საკუთარი ოპოზიციური კარიერა ერთ წელიწადში უსახელოდ დაასრულა. მომავალ წელს მისი პარტია ერთ პროცენტსაც ვეღარ მიიღებს და ამიტომ, პატრონები მასზე გათვლას აღარ აკეთებენ. ერთადერთი, რაშიც პატრონებს გახარია გამოადგათ, 4 მუნიციპალურ საკრებულოში ნაცმოძრაობისთვის უმრავლესობის დალაგება იყო.

2020 წელს ზუსტად ასეთივე ფიასკოთი დასრულდა „ლელოს“ პროექტიც, რომელიც ასევე შუაშისტურ ხაზზე იყო გათვლილი. დღეს ხაზარაძის მისია იმით შემოიფარგლება, რომ რამდენიმე ბავშვი ყავს მიბარებული და საბა ბუაძეს, გრიგოლ გეგელიას და სხვა სასაცილო პერსონაჟებს პოლიტიკოსობანას ათამაშებს. ამ ბავშვებით და სალომე სამადაშვილით, 2024 წლის არჩევნებზე ბარიერთან მიახლოების რესურსი არც „ლელოს“ აქვს.

მოგვიანებით, გლობალური ომის პარტია ვიქტორ ყიფიანზე აკეთებდა აქცენტს. თუმცა, ჭკუა არ ეყოთ და შუაშისტური პლატფორმის შესაქმნელად, ბიძინა ივანიშვილის ყოფილ ადვოკატს ბაჩო ახალაიას ყოფილი მოადგილე, ნოდარ ხარშილაძე შეუწყვილეს. ყიფიანიც იმის ტიპიური ნიმუშია, თუ როგორ ხალხზე აკეთებს აქცენტს გლობალური ომის პარტია. ვიქტორ ყიფიანი ბიძინა ივანიშვილის ადვოკატი იყო, რაშიც ძალიან დიდ ანაზღაურებასაც იღებდა. თუმცა, იმდენი მოახერხა, რომ ივანიშვილის ადვოკატობას თაღლითობა და ივანიშვილის მტრებთან „დამეგობრება“ შეუთავსა. ზუსტად ასეთ ადამიანებს ეძებს გლობალური ომის პარტია, ადამიანებს, რომელთათვისაც უცხოა სინდისი. პრინციპში, სინდისი თუ გაქვს, აგენტობაზე და საკუთარი ქვეყნის წინააღმდეგ უცხო ქვეყნის სამსახურზეც ვერ მოაწერ ხელს. საბოლოოდ, გლობალურ ომის პარტიას იმედები ვერც ვიქტორ ყიფიანმა გაუმართლა და მათაც ახალი ვარიანტის ძებნა დაიწყეს.

ამ მისიისთვის ნინო ლომჯარიას შერჩევაც ზუსტად ისეთივე უხეში შეცდომაა, როგორც თავის დროზე ხაზარაძეზე, გახარიაზე და ყიფიანზე აქცენტის გაკეთება იყო. ლომჯარია ცნობილი ნაციონალია და მას შუაშისტად ვერავის შეასაღებ. იგივე შეიძლება ითქვას მისი თავმჯდომარეობით დაფუძნებული პლატფორმის წევრების უმრავლესობაზეც. მაგალითად, ნიკა მემანიშვილის პოლიტიკური ორიენტაცია საყოველთაოდ ცნობილია. დათო ტურაშვილი სუსტი ნებისყოფის კაცია და მისი გულის მოგებას დიდი რესურსი არ ჭირდება. ამიტომაა, რომ დღეს ის ფსევდოლიბერალურ აუდიტორიას კეზერაშვილის ტელევიზიიდან პოლიტიკაზე და მაღალ მატერიებზე მოძღვრავს.

ამ მხრივ, ნინო ხარატიშვილი და გია დვალი შედარებით მომგებიანი პერსონები არიან. მათი ოპოზიციური პოლიტიკური შეხედულებებიც ცნობილია, თუმცა, ჯერჯერობით ნაციონალებად არ პოზიციონირებენ. ცოტა ხანში გაირკვევა, ისინი ვერ ხვდებიან, ვინ არის ლომჯარია და რა პროცესში შედიან, თუ შეგნებულად უერთდებიან კოლექტიურ ნაცმოძრაობას. ისიც მალე გაირკვევა, არიან თუ არა ისინი დამძიმებული ვალდებულებებით. თუ ისინი ამ ნაბიჯს ვითარების არცოდნის გამო და ვალდებულებების გარეშე დგამენ, მათ ჯერ კიდევ აქვთ შანსი, იმ გზას არ დაადგნენ, რომელმაც ხაზარაძე, გახარია და ყიფიანი მძიმე მდგომარეობაში ჩააგდო. ასეც და ისეც, აგენტობაზე ხელის მოწერას და კოლექტიურ ნაცმოძრაობასთან მიერთებას არავის ვუსურვებთ“, – წერია განცხადებაში.